တိရစ္ဆာန်အစာအဖြစ် အများဆုံးပြုတဲ့ ပဲဖတ်ဈေးကွက်မှာတော့ ဝယ်လိုအား အလွန် နည်းတဲ့အတွက် တစ်ပိဿာကို ကျပ် ၁၀၀၀ခန့် ဈေးကျလာတယ်လို့ ပဲဖတ်ရောင်းဝယ်တဲ့ ပွဲရုံ တွေထံက သိရပါတယ်။

#Local_News
Published_ 27 October 2023
#တိရစ္ဆာန်အစာ #ပဲဖတ်ဈေးကွက်
#YMG/LW #Yangon_Times

#Local_News
Published-27 Oct 2023

နေပြည်တော်အပါအဝင်တိုင်းနှင့် ပြည်နယ် ၁၃ ခုရှိ စီးပွားရေးဖြစ်မွေးမြူရေးခြံများအား တိရစ္ဆာန်သန်းခေါင်စာရင်း ရာနှုန်းပြည့်ကောက်ယူသွားမည်ဖြစ်ကြောင်း မွေးမြူရေးနှင့် ကုသရေးဦးစီးဌာနမှသိရသည်။

ထိုသို့ကောက်ယူရာတွင် လာမည့် နိုဝင်ဘာ (၁) ရက်မှ စတင်၍ နေပြည်တော်အပါအဝင် တိုင်းနှင့် ပြည်နယ် (၁၃) ခု၊ မြို့နယ်ပေါင်း၂၁၅ မြို့နယ် အတွင်းရှိ အိမ်ထောင်စုအလိုက် မွေးမြူထားသော အိမ်မွေး တိရစ္ဆာန်များနှင့် စီးပွားဖြစ်မွေးမြူထားသော ကျွဲ၊ နွား၊ သိုး၊ ဆိတ်၊ ကြက်၊ ဝက်၊ ဘဲစသည့် တိရစ္ဆာန်ကောင်ရေ စာရင်းကောက်ယူသွားမည်ဖြစ်ကြောင်း သိရသည်။

ထို့အပြင် အိမ်ထောင်စုအလိုက်မွေးမြူထားသည့် တိရိစ္ဆာန်သန်းခေါင်စာရင်းကိုမူ ကျေးရွာအုပ်စု၊ ရပ်ကွက်များ၏ ၂၀ ရာခိုင်နှုန်းကို ကောက်ယူမည်ဖြစ်ကာ စီးပွားဖြစ်မွေးမြူရေးခြံစာရင်းကိုမူ ရာခိုင်နှုန်းအပြည့် စာရင်းကောက်ယူသွားမည်ဖြစ်ကြောင်း သိရသည်။

တစ်နိုင်ငံလုံးရှိ တိရစ္ဆာန်ကောင်ရေ စာရင်းကို ၂၀၁၈ ခုနှစ်တွင် ပထမဆုံးအကြိမ် ကောက်ယူခဲ့ပြီး ယခုအခါ ငါးနှစ်ပြည့်သွားပြီဖြစ်သောကြောင့် ဒုတိယအကြိမ်ထပ်မံ ကောက်ယူရန် စီစဉ်နေခြင်းဖြစ်သည်။

ယခုထပ်မံကောက်ယူရန် ပြင်ဆင်နေသည့် ဒုတိယအကြိမ်မြောက် သန်းခေါင်စာရင်းကောက်ယူမှုအား တိုက်ပွဲများဖြစ်ပွားနေသည့် ကယားပြည်နယ်နှင့် ချင်းပြည်နယ်တို့ကို ချန်လှပ်ထားမည်ဖြစ်ကြောင်း သိရသည်။

ယခင်က မြန်မာနိုင်ငံတွင် တိရစ္ဆာန် သန်းခေါင်စာရင်းကို ၁၉၈၃ – ၈၄ ဘဏ္ဍာနှစ် မတိုင်မီအထိ လယ်ယာ စိုက်ပျိုးရေးနှင့် သစ်တောဝန်ကြီးဌာန၊ ကြေးတိုင်နှင့် မြေစာရင်းဦးစီးဌာနက ကောက်ယူခဲ့ပြီး ၁၉၈၃ – ၈၄ ဘဏ္ဍာနှစ်မှ ၁၉၉၃ – ၉၄ ဘဏ္ဍာနှစ် အထိ စာရင်းကိုမူ မွေးမြူရေးနှင့် ရေလုပ်ငန်းဝန်ကြီးဌာန၊ မွေးမြူရေးနှင့် ကုသရေး ဦးစီးဌာန တို့က ကောက်ယူခဲ့ကြောင်း၊ ၁၉၉၃ – ၉၄ ဘဏ္ဍာနှစ်တွင် မြို့နယ်၊ ကျေးရွာအုပ်စု ကျေးရွာအလိုက် တစ်အိမ်ချင်း ကောက်ယူသည့် စနစ်ဖြင့် ကောက်ယူခဲ့ပြီး ဗဟို စာရင်းကို ၁၉၉၄ ခုနှစ် အောက်တိုဘာလ ၁ ရက်နေ့တွင် အတည်ပြုထုတ်ပြန်ခဲ့ကြောင်း သိရသည်။

