Published 26 October 2022

တရုတ်နိုင်ငံဟာ ဟိုက်ဒရိုဂျင်စွမ်းအင်ဖြင့်မောင်းနှင်နိုင်တဲ့ မျှဝေသုံး စက်ဘီးတွေကို  တောင်ပိုင်း ကွမ်တုံပြည်နယ် မြို့ တစ်မြို့မှာ စတင်အသုံးပြုနေပါတယ်။

ကမ္ဘာပေါ်မှာ အကြီးဆုံး ဟိုက်ဒရိုဂျင်ထုတ်လုပ်တဲ့ တရုတ်နိုင်ငံမှာ ဒေသအစိုးရတွေနှင့် ကုမ္ပဏီတွေက နိုင်ငံရဲ့ အစိမ်းရောင်စီးပွားရေးပြောင်းလဲဖို့ လုပ်ပိုင်ခွင့်ပေးနေတဲ့ ထွန်းသစ်စအခွင့်အလမ်းတွေကို ရယူပြီး ဖွံ့ဖြိုးစ ဟိုက်ဒရိုဂျင်စွမ်းအင်စက်မှုလုပ်ငန်းကို တိုးတက်အောင်‌ ဆောင်ရွက်နေကြတာကို တွေ့မြင်ကြရပါတယ်။

အဲဒီအထဲမှာ ကွမ်တုံပြည်နယ်ရဲ့ တောင်ပိုင်း ဖိုရှန်မြို့ကလေးဟာ အဲဒီစက်မှုလုပ်ငန်းမှာ ထိပ်ဆုံးကပြေးနေတဲ့နေရာတွေထဲက တစ်ခုဖြစ်ပါတယ်။

ဖိုရှန်ရဲ့ တန်ဇောင်းမြို့ကလေးမှာ ဟိုက်ဒရိုစက်ဘီးတွေဟာ မျှဝေသုံးစက်ဘီးတွေအဖြစ် လမ်းတွေပေါ်မှာ ဓာတ်ငွေ့ထုတ်လုပ်မှုနှင့် လေထုတ်ညစ်ညမ်းမှုကို လျှော့ချပေးနိုင်တဲ့ ယာဉ်အဖြစ် စီးနင်းနေကြပါတယ်။

“ ဒီအတွင်းထဲမှာ ဟိုက်ဒရိုဂျင်ဗူးကလေးရှိတယ်။ အဲဒီကနေ ဟိုက်ဒရိုဂျင်တွေထုတ်ပေးပြီး ပါဝါဘောက်စ်ထဲ ရောက်သွားတယ်။ ပါဝါဘောက်စ်ကနေ  လျှပ်စစ်ဓာတ်ထုတ်လုပ်ပေးပြီး မော်တာကိုမောင်းနှင်ပေးတယ်။ လုပ်ငန်းစဉ်တစ်ခုလုံးဟာ ဓာတ်ငွေ့ထုတ်လုပ်မှုနှင့် လေထုညစ်ညမ်းမှု သုညပါ” လို့ ဟိုက်ဒရိုဂျင်စက်ဘီးတွေ ထုတ်လုပ်တဲ့ ပုလဲ ဟိုက်ဒရိုဂျင်နည်းပညာကုမ္ပဏီရဲ့ အထွေထွေမန်နေဂျာ ရှီးထောင်က ပြောပါတယ်။

မျှဝေသုံး ဟိုက်ဒရိုဂျင်စက်ဘီးတွေတည်ဆောက်ဖို့ လိုအပ်တဲ့ နည်းပညာက ပင်မအခက်အခဲကြီးမဟုတ်ပါဘူး။ ရှီရဲ့ရည်မှန်းချက်က ပတ်ဝန်းကျင်ထိခိုက်နစ်နာမှုကို အပေးအယူလုပ်စရာမလိုတဲ့ ဈေးနှုန်းသက်သာတဲ့ စက်ဘီးတွေ ထုတ်လုပ်ဖို့ပဲဖြစ်ပါတယ်။

“ ဒီလိုစက်ဘီးမျိုးလုပ်ရတာ ကျွန်တော်တို့အတွက် အခက်အခဲမရှိပါဘူး။ ဒါပေမယ့် ဒါပေမယ့် ဈေးကွက်ကလက်ခံတဲ့ စက်ဘီးတွေကို ကျွန်တော်တို့ထုတ်လုပ်လိုပါတယ်။ဆိုလိုတာက ပတ်ဝန်းကျင်ထိန်းသိမ်းရေးကို ဖြစ်စေပြီး ဈေးနှုန်း သက်သာတဲ့ စက်ဘီးမျိုးဖြစ်ပါတယ်” လို့ သူကပြောပါတယ်။

တန်ဇောင်းမြို့ကလေးမှာ ဟိုက်ဒရိုဂျင် စွမ်းအင်စက်မှုလုပ်ငန်းတွေ သီးသန့်ဆောင်ရွက်ဖို့အတွက် ၄၈ စတုရန်းကီလိုမီတာ ဧရိယာတစ်ခုသတ်မှတ်ပေးထားပါတယ်။

အဲဒီနေရာကို ရှန်ဟူး ဟိုက်ဒရိုဂျင်တောင်ကြားလို့ အမည်ပေးထားပြီး အဲဒီနေရာဟာ စက်ဘီး နှင့်ရင်းနှီးကျွမ်းဝင်တဲ့ ဇုန် ဖြစ်ပါတယ်။ ဟိုက်ဒရိုဂျင်စွမ်းအင် ဖွံ့ဖြိုးတိုးတက်ရေးအတွက် ဆီလီကွန်တောင်ကြားတစ်ခု ဖြစ်လာစေဖို့ မျှော်မှန်း ထားပါတယ်။ အဲဒီနေရာမှာ ဟိုက်ဒရိုဂျင်စွမ်းအင်သုံး လမ်းတံမြက်လှည်းကား၊ ဟိုက်ဒရိုဂျင်ငွေ့ရည်ဖြည့် စတေရှင်တွေနှင့် မျှဝေသုံးစက်ဘီးတွေကို နေရာအနှံ့တွေ့ကြရပါတယ်။

