#Local_News
Published_6 July 2022

ရန်ကုန်တိုင်ဒေသကြီးမင်္ဂလာဒုံမြို့နယ် ရန်ကုန်ပြည်လမ်းမ ၄၃ ကားဂိတ် ဝါယာလက်မှတ်တိုင်အနီးတွင် ယနေ့ နံနက်ပိုင်းက YBS-37 နှင့် YBS-43 တို့တိုက်မိသောကြောင့်လူ ၇ ဦးဒဏ်ရာရသွားကြောင်း ပုလဲအရန်မီးသတ်စခန်းက သိရသည်။

"မနက်က ကျွန်တော်တို့အဖွဲ့က ကားလေးစီးနဲ့ ကူညီခဲ့ပါတယ်။ အမျိုးသား ၄ ယောက်နဲ့အမျိုးသမီး ၃ ယောက်ပါ ၊ မြောက်ဥက္ကလာပမေဓာဝီဆေးရုံကို ပို့ဆောင်ကူညီခဲ့ပါတယ်"ဟု အဆိုပါ စခန်း၏ တာဝန်ရှိသူကပြောသည်။

ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေးကြီးကြပ်မှုကော်မတီ (YRTC) အနေဖြင့်လည်း YBS ယာဉ်လိုင်းကုမ္ပဏီများနှင့်တွေ့ဆုံ၍ သယ်ယူပို့ဆောင်ရေးနှင့် ယာဉ်စည်းကမ်း၊ လမ်းစည်းကမ်းဆိုင်ရာများနှင့် ပတ်သက်သည့် ဆွေးနွေးပွဲများကို အမြဲပြုလုပ်လျက်ရှိပြီး ခရီးသွားလုပ်သားပြည်သူများအဆင်ပြေချောမွေ့စွာ သွားလာနိုင်ရေးကို လုပ်ဆောင်လျက်ရှိကြောင်း သိရသည်။

သို့သော်လည်း YBS ယာဉ်များ အချင်းချင်း အပြိုင်မောင်းနှင်နေသည့်ကိစ္စများ ရှိနေသေးသည့်အတွက် ထိရောက်သော ပြစ်ဒဏ်များကိုလည်း သတ်မှတ်သင့်ကြောင်း ယာဉ်အသုံးပြုသူများက သုံးသပ်ပြောဆိုနေကြသည်။

ymg/mt
#Yangon_Media_Group

#Local_News
Published_6 July 2022

အိန္ဒိယ-မြန်မာ နယ်စပ်ကုန်သွယ်ရေးစခန်းများ ပြန်ဖွင့်ရန် ဆွေးနွေးမှုစတင်နေကြောင်း တမူးနယ်စပ်ကုန်သွယ်ရေးအသင်း တာဝန်ရှိသူက ပြောသည်။

အိန္ဒိယနှင့် မြန်မာနိုင်ငံကြားတွင် တမူးကုန်သွယ်ရေးစခန်း၊ ရိဒ်ကုန်သွယ်ရေးစခန်း၊ သာနီတာလန်စခန်းဟူ၍ ရှိပြီး လွန်ခဲ့သော ကိုဗစ်ကပ်ရောဂါ ပြင်းထန်သည့်ကာလကပင် ရပ်တန့်နေခဲ့သည့် နယ်စိပ်ဂိတ်များ ဖြစ်ကြောင်း သိရသည်။

"အရင်ကလည်း ဆွေးနွေးနေတာပဲ၊ ကိုဗစ်ကိုချည်း အကြောင်းပြနေလိုတော့ ကုန်သွယ်မှုတွေ နှောင့်နှေးမယ်။ တရားမဝင် ကုန်ကူးသန်းရောင်းဝယ်မှုတွေ ပိုပြီး ကြီးထွားလာမယ်။ ဒါကြောင့် အမြန်ဖွင့်ဖို့ လိုနေပါတယ်၊ ကျွန်တော်တို့ တမူးဂိတ်က အရင်ဆုံး ဖွင့်နိုင်တယ်လို့ ယူဆပါတယ်"ဟု တမူးနယ်စပ်ကုန်သွယ်ရေးအသင်းတာဝန်ရှိသူက ပြောသည်။