#Local_News #နေပြည်တော် #မွေးမြူရေးခြံ #YMG/NN #Yangon_Times

'ဒီရက်ပိုင်းပွဲတော်ရက်နီးလို့ ကုန်စည်စီးဆင်းမှုကတော့ ကားတွေမရှိကြဘူး။ ရန်ကုန်ကလည်းတနင်္ဂနွေ၊ တနင်္လာရုံးပိတ်တော့ ပြန်စရာကုန်မရှိဘူး။ ဒီနေ့နောက်ဆုံးတင်ကြတာ‌
ပေါ့။ ကုန်ကတော့ပါးကြတယ်' မြန်မာနိုင်ငံအဝေး‌ပြေးကုန်စည်ပို့ဆောင်ရေးဝန်ဆောင်မှုလုပ်ငန်းရှင်များအသင်း ဥက္ကဌဉီးကျင်သိန်းက

‌#Local_News
Published_ 27 October 2023
#သီတင်းကျွတ်ပွဲ‌တော်ကာလ #ဘုရင့်နောင်ကုန်စည်ဒိုင်
#YMG/ NN #Yangon_Times

‘သီတင်းကျွတ်ပိတ်ရက်သုံးရက်မှာ ပုံမှန်ရက်တွေအတိုင်း အဝေးပြေးယာဉ်လိုင်း(၂၀၀)ကျော်၊ အဝေးပြေးယာဉ်စီးရေ(၆၀၀)ကျော် ပြေးဆွဲသွားမှာဖြစ်ပြီး အလှည့်ကျနားတဲ့ယာဉ်အချို့တော့ရှိမှာ ဖြစ်တယ်’ YRTC မှ တွဲဖက်အတွင်းရေးမှူးဦးလျန်ကျင့်မန်

‌#Local_News
Published_ 27 October 2023
#YRTC #ယာဉ်စီးရေ(၆၀၀)ကျော်ပြေးဆွဲ
#tthl #Yangon_Times

#Local_News
Published -27 Oct 2023

သီတင်းကျွတ်ကာလအတွက် လေအိတ်အမြန်ရထားကိုးစီးကို ယနေ့အောက်တိုဘာ၂၇ ရက်မှစတင်၍ ပြေးဆွဲပေးနေပြီဖြစ်ကြောင်း မြန်မာ့မီးရထားမှသိရသည်။

အဆိုပါ ကဲ့သို့ပြေးဆွဲရာတွင် ရန်ကုန်_နေပြည်တော်၊ ရန်ကုန်_မန္တလေး၊ ရန်ကုန်_ပြည်၊ ရန်ကုန်_‌မော်လမြိုင်အထူးရထားများကိုပြေးဆွဲ‌ပေးနေခြင်းဖြစ်ကြောင်း သိရသည်။

"ဒီနေ့မှာလေအိတ် အမြန်ရထား စုစုပေါင်း ၉ စီး ပြေးဆွဲပေးသွားမှာဖြစ်ပါတယ်။ ပုံမှန်ရထားတွေကတော့ အရင်အတိုင်းပဲ ပြေးဆွဲပေးမှာပါ"ဟု မြန်မာ့မီးရထားမှတာဝန်ရှိသူတစ်ဦးက ပြောသည်။

ထိုသို့ လေအိတ်ရထားများပြေးဆွဲရာတွင် နေပြည်တော် - ရန်ကုန် အစုန်အထူး၊ ရန်ကုန် -မန္တလေး အမှတ် ၅ အဆန်ရထား၊ မန္တလေး - ရန်ကုန် အမှတ် ၆ အစုန်၊ ရန်ကုန် - မော်လမြိုင် အမှတ် ၈၁ အဆန်ရထား၊ ရန်ကုန် - မော်လမြိုင် အဆန်အထူးရထား၊ ရန်ကုန် - ပြည် အမှတ် ၇၁ အဆန်၊ ရန်ကုန် - ပြည် အဆန်အထူးရထား၊ပြည် - ရန်ကုန် အမှတ် ၇၂ အစုန်နှင့်ပြည် - ရန်ကုန် အစုန်အထူးရထားများပါဝင်ကြောင်း သိရသည်။

