Published_ 8 August 2023

ပြင်သစ် ထိပ်သီးကလပ် ပီအက်စ်ဂျီအသင်းက ဘာစီလိုနာ တိုက်စစ်မှူး အန်ဆူ ဖာတီကို ကမ်းလှမ်း ပြင်ဆင်နေပြီး နည်းပြလူးဝစ်အင်းနရစ်ကလည်း ခေါ်ယူရန်စိတ်အားထက်သန်နေသည်ဟု သိရသည်။

ပီအက်စ်ဂျီသည် ယခုနွေရာသီအပြောင်းအရွှေ့တွင် တိုက်စစ်မှူး အမ်ဘာပေအား ဆုံးရှုံးရမည့် အခြေအနေနှင့် ရင်ဆိုင်နေရပြီး မက်ဆီကိုလည်း ထွက်ခွာခွင့် ပြုခဲ့ရသည့်အပြင် နေမာမှာလည်း ထွက်ခွာမည့် ကောလဟလများ ထွက်ပေါ်လျက်ရှိသည် ။

လက်ရှိတွင် ပီအက်စ်ရီသည် တိုက်စစ်ကစားသမားဒမ်ဘီလီအားဘာစီလိုနာမှခေါ်ယူထားပြီး ဘင်ဖီကာမှ ကွန်ကာလိုရာမို့စ် နှင့် ဖရန့်ဖတ်မှ မူတာနီရို့ကိုလည်းငွေကြေး မြောက်မြားစွာဖြင့် ကမ်းလှမ်းရန် ပြင်ဆင်နေသည်။

ယခုနွေရာသီအစောပိုင်းက အသင်းမှထွက်ခွါရန် သတင်းများ ထွက်ပေါ်ခဲ့သော်လည်း စပိန်လက်ရွေးစင်ဖာတီက အသင်းတွင်ဆက်လက်နေလိုကြောင်း ပြောခဲ့သဖြင့်သတင်းများငြိမ်သက်သွားးခဲ့သည်။

နည်းပြဇာဗီ အနေဖြင့် ဖာတီအား ပွဲထွက်ကစားခွင့် ပိုပေးရန် စီစဉ်နေကြောင်းလည်း ဖွင့်ဟ ပြောကြားခဲ့သည်။

အခြားသတင်းတစ်ရပ်တွင် ဘာစီလိုနာအနေဖြင့် ဘရာဇီးကလပ်အက်သလက်တီကိုပါရန်နီးစ်မှလူငယ်တိုက်စစ်မှူးဗစ်တာရော့ကေးကို ခေါ်ယူရန် လာမည့်ဇန်နဝါရီ အတိစောင့်ဆိုင်းရဖွယ်ရှိနေသည်ဟုသိရသည်။

မန်စီးတီးကွင်းလယ်လူ ဘာနာဒိုဆေးလ်ဗားကိုခေါ်ယူရန် ပစ်မှတ်ထား နေသော်လည်း မန်စီးတီးက အသင်းတွင်ဆက်လက် ထိန်းသိမ်းထားရှိလိုနေသည်။
Ref: Blaugranes
#YMG #Yangon_Times

#World_Health
Published 7 August 2023

အိပ်ချိန်မမှန်ခြင်းကြောင့် ခန္ဓာကိုယ်အတွင်းပိုင်း လည်ပတ်မှုများ ထိခိုက်စေခြင်းနဲ့ ကျန်းမာရေးဆိုးကျိုးများကြား ဆက်စပ်ပုံကို ကင်းစ်ကောလိပ်လန်ဒန်မှ သုတေသီများ တွေ့ရှိခဲ့ကြပါတယ်။

အရွယ်ရောက်ပြီးသူ ၁ ထောင်နီးပါးခန့်ကို ခေါ်ယူပြီး သွေး၊ မစင်၊ အူလမ်းကြောင်းပိုးမွှားများကို ခွဲခြိမ်းစိတ်ဖြာကာ ပုံမှန်အိပ်ချိန်အတိုင်း လိုက်နာအိပ်စက်သူများနဲ့ ပုံမှန်အိပ်ချိန် မအိပ်သူများကို နှိုင်းယှဉ်ခဲ့ပါတယ်။

အိပ်စက်ချိန်ကွာခြားချက် မိနစ် ၉၀ မျှ ကွာခြားရုံဖြင့်ပင် အူလမ်းကြောင်းပိုးမွှားဖွဲ့စည်းမှုအပေါ် သက်ရောက်မှုရှိကြောင်း တွေ့ရှိခဲ့ကြပါတယ်။

ခန္ဓာကိုယ်တွင်း နေ့ညလည်ပတ်မှုပုံစံမှာ တိုးတက်ပြောင်းလဲခြင်းဖြင့် အူလမ်းကြောင်းပိုးမွှားများအတွက် ပိုမိုကောင်းမွန်စေလားဆိုတာကို ဆုံးဖြတ်ဖို့ နောက်ထပ်သုတေသနတွေ လိုအပ်သေးကြောင်း စာတမ်းပြုစုသူ ဒေါက်တာ'ဝမ်ဒီဟောလ်'က ပြောပြသွားပါတယ်။

