Published 18 Sept 2022

တရုတ်အာကာသအေဂျင်စီက ယခုတစ်ပတ်ထဲမှာ ကမ္ဘာဂြိုဟ်ကြီးနှင့်တျန်ဂေါင်းအာကာသစခန်းရဲ့ နေရောင်ခြည်ပြားတွေရဲ့ အံ့မခန်းစရာ ရှုမျှော်ခင်းတွေပါတဲ့ ဗွီဒီယိုကိုထုတ်ပြန်လိုက်ပါတယ်။ အဲဒီဗွီဒီယိုကို ဝမ်ရှန်းလက်ဗ်မော်ကျူး lab moduleမှာ တပ်ဆင်ထားတဲ့ မြင်ကွင်းကျယ်ကင်မရာကနေ ဗွီဒီယိုရိုက်ကူးပေးထားတာဖြစ်ပါတယ်။

စက်တင်ဘာ ၁ရက်က သူတို့ရဲ့ extravehicular လှုပ်ရှားမှုတွေအတွင်း တရုတ်ရဲ့ ရှန်ကျိုး-၁၄ အာကာသယာဉ်မှူးတွေဟာ တိုးတက်လာတဲ့နည်းပညာတွေသုံးပြီး ဝမ်ရှန်းလက်ဗ်မော်ကျူး က မြင်ကွင်းကျယ်ကင်မရာကို မတင်ခဲ့ပါတယ်။အဲဒီကင်မရာဟာ အာကာသစခန်းရဲ့ extravehicula ကိရိယာတွေကို စောင့်ကြပ်ကြည့်ရှုဖို့ တပ်ဆင်ထားတာဖြစ်ပါတယ်။  ကင်မရာကိုမပြီးရိုက်လိုက်တဲ့အတွက် ကျယ်ပြန့်တဲ့ မြင်ကွင်းနှင့် ပိုပြီးများပြားတဲ့ အချက်အလက်တွေစုဆောင်းရရှိခဲ့ကြပါတယ်။

Source CCTV+

#China_Manned_Space_Agency

#Panoramic_View_of_Earth

#Space_Station

Published 11 Sept 2022

အွန်လိုင်းနှင့် metaverse မက်တာဗတ်စ် ကုမ္ပဏီတစ်ခုဖြစ်တဲ့ နက်ဒရက်ဂွန် ဝက်ဗ်ဆော့ဖ် NetDragon Websoft က သူတို့ဟာ ဉာဏ်ရည်တု(AI) နှင့်မောင်းနှင်တဲ့ လူသားသဏ္ဍန်စက်ရုပ်တစ်ခုကို ကုမ္ပဏီရဲ့ စီအီးအိုအဖြစ်ခန့်အပ်လိုက်ပါတယ်။

အဲဒီ မစ္စတန်ယုလို့ အမည်ပေးထားပြီး အဲဒီတရုတ်ကုမ္ပဏီအတွင်း ဆုံးဖြတ်ချက်တွေချမှတ်ရာမှာ အထောက်အကူပြုမယ့်  အချိန်နှင့်တပြေးညီ သတင်းအချက်အလက်ဗဟိုနှင့် သုံးသပ်စိတ်ဖြာပေးတဲ့ကိရိယာအဖြစ် တာဝန်ထမ်းဆောင်မှာဖြစ်ပါတယ်။

တန်ယုဟာ ကုမ္ပဏီရဲ့ လုပ်ငန်းခွဲ ဖူကျန့် နက်ဒရက်ဂွန်ဝက်ဆော့ဗ်ကို ခေါင်းဆောင်မှာဖြစ်ပြီး  ဒီလိုရာထူးပေးလိုက်တာဟာ ကုမ္ပဏီရဲ့စီမံခန့်ခွဲမှုထဲ အေအိုင်ခေါ်ဉာဏ်ရည်တုကို ပေါင်းစပ်လိုက်တဲ့ အထင်ကရ ပြောင်းလဲမှုလို့ဆိုပါတယ်။

