Published_ 15 July 2023

အိုအိုင်စီကိုယ်စား ပါကစ္စတန်နိုင်ငံမှ စာရွက်စာတမ်းအမှတ်၊ A/HRC/53/L.30/Rev.1 ဖြင့် တင်သွင်းခဲ့သည့် ဆုံးဖြတ်ချက်အဆိုကို ယမန်နေ့ ဇူလိုင်လ ၁၄ ရက်တွင် ကောင်စီက အတည်ပြုချမှတ်ခဲ့ကြောင်း၊ဆွေးနွေးပွဲများနှင့် လတ်တလောချမှတ်ခဲ့သော ဆုံးဖြတ်ချက်အဆို တို့သည် မြန်မာပြည်သူများအပေါ် အမုန်းစကားမြောက်ကြောင်းနှင့် ယဉ်ကျေးမှုနှင့်တိုင်းရင်းသားမျိုးစုံ ပါဝင်သော မြန်မာ့အသိုက်အဝန်းအကြား စိတ်ဝမ်းကွဲပြားစေရန် လှုံ့ဆော်ရာရောက်ကြောင်းနိုင်ငံခြားရေးဝန်ကြီးဌာနက ထုတ်ပြန်ထားသည်။

အစ္စလာမ်မစ်ပူးပေါင်းဆောင်ရွက်ရေးအဖွဲ့(အိုအိုင်စီ)က တင်သွင်းခဲ့သော ဆုံးဖြတ်ချက် အဆိုအရ ဆွေးနွေးပွဲတစ်ရပ်ကို ပြီးခဲ့သည့် ဇွန်လ၂၁ ရက် တွင် ကျင်းပခဲ့ကြောင်း၊ ဥရောပသမဂ္ဂ (အီးယူ)က တင်သွင်းခဲ့သော ဆုံးဖြတ်ချက်အဆိုအရ လူ့အခွင့်အရေးဆိုင်ရာမဟာမင်းကြီးနှင့် မြန်မာနိုင်ငံ လူ့အခွင့်အရေးအခြေအနေဆိုင်ရာ အထူးအစီရင်ခံစာတင်သွင်းသူတို့နှင့် အပြန်အလှန်ဆွေးနွေးပွဲများကို လက်ရှိ ဇူလိုင်လ ၆ ရက်တွင်ကျင်းပခဲ့သေးကြောင်းလည်း သိရသည်။

မြန်မာအရေးကိစ္စသည် ပြည်တွင်းရေးသာဖြစ်ပြီး နိုင်ငံတကာ ငြိမ်းချမ်းရေးနှင့် လုံခြုံရေးအပေါ် မည်သည့်ခြိမ်းခြောက်မှုမျှ မဖြစ်ပေါ်စေသည့်အတွက် ကုလသမဂ္ဂ လူ့အခွင့်အရေးကောင်စီ၏ (၅၃) ကြိမ်မြောက် ပုံမှန်အစည်းအဝေးကာလတွင် အတည်ပြု၊ ထုတ်ပြန်ခဲ့သည့် အစီရင်ခံစာများနှင့် ဆုံးဖြတ်ချက်အဆိုတို့တွင် ကုလသမဂ္ဂလုံခြုံရေးကောင်စီနှင့် အပြည်ပြည်ဆိုင်ရာရာဇဝတ်မှုတရားရုံး (ICC) တို့ရည်ညွှန်းဖော်ပြမှုများကို မြန်မာနိုင်ငံက ပြင်းထန်စွာ ကန့်ကွက်ပယ်ချကြောင်း နိုင်ငံခြားရေးဝန်ကြီးဌာနက ထုတ်ပြန်သည်။

ဂျီနီဗာမြို့တွင် ဇွန်လ ၁၉ ရက်မှ ဇူလိုင်လ ၁၄ ရက်ထိ ကျင်းပခဲ့သည့် လူ့အခွင့်အရေး ကောင်စီ၏ (၅၃)ကြိမ်မြောက် ပုံမှန်အစည်းအဝေး ကာလအတွင်း မြန်မာနိုင်ငံဆိုင်ရာ အစည်းအဝေးများကို သက်ဆိုင်ရာ နိုင်ငံမပါဘဲ ကျင်းပခဲ့ပြီး ယင်းမှာကောင်စီ၏မူဝါဒများနှင့် ရည်ရွယ်ချက်တို့နှင့် သွေဖည်လျက်ရှိကြောင်းလည်း အဆိုပါ ထုတ်ပြန်ချက်က ဖော်ပြထားသည်။

