Published 30 December 2023

အမေရိကန်ဟာ ပုံမှန်လွှတ်တော်သုံးသပ်ချက် လျှော့ပေါ့ရေး အရေးပေါ် အခြေအနေတစ်ရပ်အဖြစ် ဒေါ်လာ ၁၄၇.၅ သန်းတန်ကြေးရှိ ပေါက်ကွဲအားပြင်းတဲ့ ၁၅၅ မီလီမီတာ အမြောက်ကျည်များနဲ့ ဆက်စပ်ပစ္စည်းများ အစ္စရေးလ်သို့ ရောင်းချခြင်းကို အတည်ပြုရန် ဒီဇင်ဘာ ၂၉ ရက်နေ့က ကြေညာလိုက်ပါတယ်။

ဂါဇာမှာ ဟားမတ်စ်တို့နဲ့ စစ်ဖြစ်နေတဲ့ အစ္စရေးလ်တို့အတွက် ၁၂၀ မီလီမီတာ တင့်ကားကျည် ၁၄,၀၀၀ နီးပါးရောင်းချခြင်းကိုလည်း အတည်ပြုရန် ယခုလအစောပိုင်းက ဆောင်ရွက်ခဲ့ပါတယ်။

အစ္စရေးလ်တို့က ယခင်စစ်လက်နက် ရောင်းချခြင်းအပြင် ၁၅၅ မီလီမီတာ လက်နက်ခဲယမ်းများပါ ရောင်းချပေးရန် တောင်းဆိုခဲ့ရာ စုစုပေါင်းခန့်မှန်း ကုန်ကျစရိတ်က ဒေါ်လာ ၉၆.၅၁ သန်းကနေ ၁၄၇.၅ သန်းအထိ များပြားလာကြောင်း အမေရိကန် ကာကွယ်ရေးနဲ့ လုံခြုံရေးပူးပေါင်းအေဂျင်စီက ထုတ်ပြန်ကြေညာလိုက်ပါတယ်။

နိုင်ငံခြားရေးဝန်ကြီးဌာနမှ ကြေညာချက်အရ ကွန်ဂရက်မှ သာမန်အတိုင်း ပြန်လည်သုံးသပ်မှုတွေ လျှော့ပေါ့ပေးရမယ့်် အရေးပေါ်အခြေအနေဖြင့် အစ္စရေးလ်အစိုးရသို့ ချက်ချင်းရောင်းချရန် ဆုံးဖြတ်လိုက်ကြောင်း၊ လက်နက်ခဲယမ်းတွေက အမေရိကန်စစ်တပ် လက်နက်တိုက်မှ ပစ္စည်းဖြစ်ကြောင်း သိရပါတယ်။

မြင့်မားလာမယ့် စစ်ရေးစွမ်းရည်ဖြင့် အစ္စရေးလ်ဟာ ဒေသတွင်း ခြိမ်းခြောက်မှုကို ချေဖျက်ပြီး အမိမြေကာကွယ်ရေးကို တိုးမြှင့်ဆောင်ရွက်လာနိုင်မှာ ဖြစ်ကြောင်း ကြေညာထားပါတယ်။

အောက်တိုဘာ ၇ ရက်နေ့က ပါလက်စ်တိုင်း စစ်သွေးကြွဟားမတ်စ်အဖွဲ့ဟာ နယ်စပ်ဖြတ်ကျော်ပြီး အစ္စရေးလ်ကို ဝင်ရောက်တိုက်ခိုက်ခဲ့တာကြောင့် အစ္စရေးလ်-ဟားမတ်စ် စစ်ပွဲဖြစ်ပွားခဲ့ပါတယ်။

ဒီနောက် အမေရိကန်ရဲ့ စစ်ရေးကူညီမှုများဖြင့် အစ္စရေးလ်ဟာ ဂါဇာမှာ စစ်ဆင်ရေးများ ဆောင်ရွက်ခဲ့ပါတယ်။

အစ္စရေးလ်စစ်ဆင်ရေးကြောင့် ဂါဇာမှာ ပျက်စီးဆုံးရှုံးမှုနဲ့ အရပ်သားသေဆုံးမှုပမာဏက နိုင်ငံတကာမှာ ဝေဖန်စရာဖြစ်နေပြီး အစ္စရေးလ်ကို ထောက်ပံ့နေတဲ့ အမေရိကန်ရဲ့ နိုင်ငံတကာဆိုင်ရာ ပုံရိပ်မှာလည်း ကျဆင်းလာပါတယ်။
Source: CNA
Published_30 December 2023
#World_Military
#Yangon_Times #YMG_News #Yangon_Media_Group

