Published 17 November 2023

အဆီကျဆေး Wegovy ဟာ ပြင်းထန်တဲ့ နှလုံးရောဂါပြဿနာများ ဖြစ်နိုင်ချေကို ၂၀ ရာခိုင်နှုန်းလျှော့ချပေးနိုင်ကာ ကိုယ်အလေးချိန်ချဖို့အပြင် အခြားနေရာတွေမှာလည်း အသုံးပြုနိုင်မယ့်လမ်းစ ထွက်ပေါ်လာပြီလို့ လေ့လာတွေ့ရှိခဲ့ပါတယ်။

ကိုယ်အလေးချိန်ချတဲ့ ကုထုံးကနေ နှလုံးသွေးကြော ပြဿနာများ ဖြစ်နိုင်ခြေ လျှော့ချပေးနိုင်တဲ့ ကုထုံးဖြစ်လာနိုင်တယ်လို့ ကလိဗ်လန်းဆေးရုံမှ လေ့လာမှုဦးဆောင်သူ ဒေါက်တာ မိုက်ကယ်လင်ကော့ဖ်က ပြောပြခဲ့ပါတယ်။

Wegovy နဲ့ Ozempic ထုတ်လုပ်သူ Novo Nordisk တို့မှ သုတေသနပြုလုပ်ရာမှာ နိုင်ငံပေါင်း ၄၁ နိုင်ငံမှ လူပေါင်း ၁၇,၆၀၀ ပါဝင်စမ်းသပ်ခံခဲ့ပါတယ်။

စမ်းသပ်ခံတွေက အသက် ၄၅ နှစ်နဲ့အထက်ဖြစ်ပြီး နှလုံးသွေးကြောရောဂါ အခံရှိကြကာ BMI ၂၇ နဲ့အထက်၊ ဆီးချိုမရှိဖူးသူများ ဖြစ်ပါတယ်။

လူနာတဝက်ကို Wegovy ထိုးဆေးပေးပြီး ကျန်တဝက်ကို အာနိသင်မရှိတဲ့ဆေး ထိုးပေးကာ အချိန်ကာလ ၃ နှစ်ကျော် စောင့်ကြည့်ခဲ့ပါတယ်။

Wegovy ဆေးထိုးတဲ့လူတွေထဲက ၆.၅ ရာခိုင်နှုန်းဟာ နှလုံးနဲ့ပတ်သက်တဲ့ အခြေအနေ တစ်မျိုးမျိုးကြောင့် သေဆုံးသွားခဲ့ပြီး အာနိသင်မရှိတဲ့ဆေး ထိုးတဲ့သူတွေထဲမှာတော့ ၈ ရာခိုင်နှုန်း သေဆုံးခဲ့ပါတယ်။

Wegovy ထိုးတဲ့သူတွေဟာ ကိုယ်အလေးချိန် ပျမ်းမျှအားဖြင့် ၁၀ ရာခိုင်နှုန်း ကျဆင်းခဲ့ပြီး စမ်းသပ်ကာလတလျှောက် ထိန်းထားနိုင်ခဲ့ပါတယ်။

ဒါ့အပြင် ရောင်ရမ်းခြင်း၊ ကိုလက်စ်ထရောလ်၊ သွေးတွင်းသကြားဓာတ်၊ သွေးပေါင်ချိန်တို့မှာလည်း တိုးတက်လာတာကို မြင်တွေ့ခဲ့ရကြောင်း လော့စ်အိန်ဂျလိစ်မှ နှလုံးအထူးကု ဒေါက်တာမာသာဂူလာတီက မှတ်ချက်ပြုလိုက်ပါတယ်။

ဒီရလဒ်တွေဟာ ကိုယ်အလေးချိန် ကျခြင်းကြောင့် ဖြစ်တာလား ဒါမှမဟုတ် ဆေးရဲ့အာနိသင်ကြောင့် ဖြစ်တာလားဆိုတာ သေချာမသိကြသေးပါဘူး။

