#DailyNews
Published - 25 Mar 2022

၁။ မြစ်ကြီးနားမြို့ပေါ်တွင် လုယက်မှုဖြစ်စဥ်တွေများပြားလာပြီး ဒေသခံများ စိုးရိမ်ထိတ်လန့် နေရ။

၂။ ကားမှတ်တိုင်များတွင် ရပ်သည့် Taxi နှင့် Light truck များကို အရေးယူရန်စီစဉ်။

၃။ နေ့စဉ်မိုးလေဝသသတင်း။

၄။ အစ်မဖြစ်သူ၏ စံချိန်ကိုချိုးဖျက်ပြီး အသက်အငယ်ဆုံး တစ်ကိုယ်တော်ကမ္ဘာပတ်ပျံသန်းသူဖြစ်လာရန် ရည်ရွယ်ထားသည့်ဆယ်ကျော်သက်လေယာဉ်မှူး......အစရှိတဲ့သတင်းတွေကို တင်ဆက်ပေးသွားမှာပဲဖြစ်ပါတယ်။

#Yangon_Media_Group

#LocalNews
Published - 25 March 2022

သင်္ကြန်ရုံးပိတ်ရက်ကာလအတွင်း YBS ယာဉ်လိုင်းများ ပြေးဆွဲသွားဖို့စီစဉ်နေတယ်လို့ ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေး ကြီးကြပ်မှုကော်မတီ (YRTC)က ကြေညာထားပါတယ်။

YBS ယာဉ်လိုင်းများအား သင်္ကြန်ရုံးပိတ်ရက်ကာလအတွင်း ပုံမှန်ထွက်ရှိတဲ့ယာဉ်လိုင်းနဲ့ ယာဉ်စီးရေအတိုင်းပြေးဆွဲဖို့နဲ့ အခက်အခဲရှိပါက ယာဉ်လိုင်းတစ်လိုင်းရှိ ယာဉ်အင်အားရဲ့ (၃) ပုံ (၁) ပုံထက်လျော့နည်းမှုမရှိစေဘဲ ပြေးဆွဲသွားဖို့ ညွှန်ကြားထားတယ်လို့ သိရပါတယ်။

ဒါ့အပြင် ယာဉ်စီးခကို သတ်မှတ်ယာဉ်စီးခထက် ပိုမကောက်ခံဖို့ကိုလည်း ယာဉ်လိုင်းကုမ္ပဏီများအား အသိပေးအကြောင်းကြားထားတယ်လို့ သိရပါတယ်။

အခုလက်ရှိ ရန်ကုန်တိုင်းတွင် ယခင်က ည ၈ နာရီအထိသာ ပြေးဆွဲခဲ့တဲ့ YBS ယာဉ်လိုင်းများကို ည (၁၀) နာရီအထိ တိုးချဲ့ပြေးဆွဲသွားမယ်လို့ ကြေညာထားပါတယ်။

ရန်ကုန်မှာ ညမထွက်ရအမိန့်ကို ယခင် ၁၀ နာရီကနေ အခု ည (၁၂) နာရီမှ နံနက် (၄) နာရီအထိ‌ ပြောင်းလဲပြင်ဆင်သတ်မှတ်လိုက်တဲ့အတွက် YBS ယာဉ်လိုင်းများ ညအချိန်ပြေးဆွဲချိန် ပြောင်းလဲသွားမယ်လို့ သိရပါတယ်။

ymg/ei
#Yangon_Media_Group

#WorldPolitics
Published - 25 March 2022

အမေရိကန်သမ္မတဟောင်း'ဒေါ်နယ်ထရမ့်'က ၂၀၁၆ အမေရိကန်သမ္မတရွေးကောက်ပွဲမှာ ပြိုင်ဘက်တွေဖြစ်ခဲ့တဲ့ 'ဟီလာရီကလင်တန်'နဲ့ အခြားဒီမိုကရက်တစ်နိုင်ငံရေးသမားများစွာကို ကြာသပတေးနေ့က တရားစွဲဆိုလိုက်ပါတယ်။

ရုရှားကို ထရမ့်သွားရောက်စည်းရုံးခဲ့တာကိုအကြောင်းပြပြီး ရွေးကောက်ပွဲမှာ နိုင်ငံရေးသမားတွေ လိမ်လည်ကြံစည်မှုတွေပြုလုပ်ခဲ့ကြတယ်လို့ 'ထရမ့်'ကစွပ်စွဲလိုက်တာဖြစ်ပါတယ်။

ထိုတရားစွဲဆိုချက်ထဲမှာ 'ထရမ့်'သမ္မတဖြစ်စဉ်ပထမဆုံးလေးနှစ်အတွင်း ထပ်ခါထပ်ခါထုတ်ပြန်ခဲ့တဲ့မကျေနပ်ချက်တွေ တသီတတန်းကြီးပါဝင်နေပါတယ်။

ဒါ့အပြင် ၂၀၂၀ ရွေးကောက်ပွဲမှာ ဒီမိုကရက်တစ်သမ္မတ'ဂျိုးဘိုင်ဒန်'ကိုအရေးနိမ့်ခဲ့ရာမှာလည်း လိမ်လည်ကြံစည်မှုကြီးကြောင့်လို့ အခိုင်အမာဆိုထားပါတယ်။