အဆိုပါ အထူးရထားများ၏လက်မှတ်ခနှုန်းထား‌များမှာ ပြောင်းလဲခြင်းမရှိဘဲ တစ်ဆင့်မြှင့်ထားသည့် မူလနှုန်းထားအတိုင်း အထူးရထားရိုးရိုးတန်းအတွက်လက်မှတ်များအား သီတင်းကျွတ်ပိတ်ရက်မတိုင်မီ လေးရက်ကြိုတင်၍ရောင်းချပေးသွားမည်ဖြစ်ပြီး အထက်တန်းတွဲများအတွက်မူ နှစ်ရက်ကြိုတင်၍ ရောင်းချပေးခဲ့‌ရာကြိုတင်လက်မှတ်ဝယ်ယူမှုများပြားခဲ့ကြောင်းသိရသည်။

ယနေ့တွင် အဆိုပါအထူးလေအိတ် အမြန်ရထား ကိုးစီးစတင် ပြေးဆွဲပေးခြင်းအပြင် AAR တွဲဆိုင်း အမြန်ရထား၊ ရန်ကုန် - မန္တလေး အမှတ် ၃ အဆန်၊ မန္တလေး - ရန်ကုန် အမှတ် ၄ အစုန်၊မော်လမြိုင် - ရန်ကုန် အမှတ် ၈၂ အစုန်၊ မော်လမြိုင် - ရန်ကုန် အစုန် အထူး၊ရန်ကုန် - ပုဂံ အမှတ် ၆၁ အဆန်ရထားများအား ပုံမှန်အတိုင်းပြေးဆွဲပေးနေပြီး ပုဂံရထားကိုလည်းပုံမှန်သောကြာနေ့အပြင်စနေနေ့တွင်လည်း ပြေးဆွဲပေးသွားမည်ဖြစ်ကြောင်း သိရသည်။

#Local_News #သီတင်းကျွတ်ကာလ #လေအိတ်အမြန်ရထားကိုးစီး #YMG/NN #Yangon_Times

#Local_News
Published 27 October 2023

ထိုင်းနိုင်ငံသို့ တရားဝင်သွားရောက် အလုပ်လုပ်ကိုင်နေသည့် MOU မြန်မာအလုပ်သမားများအနေဖြင့် သတ်မှတ်ကာလပြည့်သဖြင့် မိခင်နိုင်ငံကိုပြန်ပါကနှစ်နိုင်ငံနယ်စပ်ဂိတ်များတွင် တရားဝင်အထွက်တုံးထုပြီးမှသာ ပြည်တွင်းကို ပြန်ဝင်ကြရန် ထိုင်းနိုင်ငံရှိ မြန်မာသံရုံးက သတိပေးထားကြောင်း သိရသည်။

''အထွက်တုံးထုပြီး မပြန်လာတော့ နောက်တခေါက်ပြန်သွားမယ်ဆိုတော့ ထိုင်းလဝကမှာ ဒဏ်ကြေးဆောင်ရတာတွေ၊ ပြန်ဝင်လို့မရလို့ ပြန်ရတာတွေရှိတယ်၊ အဲ့လိုတွေ ပြန်ဝင်လို့မရရင် သွားမယ့် အလုပ်သမားလဲ နစ်နာတယ်၊ ပို့ပေးတဲ့အေဂျင်စီလဲ အခက်အခဲဖြစ်တယ်၊ အထွက်တုံး မထုခဲ့လို့ အဲ့လို့ပြန်ရတာတွေ ဒဏ်ရိုက်ခံရတာတွေအခု နောက်ပိုင်း အတော်များလာလို့ သံရုံးကနေ သတိပေးထုတ်ပြန်ရတာပါ''ဟု အလုပ်သမားဝန်ကြီးဌာနမှ တာဝန်ရှိသူက ပြောသည်။

