Published_ 5 September 2023

ကြောင်တွေက တူနာငါးကို စွဲလမ်းနှစ်သက်ရတဲ့ အကြောင်းအရင်းက အူမာမီလို့ခေါ်တဲ့ အနံ့အရသာကို ကြိုက်နှစ်သက်တာကြောင့် ဖြစ်နေနိုင်ကြောင်း Science မဂ္ဂဇင်းမှာ ဩဂုတ်လက ဖော်ပြခဲ့ပါတယ်။

ကြောင်လေးတွေက ငါးတွေ အထူးသဖြင့် တူနာကို စွဲလမ်းနှစ်သက်ရတဲ့ အကြောင်းအရင်းနဲ့ ပတ်သက်ပြီး သိပ္ပံပညာရှင်တွေအတွက် စဥ်းစားစရာဖြစ်နေပါတယ်။

အူမာမီဆိုတဲ့ အခေါ်အဝေါ်က မချိုလွန်း မခါးလွန်း မချဥ်လွန်းတဲ့အပြင် အနံ့စူးရှတဲ့ အစားအစာမျိုးကို ဆိုလိုပါတယ်။

ယခုနောက်ဆုံးတွေ့ရှိချက်အရ ကြောင်တွေရဲ့ အရသာခံဖုတွေဟာ အူမာမီအရသာဘက်ကို ထူးထူးခြားခြား စွဲဆောင်နေတယ်လို့ တွေ့ရှိခဲ့ပါတယ်။

အဆိုပါ တွေ့ရှိချက်က အိမ်မွေးတိရိစ္ဆာန်တွေ ကြိုက်နှစ်သက်တဲ့ အရာတွေကို ပိုမိုနားလည်လာစေရန် အရေးကြီးပြီး အိမ်မွေးတိရိစ္ဆာန် အစားအစာနဲ့ ပစ္စည်းထုတ်လုပ်ရေး ကုမ္ပဏီများအနေဖြင့် ထုတ်လုပ်ရာမှာ တိုးတက်လာစေဖို့ ရည်ရွယ်ကြောင်း မဲဂျီတက္ကသိုလ်မှ မော်လီကျူးဇီဝပညာရှင် ယာဆူကာတိုဒါက ပြောပြသွားပါတယ်။

ကြောင်တစ်ကောင်ရဲ့ အရသာခံဖုလိုမျိုး ဆဲလ်တွေကို သုတေသီတွေက စမ်းသပ်ခဲ့ရာမှာ ကြောင်တွေရဲ့ အရသာခံဖုတွေက တူညီပေမယ့် အရသာလှုံ့ဆော်မှုကို တုန့်ပြန်ရာမှာတော့ မတူညီကြပါဘူး။

တူနာမှာတွေ့ရတဲ့ ဒြပ်ပေါင်းတွေ ပါဝင်တဲ့ အရည်နဲ့ မပါဝင်တဲ့အရည်တို့ကို စမ်းသပ်ခဲ့ရာမှာ ဒြပ်ပေါင်းပါဝင်တဲ့ အရည်ကို ကြောင်တွေက ပိုမိုနှစ်သက်ကြရာ အူမာမီအရသာကို ပိုမိုနှစ်သက်ကြတယ်လို့ ကောက်ချက်ချလို့ ရပါတယ်။

လူတွေ ချိုချဥ်ကြိုက်သလိုပဲ အူမာမီဟာလည်း ကြောင်တွေအတွက် ချိုချဥ်လို ဖြစ်နေကြောင်း၊ ခွေးတွေကတော့ အချိုရော အူမာမီရောပါ အရသာခံနိုင်ပြီး အစားမရွေးကြကြောင်း တိုဒါက ရှင်းပြသွားပါတယ်။
Source: The Jerusalem Post.
#World_Science
#YMG #Yangon_Times

Published_ 5 September 2023

အရိုးပွရောဂါဆိုတာက အရိုးသိပ်သည်းဆ လျော့နည်းလာပြီး အရိုးတွေ ကြွပ်ဆတ်လာတာ ဖြစ်ပါတယ်။

