#World_Health
Published 14 September 2023

မနက်စာက တစ်နေ့တာအတွက် မရှိမဖြစ်လိုအပ်တဲ့ စားသောက်မှုတစ်ခုဖြစ်ပြီး  မနက်စာ မစားဘူးဆိုရင် တစ်နေ့တာလှုပ်ရှားမှုတွေကို ထိခိုက်စေလောက်တဲ့ ကျန်းမာရေးပြဿနာတွေ ဖြစ်လာနိုင်ပါတယ်။

မနက်စာကို အာဟာရညီညွတ်စွာ ပြည့်ဝအောင် စားသုံးမယ်ဆိုရင် တစ်နေ့တာအတွက် စွမ်းအင်တွေ ပေးစွမ်းနိုင်မှာဖြစ်ပါတယ်။

မနက်စာ မစားဖြစ်ဘူးဆိုရင် နောက်ထပ်နောက်ထပ် ဆာလောင်နေမှာဖြစ်ပြီး ပိုမိုစားသုံးဖြစ်မှာ ဖြစ်ပါတယ်။

ဒါဟာ ကျန်းမာရေးနဲ့ မညီညွတ်တဲ့အပြင် ကိုယ်အလေးချိန် တက်လာစေမှာ ဖြစ်ပါတယ်။

မနက်စာကို မဖြစ်မနေ စားသုံးသင့်တဲ့ အကြောင်းအရင်း ၃ ခုကို အာဟာရပညာရှင် ရူဂျူတာဒီဝယ်ကာက အင်စတာဂရမ်မှာ မျှဝေသွားပါတယ်။

 
(၁) ကိုယ်အလေးချိန်ကျစေရန် ကူညီပေးခြင်း

မနက်စာ မစားဘူးဆိုရင် နေ့လယ်စာနဲ့ ညစာစားတဲ့အခါ ကယ်လိုရီတွေ ပိုမိုစားသုံးဖြစ်မှာ ဖြစ်ပါတယ်။

မနက်စာကို ကျန်းမာရေးနဲ့ ညီညွတ်စွာ စားသုံးမယ်ဆိုရင်တော့ တစ်နေ့တာအတွက် ကယ်လိုရီကို ဖြန့်ဝေသွားမှာဖြစ်ပြီး ကိုယ်အလေးချိန်ချရာမှာ အကူအညီဖြစ်စေမှာ ဖြစ်ပါတယ်။

 
(၂) မကောင်းတဲ့ကယ်လိုရီများ မစားသုံးမိစေရန်ကာကွယ်ခြင်း

မနက်စာ မစားတဲ့သူတွေက ညဘက်မှာ ပိုမိုဆာလောင်တတ်ပြီး အာဟာရတန်ဖိုးမရှိတဲ့ အစားအစာ ကယ်လိုရီတွေ ပိုမိုစားသုံးမိတတ်ပါတယ်။

 
(၃) ဆာလောင်သဖြင့် စိတ်ဆိုးဒေါသထွက်ခြင်းကို တားဆီးပေးခြင်း

လုံလောက်စွာ မစားသုံးရသဖြင့် ဒေါသထွက်တာမျိုး မဖြစ်ရအောင် မနက်စာကို ပြည့်ဝအောင် စားသုံးဖို့ လိုအပ်ပါတယ်။

#World_Health #မနက်စာ #မဖြစ်မနေစားသုံးသင့်
Source: NDTV

BRICS အဖွဲ့ဝင်နိုင်ငံသစ် ၆ နိုင်ငံတိုးချဲ့ရေးကိစ္စက တစ်ကမ္ဘာလုံးမှာပါ ဆက်လက်သက်ရောက်နေပြီး အရင်က အမေရိကန်နဲ့ ရင်းနှီးကျွမ်းဝင်ခဲ့တဲ့ ဆော်ဒီအာရေဗျနိုင်ငံ အပါအဝင် ပင်လယ်ကွေ့နိုင်ငံများကလည်း တိုးတက်လာတဲ့ အဆိုပါစီးပွားရေးနိုင်ငံများ အဖွဲ့အစည်းမှာ အဖွဲ့ဝင်ဖြစ်လာရန် ကြိုးပမ်းလာကြပါတယ်။
Published 13 September 2023
#World_Politics #အနောက်တိုင်းကိုမှီခိုနေ #BRICSအဖွဲ့ဝင် #ဆော်ဒီအာရေဗျနိုင်ငံ

