#Health_Tips
Published 2 July 2022

ညဘက်လုံလောက်စွာ အိပ်စက်ခြင်းဟာ အသက်ရှည်ကျန်းမာစေတယ်လို့ အချိန်အတော်ကြာ သိရှိလာကြပြီး အခုအခါမှာတော့ ကျန်းမာရေးကောင်းမွန်စေမယ့်အဓိကနည်းလမ်းတွေထဲမှာ တရားဝင် ပါဝင်လာပြီဖြစ်ပါတယ်။

နှလုံးအထူးကုပညာရှင်များက ကျန်းမာသန်စွမ်းတဲ့နှလုံးရရှိစေဖို့ အဓိကအချက်အလက်တွေထဲမှာ လုံလောက်စွာအိပ်စက်ခြင်းကိုပါ ထည့်သွင်းခဲ့ကြပါတယ်။

တစ်ညတာအိပ်စက်သင့်တဲ့ ပမာဏက ၇ နာရီမှ ၉ နာရီအတွင်းဖြစ်ကြောင်း အမေရိကန်နှလုံးဆိုင်ရာ အဖွဲ့အစည်း(AHA)က ဖော်ပြခဲ့ကြပါတယ်။

၂၀၁၀ ခုနှစ်တုန်းက နှလုံးသွေးကြောကျန်းမာရေးကောင်းမွန်စေတဲ့ နည်းလမ်း ၇ သွယ်ကို AHA က ဖော်ပြခဲ့ကြပါတယ်။

ထိုနည်းလမ်းတွေထဲမှာ ကျန်းမာရေးနဲ့ညီညွတ်တဲ့အစားအသောက်များ၊ ပုံမှန်လေ့ကျင့်ခန်းလုပ်ခြင်းများ၊ ဆေးလိပ်ဖြတ်ခြင်းများ ပါဝင်ပါတယ်။

AHA ဥက္ကဌဒေါက်တာ'ဒေါ်နယ်လ်လွိက်ဂျုန်းစ်'က "အိပ်စက်ခြင်းက ယေဘုယျကျန်းမာရေးအပေါ် ထိရောက်နေပါတယ်၊ လုံလောက်ကျန်းမာစွာအိပ်စက်ရတဲ့လူတွေက ကိုယ်အလေးချိန်၊ သွေးပေါင်ချိန်၊ ဆီးချိုရောဂါဖြစ်နိုင်ချေတို့ကို ပိုမိုထိရောက်စွာထိန်းချုပ်လာနိုင်ပါတယ်၊ အိပ်စက်ခြင်းနည်းလမ်းတွေကို အဆင့်မြင့်ကိရိယာများနဲ့ တိုင်းတာလာနိုင်ပြီး သူတို့ရဲ့အိပ်စက်ခြင်းကို လေ့လာနိုင်မှာဖြစ်ပါတယ်" လို့ ဆိုခဲ့ပါတယ်။

အသက် ၅ နှစ်အောက်ကလေးတွေကတော့ အိပ်ချိန် ၁၀ နာရီမှ ၁၆ နာရီအတွင်းရှိသင့်တယ်လို့ အကြံပြုထားပါတယ်။

လုံလောက်စွာ မအိပ်စက်ရတဲ့လူတွေဟာ နှလုံးရောဂါ၊ သွေးတိုးရောဂါ၊ အဝလွန်ရောဂါတို့ဖြစ်ပေါ်နိုင်ချေ မြင့်မားတယ်လို့ AHA က ကြေညာထားပါတယ်။

လက်ကိုင်ဖုန်းတွေလို စက်ပစ္စည်းတွေကို အလင်းမှိန်စနစ်ထားရှိသင့်ပြီး ညအိပ်စက်ရာမှာ အနှောင့်အယှက်မဖြစ်နိုင်အောင် အချက်ပေးအသံများလည်း ပိတ်ထားသင့်ကြောင်း အကြံပြုထားပါတယ်။

ယူကေရှိ သေဆုံးသူလူဦးရေ ၄ ပုံ ၁ ပုံခန့်ဟာ နှလုံးနဲ့သွေးကြောရောဂါများကြောင့် ဖြစ်ပါတယ်။

