#Local_News
Published_ 20 April 2023

ပြည်မြို့ တက္ကသိုလ်ကျောင်းရှေ့ ရွက်နုလက်ဖက်ရည်ဆိုင်အနီး ဓာတ်ကြိုးလိုင်းပေါ်တွင် ဧပြီလ ၁၉ရက်နေ့ ညပိုင်းက မျောက်မျိုးနွယ်ဝင် ( မျောက်လေပွေ) slow loris တစ်ကောင်တွေ့ရှိခဲ့လို့ သွားရောက်ဖမ်းဆီးခဲ့တယ်လို့ မြန်မာနိုင်ငံလူမှုကယ်ဆယ်ရေးအဖွဲ့ (ပြည်) ပရဟိတပါရမီအဖွဲ့မှာ တာဝန်ရှိသူတစ်ဦးက YMG ကို ပြောပါတယ်။

#Local_News #ပြည်မြို့ #တက္ကသိုလ်ကျောင်းရှေ့ #ရှားပါးမျောက်မျိုးစိတ်
#YMG #Yangon_Media_Group

#Asia_Design
Published 20 April 2023

တစ်ချိန်က နီယွန်ဆိုင်းဘုတ်များဖြင့် ရောင်စုံထွန်းလင်းတောက်ပခဲ့တဲ့ ဟောင်ကောင်လူနေရပ်ကွက်တွေမှာ အခုတော့ နီယွန်ဆိုင်းဘုတ်အများစု ဖယ်ရှားခံရပြီဖြစ်ပါတယ်။

#Asia_Design #နီယွန်ဆိုင်းဘုတ် #YMG #Yangon_Media_Group

#Local_News
Published_ 20 April 2023

ကမ္ဘာ့ရွှေဈေးဟာလည်း ဧပြီလ ၁၉ ရက်နေ့မှာတစ်အောင်စကို ၂၀၀၄ ဒေါ်လာဝန်းကျင် ပေါက်ဈေးရှိခဲ့ပြီး အခု ဧပြီလ ၂၀ ရက်နေ့မှာ ၁၉၉၂ ဝန်းကျင်ပေါက်ဈေးရှိနေပြီး ဈေးပြန်ကျဆင်းလာပါတယ်။

#Local_News #ကမ္ဘာ့ရွှေ #ရွှေဈေးအနည်းငယ်ပြန်ကျ #YMG #Yangon_Media_Group

#Local_News
Published_ 20 April 2023

ဓာတ်ဆီဈေးနှုန်းများမှာ ရှိရင်းလတ်တလောနှုန်းထားထက် ကျပ် ၁၀၀ နီးပါးကျဆင်းနေပြီး တစ်လီတာ ၂,၁၂၅ ဝန်းကျင် ဈေးဖြင့်တွေ့ရှိရကြောင်း နေ့စဉ်ဈေးနှုန်းအပြောင်းအလဲများအရ သိရပါတယ်။

#Local_News #စက်သုံးဆီ #ဈေးကျဆင်း #YMG #Yangon_Media_Group

#Local_News
Published_ 20 April 2023

အခုနှစ်ကျင်းပခဲ့တဲ့ မြန်မာနိုင်ငံဒေသအသီးသီးက ရိုးရာသင်္ကြန်ပွဲတော်တွေ၊ တိုင်းရင်းသားတွေရဲ့ရိုးရာသင်္ကြန်ပွဲတော်တွေကို ယူနက်စကိုရဲ့ ဒြပ်မဲ့ယဉ်ကျေးမှုအမွေအနှစ်စာရင်းမှာ တင်သွင်းနိုင်ဖို့ သာသနာရေးနှင့်ယဉ်ကျေးမှုဝန်ကြီးဌာနက သက်ဆိုင်ရာဌာနများနဲ့ ပူးပေါင်းပြီး မှတ်တမ်းများ ရယူတင်ထားတယ်လို့ သိရပါတယ်၊၊

#Local_News #သင်္ကြန်ပွဲတော် #YMG #Yangon_Media_Group

#Daily_News
Published_ 20 April 2023

၁။ ဒေသအသီးသီးမှ သင်္ကြန်ပွဲတော်များ၊ တိုင်းရင်းသားရိုးရာသင်္ကြန်ပွဲတော်ဓလေ့များကို ကမ္ဘာ့အမွေအနှစ်စာရင်းတင်သွင်းနိုင်ရန် မှတ်တမ်းတင်ထားဟုဆို