"ဆွေးနွေးပွဲများနှင့် လတ်တလောချမှတ်ခဲ့သော ဆုံးဖြတ်ချက်အဆို တို့သည် မြန်မာပြည်သူများအပေါ် အမုန်းစကားမြောက်ကြောင်းနှင့် ယဉ်ကျေးမှုနှင့်တိုင်းရင်းသားမျိုးစုံ ပါဝင်သော မြန်မာ့အသိုက်အဝန်းအကြား စိတ်ဝမ်းကွဲပြားစေရန် လှုံ့ဆော်ရာရောက်ကြောင်း စိုးရိမ်စွာဖြင့် မှတ်သားရသည်။ ၂၀၁၇ ခုနှစ် ရခိုင်ပြည်နယ်မြောက်ပိုင်းဖြစ်စဉ် ပေါ်ပေါက်ခဲ့ရသည့် အကြောင်းရင်းကို မျက်ကွယ်ပြုခြင်းဖြင့် လက်တွေ့မြေပြင်အခြေအနေကို ထင်ဟပ်နိုင်မည် မဟုတ်ပါ။ ကောင်စီ၏ ဆွေးနွေးပွဲအမျိုးမျိုးကို အသုံးချ၍ တစ်ဖက်သတ်ဇာတ်ကြောင်းများ ဖန်တီးနေစေကာမူ ကော့ဘဇားရှိ စခန်းများတွင် တိုက်ပွဲများနှင့် လက်နက်ကိုင်တိုက်ခိုက်မှုများက အကာမူဂျာဟီဒင် ခေါ် အာဆာ အကြမ်းဖက်အဖွဲ့၏ အကြမ်းဖက်လုပ်ရပ် များကို သက်သေပြလျက်ရှိသည်။ ယင်းအကြမ်းဖက်မှုများကြောင့် ၂၀၁၇ ခုနှစ်တွင် ရခိုင်ပြည်နယ်မှ အတင်းအကြပ် နေရပ်စွန့်ခွာခဲ့မှုများ ပေါ်ပေါက်စေခဲ့ပြီး ပြန်လည်လက်ခံရေးလုပ်ငန်းစဉ်ကို ယနေ့ထက်တိုင် ဟန့်တားလျက်ရှိသည်။လူ့အခွင့်အရေးဆိုင်ရာမဟာမင်းကြီး တင်ပြချက်တွင် သီးခြားကုလသမဂ္ဂရုံး တစ်ရုံးက ကိုင်တွယ်သည့် လူသားချင်းစာနာမှုဆိုင်ရာကိစ္စများကို အထူးပြုထားရာ လုပ်ငန်းများ ထပ်တူဖြစ်နေကြောင်းနှင့် မဟာမင်းကြီး၏ လုပ်ပိုင်ခွင့်ကို ကျော်လွန်နေကြောင်း ပြသရာရောက်သည်။ လူသားချင်းစာနာမှုဆိုင်ရာ သွားရောက်ခွင့်များငြင်းပယ်ကြောင်း မဟာမင်းကြီး၏အစီရင်ခံစာတွင် စွပ်စွဲချက်မှာ လွဲမှားလျက်ရှိသည်။"ဟု နိုင်ငံခြားရေးဝန်ကြီးဌာန၏ ထုတ်ပြန်ချက်တွင် ဆိုထားသည်။

မြန်မာနိုင်ငံအစိုးရအနေဖြင့် ၂၀၂၁ ခုနှစ်မှ ၂၀၂၃ ခုနှစ်အတွင်း အီးယူအပါအဝင် သံရုံးများကို ခရီးသွားလာခွင့် ၆၂ ကြိမ်၊ ကုလသမဂ္ဂအေဂျင်စီများကို ၄၆ ကြိမ် နှင့် အာဆီယံလူသားချင်း စာနာထောက်ထားမှုအကူအညီပေးရေး ညှိနှိုင်းမှု ဗဟိုဌာန (AHA Centre) ကို ၁၀ ကြိမ် ခွင့်ပြုခဲ့သည့်အပြင် ရခိုင်ပြည်နယ်အစိုးရက ကမ္ဘာ့စားနပ်ရိက္ခာအစီအစဉ် (WFP) ကိုအကြိမ် ၆၀ ကျော်၊ အစိုးရမဟုတ်သောနိုင်ငံတကာအဖွဲ့အစည်းများကို အကြိမ် ၈၀ ကျော်နှင့် အပြည်ပြည်ဆိုင်ရာ ကြက်ခြေနီကော်မတီ (ICRC)ကို အကြိမ်ပေါင်း ၅၀၀ ကျော် ခရီးသွားလာခွင့်ပြုခဲ့ကြောင်း၊အထူးအစီရင်ခံစာတင်သွင်းသူသည် ပြည်သူ ၆၀၉၁ ဦးကို သေဆုံးစေခဲ့သော ဖြစ်စဉ်များကို ဖုံးကွယ်ထားကြောင်း၊ မြန်မာနိုင်ငံ၏ အများပြည်သူဆိုင်ရာ ဝန်ဆောင်မှုများအတွက် ဖြည့်ဆည်းပေးသည့်အစိုးရပိုင်လုပ်ငန်းများအပေါ် ဒဏ်ခတ်ပိတ်ဆို့မှုများ ချမှတ်ရန် အဖွဲ့ဝင်နိုင်ငံ များကို ထပ်မံတောင်းဆိုထားသည်မှာလည်း ပြည်သူများကိုထိခိုက်စေရန်နှင့် မြန်မာနိုင်ငံ၏ ဖွံ့ဖြိုးတိုးတက်မှုအခွင့်အရေးကို ချိုးဖောက်ရန်အတွက်သာဖြစ်ကြောင်း နိုင်ငံခြားရေးဝန်ကြီးဌာနက ထုတ်ပြန်ထားသည်။
Yangon_Time/BM
#Local_News
#YMG #Yangon_Times

Published_ 15 July 2023

ထိုင်းနိုင်ငံမှ Move Forward Party (MFP) ပါတီနဲ့ ခေါင်းဆောင်'ပီတာလင်မ်ဂျရိုအင်ရတ်'တို့ အနေဖြင့် လွှတ်တော်မှရွေးချယ်မယ့် ဝန်ကြီးချုပ်ရွေးကောက်ပွဲမှာ အနိုင်မရခဲ့ပါက ဖွေထိုင်းပါတီက ညွန့်ပေါင်းအစိုးရအသစ် ခေါင်းဆောင်ဖြစ်လာရန် အခွင့်သာနေကြောင်း နိုင်ငံရေးသိပ္ပံအကယ်ဒမီအဖွဲ့က သောကြာနေ့က ပြောကြားလိုက်ပါတယ်။

အောက်လွှတ်တော်မှာ ဒုတိယမြောက် နေရာအများဆုံးရရှိထားတဲ့ ဖွေထိုင်းပါတီအနေနဲ့ MFP ထံမှ ခေါင်းဆောင်မှုကို လွှဲပြောင်းရယူခွင့်ရှိနေကာ MFP ဦးဆောင်တဲ့ မဟာမိတ်အဖွဲ့ပြင်ပမှ အခြားပါတီကြီးများနဲ့ ပေါင်းစည်းကာ ညွန့်ပေါင်းအသစ် ဖွဲ့စည်းလာနိုင်ကြောင်း ဘူရာဖာတက္ကသိုလ်မှ 'အိုလန်ထင်ဘန်တီယို'က Bangkok Post ကို ပြောကြားခဲ့ပါတယ်။

