#Local_News
Published-4 March 2024

၂၀၂၄ ခုနှစ် နှစ်ဆန်းပိုင်းဖြစ်သည့်  ဇန်နဝါရီလမှ မတ်လ၄ရက် အထိကာလအတွင်းကားမီးလောင်မှု ၁၁ ကြိမ်အထိဖြစ်ပွားခဲ့ ကြောင်း မြန်မာနိုင်ငံမီးသတ်ဦးစီးဌာန၏ စာရင်းများအရ သိရသည်။  

အဆိုပါကားမီးလောင်မှုများတွင် ရန်ကုန်တိုင်း၌ အများဆုံးဖြစ်ပွားခဲ့ခြင်းဖြစ်ပြီး မွန်ပြည်နယ်နှင့်အမြန်လမ်း၌ တစ်ကြိမ်စီဖြစ်ပွားခဲ့ကြောင်း သိရသည်။

အဆိုပါကားမီးလောင်မှုများအပါအဝင်  နှစ်လကျော်ကာအတွင်း တစ်နိုင်ငံလုံး၌ မီးလောင်မှု ၂၆၀ကျော် ဖြစ်ပွားခဲ့‌ကြောင်း သိရသည်။

ထို မီးလောင်မှုများတွင် ရန်ကုန်မြို့ ထိန်ပင် အမှိုက်ပုံနှင့် ပဲခူးမြို့ ဆင်ဖြူကွင်း အမှိုက်ပုံတို့တွင်လည်း  မီးလောင်မှု  များလည်း ပါဝင်ပြီး  စက်တပ်လှေနှစ်စီးအပါအဝင် ဆီတင်သ‌င်္ဘောတစ်စီးလည်း မီးလောင်ကျွမ်းမှုဖြစ်ပွားခဲ့ကြောင်း သိရသည်။

အဆိုပါ မီးလောင်ကျွမ်းမှုများတွင် ရန်ကုန် ၊ မန္တလေး ၊ ပဲခူး ၊ ဧရာဝတီ ၊ မကွေး၊ စစ်ကိုင်း ၊ ရှမ်း၊ ကချင် ၊ မွန်၊ တနင်္သာရီ၊ ရခိုင်စသည့် ပြည်နယ်နှင့်တိုင်းတို့တွင် အဖြစ်များခဲ့ပြီး ကျန်ဒေသများတွင်လည်း မီးလောင်ကျွမ်းမှုအနည်းငယ်စီဖြစ်ပွားခဲ့ကြောင်း  သိရသည်။

ထို့အပြင် မီးလောင်ကျွမ်းမှုများအနက် တောမီး၊ ကိုင်းမီး၊ မြက်ခြောက်မီးနှင့် အမှိုက်ပုံများမှတဆင့်မီးလောင်မှုများလည်းပါဝင်ကြောင်း သိရသည်။

#Local_News #ကားမီးလောင်မှု ၁၁ကြိမ် #YMG/NN #Yangon-Times

#World_News
Published 04 March 2024

ကိုရီးယားနိုင်ငံရဲ့ အချက်အလက်များအရ ယမန်နှစ်က အိမ်ထောင်ပြုခဲ့ကြတဲ့ စုံတွဲပေါင်း ၁၉၃၆၇၃ တွဲရှိခဲ့ပြီး ၂၀၁၃ ခုနှစ်က အိမ်ထောင်ပြုခဲ့တဲ့စုံတွဲ ၃၂၂၈၀၇ တွဲနဲ့ယှဥ်ရင် ၄၀ ရာခိုင်နှုန်း လျော့နည်းခဲ့ပါတယ်။

ဒါပေမဲ့ ၂၀၂၂ နဲ့ယှဥ်ရင်တော့ ၁ ရာခိုင်နှုန်းမြင့်တက်ခဲ့ပြီး ၂၀၂၂ မှာတော့ အိမ်ထောင်ပြုတဲ့စုံတွဲ ၁၉၁၆၉၀ ဖြင့် စံချိန်တင်အနည်းဆုံး ဖြစ်ခဲ့ကာ ၂၀၁၂ မှ ၂၀၂၂ အထိ ၁၁ နှစ်အတွင်း အိမ်ထောင်ပြုနှုန်း ဆက်တိုက်ကျဆင်းနေခဲ့ပါတယ်။

အိမ်ထောင်ပြုနှုန်း အချက်အလက်နဲ့အတူ ကိုရီးယားနိုင်ငံမှာ ကလေးမွေးဖွားနှုန်း အကြောင်းအရာကလည်း ကပ်ပါလာပါတယ်။

အမျိုးသမီးတစ်ဦး ဘဝသက်တမ်းတလျှောက်မှာ ရနိုင်တဲ့ ပျမ်းမျှကလေးအရေအတွက်က ယမန်နှစ်မှာ ၀.၇၂ ဦးနှုန်းဖြင့် စံချိန်တင်အနည်းဆုံး ဖြစ်ခဲ့ပါတယ်။

