#Local_News
Published- 29 April2023

မွန်ပြည်နယ်၊ မုဒုံမြို့နယ်၊ ကွေ့ဝမ်းကျေးရွာ၊ ကော့ခိုက် မွန်စုအနောက်ပိုင်းတွင်ယနေ့နံနက်ကအသက် ၁၁နှစ်အရွယ် ကလေး ၁ဦးကားတိုက်ခံရ၍ သေဆုံးခဲ့ကြောင်း မုဒုံအရေးပေါ်လူမှုကယ်ဆယ်ရေးအသင်းက သိရသည်။

ဧပြီလ ၂၉ ရက် နံနက်၈ နာရီ ၅မိနစ်ခန့်တွင် စက်ဘီးစီးလာသော ကလေးငယ်ကို ဆောင်းဘောက်စ်များ တင်ဆောင်လာသော ကားမှ ကျော်တက်ခဲ့ရာတွင် ဆောင်းဘောက်စ်များနှင့် မလွတ်ဘဲတိုက်မိခဲ့ခြင်းဖြစ်ကြောင်း သိရသည်။

"စက်ဘီးစီးလာတဲ့ကလေးကို ကားက ကျော်တတ်တာမှာဘောက်စ်တွေနဲ့ မလွတ်ဘဲ ကလေးကို တိုက်မိသွားတာပါ"ယင်းအသင်း တာဝန်ရှိသူက ပြောသည်။

ယင်းကြောင့် မုဒုံအရေးပေါ် လူမှုကယ်ဆယ်ရေးအဖွဲ့ကို အကြောင်းကြားခဲ့သည့််အတွက်သွားရောက်ခဲ့ရာတွင် ကလေးမှာ ပြင်းပြင်းထန်ထန်ဒဏ်ရာများရရှိ၍ မုဒုံပြည်သူ့ဆေးရုံကြီးသို့ကူညီပို့ဆောင်ပေးခဲ့ကြောင်း၊ သို့သော်လည်း ဆေးရုံအရောက်တွင်သေဆုံးသွားခဲ့ကြောင်း သိရသည်။

သေဆုံးသွားသည့် ကလေးငယ်မှာ မုဒုံမြို့နယ်၊ နိုင်းပြိုင်ကျေးရွာ အနောက်ပိုင်း‌တွင် နေထိုင်သူ ဖြစ်ပြီး အသက် ၁၁ နှစ်အရွယ် မောင်ဝေယံမျိုး ဖြစ်ကြောင်း သိရသည်။

#ymg/pl #Local_News #မုဒုံ #ကားတိုက်ခံရ၍သေဆုံး
#YMG #Yangon-Media-Group

#World_Politics
Published 29 April 2023

ဆော်ဒီအာရေဗျနဲ့ အီရန်တို့က ယင်းတို့မြို့တော်တွေမှာ လာမယ့်ရက်ပိုင်းအတွင်း သံရုံးများအပြန်အလှန်ဖွင့်လှစ်ရန် စီစဉ်ထားကြောင်း အီရန်နိုင်ငံခြားရေးဝန်ကြီး'ဟော့စိန်အေမီရက်ဒေါ်လဟန်'က ဧပြီ ၂၈ ရက်နေ့မှာ ပြောကြားလိုက်ပါတယ်။

တရုတ်နိုင်ငံရဲ့ ကြားဝင်စေ့စပ်မှုဖြင့် ဆော်ဒီနဲ့အီရန်တို့ကြား ဆက်ဆံရေးပြန်လည်ထူထောင်မှုသဏ္ဍာန် ရုပ်လုံးပေါ်လာပြီဖြစ်ပါတယ်။

အီရန်နိုင်ငံခြားရေးဝန်ကြီးက လက်ဘနွန်မြို့တော်ဘေရွတ်မှာပြုလုပ်တဲ့ သတင်းစာရှင်းလင်းပွဲမှာ အခုလိုပြောကြားခဲ့တာဖြစ်ပါတယ်။

ဒါပေမဲ့ သံရုံးတွေ ပြန်လည်ဖွင့်လှစ်မယ့်ရက်အတိအကျကိုတော့ မပြောခဲ့ပါဘူး။

နှစ်နိုင်ငံရေးဆက်ဆံရေး ပြန်လည်ထူထောင်ရန် မတ်လ ၁၀ ရက်နေ့က သဘောတူညီခဲ့ကြပြီး ၂ လအတွင်း နှစ်နိုင်ငံမြို့တော်တွေမှာ သံရုံးများပြန်လည်ဖွင့်လှစ်သွားမယ်လို့ ပြောဆိုခဲ့ကြပါတယ်။

ဆော်ဒီက ထင်ရှားကျော်ကြားတဲ့ ဆော်ဒီရှီအာဘာသာရေးဆရာ 'ရှိတ်ခ်နီမာ'ကို ကွပ်မျက်ပြီးနောက် ၂၀၁၆ ဇန်နဝါရီကတည်းက အီရန်နဲ့ ဆော်ဒီသံရုံးတို့ဟာ နှစ်နိုင်ငံစလုံးမှာ ပိတ်ထားခဲ့ကြပါတယ်။

သံရုံးများပိတ်ရတာဟာ ယီမင်စစ်ပွဲမှာ ဆော်ဒီအာရေဗျနဲ့ အာရပ်စော်ဘွားပြည်ထောင်စုတို့ ဝင်ရောက်စွက်ဖက်မှုအပြီး ဆယ်စုနှစ်များစွာဖြစ်ပွားနေတဲ့ နှစ်နိုင်ငံကြားမတည်ငြိမ်မှုကြောင့် ဖြစ်ပါတယ်။