Published 30 December 2023

အမျိုးအမည် မသိရသေးတဲ့ ပဋိဇီဝပစ္စည်းတွေဟာ တုပ်ကွေးဗိုင်းရပ်စ် အမျိုးမျိုးကို ချေဖျက်နိုင်စွမ်းရှိတယ်လို့ ပစ်ဘာ့ဂ်ဆေးတက္ကသိုလ်မှ သုတေသီများက တွေ့ရှိထားပါတယ်။

ဒီတွေ့ရှိချက်တွေကြောင့် တုပ်ကွေးဗိုင်းရပ်စ်အားလုံးကို ထိရောက်စေမယ့် ကာကွယ်ဆေး ထုတ်လုပ်လာနိုင်ဖို့ ခြေလှမ်းတိုးတက်လာတာ ဖြစ်ပါတယ်။

သမားရိုးကျ တုပ်ကွေးကာကွယ်ဆေးတွေက ကိုယ်ခံအားကို လှုံ့ဆော်ကာ ပဋိဇီဝပစ္စည်းများ ထွက်ရှိစေပြီး တုပ်ကွေးဗိုင်းရပ်စ် မျက်နှာပြင်ပေါ်မှ ဟီမာဂလူလင်လို့ခေါ်တဲ့ ဗိုင်းရပ်စ်ပရိုတိန်းကို ပစ်မှတ်ထားတာ ဖြစ်ပါတယ်။

ဒါပေမဲ့ အဆိုပါ ပရိုတိန်းက အချိန်နဲ့အမျှ ဗီဇပြောင်းလဲလာပြီး တုပ်ကွေးမျိုးဗီဇကွဲအသစ်များ ပေါ်ထွက်လာကာ ယခင်ကာကွယ်ဆေးတွေကို ခုခံလာနိုင်ပါတယ်။

ကူးစက်မှုများတဲ့ H1 ၊ H3 တို့လို တုပ်ကွေးမျိုးကွဲတွေကို တပြိုင်တည်းကာကွယ်နိုင်မယ့် ပဋိဇီဝဆေးတွေကို သုတေသီများ စူးစမ်းထုတ်လုပ်လာကြပါတယ်။

လူနာတွေရဲ့ သွေးနမူနာများဖြင့် စမ်းသပ်မှုပြုလုပ်ရာမှာ H3 နဲ့ H1 မျိုးကွဲများကို ချေဖျက်နိုင်စွမ်းရှိတဲ့ ပဋိဇီဝဆေးအသစ်တစ်မျိုးကို တွေ့ရှိခဲ့ကြပါတယ်။

ပြောင်းလဲနေတဲ့ ဗိုင်းရပ်စ်တွေကို ကာကွယ်နိုင်ဖို့ နှစ်စဥ်တုပ်ကွေးကာကွယ်ဆေး လိုအပ်ကြောင်း၊ တုပ်ကွေးဗိုင်းရပ်စ် ထိတွေ့ခြင်းနဲ့ ကာကွယ်ဆေးပေးခြင်းတို့ သင့်တင့်စွာ ပေါင်းစပ်ပါက တုပ်ကွေးမျိုးကွဲတွေကို ခုခံနိုင်မယ့် ပဋိဇီဝတုန့်ပြန်မှု ရရှိမှာဖြစ်ကြောင်း သုတေသီများ ဖော်ပြသွားပါတယ်။

ဒါ့အပြင် အမြဲဗီဇပြောင်းလဲနေတဲ့ တုပ်ကွေးဗိုင်းရပ်စ်တွေကို တာရှည်ကာကွယ်ပေးနိုင်မယ့် ကာကွယ်ဆေး အနာဂတ်မှာ ရရှိရန် မျှော်လင့်နေကြပါတယ်။
Source: The Jerusalem Post
Published_30 December 2023
#World_Health
#Yangon_Times #YMG_News #Yangon_Media_Group

Published 30 December 2023

သကြားစားသုံးမှု မြင့်မားတဲ့အခါ ဆီးချို၊ နှလုံးရောဂါများ၊ ကင်ဆာများ ဖြစ်နိုင်ခြေများသလို အလွန်အမင်း စားသုံးမိပါက အင်ဆူလင် ယဥ်ပါးခြင်း၊ ရောင်ရမ်းခြင်း၊ ဇီဝဖြစ်စဥ်ချို့ယွင်းခြင်းတို့ ဖြစ်လာနိုင်ပါတယ်။

