#Local_News
Published 20 August 2026

■ ၂၀၂၆-၂၇ မြန်မာနေရှင်နယ်လိဂ် အမှတ်ပေးဘောလုံးပြိုင်ပွဲအတွက် ပထမအကျော့ ပွဲစဉ်ဇယားကို ပြိုင်ပွဲဝင်အသင်းများနှင့် ညှိနှိုင်းဆွေးနွေးမှုအရ မြန်မာနေရှင်နယ်လိဂ် ပြိုင်ပွဲကျင်းပရေးမှ ထုတ်ပြန်လိုက်ပြီ ဖြစ်ကြောင်း သိရသည်။

■ အဆိုပါ ၂၀၂၆-၂၇ မြန်မာနေရှင်နယ်လိဂ် အမှတ်ပေးဘောလုံးပြိုင်ပွဲကို ဩဂုတ် ၂၈ ရက်နေ့တွင် စတင်ကျင်းပသွားမည်ဖြစ်ပြီးအသင်းပေါင်း (၁၂) သင်း ပါဝင်ယှဉ်ပြိုင်ကြမည် ဖြစ်သည်။

■ ၂၀၂၆-၂၇ မြန်မာနေရှင်နယ်လိဂ် ပြိုင်ပွဲ ပထမအကျော့ကို ဩဂုတ် ၂၈ ရက်မှ ဒီဇင်ဘာ ၂၁ ရက်အထိ ရန်ကုန်မြို့ သုဝဏ္ဏကွင်း၊ YUSC ကွင်း၊ သီဟဒီပကွင်း၊ ပဒေသာကွင်း၊ မန္တလေးမြို့ရှိ ဗထူးကွင်း၊ ပဲခူးမြို့ရှိ Grand Royal ကွင်း၊ တောင်ကြီးမြို့ရှိ ပြည်နယ်အားကစားကွင်းနှင့် ပုသိမ်မြို့ရှိ ကျောက်တိုင်အားကစားကွင်းတို့၌ ကျင်းပသွားမည်ဖြစ်သည်။

■ အဆိုပါ ပွဲစဉ်ဇယားထုတ်ပြန်ရာတွင် လက်ရွေးစင်အသင်း၏ နိုင်ငံတကာပွဲစဉ်များ၊ AFC, AFF
ကလပ်အသင်းပြိုင်ပွဲများ၊ အိမ်ကွင်း၊အဝေးကွင်း သွားရောက်ကစားရမည့်အခြေအနေများနှင့် ရုပ်သံရိုက်ကူးထုတ်လွှင့်မှုအပိုင်းတို့တွင် အဆင်ပြေစေရန် ဆွေးနွေးညှိနှိုင်းမှုများ ပြုလုပ်ကာ ထုတ်ပြန်ခဲ့ခြင်းဖြစ်ကြောင်းသိရသည်။

#YMG/NN #Yangon_Times

#Local_News
Published 20 August 2026
 
■ ရှမ်းပြည်နယ် (မြောက်ပိုင်း) နောင်ချိုမြို့နယ် ဘန့်ဘွေးဘိနယ်စခန်းရှိ လိပ်ကယ်ဆယ်ရေးစခန်း(ဘန့်ဘွေး)တွင် တရားမဝင်ကုန်သွယ်မှုပြုလုပ်ရာမှ ဖမ်းဆီးရမိသည့် လိပ်မျိုးစိတ်များအား ထိန်းသိမ်းစောင့်ရှောက်လျက်ရှိပြီး လက်ရှိတွင် လိပ်ကောင်ရေ ၆၃၂ ကောင်ကို ထိန်းသိမ်းထားရှိကြောင်း သယံဇာတနှင့်သဘာဝပတ်ဝန်းကျင်ထိန်းသိမ်းရေးဝန်ကြီးဌာနမှ သိရသည်။
 
■ အဆိုပါ လိပ်ကယ်ဆယ်ရေးစခန်း(ဘန့်ဘွေး)၌ လိပ်များအား မျိုးစိတ်အလိုက် ထိန်းသိမ်းစောင့်ရှောက် မွေးမြူထားမှုကို သယံဇာတနှင့်သဘာဝပတ်ဝန်း ကျင်ထိန်းသိမ်းရေးဝန်ကြီးဌာန ပြည်ထောင်စုဝန်ကြီး ဦးဆန်းဦးသည် ဩဂုတ် ၁၈ ရက်နေ့ နံနက်ပိုင်းကသွားရောက်ကြည့်ရှုစစ်ဆေးသည်။
 