စွက်ဖက်မှုတွေရှိနေပေမယ့် အီရန်နဲ့မဟာမိတ် ဟူသီလှုပ်ရှားမှုက ဆော်ဒီကျောထောက်နောက်ခံပြုအစိုးရကို ဖြုတ်ချပြီး မြို့တော်ဆာနာကို သိမ်းပိုက်ခဲ့ပါတယ်။

ဆော်ဒီမြို့တွေကို လက်နက်ဆင်ဒရုန်းတွေ၊ ဒုံးကျည်တွေနဲ့တိုက်ခိုက်ခဲ့တဲ့ ဟူသီတွေကို အီရန်ကလက်နက်များ ထောက်ပံ့နေတယ်လို့ ဆော်ဒီက စွပ်စွဲခဲ့ပါတယ်။

၂၀၁၉ ခုနှစ်က အာရမ်ကိုဆီစက်ရုံတွေကို ပစ်မှတ်ထားတိုက်ခိုက်ခံရတဲ့အတွက် ဆော်ဒီက အီရန်ကိုစွပ်စွဲခဲ့ပါတယ်။

အီရန်ကတော့ အဆိုပါစွပ်စွဲချက်တွေကို ငြင်းဆိုထားပါတယ်။

သူတို့နှစ်နိုင်ငံဟာ ပြီးခဲ့တဲ့လက သံတမန်ရေးပြဿနာများအဆုံးသတ်ရန် သဘောတူခဲ့ကြပြီး တရုတ်ရဲ့စေ့စပ်မှုဖြင့် သံတမန်ရေးရာလုပ်ငန်းစဉ်များ ပြန်လည်ထူထောင်သွားမှာဖြစ်ပါတယ်။

အီရန်နဲ့ ဆော်ဒီအာရေဗျတို့မှ နိုင်ငံခြားရေးဝန်ကြီးများ ဖုန်းပြောဆိုခဲ့ကြကာ လာမယ့်ရက်များအတွင်း သံရုံးများပြန်လည်ဖွင့်လှစ်သွားဖို့ သဘောတူညီခဲ့ကြကြောင်း အေမီရက်ဒေါ်လာဟန်က ပြောကြားခဲ့ပါတယ်။

Source: WION #World_Politics #ဆော်ဒီအာရေဗျ #အီရန်မြို့တော် #နှစ်နိုင်ငံသံရုံး
#YMG #Yangon_Media_Group

#Local_News
Published_ 29 April 2023

ဗိုလ်တထောင်ကျိုက်ဒေးအပ်ဆံတော်ဦးစေတီတော်တွင် မေလ(၃)ရက်ကဆုန်လပြည့်( ဗုဒ္ဓနေ့)၌ ကဆုန်ညောင်ရေသွန်းလောင်း ပူဇော်ပွဲကျင်းပသွားမည်ဖြစ်ကြောင်း သိရသည်၊၊

(၅၂) ကြိမ်မြောက် ကဆုန်ညောင်ရေသွန်းလောင်းပူဇော်ပွဲကို ဗိုလ်တထောင်ကျိုက်ဒေးအပ်ဆံတော်ဦးစေတီတော် ဘဏ္ဍာတော်ထိန်းဂေါပကအဖွဲ့မှကြီးမှူးကျင်းပသွားမည် ဖြစ်သည်၊၊

ဘုရားဖူးလာပြည်သူများအနေဖြင့် ဗိုလ်တထောင်စေတီတော်ရှိ"မဟာဗောဓိ" ညောင်ပင်တွင် အမွှေးနံ့သာရေများဖြင့် ညောင်ရေသွန်းလောင်းပူဇော်ရန်အတွက် ဗုဒ္ဓဝေယျာဝစ္စအသင်းများနှင့် ဝန်ထမ်းများမှ ကုသိုလ်ယူဆောင်ရွက်ပေးခြင်း၊ အလှူရှင်များမှ စတုဒီသာများ ကျွေးမွေးလှူဒါန်းမည်ဖြစ်ပါသဖြင့် ရဟန်းရှင်လူပြည်သူအများ ပါဝင်ကုသိုလ်ပြုနိုင်ပါကြောင်း နှိုးဆော်ထားကြောင်း သိရသည်၊၊

#ymg/tthl #Local_News #ဗိုလ်တထောင်စေတီတော် #ကဆုန်ညောင်ရေသွန်းလောင်း
#YMG #Yangon_Media_Group

#Local_News
Published-29 April 2023

ရွှေဘို-မန္တလေးလမ်း လှတောကျေးရွာ မန္တ‌‌လေးအထွက်ကွေ့တွင်‌ စပါးခွံသယ်ဆောင်လာသည့်ကုန်တင်ယာဉ်နှင့် ပခုက္ကူချောင်းပြားရွာမှ ခရီးသည်တင်ယာဉ်တို့ မျက်နှာချင်းဆိုင်တိုက်မိ၍ လူ ၂ ဦးသေဆုံးကာ ၅ ဦးဒဏ်ရာရရှိခဲ့ကြောင်း မြန်မာနိုင်ငံလူမှုကယ်ဆယ်ရေးအဖွဲ့ (ရွှေဘို)မှ သိရသည်။