ထိုအခါမှာ အနည်းငယ်ထိခိုက်မိရုံဖြင့်ပင် ကျိုးတတ်ပြီး များသာအားဖြင့် သက်ကြီးရွယ်အိုတွေမှာ ဖြစ်တတ်ပါတယ်။

ဒါ့အပြင် ကိုယ်လက်လှုပ်ရှားမှု မရှိခြင်း၊ အာဟာရချို့တဲ့ခြင်း၊ မျိုးရိုးလိုက်ခြင်းတို့ကြောင့်လည်း အရိုးပွရောဂါ ဖြစ်နိုင်ချေများစေပါတယ်။

အရိုးပွရောဂါကို ကာကွယ်ပေးနိုင်မယ့် နေထိုင်စားသောက်မှုပုံစံများကို ဖော်ပြပေးလိုက်ပါတယ်။
 
(၁) ကယ်လ်စီယမ် လုံလောက်စွာစားသုံးပါ
နို့ထွက်ပစ္စည်းများ၊ အစိမ်းရောင် ဟင်းသီးဟင်းရွက်များ စတဲ့ ကယ်လ်စီယမ်ကြွယ်ဝတဲ့ အစားအစာများကို လုံလောက်စွာ စားသုံးပေးသင့်ပါတယ်။
 
(၂) ဗိုက်တာမင်-ဒီစားသုံးပါ
ငါး၊ ကြက်ဥအနှစ်များစတဲ့ ဗိုက်တာမင်-ဒီကြွယ်ဝတဲ့ အစားအစာများကို မျှတစွာ စားသုံးသင့်ပြီး လိုအပ်ရင် ဖြည့်စွက်စာပါ စားသုံးရပါမယ်။
 
(၃) လေ့ကျင့်ခန်းပြုလုပ်ပါ
လမ်းလျှောက်ခြင်း၊ ဝိတ်မခြင်းစတဲ့ လေ့ကျင့်ခန်းများပြုလုပ်ပြီး အရိုးသိပ်သည်းဆကို များပြားအောင် ပြုလုပ်ရပါမယ်။
 
(၄) ဆေးလိပ်ဖြတ်ပါ
ဆေလိပ်သောက်ခြင်းဟာ အရိုးပွစေတာကြောင့် အရိုးကျန်းမာရေး ထိန်းသိမ်းဖို့အတွက် ဆေးလိပ်ဖြတ်သင့်ပါတယ်။
 
(၅) အယ်လ်ကိုဟောကို ကန့်သတ်သောက်သုံးပါ
အရက် အလွန်အကျွံ သောက်ခြင်းက အရိုးကျန်းမာရေးကို ထိခိုက်စေတာကြောင့် အရိုးပွခြင်း လျှော့ချနိုင်ဖို့ အရက်ကို အကန့်အသတ်ဖြင့်သာ သောက်သုံးသင့်ပါတယ်။
 
(၆) ကော်ဖီအလွန်အကျူးသောက်ခြင်း ရှောင်ရှားပါ
ကော်ဖီ အများအပြားသောက်သုံးပါက ကယ်လ်စီယမ်စုပ်ယူမှုကို ကျဆင်းစေတာကြောင့် လျော်သင့်သလိုသာ သောက်သုံးသင့်ပါတယ်။
 
(၇) ပြုတ်ကျလဲကျခြင်းမဖြစ်အောင် ကာကွယ်ပါ
လူလဲကျခြင်းမျိုး မဖြစ်ရအောင် အိမ်ထဲမှာ လက်ရန်းများတပ်ဆင်ခြင်း၊ သင့်လျော်တဲ့ ခြေကာများ ဝတ်ဆင်ခြင်းတို့ ပြုလုပ်သင့်ပါတယ်။
 
(၈) ကျန်းမာရေးစစ်ဆေးမှု ပုံမှန်ပြုလုပ်ပါ
ကျန်းမာရေး စောင့်ရှောက်မှုထံ ပုံမှန်သွားရောက်ကာ အရိုးကျန်းမာရေး စစ်ဆေးပြီး လိုအပ်ရင် ကုသမှုခံယူသင့်ပါတယ်။
 