ဆယ်စုနှစ်တစ်ခုအတွင်း အိမ်ထောင်ပြုနှုန်း ၄၀ ရာခိုင်နှုန်း ကျဆင်းသွားရတဲ့ အကြောင်းအရင်းတွေထဲမှာ လူမှုရေး စံသတ်မှတ်ချက်တွေ ပြောင်းလဲသွားတာကြောင့် ဖြစ်တယ်လို့ နောက်ထပ်ဖော်ပြချက်မှာ တွေ့ရပါတယ်။

၂၀၂၂ ခုနှစ်အတွင်း အသက် ၁၉ နှစ်မှ ၃၄ နှစ်ကြား ကိုရီးယားလူမျိုးတွေဟာ ၃ ယောက်မှာ ၁ ယောက်နှုန်းက အိမ်ထောင်ပြုခြင်းအပေါ် ကောင်းတဲ့အမြင် ဖော်ပြခဲ့ကြပြီး ၂၀၁၂ ခုနှစ်တုန်းကတော့ ၅၆.၅ ရာခိုင်နှုန်းက အကောင်းမြင်ခဲ့ကြတာ ဖြစ်ပါတယ်။

အထူးသဖြင့် အသက် ၂၀ ဝန်းကျင်လူငယ်တွေမှာ အိမ်ထောင်မပြုချင်သူတွေ များပြားလာပါတယ်။

အသက် ၂၅ နှစ်မှ ၂၉ နှစ်ကြား အိမ်ထောင်ပြုနှုန်းက ၂၀၁၂ မှာ ၅၉.၅ ရာခိုင်နှုန်းကနေ ၂၀၂၂ မှာ ၃၆.၁ ရာခိုင်နှုန်း ကျဆင်းလာပါတယ်။

အသက် ၃၀ မှ ၃၄ နှစ်ကြားမှာတော့ လွန်ခဲ့တဲ့ ၁၀ နှစ်ခန့်က ၅၄.၃ ရာခိုင်နှုန်းရှိရာကနေ ၃၉.၂ ရာခိုင်နှုန်းသို့ ကျဆင်းလာပါတယ်။

ကိုရီးယားလူငယ်တွေကြား အိမ်ထောင်ပြုဖို့ရာ အကြီးမားဆုံး အခက်အခဲက ငွေရေးကြေးရေး ဖြစ်နေပါတယ်။

စစ်တမ်းဖြေဆိုသူတွေထဲက ရာခိုင်နှုန်းအများဆုံး ၃၃.၇ က ငွေကြေးကြောင့်လို့ ဖြေဆိုခဲ့ကြပါတယ်။

၁၇.၃ ရာခိုင်နှုန်းကတော့ အိမ်ထောင်ပြုဖို့ မရှိမဖြစ်လိုအပ်ချက်တွေ မပြည့်စုံတာကြောင့်လို့ ဖြေဆိုခဲ့ကြပြီး ၁၁ ရာခိုင်နှုန်းက ကလေးမွေးဖွား ထိန်းသိမ်းလိုခြင်းမရှိတာ၊ ၁၀.၂ ရာခိုင်နှုန်းက အလုပ်အကိုင် မတည်ငြိမ်တာတွေ ပါဝင်ပါတယ်။

ကလေးမွေးဖွားမှုနှုန်းက ယမန်နှစ်က ၂၃၀၀၀၀ ခန့်သာရှိခဲ့ကာ ထိုမတိုင်ခင်နှစ်ကထက် ၇.၇ ရာခိုင်နှုန်း လျော့နည်းခဲ့ပြီး လွန်ခဲ့တဲ့ ဆယ်စုနှစ်ကထက် ၄၇.၃ ရာခိုင်နှုန်း ကျဆင်းလာတာ ဖြစ်ပါတယ်။

ယမန်နှစ်က ကလေးမွေးဖွားမှုနှုန်း ၀.၇၂ ဦးနှုန်းသို့ ကျဆင်းခဲ့ရာ ၆ နှစ်ဆက်တိုက် ၁ ဦးနှုန်းအောက် ရောက်နေခဲ့ပါတယ်။

လူဦးရေထိန်းသိမ်းရာမှာ လိုအပ်တယ်လို့ သတ်မှတ်ယူဆထားတဲ့ ၂.၁ ဦးနှုန်းအောက် သိသိသာသာ လျော့နည်းနေတာလည်း ဖြစ်ပါတယ်။

၂၀၂၃ နောက်ဆုံး ၃ လအတွင်း ၀.၆၅ ဦးနှုန်းသို့ ကျဆင်းခဲ့ကာ ယခုနှစ်မှာ ၀.၆၈ ဦးနှုန်းရှိနိုင်တယ်လို့ ခန့်မှန်းထားပါတယ်။

#World_News #အိမ်ထောင်ပြုသူ #(၄၀)ရာခိုင်နှုန်းအထိကျဆင်းလာ #Source: The Nation

#Local_News
Published_ 4 March 2024

ယခုတစ်ပတ်စားအုန်းဆီဈေးသည် ပြီးခဲ့သည့်အပတ်နှင့်သိပ်မကွာဘဲ ဈေးနှုန်းတန့်နေကြောင်း သိရသည်။

