Published 5 June 2022

တရုတ်နိုင်ငံဟာ တနင်္ဂနွေနေ့ကယာဉ်မှူးတွေလိုက်ပါသွားတဲ့ အာကာသယာဉ် ဆိန်းကျိုး-၁၄ ကို ‌အောင်မြင်စွာ လွှတ်တင်ခဲ့ပါတယ်။ အာကာသယာဉ်မှူး(၃)ဦးဟာ ကမ္ဘာပတ်လမ်းကြောင်းက အာကာသစခန်းရှိ ထျင်းဟဲမော်ဂျူးထဲမှာ ခြောက်လကြာနေထိုင်ကြမှာဖြစ်ပါတယ်။

တနင်္ဂနွေနေ့ မနက် ဒေသစံတော်ချိန် ၁၀နာရီ၄၄မိနစ်မှာ တရုတ်နိုင်ငံအနောက်မြောက်ပိုင်း ဂိုဘီသဲကန္တာရက ကျိုးချွမ်းဂြိုဟ်တုလွှတင်ရေးစင်တာကနေ ဆိန်းကျိုး-၁၄ကိုသယ်ဆာင်တဲ့ 2F သယ်ဆောင်ရေးဒုံကျည်နှစ်စင်းကို လွှတ်တင်ခဲ့ပါတယ်။

Source CCTV+

Published 5 June 2022

ဘင်္ဂလားဒေ့ရှ်နိုင်ငံ အရှေ့တောင်ပိုင်းရှိ ဆိပ်ကမ်းမြို့တစ်မြို့က ကွန်တိန်နာဝင်းမှာ မီးအကြီးအကျယ်လောင်ကျွမ်းခဲ့တဲ့ အတွက် အနည်းဆုံး လူ၂၈ဦးသေဆုံးပြီး လူတစ်ရာကျော် ဒဏ်ရာရရှိခဲ့ကြတယ်လို့ အရာရှိတွေနှင့် ဒေသမီဒီယာတွေက တနင်္ဂနွေနေ့က ပြောပါတယ်။

စနေနေ့ည သန်းခေါင်ယံမှာ  ဒတ်ချ်နှင့် ဘင်္ဂလားဒေ့ရှ်ဖက်စပ်တည်ထောင်ထားတဲ့ ဘီအမ်ကွန်တိန်နာဝင်းမှာ  မီးလောင်ကျွမ်းခဲ့ရာမှာည ကွန်တိနာတွေဟာ ဓာတုပစ္စည်းတွေ အပြည့်ထည့်သွင်းထားလို့ ပေါက်ကွဲမှုကြီးတွေဖြစ်ခဲ့ရပါတယ်။ ဘာကြောင့်လောင်ကျွမ်းရတယ်ဆိုတာ မသိရသေးပါဘူး။ အဲဒီကွန်တိန်နာဝင်းဟာ  ဒါကာမြို့တော် အရှေ့တောင်ဘက် ၁၃၄ မိုင်အကွာက စစ်တကောင်းမြို့မှာတည်ရှိပါတယ်။

သေဆုံးတဲ့သူတွေထဲမှာ မီးသတ်သမား အနည်းဆုံးငါးဦးပါဝင်ခဲ့ပါတယ်လို့ ဘင်္ဂလားဒေ့ရှ် မီးသတ်နှင့်ပြည်သူ့ကာကွယ်ရေးဌာန ညွှန်ကြားရေးမှူးချုပ်  ဗိုလ်ချုပ် မိန်းအူဒင်က ပြောပါတယ်။ ထိခိုက်ဒဏ်ရာရသူတွေထဲမှာ မီးသတ်သမား ၁၅ဦးပါဝင်ပြီး မီးလောင်ဒဏ်ရာတွေကို ကုသနေရတယ်လို့ သူကဆက်ပြောပါတယ်။