"တရားခံတွေက ရီပတ်ဘလစ်ကန်ပြိုင်ဘက်ဒေါ်နယ်ဂျေထရမ့်ဟာ ရန်ဘက်နိုင်ငံတစ်ခုနဲ့ပူးပေါင်းကြံစည်ခဲ့တယ်ဆိုတဲ့ မဟုတ်မမှန်သတင်းတွေကို မသမာတဲ့နည်းနဲ့ပူးပေါင်းလုပ်ကြံခဲ့ပါတယ်" လို့ သမ္မတဟောင်းက ၁၀၈ မျက်နှာပါတဲ့ အမှုစွပ်စွဲချက်ကြီးကို ဖလော်ရီဒါရှိ ဖက်ဒရယ်တရားရုံးမှာ လျှောက်တင်ခဲ့တာဖြစ်ပါတယ်။

သူတစ်ပါးအားထိခိုက်နစ်နာစေတဲ့ သတင်းမှားတွေကိုပူးပေါင်းကြံစည်ခြင်းနဲ့ မသမာမှုပြုလုပ်ခြင်းဆိုတဲ့အကြောင်းအရာတွေနဲ့ အဓိကတရားစွဲဆိုထားတာပါ။

ကလင်တန်ရဲ့ကိုယ်စားလှယ်တစ်ဦးကတော့ ဒီကိစ္စကိုမှတ်ချက်ပြုဖို့ ငြင်းဆန်သွားပါတယ်။
တရားစွဲဆိုမှုမှာ လျော်ကြေးနဲ့နစ်နာကြေးတွေတောင်းဆိုဖို့ ပါဝင်နေပါတယ်။

'ထရမ့်'က တရားရုံးကဆုံးဖြတ်တဲ့ကုန်ကျစရိတ်အတိုင်း ပေးဆောင်ရဖို့ရှိနေပြီး ဒေါ်လာ ၂၄ သန်းကျော်ကုန်ကျနိုင်တဲ့အပြင် တရားခုခံရေးစရိတ်၊ တရားဝင်အခကြေးစရိတ်၊ ဆက်စပ်ကုန်ကျစရိတ်များလည်း ပါဝင်လာနိုင်ပါတယ်။

မသမာမှုကိစ္စများကိုကိုင်တွယ်ရာမှာကျွမ်းကျင်တဲ့ ရှေ့နေ'ဂျက်ဖ်ဂရဲလ်'က 'ထရမ့်'အနေနဲ့ အချိန်အကြာကြီးနေမှ မသမာမှုကိုတိုင်ကြားတာဖြစ်လောက်တယ်လို့ ဆိုပါတယ်။
အရပ်ဘက်မသမာမှုတိုင်ကြားခြင်းတွေကို အချိန် ၄ နှစ်အတွင်းကိုင်တွယ်ဆုံးဖြတ်ခွင့်ရှိပါတယ်။

ဒါပေမဲ့ အဲဒီ ၄ နှစ်ဆိုတဲ့သက်တမ်းက ဘယ်အချိန်ကစပြီးသတ်မှတ်သလဲဆိုတာကတော့ အငြင်းပွားမှုရှိနေဆဲဖြစ်ပါတယ်။

တရားစွဲဆိုခံရသူတွေကတော့ တရားခုခံပိုင်ခွင့်အမျိုးမျိုးဖြင့် ပြန်လည်ချေပနိုင်ပေမယ့် အချိန်ကြာမြင့်စွာတရားစွဲဆိုပြီးမှသာ ဒီလိုခုခံချေပလေ့ရှိကြောင်း 'ဂရဲလ်'ကဆိုပါတယ်။
'ထရမ့်'တရားစွဲဆိုတဲ့သူတွေထဲမှာ ဗြိတိန်ထောက်လှမ်းရေးအရာရှိဟောင်း'ခရစ္စတိုဖာစတီးလ်'လည်း ပါဝင်နေပါတယ်။

၂၀၁၆ ခုနှစ်နိုဝင်ဘာလရွေးကောက်ပွဲမတိုင်ခင် 'စတီးလ်'ရေးသားဖော်ပြခဲ့တဲ့စာရွက်စာတမ်းဖော်ပြချက်ထဲမှာ 'ထရမ့်'ရဲ့ ရီပတ်ဘလစ်ကန်စည်းရုံးရေးအကြံပေးတွေနဲ့ ရုရှားတို့ဟာ ကလင်တန်ကိုအနိုင်ရဖို့ နောက်ကွယ်ကနေပူးပေါင်းကြံစည်ခဲ့ကြကြောင်း စွပ်စွဲရေးသားခဲ့ပါတယ်။

၂၀၂၀ ခုနှစ်က အမေရိကန်လွှတ်တော်ကော်မတီမှထုတ်ပြန်ခဲ့ရာမှာ ရုရှားတို့က ရီပတ်ဘလစ်ကန်နိုင်ငံရေးလှုပ်ရှားသူ'ပေါလ်မန်နာဖော့'နဲ့ WiKiLeaks ဝက်ဘ်ဆိုက်တို့ ကိုအသုံးချပြီး ၂၀၁၆ ရွေးကောက်ပွဲမှာ 'ထရမ့်'အနိုင်ရအောင် ကူညီပေးခဲ့ကြတယ်လို့ ဖော်ပြခဲ့ကြပါတယ်။
ရွေးကောက်ပွဲကိစ္စမှာ ရုရှားတို့ကပါဝင်ပတ်သက်ခဲ့တယ်ဆိုတဲ့သတင်းကို ရုရှားတို့ကငြင်းဆိုခဲ့ပါတယ်။