#Daily_News
Published_ 13 September 2023

၁။ မွန်၊ ကရင်၊ တနင်္သာရီဒေသများတွင် မိုးသည်းထန်ပြီး ရေကျော်နိုင်သဖြင့် ခရီးသွားသူများသတိပြုသွားလာရန်လို

၂။ မြန်မာငွေတန်ဖိုးကျတဲ့အတွက် ယခင်နှစ်များထက် ဘင်္ဂလားဒေ့ရှ်မှ ဂျင်းဝယ်ယူမှုပိုများလာ

၃။ ရိုးရာမတိမ်ကော မပပျောက်အောင် ယခုနှစ်တွင်တနင်္သာရီရိုးရာ နဂါးလှေတော်ပွဲပြန်ကျင်းပလိုဟုဆို

၄။ ကာလကြာရှည်စွာ အနောက်တိုင်းကို မှီခိုနေခဲ့သည့်ဆော်ဒီအာရေဗျနိုင်ငံ BRICS အဖွဲ့ဝင်ဖြစ်လာရန်ကြိုးပမ်းလာ.... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG

၁၃ စက်တင်ဘာ ၂၀၂၃

အိန္ဒိယနိုင်ငံတောင်ပိုင်း ကဲရာလာပြည်နယ်မှာ  ဖြစ်ခဲပြီး ကြောက်မက်ဖွယ်ကောင်းတဲ့ဦးနှောက်စား Nipah နီပါး ဗိုင်းရပ်စ်ပိုး ကူးစက်လို့ လူနှစ်ဦး သေဆုံးပြီးနောက် စာသင်ကျောင်းအချို့ကို စက်တင်ဘာ ၁၃ ရက်ဗုဒ္ဓဟူးနေ့မှာ ပိတ်လိုက်ရပါတယ်။

ဆေးရုံမှာ လူကြီးတစ်ဦးနှင့် ကလေးငယ်တစ်ဦးကို ယခုဆေးရုံတင်ထားရဆဲပါ။  လူပေါင်း ၁၃၀ကျော်ကို အဆိုပါဦးနှောက်စားပိုးကူးစက်ခဲ့ တာဖြစ်ပါတယ်။ အဲဒီပိုးဟာ လင်းနို့တွေ၊ဝက်တွေနှင့် အခြားလူတွေနှင့် တိုက်ရိုက်ထိတွေ့ရာကနေကူးစက်တာဖြစ်တယ်လို့ အိန္ဒိယ ကျန်းမာရေးအရာရှိတစ်ဦးကပြောပါတယ်။

“ ကူးစက်ခံရသူတွေနှင့်ထိတွေ့ခဲ့သူတွေကို အရင်ဆုံး အဓိကထား လိုက်နေပါတယ်။ ပြီးတော့ရောဂါလက္ခဏာပြနေသူတွေကိုလည်း သီးသန့်ခွဲထားပါတယ်” လို့ ပြည်နယ်ကျန်းမာရေးဝန်ကြီး ဗီနာဂျော့က အိန္ဒိယမီဒီယာတွေကိုပြောပါတယ်။ ဗိုင်းရပ်စ်မျိုးကွဲကို လေ့လာ ဆန်းစစ်းနေတယ်လို့လည်းသူကပြောပါတယ်။

“ ကျန်းမာရေးအကျပ်အတည်းကိုထိန်းချုပ်နိုင်စေဖို့ ပြည်နယ်ရဲ့ အစိတ်အပိုင်းတွေမှာ သွားလာမှုကန့်သတ်ထားပါတယ်” လို့ သူက ဆက်ပြောပါတယ်။

