#LocalNews
Published - 3 Feb 2022

ပြီးခဲ့တဲ့ လပိုင်း အတွင်းက ချင်းပြည်နယ်မှ စစ်ဘေးရှောင်လာသည့် လူဦး ရေ ၃၀၀ ကျော်အား ကလေးမြို့ ပေါ် တွင် လက်ခံစောင့်ရှောက်ပေးထားရာမှ ယခုဖေဖော်ဝါရီ လဆန်းပိုင်းမှာတော့ ကလေးမြို့ပေါ်တွင် ခိုလှုံနေကြသည့် ချင်းစစ်ဘေး ရှောင်အချို့ နေရပ်ပြန်သွားကြပြီဖြစ်တယ်လို့ စစ်ဘေးရှောင်အရေးကိစ္စရပ်များအား ကူညီဆောင်ရွက်နေသူများထံမှ သိရပါတယ်။

ပြီးခဲ့တဲ့ ဇန်နဝါရီလဆန်းပိုင်းမှစလို့ ချင်းပြည်နယ်ဘက်ရှိ နတ်ချောင်း၊ ချောင်းခွ၊ ဟားခါးလေး၊ ရေစို၊ ဝေဘူလ အစရှိသည့် ကျေးရွာများမှ ဒေသခံတိုင်းရင်းသား စစ်ဘေးရှောင်ပြည်သူ ၃၀၀ ခန့်က ကလေးမြို့ ပေါ်သို့ ရောက်ရှိခိုလှုံလာခဲ့ကြတာဖြစ်ပါတယ်။

"လက်ရှိ မြို့ပေါ်မှာ စစ်ရှောင်ပြည်သူတွေက၁၀၀ ဝန်းကျင်လောက်ကျန်ပါသေးတယ်။ ထပ်တိုးလာတာကသိပ်မရှိပါဘူး။ တချို့ တွေလည်း သူတို့ နေရပ်ကို ပြန်သွားကြတယ်။ သူတို့ရွာ ကိုပြန်တာတော့ မဟုတ်ဘူး ပေါ့။ ရွာအနီးအနားတွေမှာသွားနေကြတာ ပေါ့။ တစ်ဝက် လောက်က ပြန်သွားကြပြီ။ ဒါပေမဲ့ ပြောရရင် နယ်မြေဒေသ အခြေအနေက အဲ့လောက်ကြီး လည်း မကောင်း သေးပါဘူး။ သူတို့ ပြောပြပုံအရဆိုရင် နေ့လည်ပိုင်း ဆိုရင်သွားလို့ရတယ်။ ညတော့ အိပ်လိုမရသေးဘူး ပေါ့။ တိုက်ပွဲတွေက ကြိုကြား ကြိုကြားရှိနေပါသေးတယ်။"လို့ ပုညကုသလ လူမှုကူညီ ရေးအဖွဲ့ မှ တာဝန်ရှိသူတစ်ဦးက ပြောပြခဲ့ပါတယ်။

က လေးမြို့ ပေါ်သို့ ခိုလှုံလာကြသည့် စစ်ဘေးရှောင်ပြည်သူတွေထဲမှာ ချင်းပြည်နယ် တောင်ပိုင်းဘက်က လာခဲ့ကြသူ တွေပိုများတယ်လို့ ကလေးမြို့ ဒေသခံတွေကဆိုပါတယ်။

"လက်ရှိ တော့ ဘာမှလိုအပ်ချက်မရှိသေးပါဘူး။စားနပ်ရိက္ခာလိုအပ်မှုလည်းမရှိသေးပါဘူး။ ဆန်၊ ဆီ၊ ဆား လည်းအပြည့်အစုံရှိပါတယ်။ မြို့ခံ တွေကလည်းစစ်ဘေး ရှောင်ပြည်သူတွေ အတွက် ဝိုင်းဝန်းလှူဒါန်းပေးကြပါတယ်။"လို့ ၎င်းက ဆက်လက် ပြောပြခဲ့ပါတယ်။

ဒါ့အပြင် နေရပ်မပြန်နိုင်သေးဘဲ ကျန်ရှိနေသည့် ချင်းပြည်နယ်မှ စစ်ဘေးရှောင်ပြည်သူ တွေကို ကလေးမြို့ ရှိ လူမှု ကူညီရေးအသင်းအဖွဲ့ တွေနဲ့ မြို့ခံတွေက ဆက်လက်၍ စောင့်ရှောက်ကူညီထားတယ်လို့လည်း မြို့ခံ လူမှုကူညီရေးအဖွဲ့ တွေ ကဆိုပါတယ်။