FBI ညွှန်ကြားရေးမှူးဟောင်း'ရောဘတ်မူလာ'က "ထရမ့်သမ္မတဖြစ်ရင် သူတို့ အတွက်အကျိုးရှိမယ်ဆိုတာကို ရုရှားတို့ ရိပ်မိခဲ့ပြီး ထရမ့်အနိုင်ရရှိအောင် လုပ်ပေးခဲ့ပါတယ်။ စည်းရုံးရေးအဖွဲ့ ကလည်း ရုရှားတို့ ကနေတဆင့် အချက်အလက်တွေရရှိပြီး ရွေးကောက်ပွဲမှာအနိုင်ရဖို့ မျှော်လင့်ခဲ့ကြတာဖြစ်ပါလိမ့်မယ်" လို့ သတင်းပို့ တင်ပြခဲ့ပါတယ်။
Source: Reuters

#LocalNews
Published - 25 March 2022

ဒီကနေ့ မတ်လ ၂၅ ရက်၊ မွန်းလွဲပိုင်းအချိန်က ရန်ကုန်တိုင်း၊ မရမ်းကုန်းမြို့နယ်၊ (၅)ရပ်ကွက်၊
အုတ်ပုံဆိပ်လမ်းတွင် ယာဉ်တိုက်မှုဖြစ်ပွားခဲ့ပြီး ယာဥ်မောင်းဖြစ်သူ ထိခိုက်ဒဏ်ရာရခဲ့သည့် ဖြစ်စဥ်တစ်ခု ဖြစ်ပွားခဲ့တယ်လို့ သိရပါတယ်။

"ယာဥ်မောင်းက ခါးပတ်ပတ်ထားပါတယ်။ ဒါပေမယ့် သူ့ခါးပတ်ကြိုးက လျော့လွန်းနေတော့ ခေါင်းထိသွားတာပေါ့။ ဒဏ်ရာက မစိုးရိမ်ရပါဘူး။"လို့ နယ်မြေခံလူမှုကယ်ဆယ်ရေးအဖွဲ့ မှ တာဝန်ရှိသူတစ်ဦးက ပြောပါတယ်။

အဆိုပါ ယာဥ်တိုက်မှုဖြစ်စဥ်အား မြန်မာနိုင်ငံမီးသတ်တပ်ဖွဲ့ဌာနချုပ် EMS တပ်ဖွဲ့ဝင်များမှ သူနာတင်ယာဉ်(၁)စီးဖြင့် ထွက်ခွာ၍ ထိခိုက်ဒဏ်ရာ(မစိုးရိမ်ရ) ရရှိသူ ယာဉ်မောင်းအား ရှေးဦးသူနာပြုစုနည်းများဖြင့် ကုသပေးခဲ့တယ်လို့လည်း မီးသတ်တပ်ဖွဲ့က သတင်းထုတ်ပြန်ထားပါတယ်။

Photo - MFSD

ymg/kg
#Yangon_Media_Group

#LocalNews
Published_25 March 2022

မြန်မာနိုင်ငံနှင့် ဥရောပအာရှစီးပွားရေးသမဂ္ဂ (Eurasian Economic Union – EAEU) တို့အကြား စီးပွားရေးပူးပေါင်းဆောင်ရွက်မှုများ မြှင့်တင်နိုင်ရေး နှစ်ဖက်ပူးပေါင်းဆောင်ရွက်မှု စာချွန်လွှာ (Memorandum of Cooperation) ကို နောက်သုံးလခန့်ကာလအတွင်း လက်မှတ်ရေးထိုးနိုင်မည်ဖြစ်ကြောင်း ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာနက သိရသည်။

"ဒီကိစ္စက မကြာဘူး၊သူတို့က အမြန်ဆုံးလုပ်မယ်။လက်မှတ်က လာမယ့် ၃ လ လောက် ဆိုရင် ထိုးဖြစ်ဖို့များတယ်။ဒါက ကောင်းတဲ့အခွင့်အရေးပါပဲ"ဟု ရင်းနှီးမြှုပ်နှံမှုနှင့် နိုင်ငံခြားစီးပွားဆက်သွယ်ရေးဝန်ကြီးဌာန ၏ အရာထမ်းတစ်ဦးက YMG ကို ပြောသည်။

ယင်းစာချွန်လွှာတွင် ကုန်သွယ်မှုနှင့် ရင်းနှီးမြှုပ်နှံမှု၊ လျှပ်စစ်နှင့်စွမ်းအင်၊ စိုက်ပျိုးရေးနှင့်မွေးမြူရေး၊ သတ္တုကဏ္ဍ၊ အခြေခံ အဆောက်အဦ၊ သတင်းအချက်အလက်နှင့် ပို့ဆောင်ဆက်သွယ်ရေးနည်းပညာ၊ စက်မှုကဏ္ဍ၊ ဘဏ္ဍာရေးကဏ္ဍ ပူးပေါင်းဆောင်ရွက်မှုတို့နှင့်ပတ်သက်၍ ပူးပေါင်းဆောင်ရွက်ရန် လက်မှတ်ရေးထိုးနိုင်မည်ဖြစ်ကြောင်း သိရသည်။

မတ်လ ၂၄ ရက်က နေပြည်တော်ရှိ Park Royal Hotel ၌ မြန်မာနိုင်ငံနှင့် ဥရောပအာရှစီးပွားရေးသမဂ္ဂ(Eurasian Economic Union – EAEU)တို့အကြား ရင်းနှီးမြှုပ်နှံမှုနှင့် ကုန်သွယ်မှု မြှင့်တင်ဆောင်ရွက်သွားနိုင်ရန် ရည်ရွယ်၍ နှစ်ဖက်အစိုးရအဖွဲ့အစည်းများနှင့် စီးပွားရေး လုပ်ငန်းရှင်များပါဝင်သော ဆွေးနွေးပွဲကိုလည်း ကျင်းပခဲ့ကြသေးသည်။