လက်ရှိမဟာမိတ်အဖွဲ့မှာ ဖွေထိုင်းအပါအဝင် ပါတီ ၈ ခုဖြင့် ဖွဲ့စည်းထားတာ ဖြစ်ပါတယ်။

ဖွေထိုင်းပါတီအနေနဲ့ စောင့်ကြည့်ပြီး အကောင်းဆုံးကို ရွေးချယ်ရုံဖြစ်ကြောင်း၊ သူတို့ဆီကနေ ဝန်ကြီးချုပ်လောင်း လွှတ်မှာလား၊ တခြားပါတီကနေ လွှတ်မှာလားဆိုတာ ဆုံးဖြတ်နိုင်မှာဖြစ်ကြောင်း မစ္စတာအိုလန်က ပြောပြပါတယ်။

မစ္စတာပီတာအနေဖြင့် ဝန်ကြီးချုပ်မဲပေးမှုမှာ အနိုင်မရပါက ဖွေထိုင်းပါတီဟာ MFP ဦးဆောင်ညွန့်ပေါင်းအဖွဲ့မှာ ဆက်နေမှာလား ဒါမှမဟုတ် ဘက်ပြောင်းပြီး ညွန့်ပေါင်းအဖွဲ့အသစ် ဖွဲ့စည်းမှာလားဆိုတာ ဆုံးဖြတ်ရမှာဖြစ်ပါတယ်။

အကယ်၍ ဖွေထိုင်းက ဒီအဖွဲ့မှာပဲ ဆက်နေပြီး သူတို့ကိုယ်ပိုင် ဝန်ကြီးချုပ်လောင်း ကိုယ်စားလှယ်ဖြင့် ရွေးကောက်ခံမယ်ဆိုပါက အထက်လွှတ်တော်ကနေပါ လုံလောက်တဲ့ မဲအရေအတွက် ရနိုင်ဖွယ်မရှိဘူးလို့လည်း မစ္စတာအိုလန်က ပြောပြပါတယ်။

ကြာသပတေးနေ့က မစ္စတာပီတာဟာ မဲပေးမှုမှာ အနိုင်မရခဲ့တာကြောင့် MFP ထောက်ခံသူတွေ လမ်းမပေါ်ထွက်လာနိုင်ချေ ရှိနေကာ မစ္စတာပီတာအနေဖြင့် ဝန်ကြီးချုပ်‌ရာထူးအတွက် ထပ်မံယှဉ်ပြိုင်ခွင့် ရှိနေပါတယ်။

ကြာသပတေးနေ့ မဲပေးမှုမှာ မဲပေးခြင်းမပြုတဲ့ လွှတ်တော်အမတ်တွေက မစ္စတာပီတာကို မထောက်ခံရတဲ့ အကြောင်းအရင်းက ဘုရင်မင်းမြတ်စော်ကားမှု ပုဒ်မ ၁၁၂ အပေါ် MFP ရဲ့ရပ်တည်ချက်ကြောင့် ဖြစ်တယ်လို့ ဆိုနေကြပါတယ်။

MFP နဲ့ မစ္စတာပီတာအနေဖြင့်လည်း ပုဒ်မ ၁၁၂ ကို အဓိကပြုပြင်ချင်နေတာကြောင့် ဒီကိစ္စနဲ့ ပတ်သက်ပြီး နောက်ဆုတ်မယ်မထင်ကြောင်း သုံးသပ်ထားကြပါတယ်။
Source: Bangkok Post
#Asia_Politics
#YMG #Yangon_Times

Published 15 July 2023

မိခင်ဝမ်းထဲမှာ သန္ဓေသားကြီးထွားလာချိန်ကစပြီး မိခင်နဲ့ ကလေးကြား လွန်ဆွဲမှုတွေဖြစ်ပေါ်နေပါတယ်။

သန္ဓေသားကြီးထွားဖွံ့ဖြိုးဖို့အတွက် မိခင်ဆီကနေ အာဟာရဓာတ်များ လိုအပ်ပါတယ်။

မိခင်အနေဖြင့် ကိုယ်တိုင်ကျန်းမာရေးအတွက် အာဟာရဓာတ်များ လိုအပ်သလို ကလေးမွေးဖွားဖို့နဲ့ နို့တိုက်ကျွေးဖို့အတွက်လည်း အာဟာရဓာတ်လိုအပ်ပါတယ်။

ထိုကဲ့သို့ နှစ်ဦးနှစ်ဖက်ကြား ပြိုင်ဆိုင်နေရတာဟာ မိဘတစ်ဦးချင်းစီမှ ရရှိထားတဲ့ မျိုးဗီဇတွေကြောင့်ဖြစ်ကြောင်း Cell Metabolism မှာ ဖော်ပြခဲ့ပါတယ်။

ဖခင်ထံမှရရှိတဲ့ မျိုးဗီဇတွေ အထူးသဖြင့် IGF2 မျိုးဗီဇဟာ အာဟာရဓာတ်များကို ဆွဲယူပါတယ်။

အဆိုပါ IGF2 ကြောင့် သန္ဓေသားဖွံ့ဖြိုးလာကာ အချင်း၊ အသည်း၊ ဦးနှောက်တို့လို တစ်ရှူးတွေက အာဟာရဓာတ်များ ရရှိလာပါတယ်။

ဖခင်ဗီဇပါလာတဲ့ မျိုးဗီဇတွေက လောဘကြီးပြီး တစ်ကိုယ်ကောင်းဆန်ကာ မိခင်ထံမှ အရင်းအမြစ်များကို အသုံးချစေပါတယ်လို့ ယူကေ Wellcome-MRC တက္ကသိုလ်မှ ဒေါက်တာ'မီဂွယ်ကွန်စတန်ရှာ'က ပြောကြားခဲ့ပါတယ်။

ဒါပေမဲ့ မိခင်ရဲ့မျိုးဗီဇတွေကလည်း တစ်ကိုယ်ကောင်းဆန်ကာ အရှုံးပေးမှာမဟုတ်ပါဘူး။

သူမရဲ့မျိုးဗီဇတွေက သန္ဓေသားဖွံ့ဖြိုးမှုကို ကန့်သတ်ဖို့ကြိုးစားကာ သူမကျန်းမာရေးအတွက် အရေးပါတဲ့ ဂလူးကို့စ်နဲ့ အဆီဓာတ်တွေကို ထိန်းသိမ်းပေးပါတယ်။

