Published 29 Aug 2022
ငွေကြေးဖောင်းပွမှုတွေဟာ ခုန်ကျော်မြင့်တက်လာနေပြီး အဲဒါကို နှိမ်နှင်းဖို့ ထူးကဲတဲ့ကြိုးစားအားထုတ်မှုတစ်ခု ပြုလုပ်ဖို့ လိုအပ်နေပြီလို့ ကမ္ဘာ့ထိပ်တန်း ဘဏ္ဍာရေးအရာရှိချုပ်တွေက ရှင်းလင်းပြတ်သားစွာ ပြောဆိုလိုက်ကြပါတယ်။ အလုပ်အကိုင် ဆုံးရှုံးမှုတွေနှင့် ထွန်းသစ်စဈေးကွက်တွေမှာ လှိုင်းဂယက်တွေထကာ စီးပွားရေးကျဆင်းမှုတွေကြုံရနိုင်ခြေရှိနေတယ် လို့လည်းသူကပြောပါတယ်။
လက်ရှိအခြေအနေကတော့ ပေးဆပ်လို့ခံနိုင်ပါသေးတယ်။ ဒါပေမယ့် ဗဟိုဘဏ်တွေက ငွေကြေးဖောင်းပွမှု ကျွမ်းကျင်မှုတွေအပေါ် ယုံကြည်မှုကို ဆယ်စုများစွာ အချိန်ပေးတည်ဆောက်ခဲ့ပါတယ်။ ဒီစစ်ပွဲမှာ ကျရှုံးရတာဟာ ခေတ်သစ် ငွေကြေးမူဝါဒတွေရဲ့ အုတ်မြစ်တွေကို လှုပ်ခါပစ်နေ ပါတယ်။
“ငွေကြေးဖောင်းပွမှုကို သတ်မှတ်အဆင့်ပြန်ဆွဲယူဖို့ဆိုတာ ကျွန်တော်တို့ ယုံကြည်မှုကို ပြန်ရရှိ ထိန်းသိမ်းနိုင်ဖို့လိုအပ်တယ်” လို့ ဥရောပ ဗဟိုဘဏ် ဘုတ်အဖွဲ့ဝင် အစ္စဘယ် ရှန်နာဗဲလ် ကပြောပါတယ်။
“ ငွေကြေးဖောင်းပွမှုတွေ ကြာကြာမြင့်မားလေလေ၊ ပြည်သူတွေရဲ့ ဝယ်လိုအားကို ဆုံးဖြတ်ထိန်းသိမ်းထားနိုင်စွမ်းနှင့်ပတ်သက်တဲ့ ယုံကြည်မှုတွေ ကျဆင်းမယ့် အန္တရာယ်ရှိလေလေဖြစ်တယ်” လို့ သူမက ဆက်ပြောပါတယ်။
တိုးတက်မှုတွေထိခိုက်လာပြီး လူတွေ စပြီး အလုပ်လက်မဲ့ဖြစ်လာတာတောင် ဘဏ်တွေက ဆက်ပြီး လှုပ်ရှားဆောင်ရွက်နေသင့်ကြပါတယ်။
“ ကျွန်မတို့ စီးပွားရေးကျဆင်းမှုထဲ ဝင်လာတာတောင် ကျွန်မတို့မှာ ရွေးချယ်ဖို့ များများစားစား မကျန်တော့သည့်တိုင် မူဝါဒလမ်းကြောင်းအပေါ် ဆက်သွားနေကြရမယ်” လို့ ရှန်နာဗဲလ်က ပြောပါတယ်။
ကမ္ဘာ့ အကြီးဆုံးစီးပွားရေးနိုင်ငံတွေမှာ ငွေကြေးဖောင်းပွမှုက ကိန်းဂဏန်းနှစ်လုံးနီးပါးဖြစ်လာနေပါတယ်။ ဒီကိန်းဂဏန်းအဆင့် ဟာ ရာစုနှစ် တစ်ဝက်အတွင်း မမြင်ဖူးခဲ့တဲ့ ကိန်းဂဏန်းတွေပါ။အဲဒီအထဲမှာ အမေရိကန်က မပါသေးပါဘူး။ အမေရိကန်မှာ ငွေကြေးဖောင်းပွမှုအမြင့်ဆုံးရောက်ဖို့ လပေါင်းများစွာ လိုပါသေးတယ်။
ယူကရိန်းက ရုရှားစစ်ပွဲကြောင့် လောင်စာဆီဈေးနှုန်းမြင့်တက်လာမှုဟာ ငွေကြေးမူဝါဒ ထိခိုက်မှုနည်းနည်းရှိနေတဲ့ ထောက်ပို့လှုပ်ခါမှုတွေ ဖန်တီးနေပါတယ်။
ကမ္ဘာပြုမှုပျက်ယွင်းလာမှု၊ ရုရှားစစ်ကြောင့် မဟာမိတ်တွေ ပြန်လည်ချိန်ညှိလာမှု၊လူမှုပထဝီပြောင်းလဲမှုနှင့် ထွန်းသစ်စ နိုင်ငံတွေမှာ ထုတ်လုပ်မှုဈေးကြီးမြင့်လာမှုတွေက ထောက်ပို့အကန့်အသတ်တွေဖြစ်လာပြီး အဲဒါတွေက အမြဲတမ်းသဘော ပိုဖြစ်လာနေပါတယ်။
“ ထောက်ပို့အတွဲတော်တော်များများဟာ ငွေကြေးဖောင်းပွမှုကို ဖုံးဖိထားပေးတဲ့ လေစုန်အဖြစ်ကနေ လေဆန်အဖြစ်ပြောင်းလဲလာတာနှင့်အတူ ကမ္ဘာ့စီးပွားရေးဟာ သမိုင်းဝင်ပြောင်းလဲမှုတစ်ခု ဖြစ်တော့မယ့်အနေအထားရှိနေတယ်” လို့ International Settlements ဘဏ်ရဲ့ ဥက္ကဋ္ဌ အော်ဂတ်စတင် ကာစတင်းက ပြောပါတယ်။
“ အဲသလိုဆိုရင် လက်ရှိ ငွေကြေးဖောင်းပွမှုဖိအားဟာ ဆက်လက်တည်မြဲနေဦးမယ့်သဘောရှိတယ်” လို့လည်း ကာစတင်း ကပြောပါတယ်။ သူ့လုပ်ငန်းစုကို ကမ္ဘာ့ဗဟိုဘဏ်တွေရဲ့ ဗဟိုဘဏ်ရယ်လို့ မကြာခဏဆိုသလို ပြောဆိုသုံးနှုန်းလေ့ရှိကြပါတယ်။