ဩဂုတ် ၃၀ရက်ကတည်းက ကူးစက်မှုကြောင့် လူနှစ်ဦးသေဆုံးခဲ့ရပါတယ်။ ၂၀၁၈ခုနှစ်ကတည်းကဆိုရင် ဒါဟာ စတုတ္ထအကြိမ် မြောက်ပြည်နယ်မှာ ဗိုင်းရပ်စ်ကူးစက်ခြင်းဖြစ်ပါတယ်။  ကိုချီကိုဒီခရိုင်က ရွာ(၇)ရွာကို ထိန်းချုပ်ရေးဇုံအဖြစ်ကြေညာထားပါတယ်။

ပထမဆုံးသေဆုံးသူဟာ မာရူတွန်ကရာရွာက မြေပိုင်ရှင်တစ်ဦးဖြစ်ပြီး သူ့သမီးနှင့်ယောက်ဖတို့လည်း ကူးစက်ခံရပြီး ဆေးရုံက သီးခြား အခန်းထဲထည့်ထားရတယ်လို့ အစိုးရအရာရှိတစ်ဦးကပြောပါတယ်။  ဒုတိယသေဆုံးသူဟာ ပထမသေဆုံးသူနှင့်ဆေးရုံမှာထိတွေ့ခဲ့ပြီး သူတို့နှစ်ဦး ဘာမှတော်စပ် ဆက်စပ်ခြင်းတော့မရှိဘူးလို့ အဆိုပါအရာရှိကပြောပါတယ်။

ပထမဆုံးသော နီပါးဗိုင်းရပ်စ်ကို ၁၉၉၉ခုနှစ်မှာ မလေးရှားနှင့်စင်္ကာပူက ဝက်မွေးသူတွေနှင့်အခြားသူတွေဆီကနေ စတင်ကူးစက်ပျံ့နှံ့ခဲ့တာ ဖြစ်ပါတယ်။

ကဲရာလာပြည်နယ်မှာ ၂၀၁၉မှာ ပထမဆုံးကူးစက်မှုဖြစ်တုန်းက ၂၃ဦးအကူးခံရပြီး ၂၁ ဦးသေဆုံးခဲ့ရပါတယ်။ ၂၀၂၁ မှာ နောက်ထပ် နှစ်ဦးထပ်သေဆုံးခဲ့ရပါတယ်။

အိန္ဒိယနိုင်ငံ ကဲလာရာပြည်နယ်ဟာ လင်းနို့ဗိုင်းရပ်စ်တွေကူးစက်နိုင်တဲ့ ကမ္ဘာ့အန္တရာယ်အရှိဆုံးနေရာတွေထဲမှာ တစ်ခုပါဝင်နေပါတယ်။

#World_Health
Published 13 September 2023

အီလက်ထရွန်နစ် စီးကရက်တွေက ကြွက်တွေရဲ့ ဝှေးစေ့အရွယ်အစားနဲ့ သုတ်ပိုးအရေအတွက်တို့အပေါ် သက်ရောက်နေပုံကို သိပ္ပံပညာရှင်များ လေ့လာခဲ့ကြပါတယ်။

ကြွက်တွေဟာ ခန္ဓာဗေဒ၊ ဇီဝကမ္မဖြစ်စဥ်၊ မျိုးဗီဇပိုင်းတွေမှာ လူသားတွေနဲ့ ဆင်တူတာကြောင့် ယင်းတို့ဖြင့် စမ်းသပ်မှုတွေ ပြုလုပ်ကြတာ ဖြစ်ပါတယ်။

ဒါကြောင့် ကြွက်တွေကို စမ်းသပ်မှုလုပ်ရာကနေ ရလာတဲ့ရလဒ်တွေဟာ အီး-စီးကရက်သုံးစွဲတဲ့ သူတွေမှာလည်း ယူဆလို့ ရနိုင်ပါတယ်။

သာမန်ကြွက်တစ်ကောင်ဟာ ပုံမှန်အားဖြင့် သုတ်ရည် ၁ မီလီလီတာမှာ သုတ်ပိုးကောင် ၉၈.၅ သန်း ပါဝင်ပါတယ်။