ကိုယ်ဝန်ဆောင်တာက နှစ်ဖက်စလုံးမှ အတူတကွ လုပ်ဆောင်ရတာ ဖြစ်ပေမယ့် မိခင်နဲ့ ကလေးကြားယှဉ်ပြိုင်နေရတာ ဖြစ်ပြီး အချင်းက အဓိကကဏ္ဍက ပါဝင်ဖွယ်ရှိကြောင်း ကွန်စတန်ရှာက ရှင်းပြပါတယ်။

ဖခင်ထံမှ IGF2 မျိုးဗီဇ အလုပ်မလုပ်တဲ့အခါ သန္ဓေသားမှာ အာဟာရလုံလောက်စွာ မရဘဲ ကောင်းစွာဖွံ့ဖြိုးတော့မှာ မဟုတ်ကြောင်း ဦးဆောင်စာတမ်းပြုစုသူ ဒေါက်တာ'ဂျော့ဂျ်လိုပက်ဇ်တယ်လို'က ပြောပြခဲ့ပါတယ်။

ဒီသုတေသနက ကိုယ်ဝန်ဆောင်စဉ်အတွင်း အချင်းရဲ့ လုပ်ငန်းစဉ်နဲ့ကဏ္ဍကို အလေးပေးဖော်ပြနေပါတယ်။
Source: NY Post
#World_Health
#YMG #Yangon_Times

Published_ 15 July2023

ရခိုင်ပြည်နယ်မှ မြို့နယ် ၁၇ ခုကို သဘာဝဘေးအန္တရာယ် ကျရောက်သည့်ဒေသများအဖြစ် နိုင်ငံတော်စီမံအုပ်ချုပ်ရေးကောင်စီ က ထပ်မံသတ်မှတ်ကြေညာလိုက်သည်။

အဆိုပါ မြို့နယ်များမှာ ကျောက်ဖြူမြို့နယ်၊ မာန်အောင် မြို့နယ်၊ ရမ်းဗြဲမြို့နယ်၊ အမ်းမြို့နယ်၊ စစ်တွေမြို့နယ်၊ ပေါက်တောမြို့နယ်၊ ပုဏ္ဏားကျွန်းမြို့နယ်၊ ရသေ့တောင်မြို့နယ်၊ ဂွမြို့နယ်၊ တောင်ကုတ်မြို့နယ်၊ သံတွဲမြို့နယ်၊ မောင်တောမြို့နယ်၊ ဘူးသီးတောင်မြို့နယ်၊ ကျောက်တော်မြို့နယ်၊ မင်းပြားမြို့နယ်၊ မြောက်ဦးမြို့နယ်၊ မြေပုံမြို့နယ် တို့ ဖြစ်ကြသည်။

ယင်း မြို့နယ်များကို ပုံမှန်အနေအထားသို့ အပြည့်အဝ ပြန်လည်ရောက်ရှိလာစေရန် ပြန်လည်ထူထောင်ရေး လုပ်ငန်းများ ဆောင်ရွက်လျက်ရှိသည့် အချိန်ကာလဖြစ်သောကြောင့် သဘာဝဘေး အန္တရာယ်ဆိုင်ရာ စီမံခန့်ခွဲမှု နည်းဥပဒေ ပုဒ်မ ၂၆ အရ ယနေ့ ဇူလိုင်လ ၁၅ ရက်မှ စက်တင်ဘာလ ၁၄ ရက်ထိ သဘာဝဘေးအန္တရာယ် ကျရောက်သည့်ဒေသ ဖြစ်ကြောင်း ဒုတိယအကြိမ် ကြေညာလိုက်ခြင်း ဖြစ်ကြောင်း နစက သတင်းထုတ်ပြန်ရေးအဖွဲ့က ထုတ်ပြန်ထားသည်။

အလွန့်အလွန်အားကောင်းသော ဆိုင်ကလုန်းမုန်တိုင်းမိုခါ (MOCHA) ဖြတ်သန်းတိုက်ခတ်မှုကြောင့် ထိခိုက်ပျက်စီး ဆုံးရှုံးမှုများ ဖြစ်ပေါ်ခဲ့သော ရခိုင်ပြည်နယ်ရှိ ကျောက်ဖြူမြို့နယ်၊ မာန်အောင် မြို့နယ်၊ ရမ်းဗြဲမြို့နယ်၊ အမ်းမြို့နယ်၊ စစ်တွေမြို့နယ်၊ ပေါက်တောမြို့နယ်၊ ပုဏ္ဏားကျွန်းမြို့နယ်၊ ရသေ့တောင်မြို့နယ်၊ ဂွမြို့နယ်၊ တောင်ကုတ်မြို့နယ်၊ သံတွဲမြို့နယ်၊ မောင်တောမြို့နယ်၊ ဘူးသီးတောင်မြို့နယ်၊ ကျောက်တော်မြို့နယ်၊ မင်းပြားမြို့နယ်၊ မြောက်ဦးမြို့နယ်၊ မြေပုံမြို့နယ် တို့ကို သဘာဝဘေးအန္တရာယ်ဆိုင်ရာ စီမံခန့်ခွဲမှုဥပဒေ ပုဒ်မ ၁၁ အရ သဘာဝဘေးအန္တရာယ် ကျရောက်သော ဒေသများအဖြစ် ပြီးခဲ့သည့် မေလ ၁၅ ရက်တွင် ကြေညာခဲ့ခြင်း ဖြစ်သည်။

လက်ရှိတွင် ပြန်လည်ထူထောင်ရေး လုပ်ငန်းများကို ကဏ္ဍအလိုက် အရှိန်အဟုန်မြှင့်တင် ဆောင်ရွက်ရန် ဖြစ်ကြောင်းလည်း နစက ဥက္ကဌ ဗိုလ်ချုပ်မှူးကြီး မင်းအောင်လှိုင်က ထုတ်ပြန်ချက်တွင် ဖော်ပြထားသည်။