(၉) ဟော်မုန်းအစားထိုးကုသနည်း (HRT)
ဟော်မုန်းအစားထိုးကုသခြင်းက တစ်ခါတရံမှာ အရိုးပွခြင်းဖြစ်နိုင်ချေ လျော့နည်းစေတာကြောင့် ကုသမယ်ဆိုရင် ဆရာဝန်နဲ့ တိုင်ပင်သင့်ပါတယ်။
 
(၁၀) ဆေးဝါးဖြင့်ထိန်းသိမ်းကုသခြင်း
အရိုးပွရောဂါအတွက် ဆေးဝါးသုံးစွဲနေရတယ်ဆိုရင် ညွှန်ကြားတဲ့အတိုင်း သုံးစွဲရန်နဲ့ ထိရောက်မှုကို သိရှိရန် အမြဲစစ်ဆေးနေရမှာ ဖြစ်ပါတယ်။
Source: DoctorNDTV
#World_Health
#YMG #Yangon_Times

ဆူဒန်နိုင်ငံမှာ လက်နက်ကိုင်တိုက်ခိုက်မှုများ ဖြစ်ပွားနေတာကြောင့် အကြီးမားဆုံး ရေနံချက်စက်ရုံ ပိတ်သိမ်းလိုက်ရကာ ထောက်ပံ့ရေးကွင်းဆက်မှာ ထိခိုက်လာပြီး လောင်စာပြတ်လပ်မှုများ ပိုမိုဆိုးရွားလာပါတယ်။
#World_News
#Published_ 4 September 2023
#YMG #Yangon_Times

Published_ 4 September 2023

ယူကရိန်းသမ္မတ ဗိုလိုဒီမီယာဇယ်လန်စကီက ကာကွယ်ရေးဝန်ကြီး အိုလက်ခ်ဆီရက်ဇ်နီကော့ဗ်ရဲ့ နေရာကို အစားထိုးခန့်အပ်ရန် စီစဥ်နေကြောင်း စက်တင်ဘာ ၃ ရက်နေ့က ကြေညာလိုက်ပါတယ်။

ဒါဟာ ကာကွယ်ရေးဝန်ကြီးဌာနအတွင်း ချဥ်းကပ်ပြောင်းလဲမှု တစ်ခုဖြစ်တယ်လို့ ဆိုလိုက်ပါတယ်။

အိုလက်ခ်ဆီရက်ဇ်နီကော့ဗ်ဟာ ရုရှား-ယူကရိန်း စစ်ပွဲကြီးမှာ ရက်ပေါင်း ၅၅၀ ကျော်ကြာအောင် ဖြတ်သန်းခဲ့ကြောင်း၊ စစ်ပွဲပေါ် ချဥ်းကပ်ပုံအသစ်တွေ၊ စစ်ဘက်ဆိုင်ရာမှာရော လူမှုအသိုင်းအဝိုင်းမှာပါ အခြားသော ဆက်ဆံလုပ်ကိုင်ရေးပုံစံမျိုးတွေ လိုအပ်နေတယ်လို့ ယုံကြည်ကြောင်း ဇယ်လန်စကီက ညနေခင်းမိန့်ခွန်းမှာ ပြောကြားသွားပါတယ်။

ရက်ဇ်နီကော့ဗ်နေရာမှာ အစားထိုးမယ့်လူအဖြစ် ယမန်နှစ်က တိုင်းပြည်ဘဏ္ဍာရန်ပုံငွေအဖွဲ့မှာ အကြီးအကဲအဖြစ် တာဝန်ထမ်းဆောင်နေခဲ့တဲ့ ခရိုင်းမီးယားတာတာလူမျိုး ရပ်စ်တမ်အူမာရော့ဗ်ကို အမည်တင်ပြခဲ့ပါတယ်။

ယခုဆိုရင် အူမာရော့ဗ်က ကာကွယ်ရေးဝန်ကြီးဌာနရဲ အကြီးအကဲ ဖြစ်သင့်ကြောင်း၊ ပါလီမန်အနေနဲ့ သူ့ကို ထောက်ခံဖို့ မျှော်လင့်ကြောင်း ပြောကြားသွားပါတယ်။