ယခုထက်ထိ ရှန်ဟူး ဟိုက်ဒရိုဂျင်တောင်ကြားမှာ ဟိုက်ဒရိုဂျင်နှင့်ဆက်စပ်တဲ့ အဖွဲ့အစည်းပေါင်း ၄၀ကျော်က ဟိုက်ဒရိုဂျင်ဆက်စပ် ပစ္စည်းတွေထုတ်လုပ်နေကြပြီး အဲဒီနယ်ပယ်ကို သိပ္ပံသုတေသနလုပ်ငန်းတွေလည်း လုပ်ဆောင်နေကြပါတယ်။

“ လက်ရှိမှာ ရှန်ဟူး ဟိုက်ဒရိုဂျင်တောင်ကြားဟာ ဟိုက်ဒရိုဂျင်စွမ်းအင် စက်မှုလုပ်ငန်းကွင်းစက်ကြီးတစ်ခုလုံး ဖွံ့ဖြိုးတိုးတက်ရေးစုစည်းထားတာပါ။ ကျွန်တော်တို့ရဲ့ ရည်မှန်းချက်က ဒီနေရာကို ဟိုက်ဒရိုဂျင်စွမ်းအင်အတွက် သရုပ်ပြဇုန်တစ်ခုအဖြစ်နှင့်ရော၊  အဆင့်မြင့် စက်မှုလုပ်ငန်းပေါင်းစုအခြေစိုက်နေရာတစ်ခုအဖြစ်နှင့်ပါ တည်ဆောက်ဖို့ဖြစ်ပါတယ်” လို့ တန်ဇောင်းမြို့ရဲ့ ဒုတိယမြို့တော်ဝန် လီကျုန်းရှန်းက ပြောပါတယ်။

Source: CCTV+

 

#Hydrogen_Bike

#China_ Guangdong

#Xianhu_Hydrogen_Valley

Published 19 Oct 2022

သဘာဝဓာတ်ငွေ့ကြွယ်ဝတဲ့ ကာတာနိုင်ငံက နိုင်ငံရဲ့ ပထမဆုံးနေရောင်ခြည်စွမ်းအင်သုံးလျှပ်စစ်ဓာတ်အားပေးစက်ရုံကို အင်္ဂါနေ့မှာ ဖွင့်လှစ်လိုက်ပါတယ်။အဲဒီဆိုလာပြားတွေဟာ သဲကန္တာရ တစ်လျောက်ဖြန့်ကျက်တည်ဆောက်ပေးထားတာ ဖြစ်ပြီး သေးငယ်တဲ့ ပင်လယ်ကွေ့နိုင်ငံကလေးရဲ့ စွမ်းအင်ထုတ်လုပ်မှုရဲ့ ၁၀ရာခိုင်နှုန်းအထိ ထုတ်လုပ်ပေးနိုင်ပါလိမ့်မယ်။

မြို့တော်ဒိုဟာရဲ့ အနောက်ဖက် အယ်လ်ခါရှားမှာရှိတဲ့ အဆိုပါ နေရောင်ခြည်စွမ်းအင်ကွင်းကြီးဟာ  အရှေ့အလယ်ပိုင်းမှာ အကြီးမားဆုံးတွေထဲက တစ်ခုဖြစ်ပါတယ်လို့ ကာတာနိုင်ငံရဲ့စွမ်းအင်ဝန်ကြီး နှင့် ကာတာစွမ်းအင် ကုမ္ပဏီရဲ့ ဥက္ကဋ္ဌ ဆာအတ်ရှာရီဒါ အယ်လ်ကာဘီကပြောပါတယ်။

ကမ္ဘာပေါ်မှာ အကြီးမားဆုံး သဘာဝဓာတ်ငွေ့ရည် ထုတ်လုပ်တဲ့ နိုင်ငံတွေထဲက တစ်နိုင်ငံဖြစ်တဲ့ကာတာဟာ ဆိုလာ စွမ်းအင်အပေါ်မှာ ရင်းနှီးမြှပ်နှံမှုတွေကို ပြုလုပ်ဖို့ ကျယ်ပြန့်စွာ တွန်းအားပေးဆောင်ရွက်တဲ့အစိတ်အပိုင်းတစ်ခုအဖြစ် ယခုဆိုလာစွမ်းအင်စီမံကိန်းကို ၂၀၁၆ခုနှစ်မှာ စတင်ခဲ့ပါတယ်။ ပြင်သစ်နိုင်ငံက တိုတယ်စွမ်းအင်ကုမ္ပဏီနှင့် ဂျပန်နိုင်ငံက မာရူဘီနီကုမ္ပဏီတို့နှင့် ပူးပေါင်းအကောင်အထည်ဖော်ခဲ့တာလည်းဖြစ်ပါတယ်။

စီမံကိန်းရဲ့ စုစုပေါင်းကုန်ကျစရိတ်ဟာ အမေရိကန်ဒေါ်လာ ၄၆၇သန်းနှင့်ညီမျှတဲ့ ကာတာရီယယ််ငွေ ၁,၇ ဘီလျံ ရှိခဲ့ပါတယ်။ စီမံကိန်းမှာ ဆိုလာပြားပေါင်း ၁.၈သန်းကို ၃.၉ စတုရန်းမိုင်မှာ တပ်ဆင်ထားတာလည်းဖြစ်ပါတယ်။

ဇွန်လကစပြီး စတင်လည်ပတ်နိုင်တဲ့ အဆိုပါစက်ရုံဟာ လျှပ်စစ်ဓာတ်အား ၈၀၀ မဂ္ဂါဝပ်ကို ထုတ်လုပ်ပေးနိုင်ပြီး  လာမယ့်နှစ်တွေမှာ ထပ်မံတိုးချဲ့ဦးမယ်လို့ ကာဘီက သတင်းစာရှင်းလင်းပွဲမှာပြောပါတယ်။

