#DailyNews
Published _ 8 November 2022

၁။ ခရမ်းချဉ်သီးဈေး အတက်အကျငြိမ်သက်မှုမရှိဘဲ အရောင်းအေးနေဟုဆိုာ

၂။ မြန်မာ-ထိုင်းနယ်စပ်ကုန်သွယ်ရေး ကန်ဒေါ်လာ သန်း ၄၀၀ ကျော်မြင့်တက်လာ

၃။ အနာကြီးဝေဒနာရှင်များအတွက် စားနပ်ရိက္ခာ၊ ဆေးဝါးနှင့်စောင်များလိုအပ်နေ

၄။ ကမ္ဘာ့အကြီးဆုံးပိုက်အော်ဂင်အား ပြန်လည်ဆန်းသစ်တီထွင်လျက်ရှိး ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group

#Local_News
Published _8 November 2022

ပို့ကုန်ရငွေရဲ့တန်ဘိုး အမေရိကန်ဒေါ်လာ ၆၅ ရာခိုင်နှုန်းကို မြန်မာ့နိုင်ငံခြားကုန်သွယ်မှုဘဏ်မှာ သတ်မှတ်နှုန်းထားအတိုင်းရောင်းချပြီးတဲ့နောက်မှာ အဲဒီ ၆၅ ရာခိုင်နှုန်းကို ရောင်းလို့တဲ့ငွေကို ဘဏ်အကောင့်ထဲကို ထည့်ပေးပေမဲ့ ပြန်ထုတ်တဲ့အခါ တစ်လုံးတစ်ခဲတည်းမပေးဘဲ တစ်ပတ်ကို သိန်းတစ်ရာပဲပေးနေတဲ့ကိစ္စက ပို့ကုန်လုပ်ငန်းရှင်တွေ အကြပ်အတည်း ဖြစ်စေတယ်လို့ ပို့ကုန်လုပ်ငန်းရှင်တွေက ပြောပါတယ်။

#Yangon_Media_Group

#Local_News
Published _ 8 November 2022

ရန်ကုန်တိုင်း၊မရမ်းကုန်းမြို့နယ်ရှိ သမိုင်းခုံးကျော်တံတားပေါ်မှ ယနေ့နိုဝင်ဘာလ ၈ ရက် နံနက်ပိုင်းက အမျိုးသားတစ်ဦးခုန်ချ၍ ထိခိုက်ဒဏ်ရာများရရှိခဲ့ကြောင်း လူမှုကူညီရေးအသင်းများထံမှ သိရှိခဲ့ရသည်။

ယနေ့ နံနက်ပိုင်း ၆ နာရီကျော်ခန့်တွင် မရမ်းကုန်းမြို့နယ်ရှိ အမှတ်(၁)ရပ်ကွက်နှင့်အမှတ်(၂)ရပ်ကွက်အား ဆက်သွယ်ထားသည့် သမိုင်းခုံးကျော်တံတားပေါ်မှ အသက် ၄၀ခန့် အရွယ်ရှိ အမည်၊ နေရပ်လိပ်စာ(စီစစ်ဆဲ)အမျိုးသားတစ်ဦးခုန်ချခဲ့သည့် ဖြစ်စဉ် ဖြစ်ပွားခဲ့သည်ဟု နီးစပ်ရာ ရပ်ကွက်နေပြည်သူများမှ ဆက်သွယ်လာသည့်အတွက် သွားရောက်ကြည့်ရှုခဲ့ကြောင်း ရွှေရောင်သမိုင်း လူမှုကူညီရေးအသင်းရဲ့တာဝန်ရှိသူက YMG ကို ပြောသည်။

