#LocalNews
Published_10 May 2022

ရခိုင်ပြည်နယ် စစ်တွေမြို့တွင် ယာဉ်မတော်တဆမှုကြောင့် အမျိုးသားနှစ်ဦး သေဆုံးသွားကြောင်း သိရသည်။

မေလ ၉ ရက် ည ၁၁ နာရီကျော်အချိန်က စစ်တွေမြို့ ပြည်တော်သာရပ်ကွက် မူလွန် အ.မ.က (၁၅)ရှေ့တွင်စစ်တွေမြို့ယာဉ်တစ်စီး အရှိန်မထိန်းနိုင်ဘဲ ပလပ်ဖောင်းအောက်လမ်းဘေးသို့ ထိုးကျသွားခဲ့ပြီး ပြင်းထန်ဒဏ်ရာများရရှိခဲ့ကာ သေဆုံးသွားခြင်းဖြစ်ကြောင်း၊ သေဆုံးသွားသူနှစ်ဦး၏ ရုပ်အလောင်းများကို စစ်တွေဆေးရုံကြီးရင်ခွဲရုံသို့ ပို့ဆောင်ထားကြောင်း ရွှေရောင်မေတ္တာဖောင်ဒေးရှင်းက သိရသည်။

"သူတို့ကို ဆေးရုံကိုယူတယ်။ တစ်ယောက်က လမ်းမှာဆုံးတယ်။ နောက်တစ်ယောက်က ဆေးရုံရောက်ပြီးမှ ဆုံးတာ။ တစ်ယောက်က ရန်ကုန်မှာနေတဲ့ စစ်တွေဇာတိ ရခိုင်တိုင်းရင်းသားပါ။နောက်တစ်ယောက်ကတော့ စစ်တွေကပဲ။ လမ်းဟောင်းနဲ့ လမ်းသစ်ကို ဆက်ထားတဲ့လမ်းဆုံ နားလေးဆိုတော့ ဂုံးတက်တစ်ခုရှိတယ်။ အဲဒီနားမှာ ဖြစ်သွာတာ "ဟု ဖောင်ဒေးရှင်းတာဝန်ရှိသူက ပြောသည်။

ရခိုင်ပြည်နယ်တွင် ၂၀၂၁ ခုနှစ်အတွင်း ယာဉ်မတော်တဆဖြစ်ပွားမှုကြောင့် သေဆုံးသူပေါင်း ၁၂၃ ဦး၊ ဒဏ်ရာရရှိသူပေါင်း ၂၈၇ ဦး ရှိခဲ့ကြောင်း ပြည်နယ်ယာဉ်ထိန်းရဲတပ်ဖွဲ့စာရင်းများတွင် ဖော်ပြထားသည်။

ymg/mt
#Yangon_media_Group

#LocalNews
Published - 10 May 2022

အမြန်လမ်းမကြီးတွင် လမ်းဖြတ်ကူးသည့် ဆိုင်ကယ်အား ခရီးသည်တင် Express ယာဥ်တစ်စီးက ဝင်ရောက်တိုက်မိမှုဖြစ်ပွားပြီး တစ်ဦးသေဆုံးကာ တစ်ဦးထိခိုက်ဒဏ်ရာရခဲ့တဲ့ ဖြစ်စဥ်တစ်ခု မေ ၉ ရက်၊ ညပိုင်းအချိန်က ဖြစ်ပွားခဲ့တယ်လို့ သိရပါတယ်။

အဆိုပါ ဖြစ်စဥ်ဟာ ရန်ကုန်-မန္တလေးအမြန်လမ်းမကြီး၊ မိုင်တိုင်အမှတ် (၆၃/၁-၂)ဖာလုံကြားတွင် ဖြစ်ပွားခဲ့ခြင်းဖြစ်ပါတယ်။

ဖြစ်စဥ်မှာ ရန်ကုန်မှ မန္တလေးဘက်သို့ မောင်းနှင်လာသော ခရီးသည်တင်ယာဉ်သည် ရှေ့မှ လမ်းဖြတ်ကူးလာသည့် ဆိုင်ကယ်အား ဝင်ရောက်တိုက်မိမှု ဖြစ်ပွားခဲ့ခြင်းဖြစ်တယ်လို့ ဆိုပါတယ်။