MOU မြန်မာအလုပ်သမားများ အနေဖြင့် သတ်မှတ်ကာလပြည့်မြောက်ပါက နှစ်နိုင်ငံနယ်စပ်ဂိတ်စခန်းများမှတစ်ဆင့် မြန်မာနိုင်ငံသို့ ပြန်လည်ဝင်ရောက်ရာတွင် နိုင်ငံကူးလက်မှတ်၌ အထွက်၊အဝင်တုံးများကို နှစ်နိုင်ငံလူဝင်မှုကြီးကြပ်ရေးအဖွဲ့များမှ ရိုက်နှိပ်ခြင်း၊ စာရင်းပယ်ဖျက်ပေးခြင်းတို့ ပြုလုပ်ပေးကြောင်း သိရသည်။

ထို့သို့ဆောင်ရွက်ပေးနေသော်လည်း အချို့သော မြန်မာအလုပ်သမားများသည် နယ်စပ်ဂိတ် စခန်းများမှ ပြန်လည်ဝင်ရောက်ခြင်း မပြုသောကြောင့် ထိုင်းနိုင်ငံလူဝင်မှုကြီးကြပ်ရေးဌာန၏စာရင်းများတွင် နေထိုင်ခွင့်သက်တမ်းကျော်လွန်နေထိုင်သူ အနေဖြင့် စာရင်းဝင်သွားသောကြောင့် ထိုင်းနိုင်ငံသို့ MOU စနစ် ဖြင့် ပြန်လည်ဝင်ရောက်ပါက ဒဏ်ငွေပေးဆောင်ရခြင်း၊ဝင်ခွင့်ကန်သတ်ခြင်းစသည့် အရေးယူခံရခြင်းတို့ဖြစ်ပေါ်လျက်ရှိကြောင်း သိရသည်။

#Local_News #MOUမြန်မာအလုပ်သမား #တရားဝင်အထွက်တုံးထု #YMG/LW #Yangon_Times

#Local_News
Published-27 October 2023

ကြည့်မြင်တိုင်တွင် YBS၂-စီးနှင့် ကွန်တိန်နာကားဝင်တိုက်မှုဖြစ်ပြီး ထိခိုက်ဒဏ်ရာရရှိသူ ၃-ဦးရှိခဲ့ သည့်အနက် ၁-ဦးမှာ စိုးရိမ်ရကြောင်း ရောင်စဉ်မဲ့ လူမှုကူညီရေးအသင်းက သိရသည်။

ယနေ့ အောက်တိုဘာလ (၂၇)ရက် နံနက် ၉ နာရီကျော်အချိန်ကYBS၂-စီး တိုက်မိစဉ် လွတ်နေသည့် နေရာ ကြားထဲသို့ ကွန်တိန်နာကားက ဝင်တိုး၍ ထပ်မံတိုက်မိမှုဖြစ်ပွားခဲ့သောကြောင့်YBS ကားပေါ်မှ ခရီးသည် ၃- ဦး ထိခိုက်ဒဏ်ရာရရှိခဲ့ရာ ၁-ဦးမှာ စိုးရိမ်ရကြောင်း ရောင်စဉ်မဲ့လူမှုကူညီရေးအသင်း၏ တာဝန်ရှိသူက ပြောသည်။

"အမျိုးသားတစ်ယောက်၊ အမျိုးသမီး နှစ်ယောက် ဒဏ်ရာရတယ်။ အမျိုးသား တစ်ယောက်က စိုးရိမ်ရတယ် လို့သိရပါတယ်။အမျိုးသမီး ၂ယောက် မှာ ၁ ယောက်က ခါးထိတယ်၊ နောက်တစ်ယောက်က ခေါင်းထိတယ်"ဟု ယင်းကဆိုသည်။

အဆိုပါယာဉ်တိုက်မှုဖြစ်စဉ်မှထိခိုက်ဒဏ်ရာရရှိသူ ၃-ဦးကို ရောင်စဉ်မဲ့လူမှုကူညီရေးအသင်းက မြေပြင်ကုသမှုပေးပြီး ရန်ကုန်ပြည်သူ့ဆေးရုံကြီးသို့ပို့ဆောင်ပေးခဲ့ကြောင်း သိရသည်။

#Local_News #YBS၂-စီးနှင့်ကွန်တိန်နာဝင်တိုက်မှုဖြစ် #ဒဏ်ရာရရှိသူ ၃-ဦး #Yangon_Times/PP