အဆိုပါ နယ်စပ်ဂိတ်များမှ ကွမ်းသီး၊ ငရုပ်ကောင်း၊ ပဲမျိုးစုံ၊ ကြက်သွန်ဖြူစသော လယ်ယာထွက်ကုန်များကို မြန်မာနိုင်ငံမှတင်ပို့ကာ အိန္ဒိယဘက်မှ မော်တော်ဆိုင်ကယ်၊ အပိုပစ္စည်း၊ ဝါဂွမ်း၊ ဂျုံ၊ ဓါတ်မြေသြဇာ၊ ပလတ်စတစ်ကုန်ကြမ်း စသည်တို့ကို တင်သွင်းကြောင်း သိရသည်။

အိန္ဒိယ-မြန်မာ နယ်စပ်ကုန်သွယ်ရေးအတွက် အိန္ဒိယရူပီးငွေကို အသုံးပြုရန် မြန်မာနိုင်ငံက စဉ်းစားနေကြောင်း ပြီးခဲ့သည့် မတ်လအတွင်းက ရင်းနှီးမြှုပ်နှံမှုဝန်ကြီးဌာန၏ အရာထမ်းတစ်ဦးက မီဒီယာများအား ပြောကြားဖူးသေးသည်။

ကိုဗစ်ကြောင့် ကုန်သွယ်မှုများကို ပိတ်ထားသော်လည်း မြန်မာ-အိန္ဒိယ နှစ်နိုင်ငံနယ်စပ်ဂိတ်များအနက် တမူး - မိုရေးနယ်စပ်ကုန်သွယ်ရေးစခန်းမှ ဂိတ် (၁) နှင့် ဂိတ် (၂) တို့ကို ကိုဗစ်ကာကွယ်ဆေးနှင့် အခြားဆေးဝါးတင်သွင်းနိုင်ရန် စီးပွားရေးနှင့် ကူးသန်းရောင်းဝယ်ရေးဝန်ကြီးဌာနအနေဖြင့် ဖွင့်လှစ်ထားခဲ့သေးကြောင်း သိရသည်။

ymg/nn
#Yangon_Media_Group

#Local_News
Published - 6 July 2022

သီလဝါအထူးစီးပွားရေးဇုန်တွင် SKD စနစ်ဖြင့် ထုတ်လုပ်ရောင်းချနေသည့် ဆူဇူကီး ကားစက်ရုံ ယာယီပိတ်ထားကြောင်း လူမှုကွန်ရက်တွင် သတင်းများ ထွက်ပေါ်နေသည်။

"ကားတင်သွင်းခွင့်ရော၊ ကားထုတ်လုပ်ခွင့်ရော ပါမစ်လိုတယ်လေ။ ကားတင်သွင်းခွင့်ဆိုရင်လည်း ပါမစ်လိုတယ်။ SKD ဆိုတာက ဒီမှာတပ်ဆင်ထုတ်လုပ်တာလေ။ အဲဒါလည်း ပါမစ်လိုတယ်။ ပါမစ်နှစ်ခုလုံးကို ပိတ်ထားတာ တစ်နှစ်ကျော်သွားပြီ။ ပါမစ်မရှိတော့ ဆက်လုပ်လို့မရတော့ဘူး။ ကားတင်သွင်းခွင့်မရတော့ဘူး။ ကားထုတ်လုပ်ခွင့် မရတော့ဘူး။ လက်ရှိ stock တွေကိုပဲ ထုတ်ရောင်းနေရတာပေါ့။ အခုက Stock လက်ကျန်တွေ အကုန်ပြတ်ကုန်ပြီ။ ကားစက်ရုံတိုင်း၊ ကား showroom တိုင်း ရပ်တည်ဖို့ ခက်ခဲသွားတယ်။ ဆူဇူကီးတစ်ခုတည်းမဟုတ်ဘူး။ အကုန်လုံးက ကားတွေရပ်ထားတာ။ အဲဒါကြောင့် ကားဈေးတွေတတ်သွားတာ။ ပါမစ်ပိတ်လိုက်တော့ ကားတွေတင်သွင်းလို့ မရတော့ဘူး။ ကားထုတ်လုပ်လို့မရတော့ဘူး။ အဲ့တော့ အကုန်လုံးနားသွားတာ။ ရောင်းစရာမရှိလို့ နားထားတဲ့သဘောပေါ့"ဟု ကားဝယ်ရောင်းလုပ်ငန်းလုပ်သူတစ်ဦးက YMG ကိုပြောသည်။