ဒီလိုကြေညာချက်ကြောင့် ၂၀၂၂ ဖေဖော်ဝါရီလ ယူကရိန်းပဋိပက္ခစစ်ပွဲအတွင်း ယူကရိန်းကာကွယ်ရေးဌာနမှာ အကြီးမားဆုံး လှုပ်ခတ်မှုကြီး ဖြစ်လာဖွယ်ရှိပါတယ်။

၂၀၂၁ နိုဝင်ဘာလမှာ ကာကွယ်ရေးဝန်ကြီး ဖြစ်ခဲ့တဲ့ ရက်ဇ်နီကော့ဗ်က စစ်ပွဲအတွက် အနောက်တိုင်းမှ စစ်ရေးကူညီမှု ဒေါ်လာဘီလီဘံနဲ့ချီ ရရှိစေရန် ကူညီနိုင်ခဲ့ပေမယ့် ကာကွယ်ရေးဝန်ကြီးဌာနမှာ အဂတိလိုက်စားမှု စွပ်စွဲချက်တွေ ထွက်ပေါ်နေခဲ့ပါတယ်။

ကာကွယ်ရေးဝန်ကြီး ပြောင်းလဲဖို့က ပါလီမန်လွှတ်တော်မှ အတည်ပြုရမှာဖြစ်ပြီး အခုကိစ္စမှာ ဥပဒေပြုအမတ်အများစုမှ ထောက်ခံသွားဖွယ်ရှိနေပါတယ်။

ပါလီမန်အနေနဲ့ အူမာရော့ဗ်ကို ခန့်အပ်ရန် အသိအမှတ်ပြုမယ်လို့ ဇယ်လန်စကီက မျှော်မှန်းထားပါတယ်။

ဇယ်လန်စကီအနေနဲ့ အခြားစီမံကိန်းနေရာတွေမှာ တာဝန်ထမ်းဆောင်ရန် ကမ်းလှမ်းလာပါက ရက်ဇ်နီကော့ဗ်က လက်ခံသွားဖွယ်ရှိတယ်လို့ ပြောကြားခဲ့ကြောင်း ဒေသတွင်းမီဒီယာတွေက ဖော်ပြခဲ့ပါတယ်။

ယူကရိန်းအစိုးရအဖွဲ့အတွင်း အကျင့်ပျက်ခြစားမှု တိုက်ဖျက်ရေးများ ဆောင်ရွက်နေစဥ် ရက်ဇ်နီကော့ဗ်ကို ရာထူးမှထုတ်ပယ်ခဲ့တာ ဖြစ်ပါတယ်။

ယူကရိန်းဟာ ဥရောပသမဂ္ဂလိုမျိုး အနောက်တိုင်းအဖွဲ့အစည်းများထံ ဝင်ရောက်ရန် ကြိုးပမ်းနေတာကြောင့် အဂတိလိုက်စားမှုတွေကို တိုက်ဖျက်ဖို့ လိုအပ်နေပါတယ်။

နိုင်ငံတကာ အကျင့်ပျက်ခြစားမှု ဖော်ပြခြင်းညွှန်းကိန်းများအရ စုစုပေါင်းအဆင့်သတ်မှတ်ချက် ၁၈၀ မှာ ယူကရိန်းက ၁၁၆ မှာရပ်တည်နေပါတယ်။

ရက်ဇ်နီကော့ဗ်ကို အကျင့်ပျက်မှုဖြင့် စွပ်စွဲထားတာမျိုး မရှိပေမယ့် ကာကွယ်ရေးဝန်ကြီးဌာနမှာတော့ စစ်တပ်အတွက် ပစ္စည်းများ အမြတ်ထုတ်ခြင်းကိစ္စများ ရှိနေတယ်လို့ သိရပါတယ်။
Source: WION
#Ukraine_Crisis
#YMG #Yangon_Times

#World_Health
Published 4 September 2023

ပတ်ဝန်းကျင်ရှိ ရေများနဲ့ စားစရာတွေမှာ ပလတ်စတစ်အမှုန်များ တွေ့ရှိမှုများပြားလာတာကြောင့် အဆိုပါ မိုက်ခရိုပလတ်စတစ်များ လူသားတွေနဲ့ သတ္တဝါတွေမှာ အပြုအမူပြောင်းလဲလာစေတဲ့အထိ သက်ရောက်မှုများကို လေ့လာခဲ့ကြပါတယ်။

