နိုဝင်ဘာ ၁၅၊၂၀၂၅ (Sky News)-

Panorama အစီအစဉ်တွင် သူ၏ မိန့်ခွန်းကို ပြုပြင်တည်းဖြတ်မှုအတွက် BBC ကို အမေရိကန်ဒေါ်လာ ၁ ဘီလီယံမှ ၅ ဘီလီယံကြား တရားစွဲဆိုမည်ဟု ဒေါ်နယ်ထရမ့်က ပြောကြားလိုက်သည်။

အမေရိကန်သမ္မတက စနေနေ့ည၌ Air Force One လေယာဉ်ပေါ်တွင် ရှိနေစဉ် အဆိုပါ အသံလွှင့်ဌာနကို တရားဥပဒေအရ အရေးယူမည်ဖြစ်ကြောင်း အတည်ပြုခဲ့ခြင်းဖြစ်သည်။

"ကျွန်တော်တို့ သူတို့ကို တရားစွဲမယ်။ ဒေါ်လာ တစ်ဘီလီယံ (ပေါင် ၇၉၂ သန်း) နဲ့ ငါးဘီလီယံ (ပေါင် ၃.၇၉ ဘီလီယံ) ကြား လျော်ကြေးရဖို့ သူတို့ကို တရားစွဲမယ်၊ လာမယ့်အပတ်လောက်မှာ ဖြစ်နိုင်တယ်" ဟု သူက သတင်းထောက်များကို ပြောကြားခဲ့သည်။

"ကျွန်တော်တို့ ဒါကို လုပ်ရမယ်၊ သူတို့ လိမ်လည်ခဲ့တယ်ဆိုတာ ဝန်ခံပြီးသားပဲ။ သူတို့ ဒါကို မလုပ်ဘဲ နေခဲ့ကြတာ မဟုတ်ဘူး။ သူတို့ လိမ်လည်ခဲ့တယ်။ ကျွန်တော့်ပါးစပ်က ထွက်တဲ့ စကားလုံးတွေကို သူတို့ ပြောင်းလဲခဲ့တယ်"ဟုထရမ့်ကပြောသည်။

ထို့နောက် ထရမ့်က ယခုသီတင်းပတ်ကုန်တွင် ဝန်ကြီးချုပ် ဆာာ ကီယာစတားမား နှင့် ဤကိစ္စကို ဆွေးနွေးမည်ဖြစ်ကြောင်း သတင်းထောက်များအား ပြောကြားခဲ့ပြီး "ဖြစ်ပျက်ခဲ့သည့်အပေါ် ယူကေ  ပြည်သူများ အလွန်ဒေါသထွက်နေကြသည်၊အဘယ်ကြောင့်ဆိုသော် BBC သည် သတင်းတု ဖြစ်ကြောင်း ပြသလိုက်သောကြောင့်ဖြစ်သည်” ဟု အခိုင်အမာ ပြောကြားခဲ့သည်။

၂၀၂၁ ခုနှစ်၊ ဇန်နဝါရီလ ၆ ရက်နေ့တွင် လူအုပ်စုတစ်စုက အမေရိကန် ကက်ပီတိုလ် အဆောက်အအုံ၌ အဓိကရုဏ်းမဖြစ်ပွားမီ ထရမ့်ပြောကြားခဲ့သော မိန့်ခွန်းကို BBC က သတင်းအစီအစဉ်တွင် ပြုပြင်  တည်းဖြတ်ခဲ့ခြင်းနှင့် ပတ်သက်၍ စိုးရိမ်မှုများ မြင့်တက်ခဲ့ကြောင်း ဌာနတွင်း မှတ်တမ်းတစ်ခုကို The Daily Telegraph က ယခုလအစောပိုင်းတွင် ဖော်ပြခဲ့သည်။

BBC အကျပ်အတည်း ဘယ်လိုဖြစ်ပွားခဲ့သလဲ

စိုးရိမ်မှုများမှာ ပြီးခဲ့သည့်နှစ် အမေရိကန်ရွေးကောက်ပွဲ မတိုင်မီ တစ်ပတ်အလိုတွင် BBC က ထုတ်လွှင့် ခဲ့သော "Trump: A Second Chance?" မှတ်တမ်းရုပ်သံတွင် သမ္မတ၏ မိန့်ခွန်း အပိုင်းအစများမှ ဗီဒီယို  ဖိုင်များကို ဖြတ်ဆက်၍ သူက ကက်ပီတိုလ် အဆောက်အအုံသို့ ထောက်ခံသူများနှင့်အတူ လမ်းလျှောက်  သွားပြီး "သတ္တိရှိရှိ တိုက်ပွဲဝင်ရန်" ပြောကြားခဲ့သကဲ့သို့ ထင်ရအောင် ပြုလုပ်ခဲ့ခြင်းနှင့် သက်ဆိုင်နေ သည်။ ပြင်းထန်သော ဝေဖန်မှုများ ထွက်ပေါ်လာပြီးနောက် BBC ညွှန်ကြားရေးမှူးချုပ် တင်မ် ဒေဗီ နှင့် BBC News အမှုဆောင်အရာရှိချုပ် ဒေဘိုရာ တားနက်စ် တို့ နှစ်ဦးစလုံး သူတို့၏ ရာထူးများမှ နုတ်ထွက်  ခဲ့ကြသည်။