မီးကပျံ့နှံကူးစက်သွားတဲ့အတွက် ကနဦးပေါက်ကွဲမှုဖြစ်ပြီးနောက် ပေါက်ကွဲမှုတွေ ဆက်တိုက်အများကြီးဖြစ်ခဲ့တယ်လို့ သူကပြောပါတယ်။  မီးသတ်သမားတွေကို အကူအညီပေးဖို့ ဘင်္ဂလားဒေ့ရှ်စစ်တပ်က ပေါက်ကွဲပစ္စည်းကျွမ်းကျင်သူတွေကို ‌ခေါ်ယူခဲ့ရပါတယ်။ ပေါက်ကွဲမှုတွေကြောင့် အနီးနားက အဆောက်အဦတွေရဲ့ ပြတင်း အစိတ်စိတ်အမွှာမွှာဖြစ်ကုန်ပါတယ်။ လေးကီလိုမီတာအကွာအဝေးရှိခံစားကြရတယ်လို့ ဒေသမီဒီယာတွေက ရေးပါတယ်။

တနင်္ဂနွေအထိ မီးသတ်သမားတွေက မီးကိုထိန်းနိုင်အောင်ကြိုးစားငြှိမ်းသတ်နေရဆဲဖြစ်ပါတယ်။

တနင်္ဂနွေမနက်အထိ သေဆုံးသူဦးရေ ၂၈ ဦးရှိကြောင်း အက်ကတာ ရုပ်သံလိုင်းကသတင်းကြေညာပါတယ်။ သေဆုံးသူ အရေအတွက် ထပ်တိုးနိုင်တယ်လို့ အဲဒီဒေသက ခွဲစိတ်ဆရာဝန်တစ်ဦးကပြောပါတယ်။  သေဆုံးသူတော်တော်များများဟာ ချန်တိုဂရမ်ကောလိပ်ဆေးရုံမှာဖြစ်ကြပြီး ကျန်သူတွေက မီးလောင်တဲ့နေရာကနေ ရရှိတဲ့ အလောင်းတွေဖြစ်ပါတယ်။

ကွန်တိနာတော်တော်များများဟာ ဓာတုပစ္စည်းကွန်တိန်နာတွေဖြစ်လိမ့်မယ်လို့ ယုံကြည်ရပါတယ်။ ဘင်္ဂလားဒေ့ရှ်ရဲ့ အဓိက ပင်လယ်ဆိပ်ကမ်း စစ်တကောင်းမြို့ရဲ့ ၂၀ကီလိုမီတာအကွာမှာ အဲဒီကွန်တိန်နာဝင်းတည်ရှိတာဖြစ်ပါတယ်။

Source NPR

Published 5 June 2022

အဖြူရောင်အခွံ..မျက်လုံးနီနီနှင့် လိပ်ကလေးတစ်ကောင်ကို ဆွစ်ဇာလန်နိုင်ငံ အနောက်ပိုင်း ဆာဗီယွန်က အပူပိုင်း တိရိစ္ဆာန် ဥယျာဉ်ကလေးအတွင်း မေလက မွေးဖွားခဲ့ပါတယ်။ ဒီလိပ်ကလေးဟာ လှောင်မွေးတာ ဒါမှမဟုတ် သဘာဝတောရိုင်းထဲမှာ မွေးတဲ့အထဲမှာ  ပထမဆုံးသော ဂါလာပါဂိုးစ် ထူးခြား ပန်းနုရောင်လိပ် ဖြစ်ပါတယ်လို့ ဆာဗီယွန်အပူပိုင်းငါးပြတိုက် ညွှန်ကြားရေးမှူး ဖိလစ် မိုရယ်လ်ကပြောပါတယ်။

Source AFP

Published 5 June 2022

ယူကရိန်းမြို့တော် ကိဗ်မှာ ဇွန်၅ ရက် တနင်္ဂနွေနေ့(ဒီကနေ့)မနက်စောစောပိုင်းမှာ ပေါက်ကွဲမှုတွေ အများအပြားဖြစ်ခဲ့တယ်လို့ မြို့တော်ဝန် ဗစ်တာလီကလစ်ရှ်ကိုက ပြောပါတယ်။ မြို့တော်ကိဗ်နှင့်ဆင်ခြေဖုံးအရပ်တွေမှာ လူတွေက ပုံမှန်လိုလှုပ်ရှားသွားလာနေကြတဲ့ ရက်သတ္တပေါင်းများစွာ အကြာမှာ ဒါဟာ ပထမဆုံသဲကြီးမဲကြီး တိုက်ခိုက်မှုဖြစ်ပါတယ်။

