#Local_News
Published_ 27 October 2022
ကျေးလက်နေပြည်သူများ လူနေမှုအဆင့်အတန်း မြင့်မားလာရေးနှင့် ကျေးလက်စီးပွားရေး မြင့်မားလာစေရေးအတွက် SMART Village စီမံကိန်းကို ယခုနှစ်တွင် မြို့နယ်(၄၂)မြို့နယ်ရှိ ကျေးရွာ(၄၄)ရွာ၌ တိုးချဲ့ ဆောင်ရွက်လျက်ရှိကြောင်း သမဝါယမ နှင့် ကျေးလက်ဖွံ့ဖြိုးရေးဝန်ကြီး ဦးလှမိုးရဲ့ ပြောကြားချက်အရ သိရပါတယ်။
ကျေးလက်ဒေသ ဖွံ့ဖြိုးတိုးတက်ရေး ဦးစီးဌာန၏ ၂၀၂၂-၂၀၂၃ ဘဏ္ဍာရေးနှစ် ပထမ(၆)လပတ် လူမှုစီးပွားဖွံ့ဖြိုးရေးလုပ်ငန်းများ ညှိနှိုင်းအစည်းအဝေးတွင် ဝန်ကြီးက ပြောကြားခဲ့တာပါ။ ထို့ပြင် ဦးစီးဌာနက ဆောင်ရွက်ပေးနေတဲ့ ကျေးလက်ရေရရှိရေး၊ ကျေးလက် မီးလင်းရေး၊ ကုန်ထုတ်လမ်း၊ တံတားလုပ်ငန်းများ၊ ကျေးရွာဖွံ့ဖြိုးရေးစီမံကိန်း (VDP)၊ Cash for Work စီမံကိန်းများသည် ကျေးလက်နေပြည်သူများ လူနေမှု အဆင့်အတန်းမြင့်မားရေးအတွက်အဓိကအရေးပါတဲ့လုပ်ငန်းများဖြစ်တယ်လို့ ဆိုပါတယ်။
ထို့ပြင်ဝန်ကြီးက မြစိမ်းရောင်ကျေးရွာစီမံကိန်း၊ ကျေးလက်စီးပွားမြင့်မားရေး စီမံကိန်း၊ ကျေးလက် အသက်မွေးဝမ်းကျောင်း သင်တန်းများသည်လည်း ကျေးလက်နေ ပြည်သူများ မိသားစုဝင်ငွေတိုးပွားရေးနှင့် ကျေးလက်စီးပွားမြင့်မားရေးကို ဖော်ဆောင်ပေးနိုင်သည့်အတွက် ပိုမိုအောင်မြင်အောင် ဆောင်ရွက်ကြဖို့ တိုက်တွန်းခဲ့ပါတယ်။
ထို့နောက်ဝန်ကြီးက ကျေးလက်ဒေသ ဖွံ့ဖြိုးရေးဆိုင်ရာလုပ်ငန်း လမ်းညွှန်ချက် များကို အမြန်ဆုံးပြီးမြောက် အောင်မြင်စွာ အကောင်အထည်ဖော် ဆောင်ရွက်နိုင်ခဲ့တဲ့ ရှမ်းပြည်နယ် (တောင်ပိုင်း) ဦးစီးမှူးနှင့် မြစိမ်းရောင်ကျေးရွာစီမံကိန်း အကောင်အထည် ဖော် ဆောင်ရွက်နိုင်မှု ပထဆုရရှိ သည့် ပဲခူးတိုင်းဒေသကြီး ဦးစီးမှူးတို့ကို လည်းကောင်း၊ ဒုတိယဝန်ကြီးက မြစိမ်းရောင်ကျေးရွာ စီမံကိန်း အကောင်အထည်ဖော် ဆောင်ရွက်နိုင်မှု ဒုတိယဆုရရှိရသည့် ဧရာဝတီတိုင်းဒေသကြီး ဦးစီးမှူးနှင့် တတိယဆု ရရှိတဲ့ ကရင်ပြည်နယ်ဦးစီးမှူးတို့ကို ဂုဏ်ပြုဆုတံဆိပ်များ ပေးအပ်ချီးမြှင့်ခဲ့ပါတယ်။
#ygm_mnn
#Yangon_Media_Group
- Category: Myanmar
- Hits: 404
#Local_News
Published _ 27 october 2022
ရခိုင်ပြည်နယ်၊ စစ်တွေပွိုင့်ကမ်းခြေမှာ ရေနစ်ပျောက်ဆုံးခဲ့သည့် ကလေးငယ် ၃ဦးအနက် နောက်ဆုံးကျန်ရှိသည့် ကလေးငယ်ရဲ့ ရုပ်အလောင်းကို ယနေ့ အောက်တိုဘာလ ၂၇ရက်မှာ ပြန်လည်တွေ့ရှိခဲ့ကြောင်း မေတ္တာရောင်ခြည်ဖောင်ဒေးရှင်းမှ သိရှိရသည်။
ပြီးခဲ့သည့် အောက်တိုဘာလ ၂၂ရက်က စစ်တွေမြို့ရှိ စစ်တွေပွိုင့်ကမ်းခြေအနီးမှာ ရေနစ်ပျောက်ဆုံးသွားခဲ့သည့် ကလေးငယ် ၃ဦးဖြစ်တဲ့ မောင်အောင်လင်းသူ၊ မောင်ဟိန်းထက်ဝင်းနိုင်နှင့် မောင်ဇွဲဘုန်းပြည့်တို့အား ရှာဖွေကယ်ဆယ်ရေးလုပ်ငန်းများ ဆောင်ရွက်ခဲ့ခြင်းဖြစ်သည်။
ယနေ့ အောက်တိုဘာလ ၂၇ရက် နေ့လည် ၁၂နာရီဝန်းကျင်ခန့်၌ နောက်ဆုံးကျန်ရှိတဲ့ ကလေးငယ် မောင်အောင်လင်းသူရဲ့ ရုပ်အလောင်းကို ကျေးတောပိုက်ဆိပ်အနီးမှာ ရှာဖွေတွေ့ရှိခဲ့ကြောင်း အသင်းထံမှသိရသည်။