 အသရေဖျက်မှု တောင်းဆိုရန် အခြေအမြစ်မရှိ

ကြာသပတေးနေ့တွင် အဆိုပါ အသံလွှင့်ဌာနက သမ္မတအား တရားဝင် တောင်းပန်ခဲ့ပြီး ယင်းသည် "ဆုံးဖြတ်ချက် အမှားအယွင်း" ဖြစ်ကြောင်းနှင့် အစီအစဉ်ကို "မည်သည့် BBC ပလက်ဖောင်းများတွင်မဆို ဤပုံစံအတိုင်း ထပ်မံထုတ်လွှင့်တော့မည် မဟုတ်ကြောင်း" အာမခံပြောကြားခဲ့သည်။

ပြောရေးဆိုခွင့်ရှိသူတစ်ဦးက "ဗီဒီယိုဖိုင်ကို တည်းဖြတ်ခဲ့သည့်ပုံစံအတွက် BBC က စိတ်ရင်းအမှန်ပင် ဝမ်းနည်းပါသည်" ဟု ပြောကြားခဲ့သော်လည်း "အသရေဖျက်မှု တောင်းဆိုရန် အခြေအမြစ်ရှိသည် ဆိုခြင်းကိုမူ ကျွန်ုပ်တို့ လုံးဝ သဘောမတူပါ" ဟု သူတို့က ထပ်လောင်းပြောကြားခဲ့သည်။

ယခုသီတင်းပတ် အစောပိုင်းတွင် ထရမ့်၏ ရှေ့နေများက BBC အနေဖြင့် တောင်းပန်ခြင်း၊ ဗီဒီယိုဖိုင်ကို ပြန်လည်ရုပ်သိမ်းခြင်း နှင့် လျော်ကြေးပေးခြင်းတို့ မပြုလုပ်ပါက ဒေါ်လာ ၁ ဘီလီယံအတွက်  တရား စွဲမည်ဟု ခြိမ်းခြောက်ခဲ့သည်။

သမ္မတ၏ မိန့်ခွန်း အပိုင်းအစများကို ဖြတ်ဆက်၍ သူက ကက်ပီတိုလ် အဆောက်အအုံသို့ ထောက်ခံ  သူများနှင့်အတူ လမ်းလျှောက်သွားပြီး "သတ္တိရှိရှိ တိုက်ပွဲဝင်ရန်" ပြောကြားခဲ့သကဲ့သို့ ထင်သွားအောင် ပြီးခဲ့သည့်နှစ် အမေရိကန်ရွေးကောက်ပွဲ မတိုင်မီ တစ်ပတ်အလိုတွင် BBC က ထုတ်လွှင့်ခဲ့သော "Trump: A Second Chance?" မှတ်တမ်းရုပ်သံတွင် ဖန်တီး ပြုလုပ်ခဲ့သည်။

တရားဥပဒေအရ စိန်ခေါ်မှုများ

သို့သော် ဥပဒေပညာရှင်များက မစ္စတာထရမ့်အနေဖြင့် ယူကေ သို့မဟုတ် အမေရိကန် တရားရုံးများ၌ အမှုဖွင့်ရာတွင် စိန်ခေါ်မှုများ ရင်ဆိုင်ရမည်ဟု ပြောကြားထားသည်။

အသရေဖျက်မှု လျော်ကြေးငွေ ပေါင် ၁၀၀,၀၀၀ ($၁၃၂,၀၀၀) ထက် မကျော်လွန်လေ့ရှိသော ယူကေ  တရားရုံးများသို့ အမှုတင်သွင်းရန် နောက်ဆုံးသတ်မှတ်ရက်မှာ ကျော်လွန်သွားပြီဖြစ်သည်။ အဘယ် ကြောင့်ဆိုသော် အဆိုပါ မှတ်တမ်းရုပ်သံကို ၂၀၂၄ ခုနှစ် အောက်တိုဘာလတွင် ထုတ်လွှင့်ခဲ့ပြီး ယင်းမှာ တစ်နှစ်ထက် ပိုမိုကြာမြင့်သွားခဲ့သောကြောင့် ဖြစ်သည်။

ထို့အပြင် အဆိုပါ မှတ်တမ်းရုပ်သံကို အမေရိကန်တွင် မပြသခဲ့သောကြောင့်၊ အမေရိကန်ပြည်သူများ မကြည့်ရှု နိုင်ခဲ့သော အစီအစဉ်တစ်ခုကြောင့် သမ္မတအပေါ် အထင်အမြင်သေးသွားသည်ဟု သက်သေပြ ရန် ခက်ခဲလိမ့်မည်လည်းဖြစ်သည်။