“မြို့တော်ရဲ့ ဒန်ညတ်စကီးနှင့် နီပရောစကီး ခရိုင်တွေမှာ ပေါက်ကွဲမှုတော်တော်များများဖြစ်ခဲ့ပါတယ်” လို့ ကလစ်ရှ်ကိုက တယ်လီဂရမ်မှာရေးပါတယ်။ အဲဒီဒေသတွေမှာ ကယ်ဆယ်ရေးတွေစလုပ်နေပါပြီ လို့လည်း သူကပြောပါတယ်။

ပေါက်ကွဲမှုဖြစ်ပြီးနောက် မီးခိုးလုံကြီးတွေ အကြာကြီးပဲတက်နေခဲ့တာကို  ရိုက်တာရဲ့ မျက်မြင်သက်သေတစ်ဦးကလည်း မြင်ခဲ့ပါတယ်။

အနည်းဆုံးလူ(၁)ဦးကို ဆေးရုံပို့လိုက်ရပြီး တနင်္ဂနွေမနက်အထိ အသေအပျောက်သတင်းပို့မှု  မရှိသေးဘူးလို့ မြို့တော်ဝန်က ဆက်ပြောပါတယ်။

ကိဗ်မြို့လယ်ကနေ ၁၂မိုင်ခန့်အကွာက သမိုင်းဝင်မြို့ ဘရိုဗရီမြို့တော်ဝန်က မီးခိုးကနေလာတဲ့ ကျပ်ခိုးတွေရဲ့ အနံတွေရနေတဲ့အတွက် ပြည်သူတွေကို အိမ်ထဲမှာနေကြဖို့ တိုက်တွန်း ထားပါတယ်။

မော်စကိုက အရှေ့နှင့်တောင်ဘက်ကို စစ်ရေးအာရုံစိုက်လုပ်ဆောင်နေပြီးနောက် ယူကရိန်းမှာ ရုရှားရဲ့တိုက်ခိုက်မှုတွေနှင့် အပျက်အစီးတွေ များပြားနေပေမယ့် ကိဗ်ကပြည်သူတွေဟာ ရက်သတ္တပတ်ပေါင်းမျာစွာ တိုက်ခိုက်မှုသိသိသာသာ မရှိဘဲနေခဲ့ကြရတာ ရက်သတ္တပတ်များစွာရှိခဲ့ပါတယ်။

လေကြောင်းအချက်ပေးသံတွေက ပုံမှန်ကြားခဲ့ကြရပေမယ့် မြိုတော်မှာ အကြီးအကျယ်တိုက်ခိုက်မှုမရှိခဲ့တာဖြစ်ပါတယ်။

Source Reuters

Published 5 June 2022

လေယာဉ်ငယ်ကလေးတစ်စီးဟာ ဒီလာဝဲပြည်နယ် ရီဟိုဘုတ် ကမ်းခြေအပေါ်က ကန့်သတ်ထားတဲ့လေပိုင်နက်အတွင်း စနေနေ့က မှားယွင်းဝင်ရောက်လာတဲ့အတွက် အမေရိကန်သမ္မတ ဂျိုးဘိုင်ဒင်နှင့် သမ္မတကတော် ဂျေးလ်ဘိုင်ဒင်တို့နှစ်ဦးကို ခေတ္တ အပြင်သို့ ကယ်ထုတ်ခဲ့ရတယ်လို့ အိမ်ဖြူတော်က ပြောပါတယ်။

အဲဒီလေယာဉ်ငယ်ကို လေယာဉ်ပျံတွေနှင့် ကြပ်မတ်ပြီး သတ်မှတ်လေကြောင်းပိုင်နက် အပြင်ဘက်ကို ထုတ်ပစ်လိုက်ရတယ်လို့ အမေရိကန် လျှို့ဝှက်ထောက်လှမ်းရေး ပြောရေးဆိုခွင့်ရ အန်သိုနီ ဂူဂလီမီက ပြောပါတယ်။ အမည်နာမထုတ်ပြောဆိုခြင်းမပြုထားတဲ့ အဲဒီလေယာဉ်မှူးကို မေးမြန်းစရာတွေဆက်လုပ်မယ်လို့ သူကပြောပါတယ်။

