#Local_News
Published_ 21 July 2023

မြန်မာပင်လယ်ပြင်၊ ကမ်းလွန်လုပ်ကွက်အမှတ် A3 ဧရိယာတွင် ဆောင်ရွက်နေသည့် ဆောက်လုပ်ရေးဆိုင်ရာ အကြိုစစ်တမ်း(Pre Construction Survey)လုပ်ငန်းများ မပြီးသေး၍ ရေကြောင်းသတိပေးချက်ထပ်မံထုတ်ပြန်လိုက်ကြောင်း သိရသည်။

မူလက ဇွန်လ(၁)ရက်မှဇူလိုင်(၃၁)ရက်အထိ ကမ်းလွန်လုပ်ကွက်အမှတ် A3 ဧရိယာအတွင်း ရေကြောင်းသတိပေးချက်ထုတ်ပြန်ခဲ့သော်လည်း လုပ်ငန်းများမပြီးပြတ်သေးသည့်အတွက် ဇူလိုင်(၃၁)ရက်မှ ဩဂုတ်လ(၁၅)ရက်အထိ ဆက်လက်ဆောင်ရွက်သွားမည်ဖြစ်ကြောင်း ထုတ်ပြန်ထားသည်။

မြန်မာ့ရေနံနှင့် သဘာဝဓာတ်ငွေ့လုပ်ငန်း၏ ရေနံရှာဖွေရေးလုပ်ငန်းများတွင် အကျိုးတူပူးပေါင်း ဆောင်ရွက်လျက်ရှိသည့် POSCO International Coorporation(Myanmar E&P)မှ M.V FURGO EQUATOR သင်္ဘောဖြင့် အဆိုပါစစ်တမ်းလုပ်ငန်းများကို ဆောင်ရွက်နေခြင်းဖြစ်ပြီး ယင်းလုပ်ငန်းများမပြီးသေး၍ ရေကြောင်းသတိပေးချက်ထပ်မံထုတ်ပြန်ခြင်းဖြစ်သည်။

လုပ်ငန်းများဆောင်ရွက်နေစဉ် ကမ်းလွန်လုပ်ကွက်အမှတ် A3 ဧရိယာအတွင်းနှင့်အဆိုပါနေရာနှင့်(၄)ကီလိုမီတာ ပတ်လည်တွင်ရေကြောင်း သတိပေးချက်ထုတ်ပြန်ထားပါ၍ သင်္ဘောကြီးငယ်များ၊ကုန်တင်စက်လှေများ၊ ငါးဖမ်းသင်္ဘောများ၊စက်တပ်သမ္ဗာန်များ ဖြတ်သန်းသွားလာခြင်း ကျောက်ချရပ်နားခြင်း၊ငါးဖမ်းခြင်းနှင့် ငါးဖမ်းကိရိယာများချထားခြင်းမပြုရန် ငါးလုပ်ငန်းဦးစီးဌာနမှသိရသည်။

#Local_News ##Survey(စစ်တမ်း)လုပ်ငန်းများမပြီးသေး
#tthl #Yangon_Times

#Local_News

Published-21-7-2023

ထိုင်းနိုင်ငံရောက် မြန်မာအလုပ်သမားများ၏ ပတ်စပို့စ် သက်တမ်းတိုးခြင်းကို လာမည့် ဩဂုတ်လ( ၂ )ရက်မှ စတင်ကာ ပြုလုပ်ပေးသွားမည်ဖြစ်ကြောင်း ဘန်ကောက်မြို့ မြန်မာသံရုံးက အသိပေးထုတ်ပြန်ထားသည်။

ထိုသို့ ပြုလုပ်ပေးရာ၌ ၂၀၂၄ ခုနှစ်၊ မတ်လ( ၃၁ )ရက်နေ့တွင် သက်တမ်းကုန်ဆုံးတော့မည့် PJ နိုင်ငံကူးလက်မှတ်များအတွက် ပြုလုပ်ပေးသွားမည်ဟုဆိုသည်။