ကြွက်တွေကို အဖွဲ့ ၃ ဖွဲ့ခွဲလေ့လာခဲ့ရာ Winston အမှတ်တံဆိပ် စီးကရက်ငွေ့နဲ့ ထိတွေ့တဲ့အဖွဲ့၊ အီး-စီးကရက်ငွေ့နဲ့ ထိတွေ့တဲ့အဖွဲ့၊ ဘာစီးကရက်ငွေ့မှ မထိတွေ့တဲ့ အဖွဲ့ဆိုပြီး ခွဲခြားခဲ့ကြပါတယ်။

ဆေးလိပ်ငွေ့တွေကို တစ်ခါထိတွေ့ရင် တစ်နာရီဖြင့် တစ်နေ့ကို နှစ်ကြိမ်ထိတွေ့စေပါတယ်။

ထိုအခါမှာ အီး-စီးကရက်ငွေ့ရှူရတဲ့ ကြွက်တွေမှာ သုတ်ပိုးကောင် ၉၅.၁ သန်းခန့် ကျဆင်းသွားပြီး သာမန်စီးကရက်ငွေ့ ရှူရတဲ့ကြွက်တွေမှာတော့ ၈၉ သန်း ကျဆင်းသွားပါတယ်။

အီး-စီးကရက်ငွေ့တွေကို အရင်က ဘေးအန္တရာယ်မရှိဘူးလို့ ယူဆခဲ့ကြပေမယ့် ဓာတ်တိုးမှုများ ဖြစ်နိုင်ပြီး ဝှေးစေ့မှာ ပြောင်းလဲမှုတွေ ဖြစ်ပေါ်နိုင်တယ်လို့ တွေ့ရှိခဲ့ကြတာ ဖြစ်ပါတယ်။

အထီးမျိုးပွားစနစ်နဲ့ သုတ်ပိုးကောင်ကျဆင်းမှုများအပေါ် ဆေးလိပ်ငွေ့ရဲ့ သက်ရောက်မှုတွေကို အလုံးစုံသိရှိနားလည်ဖို့ နောက်ထပ်သုတေသန ပြုလုပ်ရန်လိုအပ်ကြောင်း၊ ဒီလေ့လာချက်က အမျိုးသားမျိုးပွားစနစ် ကျန်းမာရေးအပေါ် စီးကရက်သောက်ခြင်းရဲ့ သက်ရောက်မှုတွေကို နားလည်စေနိုင်မယ့် အခွင့်အရေးဖြစ်နေပါတယ်။  

#World_Health #အီး-စီးကရက် #သုတ်ပိုးအရေအတွက်
Source: The Jerusalem Post

#World_News
Published 13 September 2023

လစ်ဗျားနိုင်ငံမှာ မက်ဒီတာရေးနီးယန်း မုန်တိုင်းကြီး ဝင်ရောက်တိုက်ခတ်သဖြင့် ရေကြီးရေလျှံခြင်းများ ဖြစ်ပေါ်ကာ လူပေါင်းထောင်ချီသေဆုံးပြီး အနည်းဆုံးလူ ၁ သောင်းခန့် ပျောက်ဆုံးနေပါတယ်။

မုန်တိုင်းကြောင့် ဆည်များ ကျိုးပြီး အဆောက်အအုံများကို တိုက်စားသွားကာ အရှေ့ဘက် ဒါနာကမ်းရိုးတန်းမြို့ရဲ့ ၄ ပုံ ၁ ပုံခန့်ကို ပျက်စီးသွားခဲ့ပါတယ်။

လူ ၂ ထောင်ကျော် သေဆုံးထားတယ်လို့ ဒါနာမှ အကြီးတန်းဆေးပညာရှင်တစ်ဦးက ရိုက်တာသတင်းဌာနကို ပြောကြားခဲ့ကာ လစ်ဗျားအရာရှိများကတော့ ရုပ်သံသတင်းဌာနများရဲ့ ဖော်ပြချက်များအရ သေဆုံးသူ ၅ ထောင်ဝန်းကျင်ရှိမယ်လို့ ခန့်မှန်းထားကြပါတယ်။

မုန်တိုင်းဒန်နီယယ်ဟာ မက်ဒီတာရေးနီးယန်းကို ဝင်ရောက်ဖြတ်ကျော်ကာ ဆယ်စုနှစ်ကျော်ကြာအောင် ပဋိပက္ခဖြစ်ပွားနေခဲ့တဲ့ နိုင်ငံကို ဖျက်ဆီးသွားတာပဲ ဖြစ်ပါတယ်။