အရည်အသွေးနိမ့်ပါးတဲ့ စားသောက်မှုပုံစံထဲမှာ အသီးအနှံ ဟင်းသီးဟင်းရွက် အခွံမာသီးနည်းပါးခြင်းနဲ့ အချိုရည်အသောက်များခြင်းတို့ ပါဝင်ကာ အူလမ်းကြောင်းပိုးမွှားများကို ထိခိုက်စေပါတယ်။

ထိုကနေ အဝလွန်ခြင်း၊ ရောင်ရမ်းခြင်း၊ နှလုံးသွေးကြောရောဂါ ဖြစ်နိုင်ချေတို့ ရှိနေပါတယ်။

အူလမ်းကြောင်းကျန်းမာရေး ကောင်းမွန်စေရန်အတွက် အိပ်ချိန်ပုံမှန်သတ်မှတ်ခြင်းဖြင့် အလွယ်တူထိန်းညှိလုပ်ဆောင်နိုင်ပါတယ်လို့ ကျန်းမာရေးသိပ္ပံကုမ္ပဏီ Zoe မှ ဒေါက်တာ'ဆာရာဘယ်ရီ'က ပြောကြားလိုက်ပါတယ်။

အိပ်စက်ခြင်းက ကျန်းမာရေးအတွက် အဓိကသော့ချက်တစ်ခုဖြစ်ပြီး ခန္ဓာကိုယ်အတွင်းပိုင်း နေ့ညလည်ပတ်မှုများနဲ့ အူလမ်းကြောင်းပိုးမွှားတို့အတွက် ဒီသုတေသနက အကျိုးရှိလာစေမှာဖြစ်တယ်လို့ Zoe မှ အာဟာရသိပ္ပံပညာရှင် 'ကေတီဘာမင်ဂမ်'က ပြောကြားခဲ့ပါတယ်။

အိပ်ချိန်များလွန်းခြင်း နည်းလွန်းခြင်းက ကျန်းမာရေးဆိုးရွားလာစေကြောင်းလည်း အရင်ကလေ့လာတွေ့ရှိထားပါတယ်။

တစ်ညကို အိပ်ချိန် ၉ နာရီကျော်လွန်ပါက လေဖြတ်နိုင်ချေများပြီး တရေးတမောကို ကြာရှည်စွာအိပ်စက်ပါက သွေးတိုးခြင်း၊ BMI နဲ့ ခါးအရွယ်အစားတက်ခြင်းတို့နဲ့ ဆက်စပ်နေပါတယ်။

ကောင်းမွန်စွာအိပ်စက်ခြင်းက နှလုံးသွေးကြောရောဂါဖြစ်နိုင်ချေကို လျှော့ချပေးနိုင်ကြောင်း ကိုလံဘီယာတက္ကသိုလ်မှ သုတေသီများ ဖော်ပြခဲ့ပါတယ်။

#World_Health #အလုပ်ပိတ်ရက်များတွင် တရေးတမောအိပ်စက်ခြင်း
Source: NY Post

Published-7-8-2023

ရန်ကုန်ယူနိုက်တက်အသင်းနဲ့ကချင်ယူနိုက်တက်အသင်းတို့ ယှဉ်ပြိုင်ကစားမှုဟာ အကောင်းဆုံး ဘောလုံးပွဲတစ်ပွဲဖြစ်ရမယ်လို့ လာရောက်အားပေးမယ့်ပရိတ်သတ်ကို အသင်းကိုယ်စား ကတိပြုပြောဆိုလိုက်ပါတယ်။

ပြိုင်ပွဲမစတင်မီ သုံးရက်တာလေ့ကျင့်မှုမှာလည်း အချိန်တိုတောင်းပေမယ့် အကောင်းဆုံးပြင်ဆင်ထားတယ်လို့ ဆိုပါတယ်။

ရန်ကုန်ယူနိုက်တက်အသင်းနဲ့ ကချင်ယူနိုက်တက်အသင်းတို့ရဲ့ ပွဲစဉ်ကို ဒီနေ့ ဩဂုတ် ၇ ရက် ညနေ ၃:၃၀ နာရီအချိန်မှာ YUSC ကွင်း မှာ ယှဉ်ပြိုင်သွားမှာဖြစ်ပါတယ်။

ဒီနေ့ပွဲစဉ်ကို MNL Youtube Channel ကနေလည်း တိုက်ရိုက်ထုတ်လွှင့်ပြသပေးသွားမှာဖြစ်တယ်လို့ သိရပါတယ်။