သက်တမ်းတိုးလိုသူများ အနေဖြင့် ယခုဇူလိုင်လ (၂၉)ရက်မှစ၍ အပတ်စဉ် စနေနေ့တိုင်း တိုကင်လာရောက်ယူနိုင်ကာ၊ မိမိကိုင်ဆောင်နေသော နိုင်ငံကူးလက်မှတ်ကို ယူဆောင်လာရမည်ဖြစ်ပြီး မျက်နှာဖြင့် တိုက်ဆိုင်စစ်ဆေးပြီးမှသာ ရက်ချိန်း တိုကင်ပေးအပ်မည်ဖြစ်ကြောင်း သိရသည်။

ထို့အပြင် တိုကင်လာ‌ရောက်ယူဆောင်ရာတွင် ကိုယ်စားလှယ်များဖြင့် ထုတ်ယူခြင်းကို လုံးဝ (လုံးဝ) ပေးအပ်မည်မဟုတ်ကြောင်းလည်း အသိပေးထားသည်။

ယင်းအတွက် ညအိပ်တန်းစီရန်မလိုအပ်ဘဲ နံနက်ပိုင်းမှသာ စနစ်တကျတန်းစီ၍ လာရောက်ထုတ်ယူကြရန် ဖြည့်စွက်အသိပေးထားသည်။

#YMG/my #Local_News #မြန်မာလုပ်သားများအတွက်ပတ်စပို့စ်သက်တမ်းတိုးပေးမည်
#Yangon _Times

UNESCO အနေနဲ့ မြောက်ဉီးဒေသကို လာရောက်စစ်ဆေးဖို ရှိပေမယ့် ကိုဗစ် ၁၉ ကပ်ရောဂါကာလနဲ့ အကြောင်းအမျိုးမျိုးတွေကြောင့် လာရောက် မစစ်ဆေးနိုင်သေးတာဖြစ်
Published_ 21 July 2023
#ကမ္ဘာ့ရှေ့ဟောင်းအမွေအနှစ်စာရင်းဝင်မြောက်ဦးဒေသ
#Ymg/my
#Yangon _Times

#Local_News
Published-21 July 2023

ယခုမိုးတွင်းကာလတွင် တုပ်ကွေးရောဂါ၊ နမိုးနီးယားအဆုတ်ရောင်ရောဂါ၊ ဦးနှောက်ရောင်ရောဂါဖြစ်ပွားမှုများတွေ့ရှိနေရကြောင်း ကျန်းမာရေးဝန်ကြီးဌာန ပြည်ထောင်စုဝန်ကြီး ဒေါက်တာသက်ခိုင်ဝင်းက ပြောကြားသည်။

ရန်ကုန်တိုင်းအတွင်းရှိ မြို့နယ်ပြည်သူ့ကျန်းမာရေးနှင့် ကုသရေးဦးစီးဌာနမှူးများနှင့်တွေ့ဆုံခဲ့စဥ် အထက်ပါအတိုင်းပြောကြားခဲ့ပြီး ကျန်းမာရေးဝန်ကြီးဌာန အနေဖြင့်လည်း  အသက် ၅နှစ်အောက်ကလေးငယ်များတွင် ကာကွယ်ဆေးနှင့် ကာကွယ်၍ရသည့် ရောဂါမဖြစ်ပွားစေရန်အတွက် ကာကွယ်ဆေးလွမ်းခြုံမှုမြင့်မားစေရန် ဆောင်ရွက်နေကြောင်းလည်း ဆိုသည်။

သို့ဖြစ်ပါ၍ မြို့နယ်ဆရာဝန်များအနေဖြင့်လည်း ၎င်းတို့တာဝန်ကျရာမြို့နယ်အတွင်း၌ရှိသည့် ရွေ့ပြောင်းနေထိုင်သူများကို စနစ်တကျစာရင်းပြုစုထားရမည်ဖြစ်ပြီး ကာကွယ်ဆေးလွမ်းခြုံမှုရှိစေရန်ဆောင်ရွက်ရမည်ဖြစ်ကြောင်းလည်း ပြောကြားခဲ့သည်။

ထို့အပြင် ဆေးရုံကြီးများအနေဖြင့်လည်း ရောဂါဖြစ်လာသည့်အခါ အချိန်နှင့်တပြေးညီကုသမှုပေးနိုင်ရန်အတွက် ဆေးနှင့်ဆေး ပစ္စည်းများ၊ ကုသရေးလမ်းညွှန်ချက် များကို ပြင်ဆင်ထားရမည်ဟုလည်း ကျန်းမာရေးဝန်ကြီးပြည်ထောင်စုဝန်ကြီးက ပြောကြားခဲ့သည်။