"ခုန်ချသွားတာဟုတ်တယ် ရထားလမ်းကိုဖြတ်ဖို့လုပ်ထားတဲ့ ခုံးကျော်တံတားပေါ့ အဲဒီကနေခုန်ချခဲ့တာ ထိခိုက်ဒဏ်ရာရတာတွေရှိတယ် ဘာ့ကြောင့်ခုန်ချတယ်ဆိုတာကတော့ မသိသေးပါဘူး၊ ပြည်သူတွေကစိတ်ပူပြီး ပရဟိတအသင်းတွေဆီဆက်တော့ အဲ့အသင်းတွေက ကျွန်တော်တို့ဆီဆက်သွယ်လာပါတယ်။ အဲတာကြောင့် သွားရောက်ကူညီကယ်ဆယ်ပေးခဲ့ပါတယ်။ အသက်ကတော့ ၄၀ လောက်ရှိပြီလို့ ခန့်မှန်းရပါတယ်။ မိသားစုနဲ့သူ့ရဲ့နေရပ်လိပ်စာ၊ သူ့နာမည်တွေကတော့ အခုထိစုံစမ်းနေဆဲပါ"ဟု သွားရောက်ကူညီပေးခဲ့သည့် လူမှုကူညီရေးအသင်းဖြစ်သည့် ရွှေရောင်သမိုင်းလူမှုကူညီရေးအသင်းရဲ့တာဝန်ရှိသူက ဆိုသည်။

အဆိုပါ ခုံးကျော်တံတားပေါ်မှခုန်ချ၍ ထိခိုက်ဒဏ်ရာရရှိသွားသည့် အမျိုးသားအား လူမှုကူညီရေးအသင်းကားဖြင့် ဆေးကုသမှုခံယူနိုင်ရန် ပို့ဆောင်ပေးခဲ့ကြောင်း သိရသည်။

#ymg/NN
#Yangon_Media_Group

#Local_News
Published_8 November 2022

နိုဝင်ဘာလ ၈ ရက်မှ နိုဝင်ဘာ ၁၃ ရက်အထိ ရန်ကုန်အထိုင်ဈေး အခြေခံလက်ကားရည်ညွှန်းဈေးနှုန်းမှာ စားအုန်းဆီ တစ်ပိဿာကို ၄၃၃၀ ကျပ် သတ်မှတ်ထားပြီး ပြီးခဲ့သည့် တစ်ပါတ်ထက် ၁၀၀ ကျော်မြင့်တက်လာကြောင်း သိရသည်။

ပြီးခဲ့သည့်တစ်ပါတ်တွင် ရန်ကုန်အထိုင်ဈေး စားအုန်းဆီဈေးနှုန်းမှာ တစ်ပိဿာ ၄၂၂၅ ကျပ်ဖြစ်ကြောင်း သိရသည်။

စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ စားသုံးဆီ တင်သွင်းသိုလှောင် ဖြန့်ဖြူးခြင်း လုပ်ငန်းကြီးကြပ်ရေးကော်မတီအနေနဲ့ စားအုန်းဆီအဓိကထုတ်လုပ်တင်ပို့တဲ့ မလေးရှားနိုင်ငံနဲ့ အင်ဒိုနီးရှားနိုင်ငံတို့မှာ ဖြစ်ပေါ်နေတဲ့ FOB ဈေးနှုန်းများကို နေ့စဉ်စောင့်ကြည့်ပြီး သယ်ယူပို့ဆောင်ခ ကုန်ကျစရိတ်များ၊ ဘဏ်စရိတ်များ၊ အခွန်အခများ ထည့်သွင်းတွက်ချက်၍ ပြည်တွင်းဈေးကွက်မှာ ရောင်းဝယ်ဖောက်ကားရမည့် အခြေခံလက်ကား ရည်ညွှန်းဈေးနှုန်းကို ထုတ်ပြန်ပေးနေခြင်းဖြစ်ကြောင်း သိရသည်။

ယင်းအပြင် ပြည်တွင်းဈေးကွက်အတွင်း ဈေးနှုန်းမြှင့်တင်ရောင်းချခြင်း၊ ဈေးကစားရန်ရည်ရွယ်ချက်ဖြင့် သိုလှောင်ခြင်းနှင့် မသမာသည့် လုပ်ဆောင်မှုများ ပြုလုပ်ပါက အရေးကြီး ကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်း သိရသည်။
လက်ရှိဈေးကွက်ထဲတွင် စားအုန်းဆီးဈေးနှုန်းမှာ တစ်ပိဿာ ၆၀၀၀ ဝန်းကျင်အထိ ကျင်းလာပြီး ပြည်တွင်းထုတ် ပဲဆီ၊ နှမ်းဆီဈေးနှုန်းမှာ ဈေးမြင့်တက်နေကြောင်းသိရသည်။