ရန်ကုန်ယူနိုက်တက်အသင်းဟာ နည်းပြအသစ်ဂတ်ဇီရဲ့ ကိုင်တွယ်မှုအောက်ကနေ ဘယ်လို ပွဲထွက်လာမလဲ ဘယ်လို ကစားကွက်တွေနဲ့ ကစားမှာလဲဆိုတာကို သေချာစောင့်မျှော်အားပေးကြပါလို့ YUSC အသင်း ဆိုထားပါတယ်။
YMG/my
#Local_News
#Yangon_Times

#World_Health
Published 7 August 2023

ဒိုကိုဆာဟက်ဆဲနွိုက်အက်ဆစ် (DHA)လို့ခေါ်တဲ့ အိုမီဂါ-၃ဖက်တီးအက်ဆစ်ရဲ့ သွေးထဲရှိပမာဏနဲ့ အကြားအာရုံပြဿနာများကြား ဆက်စပ်နေပုံကို သိပ္ပံပညာရှင်များ တွေ့ရှိခဲ့ကြပါတယ်။

နောက်ဆုံးသုတေသနပြုချက်အရ DHA ပမာဏမြင့်မားတဲ့ သက်လတ်ပိုင်းနဲ့ သက်ကြီးပိုင်းတွေဟာ DHA နည်းပါးတဲ့သူတွေနဲ့ယှဉ်ရင် အကြားအာရုံပြဿနာများ ကြုံတွေ့ရနိုင်ချေ ၈-၂၀ ရာခိုင်နှုန်း လျော့နည်းနိုင်ကြောင်း တွေ့ရှိခဲ့ပါတယ်။

DHA ပမာဏများခြင်းကြောင့် နှလုံးရောဂါ၊ မှတ်ဉာဏ်ကျဆင်းခြင်း၊ အသက်သေဆုံးနိုင်ချေတို့ကိုပင် လျော့ကျစေနိုင်ကြောင်း ဆက်စပ်တွေ့ရှိထားပါတယ်။

ဗြိတိန်ဘိုင်အိုဘဏ်မှ အချက်အလက်များရယူကာ ဗြိတိန်ရှိ အသက် ၄၀ မှ ၆၉ နှစ်ကြား လူပေါင်း ၁ သိန်းကျော်ရဲ့ DHA ပမာဏနဲ့ အကြားအာရုံအခြေအနေတို့ကို ခွဲခြိမ်းစိတ်ဖြာခဲ့ပါတယ်။

DHA က အကြားအာရုံဆိုင်ရာလုပ်ဆောင်မှုကို ကောင်းစွာထိန်းသိမ်းပေးခြင်း ဒါမှမဟုတ် DHA မလုံလောက်ခြင်းကြောင့် အကြားအာရုံဆုံးရှုံးတာမျိုး ဖြစ်စေတတ်ပါတယ်။

ထိုတွေ့ရှိချက်တွေက အိုမီဂါ-၃ဖက်တီးအက်ဆစ်တွေရဲ့ အရေးကြီးပုံကို ဖော်ပြကာ အထူးသဖြင့် DHA က ကျန်းမာရေးထိန်းသိမ်းရေးနဲ့ မလွဲမရှောင်သာ အိုမင်းခြင်းကို ကာကွယ်ရေးတို့မှာ အရေးကြီးပုံကို ဖော်ပြနေပါတယ်။

အိုမီဂါ-၃က နားအတွင်းပိုင်းဆဲလ်တွေကို ဆူညံသံများ၊ ဓာတုပစ္စည်းများ၊ ရောဂါကူးစက်ခြင်းတို့ကြောင့် ရောင်ရမ်းတုန့်ပြန်ခြင်း၊ ထိခိုက်ခြင်းတို့မှ ကာကွယ်ပေးတယ်လို့ သိပ္ပံပညာရှင်များ ခန့်မှန်းထားကြပါတယ်။

ပင်လယ်စာများ ပုံမှန်စားသုံးခြင်း၊ အစားအသောက် ဖြည့်စွက်စာများ ထည့်သွင်းခြင်းဖြင့် DHA တိုးပွားစေနိုင်ပါတယ်။

#World_Health #အိုမီဂါ - ၃ဖက်တီးအက်ဆစ်
Source: India Today

ကမ္ဘောဒီးယားဝန်ကြီးချုပ်ဟောင်း ဟွန်ဆန်ရဲ့သားဖြစ်သူ နှင့် ကမ္ဘောဒီးယား တော်ဝင်စစ်တပ်ရဲ့ ဒုတိယ ဦးစီးချုပ်ဖြစ်သူ  ဒေါက်တာဟွန်မန်နက်ကို ကမ္ဘောဒီးယားဘုရင်မင်းမြတ်က ဝန်ကြီးချုပ်အသစ်အဖြစ် ခန့်အပ်ကြောင်း တော်ဝင်အမိန့် ယနေ့ ဩဂုတ်(၇)ရက်နေ့မှာ ထုတ်ပြန်ခဲ့တယ်လို့ ခမာတိုင်းမ်သတင်းစာ သတင်းအရသိရပါတယ်။