အဲဒီနည်းပညာကုမ္ပဏီဟာ တရုတ်နိုင်ငံရဲ့ ဗွီဒီယိုဂိမ်းနှင့် မိုဘိုင်းအက်ပလီကေးရှင်းထုတ်လုပ်ရေးမှာ လေးစားသမှုအပြုရဆုံး ကုမ္ပဏီတွေထဲမှာ တစ်ခုအပါအဝင်ဖြစ်ပြီး ၁၉၉၉ ခုနှစ်ကတည်းက တည်ထောင်ခဲ့တာပါ။

သူတို့ဟာ အွန်လိုင်းမှာ လူစုံကစားရတဲ့ ဂိမ်း Heroes Evolved and Conquer အွန်လိုင်းဂိမ်း ဖန်တီးခဲ့ကြပြီး Android apps တွေဖြစ်တဲ့ Conquer Poker - Texas Hold'em တို့ကိုလည်း ဖန်တီးခဲ့ပါတယ်။

“ ဒီလိုခန့်အပ်လိုက်ခြင်းဟာ အေအိုင်(ဉာဏ်ရည်တု)ကို ကော်ပိုရိတ်စီမံခန့်ခွဲမှုအတွင်း ပထမဆုံးဦး ရှေ့ဆောင်အဖြစ် အသုံးပြုတာဖြစ်ပြီး လုပ်ငန်းလုပ်ဆောင်မှုစွမ်းရည်ကို အဆင့်အသစ်တစ်ခုဆီခုန်ပျံကျော်လွှားစေမှာဖြစ်ပါတယ်” လို့ ကုမ္ပဏီရဲ့ သတင်းထုတ်ပြန်ချက်မှာ ဖော်ပြထားပါတယ်။

“ တန်ယုကိုခန့်အပ်မှုဟာ ကုမ္ပဏီရဲ့ အေအိုင်+ စီမံခန့်ခွဲရေး” မဟာဗျူဟာကို ထင်ရှားစွာပြသတာဖြစ်ပြီး Metaverse အဖွဲ့အစည်းတစ်ခုသို့ ရှေ့ရှုနေတဲ့ ကုမ္ပဏီအတွက် အထင်ကရမှတ်တိုင်တစ်ခုကို ကိုယ်စားပြုနေပါတယ်” လို့ သတင်းထုတ်ပြန်ချက်ကဆိုပါတယ်။

နက်ဒရက်ဂွန်က တန်ယုရဲ့ တာဝန်အသေးစိတ်ကို ထုတ်ဖော်မပြောသေးပါဘူး။ အဲဒီအပြင် သူမက ကုမ္ပဏီကိုဘယ်လို စီမံဆောင်ရွက်မယ်ဆိုတာလည်း မသိရသေးပါဘူး။

ဒါပေမယ့် သူမဟာ ဒေါ်လာဘီလျံချီတန်တဲ့  အဖွဲ့အစည်းအတွင်း လုပ်ငန်းလည်ပတ်မှုနှင့် လုပ်ငန်းစွမ်းဆောင်ရည်တွေကို ကြီးကြပ်ကွပ်ကဲမှာဖြစ်တယ်လို့ ပြောပါတယ်။

တန်ယုဟာ လုပ်ငန်စဉ်စီးဆင်းမှုတွေကို တောက်လျောက်ကပ်ပါနေမှာဖြစ်ပြီး အရည်အသွေးရှိတဲ့အလုပ်တွေတိုးမြှင့်စေပြီး အကောင်အထည်ဖော်မှု အရှိန်ကိုလည်း တိုးတက်စေလိမ့်မယ်လို့ ဆက်ပြောပါတယ်။

တန်ယုဟာ အချိန်နှင့်တပြေးညီ သတင်းအချက်အလက်ဗဟိုအဖြစ်ရော၊ နေ့စဉ်လုပ်ငန်းတွေမှာ ဆုံးဖြတ်ချက်ချဖို့ ခွဲခြမ်း စိတ်ဖြာပေးတဲ့ကိရိယာအဖြစ်ရော ဆောင်ရွက်ပေးမှာပါ။ အန္တရာယ်စီမံခန့်ခွဲမှုစနစ်ကိုလည်း ပိုပြီး အကျိုးရှိအောင်လုပ်ပေး မယ်လို့လည်း ကုမ္ပဏီကပြောပါတယ်။