ပြည်တွင်း၌ စားအုန်းဆီသုံးစွဲမှုမှာ တစ်နှစ်လျှင် တန်ချိန်၁၀ သိန်းကျော်အထိရှိသည့်အတွက် နှစ်စဉ်တန်ချိန် ၆ သိန်းမှ ၇ သိန်းကြားကို မလေးရှားနိုင်ငံနှင့် အင်ဒိုနီးရှားနိုင်ငံမှ အဓိထားတင်သွင်းနေရကြောင်း သိရသည်။

#ymg/STH
#Yangon_Media_Group

#Local_News
Published_ 8 November 2022

ရုရှားဖက်ဒရေးရှင်းနိုင်ငံတွင် နှလုံးခွဲစိတ်ကုသမှုသင်တန်းများ၊ အဏုမြူရောင်ခြည်ဖြင့်ရောဂါရှာဖွေကုသရေး သင်တန်းများ၊ ကလေးခွဲစိတ်ကုသမှုသင်တန်းများနှင့်ပတ်သက်၍ မြန်မာနိုင်ငံမှ ဆေးပညာရှင်များစေလွှတ်သင်ကြားနိုင်ရေးကိစ္စရပ်များ ဆွေးနွေးသွားမည်ဖြစ်ကြောင်း ကျန်းမာရေးဝန်ကြီးဌာနမှ သိရသည်၊၊

ကျန်းမာရေးဝန်ကြီးဌာနအနေဖြင့် ရုရှားတက္ကသိုလ်ဖြစ်သည့် Far Eastern Federal University နှင့် ခွဲစိတ်ကုသမှု လုပ်ငန်းပူးပေါင်းဆောင်ရွက်နိုင်ရေး၊ သင်တန်းပေးနိုင်ရေးကိစ္စရပ်များကို ဆွေးနွေးသွားမည်ဖြစ်ကြောင်း သိရသည်၊၊

ရုရှားဖက်ဒရေးရှင်းနိုင်ငံ၊ ဗလာဒီဗော့စတော့ခ်မြို့ရှိ Far Eastern Federal University တွင် ၂၀၂၂ ခုနှစ်၊ နိုဝင်ဘာလ (၉)ရက်နေ့မှ(၁၀)ရက်နေ့ထိပြုလုပ်မည့် ဆေးပညာရပ်ဆိုင်ရာ ပူးပေါင်းဆောင်ရွက်မှုလုပ်ငန်းများဆွေးနွေးပွဲ၌ယင်းအချက်များထည့်သွင်း ဆွေးနွေးသွားမည်ဟု ဆိုသည်၊၊

ယင်းဆွေးနွေးပွဲကို ကျန်းမာရေးဝန်ကြီးဌာန၊ ကျန်းမာရေးလူ့စွမ်းအားအရင်း အမြစ်ဦးစီးဌာနမှ ညွှန်ကြားရေးမှူးချုပ်၊ ဒေါက်တာတင်ထွန်း ဦးဆောင် သောကိုယ်စားလှယ်(၅)ဦးပါ အဖွဲ့တက်ရောက်ရန် သွားရောက်နေပြီဖြစ်သည်၊၊