#Local_News #တုပ်ကွေး၊နမိုးနီးယားအဆုတ်ရောင်ရောဂါ #ဦးနှောက်ရောင်ရောဂါများဖြစ်ပွား
#Yangon_Times/BM

ပင်လယ်ရေအောက် ဖိုက်ဘာကေဘယ်လ်သွယ်တန်းမှုကို ယခု ဇူလိုင်လ (၁၃) ရက်မှ စတင်ပြုလုပ်နေခြင်းဖြစ်ပြီး၊ လာမယ့် ဒီဇင်ဘာလကုန်အထိ လုပ်ဆောင်သွားဖို့ရှိ
Published 21 July 2023
#Local_News
#ပင်လယ်ရေအောက်ဖိုက်ဘာကေဘယ်လ်သွယ်တန်းမှုစတင်ပြုလုပ်
#Ymg/my
#Yangon_Times

#Local_News
Published 21 July 2023

ရုပ်သံလိုင်းများတွင် ရိုက်ကူးပြသမည့် မြန်မာဇာတ်လမ်းတွဲများ မရိုက်ကူးမီဇာတ်လမ်းခွင့်ပြုချက်ရရန်အတွက် ဇာတ်လမ်းအကျဉ်းနှင့်အခန်းစဉ်များကို ဗီဒီယိုဆင်ဆာအဖွဲ့ကို ကြိုတင်တင်ပြရိုက်ကူးကြရမည်ဖြစ်ကြောင်း မြန်မာနိုင်ငံရုပ်ရှင်အစည်းအရုံးမှ ထုတ်ပြန်လိုက်သည်။

လာမည့်ဩဂုတ်လ၁ရက်နေ့မှစပြီး ရုပ်မြင်သံကြားရိုက်ကူးလုပ်ငန်းလုပ်ကိုင်နေသူများနှင့်ထုတ်လုပ်သူများ အနေဖြင့် မြန်မာဇာတ်လမ်းတွဲများ မရိုက်ကူးမီဇာတ်လမ်းအကျဉ်းနှင့် အခန်းစဉ်များကို ဗီဒီယိုဆင်ဆာအဖွဲ့ထံ ကြိုတင်တင်ပြရန်နှင့် ဆင်ဆာအဖွဲ့ထံ တင်ပြခြင်းမရှိဘဲ ရိုက်ကူးထားသောဇာတ်လမ်းတွဲများကို တင်ပြလာပါက ဆင်ဆာကြည့်ရူစစ်ဆေးပေးခြင်းကို ဆောင်ရွက်ပေးမည်မဟုတ်ကြောင်း ထုတ်ပြန်ထားသည်။

‘မြန်မာဇာတ်လမ်းတွဲတွေ မရိုက်ကူးမီ ဗီဒီယိုဆင်ဆာအဖွဲ့ကို ကြိုတင်တင်ပြရိုက်ကူးရမယ်လို့ အစည်းအရုံးကထုတ်ပြန်ထားတယ်ဆိုတာဟုတ်ပါတယ်။ အရင်ဗီဒီယိုဆင်ဆာအဖွဲ့ပါပဲ။ သူတို့ကိုပဲတင်ပြရမှာ။ အနုပညာလောကသားအနေနဲ့ ဒါကိုဘယ်လိုမြင်လဲဆိုတော့ ဇာတ်လမ်းရိုက်မယ့်လုပ်ငန်းနေရာ၊ အခန်းစဉ် နေရာတွေကိုကြိုတင်တင်ပြထားတော့တစ်ခုခုဆိုရင်စစ်ဆေးတာတွေရှိရင် ဒါကို (အထောက်အထား)ပြလိုက်ရင် အကာအကွယ်ပေးတဲ့သဘောပါ”ဟု မြန်မာနိုင်ငံရုပ်ရှင်အစည်းအရုံးဝင်၊ ရုပ်ရှင်လောကသားတစ်ဦးက YMG ကို ပြောပြခဲ့သည်။

#tthl #Local_News #မြန်မာဇာတ်လမ်းတွဲများဆင်ဆာကြိုတင်တင်ပြရမည်ဟုထုတ်ပြန်
#Yangon_Times