Wegovy ဆေးရဲ့အညွှန်းမှာ နှလုံးအတွက် အကျိုးပြုစေတယ်ဆိုတာကို ထည့်သွင်းခွင့်ရဖို့ Novo Nordisk က အစားအစာနှင့်ဆေးဝါး ကွပ်ကဲရေးထံ တောင်းဆိုထားပါတယ်။

ဒါပေမဲ့ ဒီဆေးတွေကြောင့် ဘေးထွက်ဆိုးကျိုးများ ခံစားရတယ်လို့ ဖော်ပြလာကြပါတယ်။

မူးဝေခြင်း၊ အော့အန်ခြင်း၊ ဝမ်းလျှောခြင်းစတဲ့ ဘေးထွက်ဆိုးကျိုးများကြောင့် စမ်းသပ်ခံသူ ၁၇ ရာခိုင်နှုန်းက Wegovy ကို ဆက်လက်အသုံးမပြုတော့ပါဘူး။
Source: New York Post.
#World_Health
#YMG #Yangon_Times #Yangon_Media_Group

#Daily_News
Published_ 16 November 2023

၁။ ဖားအောက်ဆရာတော်ကြီး စင်ကာပူဆေးရုံ၌ နှလုံးအထူးကုသမှုအောင်မြင်ခဲ့ ၊ရန်ကုန်သို့ပြန်လည်ရောက်ရှိ သီတင်းသုံးနေ

၂။ ကျွှဲကောစိုက်ဧကနှင့် သက်တမ်းတိုးရန် စစ်တမ်းများ လိုက်လံကောက်ယူနေ

၃။ ရှမ်းပြည်မြောက်ပိုင်းရှိ ပြောင်းစိုက်တောင်သူများ ဝယ်ယူသူမရှိသဖြင့် ဆုံးရှုံးမှုများ ဖြစ်ပေါ်နေဟုဆို

၄။ ခေတ်မီဆန်းပြား နည်းပညာများကြောင့် ကန္တာရကို ဟင်းသီးဟင်းရွက်စိုက်ခင်းများအဖြစ် ပြောင်းလဲနိုင်ခဲ့ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG

ဖုန်တွေသဲတွေ ပြည့်နေပြီး ရေရှားပါးတဲ့ ဂိုဘီကန္တာရ အနောက်မြောက်ပိုင်းမှာ နေထိုင်တဲ့ လူငယ်စုံတွဲဟာ ခေတ်မီရေသွင်းစနစ်ကို အသုံးပြုပြီး အသီးအနှံတွေ စိုက်ပျိုးကာ စီးပွားဖြစ်နေပုံကို ဖော်ပြသွားပါတယ်။
#Asia_Development
#Published_ 16 November 2023
#YMG #Yangon_Times #Yangon_Media_Group

၁၆ နိုဝင်ဘာ ၂၀၂၃

အမေရိကန်သမ္မတ ဂျိုးဘိုင်ဒင်နှင့် တရုတ်သမ္မတ ရှီကျင့်ဖျင်တို့ဟာ ကာလီဖိုနီးယားက ဖီလိုလီခြံဝင်းမှာတွေ့ဆုံကြပြီးနောက် ဆန်ဖရန်စစ္စကိုက ကျေးလက်အိမ် ဥယျဉ်ထဲ အတူတကွလမ်းလျှောက်ခဲ့ကြပါတယ်။ အဲဒီနောက် ဘိုင်ဒင်က ရှီကို ကားစီလိုက်ပို့ပေးရင်း စကားစမြည်ပြောကြပါတယ်။

Source CCTV+

Published 16 November 2023

အမေရိကန်သမ္မတ ဂျိုးဘိုင်ဒင်နဲ့ တရုတ်သမ္မတ ရှီကျင့်ဖင်တို့ဟာ နှစ်နိုင်ငံစစ်ရေး ဆက်ဆံမှု ပြန်လည်ဆောင်ရွက်ရန်၊ ဖန်တနိုင်းထုတ်လုပ်မှု လျှော့ချကန့်သတ်ရန် ကိစ္စများအကြောင်း ဗုဒ္ဓဟူးနေ့က သဘောတူညီခဲ့ကြကာ ယင်းတို့နှစ်ယောက် တစ်နှစ်အတွင်း ပထမဆုံးအကြိမ် လူချင်းတွေ့ဆုံမှုကနေ အဓိကအကျိုးရလဒ်ကြီး ၂ ခု ရရှိခဲ့ပါတယ်။