အမေရိကန်မှာလည်း နှလုံးရောဂါကြောင့် အဓိကသေဆုံးနေကြရပြီး တစ်နှစ်ကို လူပေါင်း ၆၅၉,၀၀၀ ခန့် သေဆုံးနေရပါတယ်။

AHA ရဲ့နည်းလမ်း ၇ သွယ်ထဲက အချို့အချက်အလက်များကို ပြင်ဆင်ထားပြီး သွေးပေါင်ချိန်နဲ့ သွေးတွင်းသကြားဓာတ်ထိန်းညှိရေးအကြောင်းတွေ ပါဝင်ပါတယ်။

Source: DailyMail
#Yangon_Media_Group

#WorldHealth
Published 2 July 2022

တောင်အမေရိကကုလားအုတ်ရဲ့ သွေးထဲကကိုယ်ခံအားအမှုန်လေးတွေက ကိုဗစ်မျိုးဗီဇကွဲအားလုံးနဲ့ SARS-CoV-1 လို အခြားဗိုင်းရပ်စ်တွေကို ကာကွယ်ပေးနိုင်ဖွယ်ရှိကြောင်း နယူးယော့ခ်မြို့ ဆီနိုင်းတောင်ဆေးရုံမှသုတေသီများက လေ့လာတွေ့ရှိခဲ့ပါတယ်။

ကုလားအုတ်ရဲ့ကိုယ်ခံအားအမှုန်(နာနိုပဋိပစ္စည်း)များကို ကိုဗစ်နဲ့အခြားဗိုင်းရပ်စ်ရောဂါများကိုတိုက်ဖျက်ဖို့ နှာခေါင်းဖျန်းဆေးထုတ်လုပ်ရာမှာ အသုံးပြုနိုင်ဖွယ်ရှိကြောင်း Cell Reports မှာ အင်္ဂါနေ့က ဖော်ပြခဲ့ပါတယ်။

ကုလားအုတ်မျိုးနွယ်ဝင်တွေက အခြားတိရိစ္ဆာန်များနဲ့ယှဉ်ရင် ကိုယ်ခံအားစနစ် ၂ မျိုးပါဝင်ပြီး ပုံမှန်ပဋိပစ္စည်းများထက် ၁၀ ဆမျှ ပိုမိုသေးငယ်တာကြောင့် ဗီဇပြောင်းလဲလာတဲ့ ဗိုင်းရပ်စ်တွေ မလွတ်အောင် အချင်းချင်းချိတ်ဆက်တည်ရှိနေပါတယ်။

သူတို့ရဲ့သေးငယ်တဲ့အရွယ်အစားနဲ့ အမျိုးမျိုးသောဗိုင်းရပ်စ်တွေကိုချေဖျက်နိုင်တဲ့စွမ်းရည်များကြောင့် သူတို့ရဲ့နာနိုပဋိပစ္စည်းများဟာ နောင်ထွက်ပေါ်လာနိုင်တဲ့မျိုးဗီဇကွဲတွေနဲ့ SARS ကဲ့သို့ ဗိုင်းရပ်စ်များပျံ့နှံခြင်းကို ထိရောက်စွာကာကွယ်နိုင်မှာဖြစ်ကြောင်း ဆီနိုင်းတောင်ဆေးတက္ကသိုလ်မှ ဆေးဝါးသိပ္ပံတွဲဖက်ပရော်ဖက်ဆာဒေါက်တာ'ယီရှီ'က ပြောပြခဲ့ပါတယ်။

"စွမ်းရည်တည်ငြိမ်မှုရှိခြင်း၊ ကုန်ကျစရိတ်သက်သာခြင်း၊ အသက်ရှူလမ်းကြောင်း အထက်ပိုင်းနဲ့ အောက်ပိုင်းရောကို ရောဂါပိုးဝင်ရောက်ခြင်းမှ ကာကွယ်နိုင်ခြင်းတို့ ပေးစွမ်းနိုင်ပြီး ကိုဗစ်မျိုးဗီဇကွဲအသစ်တွေပေါ်ထွက်လာရင် ကာကွယ်ဆေးတွေ ပဋိပစ္စည်းဆေးဝါးတွေကို ဖြည့်စွက်ကာကွယ်နိုင်အောင် အရေးပေါ်ကုသနည်းတွေ ထုတ်လုပ်နိုင်မှာဖြစ်ကြောင်း ဒေါက်တာ'ရှီ'က ပြောကြားခဲ့ပါတယ်။