The Telegraph တွင် ထပ်မံဖော်ပြခဲ့သည့် ၂၀၂၂ ခုနှစ် ဇွန်လတွင် ထုတ်လွှင့်ခဲ့သော အစီရင်ခံ  စာတစ်ခုတွင် BBC ၏Newsnight အစီအစဉ်ကလည်း အဆိုပါ မိန့်ခွန်း၏ ဗီဒီယိုဖိုင်ကိုပင် ရွေးချယ်   တည်းဖြတ်ခဲ့သည်ဟူသော စွပ်စွဲချက်အသစ်များကို စုံစမ်းစစ်ဆေးနေကြောင်း BBC က ပြောကြားခဲ့ သည်။

BBC ပြောရေးဆိုခွင့်ရှိသူတစ်ဦးက "BBC ဟာ အမြင့်မားဆုံးသော တည်းဖြတ်မှုစံနှုန်းတွေကို ကိုင်စွဲထားပါတယ်။ ဒီကိစ္စကို ကျွန်တော်တို့ သတိပြုမိပြီးဖြစ်ပြီး အခု စုံစမ်းစစ်ဆေးနေပါတယ်" ဟု ပြောကြားခဲ့သည်။ End

#Daily_News
Published 15 November 2025

၁။‌ ‎BAP စနစ်ဖြင့် ဆော်ဒီနိုင်ငံသို့မွေးမြူရေးငါးများတင်ပို့နိုင်ရေးဆောင်ရွက်နေ
‎
‎‎၂။ ‌‌‌‌‌‎‎‎‎‎‎‎ထိုင်းသို့ ထောပတ်သီးတန်ချိန်(၅၀၀၀)အထိတင်ပို့ရန်လျာထား
‎
‎၃။‌‎‎ ‎‎‎‎‎‎‎‎‎‎ဂျော်ဒန်နိုင်ငံသို့ သွားရောက်အလုပ်လုပ်ကိုင်မည့်သူများကို OWIC ကတ်ပြုလုပ်ခွင့်ပြု
‎
‎၄။‎ ‎‎‎‎‎‎‎‎‎‎(၁၅)ကြိမ်မြောက်အမျိုးသားအားကစားပြိုင်ပွဲ၌အသုံးပြုနေသောနောက်ဆုံးပေါ်နည်းပညာများအား CMGထုတ်ဖော်ပြသ... အစရှိတဲ့ သတင်းတွေကိုတင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

#Local_News
Published 15 November 2025

▪️ မြန်မာအီလက်ထရောနစ်မဲပေးစက် ( MEVM ) ၏ စံချိန်စံညွှန်းကို မြန်မာစံချိန်စံညွှန်းအဖြစ်သတ်မှတ်ပြီးဖြစ်ကာ အရည်အသွေးကိုက်ညီမှုထောက်ခံချက်လက်မှတ်နှင့် စံချိန်စံညွှန်းအမှတ်တံဆိပ် အသုံးပြုခွင့်လိုင်စင်ရရှိပြီးဖြစ်ကြောင်း ပြည်ထောင်စုရွေးကောက်ပွဲကော်မရှင်ကထုတ်ပြန်လိုက်သည်။

▪️ ၂၀၂၅ ခုနှစ်၊ ပါတီစုံဒီမိုကရေစီအထွေထွေရွေးကောက်ပွဲတွင် အသုံးပြုမည့် မြန်မာအီလက် ထရောနစ်မဲပေးစက် ( MEVM ) များကို ပြည်တွင်းနည်းပညာရှင်များက ပထမဆုံးတီထွင်ထုတ်လုပ်ထားခြင်းဖြစ်သဖြင့် စက်၏အရည်အသွေးနှင့် စံချိန်စံညွှန်းကိုစစ်ဆေးပေးနိုင်ရေးတင်ပြခဲ့ရာ အမျိုးသားစံချိန်စံညွှန်းကောင်စီက မြန်မာအီလက်ထရောနစ် မဲပေးစနစ်ဆိုင်ရာ စံချိန်စံညွှန်း ရေးဆွဲရေးနည်းပညာဆပ်ကော်မတီကို သက်ဆိုင်ရာ ကဏ္ဍအလိုက် ပညာရှင်များပါဝင်သည့် အဖွဲ့ဝင် ၂၀ ဦးဖြင့် ဖွဲ့စည်းခဲ့ကြောင်း သိရသည်။