ဧပြီလ ၂၈ ရက်ညနေ ၆နာရီဝန်းကျင်ခန့်က ရွှေဘို-မန္တလေးလမ်း လှတောကျေးရွာမန္တ‌‌လေးအထွက်ကွေ့တွင်‌ စပါးခွံသယ်ဆောင်လာသည့် ကုန်တင်ယာဉ်နှင့် ပခုက္ကူချောင်းပြားရွာမှခရီးသည်တင်ယာဉ်တို မျက်နှာချင်းဆိုင်တိုက်မိ၍ ခရီးသည်တင်ယာဉ်တွင်လိုက်ပါလာသူ ၉ ဦးအနက် ၂ ဦး သေဆုံးခဲ့ပြီး ၅ ဦးဒဏ်ရာရရှိခဲ့ကြောင်း သိရသည်။

ယာဉ်မတော်တဆမှုဖြစ်စဉ်တွင် အမျိုးသား ၂ ဦး၊ အမျိုးသမီး ၃ ဦးဖြစ်ပြီး ကျန်အမျိုးသား ၁ ဦးနှင့် အမျိုးသမီး ၁ ဦးမှာ လိုအပ်သည့် ရှေးဦးသူနာပြုကုသပေး၍ တောင်ကြားကျေးရွာနေအိမ်သို့ ဆက်သွယ်ခေါ်ယူပေးခဲ့ကြောင်း သိရသည်။

အဆိုပါခရီးသည်တင်ယာဉ်မှာ ဖားကန့်ခရီးစဉ်ပြေးဆွဲသည့်ကားဖြစ်ကြောင်းသိရသည်။

ယာဉ်မတော်တဆဖြစ်ရာနေရာသို့ လှတောရဲစခန်းတပ်ဖွဲ့ဝင်များနှင့် လှတောစေတနာပရဟိတအသင်းမှ အခင်းဖြစ်ရာနေရာသို့ ချက်ချင်းသွားရောက်ကူညီပေးခဲ့ပြီး ခရီးသွား ၁ ဦးရဲ့ ဖုန်းဆက်အကူအညီတောင်းခံချက်အရ မြန်မာနိုင်ငံလူမှုကယ်ဆယ်ရေးအဖွဲ့(ရွှေဘိုခရိုင်-Rescue)မှနာယကဆရာတော်ဘုရားမှ ဦးစီး၍ အရေးပေါ်လူနာတင်ယာဉ်(၂)စီးဖြင့် အခင်းဖြစ်ပွားရာသို့ထွက်ခွာကူညီခဲ့ကြောင်း သိရသည်။

#ymg/pl #Local_News #ရွှေဘို-မန္တလေး #ကုန်တင်ယာဉ် #ခရီးသည်တင်ယာဉ်
#YMG #Yangon-Media-Group

#Local_News
Published_ 29 April 2023

သရုပ်ဆောင်ဦးဝင်းနိုင်(အနုပညာ)သည် ဧပြီလ(၂၉) ရက်မနက်(၆)နာရီ(၃၀)မိနစ်တွင် လူကြီးရောဂါဖြင့် ကွယ်လွန်သွားကြောင်း မြန်မာနိုင်ငံရုပ်ရှင်အစည်းအရုံးမှ သိရသည်၊၊

ကွယ်လွန်ချိန်တွင် အသက်(၇၄)နှစ်ရှိပြီဖြစ်ပြီး ပုလဲမြို့ဆည်းဆာရိပ်ဘိုးဘွားရိပ်သာ၌ ကွယ်လွန်ခဲ့ပြီးဧပြီလ ၂၉ ရက် ညနေတွင်နေ့ချင်းသဂြိုဟ်သွားမည်ဟု မြန်မာနိုင်ငံရုပ်ရှင်အစည်း အရုံးဒုဥက္ကဌ ဦးအေးကြူလေးက YMG ကို ပြောသည်၊၊

သရုပ်ဆောင်ဦးဝင်းနိုင်(အနုပညာ)သည် လူကြီးရောဂါဖြင့် ကွယ်လွန်သွားခြင်းဖြစ်ပြီး အနုပညာရှင်များဆုံးရှုံးရ၍ ဝမ်းနည်းကြေကွဲရသည်ဟု မြန်မာနိုင်ငံရုပ်ရှင်အစည်းအရုံး နာယကဦးနှင်းမိုးက ပြောသည်၊၊

#ymg/tthl #Local_News #သရုပ်ဆောင်ဦးဝင်းနိုင်(အနုပညာ) #နေ့ချင်းသဂြိုဟ်
#YMG #Yangon_Media_Group

#Local_News
Published_ 29 April 2023

ပဲခူးမြစ်ကူး၊ သန်လျင်တံတား အမှတ် (၃) တည်ဆောက်ရေးလုပ်ငန်း ၇၆ ရာခိုင်နှုန်းပြီးစီးနေပြီး ၂၀၂၄ ခုနှစ်တွင် လုပ်ငန်းများပြီးစီးရေးလျာထား ဆောင်ရွက်လျက်ရှိကြောင်း သိရပါတယ်။

ဆောက်လုပ်ရေးဝန်ကြီးဌာန ဝန်ကြီးဦးမျိုးသန့်သည် ညွှန်ကြားရေးမှူးချုပ်များနှင့်အတူ ယနေ့တွင် ရန်ကုန်တိုင်းဒေသကြီး သာကေတမြို့နယ်နှင့် သန်လျင်မြို့နယ်တို့ကို ဆက်သွယ်သည့် ပဲခူးမြစ်ကူး၊ သန်လျင်တံတား အမှတ် (၃) တည်ဆောက်ရေးလုပ်ငန်းများ ဆောင်ရွက်နေမှုကို ကြည့်ရှုစစ်ဆေးခဲ့ပါတယ်။