#Yangon-Times/BM
#Local_News
#YMG #Yangon_Times

Published_ 15 July2023

ဟောင်းနွမ်း စုတ်ပြဲ ချို့ယွင်းငွေစက္ကူများကို နေပြည်တော်၊ရန်ကုန်နှင့်မန္တလေးတို့တွက် ကောင်တာများဖွင့်လှစ်၍ လဲလှယ်ပေးနေကြောင်း မြန်မာနိုင်ငံတော်ဗဟိုဘဏ် က ထုတ်ပြန်လိုက်သည်။

မြန်မာနိုင်ငံတော်ဗဟိုဘဏ်အနေဖြင့် ဟောင်းနွမ်း၊ စုတ်ပြဲနှင့် ချို့ယွင်းငွေစက္ကူများ လျော့နည်းပပျောက်စေရန် ရည်ရွယ်၍ တန်ဖိုးတူငွေစက္ကူများဖြင့် ပြန်လည်လဲလှယ်ပေးခြင်းကို ၂၀၀၉ ခုနှစ်မှစ၍ စီမံချက်ဖြင့်စတင်ဆောင်ရွက်ခဲ့ကြောင်း၊ ယင်းနောက်၂၀၁၇ ခုနှစ်မှစ၍ ငွေလဲလှယ်သည့် စည်းမျဉ်းစည်းကမ်းသတ်မှတ်ချက်များကို တစ်နှစ်ထက် တစ်နှစ်ဖြေလျှော့ကာ နှစ်စဉ်စီမံချက်ချ ဆောင်ရွက်ခဲ့ခြင်း ဖြစ်ကြောင်း သိရသည်။

ယင်းအပြင် ထို့အပြင် နိုင်ငံပိုင်ဘဏ်များနှင့် ပုဂ္ဂလိကဘဏ်များအနေဖြင့် အများပြည်သူသို့ ပြန်လည် ထုတ်ပေးငွေများတွင် လှည့်လည်သုံးစွဲရန် မသင့်တော်သည့် ဟောင်းနွမ်း စုတ်ပြဲငွေစက္ကူများ ပါဝင်မှု မရှိစေရန်၊ ကောင်းမွန်သန့်ရှင်းသည့် ငွေစက္ကူများကိုသာ ပြန်လည်ထုတ်ပေးရန်နှင့် ဟောင်းနွမ်း စုတ်ပြဲ ချို့ယွင်းငွေစက္ကူများကို သတ်မှတ်စည်းမျဉ်းများနှင့်အညီ လက်ခံလဲလှယ်ထုတ်ပေးရန်လည်း ငွေကြေးညွှန်ကြားလွှာများ၊ အမှာစာများဖြင့် မကြာခဏ ညွှန်ကြားခဲ့ကြောင်း သိရသည်။

သို့သော်လည်း ယခုအခါ အများ ပြည်သူ လက်ဝယ် လှည့်လည်သုံးစွဲနေသည့် ငွေစက္ကူများတွင် ဟောင်းနွမ်း စုတ်ပြဲ ချို့ယွင်းငွေစက္ကူများ လျော့နည်း ပပျောက်မှု နည်းပါးနေသေးသောကြောင့် ကောင်းမွန်သန့်ရှင်းသည့် ငွေစက္ကူများ ပြည်သူများလက်ဝယ်ပိုမိုရောက်ရှိစေရန် ရည်ရွယ်၍ မြန်မာနိုင်ငံတော်ဗဟိုဘဏ်အနေဖြင့် နေပြည်တော်၊ ရန်ကုန်၊ မန္တလေးမြို့များတွင် ကောင်တာများဖွင့်လှစ်ပြီး လက်ခံလဲလှယ်ဆောင်ရွက် ပေးနေခြင်း ဖြစ်ကြောင်း သိရသည်။
#Yangon-Times/BM
#Local_News
#YMG #Yangon_Times

Published_15 July 2023

ဆံပင်ညှပ်ဆရာ၊ အလှပြင်ဆရာမ၊ စာရင်းကိုင်စတဲ့ အမျိုးသမီးတွေဟာ သူတို့မှာ သားဥအိမ်ကင်ဆာဖြစ်နိုင်ချေ များနေတာကို မသိကြကြောင်း ကနေဒါသုတေသီများက ဖော်ပြလိုက်ပါတယ်။

အရောင်းပိုင်း၊ လက်လီ၊ အဝတ်အထည်၊ ဆောက်လုပ်ရေးလုပ်ငန်းတွေမှာ လုပ်ကိုင်သူတွေဟာ အန္တရာယ်ဖြစ်နိုင်ချေရှိပြီး ဂတ်စ်၊ ဓာတ်ဆီ၊ အမိုးနီးယား၊ အရောင်ချွတ်ဆေးများ အပါအဝင် အရာဝတ္ထုအမျိုးမျိုးနဲ့ ထိတွေ့နေရတာတွေက အဓိကကျနေပါတယ်။

ယခုမတိုင်ခင်အထိ သားဥအိမ်ကင်ဆာဖြစ်နိုင်တဲ့ အကြောင်းအရင်းအနည်းငယ်ကိုသာ တွေ့ရှိခဲ့ကြပါတယ်။

လုပ်ငန်းခွင်နေရာကြောင့် ဘေးအန္တရာယ်ဖြစ်စေနိုင်သလို အမျိုးသမီးများအနေဖြင့် လုပ်ငန်းခွင်ကြောင့် အန္တရာယ်ရင်ဆိုင်နိုင်ရတာကိုတော့ လေ့လာမှုသိပ်မလုပ်ခဲ့ကြပါဘူး။

သားဥအိမ်ကင်ဆာဖြစ်ပွားထားတဲ့ အသက် ၁၈ နှစ်မှ ၇၉ နှစ်ကြားအမျိုးသမီးတွေကို ၂၀၁၀ မှ ၂၀၁၆ အတွင်းခေါ်ယူကာ PROVAQ လေ့လာမှုမှာ စမ်းသပ်ခဲ့ကြပါတယ်။

သားဥအိမ်ကင်ဆာ ဖြစ်သူတွေဟာ ပညာရေးနောက်ခံနည်းပါးသူများသလို ကိုယ်ဝန်တားဆေး အသုံးပြုခြင်းသိပ်မတွေ့ရသလို ကလေးရယူခြင်းမရှိကြတာကို တွေ့ခဲ့ကြတာကြောင့် ဒါတွေဟာ ရောဂါဖြစ်နိုင်တဲ့ အကြောင်းအရင်းတွေ ဖြစ်နေပါတယ်။