ပြည်တွင်းသို့ သွင်းကုန်တင်သွင်းခြင်းနှင့် ပတ်သက်၍ တစ်ဦးချင်းကားတင်သွင်းမှုအပါအဝင် ဇိမ်ခံပစ္စည်းများ တင်သွင်းခြင်းကို ကန့်သတ်ထားဆဲဖြစ်ကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှ တာဝန်ရှိသူတစ်ဦးက ဇွန်လ ၁၆ ရက်တွင်ပြုလုပ်သည့် သတင်းစာရှင်းပွဲအတွင်း ပြောကြားခဲ့သည်။

နစက အနေဖြင့် ပြီးခဲ့သည့် ၂၀၂၁ ခုနှစ် အောက်တိုဘာမှစတင်ပြီး ကားတင်သွင်းမှုကို ယာယီပိတ်ထားခဲ့ခြင်း ဖြစ်သည်။

ymg/sth
#Yangon_Media_Group

#Local_News
Published_6 July 2022

သရုပ်ဆောင် ဦးမိုးဒီ Grand Hanthar ဆေးရုံတွင် နှလုံး‌ခွဲစိတ်ကုသမှုတစ်ခုပြုလုပ်ခဲ့ရကြောင်းသိရသည်။

ဇူလိုင်လ ၅ ရက် မွန်းလွဲပိုင်းကစတင်၍ ခွဲစိတ်ခန်းစဝင်ပြီး ညနေ (၅)နာရီခွဲတွင်ပြီးစီးခဲ့ကြောင်း၊ သွေးကြောချဲ့ကိရိယာ (၃)ချောင်းထည့်သွင်းရကြောင်း ၊ ပရိသတ်များ စိတ်မပူကြရန်နှင့် ကျန်းမာအောင်ဆုတောင်းပေးကြစေလိုကြောင်းလည်း သူ၏လူမှုကွန်ရက်စာမျက်နှာတွင် ဖော်ပြထားသည်။

"မနေ့ကမှ ခွဲစိတ်ထားရတာဆိုတော့ အရေးပေါ်ခန်းထဲမှာပဲ စောင့်ကြည့်နေပါတယ်။ ဘယ်နေ့ဆေးရုံက ဆင်းမယ်ဆိုတာတော့ မသိရသေးပါဘူးရှင့်"ဟု မိသားစုဝင်တစ်ဦးက YMG ကို ပြောသည်။

ဦးမိုးဒီ အနေဖြင့် ယခင်ကလည်း လည်းကျောက်ကပ်ကြောင့် ခွဲစိတ်ကုသမှုတစ်ခု ခံယူထားခဲ့ရသေးကြောင်း သိရသည်။

အဆိုပါ ခွဲစိတ်ကုသမှုအတွက် ငွေကျပ် သိန်းတစ်ရာခန့် ကုန်ကျမည်ဆိုသောကြောင့် ဦးမိုးဒီအား မိတ်တွေများက လှူဒါန်းပေးခဲ့ကြသည်ကိုလည်း လူမှုကွန်ရက်တွင် မှတ်တမ်းတင်ထားသည်ကိုတွေ့ရသည်။

ymg/mt
#Yangon_Media_Group

#Local_News
Published_6 July 2022

ရခိုင်ပြည်၊ စစ်တွေမြို့ စစ်တွေဟိုတယ်ရှေ့ရှိ ကမ်းခြေသဲသောင်ပြင်ပေါ်တွင် စစ်တွေဟိုတယ်ကမ်းခြေရှေ့တွင် သေဆုံးနေသော လင်းရှူးငါးတစ်ကောင် သောင်တင်ခဲ့ကြောင်း ရခိုင်ပြည်နယ် ငါးလုပ်ငန်းဦးစီးဌာနက သိရသည်။

အဆိုပါ ငါးကို ဇူလိုင်လ ၅ ရက် ည ပိုင်း ၁၁ နာရီကျော်ခန့်က တွေ့ရှိခဲ့သောကြောင့် ယနေ့ ဇူလိုင်လ ၆ ရက် နံနက်တွင် သဲသောင်ပြင်၌ စနစ်တကျ မြေမြှုပ်ထားပြီးဖြစ်ကြောင်း သိရသည်။