ဝန်ကြီးနှင့်အဖွဲ့သည် ပဲခူးမြစ်အား စက်လှေများဖြင့် ဖြတ်သန်း၍ Cable Stay Main Tower အမှတ် (၁) ဖြစ်သော ရေလယ်တိုင် P11 ပေါ်သို့ တက်ရောက်စစ်ဆေးပြီး Main Tower အမှတ်(၂) P12 တွင် Pier Head များ ဆောင်ရွက်ပြီးစီးမှု၊ P16,P17,P18,P19 နှင့် P20 တို့တွင် လွန်းထိုးခြင်း(Launching) နည်းပညာကို အသုံးပြု၍ P.C Box Girder များ တပ်ဆင်နေမှုတို့ကို စစ်ဆေးကာ လုပ်ငန်းလိုအပ်ချက်များ၊ ရေလမ်းကြောင်း အန္တရာယ်ကင်းရှင်းရေးနှင့် လုပ်ငန်းခွင်အန္တရာယ်ကင်းရှင်းဖို့ မှာကြားပါတယ်။

ယင်းနောက် သာကေတဘက်ခြမ်းလုပ်ငန်းခွင်ရှင်းလင်းဆောင်၌ တံတားဦးစီးဌာနမှ ဒုတိယညွှန်ကြားရေးမှူးချုပ်(စီမံရေး) ဦးကျော်ကောင်းချိုက တံတားဆိုင်ရာ အချက်အလက်များ၊ တံတားကြီးပြီးစီးပါက ရရှိလာမည့်အကျိုးကျေးဇူးများ၊ လုပ်ငန်းများ ဆောင်ရွက်ပြီးစီးမှု၊ ဆောင်ရွက်နေမှုနှင့် ဆက်လက်ဆောင်ရွက်ရန် လုပ်ငန်းအစီအစဉ်များ ကိုရှင်းလင်းတင်ပြရာ ညွှန်ကြားရေးမှူးချုပ်ဦးခင်မောင်ဆွေကဖြည့်စွက် ရှင်းလင်းပါတယ်။

တည်ဆောက်ရေးလုပ်ငန်းများ အရည်အသွေးကောင်းမွန်ရေးသည် အဓိကတာဝန်ဖြစ်ကြောင်း၊ လူ့စွမ်းအားအရင်းအမြစ် ဖွံ့ဖြိုးတိုးတက်ရေးအတွက် မျိုးဆက်သစ် အင်ဂျင်နီယာများ မွေးထုတ်ပြုစုပျိုးထောင်ပေးရန်လိုကြောင်း၊ တည်ဆောက်ရေးအပိုင်းတွင် အဓိကကျသည့် ဒီဇိုင်းပညာရပ်များကိုဌာနရှိ ဝန်ထမ်းဖြင့် တိုးတက်အောင်ဆောင်ရွက်ဖို့ဝန်ကြီးက တိုက်တွန်းပြောကြားခဲ့ပါတယ်။

ပဲခူးမြစ်ကူး၊ သန်လျင်တံတားအမှတ် (၃) တည်ဆောက်ရေး လုပ်ငန်းများကို ၂၀၁၉ ခုနှစ် မေလတွင် စတင်ဆောင်ရွက်ခဲ့တာဖြစ်ပြီး တည်ဆောက်ပြီးစီးပါက ရန်ကုန်မှ သန်လျင်သို့ အချိန်တိုအတွင်း အလွယ်တကူ ဆက်သွယ်သွားလာနိုင်ပြီး ယာဉ်ကြောပိတ်ဆို့မှုလည်း လျော့နည်း သက်သာလာမှာ ဖြစ်ပါတယ်။

#ygm_mnn #Local_News #သန်လျင်တံတား အမှတ် (၃) #၇၆ ရာခိုင်နှုန်းပြီးစီး
#YMG #Yangon_Media_Group

#Local_News
Published_ 29 April 2023

ရန်ကုန်တိုင်းဒေသကြီး သာကေတမြို့နယ် ရှုခင်းသာလမ်းမကြီး waterboom မှတ်တိုင် အနီးမှာ ဧပြီလ ၂၈ ရက်နေ့ ည ၁၁ နာရီကျော်ခန့်က ယာဉ်တိုက်မှုဖြစ်ပွားခဲ့ပြီး ယာဉ်ပေါ်ပါ အမျိုးသမီးတစ်ဦး နေရာမှာပင်သေဆုံးခဲ့ကြောင်း သာကေတမြို့နယ် လူမှုကယ်ဆယ်ရေးအသင်းမှ သိရသည်။

ယာဉ်တိုက်မှုကြောင့် ယာဉ်ပေါ်တွင် အသက် ၃၀ ၀န်းကျင်အမျိုးသား ၃ ဦး နှင့် အမျိုးသမီး၂ ဦးပါဝင်ပြီး ယာဉ်နှင့်လူညှပ်နေသည့်အတွက် ပြည်သူများနှင့် အရပ်ဖက်အဖွဲ့အစည်းများ၊ မီးသတ်တပ်ဖွဲဝင်များပူးပေါင်းကာ မိနစ် ၃၀ခန့် ကူညီကယ်ဆယ်ခဲ့ရကြောင်း သိရသည်။