ဒီနောက် ဓာတုပစ္စည်း ၂၉ မျိုးထိတွေ့ခြင်းနဲ့ သားဥအိမ်ကင်ဆာ ဖြစ်နိုင်ချေတို့ကြား ဆက်စပ်မှုကိုလည်း လေ့လာခဲ့ကြပါတယ်။

တွက်ချက်မှုများအရ အလုပ်အကိုင် အများအပြားဟာ ထိုရောဂါဖြစ်နိုင်ချေများစေကြောင်း တွေ့ရှိရပါတယ်။

ဥပမာအားဖြင့် အလှပြင်ဆရာမ၊ ဆံသဆရာမစတဲ့ အလုပ်အကိုင်တွေမှာ ၁၀ နှစ်နဲ့အထက် ပြုလုပ်နေကြသူတွေမှာ ရောဂါဖြစ်နိုင်ချေ ၃ ဆပိုများပါတယ်။

အဝတ်အထည်လုပ်ငန်းတွေမှာ ရေရှည်လုပ်ကိုင်သူတွေက ရောဂါဖြစ်နိုင်ချေ ၈၅ ရာခိုင်နှုန်းများပြီး အရောင်းလက်လီအပိုင်းမှာ အလုပ်လုပ်သူတွေက ၄၅ နဲ့ ၅၉ ရာခိုင်နှုန်းအသီးသီး ရှိနေပါတယ်။

ရောဂါဖြစ်နိုင်ချေများရခြင်းရဲ့ ၄၀ ရာခိုင်နှုန်းကျော်ကတော့ ဓာတုပစ္စည်းများထိတွေ့ခြင်းနဲ့ ဆက်စပ်နေပါတယ်။

အလှပြင်ဆိုင်တွေမှာ အလုပ်လုပ်သူတွေက အမိုးနီးယား၊ ဟိုက်ဒရိုဂျင်ပါအောက်ဆိုဒ်၊ အော်ဂဲနစ်ဆိုးဆေး၊ ရောင်ခြယ်ပစ္စည်းများ၊ အရောင်ချွတ်ဆေးများအပါအဝင် ၁၃ မျိုးနဲ့ ထိတွေ့နေကြရပါတယ်။

စက္ကူ၊ ပုံနှိပ်၊ အထည်ထုတ်လုပ်ရေးတို့မှာ လုပ်ကိုင်သူတွေကတော့ သားဥအိမ်ကင်ဆာဖြစ်နိုင်ချေ ပိုနည်းပါးနေပါတယ်။
Source: The Jerusalem Post
#World_Health
#YMG #Yangon_Times

အာဆီယံ နိုင်ငံခြားရေးဝန်ကြီးများအစည်းအဝေး၏ ပူးတွဲကြေညာချက်တွင်ပါဝင်သည့် မြန်မာနိုင်ငံကိစ္စနှင့်ပတ်သက်သည့် အချို့ အချက်များကို မြန်မာနိုင်ငံက ပြတ်သားစွာပယ်ချလိုက်တယ်လို့ နစက နိုင်ငံခြားရေးဝန်ကြီးဌာနက သတင်းထုတ်ပြန်ပါတယ်။

“အာဆီယံ နိုင်ငံခြားရေးဝန်ကြီးများအစည်းအဝေး၏ ပူးတွဲကြေညာချက်တွင်ပါဝင်သည့် မြန်မာနိုင်ငံကိစ္စနှင့်ပတ်သက်သည့် အချို့ အချက်များအပေါ် စိတ်ပျက်မိပြီး ယင်းဖော်ပြချက်များအားပြတ်သားစွာ ပယ်ချလျက် ပါဝင်ပတ်သက်မှုမရှိကြောင်း” ဖြင့်  ယနေ့ ဇူလိုင် ၁၄ ရက် နေ့စွဲဖြင့်ထုတ်ပြန်တဲ့ ကြေညာချက်မှာဖော်ပြထားပါတယ်။

မြန်မာနိုင်ငံကိစ္စနှင့်ပတ်သက်၍ တစ်ဖက်သတ်မမျှမတဖော်ပြထားသည့်အချက်အလက်အချို့ အတွက် စိတ်ပျက်မိတယ်လို့လည်း သတင်းထုတ်ပြန်ချက်ကဆိုပါတယ်။

အာဆီယံနိုင်ငံခြားရေးဝန်ကြီးများ၏ ပူးတွဲကြေညာချက်အပါအဝင် မည်သည့်ထုတ်ပြန်ချက် တွင်မဆို နိုင်ငံတစ်နိုင်ငံအားသီးခြားပစ်မှတ်ထား၍ ယင်း၏ ပြည်တွင်ရေးကိစ္စအား ဖော်ပြမှုသည် အာဆီယံပဋိညာဉ်စာတမ်းတွင် ပြဋ္ဌာန်းထားသည့် “ဝင်ရောက်မစွက်ဖက်ရေးမူ”နှင့် သွေဖည်နေသည့်အတွက် မြန်မာနိုင်ငံအနေဖြင့် မည်သည့်အခါကမျှလက်ခံခြင်းမရှိကြောင်းလည်း သတင်းထုတ်ပြန်ချက်တွင် ဆက်လက်ဖော်ပြထားပါတယ်။

အာဆီယံနိုင်ငံခြားရေးဝန်ကြီးများ၏ ပူးတွဲကြေညာချက်(မူကြမ်း)အား ညှိနှိုင်းစဉ်ကမြန်မာနိုင်ငံသည် အာဆီယံအဖွဲ့ဝင်နိုင်ငံတစ်နိုင်ငံအဖြစ် တာဝန်သိစွာဖြင့် ပါဝင်ဆွေးနွေးညှိနှိုင်းခဲ့ပေမယ့်  ပူးတွဲကြေညာချက်အား အပြီးသတ်ထုတ်ပြန်ကြေညာရာတွင်မြန်မာနိုင်ငံမှ အဆိုပြု ပြင်ဆင်ဖြည့်စွက်ထည့်သွင်းလိုသည့်အချက်များ၊ မြန်မာနိုင်ငံ၏သဘောထားနှင့် စိုးရိမ်ပူပန်မှုများကို လျစ်လျူရှုခဲ့တယ်လို့လည်း နိုင်ငံခြားရေးဝန်ကြီးဌာနက ထုတ်ဖော်ပြောဆိုပါတယ်။

