#World_News
Published 13 September 2023

လစ်ဗျားနိုင်ငံမှာ မက်ဒီတာရေးနီးယန်း မုန်တိုင်းကြီး ဝင်ရောက်တိုက်ခတ်သဖြင့် ရေကြီးရေလျှံခြင်းများ ဖြစ်ပေါ်ကာ လူပေါင်းထောင်ချီသေဆုံးပြီး အနည်းဆုံးလူ ၁ သောင်းခန့် ပျောက်ဆုံးနေပါတယ်။

မုန်တိုင်းကြောင့် ဆည်များ ကျိုးပြီး အဆောက်အအုံများကို တိုက်စားသွားကာ အရှေ့ဘက် ဒါနာကမ်းရိုးတန်းမြို့ရဲ့ ၄ ပုံ ၁ ပုံခန့်ကို ပျက်စီးသွားခဲ့ပါတယ်။

လူ ၂ ထောင်ကျော် သေဆုံးထားတယ်လို့ ဒါနာမှ အကြီးတန်းဆေးပညာရှင်တစ်ဦးက ရိုက်တာသတင်းဌာနကို ပြောကြားခဲ့ကာ လစ်ဗျားအရာရှိများကတော့ ရုပ်သံသတင်းဌာနများရဲ့ ဖော်ပြချက်များအရ သေဆုံးသူ ၅ ထောင်ဝန်းကျင်ရှိမယ်လို့ ခန့်မှန်းထားကြပါတယ်။

မုန်တိုင်းဒန်နီယယ်ဟာ မက်ဒီတာရေးနီးယန်းကို ဝင်ရောက်ဖြတ်ကျော်ကာ ဆယ်စုနှစ်ကျော်ကြာအောင် ပဋိပက္ခဖြစ်ပွားနေခဲ့တဲ့ နိုင်ငံကို ဖျက်ဆီးသွားတာပဲ ဖြစ်ပါတယ်။

နေထိုင်သူလူဦးရေ ၁၂၅,၀၀၀ ရှိတဲ့ ဒါနာမြို့မှာ လုံးဝပျက်စီးသွားပုံကို ရိုက်တာသတင်းထောက်များ မြင်တွေ့ခဲ့ကြပါတယ်။

မြို့ရဲ့ ခရိုင် ၂ ခုထဲက တစ်ခုမှာ လူ ၁,၇၀၀ သေဆုံးခဲ့ပြီး နောက်ခရိုင်မှာတော့ လူ ၅၀၀ သေဆုံးခဲ့ကြောင်း ဝါဒါဆေးရုံ ညွှန်ကြားရေးမှူး မိုဟာမက်အယ်ကာဘီစီက ပြောကြားခဲ့ပါတယ်။

ဆေးရုံစင်္ကြံလျှောက်လမ်းတွေမှာ အလောင်းတွေ စုပုံထားတာကိုလည်း သတင်းထောက်များ မြင်တွေ့ခဲ့ကြပါတယ်။

အရှေ့တိုင်း ပြည်ထဲရေးဝန်ကြီးက လူပေါင်း ၅ ထောင်ကျော်သေဆုံးခဲ့တယ်လို့ ပြောကြားခဲ့ကြောင်း အယ်မာဆာရုပ်သံဌာနက ထုတ်လွှင့်ခဲ့ပါတယ်။

လစ်ဗျားနိုင်ငံရဲ့ ဒုတိယအကြီးဆုံးမြို့ ဘင်ဂါဇီအပါအဝင် အခြားအရှေ့ပိုင်းမြို့များမှာလည်း မုန်တိုင်းဝင်ရောက်ခဲ့ကာ သေဆုံးသူအရေအတွက် အလွန်များပြားနိုင်ပြီး အခြားသတင်းရင်းမြစ်များအရ ပျောက်ဆုံးသူအရေအတွက် ၁ သောင်းခန့် ရှိနေပြီလို့ နိုင်ငံတကာ ကြက်ခြေနီကိုယ်စားလှယ်အဖွဲ့ အကြီးအကဲ တေမာရာမာဒန်က ပြောပြသွားပါတယ်။

ကုလသမဂ္ဂလူသားချင်း စာနာထောက်ထားခြင်း ပူးပေါင်းဆောင်ရွက်မှုရုံးက အရေးပေါ်ကယ်ဆယ်ရေးအဖွဲ့များ စေလွှတ်ထားတယ်လို့ ဆိုပါတယ်။