အချိုဓာတ် စွဲလမ်းတဲ့အခါ ခဏခဏ စားချင်စိတ်ပေါ်ပြီး ကျန်းမာရေးနဲ့ မညီညွတ်တဲ့အစာများ စားသုံးမိကာ အာဟာရဓာတ် မညီမျှတာတွေ ဖြစ်ပေါ်နိုင်ပါတယ်။

ဒါကြောင့် သကြားစားသုံးမှု လျှော့ချနိုင်စေမယ့် နည်းလမ်းတွေကို ဖော်ပြလိုက်ပါတယ်။
 
(၁) စားသောက်ကုန်တွေမှာ ဖော်ပြထားတဲ့ သကြားဓာတ် ပါဝင်ပစ္စည်းများကို ဖတ်ရှုသင့်ပါတယ်။

(၂) အဆင့်ဆင့်ထုတ်လုပ် ထုပ်ပိုးထားတဲ့ အစားအစာတွေဟာ သကြားဓာတ်မြင့်မားစွာ ပါဝင်တာကြောင့် လျှော့ချစားသုံးသင့်ပါတယ်။

(၃) သန့်စင်ထုတ်လုပ်ထားတဲ့ သကြားအစား ပျားရည်၊ မေပယ်သကာရည်တို့လို သဘာဝအချိုဓာတ်ပစ္စည်းတွေ ရွေးချယ်သင့်သလို သင့်တော်ရုံသာ အသုံးပြုသင့်ပါတယ်။

(၄) ပရိုတိန်းနဲ့ ကျန်းမာရေးညီညွတ်တဲ့ အစားအစာများ စားသုံးခြင်းဖြင့် ဗိုက်ပြည့်ဝစေပြီး အချိုစားချင်စိတ်ကို လျှော့ချနိုင်ပါတယ်။

(၅) အချိုရည်သောက်မယ့်အစား ရေကိုသာ သောက်သုံးပြီး ရေဓာတ်ပြည့်ဝအောင် နေထိုင်သင့်ပါတယ်။

(၆) အချိုဓာတ်ပါတဲ့ စားစရာတွေ မစားမိစေရန် ကျန်းမာရေးနဲ့ ညီညွတ်တဲ့ စားစရာများကို စနစ်ကျကျ ပြင်ဆင်စားသုံးသင့်ပါတယ်။

(၇) အချိုပါတဲ့ မုန့်တွေအစား လတ်ဆတ်တဲ့ အသီးအနှံတွေကို ရွေးချယ်သင့်ပါတယ်။

(၈) သကြားစားတဲ့အခါမှာလည်း အလွန်အကြူး မစားသင့်ဘဲ သင့်တင့်ရုံသာ စားသုံးသင့်ပါတယ်။

(၉) ဟင်းသီးဟင်းရွက်နဲ့ ပဲတွေလိုမျိုး အမျှင်ဓာတ်တွေ စားသုံးခြင်းဖြင့် အချိုဓာတ်စားချင်စိတ်ကို လျော့ကျစေပါတယ်။

(၁၀) လှုပ်ရှားလေ့ကျင့်ခန်း ပြုလုပ်ပေးပါက အချိုစားချင်စိတ်ကို လျော့ကျစေပြီး ကျန်းမာရေးကို တိုးတက်စေပါတယ်။
Source: DoctorNDTV.
Published_30 December 2023
#World_Health

#Yangon_Times #YMG_News #Yangon_Media_Group

Published_29 Dec 2023

ပြည်ထောင်စု ရွေးကောက်ပွဲကော်မရှင်(UEC)က ၈၈ မျိုးဆက်ကျောင်းသားခေါင်းဆောင်လည်း ဖြစ်၊ ၈၈ မျိုး ဆက် ငြိမ်းချမ်းရေးနှင့် ပွင့်လင်းလူ့အဖွဲ့အစည်း ခေါင်းဆောင်လည်း ဖြစ်ခဲ့သူ ဦးကိုကိုကြီး ဦးဆောင်သည့် ပြည်သူ့ပါတီ (PP)ကို ပါတီတည်ထောင်ခွင့်ပြုလိုက်ကြောင်း သိရသည်။