အဒီအပြင် ပါရမီထူးတဲ့လူတော်တွေမွေးထုတ်ဖို့ နှင့် ဝန်ထမ်းအားလုံးအတွက် မျှတပြီး အကျိုးရှိတဲ့ လုပ်ငန်းခွင်အသေအချာဖြစ်စေဖို့ တန်ယုဟာ အဓိက အခန်းကဏ္ဍကနေပါဝင်မှာဖြစ်တယ်လို့ပြောပါတယ်။

နက်ဒရက်ဂွန်ရဲ့ ဥက္ကဋ္ဌ ဒေါက်တာ ဒီကျန်းလျူက တန်ယုရဲ့နောက်မှာ  metaverse အခြေခံတဲ့ လုပ်ငန်းခွင်ဖြစ်ဖို့ အယ်ဂိုရစ်သမ်ကို ဆက်လက်တည်ဆောက်မယ်လို့ ဖွင့်ဟပြောကြားပါတယ်။

“ အေအိုင်ဟာ အနာဂတ်ရဲ့ ကော်ပိုရိတ်စီမံခန့်ခွဲမှုဆိုတာ ကျွန်တော်တို့နားလည်ထားပါတယ်။ မစ္စတန်ယုကို ကျွန်တော်တို့ခန့်အပ်တာဟာ  ကျွန်တော်တို့ နေ့စဉ်လုပ်ငန်းတွေလည်ပတ်နေတဲ့နည်းလမ်းကို အေအိုင်အသုံးပြုပြောင်းလဲမယ့် ကတိကဝတ်ဖြစ်ပါတယ်။ ဒါဟာ ကျွန်တော်တို့ရဲ့ အနာဂတ်မဟာဗျူဟာမြောက်တိုးတက်မှုကို အဆုံးစွန်မောင်းနှင်ပေးမှာပါ” လို့လည်း သူကပြောပါတယ်။

ယခုနှစ်ဆန်းပိုင်းမှာ လန်ဒန်စီးပွားရေးနှင့် နိုင်ငံရေးသိပ္ပံကျောင်းက သုတေသနမှူးတွေက အေအိုင်ဟာ ဝန်ထမ်းတွေကို ခန့်ထားရာမှာ လူသားအထက်အရာရှိတွေ၊ဘော့စ်တွေထက် ပိုကောင်းချင်ကောင်းမယ်၊ဒါမှမဟုတ် တန်းတူရှိမယ်လို့ ပြောထားပါတယ်။

Source: Daily Mail

#AI_CEO

#NetDragon_Websoft

#Ms Tang Yu_Robot_CEO

Published 4 Sept 2022

တရုတ်နိုင်ငံက နေရောင်ခြည်စွမ်းအင်သုံး မောင်းသူမဲ့  ချီမင်ရှင်း-၅၀ သို့မဟုတ် ဖော့စ်ဖရပ်-၅၀ လို့အမည်ပေးထားတဲ့ လေယာဉ်ကို စနေနေ့ကတရုတ်နိုင်ငံ အနောက်မြောက် ရှန်ရှီးပြည်နယ်က ယုလင်မြို့မှာ  အောင်မြင်စွာ စမ်းသပ်ပျံသန်းနိုင်ခဲ့ပါတယ်။

တရုတ်နိုင်ငံရဲ့ အဓိက လေယာဉ်ပျံထုတ်လုပ်တဲ့ တရုတ်လေကြောင်းစက်မှုလုပ်ငန်းကော်ပိုရေးရှင်း AVIC ရဲ့ အမှတ်(၁) လေယာဉ်ဒီဇိုင်းနှင့်သုတေသနဌာနက ထုတ်လုပ်တဲ့ အဲဒီ နေရောင်ခြည်စွမ်းအင်သုံး ဒရုန်းကြီးဟာ  စနေနေ့ ညနေ(၅)နာရီ မိနစ်(၅၀)မှာ ပျံတက်ခဲ့ပြီး ၂၆မိနစ်ကြာပျံသန်းပြီးနောက် ညနေ ၆နာရီ ၁၆ မိနစ်မှာ ချောမွေ့စွာဆင်းသက်နိုင်ခဲ့ပါတယ်။