ရေနစ်ပျောက်ဆုံးသွားပြီး ပြန်လည်တွေ့ရှိခဲ့သည့် မောင်အောင်လင်းသူရဲ့ ရုပ်အလောင်းကို စစ်တွေဆေးရုံသို့ ပို့ဆောင်ခဲ့ပြီး ပြီးခဲ့သော အောက်တိုဘာလ ၂၄ရက်တွင်လည်း ရေနစ်ပျောက်ဆုံးခဲ့ကြသည့် မောင်ဇွဲဘုန်းပြည့်နှင့် မောင်ဟိန်းထက်ဝင်းနိုင်တို့၏ ရုပ်အလောင်းများအား ရှာဖွေတွေ့ရှိခဲ့ကြောင်း သိရှိရသည်။
#ymg/NN
#Yangon_Media_Group
- Category: Myanmar
- Hits: 1084
#Local_News
Published_27 October2022
နေပြည်တော် ဥပ္ပါတသန္တိစေတီတော်မြတ်ကြီးသို့ ရတနာဆင်ဖြူတော်ရောက်ရှိပြီ ဖြစ်ကြောင်း ပြန်ကြားရေးဝန်ကြီးဌာနက သိရသည်။
အဆိုပါ ရတနာဆင်ဖြူတော်အထီးလေးကို ရခိုင်ပြည်နယ်၊ တောင်ကုတ်မြို့နယ်ရှိ မြန်မာ့သစ်လုပ်ငန်းဆင်ဝိုင်းမှ အသက် ၃၃နှစ်အရွယ် ဆင်မ ဇာနန်းလှက ပြီးခဲ့သည့် ဇူလိုင်လ ၂၃ ရက် နံနက် ၆ နာရီခွဲအချိန်တွင် မွေးဖွားခဲ့ခြင်း ဖြစ်သည်။
မွေးဖွားကာစတွင် ဆင်ဖြူတော်ကလေး အရပ်အမြင့်မှာ ၂ပေ၅လက်မ၊ ကိုယ်လုံး လုံးပတ် ၃ပေ၁လက်မ၊ ကိုယ်အလေးချိန် ပေါင် ၁၈၀ခန့် ရှိခဲ့ကာ ယခု အခါ အရပ်အမြင့် ၂ပေ ၉လက်မ၊ ကိုယ်လုံးလုံးပတ် ၄ပေ၊ ကိုယ်အလေးချိန် ၂၆၀ ပေါင်ရှိလာပြီဖြစ်ကြောင်း သိရသည်။
မွေးဖွားပြီးစဉ်ကတည်းက မိခင်ဆင်မကြီးနှင့်အတူ ကျန်းမာပျော်ရွှင်လျက်ရှိသည့်အပြင် လူနှင့် ယဉ်ပါးသည့် ဆင်ဖြူတော်ကလေးဖြစ်သည့်အတွက် ပိုမိုယဉ်ပါးလာစေရန် Human Friendly Training စနစ်ဖြင့် လေ့ကျင့်သင်ကြားပေးနေခြင်း ဖြစ်ကြောင်းလည်း သိရသည်။
ဆင်ဖြူတော်ကလေးတွင် ရတနာဆင်ဖြူတော်များ၏ ကြန်အင်လက္ခဏာ ၈ ချက် အနက် မျက်လုံးပုလဲရောင်ဖြစ်ခြင်း၊ ကျောကုန်းမှာ ငှက်ပျောကိုင်းသဏ္ဍာန်ဖြစ်ခြင်း၊ အမွှေးအဖြူ ရောင်ဖြစ်ခြင်း၊ အမြီးတံခါးပိတ်ဖြစ်ခြင်း၊ အရေပြားမှာ သြဇာကွက်ဖြစ်ခြင်း၊ အသားအရေ ပန်းရောင်ဖြစ်ခြင်း၊ ခြေဖဝါးတွင် ရှေ့ခြေသည်း ၅ခုစီနှင့် နောက်ခြေသည်း ၄ခုစီပါရှိခြင်း၊ နားကြီးခြင်းစသည့် ရတနာ ဆင်ဖြူတော်များ၏ ကြန်အင်လက္ခဏာ ၇ ချက်ကိုက်ညီသော ဆင်ဖြူတော်ကလေး ဖြစ်ကြောင်းလည်း သိရသည်။
#ymg/mt
#Yangon_Media_Group
- Category: Myanmar
- Hits: 2880
#Local_News
Published_27 October2022
မန္တလေးတိုင်းဒေသကြီး မြစ်သားမြို့နယ် သံရွာအနီးရှိ တောင်တော်ကွင်း ဧက ၂၀၀ အနက် ဧက ၈၀ ပေါ်တွင် Green Power Energy Co.,Ltd က အမေရိကန်ဒေါ်လာ ၁၇ ဒသမ ၄၃ သန်းခန့် ရင်းနှီးမြှုပ်နှံ၍ ၂၀၂၂ ခုနှစ် ဧပြီလမှစတင် ဆောင်ရွက်ခဲ့သည့် တောင်တော်ကွင်း နေရောင်ခြည်စွမ်းအင်သုံး လျှပ်စစ်ဓာတ်အားပေးစက်ရုံ စီမံကိန်း ၉၅ ရာခိုင်နှုန်း ပြီးစီးနေပြီ ဖြစ်ကြောင်း သိရသည်။
"နိုင်ငံတော်ဓာတ်အားကွန်ရက်စနစ် (National Grid System) ထဲကို ၁၃၂ ကေဗွီတောင်တော်ကွင်း ဓာတ်အားခွဲရုံကတစ်ဆင့် ဓာတ်အားချိတ်ဆက်နိုင်ဖို့ ဓာတ်အားလိုင်းတွေ တည်ဆောင်ပြီးပါပြီ၊အခု စက်ရုံမှာ IEC Standard နဲ့ကိုက်ညီတဲ့ Bifacial Monocrystalline Silicon PV Module တွေကို တပ်ဆင်ထားပြီး ဆိုလာ Tracking System တပ်ဆင်ထားတာကြောင့်လျှပ်စစ်ဓာတ်အားထုတ်လုပ်စွမ်းရည် ကောင်းမွန်မှာ ဖြစ်ပါတယ်"ဟု လျှပ်စစ်ဝန်ကြီးဌာနက တာဝန်ရှိသူကပြောသည်။