ပြည်ထောင်စုရွေးကောက်ပွဲကော်မရှင်က ၂၀၂၃ခုနှစ် ဒီဇင်ဘာ ၂၉ ရက်ရက်စွဲဖြင့်ကြေညာချက်အမှတ် ၅၄/၂၀၂၃ကို ထုတ်ပြန်ကြေညာရာတွင် ပြည်သူ့ပါတီကို နိုင်ငံရေးပါတီအဖြစ်မှတ်ပုံတင်ခွင့်ပြုလိုက်ကြောင်း ဖော်ပြပါရှိသည်။

ပြည်သူ့ပါတီ၏ မှတ်ပုံတင်အမှတ်မှာ (၄၇)ဖြစ်သည်ဟုလည်း ရွေး/ကော်၏ ကြေညာချက်အရသိသည်။

“နိုင်ငံရေးဘောင် ကျဉ်းနေသ၍ စစ်ရေးဘောင်ကျယ်နေမှာဖြစ်တယ်၊နိုင်ငံရေးဘောင် ကျယ်အောင် အားလုံးဝိုင်းဝန်း  ကြိုးစားဆောင်ရွက်ကြပါ” ဟု ဦးကိုကိုကြီးက ပါတီမှတ်ပုံတင်ရရှိမှုအပေါ်မှတ်ချက်ပေးပြောဆိုသည်။

ပြည်သူ့ပါတီ(PP) အနေဖြင့် လွန်ခဲ့သော ၈ လခန့်ကပင် ပြည်ထောင်စုအဆင့်(နိုင်ငံတစ်ဝှမ်းလုံး) ဝင်ရောက် ယှဉ်ပြိုင်မည့် နိုင်ငံရေး ပါတီအဖြစ် ပါတီမှတ်ပုံတင်လျှောက်ထားခဲ့ခြင်း ဖြစ်ကြောင်း သိရသည်။

ယခုနှစ် ဇန်နဝါရီလအတွင်းက နိုင်ငံရေးပါတီများ မှတ်ပုံတင်ခြင်းနည်းဥပဒေကို ထုတ်ပြန်ခဲ့ကာ နိုင်ငံရေး ပါတီ များ ကို ပါတီမှတ်ပုံတင်ရန် ထုတ်ပြန်ထားခဲ့ပြီးနောက် မှတ်ပုံတင်ရန် လျှောက်ထားသော နိုင်ငံရေပါတီများကို  UEC အနေဖြင့် ပါတီမှတ်ပုံတင်ခွင့်ပြုရန် စိစစ်မှူများ အထပ်ထပ် ပြုလုပ်နေကြောင်း ဖြစ်ကြောင်း ယခင်က မီဒီယာများကို ပြောကြား ထားခဲ့ဖူးသည်။

ယခုအခါ ပြည်ထောင်စု ရွေးကောက်ပွဲကော်မရှင်(UEC)အနေဖြင့် မှတ်ပုံတင်ရန် ခွင့်ပြုပြီး နိုင်ငံရေးပါတီပေါင်းမှာ ပြည်သူ့ပါတီအပါအဝင် (၄၇)ပါတီ ရှိပြီ ဖြစ်ကြောင်း သိရသည်။

Yangon_Times/PP

သက်တမ်းရင့်သံလွင်ပင်ကြီးဟာ ဂျေရုဆလမ်ရှိ ပါလက်စ်တိုင်များအတွက် လုံခြုံရေးနဲ့ တည်ငြိမ်အေးချမ်းခြင်းကို ရာစုနှစ်များတိုင်အောင် ပေးစွမ်းထားပါတယ်။
ဂျေရုဆလမ်မြို့ဟောင်း အနောက်တောင်ဘက် ၁၀ ကီလိုမီတာအကွာ အယ်လ်ဝါလာဂျာ ပါလက်စ်တိုင်းရွာမှာ တည်ရှိတာဖြစ်ပြီး ဒေသခံများရဲ့ ယုံကြည်မှုသင်္ကေတလည်း ဖြစ်ပါတယ်။
Published 29 December 2023
#World_Nature
#Yangon_Times #YMG_News #Yangon_Media_Group

#Daily_News
Published 29 December 2023

၁။ အွန်လိုင်းဈေးရောင်းသူများ  ဇန်နဝါရီလအတွင်း မှတ်ပုံတင်ရင် သက်တမ်း(၂)နှစ်နေမှ သက်တမ်းတိုးရမည်

၂။ မိုးယွန်းကြီးအင်းဘေးမဲ့တောသို့ ငှက်ကြည့်ရန် လာရောက်သူ အလွန်နည်းသွားပြီး အပန်းဖြေရန်လာရောက်သူ ပိုများလာ ဟုဆို