■ ထို့ပြင် မေမြို့ထင်းကြိုးဝိုင်းတွင် မြို့အထူးစိမ်းလန်းစိုပြည်ရေးအတွက် ယခုနှစ်တွင် သစ်တောစိုက်ခင်း ဧက ၂၇၀ တည်ထောင်ထားရှိမှုနှင့် သစ်ပင်စိုက်ပျိုးထားသည့်အခြေအနေကို ကြည့်ရှုစစ်ဆေးသည်။
 
■ မွန်းလွဲပိုင်းတွင် ပြင်ဦးလွင်မြို့ရှိ မြန်မာနိုင်ငံသစ်တောကျောင်း၌ ဝန်ကြီးဌာနအောက်မှ ဝန်ထမ်းများကို သွားရောက်တွေ့ဆုံအမှာစကားပြောကြားပြီး မြန်မာနိုင်ငံသစ်တောကျောင်းဝင်းအတွင်း စာသင်ဆောင်၊ သင်တန်းသား အိပ်ဆောင်နှင့် စုဝေးခန်းမတည်ဆောက်မည့်နေရာနှင့် မြန်မာနိုင်ငံ မြေတိုင်းသင်တန်းကျောင်းတို့ကို သွားရောက်ကြည့်ရှုစစ်ဆေးခဲ့ကြောင်း သိရသည်။
 
#YMG/NN #Yangon_Times

#Local_News
Published 20 August 2026

■ လယ်ဝေးမူလတန်းကြိုကျောင်း ဆောက်လုပ်ရေးစီမံကိန်းကို ၂၀၂၆-၂၀၂၇ ဘဏ္ဍာနှစ်အတွင်း အိန္ဒိယနိုင်ငံအစိုးရ၏ ထောက်ပံ့ငွေ ကျပ် ၁၀၉၁ ဒသမ ၄၇၅ သန်းဖြင့် အကောင်အထည်ဖော် ဆောက်လုပ်သွားမည်ဖြစ်ကြောင်း သိရသည်။

■ အဆိုပါစီမံကိန်းတွင် ပေ ၉၀ x ၃၀ x ၂၄ အရွယ်အစားရှိ Steel Structure နှစ်ထပ်အဆောက်အအုံ ၂ လုံး ဆောက်လုပ်သွားမည်ဖြစ်သည်။

■ လယ်ဝေးမူလတန်းကြိုကျောင်း ဆောက်လုပ်ရေးစီမံကိန်း ပန္နက်ရိုက်အခမ်းအနားကို ယမန်နေ့နံနက်ပိုင်းက အိန္ဒိယ-မြန်မာ ပူးပေါင်းဆောင်ရွက်မှုအစီအစဉ်အရ ကျင်းပခဲ့ပြီး ဒုတိယဝန်ကြီး ဒေါက်တာသန့်ဇော်လွင်က အိန္ဒိယအစိုးရနှင့် ပြည်သူများအား ကျေးဇူးတင်ရှိကြောင်းနှင့် နှစ်နိုင်ငံချစ်ကြည်ရေး ရေရှည်တည်တံ့ခိုင်မြဲစေရန် ဆုတောင်းမေတ္တာပို့သကြောင်း ပြောကြားခဲ့သည်။

■ ထို့အပြင် မြန်မာနိုင်ငံဆိုင်ရာ အိန္ဒိယနိုင်ငံသံအမတ်ကြီးက စီမံကိန်းအတွက် အကူအညီပေးရေးအစီအစဉ်များကို ရှင်းလင်းပြောကြားပြီး ကလေးငယ်များ၏ ရေရှည်ဖွံ့ဖြိုးတိုးတက်ရေးအတွက် နှစ်နိုင်ငံ ပူးပေါင်းဆောင်ရွက်သွားမည်ဖြစ်ကြောင်း ပြောကြားခဲ့သည်။

■ ယင်းနောက် ဒုတိယဝန်ကြီး၊ အိန္ဒိယနိုင်ငံသံအမတ်ကြီးနှင့် အခမ်းအနားတက်ရောက်သူများက ကျောင်းဆောက်လုပ်မည့်နေရာ၌ ပန္နက်ရိုက်ခြင်းနှင့် အမွှေးနံ့သာရည်များ ပက်ဖျန်းခြင်းများ ဆောင်ရွက်ခဲ့ကြောင်း သိရသည်။