ပြီးခဲ့သည့်အပတ်က စားအုန်းဆီအခြေခံလက်ကားရည်ညွှန်းဈေးနှုန်းတစ်ပိဿာ ကျပ် ၅၁၈၀ ဖြစ်ကြောင်း ထုတ်ပြန်ကြေညာခဲ့ပြီး ယခုအပတ်မှာတော့တစ်ပိဿာ ကျပ် ၅၂၁၅ကျပ်သတ်မှတ်သည့် အတွက် ၅‌၅ကျပ်သာဈေးကွာခြားမှုရှိခဲ့သည်။

ယခုအပတ်အတွင်း ကမ္ဘာ့စားအုန်းဆီထုတ်လုပ်တင်ပိုသည့် နိုင်ငံများတွင် ဈေးကွက်နှင့် ဈေးနှုန်းဖြစ်ပေါ်မှုများအရ မတ် ၄ ရက်မှ မတ် ၁၀ ရက်အထိ ရန်ကုန်အထိုင်ဈေး အခြေခံလက်ကား ရည်ညွှန်းဈေးနှုန်းမှာ စားအုန်းဆီတစ်ပိဿာလျှင် ငွေကျပ် ၅၂၁၅ ဖြစ်ကြောင်း ထုတ်ပြန်ကြေညာထားသည်။

စီးပွားရေးနှင့်ကူးသန်းရောင်းဝယ်ရေးဝန်ကြီးဌာန စားသုံးဆီတင်သွင်းသိုလှောင်ဖြန့်ဖြူးခြင်း လုပ်ငန်းကြီးကြပ်ရေးကော်မတီအနေဖြင့် စားအုန်းဆီ ကမ္ဘာ့ဈေးနှုန်း ဖြစ်ပေါ်ပြောင်းလဲမှုနှင့်အညီ ပြည်တွင်း၌ ဖြစ်သင့်ဖြစ်ထိုက်သည့် ဈေးနှုန်းများဖြစ်ပေါ်စေရေး ထိန်းကျောင်းဆောင်ရွက်လျက်ရှိပြီး စားအုန်းဆီ အဓိကထုတ်လုပ်တင်ပိုသည့် မလေးရှားနိုင်ငံတွင် ဖြစ်ပေါ်နေသည့် FOB ဈေးနှုန်းများကို နေ့စဉ်စောင့်ကြည့်ကာ သယ်ယူပိုဆောင်ခ ကုန်ကျစရိတ်များ၊ ဘဏ်စရိတ်များ၊ အခွန်အခများ ထည့်သွင်းတွက်ချက်၍ ပြည်တွင်းဈေးကွက်၌ ရောင်းဝယ်ဖောက်ကားရမည့် အခြေခံလက်ကားရည်ညွှန်းဈေးနှုန်းကို ထုတ်ပြန်ပေးလျက်ရှိကြောင်း၊

ဈေးကစားရန် ရည်ရွယ်ချက်ဖြင့် သိုလှောင်ခြင်းနှင့် မသမာသည့် လုပ်ဆောင်မှုများပြုလုပ်ပါက အရေးကြီး ကုန်စည်နှင့် ဝန်ဆောင်မှုဥပဒေအရ အရေးယူဆောင်ရွက်သွားမည်ဖြစ်ကြောင်း အသိပေး ထုတ်ပြန်ထားသည်။

အပတ်စဉ် အခြေခံလက်ကားရည်ညွှန်းဈေးနှုန်းများကိုသိရှိလိုပါက  စားသုံးသူရေးရာ ဦးစီးဌာန၏ Website: www.doca.gov.mm ၊ Facebook Page နှင့် မြန်မာနိုင်ငံဆီကုန်သည်နှင့် ဆီလုပ်ငန်းရှင်များ အသင်း၏ Facebook Page တွင် ဝင်ရောက်ကြည့်ရှုနိုင်ကြောင်း သိရသည်။

#Local_News #ယခုတစ်ပတ်စားအုန်းဆီဈေး #ဈေးနှုန်းတန့်နေ #tthl #Yangon_Times

#World_Health
Published 04 March 2024

ခန္ဓာကိုယ်ကြီးထွားဖွံ့ဖြိုးရန်အတွက် သံဓာတ်က အရေးကြီးတဲ့ သတ္တုဓာတ် ဖြစ်ပါတယ်။

ခန္ဓာကိုယ်တွင်း အောက်ဆီဂျင်သယ်ပို့ရာမှာ လိုအပ်တဲ့ ဟေမိုဂလိုဘင်ဆဲလ်တွေ ဖြစ်ပေါ်ရာမှာလည်း အရေးပါပါတယ်။