ကနဦးစုံစမ်းစစ်ဆေးမှုအရ လေယာဉ်မှူးဟာ မှန်ကန်တဲ့ ရေဒီယိုချယ်နယ်လ်ကိုမသုံးခဲ့တဲ့အပြင် NOTAMS (Notice to Airmen ကိုမလိုက်နာခဲ့ကြောင်းတွေ့ရပါတယ်။ ထုတ်ပြန်ထားတဲ့ ပျံသန်းရေးလမ်းညွှန်ကိုလည်းသူမလိုက်နာခဲ့ဘူးလို့ သိရပါတယ်။

စနေနေ့ မွန်းလွဲ(၁)နာရီထိုးခါနီးမှာ ယခုဖြစ်ရပ် ပေါ်ပေါက်ခဲ့တာဖြစ်ပြီး သမ္မတရဲ့ ယာဉ်တန်းက မြို့ထဲကို စီတန်းထွက်သွားပြီးမှ ကမ်းခြေက အိမ်ကိုပြန်မောင်းလာကြောင့် ပိတ်ရက်လူစည်ကားနေတဲ့ ရိုဟိုဘုတ်ခ်ကမ်းခြေမှာ စိတ်ရှုပ်ထွေးမှုတွေဖြစ်စေခဲ့ပါတယ်။

ကြိုတင်ကာကွယ်မှုတွေကို‌ ဆောင်ရွက်ခဲ့တာဖြစ်တယ်လို့ ထောက်လှမ်းရေးက ပြောပါတယ်။ ဒါပေမယ့် သမ္မတကို သိသာတဲ့ အန္တရာယ်ဖြစ်ပေါ်ခဲ့ခြင်းမရှိပါဘူးလို့လည်း ထောက်လှမ်းရေးအရာရှိတစ်ဦးကပြောပါတယ်။

Source Reuters

#WorldNews
Published 5June 2022

မြေငလျင်ဒဏ်ကြောင့် ပိတ်မိနေသူများကို ကယ်ဆယ်နိုင်ရန်အတွက် သိပ္ပံပညာရှင်များက သူတို့လေ့ကျင့်ပေးထားတဲ့ ကြွက်များကို မိုက်ခရိုဖုန်းတပ်ဆင်ထားတဲ့ ကျောပိုးအိတ်သေးသေးလေးပတ်ပေးထားပါတယ်။

ဒါမှ ကယ်ဆယ်ရေးအဖွဲ့တွေက ပိတ်မိသူများနဲ့ မိုက်ခရိုဖုန်းကတဆင့် ဆက်သွယ်ပြောဆိုနိုင်မှာဖြစ်ပါတယ်။

အကျိုးအမြတ်မယူတဲ့အဖွဲ့အစည်း APOPO အတွက် တန်ဇန်နီယာ မော်ရိုဂိုရိုမှ ာအလုပ်လုပ်နေတဲ့ အသက် ၃၃ နှစ်ရှိ သုတေသနသိပ္ပံပညာရှင်ဒေါက်တာ'ဒွန်နာကင်း'က ကြွက်သူရဲကောင်းများဆိုတဲ့ အစီအစဉ်ကို လုပ်ဆောင်နေတာဖြစ်ပါတယ်။

ကြွက်လေးတွေ အံဝင်ခွင်ကျသယ်ဆောင်နိုင်တဲ့ ကျောပိုးအိတ်ထဲမှာ မိုက်ခရိုဖုန်း၊ ဗီဒီယိုပစ္စည်းကိရိယာနဲ့ တည်နေရာစောင့်ကြည့်ရေးပစ္စည်းများပါဝင်ပြီး လက်တွေ့ငလျင်လှုပ်ခတ်မှုတွေကျရင် ပိတ်မိနေသူတွေနဲ့ ဆက်သွယ်ပြောဆိုနိုင်အောင် ကြိုးပမ်းနေကြတာဖြစ်ပါတယ်။

လက်ရှိမှာတော့ တကယ့်ငလျင်အပျက်အစီးနဲ့တူအောင် ပုံတူခင်းကျင်းပြုလုပ်ပြီး ကြွက်များကိုကယ်ဆယ်ရေး လှုပ်ရှားမှုများဖြင့် လေ့ကျင့်ပေးနေပါတယ်။