ဘိုင်ဒင်နဲ့ ရှီတို့ဟာ ဆန်ဖရန်ဆစ္စကို မြို့အစွန်ဘက်မှာ ၄ နာရီကြာ တွေ့ဆုံဆွေးနွေးခဲ့ပြီး အမေရိကန်နဲ့ တရုတ်ဆက်ဆံရေးကို တင်းမာစေတဲ့ ကိစ္စရပ်များအကြောင်း ပြောကြားခဲ့ကြကာ ပိုမိုရင်းနှီးစွာ ဆက်ဆံနေထိုင်ရန် သဘောတူညီခဲ့ကြပါတယ်။

၂၀၂၂ ဩဂုတ်လက အမေရိကန် အောက်လွှတ်တော် ဥက္ကဌဟောင်း နန်စီပယ်လိုစီ ထိုင်ဝမ်သို့ သွားရောက်ခဲ့စဥ် တရုတ်အမျက်ထွက်စရာ ဖြစ်ခဲ့သဖြင့် စစ်ရေးပတ်သက်မှု ပြန်လည်ဆောင်ရွက်ရန်လည်း သဘောတူညီခဲ့ကြပါတယ်။

ပွင့်လင်းမြင်သာတဲ့ တိုက်ရိုက်ဆက်ဆံရေးကို ပြန်လည်ဖော်ဆောင်ခဲ့ကြတယ်လို့ ဘိုင်ဒင်က ဆိုပါတယ်။

အမေရိကန်နဲ့ တရုတ်စစ်တပ်တို့ဟာ ယမန်နှစ်အတွင်း မကျေနပ်မှုများ အပြန်အလှန် ထုတ်ဖော်ခဲ့ကြပါတယ်။

အမေရိကန်မှာ ဆေးအလွန်အကျွံ စွဲလမ်းမှုဖြစ်ရတဲ့ အဓိကအကြောင်းအရင်းတစ်ခုဖြစ်တဲ့ ဖန်တနိုင်း ထုတ်လုပ်တင်ပို့မှုကို တရုတ်အနေနဲ့ ရပ်တန့်ပေးဖို့ ဘိုင်ဒင်နဲ့ရှီတို့ သဘောတူခဲ့ကြပါတယ်။

အဆိုပါ သဘောတူညီချက်အရ တရုတ်ဟာ ဖန်တနိုင်းထုတ်လုပ်နေတဲ့ ဓာတုကုမ္ပဏီများထံ တိုက်ရိုက်သွားရောက်မှာ ဖြစ်ပါတယ်။

ဒါ့အပြင် ပညာရှင်တွေစုစည်းပြီး လူလုပ်အသိဉာဏ်စနစ်(AI)ရဲ့ ဖြစ်လာနိုင်တဲ့ ဘေးအန္တရာယ်တွေအကြောင်း ဆွေးနွေးရန်လည်း သဘောတူညီခဲ့ကြပါတယ်။

ယခုတွေ့ဆုံမှုဟာ ပွင့်ပွင့်လင်းလင်းနဲ့ တိုက်ရိုက်ပြောဆိုတာ ဖြစ်သဖြင့် နားလည်မှုလွဲခြင်းမျိုး မရှိဘဲ အောင်မြင်မှုရှိခဲ့တယ်လို့ ဘိုင်ဒင်က သတ်မှတ်လိုက်ပါတယ်။

ဒီမိုကရက်တစ်နည်းလမ်းအရ သွားနေတဲ့ ထိုင်ဝမ်ကျွန်းကို တရုတ်က ယင်းအပိုင်နယ်မြေအဖြစ် သတ်မှတ်ချင်တဲ့ ကိစ္စကိုလည်း တစ်ဖက်နဲ့တစ်ဖက် ဆွေးနွေးသွားပါတယ်။