တူရကီနဲ့ အခြားနိုင်ငံများက လစ်ဗျားနိုင်ငံအတွက် ရှာဖွေကယ်ဆယ်ရေးယာဥ်များ၊ လှေများ၊ မီးစက်များ၊ အစားအစာများကို အလျင်အမြန် ထောက်ပံ့ကူညီလာကြပါတယ်။

အစကတော့ မိုးသည်းထန်စွာ ရွာတယ်လို့ပဲ ထင်ခဲ့ကြပေမယ့် ညသန်းခေါင်ကြီး ပေါက်ကွဲသံကြားတဲ့အချိန်မှာ ရေကာတာကြီး ပေါက်သွားတာပဲ ဖြစ်တယ်လို့ အသက်ရှင်ကျန်ရစ်သူ ရာဂျာဆာဆီက ပြောပြခဲ့ပါတယ်။

ရေတပ်အဖွဲ့တွေက ပင်လယ်ထဲမျောပါသွားတဲ့ လူတွေကို လိုက်လံရှာဖွေနေကြောင်း ပြည်ထဲရေးဝန်ကြီးဌာနမှ ပြောရေးဆိုခွင့်ရှိသူတစ်ဦးက အယ်လ်ဂျာဇီရာသတင်းဌာနကို ပြောကြားသွားပါတယ်။

#World_News #လစ်ဗျား #ဆည်များကျိုး #မြို့၏လေးပုံတစ်ပုံခန့်ပျက်စီး
Source: Reuters

#World_Health
Published 13 September 2023

မနက်ခင်းမှာ အကြမ်းခြောက် လက်ဖက်ရည်သောက်သုံးရင် လူကိုအာရုံနိုးကြားစေပြီး တစ်နေ့တာကို လန်းဆန်းစေမှာ ဖြစ်ပါတယ်။

လူအချို့က အကြမ်းခြောက် လက်ဖက်ရည်သောက်တာကို မကောင်းဘူးလို့ ပြောကြပေမယ့် တကယ်တမ်းတော့ ကျန်းမာရေးအကျိုးကျေးဇူးတွေ ရှိနေပါတယ်။

လက်ဖက်ရည် ပေါ်ပေါက်လာရတဲ့ သမိုင်းကြောင်းက လွန်ခဲ့တဲ့နှစ်ပေါင်းများစွာကတည်းက စတင်ခဲ့ပါတယ်။

လက်ဖက်ရည်သောက်ခြင်းရဲ့ အကောင်းမွန်ဆုံး အကျိုးကျေးဇူးတွေကို ဖော်ပြလိုက်ပါတယ်။
 

(၁) ကိုယ်ခံအားကို မြှင့်တင်ပေးခြင်း

လက်ဖက်ခြောက်က ခန္ဓာကိုယ်အတွက် ဓာတ်တိုးဆန့်ကျင်ပစ္စည်းများ ပေးစွမ်းနိုင်ကာ ကိုယ်ခံအားစနစ်ကို မြှင့်တင်ပေးပါတယ်။

 
(၂) နှလုံးကျန်းမာရေးကို အထောက်အကူပြုခြင်း

တရုတ်နိုင်ငံမှ လူပေါင်း ၃ သိန်းခွဲကို လေ့လာခဲ့ရာ လက်ဖက်ရည်သောက်သုံးခြင်းဖြင့် နှလုံးရောဂါဖြစ်နိုင်ချေကို လျှော့ချပေးနိုင်တယ်လို့ တွေ့ရှိခဲ့ပါတယ်။

ဒါ့အပြင် ထိုထဲမှာပါဝင်တဲ့ သီယိုဖိုင်လင်းက အသက်ရှူလမ်းကြောင်း ကြွက်သားများကို ပြေလျော့စေကာ အသက်ရှူရ လွယ်ကူစေပါတယ်။

 
(၃) ဝေဒနာများသက်သာစေခြင်း

လက်ဖက်ခြောက်မှာပါဝင်တဲ့ ကဖင်းဓာတ်က ဗဟိုအာရုံကြောစနစ်ကို လှုံ့ဆော်ပေးကာ လူကိုနိုးကြားစေပြီး ငိုက်မျဥ်းခြင်းကို ကင်းဝေးစေပါတယ်။