သံဓာတ်ချို့တဲ့ခြင်းက ဖြစ်လေ့ဖြစ်ထရှိပြီး အထူးသဖြင့် အမျိုးသမီးတွေမှာ ဖြစ်ပါတယ်။

သံဓာတ်နည်းခြင်းကြောင့် ဖြစ်ပေါ်တတ်တဲ့ လက္ခဏာတွေကို ဖော်ပြလိုက်ပါတယ်။

 
(၁) အိပ်ရာထတဲ့အခါ မူးဝေခြင်း

သံဓာတ်နည်းတဲ့အခါ သွေးမှာ အောက်ဆီဂျင် မသယ်နိုင်တော့ဘဲ ဦးနှောက်သို့ ရောက်ရှိမှုနည်းကာ မတ်တပ်ရပ်လိုက်တဲ့အခါ မူးဝေးတတ်ပါတယ်။

 
(၂) နှုတ်ခမ်းခြောက်ခြင်း

အမြှေးပါးတွေကို ထိခိုက်ကာ နှုတ်ခမ်းများ ခြောက်သွေ့ကွဲအက်လာပြီး မကုသဘဲထားပါက ပါးစပ်ထောင့်များအထိ ခြောက်သွေ့လာပါတယ်။

 
(၃) ရင်ပူခြင်းနှင့်နှလုံးတုန်ခြင်း

ပုံမှန်နှလုံးခုန်ခြင်းကို အနှောင့်အယှက်ဖြစ်စေကာ နှလုံးတုန်တတ်ပြီး အစာရေမျိုလမ်းကြောင်း လျှံတက်ကာ ရင်ပူတတ်ပါတယ်။

 
(၄) မျက်လုံးအရောင်မှိန်ခြင်း

သံဓာတ်ချို့တဲ့ပြီး သွေးအားနည်းတဲ့အခါ အရေပြားနဲ့ မျက်လုံးအရောင်လျော့လာပြီး မျက်လုံးအရောင် လျော့ပါးလာပါတယ်။

 
(၅) ထိခိုက်ပွန်းပဲ့လွယ်ခြင်း

သွေးကြောများအားနည်းကာ ထိခိုက်ပွန်းပဲ့တဲ့အခါ  သွေးထွက်လွယ်တတ်ပါတယ်။

 
အခြားလက္ခဏာတွေ အနေနဲ့ ဆံပင်ကျွတ်ခြင်း၊ လက်သည်းကြွပ်ဆတ်ခြင်း၊ အာရုံစူးစိုက်ရ ခက်ခဲခြင်း၊ အသက်ရှူကြပ်ခြင်း၊ အလွန်အမင်း ပင်ပန်းလွယ်ခြင်း၊ ခြေဖျားလက်ဖျား အေးစက်ခြင်း၊ ခေါင်းကိုက်ခြင်းတို့ ဖြစ်ပါတယ်။

သံဓာတ်ကြွယ်ဝတဲ့ အစားအစာတွေကတော့ ဟင်းနုနွယ်၊ ပဲအမျိုးမျိုး၊ ဖရုံစေ့၊ အသား၊ ပန်းဂေါ်ဖီစိမ်း၊ ချောကလက်မည်း၊ ကွမ်းသီး၊ အခွံမာသီးများ၊ အစေ့အဆန်များ၊ ကြက်ဥတို့ ဖြစ်ပါတယ်။

#World_Health #သံဓာတ်အားနည်းခြင်း #Source: DoctorNDTV

#World_Health
Published 04 March 2024

စကားတစ်ခွန်း ပြောချင်တဲ့အချိန်မှာ ပြောစရာစကားလုံး ရှာမရတာမျိုး ဖြစ်နေတယ်ဆိုရင် မိမိဦးနှောက် ဘာဖြစ်နေပြီလဲဆိုတာမျိုး အံ့အားသင့်နေကြမှာပါ။

အဆိုးဆုံး အခြေအနေတွေမှာဆိုရင် ဒီမန်ရှာရောဂါ ဖြစ်နေပြီလားလို့တောင် စိတ်ပျက်မိမှာပါ။

ယခုအခါမှာတော့ ပြောချင်တဲ့အချိန်မှာ ပြောဖို့စကားလုံး မထွက်တာဟာ သက်ကြီးရွယ်အိုတွေမှာ ဦးနှောက်ကျန်းမာရေးကို ညွှန်ပြနေတာ မဟုတ်ဘူးလို့ သိပ္ပံပညာရှင်များ ဆိုလာကြပါတယ်။

အသက်ကြီးသူတွေမှာ ပြောစရာစကားလုံး ရှာမတွေ့တာထက်စာရင် စကားပြောတဲ့ အမြန်နှုန်းက ဦးနှောက်ကျန်းမာရေးကို ပိုမိုတိကျစွာ ညွှန်ပြနေတယ်လို့ လေ့လာချက်အသစ်မှာ တွေ့ရှိထားပါတယ်။

အသက် ၁၈ နှစ်မှ ၉၀ နှစ်ကြားလူပေါင်း ၁၂၅ ဦးပါဝင်တဲ့ စမ်းသပ်မှုမှာ စကားပြောအမြန်နှုန်းနဲ့ စကားလုံးရှာခြင်းတို့ကို ဦးစားပေးလေ့လာခဲ့ကြပါတယ်။