ဒီစီမံကိန်းဟာ ဓာတ်ငွေနှင့် အပူငွေ့ထုတ်လုပ်မှုတွေ လျော့ချရေးကို ကူညီနိုင်တဲ့ စီမံကိန်းတွေကို တည်ဆောက်ဖို့ မဟာဗျူဟာမြောက် ဦးစီးဦးရွက်မှုတွေဖြစ်တယ်လို့လည်း သူကပြောပါတယ်။

နေ့ခင်းဘက်မှာ နေရောင်သွားရာလိုက်တဲ့ နည်းပညာတွေက ဆိုလာပြားတွေကို ရွှေ့ပေးပြီး အမြင့်မားဆုံး နေရောင်ခြည် ရရှိအောင်ဆောင်ရွက်ပေးပြီး ညဘက်မှာတော့ စက်ရုပ်လက်ကြီးတွေက ဖုန်တွေကို ဖယ်ရှားပေးပါတယ်။

ကမ္ဘာ့ဖလားပြိုင်ပွဲမှာ ဒီဆိုလာစက်ရုံကထုတ်တဲ့ လျှပ်စစ်ဓာတ်အားတွေကို အသုံးပြုပြီး ကာတာက “ ပထမဆုံး "net zero" ကမ္ဘာ့ဖလား” အဖြစ် ဆင်နွှဲမှာဖြစ်ပါတယ်။

ဒါပေမယ့် ဒီစက်ရုံက နိုဝင်ဘာနှင့် ဒီဇင်ဘာ မှာ ဘောလုံးပွဲတွေကစားကြမယ့် အားကစားရုံတွေအတွက် လျှပ်စစ်ဓာတ်အားပေးမပေးတော့ အတည်မပြုသေးပါဘူး။

၂၀၃၅ခုနှစ်မှာ ဆိုလာကနေ လျှပ်စစ်ဓာတ်အးကို ၅ ဂစ်ဂါဝပ်အထိထုတ်လုပ်နိုင်ဖို့ ကာတာက ရည်မှန်းဆောင်ရွက်နေပါတယ်။

ကာတာစော်ဘွား ရှိတမင်ဘင် ဟာမက်အယ်သာနီဟာ ဒီဆိုလာစက်ရုံဖွင့်ပွဲကို တက်ရောက်အားပေးခဲ့ပါတယ်။

Source AFP

 

#Qatar_opens_solar_power_plant

#Solar_Power_Plant_ al-Kharsaah

#Sheikh_Tamim_bin_Hamad_al-Thani

Published 16 Oct 2022

တရုတ်နိုင်ငံရဲ့ ကိုယ်တိုင်တည်ဆောက်တဲ့ ၁၃.၆ မဂ္ဂါဝပ် ကမ်းလွန်သုံးလေစွမ်းအင်တာဘိုင်စက်တွေ တရုတ်အရှေ့ပိုင်း ဖူကျန့် ပြည်နယ်က စက်မှုဇုန်တစ်ခုမှာ စတင်ထုတ်လုပ်နေပါတယ်။ဒီလိုထုတ်လုပ်နိုင်တာဟာ နိုင်ငံရဲ့ အဆင့်မြင့် ကိရိယာသုတေသနနှင့် ထုတ်လုပ်မှုစွမ်းရည်မှာ အထင်ကရမှတ်တိုင်တစ်ခုလည်းဖြစ်ပါတယ်။

ဖူကျန့်သရီးဂျော့ကမ်းလွန်လေစွမ်းအင်နိုင်ငံတကာစက်မှုဥယျဉ်မှာ ၁၃.၆ မဂ္ဂါဝပ် မိုဒဲလ် ဟာ  အချင်း ၂၅၂ မီတာရှိတဲ့ ဒလက်ကြီးတွေ တပ်ဆင်ပေးထားပါတယ်။ အဲဒီဒလက်ကြီးဟာ ဧရိယာ စတုရန်းမီတာ ငါးသောင်းနီးပါးအထိ သိမ်းကျုံး မွှေ့ရမ်းနိုင်ပါတယ်။အဲဒီအကျယ်အဝန်းဟာ ဘောလုံးကွင်း(၇)ကွင်းစာလောက်ရှိပါတယ်။ လေအားတာဘိုင်တစ်ခုဟာ တစ်နှစ်ပတ်လုံးမှာ ၆၃.၅ ကီလိုဝပ်နာရီသန်းပေါင်း ထုတ်လုပ်နိုင်ပါတယ်။ အဲဒါကြောင့်  မိသားစုသုံးဦးပါ အိမ်ထောင်စု ပေါင်း သုံးသောင်းကျော်ကို လျှပ်စစ်ဓာတ်အားပေးနိုင်ပါတယ်။

“ လေတာဘိုင်ဟာ လွတ်လပ်တဲ့ ဉာဏပစ္စည်းမူပိုင်ခွင့်နှင့်အတူ တရုတ်က တည်ဆောက်တာပါ။ ဓာတ်အားကွန်ယက် ပို့လွှတ်မှုရဲ့လိုအပ်ချက်အပေါ်ကောင်းစွာတုန့်ပြန်နိုင်တယ်။ ဒီဇိုင်းက ချောမွေ့ပြီး လုံခြုံစိတ်ချရတဲ့ စက်လုပ်ဆောင်မှုကို လည်းပေးပါတယ်”လို့ ဖူကျန့် တရုတ်သရီးဂျော့ ကော်ပိုရေးရှင်းရဲ့ အမှုဆောင်ဒါရိုက်တာ လိုင်ဇင်ကျွမ်းက ပြောပါတယ်။

ကမ်းလွန်လေစွမ်းအင်တာဘိုင်ဟာ ပုံမှန်ကျောက်မီးသွေး တန်ချိန် တစ်သောင်းကိုးထောင်ခန့်ကို အစားထိုးပေးနိုင်ပြီး တစ်နှစ် တစ်နှစ်ကို ကာဘွန်ဒိုင်အောက်ဆိုက်ထုတ်လုပ်မှု တန်ချိန် လေးသောင်းရှစ်ထောင်ခန့်ကို လျှော့ချပေးနိုင်ပါတယ်။