#Local_News
Published -27 October 2023

(၅၅၀၀) ကျော်အတွက်ပြည်တွင်းအလုပ်အကိုင် အခွင့်အလမ်းဖန်တီးပေးနိုင်မည့် ရင်းနှီးမြှုပ်နှံမှုလုပ်ငန်း ၈ ခုကို ရန်ကုန်တိုင်းတွင်လုပ်ကိုင်ခွင့်ပြုလိုက်ကြောင်း ရင်းနှီးမြှုပ်နှံမှု ကော်မတီကသိရသည်။

ရန်ကုန်တိုင်းဒေသကြီး ရင်းနှီးမြှုပ်နှံမှုကော်မတီ၏ (၁၀/၂၀၂၃) ကြိမ်မြောက် အစည်းအဝေးတွင်   စက် မှုကဏ္ဍတွင် မြန်မာနိုင်ငံသား ရင်းနှီးမြှုပ်နှံမှုလုပ်ငန်း (၂)ခုနှင့် ရာခိုင်နှုန်း ပြည့် နိုင်ငံခြားရင်းနှီးမြှုပ်နှံမှု လုပ်ငန်း (၆)ခုကို အတည်ပြုပေးခဲ့ကြောင်းသိရသည်။

အတည်ပြုပေးခဲ့သည့် လုပ်ငန်းများမှာ ဖိနပ်အမျိုးမျိုး ထုတ်လုပ်ရောင်းချခြင်း ( ၁၀၀% ပြည်တွင်းရောင်းချခြင်း) လုပ်ငန်း၊ CMP စနစ်ဖြင့် အဝတ်အထည် အမျိုးမျိုးချုပ်လုပ်ခြင်း လုပ်ငန်း၊ CMP စနစ်ဖြင့် Wearing Apparel အမျိုးမျိုး ချုပ်လုပ်ခြင်း လုပ်ငန်း၊ ဟင်းသီးဟင်းရွက် များနှင့် သစ်သီးဝလံများအား အေးခဲ၍ ထုပ်ပိုးတင်ပို့ရောင်းချခြင်းလုပ်ငန်း၊ CMP စနစ်ဖြင့် နားကြပ်နှင့် ဆက်စပ်ပစ္စည်း အမျိုးမျိုး ထုတ်လုပ်ခြင်းလုပ်ငန်း၊ စက္ကူကို အခြေခံ၍ ပါကင်ဗူးနှင့် တံဆိပ်အမျိုးမျိုးထုတ်လုပ်ပြီး ပြည်တွင်းသို့ (၁၀၀%) ဖြန့်ဖြူး ရောင်းချခြင်း လုပ်ငန်း၊ CMP စနစ်ဖြင့် အရည်အသွေးမြှင့် Poly Resin အား အခြေခံ၍ အရည်အသွေးမြှင့် Poly Resin, Cold Cast Bronze, Pewter ကြွေထည်ရုပ်ထုများနှင့် ပန်းပုရုပ်ထုများ ထုတ်လုပ်ခြင်းလုပ်ငန်းတို့ ဖြစ်ကြောင်းသိရသည်။

အဆိုပါ ရင်းနှီးမြှုပ်နှံမှုလုပ်ငန်းများ၏ မတည်ငွေရင်း ပမာဏမှာ ကျပ် (၄,၅၅၂.၃၂၅)သန်းနှင့် အမေရိကန် ဒေါ်လာ (၆.၂၃၆)သန်း ဖြစ်ကြောင်း သိရသည်။

#Local_News #အလုပ်အကိုင်အခွင့်အလမ်း #ရင်းနှီးမြှုပ်နှံမှုလုပ်ငန်း၈ခု #Yangon_Times/Pp

၂၇ အောက်တိုဘာ ၂၀၂၃

ယနေ့မနက်ပိုင်းတွင် ဖြစ်ပွားနေသော ချင်းရွှေဟော်နှင့်အနီးတစ်ဝိုက် တိုက်ပွဲများကိစ္စနှင့်ပတ်သက်၍ နစက သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းကို YMG. ကဆက်သွယ်မေးမြန်းခဲ့မှုအပေါ် ပြန်လည် ဖြေကြားချက် အပြည့်အစုံ။

#Local_News
Published-27 October 2023

မြန်မာ့ထောပတ်သီးနှံ တိုးမြှင့်ထုတ်လုပ်ရေး၊ တန်ဖိုးမြင့်ထုတ်ကုန်များအဖြစ် ထုတ်လုပ်ပြီး ပြည်ပသို့တင်ပိုနိုင်ရေးနှင့် ဈေးကွက်ကျယ်ပြန့်စွာ ရရှိရေးတို့အတွက် ယမန်နေ့ကဆွေးနွေးမှုများပြုလုပ်ခဲ့ကြောင်းသိရသည်။