၃။ ကျိုက်ထီးရိုးစေတီတော်ပေါ်ရှိ ဘောဂသိဒ္ဓိတောရ တရားရိပ်သာအတွက် ‌ရေကန်နှင့် ထာဝရ‌ရေအလှုရှင် လိုအပ်နေ

၄။ ပါလက်စ်တိုင်းလူမျိုးများ၏ ငြိမ်းချမ်းရေးပြယုဂ်ဖြစ်သည့် နှစ်ထောင်ချီသက်တမ်းရှိ သံလွင်ပင် ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG_News #Yangon_Media_Group

Published 29 December 2023

 Mister Supranational Myanmar 2024 ပြိုင်ပွဲကြီးတွင်ပါဝင်ယှဉ်ပြိုင်ရန်အတွက် အမျိုးသားပြိုင်ပွဲဝင်များကို တရားဝင်ဖိတ်ခေါ်လိုက်ပြီဖြစ်ကြောင်း Missosology Myanmar မှသိရသည်။

အသက် (၁၈)နှစ်ပြည့်ပီး (၃၂)နှစ်ထက်မကျော်သည့် မြန်မာတစ်နိုင်ငံလုံးရှိ အမျိုးသားများ ဝင်ရောက်ယှဉ်ပြိုင်ခွင့်ရှိပြီး၂၀၂၄ခုနှစ် ဇန်နဝါရီလ၃၁ရက်နောက်ဆုံးထားပြီး ပါဝင်ယှဉ်ပြိုင်နိုင်မည်ဖြစ်သည်။

ပထမဆုံးအကြိမ်ခမ်းနားကြီးကျယ်စွာကျင်းပမည့် Big (5) စာရင်းဝင် Mister Supranational Myanmar 2024 ပြိုင်ပွဲကြီးတွင် ပါဝင်ယှဉ်ပြိုင်ရန်အတွက် အမည် ၊မွေးသက္ကရာဇ် ၊အရပ်အမြင့် ၊
ပညာအရည်အချင်း ၊မှတ်ပုံတင်အမှတ် ၊ဓာတ်ပုံ (မျက်နှာပုံ/တစ်ကိုယ်လုံးပုံ)ဆက်သွယ်ရမည့် ဖုန်းနံပါတ် စသည်တို့ကို ပြည့်စုံစွာရေးသားပြီး Supranational Myanmar ယခု Missosology MyanmarPage Messenger (or) Google Form link သို့အရင်ဦးစွာ ပေးပို့လျှောက်ထားနိုင်ကြောင်သိရသည်။

မြန်မာကိုယ်စားပြု Miss Supranational 2024 အဖြစ် အလှမယ်‌ဒီးကို ရွေးချယ်ထားပြီဖြစ်ပြီး  မြန်မာကိုယ်စားပြု Mister Supranational 2024ကို ထပ်မံရွေးချယ်ပြီး  နိုင်ငံတကာစင်မြင့်ထက်တွင် ယှဉ်ပြိုင်သွားကြမည်ဖြစ်ကြောင်း သိရသည်။
Yangon_Times/tthl
Published 29 December 2023
#Local_News
#Yangon_Times #YMG_News #Yangon_Media_Group

"ဇန်နဝါရီလထဲမှာ အယ်နီညိုသက်ရောက်မှုကြောင့် အချိန်အခါမဟုတ် မိုးရွာတာတွေကြုံနိုင်သလို ရန်ကုန်၊ပဲခူး၊ဧရာဝတီစတဲ့ မြစ်ဝကျွန်းပေါ်ဒေသတွေကတော့ အခြားဒေသတွေလောက် မအေးနိုင်ဘူး"
မိုးလေဝသနှင့် ဇလဗေဒညွှန်ကြားမှုဦးစီးဌာန၊ ညွှန်ကြားရေးမှူးဦးလှထွန်း
Yangon_Times/tthl
Published 29 December 2023
#Local_News
#Yangon_Times #YMG_News #Yangon_Media_Group

လမ်းပန်းဆက်သွယ်ရေးအခက်ခဲကြောင့် ယခင်လပိုင်းတွေက ဈေးကွက်အတွင်း ကုန်အ၀င်အလွန်နည်းခဲ့တဲ့ တရုတ်မှ တင်သွင်းတဲ့ ကြူကုတ်ကြက်သွန်ဖြူနဲ့ အာလူးဟာ ကုန်ဝင်ရောက်မှု ပြန်များလာတယ်လို့ ကုန်သည်တွေထံက သိရပါတယ်။
Yangon_Times/LW
Published 29 December 2023
#Local_News
#Yangon_Times #YMG_News #Yangon_Media_Group