#YMG/SW #Yangon_Times

#Local_News
Published 20 August 2026

■ တနင်္သာရီတိုင်းဒေသကြီး၊ ထားဝယ်မြို့အနီး မြန်မာ့ပင်လယ်ပြင်တွင် Tri Star 3 အမည်ရှိ ခရီးသည်တင်အမြန်ရေယာဉ် ရေဝင်နစ်မြုပ်မှုဖြစ်ပွားခဲ့ပြီး ရေယာဉ်ပေါ်ပါ လူ ၂၀ ဦးကို ကယ်ဆယ်နိုင်ခဲ့ကြောင်း သိရသည်။

■ မီးပြကျွန်း၏ အရှေ့ဘက် ရေမိုင် ၀ ဒသမ ၄ မိုင်ခန့်အကွာတွင် အဆိုပါရေယာဉ် ရေဝင်နစ်မြုပ်နေကြောင်း ဒေသခံများ၏ သတင်းပေးပို့ချက်အရ လုံခြုံရေးဆောင်ရွက်နေသည့် တပ်မတော်(ရေ)မှ တပ်ဖွဲ့ဝင်များက ရှာဖွေကယ်ဆယ်ရေးလုပ်ငန်းများ သွားရောက်ဆောင်ရွက်ခဲ့ခြင်းဖြစ်‌ကြောင်း သိရသည်။

■ ယမန်နေ့ နံနက် ၁၁ နာရီ ၄၅ မိနစ်ခန့်တွင် ရေဝင်နစ်မြုပ်နေသည့် ရေယာဉ်ကို တွေ့ရှိခဲ့ပြီး ရေယာဉ်အမှုထမ်း ၁ ဦးနှင့် ခရီးသည် ၁၉ ဦး စုစုပေါင်း ၂၀ ဦးကို စစ်ရေယာဉ်ပေါ်သို့ တင်ဆောင်ကယ်ဆယ်ခဲ့ကြောင်း သိရသည်။

■ ကယ်ဆယ်ခဲ့သူများအား လိုအပ်သည့် ကျန်းမာရေးစစ်ဆေးမှုများ ဆောင်ရွက်ပေးခဲ့ပြီး အဝတ်အထည်နှင့် စားသောက်ဖွယ်ရာများ ထောက်ပံ့ပေးကာ သက်ဆိုင်ရာတာဝန်ရှိသူများထံ စနစ်တကျ လွှဲပြောင်းပေးအပ်ခဲ့ကြောင်း သိရသည်။

#YMG/SW #Yangon_Times

#Local_News
Published 20 August 2026

■ စင်ကာပူနိုင်ငံတွင် နေထိုင်အလုပ်လုပ်ကိုင်နေသည့် မြန်မာနိုင်ငံသားများ နိုင်ငံကူးလက်မှတ်ဆိုင်ရာ ဝန်ဆောင်မှုများ လျှောက်ထားရာတွင် အဆင်ပြေစေရေးအတွက် လိုက်နာရမည့် လုပ်ထုံးလုပ်နည်းများကို စင်ကာပူနိုင်ငံဆိုင်ရာ မြန်မာသံရုံးက ယနေ့ (ဩဂုတ်လ၁၉ရက်)တွင်အသိပေးထုတ်ပြန်ထားသည်။

■ အဆိုပါအသိပေးချက်အရ PJ အမျိုးအစား နိုင်ငံကူးလက်မှတ် လျှောက်ထားသူများနှင့် PJ အမျိုးအစား နိုင်ငံကူးလက်မှတ်ကိုင်ဆောင်ထားပြီး သက်တမ်းတိုးလိုသူများအနေဖြင့် သက်ဆိုင်ရာ အထောက်အထားစာရွက်စာတမ်းများနှင့်အတူ လျှောက်ထားနိုင်ကြောင်း သိရသည်။

■ ထို့အပြင် PR အမျိုးအစား နိုင်ငံကူးလက်မှတ် လျှောက်ထားသူများအတွက်လည်း သက်ဆိုင်ရာ အထောက်အထားများ တင်ပြရမည်ဖြစ်ပြီး နိုင်ငံကူးလက်မှတ်ဆိုင်ရာ လျှောက်ထားမှုများကို သတ်မှတ်ထားသည့် လုပ်ငန်းစဉ်အတိုင်း ဆောင်ရွက်ရမည်ဖြစ်သည်။

■ PE အမျိုးအစား လျှောက်ထားသူများအနေဖြင့် သက်ဆိုင်ရာ Form ကို ဖြည့်စွက်၍ နိုင်ငံကူးလက်မှတ်၊ ဗီဇာနှင့် စင်ကာပူနိုင်ငံတွင် နေထိုင်ခွင့် Student Pass စသည့် အထောက်အထားများကို ပူးတွဲတင်ပြရမည်ဖြစ်သည်။