ဓါတ်ပုံ - ပုညကုသလအသင်း(ကလေးမြို့)

ymg/kg
#Yangon_Media_Group

#LocalNews
Published - 3 Feb 2022

ရှမ်းနှင့် ကချင်ပြည်နယ်ရှိ စစ်ဘေးရှောင်ပြည်သူတွေကို လှူဒါန်းနိုင်ဖို့ အောင်လအင်န်ဆန်း၏ ဘောင်းဘီနှင့် လက်အိတ်များကို လေလံတင် ရောင်းချသွားမှာ ဖြစ်တယ်လို့ Kachin Alliance(ကချင်မဟာမိတ်အဖွဲ့ )က ထုတ်ပြန်ထားပါတယ်။

အဆိုပါ လေလံကို ဇန်နဝါရီလ ၂၄ ရက်မှစတင်ခဲ့ခြင်းဖြစ်ပြီး ဖေဖော်ဝါရီလ ၅ ရက်တွင် လေလံရက်ကုန်ဆုံးမှာ ဖြစ်တယ်လို့ သိရပါတယ်။

လေလံပွဲမှ ရရှိလာမည့် အလှူငွေများကို ကချင်ပြည်နယ်နှင့် ရှမ်းပြည်နယ်တို့မှ အရေးပေါ်လိုအပ်နေသည့် နေရာများအတွက် လှူဒါန်းသွားမည်ဖြစ်ပြီး ပစ္စည်းတစ်ခုအတွက် ကြမ်းခင်းဈေးသည် အမေရိကန်ဒေါ်လာ ၁၀၀၀၀ ဖြစ်ပြီး အနိမ့်ဆုံးလေလံဈေးတိုးမြင့်ရန်
ပမာဏမှာ အမေရိကန်ဒေါ်လာ ၅၀၀ ဖြစ်တယ်လို့ Kachin Alliance(ကချင်မဟာမိတ်အဖွဲ့ )ရဲ့ ထုတ်ပြန်ချက်မှာဖော်ပြထားပါတယ်။

ဒါ့အပြင် ရရှိသောငွေများကို စစ်ဘေးတိမ်းရှောင်သူများ၊ ကိုဗစ်ရောဂါကာကွယ်ရေး၊ ကုသရေးများနှင့် အခြေအနေအရပ်ရပ်ကြောင့် ပညာဆက်မသင်နိုင်သည့်သူများကို ပညာရေးထောက်ပံ့စရိတ်များအဖြစ် ကူညီသွားမှာဖြစ်တယ်လို့ သိရပါတယ်။

၂၀၁၉ ခုနှစ်၊မတ်လ ၃၁ ရက် နေ့က ချန်ပီယံအောင်လအင်န်ဆန်းနှင့် ဂျပန်နိုင်ငံသား Ken Hasegawa တို့၏ပွဲတွင် ဝတ်ဆင်ခဲ့သည့် ဘောင်းဘီ၊ ၂၀၁၉ ခုနှစ် အောက်တိုဘာလတွင် ချန်ပီယံ အောင်လအင်န်ဆန်းနှင့် Brandon Vera တို့၏ ပွဲစဉ်တွင် ဝတ်ဆင်ခဲ့သည့် ဘောင်းဘီနှင့် ၂၀၂၁ ခုနှစ်၊ ဇူလိုင်လ ၃၀ ရက်တွင် အောင်လအင်န်ဆန်းနှင့် Leandro Alaides တို့ပွဲတွင် ဝတ်ဆင်ခဲ့သည့် လက်ဝှေ့အိတ်တို့ကို လေလံတင် ရောင်းချသွားမှာဖြစ်တယ်လို့လည်း သိရပါတယ်။