Published 29 December 2023

ရန်ကုန်တိုင်းဒေသကြီး၊ ထန်းတပင်မြို့နယ်၊ ရိုးလေးရှိ သာဓုဓမ္မဘုန်းတော်ကြီးသင်ပညာရေး (မိဘမဲ့ပရဟိတ) ကျောင်းပိုင်ကားအား အွန်လိုင်းတင်ရောင်းချခဲ့ရာ လာရောက်ဝယ်သူက စမ်းသပ်မောင်းနှင်စဉ် ကားလုယူထွက်ပြေးသွားကြောင်း သာဓုဓမ္မဘုန်းတော်ကြီးသင်ပညာရေး (မိဘမဲ့ပရဟိတ)ကျောင်းမှ သိရသည်။

သာဓုဓမ္မဘုန်းတော်ကြီးသင်ပညာရေး (မိဘမဲ့ပရဟိတ) ကျောင်း ပြုပြင်ရန်လိုအပ်သည့်အတွက် ဒီဇင်ဘာ ၂၈ ရက် (ယမန်နေ့)တွင် ကျောင်းပိုင် MISUBISHI EXTRA CUP ကားအမျိုးအစားအား ကျပ်သိန်း ၁၃၀ ဖြင့် ရောင်းချရန် အွန်လိုင်းလူမှုကွန်ရက်ပေါ်တွင် ရောင်းချရန်တင်ထားခဲ့ခြင်းဖြစ်ပြီး အွန်လိုင်းမှတစ်ဆင့် ကားဝယ်ယူလိုကြောင်း ဆက်သွယ်လာကာ ဒီဇင်ဘာ ၂၉ ရက် (ယနေ့) နံနက် ၁၀ နာရီခန့်တွင် ကားစမ်းသပ်မောင်းနှင်စဉ် ယခုကဲ့သို့ ထွက်ပြေးသွားခြင်းဖြစ်ကြောင်း သိရသည်။

' သူကပိုက်ဆံပါတယ်ဆိုတဲ့ အိတ်လေးတစ်လုံးပေးထားခဲ့တယ်။ သိမ်းပေးထားပါ ခဏလေးမောင်းကြည့်ဦးမယ်ဆိုပြီးဒါယကာတစ်ယောက်ထည့်ပေးလိုက်တာ။ ဒညင်းကုန်ဈေးကျော်၊ မီးပွိုင့်ကျော် တပ်မတော်‌‌ဂေါက်ကွင်းထဲဝင်ပြီးတော့ အဲဒီဒါယကာကို ထားခဲ့ပြီး သူငယ်ချင်းဆီ ပိုက်ဆံသွားယူမယ်ဆိုပြီး ထွက်သွားတာ ပြန်မလာတော့တာပါပဲ။ အိတ်ထဲဖွင့်ကြည့်တော့လည်း မုန့်တွေပဲ ပါတယ်'ဟု သာဓုဓမ္မဘုန်းတော်ကြီးသင်ပညာရေး (မိဘမဲ့ပရဟိတ)ကျောင်းမှ ဆရာတော်ကမိန့်ကြားသည်။

လက်တလောတွင် သက်ဆိုင်ရာ ရိုးလေး နယ်မြေဥက္ကဋ္ဌမှတစ်ဆင့် ထန်းတပင်မြို့နယ်ရဲစခန်းသို့ တိုင်ကြားကာ အမှုဖွင့်လှစ်ထားပြီး မြို့ဝင်မြို့ထွက်ဂိတ်များကိုလည်း အကြောင်းကြားခြင်းနှင့် လိုက်လံရှာဖြွေခင်းတို့ကို ဆောင်ရွက်နေကြောင်း သိရသည်။
Yangon_Times/tthl
Published 29 December 2023
#Local_News
#Yangon_Times #YMG_News #Yangon_Media_Group

Published 29 December 2023

လှိုင်သာယာနှင့်ပဲခူးတွင် ဓာတ်အားခွဲရုံအသစ်များတည်ဆောက်နေပြီး တည်ဆောက်မှု(၆၈)ရာခိုင်နှုန်းပြီးစီး‌နေပြီဖြစ်ကြောင်း လျှပ်စစ်စွမ်းအားဝန်ကြီး ဌာနမှသိရသည်။