ဒီလေယာဉ်ဟာ AVIC ကထုတ်လုပ်တဲ့ အလွန်မြင့်မားတဲ့ သွင်ပြင်အချိုးအစားရှိတဲ့ အမြင့်ပျံ မြန်နှုန်းနိမ့် လေယာဉ်ပျံတစ်စီးဖြစ်ပါတယ်။ပထမဆုံး လေယာဉ်ကိုယ်ထည်နှစ်ခုနှင့် အကြီးစားလေယာဉ်ဖြစ်ပြီး ပထမဆုံး နေရောင်ခြည်စွမ်းအင်တစ်ခုတည်းသုံး အရာအားလုံး လျှပ်စစ်နှင့် အရွယ်ကြီးမား ဒရုန်းပလက်ဖောင်းလည်းဖြစ်ပါတယ်။

ဒီလေယာဉ်ဟာ အမြင့် ထောက်လှမ်းခြင်းတောမီးလောင်မှုစောင့်ကြပ်ကြည့်ရှုခြင်း၊ လေထုဝန်းကျင်စောင့်ကြပ်ကြည်ရှုခြင်း၊ ပထဝီအနေအထားမြေပုံမှတ်သားခြင်းနှင့်ဆက်သွယ်ရေးဆောင်ရွက်ခြင်းတွေ အတွက် သန့်ရှင်းစိမ်းလန်းပြီး ပတ်ဝန်းကျင်ထိန်းသိမ်းရေးအထောက်အကူပြုတဲ့ နေရောင်ခြည်စွမ်းအင်သုံးကာ အမြင့်မှာ အချိန်ကြာကြာ မရပ်မနားပျံသန်းနိုင်ပါတယ်။

ယခုလေယာဉ်တည်ဆောက်နိုင်တဲ့အတွက် လေကြောင်းပျံသန်းရေးမှာ မောင်းသူမဲ့ နေရောင်ခြည်စွမ်းအင်သုံးလေယာဉ် အကြီးစားတွေတည်ဆောက်ဖို့ ခိုင်မာတဲ့အုတ်မြစ်တစ်ခု အောင်မြင်စွာချလိုက်နိုင်တာလို့ သတင်းကဖော်ပြပါတယ်။

Source: CCTV Plus

#Solar_powered_unmanned_aircraft

#China_avaiation

#Green_energy

Published 3 Sept 2022

ဂျာကာတာနှင့် ဘန်ဒေါင်း ကျည်ဆန်အမြန်ရထားလမ်းစီမံကိန်းအတွက် သီးခြားထုတ်လုပ်ထားတဲ့ တရုတ်နိုင်ငံထုတ် မြန်နှုန်းမြင့် ခရီးသည်တင် လျှပ်စစ် ရထားနှင့် စစ်ဆေးရေး ရထားတွေဟာ ကြာသပတေးနေ့က တရုတ်နိုင်ငံ ချင်းဒေါင်ဆိပ်က်းမှ ဂျာကာတာ ဆိပ်ကမ်းကို ရောက်ရှိလာခဲ့ပါတယ်။

ဒီရထားတွဲတွေရောက်ရှိလာတာဟာ ဂျာကာတာ-ဘန်ဒေါင်း အမြန်ရထားလမ်းဆောက်လုပ်ရေးရဲ့ နောက်ထပ် အထင်ကရ မှတ်တိုင်တစ်ခုဖြစ်တယ်လို့ စီစီတီဗွီကသတင်းရေးသားပါတယ်။ တရုတ်နိုင်ငံထုတ် မြန်နှုန်းမြင့်ရထားတွေကို နိုင်ငံခြားတိုင်းပြည်တစ်ခုကို တင်ပို့တာ ဒါပထမဆုံးလည်းဖြစ်ပါတယ်။

