Published 21 November 2023

အိုမီဂါ၃ ဖြည့်စွက်ဆေးတွေက သွေးအဆီဓာတ် များတဲ့သူတွေမှာ စည်းချက်မမှန် နှလုံးခုန်မြန်ခြင်းဝေဒနာ ဖြစ်နိုင်ခြေများခြင်းနဲ့ ဆက်စပ်နေတယ်လို့ ဥရောပနှလုံးဗေဒအဖွဲ့အစည်းက လေ့လာသုံးသပ်ထားပါတယ်။

လက်ရှိမှာ သွေးတွင်း ထရိုင်ဂလစ်ဆရိုက် များတဲ့သူတွေ နှလုံးသွေးကြောရောဂါ ဖြစ်နိုင်ခြေလျှော့ချဖို့အတွက် ငါးကြီးဆီဖြည့်စွက်စာတွေကို ညွှန်းထားကြကြောင်း၊ ပမာဏနည်းပါးတဲ့ အိုမီဂါ၃ ဖက်တီးအက်ဆစ်ဆေးတွေကို ဆေးဆိုင်တွေမှာ အလွယ်တကူ ဝယ်ယူနိုင်ကြောင်း ဗာဂျီးနီးယား ကွန်မန်းဝဲ့လ်တက္ကသိုလ်မှ သုတေသနပြုစုသူ ဒေါက်တာ ဆယ်လ်ဗေတိုကာဘိုနေးက ပြောပြသွားပါတယ်။

အချို့သော လက်တွေ့စမ်းသပ်ချက်များအရ နှလုံးခုန်နှုန်း ပုံမှန်မဟုတ်တဲ့ ရောဂါတွေထဲမှာ အဖြစ်အများဆုံးဖြစ်တဲ့ စည်းချက်မမှန် နှလုံးခုန်မြန်ခြင်းဝေဒနာ ဖြစ်နိုင်ခြေများခြင်းနဲ့ ဆက်စပ်နေနိုင်ပြီး ဝေဒနာရှင်တွေဟာ လေဖြတ်ခြင်းအန္တရာယ် ဖြစ်နိုင်ခြေ ငါးဆပိုများနေတယ်လို့ ယူဆထားပါတယ်။

ဒီလိုဖြစ်နိုင်ခြေအကြောင်း သိရှိရန်အတွက် အိုမီဂါ၃ ဖက်တီးအက်ဆစ် ပမာဏအမျိုးမျိုး ပါဝင်တဲ့ စမ်းသပ်ချက်များ ပြုလုပ်ခဲ့ပါတယ်။

စမ်းသပ်ခံသူတွေထဲမှာ ထရိုင်ဂလစ်ဆရိုက် ပမာဏများနေပြီး နှလုံးသွေးကြောရောဂါများ ရှိထားသူတွေနဲ့ ဖြစ်နိုင်ခြေရှိသူတွေ ပါဝင်ကြပါတယ်။

လူနာပေါင်း ငါးသောင်းကျော်ပါဝင်ကာ ငါးကြီးဆီဆေးနဲ့ အာနိသင်မရှိတဲ့ ဆေးတွေကို အသုံးပြုစေပြီး အချိန် ၂ နှစ်မှ ၇ နှစ်ကျော်အထိ စောင့်ကြည့်ခဲ့ကာ ငါးကြီးဆီပမာဏက တစ်နေ့ကို ၀.၈၄ ဂရမ်မှ ၄ ဂရမ်အထိ စမ်းသပ်ခဲ့ပါတယ်။

ထိုအခါမှာ အာနိသင်မရှိတဲ့ဆေး သုံးစွဲသူတွေထက် အိုမီဂါ၃ ဖက်တီးအက်ဆစ်ဖြင့် စမ်းသပ်သူတွေက နှလုံးခုန်မမှန်ခြင်း ဖြစ်နိုင်ခြေ သိသိသာသာ များနေတာကို တွေ့ရှိခဲ့ကြပါတယ်။