အဆိုပါယာဉ်တိုက်မှုကြောင့် ထိခိုက်ဒဏ်ရာရှိသူများကို မြေပြင်ကုသမှုပေးပြီးအသက်(၃၀)ဝန်းကျင်ခန့် အမျိုးသမီး-၁ဦး(သေဆုံး) နှင့် ထိခိုက်ဒါဏ်ရာရ လူနာများအား ရှုခင်းသာလူမှုကူညီရေးအသင်း၊ မဟော်သဓာလူမှုကူညီရေးအသင်း၊ သစ္စာမဏ္ဍိုင်လူမှုကူညီရေးအသင်း(မိတ်ဖက်)၊ အာရောဂျသုခလူမှုကူညီရေးအသင်း(မိတ်ဖက်)၊ Happy လူမှုကယ်ဆယ်ရေးအသင်းကားတို့ဖြင့် ရန်ကုန်ပြည်သူ့ဆေးရုံကြီးသို့ ပို့ဆောင်ကူညီပေးခဲ့ကြောင်း သိရသည်။

#ymg/ynzw #Local_News #သာတေတမြို့နယ် #ရှုခင်းသာပတ်လမ်း #အမျိုးသမီးတစ်ဦးသေဆုံး #YMG #Yangon-Media-Group

#Local_News
Published_ 29 April 2023

နစကဒုတိယဥက္ကဋ္ဌ ဒုတိယဝန်ကြီးချုပ် ဒုတိယဗိုလ်ချုပ်မှူးကြီး စိုးဝင်းသည် မြန်မာနိုင်ငံဆိုင်ရာ တရုတ်နိုင်ငံ သံအမတ်ကြီး H.E.Mr. Chen Hai နှင့် မြန်မာ-တရုတ် နှစ်နိုင်ငံကဏ္ဍပေါင်းစုံ ပူးပေါင်းဆောင်ရွက်မှု တိုးမြှင့်ရေးဆိုင်ရာကိစ္စရပ် များကို ရင်းနှီးပွင့်လင်းစွာ ဆွေးနွေးခဲ့ကြောင်း သိရပါတယ်။

ဧပြီလ ၂၈ ရက် မွန်းလွဲပိုင်းတွင် နေပြည်တော်ရှိ နစကဥက္ကဋ္ဌရုံး သံတမန်ဆောင်ဧည့်ခန်းမ၌ လက်ခံတွေ့ ဆုံစဉ် ဆွေးနွေးခဲ့တာဖြစ်ပါတယ်။

ထိုသိုတွေ့ဆုံစဉ် ကျောက်ဖြူအထူးစီးပွားရေးဇုန်ဆိုင်ရာကိစ္စများ၊ နယ်စပ်ဒေသ သတင်းအချက်အလက်များ အပြန်အလှန်ဖလှယ်၍ နှစ်နိုင်ငံနယ်စပ်ဒေသများတွင် တည်ငြိမ်အေးချမ်းရေး၊ မူးယစ်ဆေးဝါး၊ တရားမဝင်လောင်းကစားမှု၊ အွန်လိုင်းဂိမ်းနှင့် လူကုန်ကူးမှုများ တိုက်ဖျက်ရေးတိုကို တိုးမြှင့်ဆောင်ရွက်သွားမည့် အခြေအနေများကို ဆွေးနွေးကြပါတယ်။

တွေ့ဆုံပွဲသို နစကဒုတိယဥက္ကဋ္ဌ ဒုတိယဝန်ကြီးချုပ်နှင့်အတူ စီးပွားရေးနှင့် ကူးသန်းရောင်းဝယ်ရေးဝန်ကြီးဌာနဝန်ကြီး ဦးအောင်နိုင်ဦး၊ နိုင်ငံခြားရေးဝန်ကြီးဌာန ဒုတိယဝန်ကြီး ဦးကျော်မျိုးထွဋ်နှင့် တာဝန်ရှိသူများ တက်ရောက်ကြပြီး တရုတ်ပြည်နိုင်ငံ သံအမတ်ကြီးနှင့်အတူ စီးပွားရေးသံမှူး Mr. Tab Shufu နှင့် တာဝန်ရှိသူများ တက်ရောက်ခဲ့ကြပါတယ်။

ygm_mnn #Local_News #မြန်မာ-တရုတ် #တရုတ်သံအမတ်ကြီး
#Yangon_Media_Group

#World_Health
Published 29 April 2023

၁၈၈၁ ခုနှစ်က ဆိုရှယ်လစ်ဝါဒီထွန်းကားလာချိန်မှာ လက်ဝဲဝါဒီလူထုကို နှစ်သိမ့်ကျေနပ်စေရန် ကွန်ဆာဗေးတစ်ဂျာမနီအကြီးအကဲ 'အော့တိုဗွန်ဘစ်မာ့ခ်'က အမျိုးသားရေးပင်စင်ယူခွင့်ကို အဆိုပြုခဲ့ပါတယ်။

ပင်စင်စားအရွယ်ကို အသက် ၇၀ လို့သတ်မှတ်ခဲ့ရာ ထိုအချိန်က ပျမ်းမျှမျှော်မှန်းသက်တမ်းက ၄၀ နှစ်ဖြစ်ပါတယ်။

မူဝါဒချမှတ်ပြီးနောက်မှာ ဗွန်ဘစ်မာ့ခ်က ရာထူးမှနှုတ်ထွက်ခဲ့ပေမယ့် သူ့မူဝါဒကအသက်ဝင်ခဲ့ပါတယ်။