ထိုလေ့လာမှုကို မော်လီကျူးသိပ္ပံ နိုင်ငံတကာဂျာနယ်မှာ ဖော်ပြခဲ့ပါတယ်။

သုတေသီတွေက ပလတ်စတစ်ညစ်ညမ်းခြင်းရဲ့ သက်ရောက်မှုတွေကို လေ့လာခဲ့ကြကာ ပလတ်စတစ်အမှုန်တွေက ပတ်ဝန်းကျင်ကို ညစ်ညမ်းစေသလိုမျိုး ခန္ဓာကိုယ်မှာလည်း ညစ်ညမ်စေကြောင်း တွေ့ရှိခဲ့ကာ အထူးသဖြင့် အသက်အရွယ်ကြီးသူတွေမှာ ပိုမိုဆိုးရွားစေပါတယ်။

လက်ရှိသုတေသန တွေ့ရှိချက်အရ ပလတ်စတစ်အမှုန်တွေဟာ ပတ်ဝန်းကျင်ကနေတဆင့် လူသားတစ်ရှူးတွေထဲမှာ စုပြုံလာကြောင်း၊ သတ္တဝါတွေအပေါ်မှာ ပလတ်စတစ်တွေရဲ့ ကျန်းမာရေးသက်ရောက်မှုတွေကို လေ့လာရတာက အနည်းအကျဥ်းသာ ရှိသေးကြောင်း ရိုင်ယန်တက္ကသိုလ်မှ ဇီဝဆေးပညာနဲ့ ဆေးဝါးသိပ္ပံ တွဲဖက်ပရော်ဖက်ဆာရော့စ်က ပြောပြခဲ့ပါတယ်။

ကြွက်တွေအစာစားရာကနေ ပလတ်စတစ်အမှုန် ထိတွေ့မှုကို ၃ ပတ်ကြာအောင် သုတေသနပြုလုပ်ခဲ့ရာ အပြုအမူပိုင်း ပြောင်းလဲမှုတွေ တွေ့ရသလို အသည်းနဲ့ ဦးနှောက်တို့မှာလည်း ပြောင်းလဲမှုတွေ ဖြစ်ပေါ်လာတာ မြင်တွေ့လိုက်ရပါတယ်။

လူတွေမှာ မှတ်ဉာဏ်ချို့ယွင်းလာခြင်း (ဒီမန်ရှာ)လက္ခဏာမျိုးကို ကြွက်တွေမှာ တွေ့ခဲ့ရပါတယ်။

မိုက်ခရိုပလတ်စတစ်တွေ ဦးနှောက်ထဲကို ဝင်ရောက်လာပါက အဓိကအက်ဆစ်ပရိုတိန်းများကို လျော့နည်းစေကာ အယ်လ်ဇိုင်းမား၊ စိတ်ဓာတ်ကျခြင်းတို့လို အာရုံကြောချို့ယွင်းလာတဲ့ ရောဂါများ ဆက်စပ်နေပါတယ်။

ပလတ်စတစ်က ဦးနှောက်လုပ်ဆောင်ချက်တွေကို ထိခိုက်ပုံတွေ၊ အာရုံကြောချို့ယွင်းလာတဲ့ ရောဂါတွေ ဖြစ်ပေါ်လာစေပုံတို့ကို ပရော်ဖက်ဆာရော့စ်က ဆက်ပြီး လေ့လာချင်နေပါတယ်။

Source: The Jerusalem Post #World_Health #ပလတ်စတစ်အမှုန် #ခန္ဓာကိုယ်တွင်းစနစ်
#Yangon_Times

#World_Health
Published4 September 2023

ကင်ဆာဝေဒနာရှင်များ အထူးသဖြင့် အဆုတ်ကင်ဆာနဲ့ ရင်သားကင်ဆာဖြစ်သူတွေမှာ အာဟာရစားသောက်မှုက အရေးပါတဲ့ကဏ္ဍက ပါဝင်နေပါတယ်။