Photo - AungLa Nsang(Burmese Python)

ymg/kg
#Yangon_Media_Group

#WorldPolitics
Published- 03 February 2022

ယူကရိန်းနယ်စပ်အနီးမှာ ရုရှားစစ်အင်အားအများအပြားနေရာချထားခြင်းကြောင့် ဖြစ်လာနိုင်တဲ့အန္တရာယ်ကို ကာကွယ်တဲ့အနေနဲ့ အမေရိကန်တပ်ဖွဲ့ အင်အား ၃,၀၀၀ နီးပါးကို ပိုလန်နဲ့ ရိုမေးနီးယားနိုင်ငံများထံ စေလွှတ်သွားမည်ဖြစ်ပြီး အရှေ့ဥရောပဒေသမှာ စစ်ရေးကူညီအားဖြည့်သွားမှာဖြစ်ကြောင်း အမေရိကန်မှတာဝန်ရှိသူများက ဗုဒ္ဓဟူးနေ့က ပြောကြားလိုက်ပါတယ်။

ရုရှားတို့က ယူကရိန်းကိုကျူးကျော်ဖို့ အစီအစဉ်မရှိဘူးလို့ ငြင်းဆိုထားပေမယ့် အပြန်အလှန်သဘောတူညီချက်တွေပြုလုပ်ချင်တဲ့ ပုံမပေါ်ဘဲ ဗြိတိန်နိုင်ငံနဲ့ ဝန်ကြီးချုပ်'ဘိုရစ်ဂျွန်ဆန်'တို့ကို လှောင်ပြောင်ဝေဖန်လိုက်တဲ့အပြင် ဗြိတိန်နိုင်ငံရေးသမားတွေကိုလည်း ရူးနှမ်းနေကြတယ်လို့ စွပ်စွဲပြောကြားခဲ့ပါတယ်။

ရုရှားက ယူကရိန်းနယ်စပ်မှာ စစ်အင်အား ၁ သိန်းကျော် နေရာချထားကာ ယူကရိန်းကို နေတိုး(NATO)အဖွဲ့ဝင်အဖြစ် ဘယ်တော့မှလက်မခံဖို့ ကတိပြုချက်နဲ့ တောင်းဆိုချက်တွေကို လိုက်လျောခြင်းမရှိပါက စစ်ရေးဆောင်ရွက်မှုတွေ ပြုလုပ်သွားမယ်လို့ ပြောထားပါတယ်။
ဂျာမနီနိုင်ငံ ဗီလ်ဆက်အခြေစိုက်စခန်းမှ အမေရိကန်တပ်ဖွဲ့ဝင် ၁,၀၀၀ ဝန်းကျင်ပါဝင်တဲ့ စထွိက်ကာတပ်ခွဲတစ်ခုကို ရိုမေးနီးယားသို့စေလွှတ်မည်ဖြစ်ပြီး မြောက်ကယ်ရိုလိုင်းနား ဘရက်ဂ်ခံတပ်မှ အမှတ်(၈၂)လေကြောင်းတပ်ခွဲမှ တပ်ဖွဲ့အင်အား ၁,၇၀၀ ဝန်းကျင်ကိုလည်း ပိုလန်နိုင်ငံထံ စေလွှတ်သွားမည်ဖြစ်ကြောင်း ပန်တဂွန်က ပြောကြားလိုက်ပါတယ်။

ဘရက်ဂ်ခံတပ်ကြီးမှ နောက်ထပ်တပ်ဖွဲ့ဝင် ၃၀၀ ကိုလည်း ဂျာမနီသို့ ရွှေ့ပြောင်းသွားမှာဖြစ်ပါတယ်။ရုရှားသမ္မတ'ဗလက်ဒီမီယာပူတင်'ကို သတိပေးခဲ့တဲ့အတိုင်း တပ်ဖွဲ့တွေနေရာချထားခြင်းဖြစ်ကြောင်း အမေရိကန်သမ္မတ'ဂျိုးဘိုင်ဒန်'က ပြောကြားခဲ့ပါတယ်။

"ပူတင်အနေနဲ့ ဆက်ပြီးရန်လိုတဲ့သဘောဆောင်နေမယ်ဆိုရင် အမေရိကန်တပ်တွေအဆင်သင့်ရှိနေမှာဖြစ်ကြောင်း နေတိုးမဟာမိတ်တွေနဲ့ အရှေ့ဥရောပကို အသိပေးထားပါတယ်" လို့ ဘိုင်ဒန်ကပြောကြားခဲ့ကြောင်း မီဒီယာတွေက တွစ်တာမှာဖော်ပြခဲ့ကြပါတယ်။
နေတိုးတပ်ဖွဲ့ကြီးက အမေရိကန်အတွက်ရော မဟာမိတ်အဖွဲ့တွေအတွက်ပါ အရေးကြီးတယ်ဆိုတာကို ပူတင်နဲ့တစ်ကမ္ဘာလုံးကိုသိစေဖို့အတွက် အခုလိုစစ်တပ်တွေပြောင်းရွှေ့နေရာချခြင်းဖြစ်ကြောင်း ပန်တဂွန်မှပြောရေးဆိုခွင့်ရှိသူ 'ဂျွန်ကာဘီ'က ပြောသွားပါတယ်။