ဒေါက်တာဟွမ်မန်နက်ဟာ  ဝန်ကြီးများကောင်စီကို ဖွဲ့စည်းပေးရမှာဖြစ်ပါတယ်။

သူ့အနေနှင့် အစိုးရအဖွဲ့ဖွဲ့စည်းပေးနိုင်ဖို့  ကမ္ဘောဒီးယားအမျိုးသားလွှတ်တော်ရဲ့ အယုံအကြည်ရှိကြောင်း မဲပေးထောက်ခံမှုရယူရမှာဖြစ်ပါတယ်လို့ တော်ဝင်အမိန့်မှာဖော်ပြထားပါတယ်။

ဒေါက်တာဟွန်မန်နက်ဟာ ကမ္လောဒီးယားတော်ဝင်စစ်တပ်ရဲ့ ဒုတိယဦးစီးချုပ်နှင့် တော်ဝင်ကြည်းတပ်ရဲ့ဦးစီးချုပ် အဖြစ်ဆောင်ရွက်ခဲ့တဲ့ ဗိုလ်ချူပ်ကြီး ဖြစ်ပါတယ်။ သူဟာ ကမ္ဘောဒီးယားပြည်သူ့ပါတီရဲ့ ထောက်ခံမှုကိုရရှိခဲ့ပြီး ပြီးခဲ့တဲ့ ဇူလိုင်ရွေးကောက်ပွဲမှာ ပါတီဟာ တောင်ပြိုကမ်းပြိုအနိုင်ရခဲ့ပါတယ်၊ သူ့ကို ၂၀၂၁ ဒီဇင်ဘာမှာ ပါတီက ဝန်ကြီးချုပ် လောင်းအဖြစ် ရွေးချယ်ခဲ့ပါတယ်။

သူ့ကို ၁၉၇၇ခုနှစ် အောက်တိုဘာ ၂၀ ရက်မှာ ကမ်ပေါင်းချမ်းပြည်နယ်(ယခု သဘောင်ခမမ်ပြည်နယ်) ၊ မမ်မတ်ခရိုင်၊ သမာရွာမှာ  ကမ္ဘောဒီးယားကို ခမာနီတွေအုပ်စိုးစဉ်ကာလမှာ မွေးဖွားခဲ့ပါတယ်။သူဟာ ပစ်ချ်ချန်မိုနီနှင့်လက်ထပ်ပြီး သမီးနှစ်ယောက်၊သားတစ်ယောက်ရှိပါတယ်။

Source: Khmer Times

#Local_News
Published- 6-8-2023

ယနေ့ ဩဂုတ်လ (၆ )ရက် နံနက် ၇ နာရီ ဝန်းကျင်အချိန်က မုဒုံမြို့အနီး ခရီးသည်တင်ယာဉ်တစ်စီး တိမ်းမှောက်ခဲ့ရာ ယာဉ်ပေါ်ပါ ခရီးသည်အချို့ထိခိုက်ဒဏ်ရာရရှိခဲ့ကြောင်း ဒေသအခြေစိုက် လူမှုကယ်ဆယ်ရေးအဖွဲ့ထံမှ သိရသည်။

တိမ်းမှောက်သည့် ခရီးသည်တင်ယာဉ်အတွင်း လိုက်ပါလာသည့် ခရီးသည် (၁၃)ဉီးမှာ အသက်အန္တရာယ်မစိုးရိမ်ရဘဲ ထိခိုက်ဒဏ်ရာအနည်းငယ်သာရရှိခဲ့သည်ဟုဆိုသည်။

အဆိုပါ ဒေသခံလူမှုကယ်ဆယ်ရေးအဖွဲ့၏ လူမှုကွန်ရက်စာမျက်နှာတွင် " ခရီးသည်များ ပြင်းထန်ထိခိုက်မှုမရှိခဲ့ဘဲ ပွန်းပဲ့ဒဏ်ရာမျှသာရရှိခဲ့တာကြောင့် အသင်းက ဆေးထည့်ကူညီခဲ့ပြီး ကားဆွဲဝိုင်းဝန်းကူညီပေးခဲ့တယ်" ဟု ရေးသားဖော်ပြထားသည်။

ယင်းဖြစ်စဉ်သည် ရန်ကုန်မြို့မှ ရေးမြို့သို့ မောင်းနှင်လာသောခရီးသည်တင်ယာဥ်သည် သံဖြူဇရပ်-မော်လမြိုင်လမ်းမကြီး၊ မုဒုံမြို့နယ်၊ ရောင်းဒေါင်းကျေးရွာနှင့် ကွာန်လှာကျေးရွာအကြား လမ်းချော်၍ တိမ်းမှောက်မှုဖြစ်ပွားခဲ့သည့် ဖြစ်စဉ်တစ်ခု ဖြစ်ကြောင်း သိရသည်။