လက်ဖက်ရည် ပုံမှန်သောက်ခြင်းဖြင့် ဦးနှောက်ထဲက အစိတ်အပိုင်းတွေ အစီအစဥ်တကျ ဖြစ်စေကာ မှတ်ဉာဏ်ပိုင်းလုပ်ဆောင်ချက် ကောင်းမွန်စေတယ်လို့ တွေ့ရှိထားပါတယ်။
 
(၄) အလှအပရေးရာအတွက် အထောက်အကူဖြစ်ခြင်း

လက်ဖက်ရည်သောက်ခြင်းဖြင့် အသားအရေကို ရေဓာတ်ဖြည့်ပေးပြီး နုပျိုကျန်းမာစေတဲ့အပြင် ရောင်ရမ်းခြင်းကိုလည်း လျှော့ချပေးပါတယ်။

 
(၅) ကိုယ်အလေးချိန်လျော့ကျစေနိုင်ခြင်း

လက်ဖက်ရည် မသောက်သူတွေထက်စာရင် သေက်သုံးလေ့ရှိသူတွေဟာ ခန္ဓာကိုယ် အဆီအချိုးနှုန်းကို လျော့ကျစေကာ ခါးပိုမိုသွယ်လျစေပါတယ်။

 
သတိထားရမှာကတော့ တော်သင့်ရုံသာ သောက်သုံးဖို့နဲ့ ညပိုင်းမှာရှောင်ရှားဖို့ပါပဲ။

#World_Health #လက်ဖက်ရည်သောက်သုံးခြင်း #ကျန်းမာရေးအကျိုးကျေးဇူးများ
Source: NDTV

အခုအချိန်မှာ ကမ္ဘာ့လျှပ်စစ်ကားဈေးကွက်အတွင်း ဂျာမနီကားထုတ်လုပ်ရေးကုမ္ပဏီတွေ ဆက်လက်နာမည်ရဖို့အရေး ခက်ခဲလာပါတယ်။

Published_ 12 September 2023
#World_Industry #ကမ္ဘာ့လျှပ်စစ်ကားဈေးကွက် #တရုတ်နိုင်ငံထုတ်ကား

#Daily_News
Published_ 12 September 2023

၁။ ကြက်မဲမွေးမြူလိုသူများလာသဖြင့် ကြက်မဲဥ၊ ကြက်မဲမျိုးဥနှင့် ကြက်မဲအကောင်ပေါက်များအရောင်းသွက်နေ

၂။ တညင်းကုန်းလက်ကားဈေးကြီးတွင် ဆိုင်ခန်းပေါင်း ၁၀၀၀ ကျော်ပါဝင်တဲ့ သစ်သီးဝလံဈေးရုံကြီးအောက်တိုဘာ ၁ ရက်တွင်ဖွင့်လှစ်မည်

၃။ အခုရက်ပိုင်းအတွင်း ရန်ကုန်အပါအဝင်ဒေသ(၆)ခုတွင် မိုးသည်းမည်

၄။ ကမ္ဘာ့လျှပ်စစ်ကားဈေးကွက်တွင် တရုတ်နိုင်ငံထုတ်ကားများအား ဂျာမနီယှဥ်ပြိုင်ရန်ခက်ခဲလာ .... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG

၁၂ စက်တင်ဘာ ၂၀၂၃

အာဖရိကနိုင်ငံတွေဟာ သူတို့ရဲ့ကလေးငယ်တွေကို ဥရောပအင်အားကြီးနိုင်ငံတွေက လူကုန်ကူးပြီး လှောင်အိမ်တွေထဲ ထည့်ပြသခဲ့ကြတဲ့ ကိုလိုနီဖိနှိပ်ချုပ်ခြယ်မှုတွေရဲ့ အမှောင်ခေတ်ကို အမြဲသတိရနေကြလိမ့်မယ်လို့ ရုရှားသမ္မတ ဗလာဒီမာပူတင်က အင်္ဂါနေ့က ပြောဆိုတဲ့အကြောင်း ရုရှားမီဒီယာများက ရေးသားကြပါတယ်။

အဲဒီနိုင်ငံတွေကပဲ သူတို့ရဲ့ ကိုလိုနီနိုင်ငံဟောင်းတွေကို သူ့ကျွန်ခိုင်းဖတ်ဘဝထဲ အတင်းဆွဲသွင်းနေကြတယ်လို့ သူက ဆက်လက်ပြောဆိုပါတယ်။