‘ဂျပန်၊ ကိုရီးယားနဲ့ အာဆီယံနိုင်ငံတွေမှာ မြန်မာ့ရွှေထည်၊ စိန်ထည်တွေဈေးကွက်ရပြီးသားပါ၊ ကိုဗစ်မှာ တင်ပို့ဖို့ပျက်သွားတာပါ။အခုအခွန်လျှော့ပေါ့ပေးလိုက်ချိန်မှာ ပြန်တင်ပို့သွားဖို့ရှိပါတယ်’ ရန်ကုန်တိုင်းဒေသကြီးရွှေလုပ်ငန်းရှင်အသင်းဥက္ကဌဦးမျိုးမြင့်
Published 21 July 2023
#Local_News
#မြန်မာ့ရွှေထည်၊ စိန်ထည်များပြန်တင်ပို့မည်
#tthl
#Yangon_Times

‘ပျောက်ဆုံးသွားတဲ့ သင်္ဘောသားတွေရဲ့ မိသားစုဝင်တွေကတော့ လတ်တလောဇူလိုင် ၂၁ ရက် မနက်ပိုင်းအထိတော့ MSF ကိုတော့ဆက်သွယ်အကူအညီတောင်းထားတာမျိုး မရှိသေးဘူး။ ဆက်သွယ်အကူအညီတောင်းခံလာရင် မြန်မာသင်္ဘောသားတွေရပိုင်ခွင့်၊ခံစားခွင့်တွေရရှိအောင်တောင်းဆိုပေးမယ်’
ဦးစိုးမင်းအောင်(မြန်မာနိုင်ငံပင်လယ်ကူးသင်္ဘောသားအလုပ်သမားများအဖွဲချုပ် (MSF)ဥက္ကဌ)
Published 21 July 2023
#Local_News
#မြန်မာသင်္ဘောသား(၄)ဦးပျောက်ဆုံး
#tthl
#Yangon_Times

ထိုင်းနိုင်ငံ နာမည်ကြီး ဘိလပ်မြေကုမ္ပဏီတစ်ခုဖြစ်တဲ့ Siam Cement Group (SCG) ကုမ္ပဏီ၊ ထိုင်းကြက်ခြေနီအသင်းနဲ့ ထိုင်းအယုဒ္ဓယဘဏ်တို့က ပူးပေါင်းထောက်ပံ့
Published 21 July 2023
#Local_News
#မိုခါမုန်တိုင်းသင့်ပြည်သူများထံသို့ထောက်ပံ့ပစ္စည်းများပေးအပ်
#Ymg/my
#Yangon_Times

#Local_News
Published 21 July 2023

တရုတ်တက္ကသိုလ်များနှင့် မြန်မာတက္ကသိုလ်များတွင် ကျောင်းသားဖလှယ်ရေးအစီအစဉ်ဖြင့် တရုတ်-မြန်မာကျောင်းသားစုစုပေါင်း(၇၀၀၀)ကျော် ပညာသင်ယူခွင့်ရရှိခဲ့ကြောင်း ပညာရေးဝန်ကြီးဌာနမှသိရသည်။

အာဆီယံ-တရုတ်စင်တာ အတွင်းရေးမှူးချုပ် H.E. Mr. SHI Zhongjun ဦးဆောင်သော ကိုယ်စားလှယ်အဖွဲ့နှင့် ပညာရေးဝန်ကြီးဌာန၊ပြည်ထောင်စုဝန်ကြီး ဒေါက်တာညွန့်ဖေထည့်သွင်းပြောကြားချက်အရသိရခြင်း ဖြစ်သည်။

ပြည်ထောင်စုဝန်ကြီးက ၂၀၂၃ ခုနှစ် ဇွန်လမှတ်တမ်းများအရ တရုတ်နိုင်ငံနှင့် မြန်မာနိုင်ငံတက္ကသိုလ် များအကြား နားလည်မှုစာချွန်လွှာပေါင်း ၂၅ စောင် လက်မှတ်ရေးထိုးထားပြီး ၂၀၁၃ ခုနှစ်မှ ၂၀၂၃ ခုနှစ်အတွင်း မြန်မာတက္ကသိုလ်ကျောင်းသားနှင့် ဆရာစုစုပေါင်း (၅၇၀၃) ဦး တရုတ်နိုင်ငံတက္ကသိုလ် များတွင် တက်ရောက်ပညာသင်ယူခွင့်ရရှိခဲ့ပါကြောင်း၊ ၂၀၁၃ ခုနှစ်မှစတင်ပြီး ရန်ကုန်နိုင်ငံခြား ဘာသာတက္ကသိုလ်တွင် တရုတ်ကျောင်းသား (၈၀၂) ဦးနှင့် မန္တလေးနိုင်ငံခြားဘာသာ တက္ကသိုလ်တွင် (၅၈၉)ဦး မြန်မာဘာသာစကားကို လာရောက်သင်ယူခဲ့ကြောင်းထည့်သွင်းပြောကြားခဲ့သည်။