Green Power Energy Co.,Ltd အနေဖြင့် မန္တလေးတိုင်းဒေသကြီးအတွင်း ၃၀ မဂ္ဂါဝပ် ထုတ်လုပ်နိုင်သော သာစည်မြို့နယ် သပြေဝ နေရောင်ခြည်စွမ်းအင်သုံး လျှပ်စစ်ဓာတ်အားထုတ်လုပ်မှု စီမံကိန်းနှင့် ယခု ၂၀ မဂ္ဂါဝပ် ထုတ်လုပ်နိုင်မည့် တောင်တော်ကွင်း နေရောင်ခြည်စွမ်းအင်သုံး လျှပ်စစ်ဓာတ်အား ထုတ်လုပ်မှုစီမံကိန်းတို့အပြင် နောက်ထပ် တိုးချဲ့ဆောင်ရွက်ရန်လည်း ရှိနေကြောင်း လျှစ်စစ်စွမ်းအားဝန်ကြီးဌာန၏ ထုတ်ပြန်ချက်တွင် ဖော်ပြထားသည်။
မန္တလေးတိုင်းဒေသကြီးအတွင်း စက်မှုလုပ်ငန်းများ ဖွံ့ဖြိုးတိုးတက်စေရန် မန္တလေးစက်မှုဇုန်မှ လုပ်ငန်းရှင်များအနေဖြင့် နေရောင်ခြည်စွမ်းအင်သုံး လျှပ်စစ်ဓာတ်အားထုတ်လုပ်မှု နည်းလမ်းများကိုသိရှိပြီး အသုံးပြုနိုင်ရန် အဆိုပါ နေရောင်ခြည်စွမ်းအင်သုံး လျှပ်စစ်ဓာတ်အားပေးစက်ရုံ စီမံကိန်းများကို သွားရောက်လေ့လာမှုများ ပြုလုပ်နေကြောင်းလည်း သိရသည်။
ပြည်တွင်းဓာတ်အားလိုအပ်ချက်ကို ဖြည့်ဆည်းနိုင်ရန် ရေအား လျှပ်စစ်စီမံကိန်းများနှင့် နေရောင်ခြည်စွမ်းအင်သုံး ဓာတ်အားပေးစက်ရုံများကိုဆောင်ရွက်နေသည့်အပြင် နယ်စပ်ဖြတ်ကျော်ဓာတ်အားလိုင်းများနှင့် လျှပ်စစ်ဓာတ်အားဝယ်ယူနိုင်ရန် ဆောင်ရွက်လျက်ရှိကြောင်းလည်း လျှပ်စစ်စွမ်းအားဝန်ကြီးဌာနက ပြီးခဲ့သည့် သြဂုတ်လအတွင်းက ထုတ်ပြန်ခဲ့သေးသည်။
#ymg/mt
#Yangon_Media_Group
- Category: Myanmar
- Hits: 499
#Local_News
Published_27 October2022
ပုပ္ပါးတောင်ဒေသတွင်ကမ္ဘာ့ဘူမိဥယျာဉ်သတ်မှတ်ခံရနိုင်သည့် ထူးခြားသော ကျောက်ဖြစ်ရုပ်ကြွင်းများ၊ ပုဂံခေတ် ရှေးဟောင်းသံချက်ဖိုများ၊ ထူးခြားသော ဇီဝမျိုးစုံမျိုးကွဲများနှင့် အစွယ်(၂)ထပ်ဆင်၏ ကျောက်ဖြစ်ရုပ်ကြွင်းမေးရိုးများရှိကြောင်းသယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနက သိရသည်။
မြန်မာနိုင်ငံတွင် ပထမဦးဆုံးအဖြစ် ဖွဲ့စည်းတည်ထောင်မည့် ပုပ္ပါးတောင်အမျိုးသားဘူမိဥယျာဉ်ဖြစ်မြောက်ရေးနှင့် သစ်တောနယ်မြေပြင်ပတွင် ကျရောက်နေသည့် အဆိုပြု Geosites များနှင့်ဆက်စပ်ခြင်းလုပ်ငန်း၊အမျိုးသားအဆင့်အပြင် ကမ္ဘာ့အဆင့်ဘူမိဥယျာဉ်အတွက်ပါ ရည်ရွယ်၍ ဆက်လက် လုပ်ဆောင်မည့်အခြေအနေများကို သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနက လုပ်ဆောင်လျက် ရှိကြောင်း သိရသည်။
ကမ္ဘာ့ဘူမိဥယျာဉ်အစီအစဉ်သည် ကုလသမဂ္ဂပညာရေး၊ သိပ္ပံနှင့်ယဉ်ကျေးမှုအဖွဲ့(UNESCO)၏ ဖွံ့ဖြိုးရေးနှင့်ထိန်းသိမ်းရေးကို ဟန်ချက်ညီညီဆောင်ရွက်နေသည့် အစီအစဉ်တစ်ခုဖြစ်ကြောင်း၊ သစ်တောဦးစီးဌာန၏ စီမံအုပ်ချုပ်မှုနယ်မြေအောက်တွင်ရှိသည့် မြန်မာနိုင်ငံ အလယ်ပိုင်း ကျောက်ပန်းတောင်း မြို့နယ်အတွင်းမှ Geosite နေရာ ၁၅ ခုဖြင့် ကနဦးတည်ထောင်နိုင်ရန် ဆောင်ရွက်လျက်ရှိပြီး နောင်တွင်သစ်တောဦးစီးဌာန၏ စီမံအုပ်ချုပ်မှုနယ်မြေပြင်ပတွင်ရှိသည့် Geosite များကိုလည်း ဘူမိဥယျာဉ်၏ Geosites များအဖြစ်ဖော်ထုတ်ကာ ထပ်တိုးဖွဲ့စည်းသွားမည်ဖြစ်ကြောင်း အဆိုပါဝန်ကြီးဌာနက သိရသည်။