EAEU အဖွဲ့ဝင်နိုင်ငံများအနက် ရုရှားဖက်ဒရေးရှင်းနိုင်ငံ၊ ဘယ်လာရုစ်နိုင်ငံတို့နှင့် နှစ်နိုင်ငံရင်းနှီးမြှုပ်နှံမှု တိုးမြှင့်ရေးနှင့် အကာအကွယ်ပေးရေး စာချုပ်ချုပ်ဆိုနိုင်ရေး ဆောင်ရွက်နေကြောင်းနှင့် ကုန်သွယ်မှုနှင့် ရင်းနှီးမြှုပ်နှံမှု ကဏ္ဍများတွင်လည်း မဟာဗျူဟာမြောက် ပူးပေါင်းဆောင်ရွက်ရန် ညှိနှိင်းဆောင်ရွက်လျက်ရှိကြောင်း အဆိုပါအစည်းအဝေးတွင် နိုင်ငံခြားစီးပွားဆက်သွယ်ရေးဝန်ကြီးဌာန၊ ပြည်ထောင်စုဝန်ကြီး ဦးအောင်နိုင်ဦး ကပြောကြားခဲ့သည်။

ဥရောပအာရှစီးပွားရေး သမဂ္ဂ (EAEU) အဖွဲ့အစည်းသည် ၂၀၀၁ ခုနှစ်တွင် Eurasian Economic Community (EAEC) အမည်ဖြင့် စတင်ဖွဲ့စည်းခဲ့ဖြစ်ပြီး ၂၀၁၅ ခုနှစ်တွင် Eurasian Economic Union (EAEU) အမည်အသစ်ဖြင့် အသင်းအဖွဲ့၏ လုပ်ငန်းစဉ်များကို ထဲထဲဝင်ဝင် ပိုမိုတိုးမြှင့်ဆောင်ရွက်လာခဲ့သည့် အဖွဲ့အစည်းတစ်ခု ဖြစ်သည်။

EAEU အဖွဲ့အစည်း၏ တရားဝင်ပြဌာန်းထားသည့် သင်းဖွဲ့လုပ်ငန်းစည်းမျဉ်းများအရ အဖွဲ့ဝင်နိုင်ငံများအကြား ပူးပေါင်းကာ တစ်နိုင်ငံနှင့်တစ်နိုင်ငံ ကုန်စည်၊ ဝန်ဆောင်မှု၊ အရင်းအနှီးနှင့် လုပ်သားအင်အားတို့ကို လွတ်လပ်စွာ ကူးလူးဆက်သွယ်ခွင့်ရှိကြောင်း ဖော်ပြထားသည် သာမက အဖွဲ့ဝင်နိုင်ငံများအနေဖြင့် စီးပွားရေးကဏ္ဍ နယ်ပယ်အသီးသီးတွင် မူဝါဒနှင့် လုပ်ငန်းစဉ်များကိုလည်း ညှိနှိုင်းပုံဖော်ဆောင်ရွက်လျက်ရှိကြောင်း သိရသည်။

ယခုအခါ EAEU အဖွဲ့ဝင်အဖြစ် အာမေးနီးယားနိုင်ငံ၊ ဘီလာရုစ်နိုင်ငံ၊ ကာဇက်စတန်နိုင်ငံ၊ ကာဂျစ္စတန်နိုင်ငံ နှင့် ရုရှားနိုင်ငံ စုစုပေါင်း ၅ နိုင်ငံရှိပြီး ကျူးဘားနိုင်ငံ၊ မွန်ဂိုလီးလားနိုင်ငံ နှင့် ဥဇဘက်ကစ္စတန်နိုင်ငံတို့အနေဖြင့် စောင့်ကြည့်လေ့လာသူနိုင်ငံများအဖြစ် ရှိနေကြသည့်အပြင် ဗီယက်နမ်နိုင်ငံ၊ ဆားဗီးယားနိုင်ငံနှင့် စင်္ကာပူနိုင်ငံတို့အနေဖြင့် EAEU နှင့် Free Trade Zone အဖြစ်ပါဝင်နိုင်ရေး သဘောတူညီချက်စာချုပ်ကို လက်မှတ်ရေးထိုးထားကြကြောင်းလည်း သိရသည်။

EAEU သည် အာဆီယံနှင့်လည်း စီးပွားရေးပူးပေါင်းဆောင်ရွက်မှုများ လုပ်ဆောင်လျက်ရှိကြောင်း၊ ဗီယက်နမ်နိုင်ငံနှင့် စင်္ကာပူနိုင်ငံပြီးလျှင် အာဆီယံအဖွဲ့ဝင်နိုင်ငံများဖြစ်သော အင်ဒိုနီးရှားနိုင်ငံ၊ ကမ္ဘောဒီးယားနိုင်ငံ နှင့် လာအိုနိုင်ငံတို့ကလည်း EAEU နှင့် ပူးပေါင်းဆောင်ရွက်ရန် ဆန္ဒရှိကြောင်း ထုတ်ဖော်ပြောကြားထားသည်။

ymg/mt
#Yanggon_Media_Group

#LocalNews
Published_25 March 2022

မြန်မာနိုင်ငံတွင် တစ်နှစ်ကျော်အတွင်း ဘဏ်ဓားပြတိုက်မှု ၁၈ ကြိမ်ဖြစ်ပွားပြီး တန်ဖိုးငွေကျပ် ၁၃ ဒသမ ၅ ဘီလီယံကျော် ဆုံးရှုံးခဲ့ရကြောင်း နေပြည်တော်၌ပြုလုပ်သည့် နစက သတင်းစာရှင်းလင်းပွဲတွင် သတင်းပြန်ကြားရေး တာဝန်ရှိသူ ဗိုလ်ချုပ်ဇော်မင်းထွန်းက ပြောသည်။

