#Local_News
Published 20 October 2026

■ စက်ရုံမှထွက်ရှိသော အထည်များကို Made in Myanmar ဖြင့် Export တင်ပို့ပြီး နိုင်ငံခြားဝင်ငွေရရှိရေးသည် အရေးကြီးသည့်အတွက် အရည်အသွေးကောင်းမွန်မှုရှိစေရေး စနစ်တကျ စစ်ဆေးဆောင်ရွက်သွားရန် သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန ပြည်ထောင်စုဝန်ကြီး ဦးမျိုးဇော်သိမ်းက ပြောသည်။

■ ယမန်နေ့နံနက်ပိုင်းက အင်းစိန်မြို့နယ် သီရိစန္ဒာအထည်ချုပ်နှင့် အထွေထွေရောင်းဝယ်ရေး သမဝါယမအသင်းလီမိတက်၏ အထည်ချုပ်စက်ရုံကို သွားရောက်ကြည့်ရှုစစ်ဆေးစဉ် စက်ရုံတာဝန်ရှိသူများအား မှာကြားခဲ့ခြင်းဖြစ်သည်။

■ ထို့ပြင် နိုင်ငံတော်အစိုးရအနေဖြင့် ပြည်ပမှ ချည်ဝယ်ယူတင်သွင်းမှုကို လျှော့ချနိုင်ရေး၊ နိုင်ငံခြားငွေ သုံးစွဲမှုလျှော့ချနိုင်ရေး စီစဉ်ဆောင်ရွက်လျက်ရှိကြောင်း၊ အထည်ချုပ်စက်ရုံများအတွက် လိုအပ်သောချည်ထည်နှင့် ကုန်ကြမ်းများရရှိရေးနှင့် ဝါစက်ရုံ၊ ချည်စက်ရုံများနှင့် ချိတ်ဆက်ဆောင်ရွက်ပေးမည်ဖြစ်ကြောင်း၊ အထည်ချုပ်လုပ်ငန်းများ ပုံမှန်လည်ပတ်နိုင်မှသာ စက်ရုံအပေါ် မှီခိုနေသည့်အလုပ်သမား ၇၀၀ ကျော် အလုပ်အကိုင်များ ရရှိမည်ဖြစ်သကဲ့သို့ ကုန်ထုတ်လုပ်မှုများလည်း အဆင်ပြေမည်ဖြစ်ကြောင်းပြောကြားသည်။

■ ထိုသို့သွားရောက်စဉ် စက်ရုံတာဝန်ရှိသူများက စက်ရုံအနေဖြင့် အထည်ချုပ်အလုပ်သမားဦးရေ ၇၀၀ ကျော်ဖြင့် နေ့စဉ်လည်ပတ်ထုတ်လုပ်နိုင်မှု၊ ဂျပန်နိုင်ငံနှင့် ဥရောပနိုင်ငံများသို့ Export တင်ပို့နိုင်မှုအခြေအနေကို ရှင်းလင်းတင်ပြမှုအပေါ် ပြည်ထောင်စုဝန်ကြီးက လိုအပ်သည်များ ပေါင်းစပ်ညှိနှိုင်းဆောင်ရွက်ပေးခဲ့ကြောင်း သိရသည်။

#YMG/NN #Yangon_Times

#Local_News
Published 20 October 2026

■ မြန်မာ–ထိုင်း နှစ်နိုင်ငံအကြား စွမ်းအင်ဆိုင်ရာ ပူးပေါင်းဆောင်ရွက်မှုများ ပိုမိုမြှင့်တင်ရေးနှင့် သဘာဝဘေးအန္တရာယ် ကြိုတင်ကာကွယ်ရေးလုပ်ငန်းများ ပူးပေါင်းဆောင်ရွက်ရေးတို့ကို နိုင်ငံတော်သမ္မတ ဦးမင်းအောင်လှိုင်နှင့် ထိုင်းနိုင်ငံ စွမ်းအင်ဝန်ကြီး Mr. Akanat Promphan တို့ ယနေ့နံနက်ပိုင်း နိုင်ငံတော်သမ္မတ၏ ဧည့်ဆောင်တော်၌ တွေ့ဆုံဆွေးနွေးခဲ့ကြသည်။

■ တွေ့ဆုံပွဲတွင် အိမ်နီးချင်းမိတ်ဆွေနိုင်ငံများဖြစ်သည့် မြန်မာနှင့် ထိုင်းတို့အကြား ချစ်ကြည်ရင်းနှီးမှုနှင့် ပူးပေါင်းဆောင်ရွက်မှုတိုးတက်လာသည့် အခြေအနေများ၊ နိုင်ငံတော်သမ္မတ၏ ထိုင်းနိုင်ငံချစ်ကြည်ရေးခရီးစဉ်အတွင်း ဆွေးနွေးခဲ့သည့် နှစ်နိုင်ငံပူးပေါင်းဆောင်ရွက်ရေးကိစ္စရပ်များကို ဆွေးနွေးခဲ့ကြသည်။