စီအာရ်အာရ်စီ ချင်းဒေါင်ဆီဖန်ကုမ္ပဏီက ဒီဇိုင်းထုတ်တည်ဆောက်တဲ့ ဒီရထားတွဲတွေဟာ ကျည်ဆံရထားပုံစံအတွက် ခေတ်မီနည်းပညာအသုံးပြုထားပါတယ်။ အီအမ်ယူမြန်ှုန်းမြင့် နှင့် စီအိုင်တီရထားတွေဟာ တစ်နာရီကို ၃၅၀ ကီလိုမီတာ အထိမောင်းနှင်နိုင်ပါတယ်။ ဒီရထားတွေကို တရုတ်နိုင်ငံရဲ့ စံချိန်စံညွှန်းတွေနှင့်အညီ တည်ဆောက်ထားတယ်လို့လည်း ဆိုပါတယ်။

အဲဒီအပြင် အင်ဒိုနီးရှားနိုင်ငံရဲ့ ပတ်ဝန်းကျင်နှင့် လိုင်းအခြေအနေနှင့်လည်း လိုက်လျောညီထွေရှိအောင်ဒီဇိုင်းလုပ်ထားတယ် လို့လည်းသိရပါတယ်။

၂၀၂၃ နှစ်ဆန်းပိုင်းမှာ နောက်ထပ် ရထား ၁၀စီး ထပ်မံ တင်ပိုပေးဦးမှာဖြစ်ပါတယ်။ ဂျာကာတာ-ဘန်ဒေါင်း မြန်နှုန်းမြင့် ကျည်ဆံရထားလမ်းဟာ ဂျာကာတာနှင့် အနောက်ဂျာဗားပြည်နယ်မြို့တော် ဘန်ဒေါင်းတို့အကြား ခရီးသွားချိန်ကို လျှော့ချဖြတ်တောက်ပေးနိုင်ပါလိမ့်မယ်။ ယခုပုံမှန်အားဖြင့် သုံနာရီကျော်မောင်းနှင်ရတဲ့ခရီးကို မိနစ်၄၀သာ ကြာမြင့် ပြီး မောင်းနှင်နိုင်တော့မှာဖြစ်ပါတယ်။

Source CCTV Plus

#Jakarta-Bandung_High-Speed_Railway

#Indonesia_China

#China_Made_Bullet_train

Published- 2Sept 2022

အိန္ဒိယနိုင်ငံက နိုင်ငံရဲ့ ပထမဆုံးပြည်တွင်းထုတ် လေယာဉ်တင်သင်္ဘောကြီးကို စက်တင်ဘာ ၂ရက် သောကြာနေ့က ပွဲထုတ်လိုက်ပါတယ်။ ဒါဟာ အိန္ဒိယအစိုးရရဲ့ နိုင်ငံခြားလက်နက်တွေကို မှီခိုနေရတာကိုလျှော့ချဖို့နှင့် ဒေသအတွင်း တရုတ်ရဲ့စစ်ရေးအရယုံကြည်စိတ်ချ မှုတိုးပွားလာနေတာ ကို တန်ပြန်နိုင်ဖို့အတွက်ကြိုးပမ်းမှုဖြစ်ပါတယ်။

INS Vikrant (အိုင်အင်န်အက်စ် ဗစ်ကရန့်) လို့ အမည်ပေးထားတဲ့ အဲဒီ လေယာဉ်တင်သင်္ဘောကြီးဟာ အလျား ၈၆၀ ပေရှိပြီး ကမ္ဘာ့အကြီးဆုံးလေယာဉ်တင်သင်္ဘောတွေထဲမှာ တစ်စီးဖြစ်ကာ နှစ်ပေါင်း ၁၇နှစ်ကြာ တည်ဆောက်မှုနှင့်စမ်းသပ်မှုတွေပြုလုပ်ပြီးနောက် လုပ်ငန်းခွင်ထဲ ဝင်ရောက်တော့မှာဖြစ်ပါတယ်။