အင်ဒိုနီးရှားနိုင်ငံ၊ ဂျကာတာမြို့တွင် ၁၁-၇-၂၀၂၃ရက်တွင်ပြုလုပ်ခဲ့ သည့် (၅၆)ကြိမ်မြောက် အာဆီယံနိုင်ငံခြားရေးဝန်ကြီးများ အစည်းအဝေးတွင် အဆိုပါပူးတွဲကြေညာချက်ကို ထုတ်ပြန်ကြေညာခဲ့ခြင်းဖြစ်ပါတယ်။

(၁၄)ကြိမ်မြောက်အမေရိကန်-တရုတ်စီအီးအိုနှင့်အကြီးတန်းအရာရှိဟောင်းဆွေးနွေးပွဲအား တရုတ်တွင်ကျင်းပခဲ့

၁၄ ကြိမ်မြောက် အမေရိကန်-တရုတ်စီအီးအိုနဲ့ အကြီးတန်းအရာရှိဟောင်းများ တွေ့ဆုံဆွေးနွေးပွဲကို အင်္ဂါနေ့က ပေကျင်းမှာ ကျင်းပခဲ့ပါတယ်။

#World_News
#Published_ 14 July 2023
#YMG #Yangon_Times

မကြာမီကျင်းပမယ့် ကမ္ဘောဒီးယားနိုင်ငံ အထွေထွေရွေးကောက်ပွဲတွင် မြန်မာနိုင်ငံမှ ရွေးကောက်ပွဲလေ့လာစောင့်ကြည့်သူ (၂)ဦးလာရောက်မှာ ဖြစ်တယ်လို့ သိရပါတယ်။

ကမ္ဘောဒီးယားရွေးကောက်ပွဲကော်မရှင် ဒုတိယအတွင်းရေးမှူးချုပ် ဆွမ်ဆိုရိန်ဒါရဲ့ ပြောကြားချက်ကို ကိုးကားပြီး ဖနွမ်းပင် အခြေစိုက် ခမာတိုင်း သတင်းစာပါ သတင်းတစ်ပုဒ်အရ မြန်မာနိုင်ငံမှ ရွေးကောက်ပွဲလေ့လာသူနှစ်ဦးဟာ အခြားသော အာဆီယံနိုင်ငံ (၅)နိုင်ငံမှ လေ့လာသူများနှင့်အတူ သွားရောက်ပြီး လေ့လာစောင့်ကြည့်ကြမှာဖြစ်ပါတယ်။

အဲဒီအထဲမှာ အရှေ့တီမောမှ ၂ ဦး၊စင်္ကာပူမှ ၁ ဦး ၊ဗီယက်နမ်မှ ၅ ဦးနှင့်အင်ဒိုနီးရှားမှတစ်ဦးနှင့် အခြားအာဆီယံနိုင်ငံတွေက ၄ ဦး စုစုပေါင်း ၁၅ ဦးတို့ပါဝင်ကြတယ်လို့ သူကပြောပါတယ်။

၂၀၂၃ ဇူလိုင် ၂၃ရက်မှာကျင်းပမယ့် (၇)ကြိမ်မြောက်ကမ္ဘောဒီးယားအထွေထွေရွေးကောက်ပွဲကို နိုင်ငံတကာ အဖွဲ့အစည်း ၁၂၁ ခုမှ လေ့လာ စောင့်ကြည့်သူပေါင်း ၈၈,၀၀၀ ဦးကျော် လာရောက်ကြမယ်လို့ သူကပြောတဲ့အကြောင်း သတင်းမှာဖော်ပြထားပါတယ်။ လေ့လာစောင့်ကြည့်သူတွေအပြင် အထူးဧည့်သည်တွေကိုပါဖိတ်ကြားထား  တယ်လို့သိရပါတယ်။

မြန်မာအပါအဝင် အာဆီယံနိုင်ငံတွေက  ရွေးကောက်ပွဲစောင့်ကြည့်လေ့လာသူတွေဟာ မည်သည့်အဖွဲ့အစည်းတွေ ကဆိုတာကိုတော့ သတင်းမှာ အသေးစိတ်ရေးသားထားခြင်းမရှိပါဘူး။

#knl/ymg

#Myanmar_observers_in_Cambodia_election

#Daily_News
Published_ 14 July 2023

၁။ မြန်မာ့ရွှေထည်များ ပြည်ပကို အခွန်သုညရာခိုင်နှုန်းဖြင့် တင်ပို့နိုင်ပြီ

၂။ အဒေါ်ရင်းဖြစ်သူ၏ မတရားတောင်းရမ်းခိုင်းစားခံရသည့် မိန်းကလေးငယ်ကို လူမှုကူညီရေးအဖွဲမှကယ်တင်နိုင်ခဲ့

၃။ ဖိုင်နယ်ပွဲစဉ်တွင် တတိယ‌ဆုတံဆိပ်ရယူရန် မည်သည့်ပြိုင်ဘက်နှင့် ‌မဆိုအကောင်းဆုံးပြင်ဆင်ထားဟု မြန်မာနည်းပြချုပ်ပြော

၄။ (၁၄)ကြိမ်မြောက် အမေရိကန်-တရုတ်စီအီးအိုနှင့် အကြီးတန်းအရာရှိဟောင်းဆွေးနွေးပွဲအား တရုတ်တွင်ကျင်းပခဲ့း .... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Time #Daily_News #YMG