▪️ အဆိုပါ နည်းပညာဆပ်ကော်မတီအနေဖြင့် မြန်မာအီလက်ထရောနစ် မဲပေးစက်ဆိုင်ရာစံချိန်စံညွှန်း (မူကြမ်း)ကို ရေးဆွဲတင်ပြခဲ့သဖြင့် အမျိုးသားစံချိန်စံညွှန်းကောင်စီအနေဖြင့် စံချိန်စံညွှန်း သတ်မှတ်ခြင်းဆိုင်ရာ ဥပဒေပုဒ်မ ၃၃ ပုဒ်မခွဲ (ခ) အရ အပ်နှင်းထားသောလုပ်ပိုင်ခွင့်ကိုကျင့်သုံး၍ ပုဒ်မ ၅ ပုဒ်မခွဲ (ခ) ပါ လုပ်ငန်းတာဝန်အရ ၂ - ၉ - ၂၀၂၅ ရက်စွဲပါ အမိန့်ကြော်ငြာစာအမှတ်၊ ၀၇၅/၂၀၂၅ ဖြင့် မြန်မာအီလက်ထရောနစ် မဲပေးစက်ဆိုင်ရာ စံချိန်စံညွှန်းကို မြန်မာစံချိန်စံညွှန်းအဖြစ် သတ်မှတ်ခဲ့ခြင်းဖြစ်ကြောင်းသိရသည်။

▪️ ထို့နောက် အမျိုးသားစံချိန်စံညွှန်းကောင်စီသည် မြန်မာအီလက်ထရောနစ်မဲပေးစက် (MEVM) ၏ ထုတ်ကုန်နှင့်ထုတ်လုပ်မှုနည်းစဉ်များအား သတ်မှတ်စံချိန်စံညွှန်းများနှင့် ကိုက်ညီခြင်းရှိမရှိကို အကဲဖြတ်စစ်ဆေးခြင်းဆောင်ရွက်နိုင်ရန် အမိန့်ကြော်ငြာစာအမှတ်၊ ၀၈၃/၂၀၂၅ ဖြင့် လျှပ်စစ်၊ အီလက်ထရောနစ်နှင့် သတင်းအချက်အလက်နည်းပညာဆိုင်ရာ အကဲဖြတ်စစ်ဆေးရေးကော်မတီကိုဖွဲ့စည်း၍ဆောင်ရွက်ခဲ့ကြောင်းသိရသည်။

▪️ ယခုအခါ မြန်မာအီလက်ထရောနစ်မဲပေးစက်နှင့်စပ်လျဉ်း၍ မြန်မာအီလက်ထရောနစ် မဲပေးစက်ဆိုင်ရာ စံချိန်စံညွှန်းကို အမျိုးသားစံချိန်စံညွှန်းကောင်စီက မြန်မာစံချိန်စံညွှန်း (MMS) အဖြစ်လည်းကောင်း၊ အမျိုးသားအဆင့်အရည်အသွေးထောက်ခံချက် ထုတ်ပေးရေးဆိုင်ရာ ໑໐ (National Certification Committee NCC)မှ မြန်မာအီလက်ထရောနစ် မဲပေးစက်(MEVM)၏ အရည်အသွေးသည် စံချိန်စံညွှန်းပါ စံသတ်မှတ်ချက်များနှင့် ကိုက်ညီမှုရှိကြောင်း စိစစ်အတည်ပြုထုတ်ပေးခဲ့သည့် အရည်အသွေးကိုက်ညီမှု ထောက်ခံချက် (Certification of Conformity CoC) လက်မှတ်ကိုလည်းကောင်း၊ အမျိုးသားအဆင့် အရည်အသွေးထောက်ခံချက် ထုတ်ပေးရေးအဖွဲ့ (National Certification Body NCB)မှ ထုတ်ပေးသည့် မြန်မာစံချိန်စံညွှန်း အမှတ်တံဆိပ် (MMS Standard Mark) အသုံးပြုခွင့် လိုင်စင်ကိုလည်းကောင်း ရရှိပြီးဖြစ်ကြောင်း ပြည်ထောင်စုရွေးကောက်ပွဲကော်မရှင်၏ ထုတ်ပြန်ချက်တွင် ဖော်ပြထားသည်။

#YMG/PP #Yangon_Times

#Local_News
Published 15 November 2025

▪️ ဇီဝကျင့်ဝတ်များ (Bioethics) ဆိုင်ရာဆွေးနွေးပွဲ (၁/၂၀၂၅) ကို နိုဝင်ဘာ ၁၁ ရက်နံနက်ပိုင်းတွင် မန္တလေးတိုင်းဒေသကြီး ကျောက်ဆည်မြို့ရှိ ဇီဝနည်းပညာသုတေသနဦးစီးဌာန၌ ကျင်းပခဲ့ကြောင်းသိရသည်။