ငါးကြီးဆီက နှလုံးသွေးကြောရောဂါအတွက် အထောက်အကူဖြစ်စေတယ်လို့ တွေ့ရှိထားပေမယ့် နှလုံးခုန်မမှန်တဲ့လူတွေမှာ ပိုမိုဆိုးရွားစေနိုင်တာကို သတိပြုသင့်တယ်လို့ ကာဘိုနေးက ဖော်ပြခဲ့ပါတယ်။
Source: DoctorNDTV
#World_Health
#Published_ 21 November 2023
#YMG #Yangon_Times #Yangon_Media_Group #YMG_News

Published 21 November 2023

တူရကီနိုင်ငံမှာ ရှေးဟောင်းရွှံ့စေးကမ္ပည်းတိုင်များ သောင်းနဲ့ချီ တွေ့ရှိခဲ့ပြီး လျှို့ဝှက်စာသားများ ပါဝင်နေပါတယ်။

ထိုကျောက်စာတိုင်များကို ဒုတိယထောင်စုနှစ် BCE ကာလက ဟစ်တိုက်အင်ပါယာ ကြီးစိုးစဥ် ရေးသားခဲ့တာ ဖြစ်ပါတယ်။

စာအရေးအသားတွေကို မသိရှိရသေးပေမယ့် နှစ်ပေါင်း ၃၀၀၀ ကျော် ပျောက်ဆုံးနေခဲ့တဲ့ ဘာသာစကား ဖြစ်နိုင်တယ်လို့ ပညာရှင်များ ယူဆနေကြပါတယ်။

အန်နာတိုလီယန်- အင်ဒို- ဥရောပ ဘာသာစကားတွေနဲ့ ဆင်တူသလိုရှိပေမယ့် အရှေ့အလယ်ပိုင်းမှာ တွေ့ရှိခဲ့တဲ့ အခြားရှေးဟောင်း အရေးအသားများနဲ့ ကွဲပြားနေပါတယ်။

ယခုစာသားရဲ့ နိဒါန်းမှာ ပညာရှင်များ ဘာသာပြန်ဆိုတဲ့ အဓိပ္ပာယ်အရ ‘’ယခုကစပြီး ကာလက််စ်မာ ဘာသာစကားဖြင့် ဖတ်ပါ’’ လို့ သိရှိရပါတယ်။

ဘာသာပြန်ဆိုချက်အရ ကာလက်စ်မာလို့ ဆိုရာမှာ ရှေးဟောင်း အန်နာတိုလီယာ ဟစ်တိုက်အင်ပါယာ အနောက်မြောက်ဘက် ကြေးခေတ်မှ စနစ်ကျတဲ့ လူမျိုးစုကို ဆိုလိုပါတယ်။

ထိုဒေသဟာ ကျောက်စာတွေ့ရှိရာ ဟတ်တူဆာမြို့တော်မှ အနည်းငယ်သာ ကွာဝေးတယ်လို့ ယူဆရပါတယ်။

တူရကီ ဗဟိုမြောက်ပိုင်း ယူနက်စ်ကို သမိုင်းဝင်နေရာ ဘိုဂက်ဇ်ကွိုင် ဟတ်တူရှာမှာ တူးဖော်စဥ် ထိုအရေးအသားများကို တွေ့ရှိခဲ့တာ ဖြစ်တယ်လို့ ဖော်ပြထားပါတယ်။

ကမ္ပည်းတိုင်ကို ပထမဆုံးထိလိုက်တဲ့အချိန်မှာ ဘယ်လောက်အရေးကြီးလဲ ဆိုတာကို ခံစားမိတယ်လို့ ဟက်တူဆာရှေးဟောင်း အပျက်အစီးတူးဖော်ရေး အကြီးအကဲ အန်ဒရီယာရှက်ခ်နာက ပြောပြသွားပါတယ်။

ထိုနေရာမှာပဲ တွေ့ရှိခဲ့တဲ့ အခြားကျောက်စာပေါင်း ၂၅,၀၀၀ နဲ့ယှဥ်ရင် ဒီစာကို ထိန်းသိမ်းစောင့်ရှောက်ထားပုံက အထင်ကြီးစရာကောင်းတယ်လို့ ဆိုပါတယ်။