၁၉၁၆ ခုနှစ်မှာ ဂျာမနီနိုင်ငံရဲ့ အငြိမ်းစားခံစားခွင့်ကို အသက် ၆၅ နှစ်သို့လျှော့ချခဲ့ကာ အခြားနိုင်ငံများစွာအတွက် စံနမူနာဖြစ်လာပါတယ်။

၁၉၃၅ ခုနှစ်တုန်းက အမေရိကန်မှာ နိုင်ငံတော်ပင်စင်အငြိမ်းစားအသက်အရွယ်ကို ၆၅ နှစ်သတ်မှတ်ခဲ့ပေမယ့် အမေရိကန်လူမျိုး ၆၀ ရာခိုင်နှုန်းအောက်ကသာ ထိုအသက်အရွယ်အထိ အသက်ရှင်နေထိုင်ခဲ့ကြပါတယ်။

အခုခေတ်မှာတော့ လူသားတွေဟာ ပိုမိုအသက်ရှည်လာကြပြီး ပင်စင်စားလို့ရတဲ့အရွယ်အထိ နေထိုင်လာနိုင်ပါတယ်။

အငြိမ်းစားအရွယ် ၆၂ နှစ်နဲ့ ပျမ်းမျှမျှော်မှန်းသက်တမ်း ၈၂ နှစ်ရှိတဲ့ ပြင်သစ်လိုနိုင်ငံအပါအဝင် နိုင်ငံအများအပြားမှာ သက်ကြီးရွယ်အိုတွေရဲ့ စီးပွားရေးဖိအားတွေပြေလည်စေရန်အကြောင်းနဲ့ နိုင်ငံတော်ပင်စင်ခံစားခွင့်က ရေရှည်မထောက်ပံ့နိုင်တဲ့အကြောင်းတွေ အငြင်းပွားခဲ့ကြပါတယ်။

စီးပွားရေးအရကြည့်ရင် အသက်အရွယ်နောက်ပိုင်းမှ အငြိမ်းစားယူတာဟာ လူတိုင်းရဲ့အခြေခံနေထိုင်ရေးအတွက် အကျိုးရှိစေပေမယ့် စိတ်ပိုင်းဆိုင်ရာနဲ့ ရုပ်ပိုင်းဆိုင်ရာသက်ရောက်မှုတွေကိုလည်း ကျွမ်းကျင်သူများက သုံးသပ်ခဲ့ကြပါတယ်။

ပျမ်းမျှအလုပ်လုပ်ကိုင်နိုင်တဲ့အရွယ်ကို လူတွေကျန်းမာစွာနေထိုင်နိုင်ပြီး သန်စွမ်းကြံ့ခိုင်နေတဲ့ နှစ်တွေအတိုင်း သတ်မှတ်သင့်ပါတယ်။

အသက် ၅၀ အရွယ်မှာ ကျန်းမာနေတဲ့ အမေရိကန်လူမျိုးတွေဟာ ကြံ့ခိုင်သန်စွမ်းနေတဲ့အချိန် ၂၃ နှစ်ခန့်ရှိကာ မသန်စွမ်းတော့တဲ့အချိန်ကတော့ ၈ နှစ်လောက်ရှိပြီး ပျမ်းမျှအလုပ်လုပ်ကိုင်နိုင်တဲ့အရွယ်က အသက် ၇၃ နှစ်ဖြစ်တယ်လို့ ဘော့စ်တွန်ကောလိပ် အငြိမ်းစားသုတေသီစင်တာမှ သုတေသနစီးပွားရေးပညာရှင်'ဂဲလ်ဝက်စတိုင်း'က အကြံပြုထားပါတယ်။

ဆေးပညာပိုင်းဆိုင်ရာ အပြောင်းအလဲအပြင် အလုပ်ရဲ့သဘောသဘာဝကလည်း ပြောင်းလဲလာကာ ၂၀၂၀ ခုနှစ်မှာ အမေရိကန်အလုပ်သမားဦးရေ ၄၅ ရာခိုင်နှုန်းက အသိပညာနဲ့ဆိုင်တဲ့ စီမံခန့်ခွဲမှု၊ စီးပွားရေးနဲ့ဘဏ္ဍာရေး၊ ပညာရေး၊ ကျန်းမာရေးကဏ္ဍတို့မှာ လုပ်ကိုင်ကြပါတယ်။

အသိပညာပိုင်းဆိုင်ရာ လုပ်ငန်းတွေမှဝန်ထမ်းများအနေဖြင့် အသိဉာဏ်ရှုထောင့်ကနေ ကြည့်မယ်ဆိုရင် အငြိမ်းစားအရွယ်က အသက် ၇၀ ဆိုတာ အကြောင်းသင့်ကြောင်း ဂျော်ဂျီယာတက္ကသိုလ်မှ ညွှန်ကြားရေးမှူး 'လီဆာရန်ဇီဟမ်မွန်'က ပြောကြားလိုက်ပါတယ်။

ဝန်ထမ်းတွေရဲ့ လုပ်ကိုင်နိုင်စွမ်းပေါ်မှာသာ ပင်စင်စားအသက်ကိုတွက်မယ်ဆိုရင် အသက် ၆၀ ဖြစ်စရာအကြောင်းမရှိပါဘူးလို့ ဆိုပါတယ်။

အချို့လူတွေက အသက် ၈၀ အထိ ဆက်လက်လုပ်ကိုင်နိုင်ပေမယ့် အချို့အလုပ်တွေကတော့ ရုပ်ပိုင်းဆိုင်ရာအားစိုက်မှု ပိုမိုလိုအပ်တာမျိုးရှိပါတယ်။