သုတေသီတွေက တောင်အမေရိကကုလားအုတ်တစ်ကောင်ကို ကိုဗစ်ဗိုင်းရပ်စ်စပိုက်ခ်နဲ့ ထပ်ခါထပ်ခါထိတွေ့စေတဲ့အခါ SARS-CoV-2 ဗိုင်းရပ်စ်အပြင် ဗိုင်းရပ်စ်အမျိုးမျိုးကိုချေဖျက်နိုင်တဲ့ ပဋိပစ္စည်းတွေထွက်ပေါ်စေပြီး စွမ်းအားမြင့်ခုခံအားရရှိစေကြောင်း သိရှိရပါတယ်။

ဗိုင်းရပ်စ်အမျိုးမျိုးကို ထိရောက်စွာကာကွယ်နိုင်တဲ့ နာနိုပဋိပစ္စည်းတွေကို သီးသန့်ခွဲထုတ်ခဲ့ကြပါတယ်။

"နာနိုပဋိပစ္စည်းသေးသေးလေးတွေက လျင်မြန်စွာဗီဇပြောင်းလဲလာတဲ့ဗိုင်းရပ်စ်တွေကို သိသိသာသာကာကွယ်နိုင်တယ်လို့ သိရပါတယ်၊ ဗိုင်းရပ်စ်ရဲ့မျက်နှာပြင်ကိုဝင်ရောက်ပြီး ဗိုင်းရပ်စ်လွတ်ထွက်ခြင်း ဗီဇပြောင်းလဲခြင်းတွေမဖြစ်အောင် နေရာပေါင်းစုံကို ပေါင်းစပ်လိုက်ကြပါတယ်" လို့ ကယ်လီဖိုးနီးယားမှ ဇီဝတည်ဆောက်ပုံပရော်ဖက်ဆာဒေါက်တာ'အီယန်ဝီလ်ဆန်'က ပြောပြခဲ့ပါတယ်။

သူတို့ရဲ့တွေ့ရှိချက်အရ ဗိုင်းရပ်စ်ဗီဇပြောင်းလဲခြင်းနဲ့ လွတ်ထွက်ခြင်းမဖြစ်အောင် ဗိုင်းရပ်စ်တွေရဲ့ စပိုက်ခ်ပရိုတိန်း ၂ နေရာမှာ ချိတ်ဆက်နိုင်တဲ့ စွမ်းအားမြင့်နာနိုပဋိပစ္စည်းကို သုတေသီများက ဖန်တီးခဲ့ကြပါတယ်။

Source: The Jerusalem Post
#Yangon_Media_Group

#WorldBusiness
Published 1 July 2022

ဂူဂဲလ်ကုမ္ပဏီက ဆီလီကွန်တောင်ကြားမှာ ရုံးခန်းတွဲအသစ်များထပ်မံဖွင့်လှစ်လိုက်ပြီး ဝန်ထမ်းများရုံးသို့ အလုပ်ခွင်ပြန်လည်ဝင်ရောက်ဖို့ စီစဉ်လိုက်ပါတယ်။

#Yangon_Media_Group

Published 1 July 2022

တရုတ်နိုင်ငံ၊ ဟောင်ကောင်အထူးအုပ်ချုပ်ခွင့်ရေဒေသရဲ့ ခြောက်ကြိမ်မြောက်သက်တမ်းအစိုးရ တရားဝင်စတင်ခြင်း အခမ်းအနားကို ဇူလိုင်(၁)ရက်နေ့ သောကြာနေ့မနက်က ကျင်းပခဲ့ပါတယ်။

အဲဒီအခမ်းအနားကို တရုတ်သမ္မတ ရှီကျင့်ဖျင် တက်ရောက်ခဲ့ပါတယ်။

ခြောက်ကြိမ်မြောက်သက်တမ်းအတွက် ဟောင်ကောင်အထူးအုပ်ချုပ်ခွင့်ရေဒေသရဲ့ အမှုဆောင်အရာရှိချုပ်အဖြစ် ဂျွန်လီနှင့် အုပ်ချုပ်ရေးအတွင်းဝန်ချုပ်အဖြစ် ချန်ကွတ်ကီတို့က ကျမ်းသစ္စာ ကျိန်ဆိုခဲ့ပါတယ်။