▪️ အဆိုပါ ဆွေးနွေးပွဲတွင် သိပ္ပံနှင့်နည်းပညာဝန်ကြီးဌာန ဒုတိယဝန်ကြီး ဒေါက်တာအောင်ဇေယျက ဇီဝနည်းပညာ ဆန်းသစ်တီထွင်မှုများကို သဘာဝလုပ်ငန်းစဉ်များအတိုင်းအသုံးချ၍ စိုက်ပျိုး-မွေးမြူရေး စက်မှုလုပ်ငန်းများ၊ စားရေရိက္ခာဖူလုံရေး၊ လူသားများ၏ ကျန်းမာရေးသာယာဝပြောရေးနှင့် ရေရှည်တည်တံ့ရေး၊ ရာသီဥတုပြောင်းလဲမှုတိုက်ဖျက်ရေးစသည့်ကဏ္ဍများတွင် အကျိုးရှိစွာအသုံးချနိုင်ကြောင်း၊ ယနေ့ခေတ် ဇီဝနည်းပညာအပါအဝင် နည်းပညာဖွံ့ဖြိုးမှုနှုန်းများ မြန်ဆန်လျက်ရှိပြီး AI အပါအဝင် ဒစ်ဂျစ်တယ် နည်းပညာအသုံးချမှုများသည် အဓိကမောင်းနှင်အားများဖြစ်လာရာ မျိုးရိုးဗီဇပြုပြင်မှု၊ မျိုးရိုးဗီဇအချက်အလက်များကာကွယ်မှု၊ ကျန်းမာရေးစောင့်‌ရှောက်မှု၊ Circular Economy စသည်တို့တွင် ဇီဝကျင့်ဝတ်နှင့်ကိုက်ညီသော သုတေသနလုပ်ငန်းများ၊ တာဝန်ယူမှုရှိသော ဇီဝနည်းပညာဆန်းသစ်တီထွင် ဆောင်ရွက်မှုများကို မြှင့်တင်ရန်လိုအပ်လာကြောင်း၊ ယင်းမှတစ်ဆင့် နိုင်ငံတော်ရေရှည် စဉ်ဆက်မပြတ် ဖွံ့ဖြိုးတိုးတက်စေရေးအတွက် မိမိတို့အားလုံး တက်ညီလက်ညီ ပူးပေါင်းဆောင်ရွက်သွားရန် လိုအပ်ကြောင်း တိုက်တွန်းပြောကြားသည်။

▪️ ယင်းနောက် ဌာနဆိုင်ရာတာဝန်ရှိသူများက ဇီဝနည်းပညာသုတေသနကျင့်ဝတ်များ၊ အာဆီယံနှင့် နိုင်ငံတကာတွင် ဇီဝကျင့်ဝတ်မူဝါဒများရေးဆွဲဆောင်ရွက်လျက်ရှိမှုများကို ရှင်းလင်းတင်ပြကြရာ တက်ရောက်လာသူများက ရင်းနှီးပွင့်လင်းစွာ အပြန်အလှန်မေးမြန်းဆွေးနွေးကြသည်။

▪️ ဆွေးနွေးပွဲသို့ သိပ္ပံနှင့်နည်းပညာဝန်ကြီးဌာနနှင့် ဆက်စပ်ဝန်ကြီးဌာန ၁၂ ခုတို့မှ တာဝန်ရှိသူများ၊ ဒေသတွင်း တက္ကသိုလ်အသီးသီးမှ ပါမောက္ခချုပ်များနှင့် ပါမောက္ခများ၊ ပညာရှင်များ၊ တောင်သူများနှင့် MSME လုပ်ငန်းရှင်များ တက်‌ရောက်ကြသည်။

▪️ မွန်းလွဲပိုင်းတွင် ဒုတိယဝန်ကြီးသည် နည်းပညာ၊ သက်မွေးပညာနှင့် လေ့ကျင့်ရေးဦးစီးဌာနအစိုးရ စက်မှုလက်မှုသိပ္ပံ(ကျောက်ဆည်)သို့ ရောက်ရှိကာ ဝန်ထမ်းများနှင့် ရင်းရင်းနှီးနှီးတွေ့ဆုံ၍ ဒေသတွင်း ဖွံ့ဖြိုးရေးနှင့် လူငယ်များ၏ လူမှုစီးပွားဘဝဖွံ့ဖြိုးတိုးတက်ရေးကို အမှန်တကယ် အထောက်အကူပြုသည့် သင်တန်းများကိုအရည်အသွေးပြည့်မီစွာ စဉ်ဆက်မပြတ် ဖွင့်လှစ်သွားရန်မှာကြားပြီး အင်ဂျင်နီယာဌာနအလုပ်ရုံများ၌ ၂၀၂၄-၂၀၂၅ ပညာသင်နှစ် တတိယနှစ် ကျောင်းသား ကျောင်းသူများ၏ ဆိုလာလျှပ်စစ် စက်ဘီးအားသွင်းစနစ်၊ အင်တာနက်အခြေပြု ဆိုလာစိုက်ပျိုးရေပေးဝေရေးစနစ်၊ ပြန်လည် ပြည့်ဖြိုးမြဲ စွမ်းအင်စနစ်များနှင့်ဓာတ်အားစနစ်ပုံစံငယ်၊ ကြိုးမဲ့ထိန်းချုပ်မြက်ဖြတ်စက် စသည့် သုတေသနပရောဂျက်များ ဆောင်ရွက်ပြီးစီးမှုအခြေအနေများကို ကြည့်ရှုအားပေးကာ သုတေသနထူးချွန်ဆုများကို ဂုဏ်ပြုချီးမြှင့်သည်။