ကင်ဆာရောဂါ ကနဦးအဆင့်တွေမှာ အာဟာရဖြင့် ထိရောက်စွာ ကုသနိုင်တယ်လို့ ပညာရှင်များက ဆိုပါတယ်။

ဟင်းသီးဟင်းရွက်၊ အသီးအနှံ၊ ကောက်ပဲသီးနှံများက ရင်သားကင်ဆာလူနာတွေအတွက် အကျိုးဖြစ်စေတယ်လို့ ဒေလီ ရာဂျစ်ဂန္ဒီကင်ဆာသုတေသနစင်တာမှ အတိုင်ပင်ခံ ဒေါက်တာပန်ကပ်ဂိုယဲလ်က ပြောပြသွားပါတယ်။

ကင်ဆာကုသစဥ်အတွင်း ကုသနည်းတွေရဲ့ ဘေးထွက်ဆိုးကျိုးတွေကို ကာမိစေဖို့ အာဟာရ ညီညွတ်စွာ စားသောက်ဖို့က အရေးကြီးကြောင်း၊ အိန္ဒိယအစားအစာတွေထဲက ပဲအမျိုးမျိုး၊ ဒိန်ချဥ်တို့ဟာ တစ်ရှူးလုပ်ဆောင်ချက်နဲ့ ကိုယ်ခံအားလုပ်ဆောင်ချက်တို့အတွက် အရေးကြီးကြောင်း ပြောပြသွားပါတယ်။

ဓာတ်ရောင်ခြည်၊ ဓာတုကုထုံးတို့ဖြင့် ကုသနေစဥ် အာဟာရမျှတစွာ စားသုံးပေးပါက ဆိုးကျိုးများကို လျော့နည်းစေနိုင်ကာ လူနာရဲ့အသက်ဘဝကို တိုးတက်ကောင်းမွန်စေမှာ ဖြစ်ပါတယ်။

ဗိုက်တာမင် -အေ၊ စီ၊ အီး၊ ဆယ်လီနီယမ်၊ ဇင့်တို့က ဓာတ်တိုးဆန့်ကျင်ပစ္စည်းများဖြစ်ကာ ကုသမှုကာလနဲ့ ကုသပြီးစီးစဥ်ကာလတို့မှာလည်း ဘေးထွက်ဆိုးကျိုးများကို လျော့ပါးစေပါတယ်။

အိုမီဂါ-၃ ဖက်တီးအက်ဆစ်ဆိုရင် ဓာတ်ရောင်ခြည်၊ ဓာတုကုထုံးများခံယူထားတဲ့ အဆုတ်ကင်ဆာလူနာတွေမှာ ရောင်ရမ်းခြင်းကို ထိန်းညှိပေးနိုင်ပါတယ်။

ဘီတာ-ခရစ်ပ်တိုဇန်သင်းများတဲ့အခါ အဆုတ်ကင်ဆာဖြစ်နိုင်ချေနဲ့ ပျံ့ပွားမှုတို့ကို လျှော့ချပေးနိုင်ပြီး အစိမ်းရောင် ဟင်းသီးဟင်းရွက်တွေမှာ ပါဝင်တဲ့ ဖောလိတ်က ဆေးလိပ်သမားတွေမှာ အဆုတ်ကင်ဆာဖြစ်နိုင်ချေကို လျှော့ချပေးနိုင်ပါတယ်။

ကုသခံယူတဲ့ ကုထုံးပေါ်မူတည်ပြီး အစားအစာပြောင်းလဲနိုင်ကာ ဟင်းသီးဟင်းရွက်၊ အသီးအနှံ၊ ကာဗိုဟိုက်ဒရိတ်၊ ပရိုတိန်း၊ အဆီဓာတ်တို့ကို မျှတစွာ စားသုံးသင့်တယ်လို့ မွမ်ဘိုင်း ပီဒီဟင်ဒူဂျာဆေးရုံနဲ့ ဆေးဘက်ဆိုင်ရာ သုတေသနစင်တာမှ ဒေါက်တာဗီဂျေးပါတေးလ်က ပြောပြသွားပါတယ်။

Source: India Today #World_Health #ကင်ဆာအစောပိုင်းအဆင့်ကုသ
#Yangon_Media_Group