လက်ရှိတွင် သယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနအနေဖြင့် မြန်မာနိုင်ငံ အလယ်ပိုင်း ကျောက်ပန်းတောင်း မြို့နယ်အတွင်းမှ နေရာ ၁၅ ခုကို မြန်မာနိုင်ငံဘူမိသိပ္ပံအသင်းက ပညာရှင်တွေက စနစ်တကျ ကွင်းဆင်းလေ့လာ ရွေးချယ်ရေး လုပ်ဆောင်နေကြောင်းလည်း၊ အဆိုပါ ကွင်းဆင်းမှု ပြီးစီးပါက ဘူမိနယ်မြေအဖြစ် သတ်မှတ်မည် ဖြစ်ကြောင်းလည်း သိရသည်။
#ymg/mt
#Yangon_Media_Group
- Category: Myanmar
- Hits: 912
#World_Military
Published 27 October 2022
အမေရိကန်ရေတပ်နဲ့ စစ်တပ်တို့ဟာ ဗုဒ္ဓဟူးနေ့က အသံထက် ၅ ဆမြန်တဲ့လက်နက်စမ်းသပ်မှု တစ်ဒါဇင်နီးပါးကိုစမ်းသပ်ရန် ဗာဂျီးနီးယားရှိ ပင်လယ်ကမ်းစပ်တစ်ခုကနေ ဒုံးကျည်တစ်စင်းပစ်လွှတ်ခဲ့ပါတယ်။
ဒါဟာ လက်နက်အမျိုးအစားအသစ်ထုတ်လုပ်ရန် အထောက်အကူဖြစ်ခဲ့ပြီး စမ်းသပ်မှုအောင်မြင်ခဲ့ကြောင်း ပင်တဂွန်စစ်ဌာနချုပ်မှ ထုတ်ပြန်လိုက်ပါတယ်။
ဆန်ဒီယာအမျိုးသားဓာတ်ခွဲခန်းဟာ ဗာဂျီးနီးယားရှိ နာဆာ(NASA)ရဲ့ ဝေါလော့ပ်စ်ဖလိုက်စခန်းကနေ စမ်းသပ်လုပ်ဆောင်ခဲ့တာဖြစ်ပါတယ်။
ဒီစမ်းသပ်မှုအတွင်း အသံထက်အလွန်မြန်လက်နက်ရဲ့ ဆက်သွယ်ချိတ်ဆက်နိုင်စွမ်းများ၊ လမ်းကြောင်းပြကိရိယာများအပြင် လက်တွေ့ဆန်တဲ့ အသံထက်အလွန်မြန်ကိရိယာရဲ့ အပူဒဏ်ကိုခံနိုင်မယ့် အဆင့်မြင့်ပစ္စည်းများကိုပါ အကဲဖြတ်ခဲ့ကြောင်း နာဆာက ထုတ်ပြန်ကြေညာခဲ့ပါတယ်။
လေထုအပေါ်ပိုင်းက ဒုံးကျည်ကနေ အသံထက်အလွန်မြန်တဲ့ လျှောထွက်ယာဉ်များလွှတ်တင်ပြီးနောက် အသံထက် ၅ ဆမြန်တဲ့နှုန်း တစ်နည်းအားဖြင့် တစ်နာရီကို ၆,၂၀၀ ကီလိုမီတာနှုန်းဖြင့် ပစ်မှတ်ဆီ ပျံသန်းသွားပါတယ်။
အမေရိကန်နဲ့ တစ်ကမ္ဘာလုံးရှိပြိုင်ဘက်များက အသံထက်မြန်လက်နက်များကို အရေးတကြီးအလျင်အမြန် ထုတ်လုပ်လာကြကာ ရန်သူရဲ့နည်းပညာများကို အနိုင်ရမယ့် အဆင့်မြင့်လက်နက်များရရှိရန် ကြိုးပမ်းလာကြပါတယ်။
စမ်းသပ်ထုတ်လုပ်မှုကို အရှိန်မြှင့်တဲ့အနေနဲ့ ပင်တဂွန်ဟာ မြေပြင်စမ်းသပ်မှုနဲ့ စနစ်အပြည့်အဝပျံသန်းခြင်းတို့အကြား အရေးပါတဲ့ကွာဟချက်တစ်ခုကို ဖြည့်ဆည်းနိုင်ရန် ပိုမိုသေးငယ်တဲ့စမ်းသပ်ယာဉ်ကို အသုံးပြုပြီး ရှေ့ပြေးပုံစံများနဲ့ စမ်းသပ်လွှတ်တင်ခဲ့တာဖြစ်ပါတယ်။
ဗုဒ္ဓဟူးနေ့က စမ်းသပ်မှုဟာ အမေရိကန်ရေတပ်နဲ့ စစ်တပ်တို့ရဲ့ ပစ်ခတ်နိုင်မှုစွမ်းအားအလားအလာကို အတည်ပြုစစ်ဆေးနိုင်ရန် ရည်ရွယ်ခဲ့တာဖြစ်ပါတယ်။
ဒုံးကျည်လျှောထွက်ယာဉ်တွေဟာ မူလလက်နက်အမျိုးအစားနဲ့ ကွဲပြားနေကာ အသံထက်မြန်တဲ့အရှိန်နဲ့ ပျံသန်းနိုင်စေရန် လောင်ကျွမ်းခြင်းမပြုမီ အဝင်လေကိုဖိသိပ်မယ့် scramjet အင်ဂျင်နည်းပညာနဲ့ ယာဉ်ရဲ့မြန်နှုန်းမြင့်စွမ်းအားကို အသုံးပြုထားတာဖြစ်ပါတယ်။
အမေရိကန်ရဲ့ အသံထက်အလွန်မြန်တဲ့ လက်နက်များအတွက် Lockheed Martin နဲ့ Raytheon Technologies ကုမ္ပဏီတို့က လုပ်ဆောင်ပေးနေတာဖြစ်ပါတယ်။
Source: Reuters
#Yangon_Media_Group
- Category: World
- Hits: 450
#Local_News
Published _27 October 2022
မြန်မာအပါအဝင်မဲခေါင်-လန်ချန်းအဖွဲ့ဝင်(၆)နိုင်ငံမှ ပန်းချီ၊ ပန်းပုအနုပညာရှင်လူငယ်များပါဝင်သော National Landmark Sculpturing and Painting Youth Camp for LMC Fine Arts Students စီမံကိန်းကို မန္တလေးမြို့၌ကျင်းပသွားမည်ဖြစ် ကြောင်းသိရသည်၊၊