ထောပတ်သီးနှံ စိုက်ပျိုးထုတ်လုပ်မှုတိုးတက်လာစေရန်၊ ထောပတ်သီးနှံမှ ပြည်ပပို့ကုန်ဝင်ငွေတိုးမြှင့် ရရှိစေရန်နှင့် ထောပတ်သီးနှံ၏ တန်ဖိုးကွင်းဆက်တစ်လျှောက် အားသာချက်၊ အားနည်းချက်၊ အခွင့်အလမ်းနှင့် စိန်ခေါ်မှုများကို ဆွေးနွေးဖော်ထုတ်ရန် အတွက် “ထောပတ်သီးနှံစိုက်ပျိုးထုတ်လုပ်မှု၊ ပြည်ပတင်ပို့မှုနှင့်စိန်ခေါ်မှုများ” အလုပ်ရုံဆွေးနွေးပွဲကို အောက်တိုဘာ (၂၆)ရက် နေ့က နေပြည်တော်၌ ကျင်းပခဲ့သည်။

ဆွေးနွေးပွဲတွင် ပြည်ထောင်စုဝန်ကြီးဦးမင်းနောင်က မြန်မာ့ရေမြေရာသီဥတုတွင် အောင်မြင်စွာ စိုက်ပျိုးဖြစ်ထွန်းနိုင်သည့် ထောပတ်သီးနှံစိုက်ပျိုးထုတ်လုပ်မှုကို နိုင်ငံတော်အစိုးရက အားပေးမြှင့်တင်လျက်ရှိပြီး အရည်အသွေးကောင်းသော မြန်မာ့ထောပတ်သီးနှံ တိုးမြှင့်ထုတ်လုပ်ရေး၊ တန်ဖိုးမြင့် ထုတ်ကုန်များအဖြစ် ထုတ်လုပ်ပြီး ပြည်ပသို့တင်ပိုနိုင်ရေးနှင့် ဈေးကွက်ကျယ်ပြန့်စွာ ရရှိရေးတို့အတွက် အလေးထားဆောင်ရွက်ကြောင်း ပြောကြားသည်။

ထောပတ်သီးနှံကို ကမ္ဘာ့ကုန်သွယ်မှုအနေဖြင့် ၂၀၂၁ ခုနှစ်တွင် အမေရိကန်ဒေါ်လာ ၈ ဘီလီယံခန့်ရှိပြီး မြန်မာနိုင်ငံအနေဖြင့် ၂၀၂၁ ခုနှစ်တွင် တန်ချိန်နှစ်ထောင့်လေးရာခန့်၊ ၂၀၂၂ ခုနှစ်တွင် တန်ချိန် ခုနစ်ရာကျော်ခန့်ကို ထိုင်း၊ ကမ္ဘောဒီးယား၊ ဟောင်ကောင်၊ တရုတ်၊ မလေးရှား၊ ဗြိတိန်နိုင်ငံများသို့ တင်ပို့ရောင်းချခဲ့သည်ကို တွေ့ရှိပြီး တင်ပိုသည့် ပမာဏ ၃ ဆကျော် လျော့ကျသွားခြင်းကို သေချာစွာဆန်းစစ်လေ့လာရန် လိုအပ်သည်ဟု ပြောကြားခဲ့ပါသည်။

နှစ်စဉ် ကမ္ဘာ့ထောပတ်သီး ဈေးကွက်ဝယ်လိုအား မြင့်တက်လာလျက်ရှိရာ မြန်မာနိုင်ငံ၏ ရေ၊ မြေ၊ ရာသီဥတုနှင့်ကိုက်ညီသော မျိုးသစ်များတင်သွင်းခြင်း၊ ဒေသကိုက်ညီမှု သုတေသနများဆောင်ရွက်ခြင်း၊ ခေတ်မီစိုက်ပျိုးနည်းပညာများ ကျင့်သုံးခြင်း၊ GAP နှင့် အော်ဂဲနစ်လက်မှတ်များရယူခြင်း၊ တန်ဖိုးမြင့် ထောပတ်သီးထုတ်ကုန်များ ထုတ်လုပ်ခြင်းတို့ကို အကောင်အထည်ဖော်ဆောင်ရွက်ရန် လိုအပ်ပါသည်။