ယင်းအပြင် ပညာရေးဝန်ကြီးဌာနအနေဖြင့် မြန်မာစာဧည့်ပါမောက္ခများကို တရုတ်နိုင်ငံ တက္ကသိုလ်များတွင် တာဝန်ထမ်းဆောင်ရန် စေလွှတ်ပေးလျက်ရှိပါကြောင်း၊ ကျောင်းသားဖလှယ်ရေး၊ ဆရာဖလှယ်ရေး၊ သုတေသနပူးပေါင်းဆောင်ရွက်ရေးတို့ကို တိုးမြှင့်ဆောင်ရွက်လိုကြောင်း ဆွေးနွေးပြောကြားခဲ့သည်။

အာဆီယံ-တရုတ်စင်တာညွှန်ကြားရေးမှူးချုပ် H.E. Mr. SHI Zhongjun က အာဆီယံ-တရုတ်စင်တာ သည် ကုန်သွယ်မှု၊ ရင်းနှီးမြှုပ်နှံမှု၊ ပညာရေး၊ ယဉ်ကျေးမှု၊ ကမ္ဘာလှည့်ခရီးသွားလုပ်ငန်းနှင့်မီဒီယာကဏ္ဍ တို့တွင် အာဆီယံအဖွဲ့ဝင် နိုင်ငံများနှင့်အကျိုးတူပူးပေါင်းဆောင်ရွက်မှုကို မြှင့်တင်လျက်ရှိကြောင်း၊ မြန်မာနိုင်ငံပညာရေးဖွံ့ဖြိုးတိုးတက်ရေးအတွက် တရုတ်နိုင်ငံတက္ကသိုလ်များက ပူးပေါင်းဆောင်ရွက်ရန် အသင့်ရှိပါကြောင်းပြောကြားခဲ့ကြောင်းသိရသည်။

#tthl #Local_News #ကျောင်းသား(၇၀၀၀)ကျော်ပညာသင်ယူခွင့်ရရှိခဲ့
#Yangon_Times

#Ukraine_Crisis
Published 21 July 2023

ယူကရိန်းထိုးစစ်လမ်းကြောင်းမှာ ပိတ်ဆို့ထားတဲ့ ရုရှားတပ်များရှိတဲ့နေရာတွေကို ဖြိုခွဲဖို့အတွက် ယူကရိန်းတပ်များဟာ အမေရိကန်မှ ထောက်ပံ့ပေးထားတဲ့ ပြန့်ကျဲဗုံးများ စတင်အသုံးပြုနေပြီဖြစ်ကြောင်း ယူကရိန်းအရာရှိများနှင့် နီးစပ်သူများရဲ့ ပြောကြားချက်ကို ဝါရှင်တန်ပို့စ်က ဖော်ပြခဲ့ပါတယ်။

ထိုလက်နက်တွေဟာ အရပ်သားတွေအတွက်ပါ အန္တရာယ်များတာကြောင့် ကျယ်ကျယ်ပြန့်ပြန့် တားမြစ်ထားပြီး အခုလိုမျိုး အသုံးပြုတဲ့အပေါ် အငြင်းပွားမှုတွေ ရှိလာပါတယ်။

အမေရိကန်သမ္မတ 'ဂျိုးဘိုင်ဒင်'က လက်နက်တင်ပို့ခြင်း ကန့်သတ်ချက်အချို့ကို ကျော်လွန်ပြီး ဒီလိုလက်နက်တွေကို ထောက်ပံ့ရန် ဆုံးဖြတ်ခဲ့တာ ဖြစ်ပါတယ်။