ဒီအခမ်းအနားကို ဟောင်ကောင်ကို တရုတ်ပြည်မကြီးသို့ပြန်လည်လွှဲပြောင်းခဲ့တဲ့ ၂၅နှစ်မြောက်အထိမ်းအမှတ်အခမ်းအနား နှင့်အတူ ကျင်းပခဲ့တာဖြစ်ပါတယ်။

ဟောင်ကောင်ကိုလွှဲပြောင်းရယူခဲ့တဲ့ အထိမ်းအမှတ်အခမ်းအနားမှာ သမ္မတရှီက အရေးတကြီးမိန့်ခွန်တစ်ရပ်လည်း ပြောကြားခဲ့ပါတယ်။

သမ္မတရှီက အသစ်ခန့်အပ်လိုက်တဲ့ ဟောင်ကောင်အမှုဆောင်အရာရှိချုပ်နှင့် အစိုးရအဖွဲ့သစ်ကို ချီးကျူးဂုဏ်ပြုတဲ့ အကြောင်း မိန့်ခွန်းအစမှာပြောပါတယ်။

“ နိုင်ငံတစ်နိုင်ငံ၊စနစ်နှစ်မျိုးနှင့် ဟောင်ကောင်ရဲ့ ကြွယ်ဝချမ်းသာမှုနှင့်တည်ငြိမ်မှုကို ထောက်ခံအားပေးကြတဲ့ ပြည်တွင်းပြည်ပက တရုတ်နိုင်ငံသားတွေနှင့် နိုင်ငံရပ်ခြားက မိတ်ဆွေတွေကို လှိုက်လှဲစွာကျေးဇူးတင်ပါတယ်” လို့ ရှီက ပြောပါတယ်။

“ကြိမ်ဖန်များစွာ ကြံ့ကြံ့ခံ စမ်းသပ်ခံနိုင်ခဲ့တဲ့ တစ်နိုင်ငံ စနစ်နှစ်ခုဟာ နိုင်ငံရဲ့အကျိုးစီးပွားကို ဖော်ဆောင်ပေးနေလို့ ရေရှည် စွဲမြဲစွာ ဆောင်ရွက်သွားမယ်” လို့လည်း ရှီက သတိပေးပြောကြားလိုက်တယ်။

သမိုင်းတစ်လျောက်မှာ ဟောင်ကောင်မျိုးချစ်တွေဟာ တရုတ်နိုင်ငံရဲ့ သွေးသားတွေအမြဲတမ်းဖြစ်ပြီး မိခင်ပြည်မကြီးနှင့်အတူ ရပ်တည်ခဲ့ကြတာဖြစ်တယ်လို့လည်း သူက ထည့်သွင်းပြောကြားသွားခဲ့ပါတယ်။

Source CCTV+

#DailyNews
Published - 1 July 2022

၁။ တိုင်ဖုန်းမုန်တိုင်းသက်ရောက်မှုကြောင့် မြန်မာနိုင်ငံတောင်ပိုင်းဒေသများတွင် မိုးသက်လေပြင်းကျရောက်နိုင်

၂။ ရန်ကုန်ရွှေဈေးကွက် အရောင်းအဝယ်အေးနေဟုဆို

၃။ မိုးလေဝသ သတင်း

၄။ ကိုဗစ်ကပ်ရောဂါအလွန် ဆီလီကွန်တောင်ကြားတွင် ဂူဂဲလ်ကုမ္ပဏီရုံးခန်းအသစ်များဖွင့်လှစ်

#Yangon_Media_Group

#WorldPolitics
Published 1 July 2022

ယူကရိန်းသမ္မတ'ဗိုလိုဒီမီယာဇယ်လန်စကီ'ထံမှ သတင်းစကားကို ရုရှားခေါင်းဆောင်'ဗလာဒီမီယာပူတင်'ဆီ ပေးပို့ခဲ့ကြောင်း အင်ဒိုနီးရှားသမ္မတ'ဂျိုကိုဝီဒိုဒို'က ဇွန်လ ၃၀ ရက်နေ့မှာ မော်စကို၌ပြောကြားခဲ့ပါတယ်။

ယူကရိန်းကို ရုရှားကျူးကျော်ပြီး ၄ လကျော်လာတဲ့အချိန်မှာ 'ပူတင်'က 'ဝီဒိုဒို'ကိုလက်ခံတွေ့ဆုံခဲ့တာ ဖြစ်ပါတယ်။