ထိုစာများကို ၂၀၂၄ ခုနှစ် ဖေဖော်ဝါရီ ၉ ရက်နေ့မှာ ဖော်ပြမယ့် ၇ ကြိမ်မြောက် သတ်ပုံစာရေးနည်း အရေးအသားစာစဥ်မှာ ဖော်ပြသွားမှာဖြစ်ပါတယ်။
Source: WION
#World_Archaeology
#Published_ 21 November 2023
#YMG #Yangon_Times #Yangon_Media_Group #YMG_News

ကမ္ဘောဒီးယား အနောက်မြောက်ပိုင်း ဆိုင်ယမ်ရိပြည်နယ်မှာ တရုတ်ရင်းနှီးမြှုပ်နှံထားတဲ့ ဆိုင်ယမ်ရိ အပြည်ပြည်ဆိုင်ရာလေဆိပ် (SAI)ကို ကြာသပတေးနေ့က တရားဝင်ဖွင့်လှစ်လိုက်ပါတယ်။
ဖွင့်ပွဲအခမ်းအနားသို့ လူပေါင်း ၁ ထောင်ကျော် တက်ရောက်ခဲ့ကြပါတယ်။
နိုဝင်ဘာ ၁၂ ရက်နေ့မှာတော့ တရုတ် ကူမင်းချန်ရွှေ အပြည်ပြည်ဆိုင်ရာလေဆိပ်မှ SAI လေဆိပ်သို့ ပထမဆုံး တိုက်ရိုက်ပျံသန်းမှု စတင်ခဲ့ပါတယ်။
#Asia_Development
#Published_ 20 November 2023
#YMG #Yangon_Times #Yangon_Media_Group #YMG_News

၂၀ နိုဝင်ဘာ ၂၀၂၃

ထိုင်းနိုင်ငံရှိ ဟိုတယ်တစ်လုံးတွင် သေဆုံးလျက်တွေ့ရှိခဲ့ရတဲ့ တိုင်ဝမ်အမျိုးသားရဲ့ မီးခံသေတ္တာတွေထဲမှာ အမေရိကန် ဒေါ်လာ အတုများ၊ မိတ္တူကူးပစ္စည်းများကို သိမ်းဆည်းရမိတယ်လို့ ဘန်နာရဲဌာနက ပြောတဲ့ အကြောင်း ဘန်ကောက်ပို့စ်သတင်းအရသိရပါတယ်။

ရဲတွေဟာ အမေရိကန်ဒေါ်လာငွေစက္ကူအတုတွေ၊ ရောင်စုံစက္ကူတွေနှင့် မိတ္တူကူးပစ္စည်းတွေကို ပြီးခဲ့တဲ့အပတ်က ဘန်နာခရိုင် ဟိုတယ်တစ်ခုမှာ အသတ်ခံရတဲ့ ထိုင်ဝမ်အမျိုးသားတစ်ဦးရဲ့ မီးခံသေတ္တာတွေထဲမှာ တွေ့ရှိခဲ့တာဖြစ်ပါတယ်။

အကြီးတန်းရဲအရာရှိတွေနှင့် မှုခင်းဆေးပညာအရာရှိတွေဟာ တနင်္လာနေ့က ဘန်နာရဲဌာနမှာ မီးခံသေတ္တာနှစ်လုံးကို ဖွင့်ခဲ့တာပါ။ အဲဒီမီးခံသေတ္တာတွေကို သူတို့ဟာ နီရန်ဂရင်းဟိုတယ် ခြောက်ထပ်မှာရှိတဲ့ သေဆုံးသူ အသက် ၄၈နှစ်အရွယ် ချူကျန်းရှန်းရဲ့ အခန်းထဲမှ ယူဆောင်ခဲ့ကြတာဖြစ်ပါတယ်။

အရာရှိတွေဟာ ငွေစက္ကူအတု အရွက်ပေါင်း ၁၃၁၂ရွက်၊ အမည်းရောင်စက္ကူ၁၈၂၁ရွက် အစိမ်းရောင်စက္ကူ ၈၇၉၀ ရွက်တို့ကိုလည်း ရှာဖွေတွေ့ရှိခဲ့ကြပါတယ်။