အလားတူထောပတ်သီးအနှစ်၊ ထောပတ်သီး အဆီ၊ အလှကုန်နှင့်ဆေးဝါးများ ထုတ်လုပ်ရန်ကုန်ကြမ်း စသည်ဖြင့် ဈေးကွက်တောင်းဆိုမှုအရ ဆန်းသစ်တီထွင်သောနည်းလမ်းများဖြင့် တန်ဖိုးမြင့် ကုန်ပစ္စည်းအမျိုးမျိုးထုတ်လုပ်ပြီး အကျိုးစီးပွားပိုမိုဖြစ်ထွန်းစေရေး ကြိုးပမ်းသွားမည်ဟု ပြောကြားသည်။

ထောပတ်သီးနှံကို လွန်ခဲ့သည့် ၇၅ နှစ်ခန့်က စတင်၍ မြန်မာနိုင်ငံ၌ စိုက်ပျိုးခဲ့ရာ ရှမ်းပြည်နယ်၊ ချင်းပြည်နယ်၊ စစ်ကိုင်းတိုင်းဒေသကြီးနှင့် မန္တလေးတိုင်းဒေသကြီး ပြင်ဦးလွင်ဒေသတစ်ဝိုက်တွင် အဓိကစိုက်ပျိုးကြသည်။

#Local_News #ထောပတ်သီး #တန်ဖိုးမြင့်ကုန်ပစ္စည်းအမျိုးမျိုး #Yangon_Times/PP

#World_News
Published 27 October 2023

ဂါဇာကမ်းမြောင်ရှိ ပါလက်စ်တိုင်း ဟားမတ်စ်စစ်သွေးကြွတွေကို အစ္စရေးလ်တို့ လက်တုန့်ပြန်ခြင်း အဆုံးမသတ်နိုင်ပါက အမေရိကန်လည်း ဒီပြဿနာမီးကနေ ကင်းလွတ်မှာ မဟုတ်ကြောင်း အီရန်နိုင်ငံခြားရေးဝန်ကြီး ဟိုစိန်အမိုင်ရက်ဒိုလာဟီယန်က ကုလသမဂ္ဂမှာ ကြာသပတေးနေ့က ပြောကြားသွားပါတယ်။

‘’ပါလက်စ်တိုင်းမှာ လူမျိုးသုဥ်း သတ်ဖြတ်မှုတွေကို ချုပ်ကိုင်နေတဲ့ အမေရိကန်တွေကို ပွင့်ပွင့်လင်းလင်း ပြောချင်တာက ထိုဒေသတွင်း စစ်ပွဲဂယက် ပျံ့ပွားလာမှာကို ကျုပ်တို့မလိုလားပါဘူး။ ဂါဇာမှာ သတ်ဖြတ်မှုတွေ ဆက်ပြီးဖြစ်နေမယ်ဆိုရင် သူတို့လည်း ဒီပြဿနာမီးကနေ ကင်းလွတ်မှာ မဟုတ်ပါဘူး’’ လို့ အရှေ့အလယ်ပိုင်းရှိ ၁၉၃ နိုင်ငံပါဝင်တဲ့ အထွေထွေညီလာခံ အစည်းအဝေးမှာ ပြောကြားခဲ့ပါတယ်။

ဂါဇာကို အုပ်စိုးနေတဲ့ ဟားမတ်စ်တို့ဟာ အောက်တိုဘာ ၇ ရက်နေ့က အစ္စရေးလ်ကို ကျူးကျော်ပြီး လူပေါင်း ၁,၄၀၀ ခန့် သတ်ဖြတ်ခဲ့ကာ ဓားစာခံရာဂဏန်းခန့်ကို ဖမ်းဆီးခေါ်ဆောင်သွားတဲ့အတွက် အစ္စရေးလ်က ဟားမတ်စ်တို့ကို အမြစ်ပြတ်ချေမှုန်းရန် ကြွေးကြော်ထားပါတယ်။

အစ္စရေးလ်က ဂါဇာကို လေကြောင်း တိုက်ခိုက်မှုများ ပြုလုပ်နေသလို မြို့ကိုဝိုင်းရံထားပြီး မြေပြင်ကျူးကျော်မှု ပြုလုပ်ရန် ပြင်ဆင်နေပါတယ်။

ထိုအတောအတွင်း လူပေါင်း ၇ ထောင်ကျော် သေဆုံးခဲ့တယ်လို့ ပါလက်စ်တိုင်း အာဏာပိုင်များက ဆိုပါတယ်။