အနောက်နိုင်ငံတွေရဲ့ပိတ်ဆို့အရေးယူမှုတွေကြောင့် ရုရှားတို့က အာရှနဲ့အာဖရိကတို့မှာ အခြေပြုလည်ပတ်ရန်ကြိုးစားနေတာဖြစ်ပါတယ်။

အင်ဒိုနီးရှားနိုင်ငံက ယခုနှစ် ဂျီ-၂၀ အဖွဲ့အစည်းမှာ အလှည့်ကျဥက္ကဌရာထူး ရယူထားပြီး နိုဝင်ဘာလအတွင်း ဘာလီကျွန်းမှာ ထိပ်သီးအစည်းအဝေးပွဲ ကျင်းပနိုင်ရန်ပြင်ဆင်နေပါတယ်။

"သမ္မတ'ဇယ်လန်စကီရဲ့သတင်းစကားကို သမ္မတ'ပူတင်'ထံပေးလိုက်ပါပြီ၊ နှစ်ဖက်ခေါင်းဆောင်တွေကြား ကူညီချိတ်ဆက်ပေးဖို့ အဆင့်သင့်ရှိနေပါတယ်" လို့ 'ဝီဒိုဒို'က ရုရှားခေါင်းဆောင်နဲ့ ပြောကြားခဲ့ပါတယ်။

နောက်ထပ်အသေးစိတ်များကိုတော့ ဖော်ပြခြင်းမရှိသလို အဲဒီသတင်းစကားထဲက အချက်အလက်များကိုလည်း နှစ်ဖက်စလုံးက မပြောကြားခဲ့ပါဘူး။

'ဝီဒိုဒို'က မော်စကိုမှာ 'ပူတင်'နဲ့မတွေ့ဆုံခင် ဗုဒ္ဓဟူးနေ့က ယူကရိန်းသို့သွားရောက်ခဲ့ပါတယ်။

"ပြင်ပအခြေအနေတွေက ခက်ခဲနေသေးပေမယ့် ပွင့်ပွင့်လင်းလင်းဆွေးနွေးပြီး ပြေလည်မှုရရှိအောင် လုပ်ဖို့ကလည်း အရေးကြီးပါတယ်၊ စစ်ပွဲကိုအမြန်ဆုံး အဆုံးသတ်စေချင်ပါတယ်၊ ပူးပေါင်းဆောင်ရွက်ရေးသဘောထားအတိုင်းဆောင်ရွက်ဖို့ ကမ္ဘာ့ခေါင်းဆောင်တွေအားလုံးကို တောင်းဆိုချင်ပါတယ်" လို့ မော်စကိုမှာ ပြောကြားခဲ့ပါတယ်။

ဂျီ-၂၀ အစည်းအဝေးပွဲထံ 'ပူတင်'ကိုဧပြီလက ဖိတ်ကြားခဲ့ပြီးနောက် အနောက်နိုင်ငံများက 'ပူတင်'ကိုဖယ်ထုတ်ပေးဖို့ အင်ဒိုနီးရှားကို ဖိအားပေးလာကြပါတယ်။

ဗုဒ္ဓဟူးနေ့တုန်းက 'ဇယ်လန်စကီ'ကပြောကြားရာမှာ ဂျီ-၂၀ ထိပ်သီးအစည်းအဝေးပွဲကို တက်ရောက်ဖို့က ဘယ်သူတွေတက်ရောက်လဲဆိုတဲ့အပေါ် မူတည်ကြောင်း ဆိုပါတယ်။

'ပူတင်'က 'ဝီဒိုဒို'နဲ့ပြောဆိုဆွေးနွေးရာမှာ အကျိုးဖြစ်ထွန်းစေတယ်လို့ ပြောဆိုခဲ့ပါတယ်။

"ယနေ့ရရှိခဲ့တဲ့သဘောတူညီချက်တွေက ရုရှား-အင်ဒိုနီးရှား မိတ်ဖက်ဆက်ဆံရေးကို ပိုမိုခိုင်မာစေမယ်လို့ ယုံကြည်ပါတယ်" လို့ 'ပူတင်'က ဆိုခဲ့ပါတယ်။

Source: CNA
#Yangon_Media_Group