ပြောစရာ စကားလုံးစဥ်းစားရတာဟာ အသက်အရွယ် ကြီးလာတာနဲ့အမျှ ကျဆင်းလာပေမယ့် မှတ်ဉာဏ်ကျဆင်းလာတာနဲ့ မသက်ဆိုင်ပါဘူး။

ဒါပေမဲ့ စကားပြောတဲ့ အမြန်နှုန်း ကျဆင်းလာတာကတော့ ဦးနှောက်မှတ်ဉာဏ် လုပ်ဆောင်ချက် ကျဆင်းလာတာကို ညွှန်ပြနေပါတယ်။

ဘေးခရက်စ်နဲ့ တိုရွန်တို တက္ကသိုလ်တို့က စကားပြောဆိုခြင်းနဲ့ ဦးနှောက်ကျန်းမာရေးတို့ကြား ကွာခြားချက်များကို တပြိုင်နက်တည်း လေ့လာအကဲဖြတ်တဲ့ ပထမဆုံးလေ့လာချက် ဖြစ်ပါတယ်။

သက်ကြီးရွယ်အိုများ မှတ်ဉာဏ်ကျဆင်းလာခြင်းကို စစ်ဆေးရန်၊ လိုအပ်တဲ့ အထောက်အပံ့များ ပေးနိုင်ရန်အတွက် စံချိန်မီ မှတ်ဉာဏ်ဆန်းစစ်ချက်များ ပြုလုပ်ရာမှာ စကားပြော အမြန်နှုန်းကို တစ်စိတ်တစ်ပိုင်း အနေဖြင့် ထည့်သွင်းသင့်တယ်လို့ အကြံပြုသွားပါတယ်။

#World_Health #သက်ကြီးရွယ်အိုများတွင်စကားပြောနှေးခြင်း #ဦးနှောက်ကျန်းမာရေးယိုယွင်း #Source: WION

#Local_News
Published 3 March 2024

နေပြည်တော်ရှိBarတစ်ခုတွင် မြန်မာ့ယဉ်ကျေးမှုနှင့်မညီညွတ်ဘဲ‌ဖော်ချွတ်ကပြမိ၍ အဆိုပါBarနှင့် ကပြမိသူ တို့မှလူမှုကွန်ရက်မှတစ်ဆင့်ပြန်တောင်းပန်ခဲ့ပြီး DJခန်းတစ်လနားလိုက်ကြောင်း သိရသည်။

မတ်လ(၁)ရက်တွင် Ordinary Bar and Restaurant၌ ကျင်းပသည့်DJ ပွဲတွင်Sexy Dancer ဖြစ်သူ(လိင်ပြောင်းအမျိုးသမီး) တစ်ဦးAda Wong မှမြန်မာ့ယဉ်ကျေးမှုနှင့် မလျော်ညီစွာ အပေါ်ပိုင်း (ရင်သားများအား တိတ်ဖြင့်ကပ်ကာ)ဗလာကျင်းဖြင့် Sexy Dance ပုံစံ ကပြဖျော်ဖြေခဲ့ခြင်းအပေါ် Barမှ တောင်းပန်ချက်ထုတ်ပြန်လိုက်ခြင်းဖြစ်သည်။

ဆိုင်အနေဖြင့် အဆိုပါပွဲအား လက်ခံကျင်းပခဲ့ခြင်း၊ ယခုကဲ့သို့ မြန်မာ့ယဉ်ကျေးမှုနှင့်မလျှော်ညီစွာ မသင့်မလျှော် ကပြခဲ့ခြင်းတို့အတွက် နေပြည်တော်ရှိ ပြည်သူလူထု၊ ဧည့်သည်များအား အထူး တောင်းပန်အပ်ပါသည်။

နောင်တွင် မိမိတို့ဆိုင်  အနေဖြင့် မြန်မာ့ယဉ်ကျေးမှုနှင့်မလျော်ညီသည့် မည်သည့် ကပြဖျော်ဖြေမှုမျိုးကိုမဆို ပြုလုပ်သွားမည် မဟုတ်ကြောင်းနှင့် တာဝန်ယူ/တာဝန်ခံမှုအနေဖြင့် ဆိုင်အပေါ်ထပ် DJ ခန်းအား ယနေ့ ၃-၃-၂၀၂၄ ရက်မှစတင်ကာ ၁ လ တိတိ ခေတ္တပိတ်သိမ်း ရပ်နားသွားမည်ဖြစ်ကြောင်း အသိပေးကြေညာချက်၌ဖော်ပြထားသည်။

ကပြဖျော်ဖြေမိသူSexy Dancer ဖြစ်သူ(လိင်ပြောင်းအမျိုးသမီး) Ada Wongမှလည်း ၎င်း၏လူမှုကွန်ရက်ပေါ်မှတစ်ဆင့် ပရိတ်သတ်အားပြန်လည် တောင်းပန်ထားကြောင်းလည်း သိရသည်။