ဒီနှစ်ဖေဖော်ဝါရီမှာ ၁၃ မဂ္ဂါဝပ် တိုင်ဖွန်းဒဏ်ခံ ကမ်းလွန်လေတာဘိုင်ကို ဖူကျန့်ကနေ ထုတ်လုပ်ခဲ့ပါတယ်။ ဒါဟာ အာရှမှာလက်ရှိရှိနေတဲ့ လေတာဘိုင်တွေအကြားမှာ အကြီးဆုံးတာဘိုင်ဖြစ်ပါတယ်။ အခုလအနည်းငယ်အကြာမှာ ၁၃.၆ မဂ္ဂာဝပ်ရှိတဲ့ တာဘိုင်အသစ်ထပ်မံထုတ်လုပ်ဖို့ရှိနေပါတယ်။

“ ကျွန်တော်တို့၆.၇ မဂ္ဂါဝပ်၊၈ မဂ္ဂါဝပ်။ ၁၀ မဂ္ဂါဝပ်၊၁၃ မဂ္ဂါဝပ် ကမ်းလွန်လေတာဘိုင်စက်တွေ ထုတ်လုပ်ပေးခဲ့ပါတယ်။ ၁၆ မဂ္ဂါဝပ်စက်ကတော့ အနာဂတ်မှာ လာပါမယ်” လို့ လိုင်းက ဆက်ပြောပါတယ်။

Source CCTV+

 

#13.6_MW_offshore_wind_power _turbine

#China_Wind_Turbine

#Green_Energy

Published 16 Oct 2022

နာဆာရဲ့ Crew-4 မစ်ရှင်ဟာ နိုင်ငံတကာ အာကာသစခန်းထဲမှာ ရက်ပေါင်း ၁၇၀ ရက်နေထိုင်ကြပြီးနောက် ကမ္ဘာမြေပေါ် အောက်တိုဘာ ၁၄ ရက်က  ပြန်လည်ရောက်ရှိလာခဲ့ကြပါတယ်။

စပေ့ရှ်အိတ်စ်ဒရက်ဂွန် SpaceX Dragon “ လွတ်လပ်ခြင်း” အာကာသယာဉ်ဟာ နာဆာရဲ့ အာကာသယာဉ်မှူး ကေဂျဲလ် လင်ဂရင်း၊ ဘော့ဟင်နီးနှင့် ဂျက်ဆီကာ ဝပ်ကင်တို့ကို သယ်ဆောင်လာပါတယ်။အဲဒီအပြင် ဥရောပ အာကာသအေဂျင်စီက အီတလီလူမျိုး ဆာမန်သာ ခရစ်တိုဖော်ရက်တီလည်းပြန်လည်လိုက်ပါလာပါတယ်။

အဆိုပါ အာကာသယာဉ်ဟာ အမေရိကန်ပြည်ထောင်စု ဖလော်ရီဒါကမ်းခြေအနီး ပင်လယ်ရေပြင်ပေါ်သို့ ညနေ ၄နာရီ ၅၅ မိနစ်မှာ သက်ဆင်းခဲ့ပါတယ်။

Source AFP/NASA

#SpaceX_Crew-4

#NASA

#"Freedom"_spacecraft

Published 16 Oct 2022

နိုင်ငံပေါင်း(၉)နိုင်ငံမှာ နျူကလီးယားထိပ်ဖူးပေါင်း၁၂၇၀၀ နှင့်အတူ ကမ္ဘာကြီးမှာ နျူကလီးယားစစ်ပွဲအန္တရာယ်တစ်ခုဟာ အမြဲတမ်းရှိနေပါတယ်၊

အန္တရာယ်ဖြစ်နိုင်ချေက နည်းပါးသေးပေမယ့် ယူကရိန်းစစ်ပွဲတစ်ဝိုက်မှာ တင်းမာမှုတွေကတော့မြင့်တက်နေပါတယ်။  ယူကရိန်းစစ်ပွဲမှာ တိုးတက်မှုအတွက် အတော်ရုန်းကန်နေရတဲ့အလျောက် ရုရှားသမ္မတပူတင်က  သေရေးရှင် ရေးဖြစ်လာရင် နျူကလီးယားလက်နက်သုံးမယ့်သဘော အရိပ်အယောင်ပြလာခဲ့ပါတယ်။

ကျွမ်းကျင်သူတွေကတေ့ ပူတင်ဟာ အဲဒီအဆင့်အထိသုံးမယ့်ပုံမပေါ်ဘူးလို့ သုံးသပ်ကြပေမယ့် ကမ္ဘာ့ခေါင်းဆောင် တွေကတော့ အဲဒီအပေါ်အရေးတကြီးဖြစ်နေကြပါတယ်။

 

တကယ်လို့များ အဆိုးဆုံးကိစ္စကြီးဖြစ်လာပြီဆိုရင် နျကလီးယားအန္တရာယ်ကို လျှော့ချပေးနိုင်မယ့် လွယ်ကူတဲ့နည်းလမ်းတွေကို မှတ်သားထားသင့်ပါတယ်။

“ ရေဒီယိုသတ္တိကြွကြောင့်ဖြစ်တဲ့ ထိခိုက်သေဆုံးမှုတွေကို တကယ့်ကို ကာကွယ်နိုင်ပါတယ်” လို့ လောရင့် လစ်ဗာမိုး အမျိုးသားဓာတ်ခွဲခန်းက ရေဒီယိုသတ္တိကြွနှင့် အရေးပေါ်ပြင်ဆင်ရေးဆိုင်ရာ ကျန်းမာရေးပညာရှင် ဘရွတ်ဘာဒီမီယာက Insider ကို ၂၀၁၈ ခုနှစ်တုန်းက ပြောခဲ့ပါတယ်။

“ နျူကလီးယားတိုက်ခိုက်ခံရပြီးနောက် ဘာလုပ်ရမယ်ဆိုတာသိရင် ဓာတ်ရောင်ခြည်ကြောင့် လူတွေ ရာထောင်ပေါင်း များစွာကို ဖျားနာသေဆုံးခြင်းကနေ ကယ်တင်နိုင်ပါတယ်” လို့ သူကပြောပါတယ်။

အဲဒါကြောင့် အောက်ဖော်ပြပါ ကာကွယ်ရေးဆိုင်ရာ အကြံပြုချက် (၁၇)ချက်ကို တင်ပြလိုက်ရပါတယ်။

လျှပ်ပြက်၊ပေါက်ကွဲခြင်း

အရေးပေါ်စီမံခန့်ခွဲမှု ဖက်ဒရယ်အေဂျင်စီ FEMA အဆိုအရ နျူကလီးယားလက်နက်ရဲ့ အကျိုးဆက်တစ်ခုအတွင်း အရေးကြီးတဲ့ အဆင့် (၆)ဆင့်ရှိတယ်လို့သိရပါတယ်။ အဲဒါတွေက..