အမေရိကန်ရဲ့ အတိုးနှုန်းမြင့်လားတဲ့ ဒဏ်ဟာ အမေရိကန်နိုင်ငံရဲ့ စီးပွားရေးကိုကျော်လွန်ပြီး ပဲ့တင်ရိုက်ခတ်တာတွေရှိလာပြီး ထွန်းသစ်စစီးပွားရေးနိုင်ငံတွေကို ထိခိုက်မှုတွေဖြစ်နေပါတယ်။
ပြီးခဲ့တဲ့ နှစ်လေးဆယ် ယုံကြည်မှုတွေဟာ ပျက်ယွင်းမယ့် အန္တရာယ်ပေါ်ကျရောက်နေပါတယ်။ အဲဒါကြောင်း ဘာပဲလုပ်ရ လုပ်ရ သူတို့ဟာ ငွေကြေးဖောင်းပွမှုတွေကို ဆွဲချကြပါလိမ့်မယ်။ အဲဒီအထဲမှာ ထွန်းသစ်စနိုင်ငံတွေ ဆက်စပ်ထိခိုက်နစ်နာ တာတွေရှိလာပါစေဦး လုပ်စရာရှိတာ ဆက်လုပ်သွားကြပါလိမ့်မယ်။
ဒေါ်လာတွေချေးငှားထားတဲ့ ထွန်းသစ်စနိုင်ငံတွေဟာ အတိုးနှုန်းမြှင့်လိုက်တဲ့အတွက် သူတို့ဟာ ဘက်ပေါင်းစုံမှ ထိုးနှက် ခံနေရပါတယ်။
အဲဒါကြောင့် ချေးငှားရတဲ့ စရိတ်တွေတက်လာပြီး အကြွေးတွေတက်လာကြပါလိမ့်မယ်။အမေရိကန်ဈေးကွက်မှာ စာရင်းရှင်း ဖျက်သိမ်းတာတွေဖြစ်လာစေပြီး ထွန်းသစ်စစီးပွားရေးတွေဟာ ပရီမီယံတွေအတွက် အန္တရာယ်ရှိလာစေပြီး ငွေချေးတာ ပိုပြီးတောင် ခက်ခဲလာမှာဖြစ်ပါတယ်။
နိုင်ငံကြီးတွေဖြစ်တဲ့ တရုတ်နှင့် အိန္ဒိယတို့ဟာ ဒီပြဿနာတွေကနေ လွတ်နေပုံရပေမယ့် တူရကီမှသည် အာဂျင်းတီးနားအထိ နိုင်ငံငယ်ကလေးတွေကတော့ ထိခိုက်ခံစားနေရတာ ထင်ရှားနေပါတယ်။
“နိုင်ငံတွေတော်တော်များများပါပဲ။ ဝင်ငွေနိမ့်နိုင်ငံတွေရဲ့ ၆၀ ရာခိုင်နှုန်းနှင့် ထွန်းသစ်စနှင့်နယ်သစ်စီးပွားရေးနိုင်ငံတွေရဲ့ ၂၀ ရာခိုင်နှုန်းဟာ ဒီအခြေအနေတွေနှင့် ရင်ဆိုင်နေကြရပါတယ်” လို့ ကမ္ဘာ့ငွေကြေးရန်ပုံငွေအဖွဲ့ရဲ့ စီးပွားရေးပညာရှင်ချုပ် ပီယဲ အိုလီဗာ ဂိုရင်းချားက ပြောပါတယ်။
သီရိလင်္ကာနှင့် တူရကီတို့လို နယ်သစ်စီးပွားရေးနိုင်ငံတွေဟာ အမေရိကန်က အတိုးနှုန်းတွေဆက်မြှင့်နေရင် အကြီး အကျယ်ထိခိုက်လိမ့်မယ်။ တရုတ်၊အိန္ဒိယနှင့် အင်ဒိုနီးရှားအပါအဝင် နိုင်ငံတွေတပြုံတစ်ခေါင်းကြီးမှာ ငွေကြေး လုပ်ငန်းတွေရဲ့ အကြွေးအန္တရာယ်ဟာ အလွန့်ကိုမြင့်မားနေတယ်လို့ အက်စ်အင်န်ပီ ဂလိုဗယ်က ပြောပါတယ်။
Source: Reuters
#Global_Inflation
#Recession
#World_Economy
#World_Crime
Published 29 August 2022
အိန္ဒိယအမျိုးသမီး ၄ ဦးကို တက္ကဆပ်မှအမျိုးသမီးတစ်ဦးက လူမျိုးရေးခွဲခြားပြီး "အိန္ဒိယကို ပြန်ကြတော့"ဟု အော်ဟစ်နေခဲ့တဲ့ ဗီဒီယိုဟာ ဆိုရှယ်မီဒီယာတွေမှာ ပျံ့နှံသွားကာ အစိုးရအာဏာပိုင်များအထိ သိရှိခဲ့ပြီးနောက်မှ ထိုဗီဒီယိုထဲမှ လူမျိုးရေးခွဲခြားခဲ့တဲ့ အမျိုးသမီးကို တက္ကဆပ်ရဲအရာရှိများက ဖမ်းဆီးထိန်းသိမ်းလိုက်ပါတယ်။
"ဒီဖြစ်ရပ်က တက္ကဆပ်ဥပဒေများအရ လူမျိုးခွဲခြားရေးပြစ်မှုမြောက်ပါတယ်၊ ဒါ့အပြင် အစိုးရဥပဒေနဲ့လည်း ငြိစွန်းနေနိုင်တာကြောင့် အက်ဖ်ဘီအိုင်၊ တရားမျှတမှုလူ့အခွင့်အရေးဆိုင်ရာဌာနတို့နဲ့ ပူးပေါင်းလုပ်ဆောင်လျက်ရှိပါတယ်"လို့ တက္ကဆပ် ပလေနိုမှရဲအရာရှိက စနေနေ့က ထုတ်ဖော်ပြောကြားခဲ့ပါတယ်။
ဒီဗီဒီယိုအဖြစ်အပျက်ထဲမှာတော့ ကားပါကင်တစ်နေရာမှာ အမေရိကန်အမျိုးသမီးတစ်ဦးက အိန္ဒိယလူမျိုးအမျိုးသမီး ၄ ဦးကို လူမျိုးရေးခွဲခြားတဲ့ အသုံးအနှုန်းများဖြင့် အော်ဟစ်ခဲ့ပြီး ကိုယ်ထိလက်ရောက်ပြုလုပ်ခဲ့ပုံများ ရိုက်ကူးမိခဲ့ပြီး ဆိုရှယ်မီဒီယာပေါ်မှာ တင်ခဲ့ရာမှာတော့ ကြည့်ရှုသူအရေအတွက် သန်းနဲ့ချီသွားခဲ့ပါတယ်။
ဗီဒီယိုထဲမှာ "အိန္ဒိယကိုပြန်သွားကြ၊ နင်တို့ကို ဒီမှာမရှိစေချင်ဘူး၊ နင်တို့အိန္ဒိယတွေကို အရမ်းမုန်းတယ်"လို့ အမျိုးသမီးက အော်ဟစ်နေခဲ့ကာ မက္ကဆီကို-အမေရိကန်လူမျိုးဖြစ်ကြောင်း သိရှိခဲ့ရပါတယ်။