Published_ 14 July2023

ရန်ကုန်တိုင်း၊ဒေါပုံမြို့နယ်၊ မဟာဗန္ဓုလတံတားအဆင်းတွင်ကွန်တိန်နာယာဥ်တစ်စီးက တောင်းရမ်းစားသောက်သူအမျိုးသမီးတစ်ဦးအား တက်ကြိတ်မှုယမန်​နေ့ကဖြစ်ခဲ့ကြောင်း အရောင်အသွေးမဲ့ မေတ္တာ လူမှုကူညီရေးအသင်းကသိရသည်။

ဖြစ်စဥ်မှာဇူလိုင် ၁၃ ရက် နံနက် ၁၀ နာရီဝန်းကျင်က မဟာ ဗန္ဓုလတံတားပေါ်မှဆင်းလာသော ကွန်တိန်နာတစ်စီးက မျက်စိတစ်ဖက်တိမ်ကွယ်နေသော တောင်းရမ်းစားသောက်သူ အသက်ကြီးပိုင်း အမျိုးသမီးတစ်ဦးအား အရှိန်လွန်၍ ဝင်တိုက်၍တက်ကြိတ်မှုဖြစ်ခဲ့ခြင်းဖြစ်သည်။

" အဘွားအိုက ဒီတံတားနားမှာ တောင်းရမ်းနေတာတော့ အမြဲတွေ့တယ်။ သေဆုံးသွားသူအမျိုးသမီးမှာ ယာဥ်တိုက် မှုကြောင့် ခြေထောက်ကျိုးဒဏ်ရာ၊ ပေါင်ကျိုးဒဏ်ရာတွေရတယ်။ ခြေထောက်တစ်ဖက်ပြတ်လုနီးဒဏ်ရာ၊ ဆီးခုံထိုးခွဲဒဏ်ရာတွေရခဲ့တယ်။ ဆေးရုံရောက် မှသေ သွားတယ်"ဟု အရောင်အသွေးမဲ့မေတ္တာလူမှုကူညီရေးအသင်းမှ သိရသည်။

သေဆုံးသူ၏ ရုပ်အလောင်းအား ရန်ကုန်ပြည်သူ့ဆေးရုံကြီး ရင်ခွဲရုံသို့ ကူညီပို့ဆောင်ပေးခဲ့ကြောင်း သိရသည်။

တိုက်သွားသော ကွန်တိန်နာယာဥ်မောင်းကိုလည်း ယာဥ်ထိန်းတပ်ဖွဲ့ကဖမ်းဆီးနိုင်ခဲ့ကြောင်းလည်းသိရသည်။
#Yangon-Times/BM
#Local_News
#YMG #Yangon_Times

Published_ 14 July 2023

ဂျပန်ကုမ္ပဏီ (၃၀၀)ကျော်က မြန်မာအလုပ်သမားဦးရေ (၁၀၀၀)ကျော် ခေါ်ယူမည်ဖြစ်ကြောင်း ဂျပန်နိုင်ငံ၊ တိုကျိုပို့လျက်ရှိကြောင်း သိရသည်။

မြန်မာသံရုံး၊ တိုကျိုမြို့မှ (၂၀၂၃) ခုနှစ်၊ ဇူလိုင်လ (၁) ရက်နေ့မှ (၁၄) ရက်နေ့အတွင်း စိစစ်ပြီး နိုင်ငံခြားရေးဝန်ကြီးဌာနသို့ ပေးပို့ပြန်ကြားခဲ့သည့် အလုပ်ကမ်းလှမ်းစာ (၃၁၉) ခုနှင့် ပတ်သက်သည့် အချက်အလက် များအား အသိပေးအကြောင်းကြားအပ်ပါသည်ဟု ပါရှိသည်။

အဆိုပါထုတ်ပြန်ချက်အရ ဂျပန်ကုမ္ပဏီ (၃၀၀)ကျော်က မြန်မာအလုပ်သမား အမျိုးသား (၄၀၀)နီးပါး၊ အမျိုးသမီး(၆၀၀)ကျော်၊ စုစုပေါင်း ဦးရေ(၁၀၀၀)ကျော် ခေါ်ယူမည်ဖြစ်ကြောင်း သိရှိရသည်။

အဆိုပါထုတ်ပြန်ချက်အရ မြန်မာသံရုံး၊ တိုကျိုမြို့အနေဖြင့် အလုပ်သမားဝန်ကြီးဌာနက နိုင်ငံခြားရေးဝန်ကြီးဌာနမှတစ်ဆင့် ပေးပို့လာသည့် အလုပ်ကမ်းလှမ်းစာ (Demand Letter) များကို အချိန်နှင့်တစ်ပြေးညီ စိစစ်ဆောင်ရွက်ပေးလျက်ရှိပြီး ဂျပန်နိုင်ငံရှိ အလုပ်သမားကြီးကြပ်ရေးကုမ္ပဏီနှင့် အလုပ်ခေါ်ယူသည့် စက်ရုံ/ ကုမ္ပဏီများသည် ဂျပန်နိုင်ငံတွင် တရားဝင်တည်ထောင်ထားခြင်း ရှိ/ မရှိ စာရွက်စာတမ်း အထောက်အထားများ စိစစ်ပြီး စိစစ်တွေ့ရှိချ က် များ၊ သဘောထားမှတ်ချက် များကို နိုင်ငံခြားရေးဝန်ကြီးဌာနမှတစ်ဆင့် အလုပ်သမားဝန်ကြီးဌာနသို့ ပြန်လည်ပေးပို့လျက်ရှိကြောင်း သိရသည်။

ပြီးခဲ့သည့် ဇွန်လ (၁၆) ရက်နေ့မှ (၃၀) ရက်နေ့အတွင်းကလည်း နိုင်ငံခြားရေးဝန်ကြီးဌာနသို့ စိစစ်ပေးပို့ပြန်ကြားခဲ့သော အလုပ်ကမ်းလှမ်းစာ (၂၉၃) ခုတွင် မြန်မာအလုပ်သမား အမျိုးသား၊ အမျိုးသမီး စုစုပေါင်း ဦးရေ (၉၀၀)ကျော် ခေါ်ယူမည်ဖြစ်ကြောင်း မြန်မာသံရုံး၊ တိုကျိုမြို့က ထုတ်ပြန်ခဲ့သည်။
#Yangon-Times/BM
#Local_News
#YMG #Yangon_Times