၁။ မီးအလုံးကြီးကြောင့်ဖြစ်ပေါ်တဲ့ တောက်ပတဲ့လျှပ်ရောင်ဟာ ယာယီမျက်စေ့ကွယ်စေနိုင်ပါတယ်

၂။ ပေါက်ကွဲတဲ့လှိုင်းကြောင့် အဆောက်အဦတွေပြားပြားဝပ်သွားစေနိုင်ပြီး အကြီးအကျယ်ဒဏ်ရာရတာ၊ သေဆုံးတာဖြစ်နိုင်ပါတယ်။ အဲဒီလှိုင်းဟာ ကိုယ့်ဆီကိုရောက်ဖို့ စက္ကန့်အနည်းငယ်ကြာတတ်ပါတယ်။

၃။ နျူကလီးယား ဓာတ်ရောင်ခြည်ရဲ့ လှုပ်ခတ်မှု

၄။ မီးနှင့်အပူ- အဲဒါကြောင့် ငြှိမ်းသတ်မနိုင်တဲ့ မီးလောင်ကျွမ်းမှုဖြစ်စေတတ်ပါတယ်။

၅။ လျှပ်စစ်သံလိုက်ဓာတ်-ယင်းကြောင့် မိုင်ပေါင်းများစွာပတ်လည်က အီလက်ထရွန်းနစ်ပစ္စည်းတွေ သုံးမရဖြစ်စေတတ်ပါတယ်။

၆။ရေဒီယိုသတ္တိကြွအမှုန်များ-ယင်းတို့က ပေါက်ကွဲမှုမှတစ်ဆင့်လေထဲပျံနှံ့ပြီး ၁၅မိနစ်ခန့်အကြာတွင် ကိုယ့်ဆီရောက်လာနိုင်ပါတယ်။ ခပ်မြင့်မြင့်မှာတိုက်တဲ့လေကြောင့်လည်း စတုရန်းမိုင်ရာပေါင်းများစွာအပေါ် ဖြန့်ကျက်စေနိုင်ပါတယ်။ပေါက်ကွဲတဲ့နေရာမှာတော့ အပြင်းထန်ဆုံးဖြစ်ပါတယ်။

နျူကလီးယားလက်နက်တွေဟာ သိပ်ကြောက်စရာကောင်းပါတယ်။ မြို့ကြီးတစ်မြို့ကိုကျရောက်တာနှင့်လူ ရာထောင်  များစွာ သေကြေပျက်စီးနိုင်ပါတယ်။

ဒါပေမယ့် အဆိုးရွားဆုံးပျက်စီးမှုတွေမှာတော့ အသက်ရှင်ကျန်မယ့်သူမရှိသလောက်ပါပဲ။အဲဒါကို အဆိုးရွားဆုံး အပျက်အစီးဇုန်လို့ခေါ်ပါတယ်လို့ သူကပြောပါတယ်။ ၁၀ ကီလိုတန်ပေါက်ကွဲမှုဆိုရင် ဟီရိုရှီးမားဗုံးပြင်းအားရဲ့ သုံးပုံနှစ်ပုံပါ။ မိုင်ဝက်အချင်းရှိတဲ့ပေါက်ကွဲမှုပါ။

ခင်ဗျားရဲ့မြို့ကို နျူကလီးယားဗုံးတစ်လုံး ကြဲချပြီဆိုရင် ဖြစ်နိုင်ချေအင်မတန်နည်းတဲ့ အနေအထားတစ်ခုမှာ အသက်ရှင်ကျန်ဖို့ အခွင့်အလမ်းကို တိုးမြှင့်ရယူနိုင်မယ့် နည်းလမ်းတွေတော့ရှိပါတယ်။

ဟီရိုရှီးမား ဗဟိုချက်ရဲ့ မီတာ ၃၀၀(ပေ၉၀၀)အတွင်း အသက်ရှင်ကျန်ရစ်သူတွေရှိခဲ့ပါတယ်လို့ ဘရွတ်ဘာဒီမီယာက ပြောပါတယ်။

ဘယ်လိုပြင်ဆင်ရမလဲ

အရေးပေါ်အရန်အသင့် ကိရိယာတစ်စုံ ရှိထားသင့်တယ်လို့ အမေရိကန်ကြက်ခြေနီအသင်းက အကြံပြုထားပါတယ်။ အဲဒီ တစ်စုံထဲမှာ ရေ၊အစားအစာ၊လက်နှိပ်ဓာတ်မီး၊ဆေးဝါးနှင့် အခြားပစ္စည်းတွေပါဝင်ပါတယ်။ အသေးစိတ်ကို ဒီမှာ ဆက်ကြည့်နိုင်ပါတယ်။

အန္တရာယ်ဆိုးကျိုးတစ်ခုခုအတွက် အမိုးအကာတွေ ကိုယ့်နေတဲ့ရပ်ကွက်မှာ ရှိသလား ရှာထားပါ။ ကိုယ့်မိသားစုအတွက် အကယ်လို့ ဘေးအန္တရာယ်ကြုံလာရင်ခိုနားလို့ရမယ့် အမိုးအကာတည်ဆောက်မယ့် အစီအစဉ်ရေးဆွဲထားပါ။အရေး ကြုံရင် ဘယ်သူနှင့်ဆက်သွယ်ရမလဲ(ဥပမာကြက်ခြေနီအသင်း) စဉ်းစားထားပါ။