အဆိုပါ စီမံကိန်းကို ၂၀၂၃ ခုနှစ် ဇန်နဝါရီ(၂၆)ရက်မှ (၃၀) ရက်အထိ အမျိုးသားယဉ်ကျေးမှုနှင့် အနုပညာတက္ကသိုလ် (မန္တလေး)ကတာဝန်ယူပြီး မန္တလေးမြို့တွင် Hybrid စနစ်ဖြင့် လက်ခံပြုလုပ်သွားမည် ဖြစ်သည်၊၊
အဆိုပါစီမံကိန်းပြုလုပ်နိုင်ရန် ညှိနှိုင်းအစည်းအဝေးပွဲကျင်းပခဲ့ပြီး အစည်းအဝေးတွင် သာသနာရေးနှင့်ယဉ်ကျေးမှုဝန်ကြီးဌာန ပြည်ထောင်စုဝန်ကြီး ဦးကိုကိုက" နည်းပညာဖွံ့ဖြိုးတိုးတက်လာသည်နှင့်အမျှ လက်မှုအနုပညာအချို့သည် ကွယ်ပျောက်လုနီးပါး အခြေအနေနှင့် ရင်ဆိုင်လာရသောကြောင့် ပန်းချီ၊ ပန်းပု အနုပညာလက်ရာများကို တိုးတက် လာသောခေတ်နှင့်အညီ နည်းပညာများမြှင့်တင်ခြင်း၊ မျှဝေခြင်း၊ ဖော်ထုတ်ထိန်းသိမ်းခြင်းများ ပူးပေါင်းပါဝင်ဆောင်ရွက်နိုင်ရန်အတွက် အဖွဲ့ဝင်ခြောက်နိုင်ငံမှ ပန်းချီ၊ ပန်းပုအနုပညာရှင် လူငယ်များ ပါဝင်သော National Landmark Sculpturing and Painting Youth Camp for LMC Fine Arts Students စီမံကိန်းကို ၂၀၂၃ ခုနှစ် ဇန်နဝါရီ(၂၆)ရက်မှ (၃၀) ရက်အထိ အမျိုးသားယဉ်ကျေးမှုနှင့် အနုပညာတက္ကသိုလ် (မန္တလေး)ကတာဝန်ယူပြီး မန္တလေးမြို့တွင် Hybrid စနစ်ဖြင့် လက်ခံပြုလုပ်မည်ဖြစ်ကြောင်း"ပြောကြားခဲ့သည်၊၊
အမျိုးသားယဉ်ကျေးမှုနှင့် အနုပညာတက္ကသိုလ် (မန္တလေး)သည် မဲခေါင် - လန်ချန်း အထူးရန်ပုံငွေဖြင့် ၂၀၁၉ ခုနှစ်၊ ဇန်နဝါရီလတွင် Lancang - Mekong Cultural Exchange Youth Camp စီမံကိန်းနှင့် ၂၀၂၂ ခုနှစ်၊ မတ်လတွင် လန်ချန်း - မဲခေါင် ရုပ်သေးပွဲတော်များကို မန္တလေးမြို့၌ ကျင်းပပြုလုပ်ခဲ့ပြီးဖြစ်ကာ National Landmark Sculpturing and Painting Youth Camp for LMC Fine Arts Students စီမံကိန်းသည် တတိယမြောက်ကျင်းပပြုလုပ်မည့် စီမံကိန်းဖြစ်ကြောင်း သိရသည်၊၊
#ymg/tthl
#Yangon_Media_Group
- Category: Myanmar
- Hits: 371
#World_Health
Published 27 October 2022
ကိုဗစ်ရောဂါကူးစက်ဖူးသူတွေဟာ ရောဂါမဖြစ်ဖူးတဲ့သူတွေထက် နာမကျန်းအန္တရာယ်များ သိသိသာသာပိုဖြစ်နိုင်ကြောင်း လေ့လာတွေ့ရှိထားပါတယ်။
လူသန်းပေါင်းများစွာဟာ ရောဂါကူးစက်ခဲ့သလို ကာကွယ်ဆေးလည်း ထိုးနှံထားကြပါတယ်။
ဒါပေမဲ့ ရောဂါလက္ခဏာအပျော့စား ခံစားခဲ့ရသူတွေတောင်မှ နှလုံးရောဂါနဲ့ အသက်အန္တရာယ်ထိပါးနိုင်တဲ့ ရောဂါများ ဖြစ်နိုင်ချေများကြောင်း ကျွမ်းကျင်သူများက သတိပေးလိုက်ပါတယ်။
ကိုဗစ်ကြောင့်ဆေးရုံတက်ခဲ့ရသူတွေဆိုရင် သွေးပြန်ကြောတွင် သွေးခဲပိတ်ခြင်းမျိုး ဖြစ်နိုင်ချေ ၂၇ ဆပိုများကြောင်း လေ့လာတွေ့ရှိခဲ့ပါတယ်။
ကိုဗစ်ရောဂါအပျော့စားဖြစ်ခဲ့သူတွေကတော့ ရောဂါမဖြစ်ဖူးသူထက် သွေးခဲပိတ်ခြင်း ဖြစ်နိုင်ချေ ၃ ဆပိုများပါတယ်။
သွေးခဲပိတ်ခြင်းကို မကုသဘဲထားလိုက်ရင် သွေးခဲပိုကြီးလာပြီး သေဆုံးသည်အထိ ဖြစ်နိုင်ပါတယ်။
ကိုဗစ်ကြောင့်ဆေးရုံတက်ဖူးသူတွေဟာ နှလုံးဖောက်ခြင်းဖြစ်နိုင်ချေ ၂၁ ဆပိုများပြီး လေဖြတ်ခြင်းဖြစ်နိုင်ချေ ၁၇ ဆပိုများပါတယ်။