ပိုလန်ကာကွယ်ရေးဝန်ကြီးချုပ် 'မာရီးယပ်စ်ဘလက်ဇ်ဂျက်'က အမေရိကန်တပ်ဖွဲ့တွေ နေရာချထားခြင်းက စည်းလုံးညီညွတ်မှုကို ပြသရာရောက်တယ်လို့ ဆိုလိုက်ပြီး နေတိုးအဖွဲ့ရဲ့ အထွေထွေအတွင်းရေးမှူး 'ယန်းစ်စတိုလ်တန်ဘာ့ဂ်'ကလည်း ဒီအစီအစဉ်ကိုကြိုဆိုကြောင်း ပြောကြားခဲ့ပါတယ်။

ရုရှားတို့ရဲ့အဓိကတောင်းဆိုချက်တွေက လိုက်လျောစရာအကြောင်းမရှိဘူးလို့ အနောက်နိုင်ငံတွေက သတ်မှတ်ခဲ့ကြပြီး ရုရှားတို့ကလည်း အလျှော့ပေးမယ့်ပုံမပေါ်တာကြောင့် သံတမန်ရေးအရဖြေရှင်းမှုက အောင်မြင်မှုမရဘူးလို့ ဆိုရမှာဖြစ်ပါတယ်။

ပြင်သစ်သမ္မတ'အီမန်နျူယယ်မက်ခရွန်'က ဒီပြဿနာနဲ့ပတ်သက်ပြီး မကြာခင်မှာ 'ဘိုင်ဒန်'နဲ့တွေ့ဆုံသွားမှာဖြစ်တဲ့အပြင် ရုရှားသိုသွားရောက်ကာ 'ပူတင်'နဲ့လည်း ဆွေးနွေးသွားမှာဖြစ်ပါတယ်။

ဂျာမနီမှအကြီးအမှူး'အိုလက်ဖ်ရှော့လ်ဇ်'ကလည်း မော်စကိုသို့သွားရောက်ကာ 'ပူတင်'နဲ့တွေ့ဆုံသွားမယ်လို့ ပြောကြားထားပါတယ်။ရုရှားနိုင်ငံနဲ့ သမ္မတ'ပူတင်'တို့က မည်သူနဲ့မဆို ပွင့်ပွင့်လင်းလင်းဆွေးနွေးသွားချင်တာဖြစ်ပြီး အကျိုးအကြောင်းမသိတဲ့သူနဲ့တောင် တွေ့ဆုံခွင့်ပြုထားပါတယ်လို့ ရုရှားအုပ်ချုပ်ရေးမှ ပြောရေးဆိုခွင့်ရှိသူ 'ဒီမီထရီပက်စ်ကော့ဗ်'က ပြောကြားခဲ့ပါတယ်။
Source: Reuters.

#DailyNews

(၁) စက်သုံးဆီဆိုင်များက အဝေးပြေးကုန်စည်ပို့ဆောင်ရေးယာဉ်များကို တစ်လီတာလျှင် တစ်ရာကျပ် လျှော့၍ရောင်းပေး

(၂) အိုမီခရွန်ပြည်တွင်းကူးစက်မှုရှိလာသော်လည်း ကုသရေးစင်တာများ ပြန်လည်စတင်ရန် ညွှန်ကြားထားခြင်းမရှိသေး

(၃) နေ့စဉ်မိုးလေဝသတင်း

(၄) တရုတ်နိုင်ငံအရှေ့မြောက်ဘက်ရှိ အမျိုးသားဥယျာဉ်တွင် ကျားပေါက်လေး ၅ ကောင်ကို ဗီဒီယိုကင်မရာမှတဆင့် တွေ့မြင်ခဲ့....... အစရှိတဲ့သတင်းတွေကိုတင်ဆက်ပေးသွားမှာပဲဖြစ်ပါတယ်။