#Local_News #နေပြည်တော်ရှိBar #DJခန်းတစ်လနား #tthl #Yangon_Times

နိုင်ငံခြားငွေများဗဟိုဘဏ်ဆက်တိုက်ထုတ်ရောင်းပေးနေ၊ သွင်းကုန်လုပ်ငန်းရှင်များအတွက် အကျိုးသက်ရောက်ဟုဆို
'ယခုနှစ်အတွင်း မြန်မာနိုင်ငံတော်ဗဟိုဘဏ်က နိုင်ငံခြားငွေဈေးကွက်ထဲကို ကန်ဒေါ်လာ သန်းပေါင်းရာချီနဲ့ ထိုင်းဘတ်ငွေ သန်းတစ်ထောင်ကျော်ကိုရောင်းချပေးနေတာပါ'
#Local_News
Published_ 3 March 2024
#ကန်ဒေါ်လာသန်းရာချီ #ထိုင်းဘတ်သန်းတစ်ထောင်ကျော်ရောင်းချ
#YMG/NN #Yangon_Times

၃ မတ် ၂၀၂၄

နယ်စပ်ဖြတ်ကျော်မှုခင်းများကိုနှိမ်နှင်းရာမှာ အာဆီယံအဖွဲ့ဝင်နိုင်ငံများအကြား ပူးပေါင်းဆောင်ရွက်ရေးဟာ အဓိက အချက် တစ်ခုဖြစ်တယ်လို့ ထိုင်းဝန်ကြီးချုပ် ဆာရက်သာ သာဗစ်ဆင်းက ရုပ်သံအင်တာဗျူးတစ်ခုမှာ ပြောကြားပါတယ်။

Source CCTV+

@ymg/knl

#Local_News
Published 3 March 2024

ရန်ကုန်တိုင်းဒေသကြီး၊ ဒဂုံမြို့သစ်(မြောက်ပိုင်း)မြို့နယ်၊ (၂၉)ရပ်ကွက်၊ သခင်ဗဟိန်းလမ်းတွင် မီးလောင်မှုဖြစ်ပွားခဲ့ကြောင်း မြန်မာနိူင်ငံမီးသတ်တပ်ဖွဲ့၏ သတင်း ထုတ်ပြန် ချက်အရ သိရသည်။

မတ်လ ၃ ရက် နံနက် ၈နာရီ ၂၄ မိနစ်အချိန် ခန့်က လောင်ကျွမ်းခဲ့သဖြင့် ဒဂုံမြို့သစ်(မြောက်ပိုင်း)မြို့နယ်မီးသတ်စခန်းမှ မီးသတ်ယာဉ်(၃)စီး၊ ဒဂုံမြို့သစ်(တောင်ပိုင်း)မြို့နယ်မီးသတ်စခန်းမှ မီးသတ်ယာဉ်(၂)စီးတို့ဖြင့် ထွက်ခွာ ငြှိမ်းသတ်ခဲ့ကြောင်း သိရသည်။

ယင်းသို့ ငြှိမ်းသတ်ခဲ့သဖြင့် ၈နာရီ ၃၅မိနစ် တွင် မီးထိန်း နိုင်ခဲ့ပြီး ၈နာရီ ၃၆ မိနစ် တွင် မီးငြိမ်းခဲ့ကြောင်း သိရသည်။

မီးလောင်သည့်အကြောင်းအရာနှင့်ဆုံးရှုံးမှု တန်ဖိုးကို သက်ဆိုင်ရာက စစ်ဆေးလျက်ရှိကြောင်း သိရသည်။

#Local_News #မီးလောင်မှုဖြစ် #YMG/LW #Yangon_Times

#Local_News
Published 3 March 2024

တက္ကသိုလ်ဝင် စာမေးပွဲကို ရောက်ရှိဒေသမှဖြေဆိုလိုပါက ဖြေဆိုခွင့်မဆုံးရှုံးရအောင်လုပ်နိုင်ကြောင်းပညာရေးဝန်ကြီးဌာနမှ သိရသည်။

၂၀၂၃-၂၀၂၄ ပညာရေးနှစ်၏ တက္ကသိုလ်ဝင်တန်း စာမေးပွဲ ဖြေဆိုရမည့်သူများအနက်မှ အကြောင်းအမျိုးမျိုးကြောင့် နေရာဒေသ ပြောင်းရွှေ့နေထိုင်ကြရသူများ အနေဖြင့် မိမိတို့ ရောက်ရှိနေသည့် ဒေသတွင် ဖြေဆိုလိုသူများရှိပါက တက္ကသိုလ်ဝင် စာမေးပွဲဖြေဆိုခွင့် မဆုံးရှုံးစေရေးအတွက် သက်ဆိုင်ရာမြို့နယ်ပညာရေးမှူးရုံးနှင့် ဆက်သွယ်ဆောင်ရွက်ရန် ပညာရေးဝန်ကြီးဌာန ပြည်ထောင်စုဝန်ကြီး ဒေါက်တာညွန့်ဖေကပြောကြားခြင်းဖြစ်သည်။