ယင်းမှာ ပြီးခဲ့သည့် ၂၀၂၁ ခုနှစ်၊ ဖေဖော်ဝါရီလ ၁ ရက်မှ ၂၀၂၂ ခုနှစ် မတ်လ ၁၃ ရက်ထိ စာရင်းဖြစ်ကြောင်း ၊ ကမ္ဘောဇဘဏ် ၄ ကြိမ်၊ ကမ္ဘာ့ရတနာဘဏ် ၃ ကြိမ်၊ မြန်မာ့စီးပွားရေးဘဏ် ၂ ကြိမ်၊ ဧရာဝတီဘဏ် ၂ ကြိမ်၊ CB ဘဏ် ၃ ကြိမ်၊ UAB ဘဏ် ၂ ကြိမ်၊ မြန်မာ့ရှေ့ဆောင်ဘဏ် ၁ ကြိမ်နှင့် AGD ဘဏ် ၁ ကြိမ်တို့ဖြစ်ကြောင်း သိရသည်။

ဘဏ်ကို ဓားပြတိုက်သည့် ဖြစ်စဉ်တွင် တရားခံ ၉၇ ဦးဖမ်းမိခဲ့ကြောင်း၊ ရန်ကုန်တိုင်းဒေသကြီးတွင် ၈ ကြိမ်၊ ပဲခူးတိုင်းဒေသကြီးတွင် ၄ ကြိမ်၊ ရှမ်းပြည်နယ်တွင် ၂ ကြိမ်၊ မန္တလေးတိုင်းဒေသကြီးတွင် ၁ ကြိမ်၊ မွန်ပြည်နယ်တွင် ၁ ကြိမ်၊ ချင်းပြည်နယ်တွင် ၁ ကြိမ်နှင့် ကရင်ပြည်နယ်တွင် ၁ ကြိမ် စုစုပေါင်း ၁၈ ကြိမ်ဖြစ်ပွားခဲ့ကြောင်း သတင်းစာရှင်းလင်းပွဲ ၏ စာရင်းများအရ သိရသည်။

ymg/mt
#Yangon_Media_Group

#WorldHealth
Published - 25 March 2022

ကလေးငယ်တွေကို အချိန်ကြာမြင့်စွာ တီဗီပေးကြည့်ခြင်း ဂိမ်းပေးကစားခြင်းများက သူတို့ရဲ့ပြုမူပြောဆိုပုံတွေကို ဆိုးရွားလာစေနိုင်ကြောင်း သုတေသီတို့ က ယူဆထားကြပါတယ်။

အချိန်ကြာမြင့်စွာတီဗီကြည့်ဂိမ်းကစားခြင်းက ကလေးတွေကို ဆိုးကျိုးသက်ရောက်စေသလားဆိုတာကို အလုံးစုံသဘောတူလက်ခံခြင်းတော့မရှိသေးဘူးလို့ ကနေဒါပညာသင်ကြား ပို့ချရေးကျွမ်းကျင်သူများက ဆိုပါတယ်။

အရင်ကပြုလုပ်ခဲ့တဲ့ စမ်းသပ်လေ့လာမှု ၈၇ ခုကိုပြန်လည်သုံးသပ်ရာမှာတော့ ကလေးတွေအပြုအမူဆိုးရွားလာနိုင်တယ်ဆိုတာကို ငြင်းဆန်လိုက်ကြပါတယ်။

အချိန်ကြာကြာတီဗီကြည့်ဂိမ်းကစားတတ်တဲ့ ကလေးတွေမှာ အတွင်းစိတ်ပြဿနာများဖြစ်တဲ့ စိုးရိမ်ကြောင့်ကြခြင်း၊ စိတ်ဓာတ်ကျခြင်းများ ဖြစ်ပေါ်နိုင်တယ်လို့ သုံးသပ်ရရှိခဲ့ပါတယ်။
အပြင်ပန်းသဏ္ဍာန်မူမမှန်ခြင်းတွေဖြစ်တဲ့ ရန်လိုခြင်း၊ အလေးမထားတတ်ခြင်းတို့ လည်း ဖြစ်ပေါ်နိုင်ပါတယ်။

ဘယ်လောက်အထိ ဆိုးကျိုးသက်ရောက်နိုင်သလဲဆိုတာကို အတိအကျမပြောနိုင်သလို ကလေးတွေကို တီဗီကြည့်ချိန်ဘယ်လောက်သတ်မှတ်ပေးသင့်လဲဆိုတာကိုလည်း မဖော်ပြခဲ့ပါဘူး။

ဒေါက်တာ'ရှယ်ရီမက်ဒီဂန်'နဲ့အဖွဲ့ ကတော့ ဒီလိုပြုမူပြောဆိုပုံမူမမှန်တာတွေဟာ တီဗီကြည့်ချိန်များခြင်းကြောင့်မဟုတ်ဘူးလို့ မှတ်ချက်ပြုထားပါတယ်။