ဟားမတ်စ်တို့က အရပ်သားဓားစာခံတွေကို လွှတ်ပေးဖို့ အသင့်ဖြစ်နေပြီလို့ အီရန်ကို ပြောဆိုခဲ့ပြီး အစ္စရေးလ်အကျဥ်းထောင်တွေမှာ ရှိတဲ့ ပါလက်စ်တိုင်း ၆ ထောင်ခန့်ကိုလည်း လွှတ်ပေးရေးအတွက် ကမ္ဘာကြီးအနေနဲ့ တွန်းအားပေးသင့်ကြောင်း အမိုင်ရက်ဒိုလာဟီယန်က ပြောကြားသွားပါတယ်။

အီရန်နိုင်ငံအနေနဲ့ အလွန်အရေးကြီးတဲ့ လူသားချင်းစာနာထောက်ထားမှု ကြိုးပမ်းမှုမှာ ပါဝင်ရန် ကာတာ၊ တူရကီတို့နဲ့အတူ အသင့်ရှိနေကြောင်း၊ ပါလက်စ်တိုင်း ၆ ထောင်ကို လွှတ်ပေးရေးက ဆောင်ရွက်ရန် လိုအပ်တဲ့ နောက်အချက်တစ်ခုဖြစ်ပြီး နိုင်ငံတကာ အသိုင်းအဝိုင်းအနေနဲ့ တာဝန်ရှိကြောင်း ပြောဆိုသွားပါတယ်။

#World_News #စစ်ပွဲဆက်လက်ဖြစ်ပွား #အီရန်ကသတိပေး #Source: Reuters

#Local_News
Published_ 27 October 2023

ကချင်ပြည်နယ်၊တနိုင်းမြို့အနီးတွင် အောက်တိုဘာလ(၂၇)ရက်မနက်ပိုင်း၌အင်အားရစ်တာစကေး(၄.၂)အဆင့်ရှိ ငလျင်လှုပ်ခတ်သွားကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာန၏ ထုတ်ပြန်ချက်အရ သိရသည်။

ထုတ်ပြန်ချက်တွင် ၂၀၂၃ ခုနှစ်၊ အောက်တိုဘာလ (၂၇) ရက်နေ့၊ မြန်မာစံတော်ချိန် (၀၀) နာရီ၊ (၅၉) မိနစ်၊ (၀၆) စက္ကန့်အချိန်တွင် မြစ်ကြီးနားမြေငလျင်စခန်းမှ အနောက်မြောက်ဘက် (၅၈) မိုင်ခန့်ကွာဝေးသော မြန်မာနိုင်ငံပြည်တွင်း (တနိုင်းမြို့၏ အရှေ့-အရှေ့တောင်ဘက် (၂၉) မိုင်ခန့်အကွာ)၊ မြောက်လတ္တီတွဒ် (၂၆.၃၂) ဒီဂရီ၊ အရှေ့လောင်ဂျီတွဒ် (၉၇.၁၃) ဒီဂရီ၊ အနက် (၁၀) ကီလိုမီတာကို ဗဟိုပြု၍ အင်အား ရစ်(ခ်)တာစကေး (၄.၂) အဆင့်ရှိ အင်အားအနည်းငယ်ရှိသော မြေငလျင်တစ်ခုလှုပ်ရှားသွားကြောင်း ဖော်ပြပါရှိသည်။

မြန်မာနိုင်ငံသည်၂၀၂၃ ခုနှစ်အတွင်း ဒေသအနှံ မြေငလျင်ငယ်များ ဆက်တိုက်လှုပ်ခတ်ခဲ့သလို မြေငလျင်ကြီး အချို့လည်းရန်ကုန်တိုင်း၊ မန္တလေးတိုင်း၊ စစ်ကိုင်းတိုင်းစသည့်ဒေသအချို့တွင် လှုပ်ခတ်ခြင်းများရှိခဲ့ကြောင်းနှင့် စစ်ကိုင်းပြတ်ရွေ့ကြောပေါ်ရှိ ဒေသများအနေဖြင့် တစ်ကျော့ပြန် မြေငလျင်ကြီးများကို သတိပြုကြရန် မိုးလေဝသနှင့် ဇလဗေဒညွှန်ကြားမှုဦးစီးဌာန(မြေငလျင်ဌာနခွဲ)မှ သတိပေးထားကြောင်း သိရသည်။

#Local_News #ကချင်ပြည်နယ် #တနိုင်းမြို့ #ငလျင်လှုပ် #tthl #Yangon_Times