#Yangon_Media_Group 

#LocalNews
Published- 3 Feb 2022

ထိုင်းရဲတပ်ဖွဲ့ဝင်တစ်ဦးရဲ့သေနတ်နဲ့ ပစ်ခတ်ခဲ့မှုကြောင့် မြန်မာတရားမဝင်လုပ်သားတစ်ဦးသေဆုံးမှုအပေါ် ရဲဘက်ဆိုင်ရာ လုပ်ထုံးလုပ်နည်းများအရ မှန်ကန်မှု ရှိ မရှိ၊ ပြစ်မှု မြောက်ခြင်း ရှိ မရှိ၊ သေဆုံးသူအတွက် တရားမျှတမှု ရရှိရေးနဲ့သင်္ဂြိုဟ်ပေးနိုင်ရေးကိစ္စရပ်များ ဆက်လက်ဆောင်ရွက်သွားမယ်လို့ မဲဆောက်မြို့အခြေစိုက် အလုပ်သမားသံအရာရှိရုံးက ထုတ်ပြန်လိုက်ပါတယ်။

ဖေဖော်ဝါရီလ ၂  ရက်နေ့ ည ၁၂နာရီအချိန်တွင် ကန်ချနဘူရီပြည်နယ်အတွင်း တရားမဝင် ဝင်ရောက်လာတဲ့ ပစ်ကပ်မော်တော်ယာဉ်တစ်စီးကို စိုင်ရိုခရိုင်အဝင်ဂိတ်တွင် စစ်ဆေးမှု မခံယူဘဲ မောင်းနှင်ထွက်ပြေးခဲ့တာကြောင့် တာဝန်ကျရဲတစ်ဦးက သေနတ်(M-16)နဲ့ ပစ်ခတ်ခဲ့ရာမှ အလုပ်သမား ကျား တစ်ဦး ခေါင်းထိမှန် သေဆုံးခြင်း၊ မ တစ်ဦး လက်မောင်းနဲ့ ရင်သားအကြား ထိမှန် ဒဏ်ရာရရှိခဲ့ တဲ့ဖြစ်စဉ်ဖြစ်ပွားခဲ့တာဖြစ်ပါတယ်။

ထိုင်းရဲတပ်ဖွဲ့ကထုတ်ပြန်ရာမှာအဆိုပါပစ်ကပ်မော်တော်ယာဉ်ပေါ်တွင် တရားမဝင် အလုပ်သမား ၁၀ ဦး တင်ဆောင်လာခြင်းဖြစ်ပြီးဖေဖော်ဝါရီလ ၂ ရက်နေ့တွင် ရဲစခန်းအနီး အလုပ်သမား ၉ ဦး လာရောက် စွန့်ပစ်ခဲ့ပါကြောင်း၊ ကျန်တစ်ဦးအား လိုက်လံရှာဖွေခဲ့ရာ အနီးဝန်းကျင်၌ သေဆုံးရုပ် အလောင်း(ကျား)အား ရှာဖွေတွေ့ရှိခဲ့ပါကြောင်း၊၉ ဦးအနက် ဒဏ်ရာရရှိသူ တစ်ဦး(မ)အား ဆေးရုံသို့ ပို့ဆောင်ခဲ့ပြီး ဆေးကုသမှု ခံယူစေလျှက်ရှိကြောင်း၊ အသက်အန္တရာယ်မရှိကြောင်းနဲ့ ဆေးရုံဆင်ပြီး ဒဏ်ရာဆေးခြင်း၊ ဆေးထည့်ခြင်းတို့ဖြင့် ကုသပေးလျှက်ရှိတယ်လို့ ထုတ်ပြန်ထားပါတယ်။

ကျန်အလုပ်သမားများအား စိုင်ရိုခရိုင်ရဲစခန်း အချုပ်တွင် ထားရှိကာသေနတ်ဖြင့် ပစ်ခတ်သူ တာဝန်ကျရဲအား စစ်ဆေးလျှက်ရှိပြီး ၎င်းက ထွက်ဆိုသည် မှာ ကားဘီးအား ပစ်ခတ်ခဲ့ခြင်းသာ ဖြစ်တယ်လို့ ထွက်ဆိုထားပြီး သေဆုံးသူမှာ ပေါက်တောမြို့ နယ်၊ ဘဲရကျေးရွာမှ မောင်အောင်ကျော်စိန်ဖြစ်တယ်လို့ အလုပ်သမားသံအရာရှိရုံးကထုတ်ပြန်ထားပါတယ်။
ymg/hm