၂။ စက်သုံးဆီဈေးကျဆင်းလာ ၉၂ဓာတ်ဆီတစ်လီတာ ၂၁၂၅ ကျပ်ရောက်ရှိ

၃။ ကမ္ဘာ့ရွှေဈေးတစ်အောင်စကို ၁၉၉၂ ဒေါ်လာပေါက်ဈေးရှိနေပြီး ပြည်တွင်းရွှေဈေးအနည်းငယ်ပြန်ကျ

၄။ ပျောက်ကွယ်လာသည့်နီယွန်ဆိုင်းဘုတ်များကို ထိန်းသိမ်းစောင့်ရှောက်ရန်ကြိုးပမ်းလာ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group #Daily_News #YMG

#Local_News
Published_ 20 April 2023

ဧပြီလ ၂၁ ရက်မှ ၂၅ ရက်အတွင်း ဒေသအချို့မှာ အချိန်အခါမဟုတ်မိုးထစ်ချုန်းရွာသွန်းမှာဖြစ်ပြီး လေပြင်းတိုက်တာ၊ မိုးကြိုးပစ်တာ၊မိုးသီးကြွေတာတွေဖြစ်ပေါ်နိုင်တယ်လို့ မိုးလေဝသနှင့်ဇလဗေဒညွှန်ကြားမှုဦးစီးဌာနမှ သိရပါတယ်၊၊

#Local_News #မိုးထစ်ချုန်းရွာမည် #ဒေသအချို့
#YMG #Yangon_Media_Group

#Local_News
Published_ 20 April 2023

ရှမ်းပြည်နယ်တောင်ပိုင်း၊ ရပ်စောက်မြို့နယ်၊ ဖောင်းတော ကျေးရွာအုပ်စု၊ ဘုရားဖြူကျေးရွာရှိ ဘုန်းတော်ကြီးကျောင်းတွင် ဧပြီ(၁၉)ရက် ည (၉) နာရီဝန်းကျင်ကခန့် မီးလောင်မှု ဖြစ်ပွားခဲ့ပြီး သံဃာတစ်ပါး ပျံတော်မူခဲ့ကြောင်း မြန်မာနိုင်ငံမီးသတ်တပ်ဖွဲ့မှ သိရသည်။

ပေ ၈၀ x ၆၀ သွပ်မိုး၊ ပျဉ်ကာ၊ ပျဉ်ခင်း တစ်ထပ်ကျောင်းဆောင်အတွင်း ဘုရားစင်တွင် ဖယောင်းတိုင်ဖြင့် ဘုရားမီးပူဇော်ခဲ့ရာမှ ဖယောင်းတိုင်လဲကျ၍ မီးလောင်ကျွမ်းမှုဖြစ်ပွားခဲ့ကြောင်း သိရသည်။

ဘုန်းတော်ကြီးကျောင်း မီးလောင်မှုအား ရပ်စောက်မြို့နယ် မီးသတ်စခန်းမှ တပ်ဖွဲ့ဝင်များ၊ အရန်မီးသတ်တပ်ဖွဲ့ဝင်များနှင့် လူမှုကူညီရေးအသင်းဝင်များက ဝိုင်းဝန်းငြှိမ်းသတ်ခဲ့ကြသဖြင့် ည (၁၁) နာရီ (၁၅) မိနစ်တွင် မီးငြိမ်းသွားခဲ့ကြောင်း သိရသည်။

"အကြမ်းဖျဉ်း သိရသလောက်ကတော့ ဖယောင်းတိုင်မီးကနေ စလောင်တာလို့ပဲ သိထားသေးတယ်။ မီးလောင်အားက အရမ်းများတော့ အပြီးတိုင်မီးငြိမ်းဖို့ကို (၂)နာရီကျော်လောက်ကြာအောင် ကြိုးစားပြီးငြှိမ်းခဲ့ရတယ်။ သံဃာတော်တစ်ပါး မီးလောင်ပြီး ပျံလွန်တော်မူသွားပါတယ် "ဟု အခင်းဖြစ်နေရာသို့ ရောက်ရှိခဲ့သည့် လူမှုကူညီရေးအသင်းဝင်တစ်ဦးက ပြောသည်။

သံဃာတစ်ပါး မီးလောင်ဒဏ်ရာများဖြင့် ပျံလွန်တော်မူခဲ့ပြီး တစ်ပါးမှာ ခြေကျင်းဝတ်ဒဏ်ရာ (မစိုးရိမ်ရ) ရရှိခဲ့ကြောင်း၊ ပျံလွန်တော်မူသွားသည့် သံဃာတော်၏ ရုပ်ကလပ်အား လူမှုကူညီရေးအသင်းကားဖြင့် ရပ်စောက်မြို့ ပြည်သူ့ဆေးရုံ ရင်ခွဲရုံသို့ပို့ ဆောင်ပေးခဲ့ကြောင်း သိရသည်။