အဆိုပါစီမံကိန်းလုပ်ငန်းများကို လျှပ်စစ်စွမ်းအားဝန်ကြီးဌာန၊ပြည်ထောင်စုဝန်ကြီး ဦးဉာဏ်ထွန်းနှင့်အဖွဲ့ဝင်များသွားရောက်ကြည့်ရူစစ်ဆေးခဲ့သည်။

ပြည်ထောင်စုဝန်ကြီးက ယခုကာလသည် ပွင့်လင်းရာသီဖြစ်ပြီး စပါးသီးနှံများ ရိတ်သိမ်းပြီးချိန်ဖြစ်သည့်အတွက် မြေသားလုပ်ငန်းများ ဆောင်ရွက်ခြင်း၊ ကြိုးဆွဲခြင်း လုပ်ငန်းများအတွက် လိုအပ်သော အထောက်အကူပစ္စည်းများ ကြိုတင်ပေးပို့ခြင်း၊ စီမံကိန်းတွင် အသုံးပြုမည့် အထောက်အကူပစ္စည်းများ ကြိုတင်သယ်ယူပို့ဆောင်ခြင်းလုပ်ငန်းများကို ကြိုတင်ဆောင်ရွက်ထားရန် လိုအပ်ကြောင်း၊ ဆောင်ရွက်လျက်ရှိသည့် မြို့ပြလုပ်ငန်းများကိုလည်း ဝန်ထမ်းအင်အား၊ စက်ယန္တရားအင်အား၊ လုပ်ငန်းဆောင်ရွက်ချိန်များကို ပိုမိုတိုးချဲ့စုဖွဲ့၍ ဟန်ချက်ညီ ပြီးစီးနိုင်ရေး အင်တိုက်အားတိုက် ဆောင်ရွက်သွားရန် လိုအပ်ကြောင်း၊ လုပ်ငန်းများ ဆောင်ရွက်ရာတွင်လည်း ဆောင်ရွက်ရန် ကျန်လုပ်ငန်းများအလိုက် ပြီးစီးရမည့်အချိန်ဇယားများ ရေးဆွဲထား၍ ၎င်းအချိန်ဇယားများအတိုင်း သတ်မှတ်ချိန်ပြီးစီးနိုင်ရေး အဆင့်ဆင့်ကြပ်မတ်ဆောင်ရွက်သွားရန် လိုအပ်ကြောင်း မှာကြားပြီး စီမံကိန်းလုပ်ငန်းများ ဆောင်ရွက်နေသော ဝန်ထမ်းများကို ဂုဏ်ပြုသစ်သီးခြင်းများ ပေးအပ်ကာ စီမံကိန်းလုပ်ငန်းခွင်အတွင်း ထရန်စဖော်မာများနှင့် Shunt Reactor တပ်ဆင်နေမှု၊ Hybrid Gas Insulated Switchgear (HGIS) တပ်ဆင်နေမှုနှင့် Control Build-ing တည်ဆောက်ခြင်းလုပ်ငန်း ဆောင်ရွက်နေမှုအခြေအနေကို လှည့်လည်ကြည့်ရှုစစ်ဆေးခဲ့သည်။

၅၀၀ ကေဗွီ လှိုင်သာယာ (အနောက်ပိုင်းတက္ကသိုလ်) ဓာတ်အားခွဲရုံနှင့် ၅၀၀ ကေဗွီ ဘုရားကြီးဓာတ်အားခွဲရုံစီမံကိန်းများသည် ယခုအခါ စီမံကိန်းလုပ်ငန်းများ၏ ၆၈ ရာခိုင်နှုန်း ဆောင်ရွက်ပြီးစီးနေပြီဖြစ်ကာ ၂၀၂၄ ခုနှစ်အတွင်း စီမံကိန်းတစ်ခုလုံး ရာနှုန်းပြည့်ပြီးစီးနိုင်ရေး ကြိုးပမ်းဆောင်ရွက်လျက်ရှိကြောင်းသိရသည်။
Yangon_Times/tthl
Published 29 December 2023
#Local_News
#Yangon_Times #YMG_News #Yangon_Media_Group

Published 29 December 2023

ထိုင်းနိုင်ငံသို့ သွားရောက်မည့် မြန်မာ MOU လုပ်သားများအနေဖြင့် ကြုံ‌တွေ့ရသည့်အခက်အခဲများအား ဝန်ကြီးဌာနသို့ တိုက်ရိုက်တင်ပြနိုင်ပြီး ညှိနှိုင်း‌ဖြေရှင်းပေးသွားမည် ဖြစ်ကြောင်း အလုပ်သမားဝန်ကြီးဌာန မှ သိရသည်။