ဒါ့အပြင် နှလုံးပုံစံမမှန်ခြင်း၊ နှလုံးရောင်ရမ်းခြင်းနဲ့ ရုတ်တရက်နှလုံးဖောက်ခြင်းတို့လည်း ပိုဖြစ်နိုင်ပါတယ်။
ကိုဗစ်ကြောင့်ဆေးရုံတက်ခဲ့ရသူတွေဟာ ရောဂါမပြင်းထန်သူတွေထက်စာရင် အသက်အန္တရာယ်ဆုံးပါးနိုင်ချေ ၁၁၈ ဆပိုများနေပါတယ်။
ရောဂါကူးစက်ပြီး ရက် ၃၀ အတွင်း နှလုံးရောဂါများနဲ့ အသက်အန္တရာယ် အများဆုံးဖြစ်ပေမယ့် နောက်ပိုင်းအချိန်ကာလတစ်ခုအထိလည်း ဖြစ်နိုင်ချေများနေဆဲဖြစ်ပါတယ်။
ကိုဗစ်ကူးစက်ပြီးနောက်ပိုင်း နောက်ဆက်တွဲလက္ခဏာတွေက လူအများကြား စိုးရိမ်စရာတစ်ရပ်ဖြစ်လာပါတယ်။
လက်ရှိအချိန်မှာ အိုမီခရွန်က အဓိကကူးစက်တဲ့ဗိုင်းရပ်စ်ဖြစ်နေပြီး အရင်ကထက် ရောဂါပျော့လာပါတယ်။
ယခုဆောင်းရာသီအတွင်း မျိုးဗီဇကွဲ ၃ မျိုးစုပေါင်းပျံ့ပွားလာနိုင်တယ်လို့ ကျွမ်းကျင်သူများက သတိပေးထားပါတယ်။
Source: The Sun
#Yangon_Media_Group
- Category: World
- Hits: 463
#Local_News
Published_ 27 October 2022
ပြည်ပနိုင်ငံ (၁၂) နိုင်ငံသို့စေလွှတ်မည့် စီးပွားရေးသံမှူး (၁၆) ဦးကို ကုန်သွယ်မှုနှင့် ရင်းနှီးမြှုပ်နှံမှုဆိုင်ရာ လက်တွေ့အသုံးချရေး သင်တန်း ဖွင့်လှစ်သင်ကြားပေးလျက်ရှိကြောင်း သိရပါတယ်။
စီးပွားရေးသံမှူးများအနေဖြင့် တာဝန်ထမ်းဆောင်နေတဲ့ နိုင်ငံ၏စီးပွားရေး အခြေ အနေ ကိုသာမက ကမ္ဘာ့စီးပွားရေး အခြေအနေကိုပါ ခြုံငုံသိရှိထားရန် လိုအပ်ကြောင်း စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန ဒုတိယဝန်ကြီး ဦးညွန့်အောင်က ပြောကြားခဲ့ပါတယ်။
အောက်တိုဘ ၂၆ ရက်နံနက်ပိုင်းက စီးပွားရေးနှင့် ကူးသန်း ရောင်းဝယ်ရေး ဝန်ကြီးဌာန၌ ကျင်းပသည့် ကုန်သွယ်မှုနှင့် ရင်းနှီးမြှုပ်နှံမှုဆိုင်ရာ လက်တွေ့အသုံးချရေး သင်တန်းဖွင့်ပွဲအခမ်းအနားမှာ ဒုဝန်ကြီးက ပြောကြားခဲ့တာ ဖြစ်ပါတယ်။
မြန်မာနိုင်ငံမှ အဓိကပို့ကုန် အလားအလာရှိတဲ့ ဈေးကွက်များ၊ ပို့ကုန်အမယ် သစ်များ တင်ပို့မှုဆိုင်ရာ အချက်အလက်များ၊ သွင်းကုန်ဆိုင်ရာ အချက်အလက်များကို ကျယ်ကျယ်ပြန့်ပြန့် သိရှိထားပြီး မြန်မာ့ပို့ကုန်များအတွက် ဈေးကွက်ရှာဖွေ ချိတ်ဆက် ပေးဖို့ လိုအပ်တယ်လို့ ဆိုပါတယ်။
ထို့ပြင် ရင်းနှီးမြှုပ်နှံမှုနှင့်ပတ်သက်၍ အခွန်နှင့် လုပ်ထုံးလုပ်နည်းဆိုင်ရာ ဖြေလျှော့မှုများကို မျက်ခြေမပြတ် လေ့လာပြီး ပြည်ပရင်းနှီးမြှုပ်နှံမှုများကို ဖိတ်ခေါ် ချိတ်ဆက်သွား ရန်နှင့် တာဝန်ထမ်းဆောင်သည့်အခါ နိုင်ငံတော်အပေါ် သစ္စာစောင့်သိပြီး နိုင်ငံ့ဝန်ထမ်း စည်းမျဉ်းစည်းကမ်းများကို လေးစားလိုက်နာသွားဖို့ မှာကြားခဲ့ကြောင်း သိရပါတယ်။
#ygm_mnn
#Yangon_Media_Group
- Category: Myanmar
- Hits: 491
#Local_News
Published_ 27 October 2022
မြန်မာ-တရုတ် နယ်စပ်စီးပွားရေး ပူးပေါင်းဆောင်ရွက်မှုဇုန် တည်ထောင် အကောင်အထည်ဖော်ရေးဆိုင်ရာ ဗဟိုကော်မတီ(သတ္တမအကြိမ်) လုပ်ငန်းညှိနှိုင်း အစည်းအဝေးကို အောက်တိုဘာ (၂၆) ရက် မွန်းလွဲပိုင်းတွင် နေပြည်တော်ရှိ စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၌ ကျင်းပခဲ့ပါတယ်။