#ခရီးသည်တင်ယာဉ်တစ်စီးတိမ်းမှောက်
#YMG/my
#Yangon_Times

#Local_News
Published-6-8-2023

Level 4 အဆင့် မီးလောင်ကျွမ်းခဲ့သော မော်လမြိုင်မြို့၊ ပန်းဘဲတန်းရပ်ရှိ  အမှတ် (၉) အခြေခံပညာအထက် တန်း‌ကျောင်း ပြန်လည်ဆောက်လုပ်ရန် ကျပ်သိန်း (၅၀၀)ခန့် ရရှိပြီဖြစ်ကြောင်း ယင်း ကျောင်းအကျိုးတော်ဆောင်အဖွဲ့ထံက သိရသည်။

အဆိုပါ လှူဒါန်းငွေကို ကျောင်းသားဟောင်းများ၊ ကျောင်းသားမိဘများနှင့်စေတနာရှင်များက ကျောင်းအကျိုးတော်ဆောင်အဖွဲ့နှင့် မိဘဆရာအသင်းသို့ လာရောက်လှူဒါန်းသောစာရင်းအရ သိရသည်။

အဆိုပါ ကျောင်းမီးလောင်မှုသည် ဩဂုတ်(၃) ရက်နေ့ ည ၁၁ နာရီ မိနစ် ၄၀ အချိန်ခန့်တွင် စတင်လောင်ကျွမ်းခဲ့ခြင်းဖြစ်ပြီး၊  ဩဂုတ်(၄) ရက် နံနက် ၂ နာရီ ဝန်းကျင်ခန့်တွင် မီးငြိမ်းသတ်နိုင်ခဲ့ခြင်းဖြစ်သည်။

မီးလောင်ကျွမ်းမှုအတွက် ရေဂါလံစုစုပေါင်း (၆၀၀၀၀) ကျော်ဖြင့် ငြိမ်းသတ်ခဲ့ရခြင်းဖြစ်ကာ မီးလောင်ပြင်သို့ မီးသတ်ရေသယ်ယာဉ် ၁၀ စီး၊ မီးသတ်ယာဉ် ၄ စီး၊ ဒေသအခြေစိုက် လူမှုကူညီရေးအဖွဲ့ယာဉ်များ၊ ပြင်ပရေသယ်ယာဉ်များအပါအဝင်စုစုပေါင်း ယာဉ်စီးရေ (၃၀)ကျော်ဖြင့် ငြိမ်းသတ်ခဲ့ရကြောင်း သိရသည်။

အဆိုပါ ကျောင်းသည် နှစ်ပေါင်းတစ်ရာ့နှစ်ဆယ်ကျော်သက်တမ်းရှိပြီး၊ မော်လမြိုင်မြို့၌ ပထမဆုံးပေါ်ထွန်းခဲ့သော အမျိုးသားပညာအထက်ကျောင်း တစ်ကျောင်းလည်းဖြစ်သည်။

#YMG/my
#Yangon_Times

#Local_News
Published-6-8-2023

အာဆီယံအွန်လိုင်းအရောင်းအဝယ်နေ့ ASEAN Online Sale Day (AOSD-2023)ကို ဩဂုတ် (၈) ရက်မှ (၂၂) ရက်နေ့အထိ ကျင်းပပြုလုပ်မည်ဖြစ်ရာ မြန်မာနိုင်ငံမှ လုပ်ငန်းရှင်များကို ပါဝင်ရန် ဖိတ်ခေါ်ထားရှိကြောင်း သိရသည်။

လုပ်ငန်းရှင်များဖိတ်ခေါ်ရာတွင် e-Commerce လုပ်ငန်းများ၊ Online ဖြင့် ဆောင်ရွက်လျက်ရှိသည့် SME/MSMEs လုပ်ငန်းများကို ဖိတ်ခေါ်ထားခြင်းဖြစ်ပြီး၊ အသေးစိတ်အချက်အလက်များဘသိရှိလိုပါ၀၆၇-၄၀၈၆၇၀/၀၆၇-၄၀၈၄၈၅ သို့ ဆက်သွယ်မေးမြန်းနိုင်ပါကြောင်း အသိပေးထားသည်။

ASEAN Online Sale Day ပြုလုပ်ရခြင်းသည် အာဆီယံနိုင်ငံများအချင်းချင်းအကြား e-Commerce ဖွံ့ဖြိုးတိုးတက်မှု ပိုမိုတိုးတက်စေရန် ရည်ရွှယ်လုပ်‌ဆောင်ခြင်းဖြစ်သည်ဟု ဆိုသည်။

ထို့အပြင်  ဒေသတွင်းရှိနယ်စပ်ဖြတ်ကျော် e-Commerce ကို အားပေး ကူညီရန်၊ e-Commerce တွင် စားသုံးသူယုံကြည်မှုပိုမိုတိုးတက်လာစေရန်၊ ဒေသတွင်း စီးပွားရေး ဖွံ့ဖြိုးတိုးတက်မှု၏ အဓိကမောင်းနှင်အား တစ်ခုဖြစ်သော e-Commerce ၏ အခန်း ကဏ္ဍကိုပိုမို အားဖြည့်ပေးရန်နှင့် အာဆီယံနိုင်ငံများ၏ e-Commerce စီးပွားရေးလုပ်ငန်းများ SME/MSMEs နှင့် စားသုံးသူများအတွက် အကျိုးဖြစ်ထွန်းစေရန်ရည်ရွယ်ဆောင်ရွက်ခြင်း ဖြစ်သည်။