တရုတ်က ထိုင်ဝမ်နဲ့ ငြိမ်းချမ်းစွာ ပေါင်းစည်းချင်တယ်လို့ ရှီကဆိုပေမယ့် အင်အားသုံးသိမ်းပိုက်မယ့် အရိပ်အယောင်လည်း မြင်နေရတယ်လို့ အမေရိကန်အရာရှိတစ်ဦးက ဆိုပါတယ်။

အမေရိကန်အနေနဲ့ ထိုင်ဝမ်ကို လက်နက်ထောက်ပံ့တာတွေ မပြုလုပ်ဘဲ ငြိမ်းချမ်းစွာ ပေါင်းစည်းရေးကို ထောက်ခံအားပေးသင့်ကြောင်း ရှီက တိုက်တွန်းလိုက်ပါတယ်။

ဂါဇာမှာ အစ္စရေးလ်နဲ့ ဟားမတ်စ်တို့ ပဋိပက္ခဖြစ်နေစဥ် အရှေ့အလယ်ပိုင်းရှိ အမေရိကန်တွေကို အီရန်တွေ မတိုက်ခိုက်ခိုင်းဖို့ ဘိုင်ဒင်က တရုတ်ကို ဩဇာသုံးစေချင်နေပါတယ်။

ဆန်ဖရန်ဆစ္စကို တောင်ပိုင်း မိုင် ၃၀ အကွာရှိ ကျေးလက်ခြံအိမ်ကြီးမှာ ဘိုင်ဒင်က ရှီကျင့်ဖင်ကို ကြိုဆိုခဲ့ပြီး အာရှ-ပစိဖိတ် စီးပွားရေးကော်ပိုရေးရှင်း (APEC)ဖိုရမ်ကို ပြုလုပ်သွားမှာ ဖြစ်ပါတယ်။

ယခုကဲ့သို့ တွေ့ဆုံရန် အချိန်အတော်ကြာ မျှော်လင့်နေခဲ့တဲ့ ဘိုင်ဒင်က တလေးတစားဖြင့် ကြိုဆိုခဲ့ပြီး ကမ္ဘာ့အင်အားကြီးနိုင်ငံတွေထဲမှာ အဓိကပုဂ္ဂိုလ်အနေဖြင့် ဆက်ဆံခဲ့ပါတယ်။

ခေါင်းဆောင် ၂ ဦးက နှစ်နိုင်ငံရေးရာနဲ့ ကမ္ဘာ့ရေးရာ ကိစ္စတွေမှာ အပြုသဘောဆောင်စွာဖြင့် ဆွေးနွေးခဲ့ကြပြီး သဘောထားကွဲလွဲမှုများကို ဖလှယ်ခဲ့ကြတယ်လို့ အိမ်ဖြူတော်က ဆိုပါတယ်။

အမေရိကန်နဲ့ တရုတ်ဆက်ဆံရေးက ကမ္ဘာပေါ်မှာ အရေးအကြီးဆုံး နှစ်နိုင်ငံဆက်ဆံရေးဖြစ်ကြောင်း၊ အင်အားကြီး ၂ နိုင်ငံဖြစ်သည့်အလျောက် တစ်ယောက်နဲ့ တစ်ယောက် ဒုက္ခပေးတာမျိုး မပြုလုပ်သင့်ကြောင်း ရှီကျင့်ဖင်က ဘိုင်ဒင်ကို ပြောပြခဲ့ပါတယ်။

၂၁ နိုင်ငံပါဝင်တဲ့ APEC အဖွဲ့မှ ခေါင်းဆောင်များနဲ့ စီအီးအိုရာဂဏန်းခန့်ဟာ ဆန်ဖရန်ဆစ္စကိုမှာ တွေ့ဆုံဆွေးနွေးသွားမှာ ဖြစ်ပါတယ်။
Source: Reuters
#World_Politics
#အမေရိကန်သမ္မတဂျိုးဘိုင်ဒင် #တရုတ်သမ္မတရှီကျင့်ဖင် #ပထမဆုံးအကြိမ်လူချင်းတွေ့ဆုံမှု
#YMG #Yangon_Times #Yangon_Media_Group