▪️ ဆက်လက်၍ ဒုတိယဝန်ကြီးသည် အစိုးရနည်းပညာအထက်တန်းကျောင်း (ကျောက်ဆည်)သို့ ရောက်ရှိပြီး ဝန်ထမ်းများနှင့် ရင်းရင်းနှီးနှီးတွေ့ဆုံကာ ဝန်ထမ်းများ၏ လိုအပ်ချက်တင်ပြမှုများအပေါ် ဖြည့်ဆည်းဆောင်ရွက်ပေးပြီး အင်ဂျင်နီယာဘာသာရပ်အလိုက် စာသင်ခန်းများနှင့် အလုပ်ရုံများတွင် သင်ကြားလေ့ကျင့်လျက်ရှိကြသည့် ကျောင်းသား ကျောင်းသူများအား ရင်းရင်းနှီးနှီးနှုတ်ဆက်အားပေးကာ နိုင်ငံတော်ကအမှန်တကယ်အားထားရသော နည်းပညာရှင်လူငယ်ကောင်းများဖြစ်စေရေး ရည်မှန်းကြိုးပမ်းသွားကြရန်မှာကြား၍ သုတေသနထူးချွန်ဆုများကို ဂုဏ်ပြုချီးမြှင့်ခဲ့ကြောင်း သိရသည်။

#YMG/NN #Yangon_Times

#Local_News
Published 15 November 2025

▪️ ရန်ကုန်-ပြည်ကားလမ်းပေါ်တွင် ဆန်ကားမှောက်ပြီး အမျိုးသားတစ်ဦး ‌ေ-သဆုံးမှူတစ်ခု ဖြစ်ပွားခဲ့ကြောင်းသိရသည်။

▪️ နိုဝင်ဘာလ ၁၅ရက်နေ့၊ နေ့လယ် ၁၁နာရီ ၅၆မိနစ် အချိန်၊ ရန်ကုန်တိုင်းဒေသကြီး၊ တိုက်ကြီးမြို့နယ်၊ တာဂွကျေးရွာအုပ်စု၊ ရန်ကုန်-ပြည်ကားလမ်းမပေါ်တွင် ဆန်ကားမှောက်၍ ယာဉ်မောင်းညပ်နေကြောင်း သိရသည်။

▪️ အဆိုပါသတင်းရရှိသဖြင့် တိုက်ကြီးမြို့နယ်မီးသတ်စခန်းမှ ရှာဖွေကယ်ဆယ်ရေးလုပ်ငန်းများ ထွက်ခွာဆောင်ရွက်ခဲ့ရာ ၁၂ : ၁၀ အချိန်တွင် ကားခေါင်းခန်းတွင် ညှပ်နေသူ ယာဉ်မောင်းကျား(၁)ဦး (‌ေ-သဆုံး)အား ခိုကိုးရာမဲ့အသင်းသူနာတင်ယာဉ်ဖြင့် တိုက်ကြီးဆေးရုံသို့ ပို့ဆောင်ပေးခဲ့ ကြောင်းသိရသည်။

#YMG/NN #Yangon_Times

#World_Science
Published 14 November 2025

■ အသက် ၇၀ ကျော်အရွယ်မှာ သီချင်းနားထောင်ခြင်းက ဒီမန်ရှာရောဂါဖြစ်နိုင်ခြေ ၃၉ ရာခိုင်နှုန်းလျော့နည်းစေခြင်းနဲ့ ဆက်စပ်နေတယ်လို့ မိုနက်ရှ်တက္ကသိုလ်က သက်ကြီးရွယ်အို ၁၀,၈၀၀ ကျော်ကို လေ့လာတွေ့ရှိခဲ့ပါတယ်။

■ အသက် ၇၀ ကျော်တဲ့အခါ သီချင်းအမြဲနားထောင်သူတွေက နားမထောင်ဖြစ်တဲ့သူတွေထက်စာရင် ဒီမန်ရှာဖြစ်နိုင်ခြေ ၃၉ ရာခိုင်နှုန်း လျော့နည်းစေကာ ဂီတတူရိယာ တီးခတ်ခြင်းကတော့ ၃၅ ရာခိုင်နှုန်း လျော့ကျစေတယ်လို့ ပရော်ဖက်ဆာ ဂျိုအန်ရိုင်ယန်နဲ့ ကျောင်းသူ အမ်မာဂျက်ဖာတို့က တွေ့ရှိခဲ့ပါတယ်။

■ ဒါ့အပြင် သီချင်းနားထောင်ခြင်းဖြင့် ဦးနှောက်ချို့ယွင်းခြင်းကိုလည်း ၁၇ ရာခိုင်နှုန်းလျှော့ချပေးကာ ဦးနှောက်အသိဉာဏ်စွမ်းရည်နဲ့ မှတ်ဉာဏ်ပြန်ခေါ်ခြင်းတို့မှာ ရလဒ်ကောင်းပါတယ်။