#Yangon_Media_Group

#WorldHealth
Published - 3 February 2022

ဆေးလ်ဗားစပရင်း မယ်ရီလန်းဒေသမှာနေထိုင်တဲ့ ကလေး ၂ ယောက်မိခင်ဖြစ်သူ 'ကယ်ရီဒင်ဂယ်လ်'က စာသင်ကျောင်းတွေနဲ့ ကလေးထိန်းစင်တာတွေမှာ ကလေးတွေကို နှာခေါင်းစည်းမဖြစ်မနေတပ်ဆင်ဖို့ မသတ်မှတ်သင့်ကြောင်း ဖွင့်ဟပြောဆိုခဲ့ပါတယ်။အသက် ၂ နှစ်အရွယ်ကလေးတစ်ယောက်ကို တစ်နေ့လုံး နှာခေါင်းစည်းတပ်ဆင်ခိုင်းထားဖို့က ဖြစ်သင့်ရဲ့လားလို့ မေးခွန်းထုတ်လိုက်ပါတယ်။

ရောဂါကူးစက်နိုင်ချေမြင့်မားတဲ့လူတွေမှာ ကိုဗစ်ကာကွယ်ဆေးတွေ booster အားမြှင့်ကာကွယ်ဆေးတွေ ထိုးနှံသင့်ကြောင်း၊ အခြားလူတွေဆီမကူးစက်အောင် ကလေးတွေကို ဖိအားပေး နှာခေါင်းစည်းတပ်ခိုင်းတာမျိုး မလုပ်သင့်တော့ကြောင်း 'ဒင်ဂယ်လ်'က ပြောလိုက်ပါတယ်။

'ဒင်ဂယ်လ်'ရဲ့ အသက် ၃ နှစ်အရွယ် သားယောက်ျားလေးဖြစ်သူတက်ရောက်နေတဲ့ မူကြိုကျောင်းမှာ ကလေးတွေကအမြဲလိုလို အခန်းအပြင်ဘက်မှာရှိနေတတ်ပေမယ့် နှာခေါင်းစည်းမဖြစ်မနေတပ်ဆင်ဖို့ စည်းကမ်းသတ်မှတ်ထားပါတယ်။

"ကျွန်မကလေးက သူမကြိုက်တဲ့ အဝတ်စနှာခေါင်းစည်းကို အမြဲတပ်ဆင်နေရပါတယ်။ သူကနှာခေါင်းစည်းကို ကိုက်ပစ်တတ်ပါတယ်။ ၅ မိနစ်တောင်မပြည့်သေးဘူး နှာခေါင်းစည်းက စိုရွှဲတော့တာပဲ" လို့ ဆိုပါတယ်။

သူ့ရဲ့အသက် ၆ နှစ်အရွယ် ပထမတန်းတက်ရောက်နေတဲ့ သားတစ်ယောက်ကတော့ မျက်နှာကြွက်သားမသန်စွမ်းသူဖြစ်ပြီး နှာခေါင်းစည်းတပ်ဆင်ရတဲ့အခါမှာတော့ ပိုဆိုးသွားခဲ့ပါတယ်။

နှာခေါင်းစည်းတပ်လိုက်ရင် အောက်ကိုကျကျသွားပြီး ကလေးအထူးကုဆရာဝန်နဲ့ တိုင်ပင်ကာ ခွင့်ပြုစာရယူခဲ့ပေမယ့် ကျောင်းကဆရာမတွေက ပြန်ပြင်တပ်ဆင်ပေးနေခဲ့ပါတယ်။
နိုင်ငံအနှံ့ရှိ စာသင်ကျောင်းကြီး ၃ ပုံ ၂ ပုံခန့်မှာ ကျောင်းသူကျောင်းသားတွေအနေနဲ့ နှာခေါင်းစည်းမဖြစ်မနေတပ်ဆင်ရပါတယ်။