■ ထို့ပြင် ရာသီဥတုဖောက်ပြန်မှုကြောင့် ဖြစ်ပေါ်လာနိုင်သည့် သဘာဝဘေးအန္တရာယ်များကို ကြိုတင်ကာကွယ်နိုင်ရေး ပူးပေါင်းဆောင်ရွက်မည့် အခြေအနေများကိုလည်း ဆွေးနွေးခဲ့ကြသည်။

■ တွေ့ဆုံပွဲသို့ ပြည်ထောင်စုဝန်ကြီးများဖြစ်ကြသည့် ဦးခင်မောင်ရီ၊ ဦးတင်မောင်ဆွေ၊ ဦးကိုကိုလွင်နှင့် တာဝန်ရှိသူများ တက်ရောက်ကြပြီး ထိုင်းစွမ်းအင်ဝန်ကြီးနှင့်အတူ မြန်မာနိုင်ငံဆိုင်ရာ ထိုင်းသံအမတ်ကြီး Mr. Tor Saralamba နှင့် တာဝန်ရှိသူများ တက်ရောက်ခဲ့ကြသည်။

#YMG #Yangon_Times #Yangon_Media_Group

#Local_News
Published 19 October 2026

■ ဧရာဝတီတိုင်းဒေသကြီးအစိုးရအဖွဲ့၏စီစဉ်မှုဖြင့် တိုင်းဒေသကြီးအတွင်းရှိ
ရေဘေးသင့်ပြည်သူများ၏ စိတ်ခွန်အားပြန်လည်မြှင့်တင်နိုင်ရေး မြို့ရွှေမန်းသားဖိုးချစ် ဇာတ်အလှသဘင်မှ လေးမျက်နှာမြို့နယ်နှင့် ငါးသိုင်းချောင်းမြို့တို့တွင် နိုဝင်ဘာလဆန်း၌ လေးညတိုင်တိုင် ကပြဖျော်ဖြေမည်ဖြစ်ကြောင်းသိရသည်။

■ အဆိုပါ ဧရာဝတီတိုင်းဒေသကြီးအတွင်း ၂၀၂၆ ခုနှစ်၊ ဇူလိုင်လနှောင်းပိုင်းတွင် မိုးသည်းထန်စွာ ရွာသွန်းမှုများနှင့်အတူ မြစ်ရေမြင့်တက်လာမှုများကြောင့် ဟင်္သာတခရိုင်၊ လေးမျက်နှာမြို့နယ်၊ ငဝန်တာ၏ အောက်ခံမြစ်ကျိုးအင်းသဲကြောမှ ထူးပေါက်၍ ရေဖြတ်သန်းစီးဆင်းပြီး တာတမံ နိမ့်ကျမှုဖြစ်ပွားကာ ရေကျော်စီးဝင်ခဲ့သဖြင့် ရပ်ကွက်/ ကျေးရွာများအတွင်းသို့ ရေဝင်ရောက်မှု များဖြစ်ပွားခဲ့ကာ ဒေသခံပြည်သူများအနေဖြင့် ရေလွတ်ရာနေရာများနှင့် ကယ်ဆယ်ရေးစခန်း များသို့ ၂ လနီးပါး ရွှေ့ပြောင်းနေထိုင်ခဲ့ရပြီး ယခုအခါ ၎င်းတို့၏နေအိမ်များတွင် ပြန်လည် နေထိုင်လျက်ရှိကြပြီ ဖြစ်သည်။

■ ယင်း ရေဘေးသင့်ခဲ့ရသည့်ဒေသများရှိ ပြည်သူများ၏ စိတ်ခွန်အားပြန်လည် မြှင့်တင်နိုင်ရေးအတွက် တိုင်းဒေသကြီးအစိုးရအဖွဲ့၏စီစဉ်မှုဖြင့် မြို့ရွှေမန်းသားဖိုးချစ် ဇာတ်အလှသဘင်ကို နိုဝင်ဘာလ ၁ ရက်နေ့နှင့် ၂ ရက်နေ့ များတွင် လေးမျက်နှာမြို့၊ အမှတ် ၁ ရပ်ကွက်၊ သံသရာငြိမ်းအေး စတုမုခဇေယျသိဒ္ဓိ စေတီတော်မြတ်ကြီး ဘုရားဝန်းအတွင်း၌ လည်းကောင်း၊ နိုဝင်ဘာလ ၃ ရက်နေ့နှင့် ၄ ရက်နေ့များတွင် ငါးသိုင်းချောင်းမြို့၊ ဘောလုံး ကွင်းတွင် လည်းကောင်း၊ ၄ ညတိုင်တိုင် မိုးလင်းပေါက် တင်ဆက်ကပြဖျော်ဖြေပေးသွားမည် ဖြစ်ကြောင်း သိရသည်။