ASEAN Online Sale Day အား ၂၀၂၀ ပြည့်နှစ်တွင် စတင်ကျင်းပခဲ့ရာ ယခုအခါ (၄) နှစ်မြောက်ရှိခဲ့ပြီဖြစ်သည်။

#YMG/my
#Yangon_Times

#Local_News
Published 6-8-2023

ရေကြီးရေလျှံဖြစ်ပွားနေသော ကရင်ပြည်နယ်နှင့် မွန်ပြည်နယ်တို့တွင် ယနေ့ ညနေပိုင်းအချိန်အထိ မိုးဆက်လက်ကြီးနိုင်သည်ဟု မိုးဇလက သတိပေးထားသည်။

အဆိုပါ ဒေသများတွင် နေရာကွက်၍ မိုးကြီးနိုင်ပြီး၊ ရွာရန်ရာနှုန်းပြည့်ဖြစ်သည်ဟုဆိုသည်။

ထို့အပြင် မိုးဇလ၏ ယနေ့ ဩဂုတ်လ ၆ ရက် ညနေအထိ ခန့်မှန်းချက်မှာ စစ်ကိုင်းတိုင်းဒေသကြီးအောက်ပိုင်း၊  မကွေးတိုင်းဒေသကြီးနှင့် ကယားပြည်နယ် တို့တွင် နေရာကျဲကျဲ၊ စစ်ကိုင်းတိုင်းဒေသကြီးအထက်ပိုင်း၊ မန္တလေးတိုင်းဒေသကြီး၊ ဧရာဝတီတိုင်းဒေသကြီးနှင့် ရှမ်းပြည်နယ်(မြောက်ပိုင်း)တို့တွင် နေရာစိပ်စိပ်နှင့် ကျန်တိုင်းဒေသကြီးနှင့် ပြည်နယ်တို့တွင် နေရာအနှံ့အပြား မိုးထစ်ချုန်းရွာနိုင်ကြောင်း ထုတ်ပြန်အသိပေးထားသည်။

အလားတူ ကချင်ပြည်နယ်၊ ချင်းပြည်နယ်၊ ရခိုင်ပြည်နယ်၊ ကရင်ပြည်နယ်နှင့် မွန်ပြည်နယ်တို့တွင် နေရာကွက်၍ မိုးကြီးနိုင်ပြီး၊ ရွာရန်ရာနှုန်းပြည့် ဖြစ်သည်။

လက်ရှိတွင် ကပ္ပလီပင်လယ်ပြင်နှင့် ဘင်္ဂလားပင်လယ်အော်တောင်ပိုင်းတို့တွင် မုတ်သုံလေ အားကောင်းနေဆဲဖြစ်ပြီး၊ ကျန်ဘင်္ဂလားပင်လယ်အော်တွင် မုတ်သုံလေ အားအသင့်အတင့်ရှိနေကြောင်း မိုးဇလက ထုတ်ပြန်ထားသည်။

#YMG/my
#Yangon_Times

#Local_News
Published-6-8-2023

တစ်နိုင်ငံလုံးတွင် EV ကားများအတွက် လျှပ်စစ်အားသွင်းနိုင်မည့်နေရာ(Charging Station) များကို ရှေ့ပြေးစီမံကိန်း (Pilot project) ဖြင့်ဆောင်ရွက်လျက်ရှိကြောင်းသိရသည်။

ယခုအခါ ရန်ကုန်မြို့ ပြည်သူ့ရင်ပြင်တွင် ဩဂုတ် လ (၄)ရက် မှ ယနေ့ ဩဂုတ် (၆)ရက်အထိ လျှပ်စစ်ကား (EV) ပြပွဲပါဝင်သည့်
၂၀၂၃ ခုနှစ် မိုးရာသီဈေးရောင်းပွဲတော်ကို ကျင်းပပြုလုပ်လျက်ရှိသည်။

အဆိုပါ EV ကားပြပွဲတွင်  တရုတ်နိုင်ငံထုတ် EVကားအမျိုးအစားများဖြစ်သည့် BYD၊ VOYAH၊ MG5၊ ATTO ၊ KAIYI ကားအပြင် NETA u pro အမျိုးအစားများကို ပြသထားသည်။

လက်ရှိတွင် ယင်း EV ကားများကို  ကြို တင်မှာယူငွေ သိန်း (၅၀) ပေးသွင်း၍ ဝယ်ယူနိုင်ကြောင်း သိရသည်။