မကြာမီတိုက်ခိုက်ခံရတော့မယ်လို့ သတိပေးမှုရရှိရင် ဘာလုပ်မလဲ

မကြာမီတိုက်ခိုက်မှာလာတော့မယ်လို့ သတိပေးချက်ရရှိရင် ပထမဆုံးအလုပ်က ခိုနားရာ အမိုးအကာကိုရှာဖို့ပဲဖြစ်တယ်။ အဲဒီနေရာက ခင်ဗျားကို ပေါက်ကွဲမှုကြောင့် ခန္တာကိုယ်ထိခိုက်နိုင်တာရော ဓာတ်ရောင်ခြည်တွေအန္တရာယ်ကရော အထိုက်အ‌လျောက်ကာကွယ်ပေးနိုင်ပါလိမ့်မယ်။

ကိုယ်ကကားမောင်းနေတယ်ဆိုရင် လမ်းဘေးချက်ခြင်းရပ်၊ကားပေါ်ကထွက် အဆောက်အဦတစ်ခုခုသွားမယ့် လမ်းကိုရှာ ပြီးသွားပါလို့ သူက အကြံပြုပါတယ်။

အတွင်းခန်းအမိုးအကာကိုရှာပါ။ ပိုကောင်းတာက မြေအောက်ခန်းပဲဖြစ်တယ်။ အုတ်သို့မဟုတ် ကွန်ကရစ် အဆောက် အအုံ ဖြစ်တယ်လို့  ကြက်ခြေနီနှင့် FEMA  တို့က အကြံပြုထားပါတယ်။ အဆောက်အအုံရဲ့ အလယ်မှာ ကြိုးစားပြီးနေပါ။ ဥပမာ- လှေကားခွင်လိုနေရာမျိုးပေါ့။

အဆောက်အဦအတွ်း ပိုနိမ့်ပြီး ပိုနက်တဲ့နေရာမှာ နေနိုင်ပါတယ်။ ပြတင်းတွေနှင့် ဝေးဝေးနေပါ(ကွဲရှနိုင်)။ တံခါးတွေနှင့် ဝေးဝေးနေပါ(ပွင့်ထွက်နိုင်)။ အပြင်နံရံတွေနင့်ဝေးဝေးနေပါ( ပြိုလဲကျနိုင်)။

“ လေဆင်နှာမောင်းတိုက်ရင် ပုန်းသလိုမျိုးအတူတူသဘောပါပဲ” လို့ သူကပြောပါတယ်။

မီးလုံးကြီးကို မကြည့်မိပါစေနှင့်။ အဲဒီအလင်းရောင်ဟာ အမြင်အာရုံကို ခေတ္တကွယ်စေနိုင်တယ်လို့ FEMA က သိရပါတယ်။

ညွှန်ကြားချက်တွေကို အဆက်မပြတ်ပါစေနှင့်။မိုဘိုင်းဖုန်းတွေက ပြန်တောက်သွာနိုင်တယ်။ ဒါပေမယ့် ရေဒီယိုတွေက ဆက်အလုပ်လုပ်နေပါဦးမယ်။

လူသားတွေနှင့်အိမ်မွေးတိရိစ္ဆာန်တွေအားလုံးဟာ အာဏာပိုင်တွေဆီက ဘာညွှန်ကြားချက်မှ မလာသေးဘဲနှင့် အဆောက်အဦအတွင်းမှာပဲ အနည်းဆုံး ၂၄ နာရီနေပေးရပါမယ်လို့ ကြက်ခြေနီအဖွဲ့ကဆိုပါတယ်။

ပေါက်ကွဲမှုဖြစ်တဲ့အချိန် အပြင်မှာရှိနေရင်ဘာလုပ်ရမလဲ

အပြင်မှာ ခင်ဗျားရောက်နေရင် ပထမဦးစားပေးလုပ်ရမှာက ပေါက်ကွဲမှုလှိုင်းတွေကို ကာကွယ်နိုင်အောင် ကိုယ့်ကိုကိုယ် မိုးကာရမှာဖြစ်ပါတယ်။ ကိုယ့်ကိုကာလို့ရတဲ့ အရာမှန်သမျှနှင့်ကာထားပါ။ အဲဒီနောက် မြေပြင်မှာ ဆန့်လှဲချလိုက်ပြီး ခေါင်းကို ဖုံးကာထားပေးပါလို့ ကြက်ခြေနီအဖွဲ့က ဆိုပါတယ်။

ပေါက်ကွဲတာတွေက ကိုယ့်ကိုကျော်သွားပြီလို့ ဘယ်တော့မှ မမှတ်ယူပါနှင့်။ လှိုင်းတွေကိုယ့်ဆီရောက်ဖို့ ၃၀စက္ကန့်လောက် ကြာတတ်ပါတယ်လို့လည်း ကြက်ခြေနီအဖွဲ့ကပြောပါတယ်။

ပေါက်ကွဲလှိုင်းတွေဖြတ်သွားပြီးတဲ့နောက် ဓာတ်ရောင်ခြည်ထိတွေ့မှု အကန့်အသတ်ဖြစ်ဖို့လိုပါတယ်။

အပြင်မှာပဲဆက်ရှိနေတုန်းပဲဆိုရင် ကိုယ့်ရဲ့ပါးစပ်ကို အဝတ်သို့မဟုတ် မျက်နှာသုတ်ပဝါစဖြင့် ဖုံးအုပ်ထားပါ။ အဲသလို လုပ်ပေးခြင်းဖြင့် ရေဒီယိုသတ္တိကြွအမှုန်တွေက အသက်ရှုသွင်းတဲ့အထဲ ပါဝင်မှုကို လျော့ချပေးနိုင်ပါတယ်။