ဒီလို နောက်ထပ်လက်နက်တွေ မရသေးတဲ့အချိန်အထိ ယူကရိန်းစစ်ရေးအားထုတ်မှုတွေကို ထောက်ပံ့ကူညီတာ ဖြစ်တယ်လို့ အမေရိကန်က ဆိုပါတယ်။

ယူကရိန်းက ပြန်လည်သိမ်းပိုက်ရန် ကြိုးပမ်းနေတဲ့ နယ်မြေများမှာ ယူကရိန်းထိုးစစ်ဆင်မှုကို နှောင့်နှေးစေတဲ့ ရုရှားတပ်များကို တိုက်ခိုက်ဖို့အတွက် အဆိုပါပြန့်ကျဲဗုံးတွေ အသုံးပြုတာဖြစ်ကြောင်း ယူကရိန်းအရာရှိများက ဆိုပါတယ်။

ထိုလက်နက်များဖြင့် လက်နက်အင်အား၊ တပ်ဖွဲ့အင်အား သိသိသာသာ နည်းပါးခြင်းအခြေအနေမှာ တန်ပြန်အသာရစေနိုင်မယ်လို့ အရာရှိများက ဆိုပါတယ်။

ဗုံးများကို ယူကရိန်းအရှေ့တောင်ပိုင်း ရှေ့တန်းနေရာတွေမှာသာမက ရုရှားတို့ထိန်းချုပ်ထားတဲ့ ဘက်ခ်မွတ်မြို့အနီးမှာလည်း အသုံးပြုနေကြောင်း တာဝန်ရှိသူများရဲ့ ပြောကြားချက်ကို ကိုးကားပြီး မီဒီယာများက ဖော်ပြနေကြပါတယ်။

ဒီလက်နက်တွေကို ယူကရိန်းသို့ ပေးပို့ရန် ဘိုင်ဒင်က ခက်ခက်ခဲခဲ ဆုံးဖြတ်ရတာဖြစ်ပြီး ထိုဆုံးဖြတ်ချက်ကြောင့် လူ့အခွင့်အရေးအဖွဲ့များ၊ ဥရောပမဟာမိတ်များ၊ အချို့သော ဒီမိုကရက်တွေက ဆန့်ကျင်နေကြပါတယ်။

ထိုဗုံးတွေထဲကနေ ဗုံးအသေးအမွှားများစွာက ပြန့်ကျဲထွက်သွားကာ အရပ်သားတွေအတွက် ဘေးအန္တရာယ်များစေတဲ့အပြင် စစ်ပွဲများပြီးသည့်တိုင်အောင် မပေါက်ကွဲဘဲ ကျန်ရှိနေနိုင်တာကြောင့် နိုင်ငံပေါင်း ၁၂၀ ကျော်မှာ တားမြစ်ထားပါတယ်။

ရုရှားသမ္မတ 'ဗလာဒီမာပူတင်'က ယူကရိန်းတို့ အဆိုပါလက်နက်အသုံးပြုခြင်းကို သတိပေးလိုက်ကာ အသုံးပြုခဲ့ပါက လက်တုန့်ပြန်သွားမယ်လို့ ခြိမ်းခြောက်လိုက်ပါတယ်။

၂၀၂၂ ကျူးကျော်ချိန်ကစလို့ ရုရှားတို့ဟာလည်း ယူကရိန်းနေရာအများအပြားမှာ အဆိုပါဗုံးများကို အကြိမ်ကြိမ်အသုံးပြုခဲ့ပြီးဖြစ်တာကို သတိပြုသင့်တယ်လို့ ကုလသမဂ္ဂက ဆိုထားပါတယ်။

ယူကရိန်းက လူနေထူထပ်ရာနေရာတွေမှာ ထိုလက်နက်တွေ အသုံးပြုမှာမဟုတ်ကြောင်း၊ အသုံးပြုပြီးနောက် ထိုနေရာတွေမှာ ရှင်းလင်းရေးသေချာ လုပ်ဆောင်သွားမှာဖြစ်ကြောင်း အခိုင်အမာဆိုထားပါတယ်။

#Ukraine_Crisis #ယူကရိန်းတို့ပြန့်ကျဲဗုံးများအသုံးပြု၍ရုရှားတပ်များကိုတိုက်ခိုက်
Source: WION