ဗုဒ္ဓဟူးနေ့ကဖြစ်ခဲ့တဲ့ ဒီအဖြစ်အပျက်ဗီဒီယိုက အိန္ဒိယနဲ့ အမေရိကန်တို့ကြား ဆိုရှယ်မီဒီယာတွေမှာ လျင်မြန်စွာပျံ့နှံသွားခဲ့ပြီး ကြာသပတေးနေ့မှာ ဖမ်းဆီးခဲ့တာဖြစ်ပါတယ်။
'အက်စ်မာရယ်လ်ဒါအက်ပ်တန်'လို အမည်ရတဲ့ အမျိုးသမီးကို ကိုယ်ထိလက်ရောက်ကျူးလွန်မှု၊ အကြမ်းဖက်ခြိမ်းခြောက်မှုတို့ဖြင့် ဖမ်းဆီးခဲ့ကာ ဒေါ်လာ ၁ သောင်း ဒဏ်ကြေးဆောင်ရန် သတ်မှတ်ခဲ့ပါတယ်။
အိန္ဒိယအမျိုးသမီး ၄ ဦးထဲက 'ရာနီဘာနာဂျီ'က သူငယ်ချင်း ၃ ဦးနဲ့အတူ စားသောက်ဆိုင်တစ်ခုမှာ ညစာစားပြီးထွက်လာစဉ် ကားပါကင်တစ်နေရာမှာ အမေရိကန်အမျိုးသမီးနဲ့ ထိပ်တိုက်တွေ့ခဲ့တာဖြစ်တယ်လို့ ထွက်ဆိုထားပါတယ်။
"ရုတ်တရက် အဲဒီအမျိုးသမီးက ကျွန်မတို့ကိုလှမ်းအော်ပြီး ကျွန်မတို့ဆီကို လျှောက်လာပါတယ်၊ လူမျိုးရေးခွဲခြားတဲ့ စကားလုံးတွေပြောပြီး လက်ပါပါလာတော့ ထိတ်လန့်သွားရပါတယ်" လို့ 'ဘာနာဂျီ'က ABC News ကို ပြောပြခဲ့ပါတယ်။
'ဘာနာဂျီ'ကပဲ ထိုအဖြစ်အပျက်ကို ဗီဒီယိုမှတ်တမ်းရိုက်ကူးခဲ့တာဖြစ်ပါတယ်။
ဗီဒီယိုထဲမှာ 'အက်ပ်တန်'က အိန္ဒိယတွေကို လက်နဲ့ရိုက်ခဲ့တဲ့အဖြစ်လည်း ပါဝင်ပါတယ်။
"ကြောက်စရာကောင်းတာက သူကနီးနီးကပ်ကပ်ရောက်လာပြီးတော့ နှုတ်နဲ့တင်စော်ကားတာမဟုတ်ဘဲ လက်ပါ ပါခဲ့တာဖြစ်ပါတယ်"လို့ ဆိုပါတယ်။
'အက်ပ်တန်'ဘက်က ကိုယ်စားလှယ်ကတော့ မှတ်ချက်ပြုပြောကြားပေးဖို့ ရှိမနေခဲ့ပါဘူး။
Source: Reuters
#Yangon_Media_Group
#World_Science
Published 29 August 2022
လူတွေဟာ ဆွဲဆောင်မှုရှိပြီး ကြည့်ကောင်းတဲ့လူတွေကို ကိုယ်ရည်ကိုယ်သွေးကောင်းရှိမယ်လို့ ခန့်မှန်းယူဆတတ်ကြကြောင်း လေ့လာမှုအသစ်တစ်ခုမှာ ဖော်ပြထားပါတယ်။
သုတေသီတွေက အပြင်ပန်းဆွဲဆောင်မှုအမြင်ကိုကြည့်ပြီး လူတွေအကြောင်း ခန့်မှန်းခြင်းကိုလေ့လာဖို့အတွက် နိုင်ငံပေါင်း ၄၅ နိုင်ငံမှ စမ်းသပ်ပါဝင်မယ့်သူ ၁၁,၀၀၀ ကို လူတွေရဲ့ဓာတ်ပုံများပြသခဲ့ပါတယ်။
ဓာတ်ပုံထဲမှာ ကြည့်ကောင်းပြီး ဆွဲဆောင်မှုရှိပုံပေါ်တဲ့သူလူတွေဟာ ထူးချွန်ထက်မြက်ပြီး ယုံကြည်အားကိုးနိုင်တယ်လို့ စမ်းသပ်ခံသူတွေက မှတ်ယူလိုက်ကြကြောင်း တွေ့ရှိခဲ့ရပါတယ်။
ဓာတ်ပုံထဲက ဆွဲဆောင်မှုမရှိတဲ့လူတွေကိုတော့ မကောင်းတဲ့အမြင်တွေ မှတ်ချက်ပေးခဲ့ကြပါတယ်။
ဒီလိုမျိုး ကြည့်ကောင်းတဲ့သူတွေကို အလိုလိုနေရင်း လူကောင်းလို့ထင်နေတာက တကယ့်လက်တွေ့မှာ အန္တရာယ်များတဲ့အယူအဆဖြစ်ကြောင်း သုတေသီများက သတိပေးလိုက်ပါတယ်။
အရင်လေ့လာမှုတွေအရလည်း တရားသူကြီးတွေဟာ ဆွဲဆောင်မှုရှိပြီး ပုံပန်းသဏ္ဍာန်ကြည့်ကောင်းတဲ့ တရားခံတွေကို အပြစ်လျှော့ပေါ့ပေးလေ့ရှိပါတယ်။
လန်ကက်စတာမှ စိတ်ကျန်းမာရေးဆရာဝန်'ကာလိုတာဘာတရက်စ်'က အပြင်ပန်းသဏ္ဍာန်က တရားမျှတမှုကို ဖုံးလွှမ်းသွားတယ်လို့ မှတ်ချက်ပြုလိုက်ပါတယ်။
လူတွေက မျက်နှာမြင်ပြီး ၁၀၀ မီလီစက္ကန့်အတွင်းမှာပဲ ထင်မြင်ချက်ချတတ်ကြကြောင်း တွေ့ရှိထားပါတယ်။
အပြင်ပန်းအရ ဆွဲဆောင်မှုရှိတဲ့လူတွေကို ကိုယ်ရည်ကိုယ်သွေးကောင်းမွန်တဲ့သူတွေလို့ ထင်မှတ်တတ်ကြပါတယ်။
စမ်းသပ်ခံမယ့်သူတွေကို ကမ္ဘာ့နေရာအနှံအပြားရှိ ၄၅ နိုင်ငံမှ ခေါ်ယူစုဆောင်းခဲ့ပါတယ်။