ဒီလိုဝန်ထမ်းတွေဆိုရင် အသက် ၆၀ ဝန်းကျင်မှာ အနားယူသင့်ပြီဖြစ်ပါတယ်။

ဒါကြောင့် ပင်စင်စားအသက်အရွယ်မြှင့်တင်သတ်မှတ်ဖို့ရာ တစ်ဦးနဲ့တစ်ဦး သက်ရောက်ပုံမတူတာကြောင့် စိတ်ထဲသိရှိဖို့သာလိုအပ်ပါတယ်။

Source: CNA #World_Health #ကျန်းမာရေးရှုထောင့် #အငြိမ်းစားယူသင့်လဲ
#YMG #Yangon_Media_Group

Published_ 28April 2023

နစက ဥက္ကဋ္ဌ၊နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်ဟာ  ရုရှား-မြန်မာ ချစ်ကြည်ရေးနှင့်ပူးပေါင်းဆောင်ရွက်ရေးအသင်း ဒုတိယဥက္ကဋ္ဌ Mr. Anatoly Bulochnikov ဦးဆောင်သောကိုယ်စားလှယ်အဖွဲ့နှင့် ဧပြီ ၂၉ရက်က နေပြည်တော်ရှိ နစကဥက္ကဋ္ဌရုံး၊ ဧည့်ခန်းမ၌ တွေ့ဆုံပြီး နှစ်နိုင်ငံပူးပေါင်းဆောင်ရွက်မှုပိုမိုတိုးတက်ကောင်းမွန်လာတဲ့အခြေအနေတွေနှင့် ဆက်လက်ဆောင်ရွက်နိုင်မယ့် ကိစ္စတွေကို ဆွေးနွေးခဲ့ကြတယ်လို့ နစကရဲ့သတင်းထုတ်ပြန်ချက်အရသိရပါတယ်။

မြန်မာနိုင်ငံသို့ရောက်ရှိနေတဲ့ ရုရှား-မြန်မာ ချစ်ကြည်ရေးနှင့်ပူးပေါင်းဆောင်ရွက်ရေးအသင်း ဒုတိယဥက္ကဋ္ဌ Mr. Anatoly Bulochnikov ဦးဆောင်သောကိုယ်စားလှယ်အဖွဲ့က ဧပြီ၂၈ ရက်က  နေပြည်တော်တွင် နစက ဥက္ကဋ္ဌထံလာရောက် ဂါရဝပြုတွေ့ဆုံစဉ်ဆွေးနွေးခဲ့ကြတာဖြစ်ပါတယ်။

ထိုသို့တွေ့ဆုံရာတွင် မြန်မာ-ရုရှား နှစ်နိုင်ငံချစ်ကြည်ရင်းနှီးမှု၊ ပူးပေါင်းဆောင်ရွက်မှုများနှင့် ကဏ္ဍစုံတွင်ပူးပေါင်းဆောင်ရွက်မှုများ ပိုမိုတိုးတက်ကောင်းမွန်လာမှုအခြေအနေများ၊ ရေအားလျှပ်စစ်ဓာတ်အားထုတ်လုပ်ရေး စီမံကိန်းများတွင် ပူးပေါင်းဆောင်ရွက်သွားမည့်အခြေအနေများ၊ စိုက်ပျိုးရေးလုပ်ငန်းများ ဖွံ့ဖြိုးတိုးတက်ရေးပူးပေါင်းဆောင်ရွက်သွားမည့် အခြေအနေများ၊ နှစ်နိုင်ငံအကြားခရီးသွားလုပ်ငန်းများဖွံ့ဖြိုးတိုးတက်ရေး ဆက်လက်ဆောင်ရွက်သွားမည့် အခြေအနေများ၊ နှစ်နိုင်ငံအကြားယဉ်ကျေးမှုဖလှယ်ရေးဆိုင်ရာကိစ္စရပ်များ၊ နှစ်နိုင်ငံဆက်ဆံမှုများ တိုးတက်စေရေးအတွက်ရုရှားနိုင်ငံ၌ မြန်မာနိုင်ငံကောင်စစ်ဝန်ရုံးများ တည်ဆောက်လျက်ရှိမှု၊ နှစ်နိုင်ငံအကြားကူးလူးဆက်ဆံမှုများ တိုးမြှင့်ရေးနှင့် နှစ်နိုင်ငံကုန်သွယ်မှုလုပ်ငန်းများယခုထက် ပိုမိုတိုးတက်အောင် ဆက်လက်ဆောင်ရွက်သွားမည့်အခြေအနေများနှင့်ပညာ ရေးဆိုင်ရာပူးပေါင်းဆောင်ရွက်မှုများ မြှင့်တင်ရေးတို့နှင့် ပတ်သက်၍ ရင်းရင်းနှီးနှီး ဆွေးနွေးခဲ့ကြတယ်လို့ သတင်းထုတ်ပြန်ချက်မှာဖော်ပြထားပါတယ်။