#ymg/ppk #Local_News #ရှမ်းပြည်နယ် #သံဃာတော်တစ်ပါး #ပျံလွန်တော်မူ
#YMG #Yangon-Media-Group

#Local_News
Published_ 20 April 2023

မြန်မာနိုင်ငံတွင် ယခုရက်ပိုင်းအတွင်း ကိုဗစ်လူနာသစ်တွေ့ရှိမှုအနည်းငယ်မြင့်လာပြီးတစ်ရက်အတွင်း ပြည်ပမှဝင်ရောက်လာသူရော၊ပြည်တွင်းတွင်ကူးစက်ခံရသူပါ ကိုဗစ်လူနာသစ်စုစုပေါင်း(၃၉)ဦးတွေ့ရှိရကြောင်း ကျန်းမာရေးဝန်ကြီးဌာန၏ထုတ်ပြန်ချက်အရသိရသည်၊၊

ဧပြီ (၁၈) ရက် ည ၈ နာရီကနေ ဧပြီ (၁၉) ရက် ည ၈ နာရီ အတွင်း ဓာတ်ခွဲနမူနာစုစုပေါင်း (၁၂,၄၈၉)ခုကို စစ်ဆေးခဲ့ရာ ဓာတ်ခွဲအတည်ပြုလူနာသစ်(၃၉)ဦးတွေ့ရှိရခြင်းဖြစ်သည်၊၊

ဓာတ်ခွဲအတည်ပြုလူနာသစ်များထဲတွင် (၂၄ )ဦးသည် ပြည်ပမှဝင်ရောက်လာသူများကို ဓာတ်ခွဲစစ်ဆေးရာမှတွေ့ရှိရခြင်းဖြစ်ပြီး ကျန်(၁၅)ဦးကတော့ ပြည်တွင်းတွင် ကူးစက်ဖြစ်ပွားသူများဖြစ်သည်ဟုဆိုသည်၊၊

နိုင်ငံတကာသတင်းများအရမြန်မာနိုင်ငံ၏အိမ်နီးချင်းနိုင်ငံဖြစ်သောအိန္ဒိယနိုင်ငံတွင် ကိုဗစ်မျိုးကွဲပိုးသစ်ဖြစ်သည့် XBB 1.16 အပါ အဝင်ကိုဗစ်ကူးစက်မှုများမြင့်မားနေဆဲဖြစ်၍ သတိပြုနေထိုင်ကြရန်လိုအပ်ကြောင်း သိရသည်၊၊

#ymg/tthl #Local_News #ကိုဗစ်ပိုးတွေ့ #YMG
#Yangon_Media_Group

#Local_News
Published_ 20 April 2023

ရန်ကုန်တိုင်းဒေသကြီး၊ သာကေတမြို့နယ်၊ (၃)ရန်ပြေရပ်ကွက် ရန်ပြေလမ်းမပေါ် တိုးချဲ့(၁)လမ်းထိပ်တွင် လူတစ်ဦးလဲကျသေဆုံးနေကြောင်း သာကေတမြို့နယ် လူမှုကူညီရေးအဖွဲ့က ထုတ်ပြန်ထားသည်။

ယင်းမှာ အသက် ၄၀ ခန့်အရွယ် အမျိုးသားတစ်ဦး ဖြစ်ကြောင်း၊ယနေ့ ဧပြီလ ၂၀ ရက် နံနက်ပိုင်းက လဲကျသေဆုံးနေသည်ကို တွေ့ရှိသည့်အတွက် ရပ်ကွက်နေပြည်သူများက အကြောင်းကြားလာ၍ သာကေတမြို့နယ်လူမှုကူညီရေးအဖွဲ့က သွားရောက် ကူညီခဲ့ရကြောင်း သိရသည်။

၎င်းသေဆုံးနေသော အမျိုးသားတွင် ပြင်ပဒဏ်ရာ မတွေ့ရှိကြောင်း၊ ရုပ်အလောင်းကို အောင်နိုင်သူလူမှုကူညီရေးအသင်းကားဖြင့် စံပြဆေးရုံသို့ ပို့ဆောင်ကူညီပေးခဲ့ကြောင်း သိရသည်။