Published 16 November 2023

DNA ၂ စုံပါဝင်တဲ့ ကိုင်မီးရားမျောက် မွေးဖွားနိုင်ခဲ့ကြောင်း သိပ္ပံပညာရှင်များ ကြေညာလိုက်ပါတယ်။

ထင်သာတဲ့ ပုံစံတွေကတော့ အစိမ်းရောင်တောက်တောက် မျက်လုံးတွေနဲ့ အဝါရောင်တောက်တောက် လက်ချောင်းထိပ်တွေ ဖြစ်ပါတယ်။

တရုတ်မှ သိပ္ပံပညာရှင်များ ဖန်တီးလိုက်တာ ဖြစ်ပြီး ယင်းတို့ရဲ့ မျိုးရိုးဗီဇတွေနဲ့ အရေပြားအောက်က အရာတွေက ပိုပြီးစိတ်ဝင်စားစရာ ကောင်းနေပါတယ်။

သုတေသနရဲ့ ရည်ရွယ်ချက်က အာရုံကြောချို့ယွင်းရောဂါများ ကုသမှုကို ပိုမိုလေ့လာနိုင်ရန် မျောက်များမှာ စမ်းသပ်တာဖြစ်ပါတယ်။

ထိုမျောက်ကို ဓာတ်ခွဲခန်းမှာ ဖန်တီးခဲ့တာဖြစ်ပြီး ၁၀ ရက်တာ အသက်ရှင်နိုင်ခဲ့ကာ တဖြည်းဖြည်းနဲ့ ညင်သာစွာ သေဆုံးစေခဲ့ပါတယ်။

မျောက်မျိုးစိတ်တစ်ခုမှ ပင်မစတမ်းဆဲလ်နဲ့ ထိုမျိုးစိတ်မှပဲ မျိုးဗီဇအရ ကွဲပြားတဲ့ သန္ဓေသားတို့ကို ပေါင်းစပ်ပြုလုပ်ခဲ့တာ ဖြစ်ပါတယ်။

အသက်ရှင်လျက် မွေးခဲ့တဲ့ ကိုင်မီးရားမျောက်က ဦးနှောက်မှာ များစွာသက်ရောက်နေပြီး အာရုံကြောချို့ယွင်းရောဂါများ လေ့လာရန်အတွက် နည်းလမ်းဖြစ်နိုင်တယ်လို့ ကွမ်ကျိုးဇီဝဆေးပညာနဲ့ ကျန်းမာရေးအဖွဲ့အစည်းမှ လေ့လာချက်ပြုစုသူ မီဂွယ်အက်စ်တယ်ဘန်က ဆိုလိုက်ပါတယ်။

ဒါ့အပြင် ကိုင်မီးရားမျောက်ဟာ မျိုးသုဥ်းလုနီးပါးဖြစ်နေတဲ့ မျောက်မျိုးစိတ်တွေကို ထိန်းသိမ်းရာမှာလည်း အရေးပါနေနိုင်ပါတယ်။

မျိုးဥအမျိုးမျိုးကနေ ပေါင်းစပ်ပြီး မျောက်ကိုဖန်တီးတာဟာ ပထမဆုံးမဟုတ်ပေမယ့် စိတ်ကူးယဥ်အဆန်ဆုံး ပေါင်းစပ်မှုဖြစ်နေပါတယ်။

ကိုင်မီးရားဆိုတဲ့ သတ္တဝါဟာ ဂရိပုံပြင်များအရ မီးမှုတ်နိုင်တဲ့ ပေါင်းစပ်သတ္တဝါဆိုး ဖြစ်ပါတယ်။

တိရိစ္ဆာန် အမျိုးမျိုးရဲ့ ခန္ဓာကိုယ်အစိတ်အပိုင်းတွေနဲ့ ဖွဲ့စည်းထားပြီး သိပ္ပံနည်းပညာအရ နှစ်ကောင်ထက်ပိုတဲ့ တိရိစ္ဆာန်မိဘတွေဆီက ဆဲလ်တွေနဲ့ ဖွဲ့စည်းထားတာ ဖြစ်ပါတယ်။
Source: WION
#World_Health
#Published_ 16 November 2023
#YMG #Yangon_Times #Yangon_Media_Group