အဆိုပါ ယာဥ်တိုက်မှုဖြစ်ပွားရာသို ဥသျှစ်ကုန်းအမြန်လမ်းမီးသတ်စခန်းမှ တပ်ဖွဲ့ဝင်များက ဥသျှစ်ကုန်းအမြန်လမ်းရဲစခန်းမှ တပ်ဖွဲ့ဝင်များနှင့်အတူ ကူညီကယ်ဆယ်ရေးလုပ်ငန်းများကို ဆောင်ရွက်ပေးခဲ့ရတာ ဖြစ်ပါတယ်။

ယင်းဖြစ်စဥ်ကြောင့် ဆိုင်ကယ်ပေါ်ပါ အမျိုးသား(၂)ဦးအနက်မှ ဆိုင်ကယ်ယာဉ် မောင်းထိခိုက်ဒဏ်ရာ(မစိုးရိမ်ရ)နှင့် နောက်မှလိုက်ပါလာသူ (သေဆုံး)တို့အား တပ်ဖွဲ့ပိုင်ယာဉ်ဖြင့် မြို့ချောင်းတိုက်နယ်ဆေးရုံသို့ ပိုဆောင်ကူညီပေးခဲ့ကြောင်း အမြန်လမ်း မီးသတ်တပ်ဖွဲ့က သတင်းထုတ်ပြန်ထားပါတယ်။

ဓါတ်ပုံ - အမြန်လမ်း မီးသတ်တပ်ဖွဲ့

ymg/kg
#Yangon_Media_Group

#LocalNews
Published -10 May 2022

မုန်တိုင်းအာဆင်နီအရှိန်ကြောင့်ဒေသအချို့မှာ မိုးသည်းထန်ကာလေပြင်းတိုက်တဲ့အတွက် ပဲခူးတိုင်း၊ မန္တလေးတိုင်းနဲ့ စစ်ကိုင်းတိုင်းဒေသတွေမှာ သစ်ပင်တွေလဲကျကာ လမ်းပိတ်ဆို့တာ၊ နေအိမ်တွေအပေါ် သစ်ပင်တွေလဲကျတာတွေ ဖြစ်ပွားခဲ့တယ်လို့ သိရပါတယ်၊၊

မေလ(၁၀)ရက် နံနက်ပိုင်းမှာပဲခူးတိုင်းဒေသကြီး၊ ပေါင်းတည်မြို့၊ မင်းကွက်(၃)ရပ်ကွက်၊ ရန်ကုန်-ပြည်ကားလမ်း၊ မိုင်တိုင်အမှတ်(၁၄၄)မှာ မိုးသည်းထန်စွာသွန်းပြီး သစ်ပင်လဲကျကာ လမ်းပိတ်ဆို့မှု ဖြစ်ပွားခဲ့ပါတယ်၊၊

မေလ(၉)ရက်နေ့မှာလည်း မန္တလေးတိုင်းဒေသကြီး၊ ညောင်ဦးမြို့၊ အမှတ်(၆)ရပ်ကွက်၊ အောင်မြေသာရပ်၊ ခုတင် ၂၀၀ ဆံ့ ညောင်ဦးခရိုင် ပြည်သူ့ဆေးရုံဝန်းအတွင်းမှာ နေအိမ်ပေါ်သို့ သစ်ပင်လဲကျမှု ဖြစ်ပွားခဲ့ပါတယ်၊၊

မေလ(၉)ရက်မှာပဲ စစ်ကိုင်းတိုင်းဒေသကြီး၊ စစ်ကိုင်းမြို့နယ်၊ သောတပန်ရပ်ကွက်၊ တောင်ရိုးလမ်း(သီတဂူလမ်း)၊ မြစင်္ကြာကျောင်းတိုက်ဝန်းအတွင်းရှိ သစ်ပင်လဲကျပြီး လမ်းပိတ်ဆို့မှုဖြစ်ပွားခဲ့ပါတယ်၊၊