အလုပ်သမားဝန်ကြီးဌာနအနေဖြင့် ရွှေ့ပြောင်းလုပ်သားလုပ်ငန်းစဉ်များကို တိုက်ရိုက်ကြီးကြပ်ရခြင်းဖြစ်သည့်အတွက် သက်ဆိုင်ရာ တိုင်းဒေသကြီး၊ ပြည်နယ်အစိုးရများ၊ လိုအပ်သည့် ဦးစီးဌာန လုပ်ငန်းအဖွဲ့အစည်းများနှင့်လည်းဆက်စပ်၍ ရွှေ့ပြောင်းလုပ်သားများသွားသည့် ခရီးလမ်းကြောင်း အဆင်ပြေစေရန်၊ အတတ်နိုင်ဆုံး သွားရမည့်ရက်များတွင် အချိန်ကိုက်သွားနိုင်စေရန်၊ အချိန်တိုအတွင်းသွားနိုင်ရန်အတွက် အားလုံးပေါင်းစပ်ညှိနှိုင်း၍ အတက်နိုင်ဆုံး ပြေလည်အောင် ဝန်ဆောင်မှုပေးကာ ဖြေ‌ရှင်းဆောင်ရွက်လျက်ရှိကြောင်း သိရသည်။

"ဒီကြားထဲကနေ အခက်အခဲတွေ၊ မပြေလည်မှုတွေ ရှိရင်လည်း အလုပ်သမားဝန်ကြီးဌာနကို တိုက်ရိုက်ဆက်သွယ်ပြီး ကြုံတွေ့နေရတဲ့ အခက်အခဲတွေ၊ အခြေအနေတွေကို တင်ပြလာရင်လည်း ကျွန်တော်တို့ ပေါင်းစပ်ညှိနှိုင်းပြီးတော့ ဖြေရှင်းဆောင်ရွက်ပေးသွားမယ်ဆိုတာကို အသိပေးပြောကြားလိုပါတယ်"ဟုအလုပ်သမားဝန်ကြီးဌာန၊ အမြဲတမ်းအတွင်းဝန် ဦးညွန့်ဝင်းကပြောသည်။

လတ်တလောတွင် ထိုင်းနိုင်ငံသို့ MOU လုပ်သားစေလွှတ်ရာတွင် အဓိကလမ်းကြောင်းဖြစ်သည့် မြဝတီလမ်းပိုင်းသည် အခက်အခဲရှိနေသော်လည်း ပုံမှန်အတိုင်းစေလွှတ်နေကြောင်း၊အလားတူ ရန်ကုန်-ကော့သောင်းလေယာဉ်နှင့်ကော့သောင်း-ရနောင်းရေယာဉ်ဖြင့်လည်း ထိုင်းနိုင်ငံသို့ MOU လုပ်သားစေလွှတ်လျက်ရှိကြောင်း၊ ယင်းကြောင့် MoU လုပ်သားနှင့်ပတ်သက်၍လုံးဝရပ်တန့်သွားသည့်အနေအထားမရှိကြောင်း သိရသည်။

ထို့အပြင် မြဝတီဘက်မှ ထိုင်းနိုင်ငံသို့ MoU လုပ်သားများသွားလာရန်ခက်ခဲလာပါကလည်း ရန်ကုန်-ကော့သောင်း-ရနောင်း လမ်းကြောင်း မှ လည်း လက်ခံမည့် လုပ်ငန်းစဉ်များဆောင်ရွက်ပေးမည်ဖြစ်ကြောင်းတစ်ဖက်နိုင်ငံမှပြောဆိုထားကြောင်းသိရသည်။

မြန်မာရွှေ့ပြောင်းအလုပ်သမားများအများဆုံးသွားရောက်သည့် နိုင်ငံဖြစ်သည့် ထိုင်းနိုင်ငံတွင် တရားဝင် မြန်မာရွှေ့ပြောင်းလုပ်သား ၄ သန်းခန့်ရှိပြီး ယင်းမှ MoU လုပ်သား ၁၅ သိန်းခန့်ရှိကြောင်း ထိုင်းအစိုးရ၏ ဖော်ပြချက်များအရ သိရသည်။
Yangon_Times/NN
Published 29 December 2023
#Local_News
#Yangon_Times #YMG_News #Yangon_Media_Group