မတ်လ (၁) ရက်က တက္ကသိုလ် ပါမောက္ခချုပ်များ၊ ပညာရေးဒီဂရီ ကောလိပ်ကျောင်းအုပ်ကြီးများ၊ တိုင်းဒေသကြီးနှင့် ပြည်နယ် ပညာရေးမှူးများနှင့် တွေ့ဆုံပွဲ၌ ပြောကြားခဲ့ခြင်းဖြစ်သည်။

လာမည့် မတ် (၁၁) ရက်တွင် တက္ကသိုလ်ဝင်စာမေးပွဲများ စတင်ဖြေဆိုမည်ဖြစ်ရာ စာမေးပွဲအောင်မြင်စွာ ကျင်းပနိုင်ရေးအတွက် တက္ကသိုလ်ပါမောက္ခချုပ်များ၊ ပညာရေးဒီဂရီကောလိပ် ကျောင်းအုပ်ကြီးများ၊ တိုင်းဒေသကြီးနှင့် ပြည်နယ်ပညာရေးမှူးများ အားလုံးဝိုင်းဝန်း လက်တွဲဆောင်ရွက်သွားကြရမည်ဖြစ်ကြောင်းလည်း ပညာရေးဝန်ကြီးက ပြောသည်။

၂၀၂၄ ခုနှစ် တက္ကသိုလ်ဝင်စာမေးပွဲအား မတ်လ (၁၁) ရက်တွင် မြန်မာစာ၊မတ်လ (၁၂) ရက်တွင် အင်္ဂလိပ်စာ၊ မတ်လ (၁၃) ရက်တွင် သင်္ချာ၊ မတ်လ (၁၄)ရက်တွင် ဓာတုဗေဒ / ပထဝီဝင်၊ မတ်လ (၁၅) ရက်တွင် ရူပဗေဒ/သမိုင်း၊ မတ်လ (၁၆) ရက် ဇီဝဗေဒ/ဘောဂဗေဒ ဘာသာရပ်တို့ကို ခြောက်ဘာသာလုံး နားရက် မရှိဆက်တိုက် ဖြေဆိုရမည်ဖြစ်ကြောင်း မြန်မာနိုင်ငံစာစစ်ဦးစီးဌာနမှ ထုတ်ပြန်ထားသည်။

ထို့အပြင် မတ်လ (၁၇) ရက်တွင် တစ်ရက်ပိတ်ကာ မတ်လ (၁၈) ရက်တွင် လူမှုရေးသိပ္ပံနှင့် မတ်လ (၁၉) ရက်တွင် စိတ်ကြိုက်မြန်မာစာတို့ကို ဖြေဆိုရမည့်ရက်အလိုက် နံနက် (၉) နာရီမှ (၁၂) နာရီအထိ ဖြေဆိုရမည်ဖြစ်ကြောင်းလည်း သိရသည်။

#Local_News #တက္ကသိုလ်ဝင်စာမေးပွဲ #ဖြေဆိုခွင့်မဆုံးရှုံးရအောင်လုပ်နိုင် #YMG/LW #Yangon_Times

#Local_News
Published 3 March 2024

ရန်ကုန် - မန္တလေး အမြန်လမ်းမကြီးပေါ်ရှိ တိုးဂိတ်များအနေဖြင့် လမ်းအသုံးပြုခကောက်ခရောက်ခံရာ၌ CCTV နှင့် Computer စနစ်ဖြင့်ဆောင်ရွက်ရန် ဆောက်လုပ်ရေးဝန်ကြီး ဌာန ဒုတိယဝန်ကြီး ဦးဝင်းဖေက ပြောကြားခဲ့သည်။

ရန်ကုန် - မန္တလေးအမြန်လမ်းမကြီး (နေပြည်တော်-မန္တလေးလမ်းပိုင်း) ရှိ တိုးဂိတ်များအား သွားရောက်စစ်ဆေးစဉ်ပြောကြားခဲ့ခြင်း ဖြစ်သည်။

လမ်းအသုံးပြုခကောက်ခံရရှိငွေ အပြည့်အဝရရှိရေး၊ နိုင်ငံတော် ဘဏ္ဍာငွေ လေလွင့်ဆုံးရှုံးမှုမရှိစေရေး၊ ငွေကြေးမသမာမှုမဖြစ်စေရေး၊ CCTV နှင့် Computer စနစ်ဖြင့် ဆောင်ရွက်ပြီး လက်လုပ်ပြေစာများ လုံးဝအသုံးမပြုစေရေး၊ တာဝန်ရှိသူများက အမြဲမပြတ် စစ်ဆေးပြီး စာရင်းများ မှန်ကန်စွာတင်ပြနိုင်ရေး အလေးထားကြပ်မတ်ဆောင်ရွက်ရန်နှင့်အမြန်လမ်းမကြီး အင်္ဂါရပ်နှင့်အညီ ဆောင်ရွက်သွားရန်လိုအပ်ကြောင်း ပြည်ထောင်စုဝန်ကြီးကဆိုသည်။