#World_Health
Published 21 July 2023

အသက်အရွယ်ရလာတဲ့အခါ ကျန်းမာရေးကို ခြိမ်းခြောက်လာပြီး အထူးသဖြင့် ဦးနှောက်လုပ်ဆောင်ချက်တွေကို ထိခိုက်လာပါတယ်။

အမြဲစွမ်းဆောင်မှု မြင့်မားနေအောင်၊ အရေးကြီးဆုံးဖြတ်ချက်များ ချမှတ်နိုင်အောင်၊ စွမ်းရည်အသစ်များ သင်ယူချင်စိတ်ရှိလာအောင် ကျွန်ုပ်တို့ရဲ့မှတ်ဉာဏ်က အရေးကြီးတဲ့ကဏ္ဍက ပါဝင်နေပါတယ်။

အသက်ကြီးလာတဲ့အခါ တစ်ခုခုကို သင်ယူလေ့လာရာမှာ ခက်ခဲလာခြင်း၊ သတိမေ့ခြင်းများ ဖြစ်ပေါ်လာတတ်ပါတယ်။

ဒါပေမဲ့ အသက်ကြီးသူတွေမှာ မှတ်ဉာဏ်နဲ့ ဦးနှောက်စွမ်းရည် တိုးတက်စေနိုင်တဲ့ နည်းလမ်းတွေရှိကြောင်း သုတေသန တွေ့ရှိထားပါတယ်။

- ပုံမှန်လေ့ကျင့်ခန်းပြုလုပ်ခြင်း

နေ့စဉ်အခြေခံ ကိုယ်လက်လှုပ်ရှားလေ့ကျင့်ခန်း ပြုလုပ်ခြင်းဖြင့် ဦးနှောက်နဲ့ စိတ်ပိုင်းဆိုင်ရာ ကျန်းမာရေးကို တိုးတက်စေပါတယ်။

- ကျန်းမာရေးနှင့်ညီညွတ်စွာ စားသုံးခြင်း

ကျန်းမာရေးနဲ့ ညီညွတ်တဲ့ အစားအစာများ စားသုံးပါက မှတ်ဉာဏ်စွမ်းရည် လျော့ကျခြင်းကို ၂၄ ရာခိုင်နှုန်း ဖြစ်နိုင်ချေနည်းစေပါတယ်။

ပရိုတိန်း၊ ကျန်းမာရေးအတွက် သင့်လျော်တဲ့ ကာဗိုဟိုက်ဒရိတ်နဲ့ အဆီဓာတ်များ စားသုံးသင့်ပြီး သန့်စင်ပြီးသကြားတွေကို ရှောင်ရှားသင့်ပါတယ်။

- စိတ်နှင့်ဦးနှောက်ကို လှုံ့ဆော်ခြင်း

ပဟေဌိဖြေရှင်းခြင်း၊ စာဖတ်ခြင်း၊ စွမ်းရည်အသစ်သင်ယူခြင်း၊ ဗျူဟာမြောက်ဂိမ်းများ ဆော့ကစားခြင်းဖြင့် ဦးနှောက်ကို အလုပ်လုပ်စေပါ။

ထိုသို့ပြုလုပ်သွားခြင်းဖြင့် ၇ နှစ်တာကာလအတွင်း ဒီမန်ရှာဖြစ်နိုင်ချေ ၄၆ ရာခိုင်နှုန်း ကျဆင်းစေပါတယ်။

- ဖိစီးမှုလျှော့ချပေးခြင်း

သီချင်းနားထောင်ခြင်း၊ ခရီးသွားခြင်းတို့ဖြင့် စိတ်ဖိစီးမှုကို ဖြေလျှော့ပေးကာ မှတ်ဉာဏ်စွမ်းရည်ကို ပြုပြင်ပေးပါတယ်။

- လုံလောက်စွာ အိပ်စက်ခြင်း

တစ်ညကို ၇ နာရီမှ ၉ နာရီကြား အိပ်စက်ပေးသင့်ပြီး အိပ်ရေးမဝတဲ့အခါ မှတ်ဉာဏ်ဆုံးရှုံးမှု ဖြစ်ပေါ်စေနိုင်ပါတယ်။

#World_Health #ဦးနှောက်ထက်မြက်နေစေမည့်အလေ့အကျင့်
Source: India Today