■ ကမ္ဘာကြီးမှာ သက်ကြီးရွယ်အိုဦးရေ များပြားလာပြီး အသက်အရွယ်နဲ့ဆိုင်တဲ့ ရောဂါတွေလည်းအဖြစ်များလာပါတယ်။

■ ဒီမန်ရှာအတွက် ကုသနည်းမရှိတာကြောင့် ရောဂါကို ကြိုတင်ကာကွယ်ခြင်းက အရေးကြီးကြောင်း ရိုင်ယန်က ဆိုပါတယ်။

■ ဦးနှောက်အိုမင်းလာခြင်းက အသက်အရွယ်တစ်ခုတည်းသာ မှီခိုတာမဟုတ်ဘဲ ပတ်ဝန်းကျင်နဲ့ နေထိုင်မှုပုံစံတို့ကလည်း သက်ရောက်နေပါတယ်။

■ သီချင်းနားထောင်ခြင်းက ဦးနှောက်အစိတ်အပိုင်းအမျိုးမျိုးကို လှုံ့ဆော်ပေးကာ မှတ်ဉာဏ်၊ စိတ်ခံစားမှု၊ အာရုံစူးစိုက်မှုတို့ကို ထောက်ကူပေးပြီး အသက်ကြီးတဲ့အချိန်မှာ ဦးနှောက်အသိဉာဏ်လုပ်ဆောင်ချက်ကို ထိန်းသိမ်းပေးပါတယ်။

■ နောက်ဆုံးကောက်ချက်ချရလျှင် သီချင်းနားထောင်ခြင်းဟာ အသက်ကြီးတဲ့အခါ ဦးနှောက်ချို့ယွင်းမှုကို လျှော့ချစေပြီး ဒီမန်ရှာဖြစ်ခြင်းကို နှောင့်နှေးစေနိုင်တယ်လို့ ဆိုရမှာဖြစ်ပါတယ်။

Source: Neuroscience.

#World_Science
Published 14 November 2025

▪️ စတန်းဖို့ဒ်တက္ကသိုလ်မှ မျက်စိကျန်းမာရေးပရော်ဖက်ဆာ ဒန်နီယယ်ပယ်လန်ကာက မျက်စိကွယ်ခြင်းကို ပြန်ပြောင်းလဲစေနိုင်မယ့် နည်းလမ်းရရှိဖို့ ပြီးခဲ့တဲ့ ဆယ်စုနှစ် ၂ ခုလောက်တည်းက စိတ်ကူးယဉ်ခဲ့ကာ နောက်ဆုံးမှာတော့ အောင်မြင်စွာတီထွင်နိုင်ခဲ့ပါပြီ။

▪️ မျက်လုံးနောက်မှာ ကြိုးမဲ့ဆားကစ်ပြားလေးတွေနဲ့ နည်းပညာမြင့်မှန်လေးတွေ ထည့်သွင်းလိုက်တာဖြစ်ပြီး အဖြစ်များကြတဲ့ မျက်လုံးကြွက်သားချို့ယွင်းရောဂါ ခံစားရတဲ့ လူ ၃၀ ခန့်ဟာ ပြန်ပြီးတော့ စာဖတ်နိုင်ခဲ့ပါတယ်။

▪️ ဒီပစ္စည်းဟာ အမြင်အာရုံ ပြန်လည်ရရှိစေတဲ့ ပထမဆုံးအရာဖြစ်ပေမယ့် ကုသမရနိုင်တော့တဲ့ အမြင်အာရုံဆုံးရှုံးလူနာတွေမှာ အဖြူအမည်းကိုမှ မှုန်ဝါးဝါး မြင်ရစေပါတယ်။

▪️ လူနာတွေ ပြန်လည်မြင်ခွင့်ရတာ အံ့အားသင့်ကြရတယ်လို့ ပယ်လန်ကာက SFGATE ကို ပြောပါတယ်။

▪️ မျက်လုံးကြွက်သားချို့ယွင်းခြင်း ပိုဆိုးလာတဲ့အခါ အသက်ကြီးလာတာနဲ့အမျှ အမြင်အာရုံဆုံးရှုံးလာစေပြီး ပြန်လည်ကုသလို့မရတော့ပါဘူး။

▪️ ဒီကိရိယာရဲ့ အစိတ်အပိုင်းနှစ်ခုက ဆားကစ်ပြားလေးနဲ့ အထူးမှန်တွေ ဖြစ်ပါတယ်။

▪️ မှန်မှာဆိုရင် ပုံရိပ်တွေကို ဖမ်းယူနိုင်တဲ့ ကင်မရာချိတ်ဆက်ထားကာ ဆားကစ်တွေဆီ အနီအောက်အလင်းမှတဆင့် ပို့လွှတ်ပေးပါတယ်။