သစ်ပင်တွေလဲကျနေတာတွေကို သက်ဆိုင်ရာ မြို့နယ်မီးသတ်စခန်းမှ သန္ဓေမီးသတ်တပ်ဖွဲ့ဝင်တွေ၊ အရန်မီးသတ်တပ်ဖွဲ့ဝင်တွေနဲ့ လူမှုကူညီရေးအဖွဲ့တွေက ရှင်းလင်းရေးလုပ်ငန်းတွေ ဆောင်ရွက်ခဲ့တယ်လို့ သိရပါတယ်၊၊

ယခုကာလဟာ မုတ်သုန်အဝင်ကာလဖြစ်သလို ကပ္ပလီပင်လယ်ပြင်မှာဖြစ်ပေါ်နေတဲ့ မုန်တိုင်းငယ်အာစင်နီကြောင့် မြန်မာနိုင်ငံရဲ့အချို့ဒေသတွေမှာ မိုးသည်းထန်တာ၊ လေပြင်းတိုက်ခတ်တာတွေ ဖြစ်ပေါ်မယ်လို့ မိုးလေဝသနှင့်ဇလဗေဒညွှန်ကြားမှုဦးစီးဌာနက သတိပေးထားပြီးလတ်တလောမှာလည်း မိုးသည်းထန်တာ၊ လေပြင်းတိုက်ခတ်တာတွေ ဖြစ်ပွားနေတာဖြစ်ပါတယ်၊၊

ymg/tthl
#Yangon_Media_Group

#LocalNews
Published_10 May 2022

မြန်မာ့ထိပ်သီးစီးပွားရေးလုပ်ငန်းရှင် ဦးအောင်ကိုဝင်း၏ သမီးဖြစ်သူ KBZ ဘဏ် ဒုတိယအမှုဆောင်အရာရှိချုပ်လည်းဖြစ် ကမ္ဘောဇဘဏ်အုပ်စု အမှုဆောင်ဒါရိုက်တာလည်းဖြစ်သော ဒေါ်နန်းလိုင်ခမ်း အဖမ်းခံရသည်ဆိုခြင်းမှာမဟုတ်ကြောင်း ပြန်ကြားရေးဝန်ကြီးဌာန ဒုဝန်ကြီး ဗိုလ်ချုပ်ဇော်မင်းထွန်းက YMG ကို ပြောသည်။

"အဲဒီသတင်းက မဟုတ်ဘူး။အခု ပြည်တွင်းမှာတောင် မရှိဘူး။ပြည်ပမှာပါတဲ့၊အဖမ်းခံရတယ်ဆိုတာ မဟုတ်ပါဘူးဗျ"ဟု ယင်းက ပြောသည်။

လူမှုကွန်ရက်သတင်းများတွင် ဒေါ်နန်းလိုင်ခမ်းအား ရန်ကုန်အပြည်ပြည်ဆိုင်ရာလေဆိပ်တွင် မေလ ၉ ရက်က ခေါ်ယူစစ်ဆေးခဲ့ကြောင်းရေးသားမှုများရှိခဲ့သည်။

လေဆိပ်နှင့် နီးစပ်သော သတင်းရင်းမြစ်တစ်ဦးက ယင်းသို့ခေါ်ယူမေးမြန်းသည်ဆိုခြင်းမှာ ပြည်ပခရီးသွားရောက်ရန် လေဆိပ်သို့လာရောက်စဉ် အချက်အလက်အချို့ကျန်နေခြင်း၊လေယာဉ်လက်မှတ်ကိစ္စအကြောင်းအရာများကြောင့်သာဖြစ်ကြောင်း ပြောသည်။

ymg/mt
#Yangon_Media_Group

#LocalNews
Published_10 May 2022

အထောက်အထားမဲ့ မြန်မာနိုင်ငံသားများ တင်ဆောင်လာသော မော်တော်ယာဉ်တစ်စီး ထိုင်းနိုင်ငံအတွင်းတိမ်းမှောက်၍ တစ်ဦးသေပြီး ၈ ဦးဒဏ်ရာရခဲ့ကြောင်း သိရသည်။