၁၉၇၁ ခုနှစ် ဘင်္ဂလားဒေ့ရှ် လွတ်လပ်ရေးစစ်ပွဲအတွင်း ပါကစ္စတန်ရေတပ်ကို ပိတ်ဆို့နိုင်ခဲ့လို့ နာမည်ကြီးခဲ့ပြီး အနားယူသွားတဲ့ လေယာဉ်တင်သင်္ဘောကြီးရဲ့ အမည်ကို အမွေဆက်ခံထားတာလည်းဖြစ်ပါတယ်။

“ ယနေ့မှာ အိုင်အင်န်အက်စ် ဗီကရန့်ဟာ နိုင်ငံကို ယုံကြည်မှုအသစ်တွေနှင့် ဖြည့်ဆည်းပေးလိုက်ပါပြီ။ ဖန်တီးပေးလိုက်ပါပြီ “ လို့ အိန္ဒိယဝန်ကြီးချုပ် နာရင်ဒရာ မိုဒီက  တောင်ပိုင်း ကရာလာပြည်နယ်မှာပြုလုပ်တြ့  သင်္ဘော  တပ်တော်ဝင် အခမ်းအနားမှာ ပြောကြားပါတယ်။

“ ပြည်တွင်းမှာ ဒီလို လေယာဉ်တင်သင်္ဘောတွေ တည်ဆောက်နိုင်တဲ့ အနည်းငယ်သော နိုင်ငံအုပ်စုထဲ ကျွန်တော်တို့ ဝင်ရောက်လိုက်ပါပြီ” လို့လည်းသူကပြောပါတယ်။

အိန္ဒိယရဲ့ တစ်စီးတည်းသော အခြားလေယာဉ်တင်သင်္ဘောရဲ့တိုက်လေယာဉ်တွေမှာ အမှုထမ်းနေသူ ၁၆၀၀ဦးခန့်ကို ယခုလေယာဉ်တင် သင်္ဘောကြီးမှာ တာဝန်ပေးမှာဖြစ်ပါတယ်။

အဲဒီအခြားလေယာဉ်တင်သင်္ဘောကြီးကို အိန္ဒိယရဲ့ အဓိက လက်နက်ရောင်းနိုင်ငံဖြစ်တဲ့  ရုရှားထံမှ တစ်ပတ်ရစ်သင်္ဘောကြီးအဖြစ် အိန္ဒိယက ဝယ်ယူခဲ့တာဖြစ်ပါတယ်။

မိုဒီအစိုးရဟာ နိုင်ငံက နိုင်ငံခြားကနေ စစ်ရေးပစ္စည်းတွေ ဝယ်ယူမှီခိုနေရတာကို ဖြတ်တောက်ဖို့ နည်းလမ်းရှာဖွေခဲ့ပြီး  ပြည်တွင်းဖြစ် ကာကွယ်ရေးပစ္စည်းစက်မှုလုပ်ငန်းတွေကို တည်ဆောက်ခဲ့ပါတယ်။

အခုဆို စစ်သင်္ဘောတွေနှင့် ရေငုပ်သင်္ဘောတွေ အစီးရေ သုံးဒါဇင်ကျော်ကို နိုင်ငံရဲ့ သင်္ဘောကျင်းတွေမှာ တည်ဆောက်နေပါတယ်။

အိန္ဒိယရဲ့ ကိုလိုနီခေတ်က ကျန်ရစ်ခဲ့တဲ့ ဗြိတိသျှကိုလိုနီသရုပ်သကန်တွေမပါတော့ တဲ့ ရေတပ်အလံအသစ်ကိုပါ သောကြာနေ့က စတင်အသုံးပြုပြသခဲ့ပါတယ်။

“ ဒီနေ့ဟာ သမိုင်းဝင်နေ့ဖြစ်တယ်။ ကျွန်တော်တို့ သမိုင်းတစ်ခုလုပ်ခဲ့ကြပြီ။ ကျွန်တော်တို့လက်အောက်ခံဘဝ အမှတ်လက္ခဏာတွေကို ဖယ်ရှားပစ်ခဲ့ပြီ” လို့ လည်း မိုဒီက ပြောပါတယ်။