#ymg/mt #Local_News #သာကေတ #YMG
#Yangon_Media_Group

#World_Business
Published 20 April 2023

ဖေ့စ်ဘွတ်ခ်တည်ထောင်ရာ Meta ကုမ္ပဏီဟာ Metaverse ကုမ္ပဏီအားလုံးမှာ ဧပြီ ၁၉ ရက်နေ့ကစပြီး အလုပ်အကိုင်များလျှော့ချနေပြီ ဖြစ်ပါတယ်။

Facebook ၊ WhatsApp ၊ Instagram ၊ Reality Labs တို့မှာ အလုပ်အကိုင်နေရာပေါင်း ၁ သောင်းလျှော့ချသွားမှာဖြစ်ပြီး ဒါဟာ ပိုမိုအကျိုးရှိသက်ရောက်စေရန် Meta က ရည်ရွယ်တာဖြစ်ပါတယ်။

ထုတ်ပယ်ရန် ရည်ရွယ်ထားတဲ့ ဝန်ထမ်းများထံသို့ ကြေညာရန် မန်နေဂျာများအား Meta က အသိပေးပြီးနောက် အခုလိုဆောင်ရွက်လိုက်တာဖြစ်ပါတယ်။

Metaverse ကုမ္ပဏီအသီးသီးရှိ မန်နေဂျာများထံသို့ ဧပြီ ၁၉ ရက်နေ့ကအသိပေးပြီးနောက် ထိုရာထူးနေရာ ၁ သောင်းထဲကမှ ဘယ်နှဦးဖယ်ရှားမလဲဆိုတာတော့ သေချာမသိရသေးပါဘူး။

Meta မှ အသင်းအဖွဲ့များကို ပြန်လည်ဖွဲ့စည်းမယ်လို့လည်း Bloomberg News မှ ဖော်ပြခဲ့ပါတယ်။

အိမ်ကနေအလုပ်လုပ်နိုင်တဲ့ မြောက်အမေရိကမှ ဝန်ထမ်းတွေကိုလည်း အချက်အလက်များ စီမံဆောင်ရွက်ပေးဖို့ အမိန့်ပေးထားကြောင်း သိရှိရပါတယ်။

Meta က နိုဝင်ဘာလမှာ အလုပ်အကိုင် ၁၃ ရာခိုင်နှုန်းဖြစ်တဲ့ ၁၁,၀၀၀ ကိုလည်းလျှော့ချထားပြီးဖြစ်ပါတယ်။

ဒါကြောင့် အချိန် ၆ လခန့်အတွင်း ဝန်ထမ်းပေါင်း ၂၁,၀၀၀ ထုတ်ပစ်မယ့်သဘောဖြစ်ပါတယ်။
Meta က အသင်းဘတ်ဂျက်သတ်မှတ်ခြင်းမှာ နှောင့်နှေးနေသလို အလုပ်ထုတ်ပယ်မှုများ ပိုများလာမယ်လို့ ထင်ကြေးများထွက်ပေါ်နေကြောင်း WION က ၂၀၂၃ ဖေဖော်ဝါရီမှာ တင်ပြခဲ့ပါတယ်။

"ဧပြီနှောင်းပိုင်းမှာ စီးပွားရေးဆိုင်ရာအဖွဲ့များနဲ့ မေလနှောင်းပိုင်းမှာ နည်းပညာဆိုင်ရာအဖွဲ့များ ပြန်လည်ဖွဲ့စည်းခြင်း၊ အလုပ်ထုတ်ပယ်ခြင်းများ ကြေညာသွားဖို့မျှော်မှန်းထားပါတယ်" လို့ Meta တည်ထောင်သူ'မာ့ခ်ဇူကာဘက်ခ်'က မတ်လက ရေးသားဖော်ပြခဲ့ပါတယ်။

ဇူကာဘက်ခ်ဆိုခဲ့တဲ့အတိုင်း Meta က ဘဏ္ဍာရေး၊ တရားဥပဒေ၊ လူသားအရင်းအမြစ်စတဲ့ ကဏ္ဍတွေကိုဖြတ်တောက်ရန် စီစဉ်နေပါတယ်။

CNBC TV18 ရဲ့တင်ပြချက်အရ ဒုတိယအကြိမ်အလုပ်လျှော့ချရာမှာ အိန္ဒိယမှဝန်ထမ်းများလည်း သက်ရောက်လာနိုင်ပါတယ်။