ကိုယ်ကပေါက်ကွဲတဲ့နေရာနှင့် ဘယ်လောက်ပင်ဝေးနေပါစေ အမိုးအကာအောက်ရောက်နိုင်သမျှရောက်အောင်လုပ်ပါ။ ရေဒီယိုသတ္တိကြွတွေ အမှုန်တွေဟာ မိုင်ပေါင်းရာချီခရီးသွားနိုင်လို့ဖြစ်ပါတယ်လို့ ကြက်ခြေနီက ပြောပါတယ်။ အတွင်းထဲ ရောက်လို့ အန္တရာယ်ကင်းပြီဆိုရင်တော့ အပေါ်ကဖုံးကာထားတာတွေကို ဖယ်ရှားလိုက်ပါ။

အမိုးအကာတွေ့ပြီဆိုတာနှင့် ဘာလုပ်ရမလဲ

အပြင်မှာခင်ဗျားရှိနေရင် ခန္ဓာကိုယ်က ရေဒီယိုသတ္တိကြွအမှုန်တွေ နှင့် ဝေးလို့ရနိုင်သလောက်ဝေးအောင်လုပ်ပါ။

အချိန်တိုတိုအတွင်း အများကြီးနှင့်ထိတွေ့မိရင် ခန္ဓာကိုယ်ကို ပျက်စီးစေပါလိမ့်မယ်။ မိမိခန္ဓာက မိမိကိုယ်မိမိ ပြန်ပြုပြင်တာကို ကန့်သတ်သွားပါလိမ့်မယ်။ ကူးစက်ရောဂါတွေကို ပြန်လည်တိုက်ခိုက်တာနှင့် အခြားသော လုပ်ဆာင်မှု တွေကို ကန့်သတ်စေပြီး အဲဒါက အန္တရာယ်ရှိတဲ့အခြေအနေဖြစ်တဲ့ အမြဲတမ်း ဓာတ်ရောင်ခြည်အဆိပ်သင့်ဖျားနာမှုကို ဦးတည် သွားစေပါလိမ့်မယ်။

နာရီအနည်းငယ်အတွင်း ထိတွေတဲ့ပမာဏ ၇၅၀ millisieverts လောက်ရှိရင် လူကို နာမကျန်းဖြစ်စေပါတယ်။ ဒါဟာ နှစ်စဉ် သာမာန်အမေရိကန်တစ်ဦး သဘာဝနှင့်ဆေးဝါးကရတဲ့ ဓာတ်ရောင်ခြည်ပမာဏထက်  အဆ၁၀၀ခန့် များနေပါတယ်။ ၁၀ ကီလိုတန်ပေါက်ကွဲမှုဟာ အချင်းဝက် တစ်မိုင်အတွင်း ဒီလောက်များတဲ့ ထိတွေ့မှုကို ဖြစ်ပေါ်စေပါ တယ်။

 အဝတ်အစားရဲ့ အပေါ်က အလွှာကို ဖယ်ထုတ်ပစ်လိုက်ခြင်းက ရေဒီယိုသတ္တိကြွမှုန်တွေ ညစ်ညမ်းခြင်းကို ၉၀ ရာခိုင်နှုန်း အထိလျှော့ချပေးနိုင်တယ်လို့ ကြက်ခြေနီကပြောပါတယ်။

ဖြစ်နိုင်ရင်တော့ အဲဒီစွန်းပေနေတဲ့အဝတ်တွေအားလုံးကို ပလပ်စတစ်အိတ်ထဲထည့်ပြီး အခြားသူတွေနှင့် အိမ်မွေးတိရိစ္ဆာန် တွေနှင့် ဝေးရာမှာ သွားထားလိုက်ပါ။ အဝတ်အစားတွေက ဓာတ်ရောင်ခြည်ကို ဆက်ပြီးလွှတ်ထုတ်ပေးနိုင်လို့ဖြစ်ပါတယ်။

ဆံပင်နှင့် အရေပြားကို  ဆပ်ပြာတွေ ခေါင်းလျှော်ရေတွေအများကြီးနှင့် ပြီးတော့ ရေဖြင့် ဆေးကြောပစ်ပါ။ အရေပြားကို မကုတ်ခြစ်ပါနှင့်။ ဆံပင်ပြုပြင်ဆေး conditioner မသုံးပါနှင့်။ အဲဒီဆေးတွေက ရေဒီယိုသတ္တိကြွပစ္စည်းတွေနှင့် ဆံပင်ကို တွယ်ကပ်စေလို့ဖြစ်ပါတယ်လို့ ကြက်ခြေနီက ပြောပါတယ်။

အညစ်အကြေးတွေ ပိတ်မိနေနိုင်တဲ့ နှာခေါင်းကို ညင်ညင်သာသာ မှုတ်ထုတ်ပစ်ပြီး နားရွက်တွေကိုလည်း သုတ်ပစ်ဖို့ လိုပါ တယ်။

ရေချိုးလိုက်တာက အကောင်းဆုံးပါပဲ။ ဒါပေမယ့် ရေမချိုးနိုင်ရင် ရေစိုနေတဲ့အဝတ်နှင့် ပွတ်တိုက်ပေးပါ။  အဲဒီအဝတ် ကလည်း အပြင်မှာထားတာမဟုတ်တဲ့ အဝတ်ဖြစ်ရပါမယ်လို့ FEMA ကပြောပါတယ်။

ကိုယ့်ရဲ့တိရိစ္ဆာန်လေးတွေက အပြင်မှာရှိရင် သူတို့မှာကပ်ငြိပါလာတဲ့ ရေဒီယိုသတ္တိကြွအမှုန်တွေက သူတို့နှင့် ခင်ဗျားကို ထိတွေ့မိစေပါလိမ့်မယ်။ ကိုယ့်အိမ်မွေးတိရိစ္ဆာန်တွေရဲ့ အမွှေးတွေကို ဖီးပေးပြီး ဆပ်ပြာနှင့်ရေနှင့် သူတို့ကို ရေချိုးပေးပါ။

ဖြစ်နိုင်ရင် ပြတင်းနှင့် မီးလင်းဖိုတွေကိုပိတ်ထားပါ။ပန်ကာတွေနှင့်လေအေးပေးစက်တွေပိတ်ပါလို့ ကြက်ခြေနီက ဆိုပါတယ်။