သို့ ပေမယ့် ကလေးတွေအတွက် ကြမ်းတမ်းမသင့်လျော်တဲ့အရာတွေကို ကြည့်ရှုခြင်းက ရန်လိုတဲ့အပြုအမူဖြစ်ပေါ်လာနိုင်ပြီး လူမှုဆက်ဆံရေးနည်းပါးခြင်း၊ အိပ်ရေးပျက်ခြင်းတို့က စိုးရိမ်ကြောင့်ကြခြင်းနဲ့ စိတ်ဓာတ်ကျခြင်းတို့ ကို ဖြစ်ပေါ်စေနိုင်ပါတယ်။

ယူကေမှ အသက် ၅ နှစ်မှ ၁၆ နှစ်ကြားကလေးတွေဟာ တစ်နေ့ကို တီဗီကြည့်ဂိမ်းကစားချိန် ပျမ်းမျှ ၆.၃ နာရီအထိရှိကြောင်း NHS က ဖော်ပြထားပါတယ်။

အသက် ၂ နှစ်အောက်ကလေးတွေအနေနဲ့ လုံးဝမကြည့်ရှုသင့်ကြောင်း၊ အသက် ၂ နှစ်မှ ၅ နှစ်ကြားကလေးတွေအနေနဲ့ တစ်နေ့ကို တစ်နာရီထက်ပိုပြီး မကြည့်ရှုသင့်ကြောင်း အကြံပြုထားပါတယ်။

အောက်စ်ဖို့ ဒ်အင်တာနက်တက္ကသိုလ်မှ သုတေသနညွှန်ကြားရေးမှူးနဲ့ စိတ်ကျန်းမာရေးအထူးကု ပရော်ဖက်ဆာ'အန်ဒရူးပါဇီဘယ်စကီ'က ပညာရေးကျွမ်းကျင်သူများပြောကြားခဲ့တဲ့ အချက်အလက်တွေဟာ မှန်ကန်ခြင်းမရှိဘူးလို့ ထောက်ပြလိုက်ပါတယ်။

ကလေးတွေရဲ့စိတ်ကျန်းမာရေးအခြေအနေ ၉၉ ရာခိုင်နှုန်းကျော်က တီဗီကြည့်ဂိမ်းကစားခြင်းနဲ့ သက်ဆိုင်မှုမရှိကြောင်း ပရော်ဖက်ဆာကပြောကြားလိုက်ပါတယ်။

အချိန်ကြာမြင့်စွာတီဗီကြည့်ဂိမ်းကစားခြင်းက အဓိကပြဿနာမဟုတ်ဘဲ ကလေးတွေအတွက် မသင့်လျော်တဲ့အကြောင်းအရာတွေကသာ ဒီလိုပြဿနာတွေဖြစ်ပေါ်စေတာဖြစ်ပါတယ်။

ကလေးတွေက တီဗီနဲ့ဖုန်းတွေကနေ ပညာသင်ကြားလေ့လာခြင်းတွေ ဖျော်ဖြေရေးအပိုင်းတွေကြည့်ရှုနိုင်ပါတယ်။

သုတေသနအဖွဲ့ ကတော့ အချိန်ကြာမြင့်စွာတီဗီကြည့်ဂိမ်းကစားခြင်းနဲ့ အပြင်ပန်းပြုမူနေထိုင်ပုံတွေကြားဆက်စပ်နေမှုက ယောကျ်ားလေးတွေမှာ ပိုအဖြစ်များကြောင်း ထောက်ပြသွားပါတယ်။
Source: Daily Mail

#WorldHealth
Published - 25 March 2022
မိုဒါနာကိုဗစ်ကာကွယ်ဆေးနောက်ဆုံးအဆင့်စမ်းသပ်ချက်များအရ မိုဒါနာကိုဗစ်ကာကွယ်ဆေးဟာ အသက် ၆ နှစ်အောက်ကလေးငယ်တွေမှာ ရောဂါခုခံအားကိုမြှင့်တင်ပေးပြီး အိုမီခရွန်ကူးစက်မှုကို ထိရောက်စွာကာကွယ်နိုင်ကြောင်း မိုဒါနာကုမ္ပဏီကပြောကြားလိုက်ပါတယ်။

ကလေးငယ်လေးတွေတွက် ကိုဗစ်ကာကွယ်ဆေးထိုးဖို့ လိုအပ်နေတဲ့အပြင် စမ်းသပ်ရရှိလာတဲ့ရလာဒ်တွေကလည်း ကောင်းမွန်တာကြောင့် မိုဒါနာက အမေရိကန်နဲ့နိုင်ငံရပ်ခြားမှ တာဝန်ရှိသူများထံ တတ်နိုင်သမျှအမြန်ဆုံးတင်ပြသွားမှာဖြစ်ပါတယ်။

တာဝန်ရှိသူများနဲ့ညှိနှိုင်းတိုင်ပင်ပြီးနောက် အမေရိကန်ရှိ အသက် ၆ နှစ်မှ ၁၁ နှစ်ကြားကလေးတွေမှာလည်း အသိအမှတ်ပြုထိုးနှံခွင့်ရဖို့ တောင်းဆိုသွားမှာဖြစ်ပါတယ်။

ဖိုင်ဇာနဲ့ဘိုင်အိုတက်ခ်မှ ကလေးငယ်များထိုးနှံရမယ့်ကာကွယ်ဆေးဟာ လုံလောက်တဲ့ထိရောက်မှုမရှိဘူးလို့ ပြီးခဲ့တဲ့လက တွေ့ရှိခဲ့ကြပါတယ်။ မိုဒါနာရဲ့စမ်းသပ်မှုမှာတော့ အသက် ၆ လမှ ၅ နှစ်ကြားကလေးငယ် ၇,၀၀၀ ထောင်နီးပါးကို လူကြီးထိုးနှံရတဲ့ဆေးပမာဏရဲ့ ၄ ပုံ ၁ ပုံဖြစ်တဲ့ ၂၅ မိုက်ခရိုဂရမ် နှစ်ကြိမ်စီထိုးပေးခဲ့တာဖြစ်ပါတယ်။