ယာဉ်ပေါ်တွင် အထောက်အထားမဲ့ မြန်မာနိုင်ငံသား၂၁ ဦး လိုက်ပါလာခြင်းဖြစ်ပြီး မေလ ၉ ရက် က ထိုင်းနိုင်ငံ တာခ်ခရိုင် နယ်စပ် မဲ့လမတ်မြိုနယ်အတွင်း တိမ်းမှောက်မှုဖြစ်ပွားခဲ့ခြင်း ဖြစ် ကြောင်း သိရသည်။

"ကားပေါ်မှာ အမျိုးသား ၁၂ ယောက်၊ အမျိုးသမီးက ၉ ယောက်ပါတယ်လို့ ကြားတယ်။ ကားက ချောက်ထဲကို ထိုးကျသွားတာ။ ကားအမျိုးအစားက ပစ်ကပ်ထရပ်ကား Isuzu အမျိုးအစားလို့သိရတယ်။ ဒဏ်ရာရသူတွေကလည်း ပြင်းထန်တာကြောင့် မဲ့လမတ်ဆေးရုံကို ပို့ထားတယ်တဲ့"ဟု ထိုင်းနိုင်ငံရောက် မြန်မာနိုင်ငံသားတစ်ဦးက ပြောသည်။

ထိုင်းနိုင်ငံသို့ တရားမဝင်လမ်းကြောင်းမှ သွားရောက်သည့်မြန်မာရွှေ့ပြောင်းအလုပ်သမားတင်ဆောင်သောယာဉ်များ တိမ်းမှောက်ခြင်း၊ အဖမ်းဆီးခံရခြင်းနှင့် အခြားဘေးအန္တရာယ်များ ကြုံတွေ့ခြင်းများ မကြာခဏဖြစ်ပေါ်လေ့ရှိနေသည့်အတွက် မြန်မာရွှေ့ပြောင်းအလုပ်သမားများအနေဖြင့် တရားမဝင်လမ်းကြောင်းမှ မလာရောက်ကြရန်လည်း ရွှေ့ပြောင်းလုပ်သားများ အရေးလုပ်ကိုင်နေသူများက တိုက်တွန်းနေကြသည်။

ymg/mt
#Yangon_Media_Group

#Local_News
Published _ 10 May 2022

ကွန်ဟိန်းမြို့နယ်တွင် ငွေကျပ်သိန်း ၅၀၀၀ ကျော် တန်ဖိုးရှိ ကတ်တမင်းများ ဖမ်းဆီးရမိခဲ့ကြောင်း မြန်မာနိုင်ငံရဲတပ်ဖွဲ့ရဲ့ ထုတ်ပြန်ချက်အရ သိရပါတယ်။

မူးယစ်ဆေးဝါး တားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များ ပါဝင်သော ပူးပေါင်းအဖွဲ့သည် မေ ၇ ရက်တွင် ကွန်ဟိန်းမြို့နယ်၊ တာကော်ပူးပေါင်းစစ်ဆေးရေး စခန်းတွင် ကာလိမှ မိုင်းပျဉ်းဘက်သို့ စိုင်းနော်ရှဲန် မောင်းနှင်လာသည့် MITSUBISHI COLT မော်တော်ယာဉ်ကို သတင်းအရရှာဖွေခဲ့ပါတယ်။

ထိုသို့ ရှာဖွေရာတွင် ဒေသကာလတန်ဖိုးငွေကျပ် သိန်း ၅၀၀၀ ကျော်တန်ဖိုးရှိ ကတ်တမင်း ၆၁ ကီလို သိမ်းဆည်းရမိခဲ့ပါတယ်။

စစ်ဆေးဖော်ထုတ်ချက်အရ သိမ်းဆည်းရမိ ကတ်တမင်းများကို ကာလိမြို့မှ မိုင်းပျဉ်းမြို့သို့ သယ်ဆောင်ခြင်းဖြစ်ကြောင်း သိရှိရသဖြင့် ၎င်းအား ဥပဒေအရ အရေးယူထားကြောင်း သိရပါတယ်။

ထို့ပြင် ကွင်းဆက်ပြစ်မှု ကျူးလွန်သူများကို ဆက်လက်စစ်ဆေး ဖော်ထုတ်လျက်ရှိကြောင်း သတင်းရရှိပါတယ်။

ymg_mnn
#Yangon_Media_Group