ရဲတွေက ငွေစက္ကူအတုလုပ်ရာမှာ ပတ်သက်တယ်လို့သံသယရှိထားတဲ့ ထိုင်းနိုင်ငံသားနှင့် နိုင်ငံခြားသားတွေကို ကြိုးစားရှာဖွေနေကြပါတယ်။

ချူကို ပြီးခဲ့တဲ့အပတ်ကြာသပတေးနေ့က သူ့ဟိုတယ်ခန်းထဲ သေဆုံးလျက်တွေ့ရှိခဲ့ကြပါတယ်။ သူ့ခြေလက်တွေကို ကြိုးတုပ်ထားပြီး သူ့မျက်နှာလည်း ပလပ်စတစ်အစနှင့်ပတ်ခံထားရတာတွေ့ရပြီး သူဟာ အသက်ရှုကြပ်ပြီးသေဆုံး ရတာလို့ ရဲက ကောက်ချချထားပါတယ်။

သူဟာ ပြီးခဲ့တဲ့အပတ်အင်္ဂါနေ့က ဟိုတယ်မှာ စတည်းခိုခဲ့တာလို့ မျက်မြင်တွေက ပြောပါတယ်။  လူသတ်မှုဟာ ဗုဒ္ဓဟူးနေ့ ညဉ့်နက်ပိုင်းနှင့် ကြာသပတေးမနက်စောစောအပိုင်းအကြား ဖြစ်ပွားခဲ့တာလို့ ရဲက ယူဆထားပါတယ်။

လူသတ်မှုဖြစ်ပွားပြီးသိပ်မကြာခင်မှာပဲ မြန်မာနှင့် ကင်မရွန်နိုင်ငံသား နှစ်ဦးတို့ကို ရဲကဖမ်းဆီးခဲ့ပါတယ်။ လွတ်မြောက်နေတဲ့ ထိုင်းအမျိုးသမီးတစ်ဦးကို လိုက်ရှာနေပေမယ့် သူမဟာ ထိုင်းကထွက်သွားလောက်ပြီလို့ ရဲက ယူဆထားပါတယ်။

#Daily_News
Published_ 20 November 2023

၁။ ဆောင်းကာလ နေ့ပူ၍ ညချမ်းသည့်ဒေသများတွင် နှာစေး၊ ချောင်းဆိုးနှင့် အပြင်းထန်ဆုံး လေဖြတ်ခြင်းများ မဖြစ်အောင် သတိပြုနေထိုင်ရန်လို

၂။ စားနပ်ရိက္ခာအခက်ခဲမဖြစ်စေရန် အခြေခံစားသောက်ကုန်များ ဈေးလျော့ရောင်းပေးသော်လည်း  ဈေးတင်ပြီး တစ်ဆင့်ပြန်လည် ရောင်းချသူများကြောင့် အခက်တွေ့

၃။ ရွှေဘိုပေါ်ဆန်းဆန်များအား ကုန်အမှတ်တံဆိပ်လိုဂိုများဖြင့် တစ်နိုင်ငံလုံးသို့ ဖြန့်ချီမည်

၄။ ကမ္ဘောဒီးယားတွင်တရုတ်မှ ရင်းနှီးထောက်ပံ့မှုဖြင့် ဆောက်လုပ်သည့် ဆိုင်ယမ်ရိအပြည်ပြည်ဆိုင်ရာလေဆိပ်ကြီး တရားဝင်ဖွင့်ပွဲကျင်းပ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG News

၂၀ နိုဝင်ဘာ ၂၀၂၃

ကေပေါ့တ် BIGBANG အဖွဲ့သားတစ်ဦးဖြစ်တဲ့ ဂျီဒရယ်ဂွန် G-Dragon ရဲ့ ဆံပင်နမူနာကိုယူပြီး မူးယစ်ဆေးဝါး အသေးစိတ်စစ်ဆေးမှုတစ်ခုကို တောင်ကိုရီးယားနိုင်ငံ မှုခင်းဆေးပညာဌာနက စစ်ဆေးခဲ့ရာ နဂ္ဂတစ်အဖြေ ထွက်ရှိတယ်လို့  အရာရှိတွေက နိုဝင်ဘာ ၂၀ ရက် တနင်္လာနေ့ကပြောပါတယ်။