အဆိုပါ ဆွေးနွေးပွဲတွင် ကျန်းမာရေးဝန်ကြီးဌာန၊ ကျန်းမာရေးလူ့စွမ်းအားအရင်းအမြစ်ဦးစီးဌာနနှင့် ရုရှားဖက်ဒရေးရှင်းနိုင်ငံ၊ ဗလာဒီဗောစတော့ခ်မြို့ရှိ Far Eastern Federal University တို့ အကြား ဆေးပညာရပ်ဆိုင်ရာ ကျန်းမာရေးလူ့စွမ်းအားအရင်းအမြစ်ဖွံ့ဖြိုးတိုးတက်ရေး၊ ဆေးဘက်ဆိုင်ရာခွဲစိတ်ကုသမှုလုပ်ငန်းများ ပူးပေါင်းဆောင်ရွက်နိုင်ရေးနှင့် လေ့ကျင့်သင်တန်းပေးခြင်းများအတွက် နှစ်ဦးနှစ်ဖက်နားလည်မှုစာချွန်လွှာ(MOU) လက်မှတ်ရေးထိုးနိုင်ရေးကိစ္စရပ်များ၊ ရုရှားဖက်ဒရေးရှင်းနိုင်ငံတွင် နှလုံးခွဲစိတ်ကုသမှုသင်တန်းများ၊ အဏုမြူရောင်ခြည်ဖြင့် ရောဂါရှာဖွေကုသရေး သင်တန်းများ၊ ကလေးခွဲစိတ်ကုသမှုသင်တန်းများနှင့်ပတ်သက်၍ မြန်မာနိုင်ငံမှ ဆေးပညာရှင်များ စေလွှတ်သင်ကြားနိုင်ရေးကိစ္စရပ်များ၊ ဝန်ကြီးဌာနရှိ ဆေးတက္ကသိုလ်များနှင့် ဆေးပညာရပ်သင်ကြား ရေးဆိုင်ရာ ပူးပေါင်းဆောင်ရွက်ရေးကိစ္စရပ်များစသည်တို့အား ဆွေးနွေးညှိနှိုင်းကြမည်ဖြစ်ပါသဖြင့် မြန်မာနိုင်ငံ၏ ကျန်းမာရေးလူ့စွမ်းအားအရင်းအမြစ်ဖွံ့ဖြိုးတိုးတက်ရေးနှင့် ဆေးပညာရပ်ဆိုင်ရာ ခွဲစိတ် ကုသမှုနည်းပညာများ ဖွံ့ဖြိုးတိုးတက်ရေးအတွက် အထောက်အကူပြုမည်ဖြစ်ပြီး နှစ်နိုင်ငံဆေးဘက် ဆိုင်ရာ ပူးပေါင်းဆောင်ရွက်မှုကိစ္စရပ်များ ပိုမိုကျယ်ပြန့်နက်ရှိုင်းစွာ ဆောင်ရွက်နိုင်မည်ဖြစ်ကြောင်း သိရသည်။

#ymg/tthl
#Yangon_Media_Group

#Local_News
Published_8 November 2022

ရန်ကုန်တိုင်းဒေသကြီးအတွင်း ယာဉ်ကြောကျပ်တည်းမှုမရှိစေရန်အတွက် အချက်အချာကျသည့် ဘတ်စ်ကားမှတ်တိုင်များတွင် YBS ယာဉ်တွေအနေဖြင့် ယာဉ်နှစ်ထပ်ရပ်ခြင်းမရှိစေရန် Pilot Project စတင်ဆောင်ရွက်နေပြီဖြစ်ကြောင်း YRTC မှ တွဲဖက်အတွင်းရေးမှူး ဦးလျန်ကျင့်မန်က ပြောသည်။

အဆိုပါ Pilot Project ကိုလူစည်ကားရာနေရာတွေဖြစ်သည့် မှတ်တိုင် ၁၆ ခုကိုရွေးချယ်ဆောင်ရွက်နေပြီး စမ်းသပ်ကာလပြီးမြောက်ပါက ဆက်လက်ဆောင်ရွက်သွားမည်ဖြစ်ကြောင်း သိရသည်။

ကနဦးတွင် စော်ဘွားကြီးကုန်း(ပြည်လမ်း)၊ မြေနီကုန်းမှတ်တိုင်(ဗားဂရာလမ်း)၊ မဟာမြိုင်မှတ်တိုင်(ပြည်လမ်း)၊ ၈ မိုင်မှတ်တိုင်(ကမ္ဘာအေးဘုရားလမ်း)၊ ၆ ကွေ့မှတ်တိုင်(သုဓမ္မာလမ်း)၊ ယုဇနပလာဇာမှတ်တိုင်(ဗညားဒလလမ်း)၊ သမိုင်းလမ်းဆုံမှတ်တိုင်(အင်းစိန်းလမ်း) အပါအဝင် ဘတ်စ်ကားမှတ်တိုင် ၁၆ ခုကို ဆောင်ရွက်နေကြောင်း သိရသည်။

YBS ယာဉ်များ နှစ်ထပ်ရပ်ခြင်းအပါအဝင် ဘတ်စ်ကားမှတ်တိုင်အတွင်း အငှားယာဉ်များနှင့် ကိုယ်ပိုင်ယာဉ်များ ရပ်နားခြင်းမရှိစေရန် ပညာပေးကာလအဖြစ်ဆောင်ရွက်ပြီး နောက်ပိုင်းတွင် သက်ဆိုင်ရာအဖွဲ့အစည်းများနှင့် ပူးပေါင်း၍ အရေးယူဆောင်ရွက်မည်ဖြစ်ကြောင်းသိရသည်။

#ymg/sth
#Yangon_Media_Group