"အစိုးရက တစ်နိုင်ငံလုံးမှာ EV ကားအတွက် Charging Station တွေကို ဒီနှစ်အကုန်အထိ Pilot project နဲ့ဆောင်ရွက်နေတာဖြစ်တဲ့အတွက် EVကားက ဝယ်ယူစီးသင့်တယ်" ဟု NETA အမည်ရှိ EVကား အရောင်းပိုင်းတာဝန်ခံတစ်ဦးပြောသည်။

ထို့အပြင် အဆိုပါပြပွဲတွင် လျှပ်စစ်  EV သုံးဘီးဆိုင်ကယ်များကိုပါ ထည့်သွင်းပြသထားပြီး၊ မော်ဒယ်များအလိုက် XT, TL5, TI 150D, CX,WH စသည့် အမျိုးအစားများကို ထည့်သွင်းပြသထားသည်။

လျှပ်စစ်သုံးဘီးဆိုင်ကယ်များတွင် လူစီးသီးသန့်နှင့် ကုန်တင်ဆိုင်ကယ်သီးသန့် နှစ်မျိုး ပြသထားသည်။

ထို့အပြင် ပြပွဲအတွင်း ရန်ကုန်တိုင်းဒေသကြီး စက်မှုဇုန် (၂၉)ဇုန်က ထုတ်လုပ်သည့် ထုတ်ကုန်ပစ္စည်းများ၊ MSMEs ထုတ်ကုန်ပစ္စည်းများကိုလည်း ထည့်သွင်းပြသထားကြောင်း သိရသည်။

#YMG/my
Yangon_Times

#Local_News
Published_ 6 August 2023

ကျိုက်ထိုမြို့နယ်နှင့် မင်္ဂလာဒုံမြို့နယ်တို့တွင် ငွေကျပ် ၃ ဒသမ ၉၆ ဘီလီယံကျော် တန်ဖိုးရှိ အိုက်စ်(မက်သ်အဖက်တမင်း)၊ စိတ်ကြွရူးသွပ်ဆေးပြားနှင့် ကက်တမင်းများ ဖမ်းဆီးရမိခဲ့ကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန်ထားပါတယ်။

မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များနှင့် ပူးပေါင်းအဖွဲ့သည် ဇူလိုင် ၂၆ ရက် ည ၉ နာရီခွဲအချိန်ခန့် မွန်ပြည်နယ်၊ ကျိုက်ထိုမြို့နယ်၊ မရမ်းချောင် ပူးပေါင်းစစ်ဆေးရေးစခန်းတွင် ရန်ကုန်မှရေးသို့သွားသည့် ခရီးသည်တင်ယာဉ်ပေါ်၌ အောင်မင်းထွန်းအား အိုက်စ်(မက်သ်အဖက်တမင်း) ၃ ကီလိုနှင့်အတူဖမ်းဆီးရမိခဲ့ပါတယ်။

စစ်ဆေးဖော်ထုတ်ချက်အရ ဇူလိုင် ၂၇ ရက် မွန်းတည့် ၁၂ နာရီအချိန် ဖမ်းမိမူးယစ်ဆေးဝါးများ သယ်ဆောင်ရောင်းဝယ်ရာတွင် ပူးပေါင်းပါဝင်သည့် ညီညီထွန်း (ခ) ညီညီ အား ရန်ကုန်တိုင်းဒေသကြီး၊ မြောက်ဥက္ကလာပမြို့နယ်၊ (ဌ)ရပ်ကွက်ရှိ ၎င်း၏နေအိမ်တွင် လည်းကောင်း၊ ညနေ ၅ နာရီအချိန် စံလင်း နှင့် ထွန်းနိုင်မိုး တို့အား မင်္ဂလာဒုံမြို့နယ်၊ အမှတ်(၃)လမ်းမကြီးတွင် အိုက်စ် ၁ ကီလို၊ Honda Fit မော်တော် ယာဉ် ၁ စီးနှင့် လည်းကောင်း ဆက်လက်ဖမ်းဆီးရမိခဲ့ပါတယ်။

ထိုနေ့ ညနေ ၅ နာရီခွဲအချိန် ဖမ်းမိတရားခံ ထွန်းနိုင်မိုး ငှားရမ်းနေထိုင်တဲ့ မင်္ဂလာဒုံမြို့နယ်၊ ပုလဲ(၁) ရပ်ကွက်၊ ခိုင်ရွှေဝါလမ်းရှိ နေအိမ်တွင် အောင်ကိုဦး နှင့်အတူ အိုက်စ်(မက်သ်အဖက်တမင်း) ၁၁၄ ကီလို၊ စိတ်ကြွရူးသွပ်ဆေးပြား ၁၀ သိန်း၊ ကက်တမင်း ၆၂၀ ဂရမ် ထပ်မံဖမ်းဆီးရမိခဲ့ပါတယ်။