အမိုးအကာအတွက် ပြင်ဆင်ထားပါ

လှုပ်ရှားဖို့က အန္တရာယ်ရှိမရှိမသေချာရင် ပေါက်ကွဲနေတဲ့ အမိုးအကာအထဲ ကိုယ်ကိုနိမ့်နိုင်သမျှနိမ့်အောင် ခိုဝင်ပါ။

ဒီအချိန်မှာ မီးတွေနှင့် အပျက်အစီးအပုံတွေက ပြန့်ကျဲနေနိုင်တယ်လို့ ဘရွတ်ဘာဒီမီယာက ပြောပါတယ်။

ထုတ်ပိုးထားပြီးသား အစားအသောက်တွေကိုပါ စားသောက်ပါ။ ဒါမှမဟုတ် အဆောက်အဦအတွင်းက အစားအစာတွေ  ကိုပဲစားသုံးပါလို့ FEMA ကပြောပါတယ်။

မိမိရဲ့ စိတ်ပိုင်းဆိုင်ရာကျန်းမာရေးနှင့် ကလေးတွေရဲ့ကျန်းမာရေးအတွက် ဂရုစိုက်ပါ။ အပြုသဘောဆောင်တဲ့လှုပ်ရှားမှု တွေကို အာရုံစိုက်ပါ။ ကြောက်စရာကောင်းတဲ့ မီဒီယာသတင်းပေးပို့ချက်တွေကို ကလေးတွေမသိအောင်ကန့်သတ်ပါ။  စားဖို့သောက်ဖို့သတိရနေပါ။ အခြားသူတွေအပေါ်စိတ်ရှည်ပါလို့ ကြက်ခြေနီက အကြံပြုပါတယ်။

ပေါက်လောင်မှုတွေဖြစ်တာပဲဖြစ်ပစေ၊ရေဒီယိုသတ္တိကြွအမှုန်တွေ ရောက်လာတာပဲဖြစ်ပစေ နှစ်မျိုးစလုံးအတွက် အရေးအကြီးဆုံးက အတွင်းထဲမှာ နေထိုင်ကြဖို့ပဲဖြစ်ပါတယ်လို့ ဘရွတ်ဘာဒီမီယာက ပြောပါတယ်။

Source Insider

#Nuclear_war

#Radiation_illness

#Tips_For_Minimize_risks

Published 11 Oct 2022

ဂျပန်နိုင်ငံမှာ စတားလင့်ခ် Starlink အင်တာနက်ဝန်ဆောင်မှုလုပ်ငန်းကို စတင်နေပြီလို့  အမေရိကန်လုပ်ငန်းရှင် အီလွန်မတ်စ်ရဲ့ စပေ့ရှ်အိတ်စ် SpaceXကုမ္ပဏီကကြေညာပါတယ်။

စတားလင့်ခ်ဟာ ဂျပန်နိုင်ငံရဲ့ တောင်ထူထပ်တဲ့ဒေသတွေနှင့် အင်တာနက် မရတစ်ချက် ရတစ်ချက်ဖြစ်နေပြီး ဆက်သွယ်ရခက်ခဲတဲ့ ကျွန်းတွေရဲ့ လိုအပ်ချက်တွေကို ဖြည့်ဆည်းပေးပါလိမ့်မယ်။

စပေ့ရှ်အိတ်စ်က ယင်းရဲ့ တွစ်တာစာမျက်နှာကနေ ကြေညာတာဖြစ်ပါတယ်။ တရားဝင်ဝက်ဆိုက်မှာပါတဲ့ အချက်အလက်တွေအရ စပေ့ရှ်အိတ်စ်အင်တာနက်ရဲ့ လစဉ်ကြေးဟာ ၈၄ ဒေါ်လာ ( ၁၂၃၀၀ ယန်း)ဖြစ်ပါတယ်။ အဲဒီအပြင် ဟာ့ဒ်ဝဲကုန်ကျစရိတ်ကလည်း ယန်းငွေ ၇၃၀၀၀ ကုန်ကျမှာဖြစ်ပါတယ်။

စတားလင့်ခ်ဟာ  ဂြိုဟ်တုကနေတစ်ဆင့် မြန်နှုန်းမြင့်ပြီး စောင့်ဆိုင်းချိန်နည်းပါးတဲ့ အင်တာနက်ဝန်ဆောင်မှုလုပ်ငန်း ကို ဆောင်ရွက်ပေးနေပါတယ်။ ရုရှားတိုက်ခိုက်ပြီးကတည်းက ယူကရိန်းမှာ စတားလင့်ခ်ရဲ့ ဂြိုဟ်တုအင်တာနက်ဟာ အရေးကြီးတဲ့ အခန်းကဏ္ဍကနေ ပါဝင်နေတာဖြစ်ပါတယ်။

ဥရောပနှင့် အမေရိကန်အပြင်  အာရှနှင့် အခြားဒေသတွေကိုပါ ဂြိုဟ်တုအင်တာနက်လုပ်ငန်းဝန်ဆောင်မှုပေးဖို့ စတင်းလင့်ခ်က စီစဉ်နေပါတယ်။

ဖိလစ်ပိုင်မှာ အစိုးရဟာ ယင်းရဲ့ အခမဲ့ ဝိုင်ဖိုင်အစီအစဉ်အတွက် စတားလင့်ခ်ကို စာရင်းသွင်းဖို့ စဉ်းစားနေပါတယ်။ စပေ့ရှ်အိတ်ခ်ဟာ ဒီဇင်ဘာနောက်ဆုံးထားပြီး  စီးပွားဖြစ်လုပ်ငန်းဆောင်ရွက်ဖို့ ကြိုးစားနေပါတယ်လို့ ကုမ္ပဏီရဲ့ အစိုးရဆက်ဆံရေး အကြီးတန်းအရာရှိ ရီဘက်ကာဟန်တာကပြောပါတယ်။

Source: Nikkei Asia

#Starlink internet

#Japan_Internet

#Elon_Musk