အမျိုးသားမှုခင်းဆေးပညာဌာနက လတ်တလောအဖြေရလာဒ်ကပို အင်ချီယွန်မြို့ပြရဲဌာနကို အကြောင်းကြား ပြီး ဖြစ်ပါတယ်။ ဒါပေမယ့် အဆိုတော်ရဲံလက်သည်း ခြေသည်းတွေကို စစ်ဆေးအဖြေထုတ်ဖို့တော့ လိုပါသေးတယ်။

ဂျီဒရယ်ဂွန်လို့သိကြတဲ့ အမည်ရင်း ကွမ်ဂျီယွန်း Kwon Ji-yong ဟာ အောက်တိုဘာ ၂၅ ရက်နေ့က မူးယစ်ဆေးဝါး တရားမဝင်သုံးစွဲတယ်ဆိုကာ အမှုဖွင့်ခံရပြီးနောက် နိုင်ငံကထွက်မသွားဖို့ တားမြစ်လည်းခံခဲ့ရပါတယ်။

နိုဝင်ဘာ ၆ ရက်က သူ့ကို ပထမဆုံမေးမြန်းမှုတွေပြုလုပ်စဉ်အတွင်း စစ်ဆေးထားတဲ့ အဖြေ ယခုထွက်ရှိလာတာ ဖြစ်ပါတယ်။ အသေးစိတ်ထပ်သိရအောင်လို့ သူတို့က အဆိုတော်ရဲ့ ဆံပင်နှင့် လက်သည်းခြေသည်းတွေကို မှုခင်းဆေးပညာဌာနကိုပေးပို့ထားတာပါ။

မူးယစ်ဆေးဝါးကို မစစ်ဆေးခင် ငါးရက်နှင့် ၁၀ရက်အတွင်းသုံးစွဲခဲ့လျှင် စစ်ဆေးရင် ပေါ့စတစ်အဖြေပေါ်မှာပါ။  ဒါပေမယ့် မူးယစ်ဆေးဝါးကိုအကြာကြီးသုံးစွဲတဲ့ကိစ္စတွေမှာတော့ တိကျမှန်ကန်တဲ့အဖြေရဖို့ ခက်ခဲလှပါတယ်။

ဆံပင်ကိုစစ်ဆေးလို့ရတဲ့အဖြေဟာ အဲဒီပုဂ္ဂိုလ်အနေနှင့် တစ်နှစ်အတွင်းမူးယစ်ဆေးဝါးသုံးမသုံး သိနိုင်မှာဖြစ်ပါတယ်။ ဆံပင်အတိုအရှည်ပေါ်တော့မူတည်ပါတယ်။ လက်သည်းခြေသည်းကိုစစ်ဆေးရင်တော့ လွန်ခဲ့တဲ့ ငါးလ ခြောက်လခန့်က သုံးမသုံးအဖြေထွက်ပါတယ်။

ရဲတွေအနေနှင့် ပိုပြီးသေချာအောင် ကျန်တဲ့ စစ်ဆေးချက်အဖြေတွေမရခင်မှာ သူ့ကို အခြား အထောက်အထားတွေ ဆက်လက်စစ်ဆေးဦးမှာဖြစ်ပါတယ်။

၂၀၁၁ခုနှစ်တုန်းက ဂျီဒရယ်ဂွန်ဟာ ဆေးခြောက်သုံးစွဲခဲ့ပေမယ့် သူက ဘာမှန်းမသိခဲ့လို့ပါလို့ပြောတဲ့အတွက် အမှုစွဲ အရာရှိတွေက အမှုကိုပြန်ရုပ်သိမ်းပေးခဲ့ပါသေးတယ်။

Source Yna