နေထိုင်သူလူဦးရေ ၁၂၅,၀၀၀ ရှိတဲ့ ဒါနာမြို့မှာ လုံးဝပျက်စီးသွားပုံကို ရိုက်တာသတင်းထောက်များ မြင်တွေ့ခဲ့ကြပါတယ်။

မြို့ရဲ့ ခရိုင် ၂ ခုထဲက တစ်ခုမှာ လူ ၁,၇၀၀ သေဆုံးခဲ့ပြီး နောက်ခရိုင်မှာတော့ လူ ၅၀၀ သေဆုံးခဲ့ကြောင်း ဝါဒါဆေးရုံ ညွှန်ကြားရေးမှူး မိုဟာမက်အယ်ကာဘီစီက ပြောကြားခဲ့ပါတယ်။

ဆေးရုံစင်္ကြံလျှောက်လမ်းတွေမှာ အလောင်းတွေ စုပုံထားတာကိုလည်း သတင်းထောက်များ မြင်တွေ့ခဲ့ကြပါတယ်။

အရှေ့တိုင်း ပြည်ထဲရေးဝန်ကြီးက လူပေါင်း ၅ ထောင်ကျော်သေဆုံးခဲ့တယ်လို့ ပြောကြားခဲ့ကြောင်း အယ်မာဆာရုပ်သံဌာနက ထုတ်လွှင့်ခဲ့ပါတယ်။

လစ်ဗျားနိုင်ငံရဲ့ ဒုတိယအကြီးဆုံးမြို့ ဘင်ဂါဇီအပါအဝင် အခြားအရှေ့ပိုင်းမြို့များမှာလည်း မုန်တိုင်းဝင်ရောက်ခဲ့ကာ သေဆုံးသူအရေအတွက် အလွန်များပြားနိုင်ပြီး အခြားသတင်းရင်းမြစ်များအရ ပျောက်ဆုံးသူအရေအတွက် ၁ သောင်းခန့် ရှိနေပြီလို့ နိုင်ငံတကာ ကြက်ခြေနီကိုယ်စားလှယ်အဖွဲ့ အကြီးအကဲ တေမာရာမာဒန်က ပြောပြသွားပါတယ်။

ကုလသမဂ္ဂလူသားချင်း စာနာထောက်ထားခြင်း ပူးပေါင်းဆောင်ရွက်မှုရုံးက အရေးပေါ်ကယ်ဆယ်ရေးအဖွဲ့များ စေလွှတ်ထားတယ်လို့ ဆိုပါတယ်။

တူရကီနဲ့ အခြားနိုင်ငံများက လစ်ဗျားနိုင်ငံအတွက် ရှာဖွေကယ်ဆယ်ရေးယာဥ်များ၊ လှေများ၊ မီးစက်များ၊ အစားအစာများကို အလျင်အမြန် ထောက်ပံ့ကူညီလာကြပါတယ်။

အစကတော့ မိုးသည်းထန်စွာ ရွာတယ်လို့ပဲ ထင်ခဲ့ကြပေမယ့် ညသန်းခေါင်ကြီး ပေါက်ကွဲသံကြားတဲ့အချိန်မှာ ရေကာတာကြီး ပေါက်သွားတာပဲ ဖြစ်တယ်လို့ အသက်ရှင်ကျန်ရစ်သူ ရာဂျာဆာဆီက ပြောပြခဲ့ပါတယ်။

ရေတပ်အဖွဲ့တွေက ပင်လယ်ထဲမျောပါသွားတဲ့ လူတွေကို လိုက်လံရှာဖွေနေကြောင်း ပြည်ထဲရေးဝန်ကြီးဌာနမှ ပြောရေးဆိုခွင့်ရှိသူတစ်ဦးက အယ်လ်ဂျာဇီရာသတင်းဌာနကို ပြောကြားသွားပါတယ်။

#World_News #လစ်ဗျား #ဆည်များကျိုး #မြို့၏လေးပုံတစ်ပုံခန့်ပျက်စီး
Source: Reuters