ထို့အပြင်  ရန်ကုန် - မန္တလေးအမြန်လမ်းမကြီး (နေပြည်တော်- မန္တလေးလမ်းပိုင်း)ရှိ ပန်းတင်တိုးဂိတ် လမ်းအသုံးပြုခကောက်ခံနေမှု၊ ရန်ကုန်-မန္တလေး အမြန်လမ်းမကြီး မိုင်တိုင်အမှတ် ၂၄၂ မိုင် ၁ ဖာလုံနှင့် ၂၄၃ မိုင်ရှိ ဆင်သေချောင်းတံတားအဝင်အထွက် ကွန်ကရစ်လမ်း နှစ်လမ်းသွားမှ လေးလမ်းသွားချဲ့ခြင်းလုပ်ငန်း ဆောင်ရွက်နေမှုကို ကြည့်ရှု စစ်ဆေးခဲ့သည့်အပြင် ပေပင်လေးတိုးဂိတ်၊ သီးကုန်းတိုးဂိတ်တို့၌ လမ်းအသုံးပြုခကောက်ခံနေမှု၊ သီးကုန်းယာဉ်ရပ်နားကွင်းအတွင်းရှိ EV Charging Station အသုံးပြု ဆောင်ရွက်နေမှု၊ ကံကောင်းတိုးဂိတ်၊ ပြင်စည်တိုးဂိတ်၊ စကားအင်းတိုးဂိတ်တို့၏ လမ်းအသုံးပြုခကောက်ခံနေမှု၊ မန္တလေးအပြည်ပြည်ဆိုင်ရာလေဆိပ်ရှိ EV Charging Station ဆောင်ရွက်ပြီးစီးမှုနှင့် တံခွန်တိုင်တိုးဂိတ် လမ်းအသုံးပြုခကောက်ခံနေမှုများကိုလည်း ကြည့်ရှု့စစ်ဆေးခဲ့ကြောင်း သိရသည်။

#Local_News #အမြန်လမ်း အသုံးပြုခကောက်ခံမှု #YMG/LW #Yangon_Times

#Local_News
Published 29 February 2024

ထိုင်းနိုင်ငံတွင် တရားမဝင် မြန်မာအလုပ်သမားများကို တရားဝင်နေထိုင်အလုပ်လုပ်ကိုင်နိုင်စေရန် အတွက် အလုပ်သမား ဝန်ကြီးဌာနမှ မည်သူမည်ဝါ ဖြစ်ကြောင်းသက်သေခံ လက်မှတ် (CI) များကို စခန်းများ ဖွင့်လှစ်ပြီး လုပ်ဆောင် ပေးလျက်ရှိရာ ပွဲစားများနှင့် ဆောင်ရွက်ခြင်း မပြုဘဲ လုပ်ဆောင်မည့်သူကိုယ်တိုင် လာရောက်လုပ်ဆောင်ရန် အလုပ်သမားဝန်ကြီးဌာနက အသိပေးကြေညာထားသည်။

အဆိုပါ မည်သူမည်ဝါဖြစ်ကြောင်းသက်သေခံလက်မှတ်(CI)ထုတ်ပေးမည့် စခန်း (၅) ခုကို ထိုင်းနိုင်ငံ၊ ပထုန်ဌာနီ၊ စမုပရာကန်၊ စမုစခွန်၊ ချွန်ဘူရီနှင့် ဆူရတ်ဌာနီပြည်နယ်များတွင်ဖွင့်လှစ် လုပ်ဆောင်ပေးနေကြောင်းသိရသည်။

ထို့ပြင် Mobile Unit (၃) ခုကို ချင်းမိုင်၊ နခွန်စဝမ်၊ ဆုန်ခလာပြည်နယ်များတွင်လည်းကောင်း ၂၃-၂-၂၀၂၄ ရက်နေ့မှ စတင်၍ ၃၁-၁၀-၂၀၂၄ ရက်နေ့အထိ ဖွင့်လှစ်ဆောင်ရွက်ပေးသွားမည်ဖြစ်ကြောင်း သိရသည်။

အဆိုပါ ဆောင်ရွက်ရမည့်လုပ်ငန်းစဉ်များ၊ CI ပြုလုပ်နိုင်မည့် ရက်၊အချိန်များ၊ စုံစမ်းမေးမြန်းနိုင်သည့် ဖုန်းအမှတ်များကိုလည်း ဖော်ပြထားပြီးဖြစ်ကြောင်း နှင့်သတ်မှတ်နှုန်းထားထက်ပိုမိုကုန်ကျမှုမရှိစေရေးအတွက် ပွဲစားများဖြင့်ဆောင်ရွက်ခြင်းမပြုဘဲ ကိုယ်တိုင်သွားရောက်ဆောင်ရွက်ကြရန် အလုပ်သမားဝန်ကြီးဌာနက အသိပေးကြေညာထားသည်။

#Local_News #အလုပ်သမားဝန်ကြီးဌာနအသိပေး #ပွဲစားဖြင့်ဆောင်ရွက်ခြင်းမပြုဘဲ #YMG/LW #Yangon_Times