သူတို့ကို အမေရိကန်ပြည်ရှိ လူမည်း၊ လက်တင်လူမျိုး၊ လူဖြူ၊ အာရှလူမျိုး စတဲ့ အမျိုးသား အမျိုးသမီးတွေရဲ့ ဓာတ်ပုံတွေကို ပြသခဲ့တာဖြစ်ပါတယ်။
စမ်းသပ်ခံတစ်ဦးချင်းစီက ဓာတ်ပုံ ၁၂၀ လောက်ကို အမြင်တစ်မျိုးတည်းနဲ့ ခွဲခြားခဲ့ပါတယ်။
အဲဒါကတော့ ဆွဲဆောင်မှုရှိ/မရှိကို ကြည့်ပြီး ခွဲခြားသွားတာဖြစ်ပါတယ်။
ကြည့်ကောင်းတဲ့ အမျိုးသား အမျိုးသမီးတွေရဲ့မျက်နှာကိုကြည့်ပြီး ယုံကြည်ချက်ရှိခြင်း၊ တည်ငြိမ်ခြင်း၊ ဉာဏ်ရည်ထက်မြတ်ခြင်း၊ တာဝန်သိခြင်း၊ လူမှုရေးကောင်းမွန်ခြင်း၊ ယုံကြည်လောက်ဖွယ်ရှိခြင်း စတဲ့အချက်များ ပိုင်ဆိုင်မယ်လို့ မှတ်ချက်ပေးခဲ့ကြပါတယ်။
ခြုံပြောရရင်တော့ ရုပ်ရည်ကြည့်ကောင်းတဲ့သူတွေကို လူကောင်းသူကောင်းဖြစ်မယ်လို့ လူတွေက ယူဆချင်တဲ့သဘောဖြစ်ပါတယ်။
Source: Daily Mail
#Yangon_Media_Group
#World_Health
Published 29 August 2022
သတင်းအကြောင်းအရာတွေကို အလွန်အမင်း အာရုံစိုက်ဖတ်ရှုနေသူတွေဟာ ရုပ်ပိုင်းဆိုင်ရာရော စိတ်ပိုင်းဆိုင်ရာမှာပါ ထိခိုက်စေနိုင်တယ်လို့ Health Communication ဂျာနယ်မှာ ဗုဒ္ဓဟူးနေ့က ဖော်ပြခဲ့ပါတယ်။
အင်တာနက်၊ ဂိမ်း၊ စမတ်ဖုန်းတို့ကို စွဲလမ်းခြင်းက ကျန်းမာရေးထိခိုက်နိုင်ကြောင်း အခိုင်အမာတွေ့ရှိထားသကဲ့သို့ စစ်ပွဲသတင်းများ၊ ဝမ်းနည်းဖွယ်ဖြစ်ရပ်သတင်းများ၊ ရောဂါကပ်ဆိုးသတင်းများကို အစဉ်တစိုက်ဖတ်ရှုနေတာကလည်း ပြဿနာတစ်ရပ်ဖြစ်လာနိုင်ပြီး ကျန်းမာရေးကို ထိခိုက်စေတယ်လို့ သိပ္ပံပညာရှင်များက ဖော်ညွှန်းထားကြပါတယ်။
သတင်းအကြောင်းအရာတွေကို အာရုံစိုက်ဖတ်ရှုခြင်းဖြင့် လူအချို့မှာ အလွန်ခံစားမိလွယ်ပြီး ကမ္ဘာကြီးကို အန္တရာယ်တွင်းကြီးအဖြစ် ထင်မှတ်လာစေကြောင်း တက္ကဆပ်နည်းပညာတက္ကသိုလ်ကောလိပ်မှ တွဲဖက်ပရော်ဖက်ဆာ'ဘရိုင်ယန်မက်လက်ဖ်လင်'က ဖော်ပြခဲ့ပါတယ်။
လူအချို့က သတင်းတွေကို စွဲစွဲလမ်းလမ်းဖတ်ရှုပြီး သူတို့စိတ်ခံစားချက် ပြေပျောက်စေဖို့ သတင်းအသစ်တွေကို အမြဲရှာဖွေနေကြောင်း၊ ဒါပေမဲ့ သတင်းတွေ ပိုသိလာလေ အခြားသူတွေရဲ့ဘဝကို နှောင့်ယှက်လာလေဖြစ်ကြောင်း ဆိုပါတယ်။
သတင်းကြည့်ခြင်းက စိုးရိမ်ပူပန်စိတ်တွေ ပြေပျောက်မယ်လို့ ထင်ထားကြပေမယ့် သတင်းမကြည့်ရမနေနိုင်လောက်အောင် စွဲလမ်းသွားတတ်ပါတယ်။
အမေရိကန်မှ အရွယ်ရောက်ပြီးသူ ၁,၁၀၀ ခန့်ကို မေးမြန်းခဲ့ရာမှာ သတင်းကို စိတ်ဝင်စားသွားရင် ပတ်ဝန်းကျင်ကိုမေ့သွားကြောင်း၊ သတင်းဖတ်နေတဲ့အတွက် ကျန်တဲ့အရာတွေကို မပြုလုပ်မိတော့ကြောင်း လက်ခံခဲ့ကြပါတယ်။
ကျန်းမာရေးအပိုင်းကိုလည်း လေ့လာသုံးသပ်ရာမှာ သတင်းစွဲလမ်းသူတွေက ပုံမှန်သာသတင်းကြည့်တဲ့သူတွေထက် စိတ်ပိုင်းဆိုင်ရာနဲ့ ရုပ်ပိုင်းဆိုင်ရာ နာမကျန်းရောဂါများဖြစ်နိုင်ချေ ၂၇.၃ ရာခိုင်နှုန်း ပိုများနေပါတယ်။
ဒါကြောင့် နာမကျန်းဖြစ်ခြင်းတရားခံက သတင်းမဟုတ်ဘဲ သတင်းစွဲလမ်းမိခြင်းကြောင့်သာ ဖြစ်တယ်လို့ ထောက်ပြထားပါတယ်။
သတင်းစွဲလမ်းခြင်းကြောင့် မကျန်းမာလာရတာကို သိလာတဲ့လူတွေအနေနဲ့ သတင်းမဖတ်ဘဲနေလိုက်ပြန်လို့လည်း သက်သာလာမှာ မဟုတ်ပါဘူး။
အရေးကြီးသတင်းတွေ လွတ်သွားပြီလားလို့ စိုးရိမ်ပူပန်လာရပြီး နိုင်ငံကြီးသားမပီသတဲ့သူအဖြစ် ထင်မှတ်နေစေပါတယ်။
အဲဒီအစား အခြားကိစ္စတွေကို အာရုံပြောင်းသွားအောင်လုပ်ဆောင်တာက ပိုပြီးထိရောက်နိုင်ပါတယ်။