အလုပ်ထုတ်ခံရတဲ့ Meta ဝန်ထမ်းအများအပြားဟာ ကုမ္ပဏီလည်ပတ်ရာနေရာများမှာ ထောင်ချီအလုပ်ဖြုတ်ခံရတဲ့အကြောင်းတွေကို LinkedIn မှာ ဖော်ပြလာကြပါတယ်။

ဖေ့စ်ဘွတ်ခ်မှ စီးပွားရေးပရိုဂရမ်မန်နေဂျာဟောင်း 'ထရီဇာဂျီမီနက်ဇ်'က LinkedIn မှာဖော်ပြရာမှာ ဒီမနက်အိပ်ရာနိုးလာတော့ Meta ကနေ အလုပ်ထုတ်ခံရသူတွေထဲမှာ သူလည်းပါဝင်ကြောင်း၊ စိတ်ပျက်ရပေမယ့် ၃ နှစ်နီးပါးအတွင်း အရည်အသွေးပြည့်ဝတဲ့ လက်တွဲဖော်တွေနဲ့ တွဲလုပ်ခဲ့ရတဲ့အတွက် အလွန်ကျေနပ်မိကြောင်း ဖော်ပြထားပါတယ်။

# Source: WION
#World_Business #Facebook #Instagram #Whats App #အလုပ်စဖြုတ် #YMG #Yangon_Media_Group

#Local_News
Published_ 20 April 2023

ရွှေတိဂုံစေတီတော်မြတ်ကြီးအား သံဃာတော် (၁၁၁၁၁)ပါးဖြင့် ဗုဒ္ဓါဘိသေကအနေကဇာတင် မင်္ဂလာအခမ်းအနားနှင့် ဆွမ်းဆန်စိမ်း စုပေါင်းလောင်းလှူပွဲမင်္ဂလာအခမ်းအနားများ ကျင်းပပြုလုပ်သွားမည်ဖြစ်ကြောင်း သိရသည်၊၊

အဆိုပါ အခမ်းအနားကို လာမည့်ကဆုန်လဆန်း(၁၄) ရက်မေလ( ၂ )ရက်တွင် ကျင်းပသွားမည်ဟု အခမ်းအနားကျင်းပရေးဦးစီးကော်မတီမှ ထုတ်ပြန်ထားသည်၊၊

ယင်းအခမ်းအနားကို ရန်ကုန်တိုင်းဒေသကြီးအစိုးရအဖွဲ့မှ ကြီးမှူးကျင်းပမည်ဖြစ်ပြီး ရွှေတိဂုံ စေတီတော် အထက်ပစ္စယံနှင့်ပြည်သူ့ရင်ပြင်၌ ကျင်းပသွားမည်ဖြစ်သည်၊၊

အခမ်းအနားကို နိုင်ငံတော်ဩဝါဒါစရိယ ဆရာတော်ကြီးများ၊ နိုင်ငံတော်သံဃမဟာနာယကအဖွဲ့ ဆရာတော်ကြီးများ၊ နိုင်ငံတော်ဗဟို သံဃာ့ဝန်ဆောင်ဆရာတော်ကြီးများ၊ တိပိဠကကောဝိဒဆရာတော်ကြီးများ တိုင်းဒေသကြီး သံဃာမဟာနာယကအဖွဲ့ဆရာတော်ကြီးများ၊ မြို့နယ်သံဃာမဟာနာယကအဖွဲ့ ဆရာတော်ကြီးများ အပါအဝင် ရန်ကုန်တိုင်းဒေသကြီးအတွင်းရှိ ဘုန်းတော်ကြီးကျောင်းအားလုံး၏ ကျောင်းထိုင်ဆရာတော်ကြီးများနှင့် ပရိယတ္တိစာသင်တိုက်များမှ သံဃာတော်၊ ဆရာတော်များကို ပင့်ဆောင်ပြီး စုပေါင်းလှူဒါန်းပူဇော်သွားမည်ဖြစ်သည်ဟု သိရသည်၊၊

အလှူရှင်များအနေဖြင့်လည်း မိမိတို့တတ်စွမ်းသမျှ လှူဖွယ်ဝတ္ထုငွေများနှင့်လှူဖွယ်ပစ္စည်းများကို လာရောက်လှူဒါန်းနိုင်သည်ဟု အခမ်းအနားကျင်းပရေး ဦးစီးကော်မတီမှတိုက်တွန်းနှိုးဆော်ထားကြောင်း သိရသည်၊၊

#ymg/tthl #Local_News #ရွှေတိဂုံ #အနေကဇာတင် #YMG
#Yangon_Media_Group