▪️ ဒီနောက် ဆားကစ်ပြားလေးတွေက ပုံရိပ်တွေကို လျှပ်စီးလှုံ့ဆော်မှုအဖြစ် ပြောင်းလဲပေးကာ အမြင်အာရုံပြန်ရစေတာ ဖြစ်ပါတယ်။

▪️ အချို့လူနာတွေမှာ ဘေးထွက်ဆိုးကျိုးတွေ ရှိပြီး ၂ လအတွင်း သက်သာသွားကြကာ ၃ ပုံ ၂ ပုံလောက်က အတော်လေး ကျေနပ်ကြပါတယ်။

▪️ ဒီကိရိယာရဲ့ စွမ်းဆောင်ရည်တွေကို မြှင့်တင်နိုင်ဖို့ ဆက်လက်ကြိုးပမ်းနေကြပြီး မီးခိုရောင်နဲ့ ပိုမိုပြတ်သားတဲ့ပုံရိပ် ထည့်သွင်းနေကြကာ ဥရောပနဲ့ အမေရိကန်တို့မှာ ရောင်းချသွားမှာ ဖြစ်ပါတယ်။

Source: SFGATE

တရုတ်နဲ့အိန္ဒိယကြား တိုက်ရိုက်လေကြောင်းခရီးစဉ်များ ၅ နှစ်တာ ရပ်ဆိုင်းထားပြီးနောက် တနင်္ဂနွေနေ့မှာ ပြန်လည်စတင်ခဲ့ပြီး ပထမဆုံးခရီးစဉ်ကတော့ နေရာ ၉၅ ရာခိုင်နှုန်း ပြည့်သွားခဲ့ပါတယ်။

#Asia_Business
Published 13 November 2025
#တရုတ် #အိန္ဒိယ #လေကြောင်းခရီးစဉ်
#YMG #Yangon_Times #Yangon_Media_Group

ရန်ကုန်နဲ့ ပုသိမ်ဆိပ်ကမ်းတွေကနေ ဘင်္ဂလားဒေ့ရှ်သို့ မြန်မာနိုင်ငံကနေ ထွက်ရှိတဲ့ ဆန်ဖြူတွေတင်ပို့သွားမယ်လို့ မြန်မာနိုင်ငံဆန်စပါးအသင်းချုပ် (MRF)ကနေသိရပါတယ်။

#Local_News
Published 13 November 2025
#ရန်ကုန် #ပုသိမ်ဆိပ်ကမ်း #ဘင်္ဂလားဒေ့ရှ်
#YMG/NN #Yangon_Times

မန္တလေး မြို့မအပျော်တမ်းတူရိယာအသင်း နှစ်(၁၀၀) ပြည့် အထိမ်းအမှတ်အခမ်းအနားကို ယခုလ(၂၇)ရက်မှာ မန္တလေးမြို့၊ရတနာပုံခန်းမမှာ ကျင်းပသွားမယ်လို့ သိရပါတယ်။

#Local_News
Published 13 November 2025
#မန္တလေးမြို့ #မြို့မအပျော်တမ်းတူရိယာအသင်း
#YMG/SW #Yangon_Times

၂၀၂၄ - ၂၀၂၅ ဘဏ္ဍာနှစ်မှာတညင်းကုန်းလက်ကားဈေးကြီးကို စီမံခန့်ခွဲနေတဲ့ မြန်မာအက်ဂရိုအိတ်(စ်)ချိန်း အများနှင့်သက်ဆိုင်သော ကုမ္ပဏီလီမိတက် (MAEX) က အသားတင်အမြတ်ငွေ ကျပ် ၇ ဘီလီယံနီးပါးရရှိခဲ့တယ်လို့ ၂၀၂၄-၂၀၂၅ နှစ်ပတ်လည်အစီရင်ခံစာမှာ ဖော်ပြထားပါတယ်။

#Local_News
Published 13 November 2025
#MAEX #တညင်းကုန်းလက်ကားဈေးကြီး
#YMG/NN #Yangon_Times

မြန်မာ-အိန္ဒိယ ဝါမျိုးစေ့တင်သွင်းမှုပူးပေါင်းဆောင်ရွက်နိုင်ရေး နားလည်မှုစာချွန်လွှာ (MoU) လက်မှတ်ရေးထိုးနိုင်ရေးအတွက် MoU (မူကြမ်း) ကို ပြုစုနေတယ်လို့ ယမန်နေ့က ပြုလုပ်တဲ့ မြန်မာနိုင်ငံသို့ အိန္ဒိယနိုင်ငံမှအရည်အသွေးမြင့် ဝါမျိုးစေ့တင်သွင်းနိုင်မှုအတွက် ဆက်လက်ပူးပေါင်းဆောင်ရွက်နိုင်ရန် တတိယအကြိမ်ညှိနှိုင်းအစည်းအဝေးမှသိရပါတယ်။

#Local_News
Published 13 November 2025
#ဝါမျိုးစေ့ #ဝါမျိုးစေ့
#YMG/SW #Yangon_Times