ထို့ကြောင့် စုစုပေါင်းဒေသကာလတန်ဖိုးငွေကျပ် ၃ ဒသမ ၉၆ ဘီလီယံကျော် တန်ဖိုးရှိ အိုက်စ်(မက်သ်အဖက်တမင်း) ၁၁၈ ကီလို၊ စိတ်ကြွရူးသွပ်ဆေးပြား ၁၀ သိန်း၊ ကက်တမင်း ၆၂၀ ဂရမ်တို့ကို သိမ်းဆည်းရမိခဲ့သဖြင့် ၎င်းတို့ ၅ ဦးအား ဥပဒေအရအရေးယူ ထားပြီး ကွင်းဆက်ပြစ်မှုကျူးလွန်သူများကို ဆက်လက်စစ်ဆေးဖော်ထုတ်လျက်ရှိ ကြောင်း မြန်မာနိုင်ငံရဲတပ်ဖွဲ့က သတင်းထုတ်ပြန်ထားပါတယ်။

#Local_News #အိုက်စ်၊စိတ်ကြွရူးသွပ်ဆေးပြားနှင့်ကက်တမင်းများဖမ်းဆီးရမိ
#ygm_mnn
#Yangon_Media_Group

#Local_Sport
Published-6-8-2023

ရာသီကြိုခြေစမ်းပွဲစဉ်တွေက အသင်းရဲ့ ခြေစွမ်းကို ကျေနပ်အားရပေမယ့်ကြီးမားတဲ့အားနည်းချက် တွေကိုပြုပြင်ရဦးမယ်လို့ ရီးရဲလ်မက်ဒရစ်နည်းပြ အန်ဆယ်လော့တီကဆိုလိုက်ပါတယ်။ရီးရဲလ်အသင်းဟာ ရာသီကြို အဖွင့်ပွဲစဉ်မှာ အေစီမီလန်ကို ၃-၂ နဲ့အနိုင်ရပြီး မန်ယူကို၂-၀နဲ့ ဆက်နိုင်ခဲ့ပေမယ့် နောက်ပွဲစဉ်တွေမှာ ဘာစီလိုနာကို ၀-၃၊ ဂျူဗင်တပ်ကို ၁-၃ ဂိုးတွေနဲ့အသီးသီး ဂိုးပြတ် အရေးနိမ့်ခဲ့ပါတယ်။ နောက်ဆုံး၂ပွဲမှာ ၆ ဂိုးအထိ ပေးခဲ့ရတဲ့အတွက် ခံစစ်ပိုင်းကို အဓိကထားပြင်ဆင်ဖို့လိုကြောင်း နည်းပြ က၀န်ခံပြောဆိုပါတယ်။

"တိုက်စစ်ပိုင်းအလွန်ကောင်းပေမယ့် ခံစစ်ပိုင်းလိုအပ်ချက်တွေရှိနေတဲ့အတွက် ဘာစီလိုနာနဲ့ ဂျူဗင်တပ် တို့ကို ၃ ဂိုးစီ ပေးခဲ့ရတာကိုပြုပြင်ဖို့လိုပါတယ်။နေရာယူမှု၊ အာရုံစူးစိုက်မှုနဲ့ စိတ်ခံယူချက်တွေကို ပြင်ဆင်ရမှာပါ။ဒီအချက်တွေမှာ ဟန်ချက်မညီ ဖြစ်နေပါတယ်"လို့အန်ဆယ်လော့တီက ဆိုပါတယ်။

ရီးရဲလ်မက်ဒရစ်ဟာလာလီဂါအဖွင့်ပွဲစဉ်အဖြစ် ဩဂုတ်၁၂ရက် ကျရင်အဝေးကွင်းမှာ ဘီလ်ဘာအိုနဲ့ရင်ဆိုင်ရမှာပါ။အန်ဆယ်လော့တီကတော့ အသစ်ပြင်ဆင်လေ့ကျင့်နေတဲ့ ၄-၁-၂-၁-၂ ကစားကွက်ကို ဆက်သုံးစွဲဦးမယ်လို့ ပြောပါတယ်။အခြားသတင်းတစ်ရပ်မှာတော့ ရီးရဲလ်မက်ဒရစ်ကို ၂၀၂၄ ခုနှစ်မှာပြောင်းရွှေ့လာဖို့ သတင်းထွက်နေတဲ့ နည်းပြဇာဘီ အလွန်ဆိုဟာလေဗာကူဆင်အသင်းနဲ့ ၂၀၂၆ ခုနှစ်အထိစာချုပ်သက်တမ်း တိုးမြှင့်လိုက်တယ်လို့သိရပါတယ်။ရီးရဲကစားသမားဟောင်းဖြစ်တဲ့အလွန်ဆိုဟာ ထိပ်တန်း နည်းပြသက်တမ်း ၁နှစ်သာရှိသေးပေမယ့် လေဗာကူဆင်အသင်းကိုပြီးခဲ့တဲ့ရာသီက အောင်မြင်မှုတွေရအောင်စွမ်းဆောင်ပေးနိုင်ခဲ့ပါတယ်။

#Local_Sport #အန်ဆယ်လော့တီ
#Ref: Managing Madrid