အစည်းအဝေးတွင် စီးပွား/ကူးသန်း ဒုတိယဝန်ကြီး ဦးညွန့်အောင်က မြန်မာ-တရုတ် နယ်စပ်စီးပွားရေး ပူးပေါင်းဆောင်ရွက်မှုဇုန် တည်ထောင် အကောင်အထည်ဖော်ရေး လုပ်ငန်းစဉ်များ မြန်ဆန်ချောမွေ့စေရန်နှင့် အမြန်ဆုံးဖော်နိုင်ရေးအတွက် သက်ဆိုင်ရာ ကဏ္ဍအလိုက် ပူးပေါင်းဆောင်ရွက်ကြဖို့ ပြောကြားခဲ့ပါတယ်။
မြန်မာ-တရုတ်နယ်စပ် စီးပွားရေး ပူးပေါင်းဆောင်ရွက်မှုဇုန်များကို မူဆယ်၊ ချင်းရွှေဟော်နှင့် ကန်ပိုက်တီးတို့တွင် တည်ဆောက်ပြီး Core Zone ၊ ပို့ကုန်သွင်းကုန် ပစ္စည်းများသိုလှောင်ရန် ကုန်လှောင်ရုံဧရိယာများအဖြစ် ဖွဲ့စည်းတည်ထောင်သွားရန် ဆောင်ရွက်လျက်ရှိကြောင်း သိရပါတယ်။
အထက်ပါဇုန်သုံးခုထဲမှ နှစ်နိုင်ငံ နယ်စပ်ကုန်သွယ်ရေးတွင် အဓိကျသော မူဆယ်မြို့နယ်ရှိ ဇုန်စီမံကိန်းကို ဦးစားပေးတည်ဆောက်ရန် လျာထားကြောင်း သိရပါတယ်။
#ygm_mnn
#Yangon_Media_Group
- Category: Myanmar
- Hits: 417
#Local_News
Published_ 27 October 2022
မွန်ပြည်နယ်၊ သထုံမြို့နယ်၌ ငွေကျပ် ၁၁ ဒသမ ၇၅ ဘီလီယံတန်ဖိုးရှိ အိုက်စ် (မက်သ်အဖက်တမင်း) ၄၇၀ ကီလို ဖမ်းဆီးရမိခဲ့ကြောင်း မြန်မာနိုင်ငံရဲတပ်ဖွဲ့ရဲ့ သတင်းထုတ်ပြန်ချက်အရ သိရပါတယ်။
မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များနှင့် ပူးပေါင်းအဖွဲ့သည် အောက်တိုဘာလ ၁၉ ရက် ညနေ ၄ နာရီခွဲအချိန် မွန်ပြည်နယ်၊ သထုံမြို့နယ်၊ ရန်ကုန်-မော်လမြိုင်ကားလမ်း၊ မိုင်တိုင်အမှတ်(၁၄၅/၆)အနီးတွင် ကျိုက်ထိုဘက်မှ မြဝတီဘက်သို့ သိန်းကို မောင်းနှင်ပြီး ရန်နိုင်ထွန်း လိုက်ပါလာသည့် Canter ၆ ဘီး မော်တော် ယာဉ်ကို သတင်းအရရှာဖွေခဲ့ပါတယ်။
ထိုသို့ရှာဖွေရာ ယာဉ်ပေါ်မှ ဒေသကာလတန်ဖိုးငွေကျပ် ၁၁ ဒသမ ၇၅ ဘီလီယံ တန်ဖိုးရှိ အိုက်စ် (မက်သ်အဖက်တမင်း) ၄၇၀ ကီလို သိမ်းဆည်းရမိခဲ့ပါတယ်။
စစ်ဆေးချက်များအရ ရှမ်းပြည်နယ်(မြောက်ပိုင်း)မှ ကရင်ပြည်နယ်သို့ အိုက်စ် (မက်သ်အဖက်တမင်း)များ သယ်ဆောင်ရာ၌ ပူးပေါင်းပါဝင်သူများဖြစ်ကြတဲ့ ပြင်ဦးလွင် မြို့နယ်၊ စိန်ပန်းကျေးရွာတွင် စိုးလင်းထွန်း အား မြန်မာငွေကျပ် သိန်း ၈၀၊ IPSUM မော်တော်ယာဉ် ၁ စီး နှင့်လည်းကောင်း၊ မြဝတီမြို့နယ်၊ သင်္ဃန်းညီနောင်ကျေးရွာတွင် စောဇာနည်မောင် နှင့် မျိုးအောင်တို့အား GIOCK 9 MM ပစ္စတိုသေနတ် ၁ လက်၊ ၎င်းကျည်အိမ် ၂ ခု၊ 9 MM ကျည် ၂၃ တောင့်၊ Crown မော်တော်ယာဉ် ၁ စီး နှင့် လည်းကောင်း၊ ဘားအံမြို့နယ်၊ မဲဘောင်ကျေးရွာတွင် အားဝေနှင့် စောသက်ဦးတို့အား Crown မော်တော်ယာဉ် ၁ စီးနှင့်လည်းကောင်း အသီးသီးဖမ်းဆီးရမိခဲ့ပါတယ်။
ထို့ကြောင့်၎င်းတို့ ၇ ဦးအား ဥပဒေအရ အရေးယူထားရှိပြီး ကွင်းဆက်ပြစ်မှု ကျူးလွန်သူများအား ဆက်လက်စစ်ဆေး ဖော်ထုတ်လျက်ရှိကြောင်း မြန်မာနိုင်ငံရဲတပ်ဖွဲ့ က သတင်းထုတ်ပြန်ထားပါတယ်။
#ygm_mnn
#Yangon_Media_Group
- Category: Myanmar
- Hits: 379
#World_Health
Published 27 October 2022
အလုပ်ရှင်နဲ့ အဆင်မပြေတာမျိုး၊ အလုပ်ခွင်နေရာမှာ အဆင်မပြေတာမျိုးတွေက စိတ်ပိုင်းဆိုင်ရာကျန်းမာရေးကို သိသိသာသာ ထိခိုက်စေနိုင်ကြောင်း အမေရိကန်အထွေထွေခွဲစိတ်ဆရာဝန်ကြီးက တင်ပြခဲ့ပါတယ်။