"ဝေလငါးမဟုတ်၊ လင်းရှူးပါ၊ ငါးက ကမ်းမှာပါးကတည်းက အသေပါ။ အခုတော့ မြေမြှုတ်တာကို သေချာလုပ်လိုက်ပါပြီ"ဟု ပြည်နယ်ငါးလုပ်ငန်းဦးစီးဌာန တာဝန်ရှိသူက YMG ကို ပြောသည်။

ယင်းငါး၏ အရွယ်အစားမှာ အလျား ၁၀ ပေ ခန့်၊ လုံးပတ် ၄ ပေ ခွဲခန့်ရှိကြောင့် အနံ ၃ ပေခန့်ရှိကြောင်း၊ ပင်လယ်လင်းရှူးများမှာ ပင်လယ်နို့တိုက်သတ္တဝါ (Marine Mammals) များဖြစ်ကြပြီး ရှားပါးရေနေသတ္တဝါလည်း ဖြစ်ကြောင်း သိရသည်။

ymg/mt
#Yangon_Media_Group

#Local_News

Published - 6 July 2022

ပြီးခဲ့သည့် ဇွန်လအတွင်း ပြည်ပသို့ဆန်နှင့်ဆန်ကွဲတန်ချိန် တစ်သိန်းခွဲခန့် တင်ပို့ခဲ့ကြောင်း မြန်မာနိုင်ငံဆန်စပါးအသင်းချုပ်၏ ထုတ်ပြန်ထားသည့်စာရင်းများအရ သိရသည်။

ဇွန်လအတွင်း ဆန်တန်ချိန် ၈၃၉၂၆ တန်၊ ဆန်ကွဲတန်ချိန် ၆၂၁၆၈ တန် စုစုပေါင်း ၁၄၆၀၉၄ တန်ကို ပြည်တွင်းမှကုမ္ပဏီပေါင်း ၃၈ ခုမှ နိုင်ငံပေါင်း ၂၇ နိုင်ငံသို့ တင်ပို့ခဲ့ခြင်းဖြစ်ကြောင်း၊ ပင်လယ်ရေကြောင်းမှ ၁၂၅၃၇၄ တန်နှင့် နယ်စပ်ကုန်သွယ်ရေးမှ တန် ၂၀၇၂၀ တင်ပို့ခဲ့ခြင်းဖြစ်ပြီး ပင်လယ်ရေကြောင်းမှ ပိုမိုကုန်သွယ်နိုင်ခဲ့ကြောင်း သိရသည်။

ပြည်တွင်း ဆန်ကို ဖိလစ်ပိုင်၊ တရုတ်၊ ဘယ်လ်ဂျီယံ၊ စပိန်၊ ရိုမေးနီးယားနိုင်ငံ အပါအဝင် နိုင်ငံပေါင်း ၁၈ နိုင်ငံသို့ တင်ပို့ခဲ့ခြင်းဖြစ်ပြီး ဖိလစ်ပိုင်နိုင်ငံသို့ တန် ၃၇၅၃၀ ဖြင့် အများဆုံးတင်ပို့နိုင်ခဲ့ကြောင်း၊ ဆန်ကွဲကို ဘယ်လ်ဂျီယံ၊ တရုတ်၊ ပြင်သစ်၊ စပိန်၊ ဆလိုဗေးနီးယားနိုင်ငံ အပါအဝင် နိုင်ငံပေါင်းကိုးနိုင်ငံသို့ တင်ပို့ခဲ့ကြောင်း သိရသည်။

ပြည်ပနိုင်ငံသို့ ယခုဘဏ္ဍာနှစ်အတွင်း ဆန်နှင့်ဆန်ကွဲများ တင်ပို့ရာတွင် တစ်လလျှင် ပျမ်းမျှအားဖြင့် တန်ချိန်တစ်သိန်းခွဲမှ နှစ်သိန်းဝန်းကျင်အထိ တင်ပို့နေခြင်းဖြစ်ပြီး ဆန်တန်ချိန် နှစ်သန်းခန့်တင်ပို့နိုင်ရန် မျှော်မှန်းထားကြောင်း သိရသည်။

ယင်းအပြင် မူဆယ်နယ်စပ်ဂိတ်မှလည်း ဆန်နှင့်ဆန်ကွဲတင်ပို့မှုမှာ ပြန်လည်မြင့်တက်လာပြီဖြစ်ကြောင်း ကုန်သည်များ၏ ပြောပြချက်အရသိရသည်။

ymg/sth
#Yangon_Media_Group