#YMG/NN #Yangon_Times

#Local_News
Published 18 October 2026

■ ကျပ် ၅၀,၀၀၀ တန် ငွေစက္ကူသစ် ထုတ်ဝေမည်ဆိုသည့် သတင်းများသည် မမှန်ကန်ကြောင်း မြန်မာနိုင်ငံတော်ဗဟိုဘဏ်က အောက်တိုဘာ ၁၈ ရက်တွင်ထုတ်ပြန်ထားသည်။

■ လက်ရှိတွင် လူမှုကွန်ရက်စာမျက်နှာများနှင့် အင်တာနက်ဝက်ဘ်ဆိုက်များ၌ ကျပ် ၅၀,၀၀၀ တန် ငွေစက္ကူသစ် ထုတ်ဝေမည်ဆိုသည့် သတင်းများ ပျံ့နှံ့နေသော်လည်း ယင်းသတင်းများမှာ မှန်ကန်မှုမရှိကြောင်းနှင့် ငွေစက္ကူသစ်ထုတ်ဝေရန် အစီအစဉ်မရှိကြောင်း ဗဟိုဘဏ်က အသိပေးထားသည်။

■ ဗဟိုဘဏ်၏ အဓိကရည်မှန်းချက်မှာ ပြည်တွင်းဈေးနှုန်းတည်ငြိမ်မှုရရှိစေရန်နှင့် ထိန်းသိမ်းရန်ဖြစ်ပြီး ငွေကြေးတည်ငြိမ်ရေးနှင့် ငွေကြေးစနစ်တည်ငြိမ်ရေးအတွက်ဆောင်ရွက်လျက်ရှိကြောင်းလည်း ထုတ်ပြန်ချက်တွင်ဖော်ပြထားသည်။

■ ထို့ပြင် အများပြည်သူ၏ အကျိုးစီးပွားကို ထိခိုက်စေပြီး ဈေးနှုန်းမတည်ငြိမ်မှု ဖြစ်ပေါ်စေနိုင်သည့် သတင်းမှားများ ဖြန့်ဝေသူများကို ဥပဒေပြဋ္ဌာန်းချက်များနှင့်အညီ ဖော်ထုတ်အရေးယူကာ ထိရောက်သော ပြစ်ဒဏ်များချမှတ်နိုင်ရေးအတွက် တရားဥပဒေစိုးမိုးရေးအဖွဲ့အစည်းများနှင့် ပူးပေါင်းဆောင်ရွက်လျက်ရှိကြောင်း ဗဟိုဘဏ်ကအသိပေးထုတ်ပြန်ထားသည်။

#YMG/SW #Yangon_Times

မန္တလေးတိုင်းဒေသကြီး၊ ကျောက်ဆည်မြို့မှာရိုးရာဆင်အကအလှပြိုင်ပွဲကိုအောက်တိုဘာ ၂၅ ရက်တွင်ကျင်းပသွားမယ်လို့ဆင်အကအလှပြိုင်ပွဲ ကော်မတီကသိရပါတယ် ။

#Local_News
Published 18 October 2026
#ကျောက်ဆည်မြို့ #ဆင်အကအလှပြိုင်ပွဲ
#YMG/NN #Yangon_Times

#Local_News
Published 17 October 2026

■ လူမှုကွန်ရက်စာမျက်နှာများနှင့် အွန်လိုင်းမီဒီယာအချို့တွင် ကျပ် ၅၀,၀၀၀ တန် ငွေစက္ကူအသစ်များ ထုတ်ဝေသွားမည်ဆိုသည့် သတင်းများ ပျံ့နှံ့နေသော်လည်း အဆိုပါသတင်းမှာ သတင်းအမှားသာဖြစ်ကြောင်း နိုင်ငံတော်သမ္မတရုံးမှ ထုတ်ပြန်ထားချက်အရသိရသည်။

■ ထို့ကြောင့် ပြည်သူများအနေဖြင့် ငွေကြေးဆိုင်ရာ သတင်းအချက်အလက်များကို ယုံကြည်စိတ်ချရသည့် သတင်းရင်းမြစ်များမှတစ်ဆင့် စိစစ်အတည်ပြုရန်လိုအပ်ကြောင်း တိုက်တွန်းထားသည်။

■ အထူးသဖြင့် ငွေစက္ကူအသစ်များ ထုတ်ဝေမည့်ကိစ္စနှင့်ပတ်သက်၍ မြန်မာနိုင်ငံတော်ဗဟိုဘဏ်နှင့် သက်ဆိုင်ရာ တရားဝင်ဌာနများ၏ ထုတ်ပြန်ချက်များကိုသာ အခြေခံစိစစ်ကြရန်နှင့် သတင်းအမှားများကြောင့် မလိုလားအပ်သည့် စိုးရိမ်ပူပန်မှုများ မဖြစ်ပေါ်စေရေး ပူးပေါင်းဆောင်ရွက်ကြရန် တိုက်တွန်းထားသည်။

#YMG/SW #Yangon_Times