အလုပ်သမားရေးရာ ပြဿနာများ လတ်တလောနှစ်များအတွင်း မြင့်တက်လာသလို ကိုဗစ်ကပ်ရောဂါကြောင့် ဝန်ထမ်းများပင်ပန်းနွမ်းနယ်ခြင်းနဲ့ လုပ်ငန်းခွင်အဆင်မပြေမှုများအပေါ် အာရုံစိုက်လာကြပါတယ်။
ဝန်ထမ်းရပိုင်ခွင့်များနဲ့ပတ်သက်ပြီး သတ်မှတ်ချက်များဖြင့် ကာကွယ်ပေးထားမယ့်ဥပဒေမျိုး အမေရိကန်မှာ ချမှတ်ထားပေမယ့် လုပ်ငန်းရှင်များအနေနဲ့ ဒီထက်ထောက်ပံ့နိုင်ပါသေးတယ်။
လုပ်ငန်းခွင်မှာ စိတ်ဖိစီးမှုဖြစ်ပေါ်လာနိုင်တဲ့ အချက်အလက်များကို ဆရာဝန်ကြီးက ဖော်ပြခဲ့ပါတယ်။
အလုပ်နေရာနဲ့ဝေးကွာခြင်း၊ ကိုယ်ပိုင်လုပ်ပိုင်ခွင့်နည်းပါးခြင်း၊ လစာနည်းခြင်း၊ တာဝန်များစွာလုပ်ကိုင်ရခြင်း၊ အလုပ်ချိန်ဇယားခန့်မှန်းရခက်ခြင်း၊ အလုပ်ဝန်ပိခြင်း၊ အလုပ်ချိန်ကြာမြင့်ခြင်း၊ အသိအမှတ်ပြု မခံရခြင်း၊ တိုးတက်ရေးအခွင့်အလမ်း နည်းပါးခြင်းတို့ဖြစ်ပါတယ်။
လုပ်ငန်းခွင်ပတ်ဝန်းကျင်အဆင်မပြေခြင်း ဖြစ်နိုင်တဲ့အချက်များကတော့ လေးစားမှုမရှိခြင်း၊ ကျင့်ဝတ်မညီခြင်း၊ ရိုင်းစိုင်းခြင်း၊ ခေါင်းပုံဖြတ်ခြင်း တို့ဖြစ်ပါတယ်။
စိတ်ဖိစီးမှုဆက်တိုက်ဖြစ်ပေါ်လာပါက ရုပ်ပိုင်းဆိုင်ရာရော စိတ်ပိုင်းဆိုင်ရာပါ ထိခိုက်မှုရှိလာနိုင်ကာ ထကြွဆန့်ကျင်ခြင်း ဒါမှမဟုတ် လက်လျှော့အရှုံးပေးခြင်းတို့ဖြင့် တုံ့ပြန်လာနိုင်ပါတယ်။
စိတ်ဖိစီးမှုများလာတဲ့အခါ ရောဂါဝင်ရောက်နိုင်ခြင်း၊ နာတာရှည်ရောဂါဖြစ်လာနိုင်ခြင်း၊ သွေးတိုးခြင်း၊ အိပ်ရေးပျက်ခြင်း၊ အဝလွန်ခြင်း၊ ကိုယ့်ကိုယ်ကိုကြံစည်ခြင်းများ ဖြစ်ပေါ်လာနိုင်ပါတယ်။
အစ္စရေးလ်မှဝန်ထမ်းများဆိုရင် အလုပ်တာဝန်များလွန်းခြင်းကြောင့် အားလပ်ချိန်များမှာပါ အချိန်ပိုအလုပ်လုပ်နေကြရပါတယ်။
အရင်ကတည်းက လုပ်ငန်းခွင်မှာ စိတ်ဖိစီးမှုဆိုတာ ရှိစမြဲဖြစ်ပေမယ့် ကိုဗစ်ကပ်ရောဂါကြောင့် ပိုမိုဆိုးရွားလာကြပါတယ်။
၂၀၂၁ ခုနှစ် အမေရိကန်စစ်တမ်းတစ်ခုအရ ၇၆ ရာခိုင်နှုန်းသောဝန်ထမ်းတွေဟာ စိတ်ပိုင်းဆိုင်ရာအခြေအနေ အနည်းဆုံးတစ်မျိုးခံစားရကြောင်း တွေ့ရှိခဲ့ပါတယ်။
ဒီလိုမျိုး ဝန်ထမ်းတွေရဲ့ စိတ်ပိုင်းဆိုင်ရာကျန်းမာရေးထိခိုက်လာခြင်းက လုပ်ကိုင်နိုင်စွမ်းကျဆင်းလာပြီး လုပ်ငန်းအဖွဲ့အစည်းများကိုပါ ထိခိုက်လာစေပါတယ်။
ဒါကြောင့် ဝန်ထမ်းအလုပ်သမားများ ပျော်ရွှင်မှသာ လုပ်ကိုင်နိုင်စွမ်းမြင့်မားပြီး လုပ်ငန်းအောင်မြင်နိုင်မှာဖြစ်ပါတယ်။
ဝန်ထမ်းများ ပျော်ရွှင်စေဖို့ လုပ်ငန်းရှင်များဆောင်ရွက်နိုင်တဲ့ အခြေအနေတွေကတော့ ဘေးအန္တရာယ်ကင်းအောင် ဆောင်ရွက်ခြင်း၊ လုပ်ငန်းအတွင်း ဆက်ဆံရေးတိုးတက်စေခြင်း၊ လုပ်ငန်းတာဝန်မျှတအောင် စီမံခြင်း၊ သင့်တင့်ကောင်းမွန်တဲ့ လုပ်အားလစာပေးခြင်း၊ တိုးတက်ရာတိုးတက်ကြောင်း အခွင့်အလမ်းပေးခြင်းတို့ ဖြစ်ပါတယ်။
ဝန်ထမ်းတွေရဲ့အခက်အခဲကို နားထောင်ခြင်းဖြင့်လည်း သူတို့ရဲ့ကျေနပ်မှုကို အထောက်အကူဖြစ်စေကြောင်း ဆရာဝန်ကြီးက အကြံပြုထားပါတယ်။
Source: The Jerusalem Post
#Yangon_Media_Group
- Category: World
- Hits: 390