ဒီလိုမျိုးဖြစ်နေရတာတွေအတွက် စီးပွားရေးအရရော နည်းပညာအရပါ အသုံးချလာကြတဲ့ သတင်းမီဒီယာတွေမှာ အဓိကတာဝန်ရှိတယ်လို့ ယူဆနေကြပါတယ်။
သတင်းစွဲလမ်းတဲ့ပြဿနာကို ဖြေရှင်းဖို့ လေ့လာစရာများစွာကျန်နေသေးပြီး ဒီလေ့လာချက်ကလည်း သတင်းရဲ့သက်ရောက်မှုတွေကို သိရှိနားလည်လာစေမှာဖြစ်တယ်လို့ သုံးသပ်ပြထားပါတယ်။
Source: The Jerusalem Post
#Yangon_Media_Group
Published 28 Aug 2022
ကမ္ဘာကြီးဟာ စားနပ်ရိက္ခာ မရေရာမှုတွေ ယိုယွင်းလာမှုတွေနှင့် လွန်ခဲ့တဲ့ သုံးနှစ်အတွင်း ရင်ဆိုင်နေခဲ့ရတယ်လို့ ကုလသမဂ္ဂ စားနပ်ရိက္ခာအစီအစဉ်အဖွဲ့က သတိပေးလိုက်ပါတယ်။ စားနပ်ရိက္ခာ မလုံလောက်မှုတွေ အကြီးအကျယ် ရင်ဆိုင်နေရတဲ့ ကမ္ဘာ့လူဦးရေဟာ လူဦးရေ ၃၄၅ သန်းအထိရှိလာပြီး ရာခိုင်နှုန်းအားဖြင့် ၁၅၀ ရာခိုင်နှုန်းတိုးလာတာ လို့ အဖွဲ့ကပြောပါတယ်။
ကိုဗစ်-၁၉ ကပ်ရောဂါ၊ ရာသီဥတုပြောင်းလဲခြင်းနှင့်ကမ္ဘာ့အကြီးဆုံး ဂျုံထုတ်လုပ်တင်ပို့တဲ့ ရုရှားနှင့်ယူကရိန်း ပဋိပက္ခတွေကြောင့် စားနပ်ရိက္ခာ မလုံခြုံ မရောရာမှုတွေဖြစ်နေပါတယ်။ ဂျုံတင်ပို့မှုကျဆင်းသွားတဲ့အတွက် ကမ္ဘာ့ဈေးနှုန်းတွကလည်း မြင့်တက်လာတယ်လို့ ကမ္ဘာ့စားနပ်ရိက္ခာအဖွဲ့ကပြောပါတယ်။
ကပ်ရောဂါဘေးမသင့်ခင် ၂၀၁၉ခုနှစ်မှာ လူဦးရေ ၁.၃၅ သန်းဟာ စားနပ်ရိက္ခာမလုံလောက်မှုနှင့်ရင်ဆိုင်ခဲ့ရပြီး အရှေ့အလယ်ပိုင်းနှင့် မြောက်အာဖရိကတို့လို အားနည်းမှုတွေရှိနေတဲ့ ဒေသက ယီမင်လိုနိုင်ငံမျိုးတွေမှာ စားနပ်ရိက္ခာ မလုံခြုံမှု နာတာရှည်ခံစားနေကြရပါတယ်။
ကမ္ဘာ့လူဦးရေ ၈၂၈သန်းဟာ ညစဉ် ဆာလောင်မွတ်သိပ်စွာနှင့်ပဲ အိပ်ရာဝင်နေကြရပြီး နိုင်ငံပေါင်း ၄၅ နိုင်ငံမှ လူသန်း၅၀ခန့်ဟာ အငတ်ကပ်ဘေးရောက်လုနီးဖြစ်နေကြရတယ်လို့ ကမ္ဘာ့စားနပ်ရိက္ခာအဖွဲ့က သတင်းထုတ်ပြန်ထားပါတယ်။
Source: CCTV Plus
#World_Food_Programme
#Severe_food_shortage
#Russia_Ukraine_Crisis
Published 28 Aug 2022
ပြင်သစ်လေကြောင်းလိုင်းမှ လေယာဉ်မှူးနှစ်ဦးဟာ ပျံသန်းနေရင်း လမ်းခုလတ်မှာ လေယာဉ်မှုးအခန်းထဲ စကားများ ထိုးကြိတ် ကြတဲ့အတွက် နှစ်ယောက်စလုံး ရာထူးချခံကြရပါတယ်။
ဇွန်လအတွင်းက ဂျီနီဗာကနေ ပါရီကိုပျံသန်းတဲ့ ခရီးစဉ်အတွင်း လေယာဉ်မှူးနှစ်ဦးဟာ အပြန်အလှန်ထိုးကြိတ်ခဲ့ကြတာ လို့ လာ ထရင်းဗျူး သတင်းစာက သတင်းရေးပါတယ်။
ဘာကြောင့် ရန်ဖြစ်ကြသလဲဆိုတာတော့ မသိကြရပါဘူး။ ဒါပေမယ့် ဒီအပြုအမူဟာ မလျောကန်တဲ့ အပြုအမူဖြစ်တယ်လို့ လေကြောင်းလိုင်း ပြောရေးဆိုခွင့်ရသူကပြောတယ်လို့ ဘလွန်းဘတ်သတင်းဌာနက ရေးပါတယ်။ လေကြောင်းလိုင်းဟာ အဲဒီလေယာဉ်မှူးတွေကို စုံစမ်းစစ်ဆေးမှုတွေပြုလုပ်နေပါတယ်။’
ပြင်သစ်လေကြောင်းဟာ ပြီးခဲ့တဲ့ လများအတွင်း ဘေးအန္တရာယ်ကင်းရှင်းရေး ဆောင်ရွက်မှု ချို့ယွင်းချက်တွေအပေါ် စိစစ်မှုတွေတိုးမြှင့်လုပ်ဆောင်နေရပါတယ်။
ပါရီအခြေစိုက် ပြင်သစ်လေကြောင်းလိုင်းဟာ ကိစ္စတော်တော်များများမှာ ဘေးအန္တရာယ်ကင်းရှင်းရေး လုပ်ငန်းစဉ်တွေကို ပေါ့လျော့ချိုးဖောက်ခဲ့ကြတာတွေကို ပြင်သစ် မြို့ပြလေကြောင်း အာဏာပိုင်အဖွဲ့က တွေ့ရှိခဲ့ကြပါတယ်။ အဲဒီအထဲမှာ ၂၀၂၀ပြည့်နှစ်က ခရီးစဉ်တစ်ခုမှာ လေယာဉ်ထွက်ခွာပြီးကာမှ လေယာဉ်ဆီကန်ထဲမှာ လောင်စာဆီ ၁.၄ တန်လျော့နည်း နေတာကိုတွေ့ရှိခဲ့ကြတဲ့ ကိစ္စလည်း ပါဝင်ခဲ့ပါတယ်။