ရုရှားနိုင်ငံ ဗလက်ဒီဗိုစတော့ခ်မြို့မှာ ကျင်းပနေတဲ့ အရှေ့ဖျားဒေသစီးပွားရေးဖိုရမ် ဖွင့်ပွဲမှာ ပူတင်က ပြောခဲ့တာဖြစ်ပြီး  မော်စကိုက စီးပွားရေးအကူအညီတွေ အလျှံပယ်ပေးခဲ့တဲ့ ဆိုဗီယက်ခေတ်အနေအထားအတိုင်း အာဖရိကနှင့် နီးစပ်တဲ့ဆက်ဆံရေး ပြန်လည်ထူထောင်ဖို့ သိပ်ခက်ခဲမယ်မဟုတ်ဘူးဆိုတာ သူအသေအချာပြောနိုင်တယ်လို့လည်း ဆက်ပြောပါတယ်။

လွတ်လပ်ရေးကြိုးပမ်းစဉ်ကာလမှာ ကိုလိုနီပြုသူလို ဘယ်တော့မှမလုပ်ခဲ့တဲ့ မော်စကိုရဲ့ကူညီမှုတွေကို အာဖရိကနိုင်ငံတွေ သတိရနေမှာ ဖြစ်တယ်လို့လည်းပူတင်ကပြောပါတယ်။ “  ကျွန်တော်တို့ရဲ့ ပူးပေါင်းဆောင်ရွက်မှုဟာ အမြဲတမ်း အပြန်အလှန်ဆောင်ရွက်မှု ဒါမှမဟုတ် ကူညီလိုတဲ့စိတ်ဆန္ဒတွေအပေါ်မှာ အခြေခံခဲ့ကြတယ်” လို့ ပူတင်ကပြောပါတယ်။

ဒါပေမယ့် အဲဒီနိုင်ငံတွေဟာ ဆိုဗီယက်ရဲ့အကူအညီတွေသာမက အနောက်ရဲ့ ရက်စက်ယုတ်မာမှုတွေကိုပါ သတိရနေကြတယ်လို့ ပူတင်က မှတ်သားပြောဆိုပါတယ်။ “ အာဖရိကက ပြည်သူတွေကို လှောင်အိမ်တွေထဲထည့်ခေါ်သွားကြတယ်။ ဒါကို မျက်ရည်မကျဘဲ ကြည့်လို့ကို မရဘူး။ ကလေးငယ်တွေဟာ လှောင်အိမ်တွေထဲ ထိုင်နေကြရပြီး လူတိုင်းမြင်နေအောင် ခင်းကျင်းပြသထားတာခံခဲ့ကြရတယ်။ အာဖရိကနိုင်ငံတွေက ဘယ်သူတစ်ဦးတစ်ယောက်မျှ ဒါကိုမေ့လိမ့်မှာမဟုတ်ဘူး”

အနောက်ဟာ သူတို့ရဲ့ လက်အောက်သွတ်သွင်းမှုတွေကို ဘယ်တော့မှမစွန့်လွှတ်ကြဘူး။ အခုလဲ သူတို့ဟာ အရှင်သခင်ပုံစံဖမ်းနေကြတယ်။ သူတို့ရဲ့ ကိုလိုနီလက်သစ်ဝါဒကို သွတ်သွင်းနေကြတယ်” လို့ ပူတင်က ပြောပါတယ်။ အနောက်နိုင်ငံတွေဟာ အာဖရိကကို ဒေါ်လာထရီလီယံတန်ဖိုးချီတဲ့ ချေးငွေတွေ ထုတ်ပေးနေတယ်လို့ ပူတင်က ရှင်းပြပါတယ်။ ဒါတွေဟာ ချေးငွေတွေဆိုတာထက် လျော်ကြေးငွေလိုမျိုးဖြစ်တယ်လို့လည်းသူကဆိုပါတယ်။