"ကြွက်တွေက နေရာကြိုကြားတွေကနေဖြတ်ပြီး ပိတ်မိနေတဲ့သူတွေဆီသွားရောက်နိုင်ပါတယ်၊ တကယ့်လက်တွေ့တော့ မလုပ်ရသေးပေမယ့် ငလျင်အပျက်အစီးပုံစံတူတစ်ခုပြုလုပ်ထားပါတယ်၊ ကျောပိုးအိတ်အသစ်တွေရတဲ့အခါ ကျွန်မတို့တည်ရှိရာနေရာကနေ အပျက်အစီးတွေကြားထဲက ကြွက်ရောက်ရှိတဲ့နေရာကို ကြားသိရမှာပါ၊ ကြွက်ရဲ့မိုက်ခရိုဖုန်းကနေ ပိတ်မိနေသူတွေနဲ့ဆက်သွယ်နိုင်မှာပါ" လို့ 'ကင်း'ကပြောပြပါတယ်။

အခုလက်ရှိ ကြွက် ၇ ကောင်ကိုလေ့ကျင့်ထားပြီဖြစ်ပြီး မကြာခင်မှာ တကယ်လက်တွေ့ကယ်ဆယ်ရေးလုပ်ဆောင်ရနိုင်တဲ့ တူရကီကိုပို့ဆောင်သွားမှာဖြစ်ပါတယ်။

တူရကီနိုင်ငံဟာ မကြာခဏငလျင်လှုပ်ခတ်လေ့ရှိပြီး GAE ရှာဖွေကယ်ဆယ်ရေးအဖွဲ့က ကြွက်တွေနဲ့စမ်းသပ်လုပ်ဆောင်ဖို့ သဘောတူထားပါတယ်။

သူတို့ရဲ့လေ့ကျင့်မှုကိုတိုးချဲ့လျက်ရှိပြီး ဒီထက်ပိုမိုရှုပ်ထွေးခက်ခဲတဲ့အလုပ်များ လုပ်နိုင်အောင် လေ့ကျင့်ပေးနေပါတယ်။

ကြွက်တွေက မြေမြှုပ်မိုင်းရှာဖွေခြင်း၊ တီဘီရောဂါရှာဖွေခြင်း၊ တိရိစ္ဆာန်များတွင်ဖြစ်တတ်သည့် ဘရူဆယ်လိုဆစ်ကူးစက်ရောဂါရှာဖွေခြင်းတို့မှာလည်း ကူညီနိုင်မယ်လို့ သုတေသီများကယုံကြည်နေပါတယ်။

မြေမြှုပ်မိုင်းမပေါက်ကွဲနိုင်လောက်အောင် ကြွက်တွေကပေါ့ပါးသွက်လက်ကြပါတယ်။

ကြွက်တွေက မသန့်ရှင်းတဲ့သတ္တဝါတွေဖြစ်တယ်ဆိုတဲ့ ယူဆချက်အလွဲများရှိနေပြီး အသက်တွေကယ်ဆယ်ပေးနိုင်အောင် လျင်မြန်စွာလေ့ကျင့်ပေးနိုင်တယ်လို့ 'ကင်း'ကဆိုပါတယ်။

"သူတို့က အလွန်သွက်လက်လျင်မြန်ပါတယ်၊ ပတ်ဝန်းကျင်အခြေအနေအမျိုးမျိုးမှာ ကောင်းကောင်းမွန်မွန်သွားလာ လှုပ်ရှားနိုင်ပါတယ်၊ ရှာဖွေရေးနဲ့ ကယ်ဆယ်ရေးလုပ်ဖို့အတွက် ကြွက်တွေက သင့်တော်ပါတယ်" လို့ဆိုပါတယ်။

ကြွက်တွေကခွေးတွေထက် အရွယ်အစားသေးပြီး အလိုက်သင့်သွားလာနိုင်တဲ့ အားသာချက်ရှိနေပါတယ်။

"လူ့အသက်တွေကို ကယ်ဆယ်နိုင်ဖို့မျှော်လင့်ပါတယ်၊ စမ်းသပ်ချက်ရလာဒ်တွေက တကယ်ကိုကျေနပ်စရာကောင်းပါတယ်" လို့ ပြောပြသွားပါတယ်။

Source: DailyMail
#Yangon_Media_Group