Source Business Insider
#Air_France
#Cockpit_fighting
#Aviation_safety
Published 28 Aug 2022
တစ်ကမ္ဘာလုံးမှာ လက်ရှိအသုံးပြုနေတဲ့ လေယာဉ်တင်သင်္ဘော ၄၇ စီးရှိနေပါတယ်။ အဲဒီ (၄၇)စီးကို နိုင်ငံပေါင်း ၁၄ နိင်ငံ ကသာ စီမံလုပ်ဆောင်နေတာဖြစ်ပါတယ်။ လေယာဉ်တင်သင်္ဘောဆိုတာ ရေတပ်ရဲ့ တန်ဖိုးအရှိဆုံး ပိုင်ဆိုင်မှုဖြစ်ပြီး စစ်ဆင်ရေးအတွက်သာမကဘဲ ရေပိုင်နက်ကို စောင့်ကြပ်ထိန်းသိမ်းရတဲ့ တာဝန်ပါ ထမ်းဆောင်ကြရတာပါ။
အမေရိကန်ပြည်ထောင်စု၊ တရုတ်၊ဗြိတိန်၊ပြင်သစ်နှင့် အိန္ဒိယတို့ဟာ သင်္ဘောရဲ့ ဝမ်းပမာဏနှင့်ညီမျှတဲ့ရေထုအလေးချိန်အရ ကမ္ဘာ့အကြီးဆုံး လေယာဉ်တင် သင်္ဘော ၁၀စီးကို ပိုင်ဆိုင်ထားကြပါတယ်လို့ ရေတပ်ဗိသုကာ ဟာရီအဲလက်ဇင်းဒါး ကာရန်နက်ဆော့ ကပြောပါတယ်။
အဲဒီအကြီးဆုံး လေယာဉ်တင်သင်္ဘော (၁၀)စီးကို အဆင့် အနိမ့်မှအမြင့်အလိုက် ဖော်ပြအပ်ပါတယ်။
၁၀။ချားလ်စ်ဒီဂေါ Charles De Gaulle (ပြင်သစ်)
ချားလ်စ်ဒီဂေါဟာ ၂၀၁၁ခုနှစ်မှာ စတင်တာဝန်ထမ်းဆောင်ပြီး ပြင်သစ်ရေတပ်ရဲ့ ရေယာဉ်စုမှူးစီးနင်းတဲ့ သင်္ဘောအဖြစ် ဆက်လက်တည်ရှိနေပါတယ်။ ဒီသင်္ဘောဟာ ပြင်သစ်ရဲ့ ပထမဆုံးနှင့်တစ်ခုတည်းသော နျူကလီးယားစွမ်းအင်သုံး သင်္ဘော ဖြစ်ပါတယ်။
အဲဒီစစ်သင်္ဘောဟာ အလျား ၈၅၈ ပေရှိပြီး ၂၁၈ပေ အမြင့်ရှိပါတယ်။ သင်္ဘောရဲ့ဝမ်းပမာဏာနှင့် ညီမျှတဲ့ ရေထုအလေးချိန် Displacement ဟာ ၄၂,၅၀၀ တန်ရှိပါတယ်။သင်္ဘောသား ၁၂၀၀ တင်ဆောင်နိုင်ပါတယ်။
Dassault Rafale M တိုက်လေယာဉ်အစီး (၄၀)နှင့် Super Etendard ခေတ်မီလေယာဉ်တွေနှင့် Northrop Grumman E-2C Hawkeyesတွေ အပါအဝင် ဒါဇင်ပေါင်းများစွာသော လေယာဉ်တွေအသုံးပြုနိုင်ပါတယ်။
၉။ အိုင်အင်န်အက်စ် ဗီကရာမာဒစ်ယာ INS Vikramaditya (အိန္ဒိယ)
အိုင်အင်န်အက်စ် ဗီကရာမာဒစ်ယာ ဟာ ဆိုဗီယက်လုပ် လေယာဉ်တင်သင်္ဘောဖြစ်ပြီး ၂၀၁၃ခုနှစ်မှာ အိန္ဒိယရေတပ်က စတင် အသုံးပြုပါတယ်။ ဒီစစ်သင်္ဘောဟာ လက်ရှိ အိန္ဒိယရေတပ်ရဲ့ ရေယာဉ်စုမှူးသင်္ဘောဖြစ်ပါတယ်၊ ရုရှားထံမှ ဒေါ်လာ ၂.၃၅ ဘီလျံဖြင့်ဝယ်ယူခဲ့ပါတယ်။
ပင်လယ်နက်သင်္ဘောကျင်းက တည်ဆောက်တဲ့ ဒီသင်္ဘောဟာ အလျား ၉၃၂ ပေရှိ ပြီး Displacement ဟာ တန်ချိန်ပေါင်း ၄၄၅၀၀ ရှိပါတယ်။ သင်္ဘောသား ၁၆၀၀ တင်ဆောင်နိုင်ပါတယ်။
သင်္ဘောဟာ လေယာဉ်ပျံ အစီး ၃၀ အသုံးပြုနိုင်ပါတယ်။ အဲဒီအထဲမှာ Mikoyan MiG-29K ဘက်စုံတိုက်လေယာဉ်တွေနှင့် Kamov Ka-31၊KA-28 ရဟတ်ယာဉ်တွေပါဝင်ပါတယ်။
၈။အိုင်အင်န်အက်စ် ဗီကရန့် INS Vikrant (အိန္ဒိယ)
ကိုချင်းသင်္ဘောကျင်းကတည်ဆောက်ပြီး ပထမဆုံးပြည်တွင်းထုတ် လေယာဉ်တင်သင်္ဘောဖြစ်ပါတယ်။ ၂၀၁၃ခုနှစ်မှာ ရေချခဲ့ပါတယ်။ သင်္ဘောတည်ဆောက်ကုန်ကျစရိတ်ပေါင်း ဒေါ်လာ ၃.၅ ဘီလျံရှိပါတယ်။ ၂၀၁၈ခုနှစ်မှာ စတင်သုံးဖို့ ရည်ရွယ်ခဲ့ပေမယ့် ကပ်ဘေးကြောင့် နောက်ကျခဲ့ရပါတယ်။
အိုင်အင်န်အက်စ်ဗီကရန့်ဟာ Displacement အားဖြင့် ၄၅,၀၀၀ တန်ရှိပြီး အိန္ဒိယရေတပ်ရဲ့ အကြီးဆုံး လေယာဉ်တင်သင်္ဘော ဖြစ်ပါတယ်။ အလျား ၈၆၀ပေရှိပြီး အမြင့်၁၉၄ပေရှိပါတယ်။ သင်္ဘောသား ၁၆၄၅ဦးတင်ဆောင်နိုင်ပါတယ်။