ထိုကဲ့သို့ထိုးနှံခြင်းက အရွယ်ရောက်ပြီးသူတွေကိုစမ်းသပ်ပြီး ရရှိခဲ့တဲ့ရလာဒ်တွေအတိုင်း ပဋိပစ္စည်း(antibody)ထွက်ရှိမှုမြင့်မားနေခဲ့ပါတယ်။

အိုမီခရွန်ကူးစက်မှုလွှမ်းမိုးနေတဲ့ကာလမှာလည်း မိုဒါနာကာကွယ်ဆေးက ကိုဗစ်ရောဂါကိုထိရောက်စွာကာကွယ်ပေးနိုင်ကြောင်း ကုမ္ပဏီကပြောကြားလိုက်ပါတယ်။

အသက် ၆ လမှ ၂ နှစ်ကြားကလေးငယ်တွေမှာ ၄၃.၇ ရာခိုင်နှုန်းကာကွယ်ပေးနိုင်ပြီး အသက် ၂ နှစ်မှ ၅ နှစ်ကြားကလေးတွေမှာတော့ ၃၇.၅ ရာခိုင်နှုန်းကာကွယ်ပေးနိုင်ပါတယ်။
ကလေးငယ်တွေမှာ မိုဒါနာကာကွယ်ဆေးရဲ့ကာကွယ်နိုင်စွမ်းက အိုမီခရွန်ကူးစက်မှုကာလအတွင်း အရွယ်ရောက်ပြီးသူတွေမှာ ကာကွယ်ဆေးနှစ်ကြိမ်ထိုးပြီးလို့ ရရှိတဲ့ကာကွယ်နိုင်စွမ်းအတိုင်း တည်ရှိနေပါတယ်။

ယခုစမ်းသပ်မှုမှာ ဘေးထွက်ဆိုးကျိုးပြဿနာတွေ မတွေ့ရဘူးလို့ ဖော်ပြထားပါတယ်။
မိုဒါနာလို mRNA ကာကွယ်ဆေးကို ဆယ်ကျော်သက်ကလေးတွေမှာစမ်းသပ်ထိုးနှံစဉ်က နှလုံးကြွက်သားရောင်ရမ်းခြင်းမျိုး ရှားပါးလက္ခဏာတွေ တွေ့ခဲ့ရပေမယ့် အသက်အရွယ်ငယ်သေးတဲ့ကလေးတွေမှာတော့ အဲဒီလိုဘေးထွက်ဆိုးကျိုးတွေ မတွေ့ရပါဘူး။

အသက်အငယ်ဆုံးကလေးတွေ ၁၇ ရာခိုင်နှုန်းလောက်က အဖျားဝေဒနာခံစားကြရပြီး အဲဒီထက်အနည်းငယ် အသက်ပိုကြီးတဲ့ကလေးတွေမှာတော့ ၁၅ ရာခိုင်နှုန်းခန့်က အဖျားဝေဒနာပေါ်ပေါက်ခဲ့ပါတယ်။

အသက် ၆ နှစ်အောက်ကလေးအရွယ်တွေရဲ့ မိဘတွေအတွက်တော့ ဒါဟာသတင်းကောင်းဖြစ်ကြောင်း အမှုဆောင်အရာရှိချုပ်'စတက်ဖနီဘန်ဆယ်'က ထုတ်ဖော်ပြောကြားလိုက်ပါတယ်။

ကလေးအရွယ်အားလုံးမှာ အားမြှင့်ကာကွယ်ဆေး(booster)ရဲ့ ထိရောက်နိုင်စွမ်းကိုလည်း မိုဒါနာက လေ့လာသွားဖို့ ပြင်ဆင်နေပါတယ်။
Source: Bloomberg

#LocalNews
Published_24 March 2022

ရခိုင်ပြည်နယ် စစ်တွေမြို့မှာဖွင့်လှစ်ထားတဲ့ အလုပ်သမားရေးရာကူညီပံ့ပိုးရေးစင်တာကနေ အများပြည်သူကို ဥပဒေအမြင်ဖွင့်သင်တန်းတွေ ပို့ချနေပါတယ်။

#Yangon_Media_Group

Published 24 March 2022

တရုတ်ပြည်တွင်းထုတ် J-10C ဂျက်တိုက်လေယာဉ်တွေဟာ မတ်လ(၂၄)ရက်မှာ ပါကစ္စတန်နိုင်ငံ မြို့တော် အစ္စလမ်မာဘတ်မှာ  ကျင်းပတဲ့ ၈၂ကြိမ်မြောက် ပါကစ္စတန်နေ့ စစ်ရေးပြအခမ်းအနားမှာ ပါှဝင်ပျံသန်းပြသခဲ့ပါတယ်။

အဲဒီစစ်ရေးပြအခမ်းအနားမှာ စစ်လက်နက်ကိရိယာတွေနှင့် အလှပြယာဉ်တွေကနေ  စစ်အင်အားနှင့် ယဉ်ကျေးမှုတို့ကို ပြသတာဖြစ်ပါတယ်။

စစ်ရေးပြအခမ်းအနားကို ပါကစ္စတန်ဝန်ကြီးချုပ် အာမန်ခန်၊သမ္မတ အာရစ်အယ်လ်ဗီနှင့် စစ်တပ်ခေါင်းဆောင်တွေ တက်ရောက်ခဲ့ကြပါတယ်။