■ PT အမျိုးအစား လျှောက်ထားသူများအနေဖြင့်လည်း Form နှင့်အတူ နိုင်ငံကူးလက်မှတ်၊ စင်ကာပူနိုင်ငံတွင် နေထိုင်ခွင့်အထောက်အထားများ၊ PR၊ LTVP၊ Dependent Pass စသည့် သက်ဆိုင်ရာ စာရွက်စာတမ်းများကို တင်ပြရမည်ဖြစ်ပြီး အထောက်အထားများကို PDF ဖိုင်အဖြစ် ပေးပို့ရမည်ဖြစ်သည်။

■ PS အမျိုးအစား လျှောက်ထားသူများအတွက်လည်း သက်ဆိုင်ရာ Form နှင့် နိုင်ငံကူးလက်မှတ်၊ PR/SP/EP/WP စသည့် နေထိုင်ခွင့်အထောက်အထားများ၊ Seafarer's Identification and Record Book နှင့် Myanmar Seafarer's Certificates တို့ကို ပူးတွဲတင်ပြရမည်ဖြစ်ကြောင်း အသိပေးထားသည်။

■ နိုင်ငံကူးလက်မှတ်ဆိုင်ရာ စာရွက်စာတမ်းများကို သက်ဆိုင်ရာ Facebook နှင့် Website များတွင် လွှင့်တင်ပေးထားမည်ဖြစ်သဖြင့် လျှောက်ထားသူများအနေဖြင့် ကြိုတင်စစ်ဆေးနိုင်ကြောင်း သိရသည်။

■ ထို့အပြင် မေးမြန်းစုံစမ်းလိုသည့် လျှောက်ထားသူများအနေဖြင့် သတ်မှတ်ထားသည့် ဆက်သွယ်ရန်လမ်းကြောင်းများမှတစ်ဆင့် ဆက်သွယ်မေးမြန်းနိုင်ပြီး Walk-in လာရောက်လျှောက်ထားခြင်းကို လက်ခံဆောင်ရွက်ပေးမည်မဟုတ်ကြောင်း သံရုံးက အသိပေးထားသည်။

■ နိုင်ငံကူးလက်မှတ်ဆိုင်ရာ အရေးပေါ်ကိစ္စများနှင့် ကောင်စစ်ဝန်ဆိုင်ရာ မေးမြန်းမှုများအတွက် This email address is being protected from spambots. You need JavaScript enabled to view it. သို့ အီးမေးလ်ပေးပို့ ဆက်သွယ်နိုင်ကြောင်း သိရသည်။

■ အဆိုပါစနစ်အရ လျှောက်ထားသူများအနေဖြင့် လိုအပ်သည့် အထောက်အထားစာရွက်စာတမ်းများကို ပြည့်စုံစွာပြင်ဆင်ပြီး သတ်မှတ်ထားသည့် လုပ်ငန်းစဉ်အတိုင်း လျှောက်ထားရန် မြန်မာသံရုံးက အသိပေးထားသည်။

#YMG/SW #Yangon_Times

#Local_News
Published_ 20 August 2026

■ တပ်မတော်ကာကွယ်ရေးဦးစီးချုပ် ဗိုလ်ချုပ်ကြီး ရဲဝင်းဦးသည် ထိုင်းဘုရင့်တပ်မတော်ကာကွယ်ရေး ဦးစီးချုပ်ရုံးဧည့်ခန်းမတွင် ထိုင်းဘုရင့်တပ်မတော် ကာကွယ်ရေးဦးစီးချုပ်နှင့် တွေ့ဆုံဆွေးနွေးခဲ့ကြောင်း သတင်းရရှိပါတယ်။
 