ပြည်တွင်းမီဒီယာတွေက ဒီသင်္ဘောကို လက်ရွေးစင် စစ်သင်္ဘောကြီးလို့ ဖော်ပြကြပါတယ်။ MiG-29K တိုက်ဂျက်လေယာဉ်၊ Kamov-31 ရဟတ်ယာဉ်တွေနှင့် Sikorsky MH-60R Seahawk ရဟတ်ယာဉ်တွေ အသုံးပြုနေပါတယ်။
၇။လျောင်နင်း ပုံစံ၀၀၁ Liaoning, Type 001 (တရုတ်)
လျောင်နင်းကို ပုံစံ ၀၀၁လို့သိကြပြီး ၂၀၁၂ မှာစတင်အသုံးပြုပါတယ်။ ဒီသင်္ဘောကို ပင်လက်နက် သင်္ဘောကျင်းက ဆိုဗီယက် ခေတ်မှာ တည်ဆောက်ခဲ့ပါတယ်။ တရုတ်စစ်တပ်က ဒီသင်္ဘောကို ယူကရိန်းထံမှ ဝယ်ယူခဲ့တာပါ။
ဒီလေယာဉ်တင်သင်္ဘေဟာ ၉၉၉ပေ အလျားရှိပြီး Displacementက ဝန်အပြည့်မှာ ၆၀၉၀၀ တန်ရှိပါတယ်။ သင်္ဘောသား ၂၅၀၀ ဦးလိုက်ပါနိုင်ပါတယ်။
လျောင်နင်းစာ တရုတ်ထုတ် Type 1130 rotary အမြောက်တွေနှင့် HQ-10 မြေပြင်မှဝေဟင်ပစ် ဒုံးကျည်တွေအပါအဝင် လက်နက်ကြီးတွေ တင်ဆောင်နိုင်ပါတယ်။ အဲဒီအပြင် Shenyang J-15၊ Shenyang J-15နှင့် Harbin Z-9 လေယာဉ်တွေ အပါအဝင် လေယာဉ် ၃၆ စီးအသုံးပြုနိုင်ပါတယ်။
၆။အက်ဒ်မိုင်ရယ်လ် ကူညက်ဆော့ဗ် Admiral Kuznetsov (ရုရှား)
ဒီသင်္ဘောကို နီကိုလာယက်တောင်ပိုင်းက ဆိုဗီယက်ခေတ်အတွင်း တည်ဆောက်ခဲ့ပြီး ၁၉၉၁ မှာ ပထမဆုံးအသုံးပြုခဲ့ပါတယ်။ ဒီသင်္ဘောကို လောလာဆယ် ရုရှားစစ်တပ်က စီမံကြီးကြပ်တဲ့ တစ်စီးတည်းသော သင်္ဘောဖြစ်ပါတယ်။ ဇွန်လအထိ သတင်းအရ ဒီသင်္ဘောဟာ ပြန်လည်ပြုပြင်နေတယ်လို့ ရိုက်တာသတင်းအရသိရပါတယ်။
သင်္ဘောဟာ အလျား ၁၀၀၀ပေရှိပြီး Displacement က ဝန်အပြည့် ၆၇၅၀၀ တန်ရှိပါတယ်။ သင်္ဘောသား ၁၆၉၀ကျော် တင်ဆောင်နိုင်ပါတယ်။
သင်္ဘောဟာ ဆိုဗီယက်လုပ် AK-630 လက်နက်များကအစ P-700 Granit anti-cruise ဒုံးကျည်များအထိ လက်နက်ကြီးမျိုးစုံ အသုံးပြုနိုင်ပါတယ်။
၅။ရှန်ဒေါင်း ပုံစံ၀၀၂ Shandong, Type 002 (တရုတ်)
ရှန်ဒေါင်းဟာ ၂၀၁၈ခုနှစ်မှာ ဒါလျန်း သင်္ဘောကျင်းကနေ တည်ဆောက်ပေးခဲ့ပါတယ်။ ဒီသင်္ဘောကိုပုံစံ ၀၀၂ လို့လည်း သိကြပါတယ်။ ၂၀၁၉ မှာ စတင်အသုံးပြုပါတယ်။ ရှန်ဒေါင်းဟာ တရုတ်လုပ် ပထမဆုံးလေယာဉ်တင်သင်္ဘောဖြစ်ပြီး ဆိုဗီယက်လုပ် Kuznetsov-class ရဲ့ ပုံစံကွဲတစ်ခုဖြစ်ပါတယ်။
သင်္ဘောဟာ အလျား ၁၀၃၃ပေခန့်ရှိပြီး Displacement က ၇၀၀၀၀ တန်ရှိပါတယ်။
လျန်နင်းလေယာဉ်တင်သင်္ဘောမှာပါတဲ့ လက်နက်ကြီးတွေကိုပဲ အသုံးပြုပါတယ်။ Type 1130 rotary အမြောက်နှင့် HQ-10 မြေပြင်မှဝေဟင်ပစ်ဒုံးကျည်တို့ဖြစ်ပါတယ်။ အဲဒီအပြင် Shenyang J-15 ၊ Changhe Z-18F/J နှင့် Harbin Z-9လေယာဉ်တွေ အသုံးပြုပါတယ်။
၄.အိတ်ချ်အမ်အက်စ် အဲလ်ဇဘက်ဘုရင်မ-ကလပ်စ် HMS Queen Elizabeth-class (ယူကေ)
ဒီသင်္ဘောဟာ လေယာဉ်တင်သင်္ဘော HMS Queen Elizabeth နှင့် HMS Prince of Wales တို့ပေါင်းစပ်ထားပါတယ်။ဦးဆောင် သင်္ဘော HMS Queen Elizabethကို ၂၀၁၇ခုနှစ်မှာ စတင်တာဝန်ထမ်းပါတယ်။ သင်္ဘောကို Aircraft Carrier Alliance က တည်ဆောက်ခဲ့ပြီး တစ်စီးကို ပေါင်စတာလင် ၃.၈ ဘီလျံကုန်ကျခဲ့ပါတယ်။
သင်္ဘောဟာ အလျား ၉၃၂ ပေရှိပြီး Displacement က တန်ချိန် ၆၅၀၀၀ နှင့် ၇၁၆၅၀ အသီးသီးရှိကြပါတယ်၊ တစ်စီးကို သင်္ဘောသား ၁၆၀၀ အထိတင်ဆောင်နိုင်ပါတယ်။
Phalanx close-in လက်နက်စနစ်နှင့် အမေရိကန်လုပ် M134 မီနီဂန်းတွေအပါအဝင် လက်နက်ကြီးတွေတပ်ဆင်ထားပါတယ်။ Lockheed Martin F-35 တိုက်လေယာဉ်နှင့် ဘိုအင်းချင်းနုတ် ရဟတ်ယာဉ်တွေအပါအဝင် လေယာဉ် ၆၅စီးကျော် တင်ဆောင် နိုင်ပါတယ်။