သူတို့အပြင် ပါကစ္စတန်မှာ OIC အစ္စလမ်မစ်ပူးပေါင်းဆောင်ရွက်ရေး အဖွဲ့ရဲ့ နိုင်ငံခြားရေးဝန်ကြီးများကောင်စီ ၄၈ကြိမ်မြောက် အစည်းအဝေး  တက်ရောက်လာကြတဲ့ နိုင်ငံပေါင်း၅၇နိုင်ငံက ကိုယ်စားလှယ်တွေကိုလည်း ဖိတ်ကြားတဲ့ အတွက် တက်ရောက်လာကြပါတယ်။

အဲဒီစစ်ရေးပြအခမ်းအနားမှာ စစ်ရေးစွမ်းရည်ပြသကြတဲ့အထဲမှာ တရုတ်ပြည်တွင်းထုတ် J-10C  တိုက်လေယာဉ်တွေကို ထည့်သွင်း ပျံသန်းပြသခဲ့တာဖြစ်ပါတယ်။ အခမ်းအနားတက်ရောက်လာတဲ့ ဇာကစ်အယ်လ်အိုင်ဂျက်စ်က “အခုမှ ပထမမဆုံး တရုတ်တိုက်လေယာဉ်တွေမြင်ဖူးတာဖြစ်တယ်လို့ပြောပါတယ်။ သူမရဲ့သမီးကတော့ တရုတ်နှင့် ပါကစ္စတန်နိုင်ငံဟာ အလွန်ရင်းနှီးတဲ့မိတ်ဆွေတွေဖြစ်တယ်လို့ ပြောပါတယ်။

Source CMG

#LocalNews
Published_24 March 2022

ဇေကမ္ဘာကုမ္ပဏီ ဥက္ကဌလည်း ဖြစ် ၊ ဇေကမ္ဘာ ရှေးဟောင်းပြတိုက်ပိုင်ရှင်လည်းဖြစ်သည့် ဦးခင်ရွှေနှင့်သားဖြစ်သူ ဦးဇေသီဟတို့အား ၂၀၁၅ ခုနှစ် ရှေးဟောင်းအဆောက်အအုံများကာကွယ်ထိန်းသိမ်းရေးဥပဒေပုဒ်မ - ၂၄ ဖြင့် အမှုဖွင့်ပြီး အင်းစိန်အကျဉ်းထောင်သို့ ပို့ဆောင်ထားခြင်းဖြစ်သည်။

#Yangon_Media_Group

#LocalNews
Published_24 March 2022

ရန်ကုန်တိုင်းဒေသကြီးအတွင်းရှိ မြို့နယ်များတွင်သတ်မှတ်ထားသော ညမထွက်ရအမိန့် (curfew) ကို ညသန်းခေါင် ၁၂ နာရီမှ နံနက် ၄ နာရီ အဖြစ်ပြောင်းလဲ သတ်မှတ်လိုက်ပြီးနောက် YBS ယာဉ်များနောက်ဆုံးထား ပြေးဆွဲချိန်ကို ည ၁၀ နာရီထိ သတ်မှတ်လိုက်ကြောင်း ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေး ကြီးကြပ်မှုကော်မတီ(YRTC) က သိရသည်။

ယခင် ညမထွက်ရ အမိန့်ကို ည (၁၀) နာရီ မှ နံနက် (၄) နာရီထိ သတ်မှတ်ခဲ့စဉ် YBS ယာဉ်များ နောက်ဆုံးပြေးဆွဲချိန်မှာ ည ၈ နာရီထိ သတ်မှတ်ရာမှ ယခုကဲ့သို့ ပြောင်းလဲလိုက်ခြင်းဖြစ်သည်။

"ညမထွက်ရအမိန့်က ည ၁၂ ကနေ မနက် ၄ အထိ ဖြစ်သွားတဲ့အတွက် ခရီးသွားပြည်သူလူထုတွေအဆင်ပြေစေဖို့ ည ၁၀ နာရီ အထိလောက် နောက်ဆုံးပြေးဆွဲပေးဖို့ အကြောင်းကြားထားတယ်"ဟု ရန်ကုန်တိုင်းဒေသကြီး ပုဂ္ဂလိကသယ်ယူပို့ဆောင်ရေးကြီးကြပ်မှုကော်မတီ(YRTC) ၏ တွဲဖက်အတွင်းရေးမှူး ဦးလျန်ကျင့်မန် က YMG ကို ပြောသည်။

YRTC ၏ စာရင်းများအရ ယခုအခါ လက်ရှိတွင် YBS ပြေးဆွဲလမ်းကြောင်း ၁၂၅ လမ်းကြောင်း ကျော်၊ ယာဉ်စီးရေ ၃,၅၀၀ ကျော်တို့ဖြင့် နေ့စဉ်ခရီးသည် ၇ သိန်းကျော်ပို့ဆောင်ပေးနေကြောင်း၊ ယခင်က YBS စီးနင်းသူ တစ်နေ့လျှင် ၁ ဒသမ ၈ သန်းထိရှိခဲ့သော်လည်း COVID-19 ကြောင့် စီးနင်းသူ ၉၀ ရာခိုင်နှုန်းထိကျဆင်းခဲ့ရာမှ တစ်ဖြည်းဖြည်းပြန်လည်မြင့်တက်လာခဲ့ခြင်း ဖြစ်ကြောင်း သိရသည်။

ymg/mt
#Yangon_Media_Group