■ ထိုသို့တွေ့ဆုံဆွေးနွေးရာတွင် မြန်မာနိုင်ငံနှင့် ထိုင်းနိုင်ငံတို့သည် ရှည်လျားသည့် သမိုင်းကြောင်းရှိပြီး အိမ်နီးချင်းကောင်း၊ မိတ်ဆွေကောင်းနိုင်ငံများဖြစ်မှု၊ နှစ်နိုင်ငံအကြား သဘောတူညီချက်များအား ဆက်လက်အကောင်အထည်ဖော်နိုင်ရေး ဆောင်ရွက်လျက်ရှိမှုနှင့် ပူးပေါင်းဆောင်ရွက်မှုများ တိုးတက်ကောင်းမွန်နေစေရေး ဆက်လက်ဆောင်ရွက်သွားမည့် အခြေအနေများ၊ နှစ်နိုင်ငံနယ်စပ်ဒေသကုန်သွယ်မှုများ ပြန်လည်ကောင်းမွန်ရေးအတွက် နယ်စပ်ဒေသတည်ငြိမ်အေးချမ်းရေးသည် မရှိမဖြစ်လိုအပ်သဖြင့် နှစ်နိုင်ငံအစိုးရနှင့် တပ်မတော်နှစ်ရပ်အကြား ပူးပေါင်း၍ ထိန်းသိမ်းဆောင်ရွက်သွားရန် လိုအပ်မှု၊ နယ်စပ်ဒေသ တရားမဝင်ကုန်သွယ်မှုများမရှိစေရေး ထိန်းသိမ်းဆောင်ရွက်ရန် လိုအပ်မှု၊ နှစ်နိုင်ငံ နယ်စပ်ဒေသတွင်ရှိသည့် အွန်လိုင်းလိမ်လည် လောင်းကစားမှုများကို လုပ်ဆောင်လျက်ရှိသည့် ကျောက်ခက်နှင့်ရွှေကုက္ကိုလ်တို့ရှိ အဆောက်အအုံများအား မြန်မာနိုင်ငံဘက်မှ အမြစ်ပြတ် ဖြိုချဖျက်ဆီးလျက်ရှိမှုနှင့် အွန်လိုင်းလောင်းကစားမှု တိုက်ဖျက်ရေးကို အမျိုးသားရေး တာဝန်အဖြစ် ဆောင်ရွက်လျက်ရှိသည့်အခြေအနေများကို ဆွေးနွေးပါတယ်။

■ ထို့ပြင် မြန်မာနိုင်ငံအနေဖြင့် မူးယစ်ဆေးဝါး ရောင်းဝယ် ဖောက်ကားမှုများကို နိုင်ငံတော်သမ္မတကြီး၏ လမ်းညွှန်ချက်နှင့်အညီ အမျိုးသား ရေးတာဝန်တစ်ရပ်အဖြစ် တားဆီးကာကွယ်နှိမ်နင်းလျက်ရှိသည့် အခြေအနေများ၊ နယ်စပ်ဖြတ်ကျော်မှုခင်းဆိုင်ရာ ကိစ္စရပ်များနှင့် လက်နက်ခဲယမ်းမှောင်ခိုရောင်းဝယ်မှုများကို ပူးပေါင်း ထိန်းသိမ်းတိုက်ဖျက်ဆောင်ရွက်နိုင်မည့် အခြေအနေများ၊ မြန်မာနိုင်ငံအနေဖြင့် အာဆီယံအဖွဲ့အတွင်း ပူးပေါင်းဆောင်ရွက်လျက်ရှိသည့် အခြေအနေများကိုလည်း ဆွေးနွေးပြောကြားပါတယ်။

■ တပ်မတော်အနေဖြင့် အမျိုးသားရေးတာဝန်ဖြစ်သည့် ဒို့တာဝန်အရေးသုံးပါးကို နိုင်ငံတော်အစိုးရ၏ ဦးဆောင်မှုဖြင့် ကာကွယ်စောင့်ရှောက်နေသည့် အခြေအနေများ၊ နှစ်နိုင်ငံတပ်မတော်နှစ်ရပ်ကြား လေ့ကျင့်ရေးဆိုင်ရာများ၊ သင်တန်းသားများ၊ တပ်မတော် အားကစားအဖွဲ့များ၊ ယဉ်ကျေးမှု အဖွဲ့များ အပြန်အလှန် စေလွှတ်ရေးနှင့် တပ်မတော်နှစ်ရပ်ကြား အဆင့်လိုက်ချစ်ကြည်ရေးခရီးစဉ်များ အပြန်အလှန်လည်ပတ်ရေး၊ တပ်မတော်နှစ်ရပ်ကြား ချစ်ကြည်ရင်းနှီးမှုနှင့် ပူးပေါင်းဆောင်ရွက်မှု တိုးတက်ခိုင်မာစေရေး ဆက်လက်ကြိုးပမ်းဆောင်ရွက်သွားမည့် အခြေအနေများကို ဆွေးနွေးခဲ့ကြောင်း သတင်းရရှိပါတယ်။

#Yangon_Media_Group
#YMG/MNN #Yangon_Times