၃။ဖူကျန့် ပုံစံ ၀၀၃ Fujian, Type 003 (တရုတ်)
ဖူကျန့်ဟာ တရုတ်နိုင်ငံရဲ့ အကြီးဆုံးနှင့် ခေတ်အမီဆုံး လေယာဉ်တင်သင်္ဘောြဖစ်ပါတယ်။ဇွန်လမှာ စတင်ရေချခဲ့ပါတယ်။ ပုံစံ ၀၀၃ အဖြစ်လည်းသိကြပါတယ်။ တရုတ်နိုင်ငံတော် သင်္ဘောကျင်းကော်ပိုရေးရှင်းက တည်ဆောက်ပေးခဲ့ပါတယ်။ ဒါပေမယ့် စတင်တာဝန်ထမ်းဆောင်ခြင်းမရှိသေးပါဘူး။
တိုက်ခိုက်ရေးအဆင်သင့်ဖြစ်ဖို့အတွက် ၁၈လခန့် စမ်းသပ်ဖို့လိုအပ်မယ်လို့ ဘေဂျင်းအခြေစိုက် ဉာဏ်ကြီးရှင်အဖွဲ့ ယွမ်ဝမ်းက သုတေသနပညာရှင် ကျောင်ချန်မင်းက ပြောပါတယ်။
သင်္ဘောဟာ ၉၈၄ ပေရှိပြီး displacement က တန်ချိန် ၈၀၀၀၀ ရှိပါတယ်။
ဖူကျန့်ဟာ ပိုမိုကြီးမားလေးလံတဲ့ လေယာဉ်တွေကို သယ်ဆောင်နိုင်တယ်လို့ဆိုပါတယ်။ ဒီသင်္ဘောကိ ထိုင်ဝမ် အရှေ့ခြမ်း တရုတ်စစ်အင်အားကို ဖြည့်ဆည်းပေးဖို့ တာဝန်ပေးထားတယ်လို့ ပြည်တွင်းရေတပ် မဟာဗျူဟာပညာရှင်တွေက ပြောပါတယ်။
၂။နီမစ်-ကလပ်စ် Nimitz-class (အမေရိကန်)
နီမစ်-ကလပ်စ်မှာ လေယာဉ်တင်သင်္ဘော ၁၀စီးပါဝင်ပါတယ်။ ဒီသင်္ဘောဆယ်စီးလုံးကို Newport News သင်္ဘောကျင်းက တည်ဆောက်ပေးပါတယ်။ ဒါဟာ ပထမဆုံးကလပ်စ်အဆင့် လေယာဉ်တင်သင်္ဘောဖြစ်ပါတယ်။ ၁၉၇၅ခုနှစ်မှာ စတင်တာဝန်ထမ်းဆောင်ပေမယ့် ၂၀၂၅ခုနှစ်မှာ တာဝန်ရပ်နားဖို့ရှိပါတယ်။
နျူကလီးယားစွမ်းအင်သုံး ဒီစစ်သင်္ဘောဟာ အလျား ၁၀၉၂ ပေရှိပြီး displacement က တန်ချိန် တစ်သိန်းရှိပါတယ်။ သင်္ဘောသား ၆၀၀၀လိုက်ပါနိုင်ပါတယ်။
နီမစ်ကလပ်စ်ဟာ ကမ္ဘာပေါ်မှာ ကလပ်စ်အမျိုးအစား လေယာဉ်တင်သင်္ဘောတွေထဲမှာ အင်အားအကြီးမားဆုံး လေယာဉ် တင်သင်္ဘောထဲမှာ တစ်စီးအပါအဝင်ဖြစ်ပါတယ်။ အဲဒီအပြင် ရေတပ်ရဲ့ သက်တမ်းအကြာဆုံး လည်းဖြစ်ပါတယ်။
သင်္ဘောကြီးဟာ လေယာဉ်ပေါင်း ၈၂ စီးအထိ အသုံးပြုနိုင်ပါတယ်။ အဲဒီအထဲမှာ McDonnell Douglas Hornet တိုက်ဂျက်လေယာဉ်နှင့် Northrop Grumman E-2 Hawkeye လေယာဉ်တွေ ပါဝင်ပါတယ်။ Phalanx Mk-15 close-in လက်နက်စနစ်အပါအဝင် လက်နက်ကြီးတွေတပ်ဆင်ထားပါတယ်။
၁။ဂါးရက် အာရ် ဖို့ဒ်-ကလပ်စ် Gerald R. Ford-class (အမေရိကန်)
လေယာဉ်တင်သင်္ဘော ၁၀စီးပေါင်းထားတဲ့ ဂါးရက်စ် အာရ်ဖို့ဒ်ဟာ အမေရိကန်ရေတပ်ရဲ့ အနာဂတ်စစ်သင်္ဘောကြီး အဖြစ် မှတ်ယူထားကြပါတယ်။ ၂၀၁၇ မှာစတင်တာဝန်ထမ်းဆောင်ပြီး သုတေသနနှင့် ဖွံ့ဖြိုးရေးကုန်ကျစရိတ်က ဒေါ်လာ ၃၇.၃ ဘီလျံရှိခဲ့ပါတယ်။ တစ်စီးချင်းစီရဲ့ တည်ဆောက်စရိတ်ဟာ ဒေါ်လာ ၁၃ဘီလျံရှိပါတယ်။
အလျား ၁၁၀၆ပေရှိပြီး displacementက တန်ချိန်ပေါင်း ၁၁၂၀၀၀ ရှိတဲ့အတွက် ကမ္ဘာ့အကြီးဆုံးစစ်သင်္ဘောကြီး ဖြစ်ပါတယ်။ သင်္ဘောသား ၄၅၀၀ တင်ဆောင်နိုင်ပါတယ်။
သင်္ဘောမှာ မြေပြင်မှဝေဟင်ပစ် ဒုံးကျည်မျိုးစုံတပ်ဆင်ထားပါတယ်။ အဲဒီအထဲမှာ RIM-7 Sea Sparrow၊ RIM-116 နှင့် M2 မက်ရှင်းဂန်းတွေလည်းပါဝင်ပါတယ်။ လေယာဉ်ပေါင်း ၇၅စီးကျော် အသုံးပြုနိုင်ပြီး Lockheed Martin F-35 တိုက်လေယာဉ်တွေ၊ Boeing F/A-18E/F Super Hornet တိုက်ဂျက်လေယာဉ်တွေနှင့် Sikorsky MH-60R ရဟတ်ယာဉ်တွေ ပါဝင်ပါတယ်။
Source Business Insider
#world's_largest_aircraft_carriers
#World_navy_power
Page 847 of 1055