အဆိုပါတွေ့ဆုံပွဲသို့ ဗိုလ်ချူပ်မှူးကြီးနှင့် အတူ ကောင်စီတွဲဖက်အတွင်းရေးမှူး ဒုတိယဗိုလ်ချုပ်ကြီး ရဲဝင်းဦး ပြည်ထောင်စုဝန်ကြီးများဖြစ်ကြတဲ့ ဒေါက်တာကံဇော်၊ ဦးကိုကိုလှိုင်၊ ဦးအောင်သော်နှင့်တာဝန်ရှိသူများနှင့် ရုရှား-မြန်မာ ချစ်ကြည်ရေးနှင့် ပူးပေါင်းဆောင်ရွက်ရေးအသင်း ဒုတိယဥက္ကဋ္ဌနှင့်အတူ အဆိုပါကိုယ်စားလှယ်အဖွဲ့မှ တာဝန်ရှိသူများတက်ရောက်ခဲ့ကြတာဖြစ်ပါတယ်။

#ymg/knl

#ရုရှား-မြန်မာချစ်ကြည်ရေးအသင်း

#ဗိုလ်ချူပ်မှူးကြီးမင်းအောင်လှိုင်

#မြန်မာ-ရုရှားဆက်ဆံရေး

Published_ 28 April 2023

  နိုင်ငံတော်သံဃမဟာနာယကအဖွဲဥက္ကဋ္ဌ ဒေါက်တာဘဒ္ဒန္တကုမာရာဘိဝံသ ဗန်းမော် ကျောင်းတိုက်ဆရာတော်ကြီး၏ ကျန်းမာရေးအခြေအနေမှာ တိုးတက်ကောင်းမွန်လျက် ရှိရာ မူလသီတင်းသုံးတော်မူရာကျောင်း၌ ပြန်လည်သီတင်းသုံးသွားမည်ဖြစ်ကြောင်း သိရပါတယ်။

မန္တလေးအထွေထွေရောဂါကုဆေးရုံကြီးရှိ မန်းတောင်ရိပ် အထွေထွေရောဂါကုသ ဆောင်တွင် ကျန်းမာရေးစောင့်ရှောက်မှုများ ခံယူသီတင်းသုံးတော်မူနေသည့် ဗန်းမော် ကျောင်းတိုက်ဆရာတော်ကြီး၏ ကျန်းမာရေးတိုးတက်ကောင်းမွန်နေမှု အခြေအနေအား မန္တလေးတိုင်း ဒေသကြီးအစိုးရအဖွဲ့ ဝန်ကြီးချုပ်ဦးမျိုးအောင်နှင့်တာဝန်ရှိသူများက ဧပြီ ၂၈ ရက် နံနက်ပိုင်းက သွားရောက်ဖူးမြော်ကြည့်ရှုခဲ့ကြပါတယ်။

မန္တလေးအထွေထွေရောဂါကုဆေးရုံအုပ်ကြီး ဒေါက်တာသက်အောင်နှင့် အထူးကု ဆရာဝန်ကြီးများက ဆရာတော်ကြီး၏ ကျန်းမာရေးတိုးတက်ကောင်းမွန်နေသည့် အခြေအနေများ၊ အနီးကပ်ကြီးကြပ်ကာ စနစ်တကျဆောင်ရွက်ကုသပေးနေမှုများနှင့် ဆက်လက်ဆောင်ရွက်သွားမည့်အစီအစဉ်များကို တိုင်းဒေသကြီးအစိုးရအဖွဲ ဝန်ကြီးချုပ် နှင့်အဖွဲအား ရှင်းလင်းတင်ပြကြပါတယ်။

ဝန်ကြီးချုပ်က ဆရာတော်ကြီး၏ ကျန်းမာရေးအခြေအနေကောင်းမွန်၍ မူလ သီတင်း သုံးရာကျောင်းတွင် ပြန်လည်သီတင်းသုံးသည့်အခါ ကျန်းမာရေး အခြေအနေ များကို အစဉ်မပြတ်အနီးကပ်စောင့်ကြည့်၍ ကျန်းမာရေး စောင့်ရှောက်မှု ပေးခြင်းများကို အထူးဂရုစိုက် ဆောင်ရွက်သွားကြဖို့ မှာကြားခဲ့ပါတယ်။

ယခုအခါ ဆရာတော်ကြီးမှာ သက်တော်(၉၄)နှစ်၊ သိက္ခာ(၇၄)ဝါရှိပြီး မန်းတောင်ရိပ် အထွေထွေရောဂါကုသဆောင်(၉ထပ်ဆေးကုသဆောင်) (၅)ထပ်ရှိ အထူးသီးသန့်ခန်းတွင် လိုအပ်သော ကျန်းမာရေးစောင့်ရှောက်မှုများကို အထူးကုဆရာဝန်ကြီးများက အနီးကပ်ကြီးကြပ် ဆောင်ရွက်ပေးလျက်ရှိကြောင်း သတင်းရရှိပါတယ်။

ygm_mnn

#ဗန်းမော်ဆရာတော်ဘုရား

#Yangon_Media_Group

#Local_News
Published_ 28 April 2023

မြန်မာနိုင်ငံတော်ဗဟိုဘဏ်နှင့် အထူးစုံစမ်းစစ်ဆေးရေး ဦးစီးဌာနက ရန်ကုန်တိုင်းရွှေအသင်းနဲ့အစည်းဝေးပြုလုပ်ပြီး ရွှေဈေးနှုန်းကို ၂၉သိန်းအောက်မှာသာ အရောင်းအဝယ်ပြုလုပ်ဖို့ညွှန်ကြားခဲ့ကြောင်း ရန်ကုန်တိုင်းရွှေအသင်းဥက္ကဌ ဦးမျိုးမြင့်က ပြောပါတယ်။

#Local_News #ရွှေဈေး၂၉ သိန်း #အရောင်းအဝယ် #စသုံးလုံးဌာန
#YMG #Yangon_Media_Group