ရုရှားဟာ ပြီးခဲ့တဲ့နွေရာသီတုန်းက စိန့်ပီတာစဘတ်မြို့မှာ ရုရှား-အာဖရိက ဖိုရမ်ကျင်းပခဲ့ပြီး နယ်ပယ်အစုံမှာ သဘောတူစာချုပ်များစွာ ချုပ်ဆိုခဲ့ပါတယ်။  အဆိုပါအစည်းအဝေးကိုမတက်ဖို့ အနောက်က ဖိအားပေးခဲ့သည့်တိုင် အာဖရိက ကိုယ်စားလှယ်အဖွဲ့ ဒါဇင်များစွာ တက်ရောက်ခဲ့ကြတာဖြစ်တယ်လို့ သတင်းများမှာဖော်ပြထားပါတယ်။

-knl/ymg

#World_News
Published 12 September 2023

အမေရိကန် ဂူလေ့လာရေးသမားတစ်ဦးဟာ တူရကီနိုင်ငံတောင်ပိုင်း မြေအောက်မီတာ ၁ ထောင်ကျော်မှာ ပိတ်မိကာ ဖျားနာနေခဲ့ပြီး နိုင်ငံတကာ ကယ်ဆယ်ရေးလုပ်ငန်းများ ရက်အတော်ကြာအောင် ကြိုးပမ်းခဲ့ပြီးနောက် အင်္ဂါနေ့အစောပိုင်းမှာ ကယ်တင်ခဲ့နိုင်ကြောင်း တူရကီ TUMAF ဂူလေ့လာရေးဖက်ဒရေးရှင်းက ပြောကြားလိုက်ပါတယ်။

အသက် ၄၀ အရွယ် မာ့ခ်ဒစ်ကီဟာ မာဆင်ပြည်နယ် တောရပ်စ်တောင်တန်းများရှိ မော်ကာဂူထဲမှာ နိုင်ငံတကာ လေ့လာရေးမစ်ရှင်တစ်ခု ဆောင်ရွက်နေတာဖြစ်ပြီး မြေအောက် ၁,၀၄၀ ပေအရောက်မှာ အစာအိမ်အူလမ်းကြောင်းမှ သွေးယိုစိမ့်မှုခံစားရတယ်လို့ အကြောင်းကြားခဲ့ပါတယ်။

ဒစ်ကီကို ဂူအန္တရာယ်ထဲကနေ ကယ်ဆယ်နိုင်ခဲ့ပြီလို့ TUMAF က X ဆိုရှယ်မီဒီယာမှာ ရေးသားခဲ့ပါတယ်။

ဂူကယ်ဆယ်ရေး လုပ်ငန်းစဥ်ဟာ အောင်မြင်စွာပြီးဆုံးခဲ့ပြီ ဖြစ်ပြီး ပါဝင်ကူညီခဲ့သူအားလုံးကို ဂုဏ်ပြုပါတယ်လို့ ဖော်ပြခဲ့ပါတယ်။

ဒစ်ကီကို ကျန်းမာရေးစစ်ဆေးမှုများ ပြုလုပ်ရန် စခန်းရှိ ဆေးဘက်ဆိုင်ရာဌာနသို့ ခေါ်ဆောင်သွားခဲ့ကြောင်း အီတလီကယ်ဆယ်ရေးများက ဆိုပါတယ်။

တူရကီနိုင်ငံမှ တတိယမြောက် အနက်ရှိုင်းဆုံးဂူထဲကနေ ဒစ်ကီကို ကယ်ဆယ်ရန်အတွက် တူရကီ၊ ခရိုအေးရှား၊ အီတလီနဲ့ အခြားနိုင်ငံများမှ ကယ်ဆယ်ရေးသမား ၁၅၀ ကျော်လောက်ဟာ ၉ ရက်ကြာအောင် ကြိုးစားအားထုတ်ခဲ့ကြပါတယ်။

ကယ်ဆယ်ရေး ဗီဒီယိုရိုက်ကူးချက်တွေထဲမှာ ဒစ်ကီက ဂူထဲမှာ လဲလျောင်းနေကာ ဆေးအဖွဲ့မှ ကုသပေးနေပုံ မြင်တွေ့ခဲ့ရသလို အခြားအဖွဲ့တွေက ဂူတွေထဲသို့ ကျဥ်းမြောင်းတဲ့လမ်းတွေကနေ ကြိုးများဖြင့် ဆင်းသွားကြပုံတွေလည်း မြင်တွေ့ရပါတယ်။

#World_News #တူရကီဂူတွင်းမြေအောက် #အမေရိကန်ဂူလေ့လာရေးသမား #ကယ်ဆယ်နိုင်ခဲ့ #Source: Reuters