ရေတပ်အလံသစ်မှာ ယခင်ကပါခဲ့တဲ့ အင်္ဂလန် နိုင်ငံတော်အလံက  စိန့်ဂျော့ကြက်ခြေခတ်နေရာမှာ ဟိန္ဒူစစ်ဘုရင် ချတ်ထရာပါတီ ရှီဗာဂျီရဲ့ တော်ဝင်တံဆိပ်ကို အစားထိုးခဲ့တာဖြစ်ပါတယ်။

Source: AFP

#India
#India_Home_made_aircraft_carrier

#INS_Vikrant

Published 30 Aug 2022

တရုတ်နိုင်ငံ အရှေ့ပိုင်း ကျဲကျန်းပြည်နယ်က စမတ်လယ်ယာတွေဟာ အင်တာနက်အသုံးချနည်းပညာတွေ သုံးတဲ့အတွက် လယ်ယာထွက်ကုန်ထုတ်လုပ်မှုစွမ်းရည်တွေ တိုးတက်မှုရှိနေကြပါတယ်။

ဟိုင်းယန်စီရင်စုကရွာတစ်ရွာမှာ လယ်သမားတွေဟာ သူတို့ရဲ့ အရွယ်အစားအမျိုးမျိုးရှိတဲ့ လယ်ယာတွေကို လွယ်လွယ်ကူကူ စီမံခန့်ခွဲနိုင်ကြပါတယ်။ အဲဒီအထဲမှာ ရှုဟွာလန်လည်း တစ်ယောက်အပါအဝင်ဖြစ်ပါတယ်။

ရှုရဲ့ ၃၃ ဟက်တာရှိတဲ့လယ်ထဲမှာ အင်တာနက်အခြေခံနည်းပညာတွေနှင့် အာရုံခံကိရိယာတွေ တပ်ဆင်ပြီး အပင်တွေ ဖွံ့ဖြိုးကြီးထွားလာတဲ့ ဝန်းကျင်ကို စမ်းသပ်တာ၊သတိပေးတာ၊ခွဲခြမ်းစိတ်ဖြာတာနှင့်ချိန်ညှိတာတွေ ဆောင်ရွက်နေပါတယ်။ အဲဒါကြောင့် ရေနှင့် ဓာတ်မြေဩဇာကို ချွေတာသုံးစွဲနိုင်ပြီး အလုပ်သမားခတွေကိုလည်း သက်သာစေပါတယ်။

ရှုက သတင်းထောက်ကို ပြောပြနေစဉ်မှာပဲ သူ့ရဲ့ ဂရင်းဟောက်စ်ပန်ကာတွေက အလိုလို စတင် လည်ပတ်ပါတော့တယ်။

“ ပန်ကာတွေက အလိုအလျောက်အဖွင့်အပိတ်လုပ်တာ။ အခန်းတွင်း အပူချိန်က ၃၀ ဒီဂရီဆဲဆိယတ်စ်ရောက်ရင် ပန်ကာတွေက အလိုလိုလည်ပတ်လာပြီး ၂၅ ဒီဂရီဆဲဆိယတ်စ်ရောက်တာနှင့် အလိုလိုပြန်ပိတ်သွားတယ်” လို့ ရှုက ပြောပါတယ်။

ထူးခြားတဲ့ သစ်သီးတွေနှင့် ဟင်းသီးဟင်းရွက်တွေအားလုံး ကျွန်တော့် ဂရင်းဟောက်စ်ထဲ တွေ့နိုင်တယ်။  အဲဒါတွေအားလုံးကို အင်တာနက်ရဲ့ အိုင်အိုတီစနစ်နှင့် ဒစ်ဂျစ်တယ်နည်းအရ စီမံထိန်းကျောင်းပေးနေတာဖြစ်တယ် လို့လည်း သူကပြောပါတယ်။

အိုင်အိုတီစနစ်နှင့် ဒီဥယျဉ်ထဲက ယာခင်းတွေအားလုံး စီမံလုပ်ဆောင်နေပါတယ်။ ပန်ကာတွေ၊ရေလိုက်ကာ တွေနှင့် နေကာပိုက်တွေ၊ ပြီးတော့ ဂရင်းဟောက်စ်ရဲ့ အပူချိန်နှင့် စိုထိုင်းဆတွေကို အဲဒီနည်းပညာနှင့် ထိန်းသိမ်းစီမံနေပါတယ်” လို့ သူကဆက်ပြောပါတယ်။

အဲဒီအတွက် ရင်းနှီးမြှပ်နှံစရိတ်ဟာ အမေရိကန်ဒေါ်လာ ၁၆.၃သန်းနှင့်ညီမျှတဲ့ တရုတ်ယွမ်ငွေ ၁၁၃သန်းရှိပြီး သူဟာ ဒစ်ဂျစ်တယ်စမတ်ဂရင်းဟောက်စ်ပေါင်း ၁၉ ခုတည်ဆောက်ထားပါတယ်။ အဲဒီဂရင်းဟောက်စ်တွေက တစ်ခုနှင့်တစ်ခု ချိတ်ဆက်ထားပါတယ်။

“ ကျွန်တော်တို့အပင်တွေကြီးထွားလာတာကို အချိန်နှင့်တပြေးညီစီမံလုပ်ဆာင်နိုင်ပါတယ်။ ရောဂါတွေ၊ပိုးမွှားကောင်တွေနှင့် အမြင့်မားဆုံး ကြီးထွားမှုဝန်းကျင်ရရှိအောင် အမြဲစောင့်ကြည့်နိုင်ကြပါတယ်”လို့လည်းသူကပြောပါတယ်။

“ ပဲနို့နှင့် ကြက်၌တွေကိုအသုံးပြုပြီး အော်ဂဲနစ်မြေဩဇာ ကျွန်တော်တို့လုပ်ပါတယ်။ အဲဒီနောက် အစက်ချစနစ်သုံးပြီး အပင်တွေကို လိုအပ်တဲ့ အဟာရပမာဏကိုတိတိကျကျပေးနိုင်တယ်” လို့ သူကပြောပါတယ်။

အဲဒီဒေသမှာ နည်းပညာအသစ်တွေက လယ်ယာထွက်ကုန်တွေကို ဈေးကွက်မှာ လူကြိုက်များစေပါတယ်။

အလုပ်အများဆုံးရာသီမှာ အလုပ်သမားတွေဟာ ယာထဲနေ့တိုင်းလာပြီး သစ်သီးဝလံဟင်းသီးဟင်းရွက်တွေကို ဖြန့်ဖြူးရောင်းချဖို့ ထုတ်ပိုးကြပါတယ်။ သူတို့ရဲ့ ဝင်ငွေက သတိထားမိစရာဖြစ်လို့ အနီးအနားရွာတွေကလူတော်တော်များများ အလုပ်လုပ်ဖို့ ဆွဲဆောင်ပေးနေပါတယ်။

“ လယ်ယာစိုက်ပျိုးရေး ပုံစံသစ်က လယ်ယာထွက်ကုန်စွမ်းဆောင်ရည်တိုးတက်စေတယ်။ လယ်သမားတွေဟာ သူတို့ရဲ့ လယ်ယာမြေတွေကို အဲသလို ကုမ္ပဏီတွေကို အငှားချပေးတဲ့အတွက် အဲဒီကနေဝင်ငွေရတဲ့အပြင်  အားလပ်တဲ့အချိန်မှာ အဲဒီမှာ ဝင်လုပ်ကိုင်တဲ့အတွက် ပိုက်ဆံတွေပိုရတယ်” လို့ ရွာရဲ့ အရာရှိတစ်ဦးဖြစ်တဲ့ ချေးဟွေးကျားက ပြောပါတယ်။

Source: CCTVPlus

#Smart_farms

#China_modern-agriculture

#Internet-of-the-things