အများစုတပ်ဆင်တဲ့ နှာခေါင်းစည်းတွေက ကျွမ်းကျင်သူတွေရဲ့အဆိုအရ အိုမီခရွန်မျိုးဗီဇကွဲကူးစက်ခြင်းကို ထိရောက်စွာမကာကွယ်နိုင်တဲ့ အဝတ်စနှာခေါင်းစည်းတွေဖြစ်ပါတယ်။အဲဒီအတွက် သင့်လျော်တဲ့ဖြေရှင်းချက်ကတော့ ပိုမိုအဆင့်မြင့်ကောင်းမွန်တဲ့ နှာခေါင်းစည်းတွေ အသုံးပြုဖို့ဖြစ်ပါတယ်။

အမေရိကန်ရှိ ဒုတိယအကြီးမားဆုံးကျောင်းတော်ဖြစ်တဲ့ လော့စ်အိန်ဂျလိစ်ယူနီဖိုင်းကျောင်းကြီးမှာ ဇန်နဝါရီ ၂၁ ရက်နေ့ကစပြီး အဝတ်စနှာခေါင်းစည်းတွေကို အသုံးမပြုဖို့ ပြင်ဆင်ထုတ်ပြန်လိုက်ပါတယ်။
ကယ်လီဖိုးနီးယားရှိ စာသင်ကျောင်းတွေကို N95 နဲ့ ကလေးသုံး KN95 နှာခေါင်းစည်း သန်းနဲ့ချီပြီး ဖြန့်ဝေခဲ့ပါတယ်။

အခြားဒေသတွေနဲ့ ကွဲပြားခြားနားတဲ့ ဘော့စတွန်၊ ဒန်ဗာ၊ ရောင်းရော့ခ်၊ တက္ကဆက် တို့မှာဆိုရင် ကျောင်းသားရေးတက်ကြွလှုပ်ရှားသူတွေဟာ ဘေးကင်းစိတ်ချရဖို့ အသက်ရှူကိရိယာပါတဲ့နှာခေါင်းစည်တွေကို တောင်းဆိုနေကြပါတယ်။

ကိုဗစ်ရောဂါကူးစက်မှုတွေနဲ့ ဆေးရုံတက်ကုသခံယူရတဲ့ကလေးတွေ လက်ရှိမှာ များပြားနေဆဲဖြစ်ပါတယ်။ရောဂါထိန်းချုပ်ကာကွယ်ရေးစင်တာ CDC နဲ့ အမေရိကန်ကလေးအထူးကုအကယ်ဒမီတို့ကတော့ ကပ်ရောဂါစကတည်းက ကြေညာထားတဲ့အတိုင်း စာသင်ကျောင်းတွေအားလုံးမှာ ကလေးတွေနှာခေါင်းစည်းတပ်ဆင်ခိုင်းဖို့ ညွှန်ကြားထားပါတယ်။

အမေရိကန်ပြည်နယ်အချို့မှာ အိုမီခရွန်ကူးစက်မှုတွေ မြင့်တက်နေပေမယ့် ကလေးအထူးကုတွေ၊ အာရုံကြောသိပ္ပံပညာရှင်တွေ၊ စာသင်ဆရာတွေနဲ့ 'ဒင်ဂယ်လ်'တို့လို မိဘတွေက ကလေးတွေမှာ အချိန်ကြာရှည်စွာ နှာခေါင်းစည်းတပ်ဆင်ခြင်းရဲ့ ဆိုးကျိုးတွေအကြောင်း အသိပေးပြောကြားနေကြပါတယ်။
အရွယ်ရောက်ပြီးသူတွေ များစွာစုဝေးရှိနေတတ်တဲ့ စားသောက်ဆိုင်တွေ ဘားတွေမှာတောင် နှာခေါင်းစည်းတပ်ဆင်ဖို့ညွှန်ကြားချက်တွေ မတွေ့ရပေမယ့် ကလေးသူငယ်တွေမှာ မဖြစ်မနေနှာခေါင်းစည်းတပ်ဆင်ခိုင်းတာဟာ ဘယ်လိုလုပ်မျှတမှုရှိမှာလဲလို့ မေးခွန်းထုတ်လာကြပါတယ်။
Source: NPR

#WorldHealth
Published - 3 February 2022

ကိုဗစ်ကပ်ရောဂါကာလအတွင်း စွန့်ပစ်ခဲ့တဲ့ ဆေးထိုးအပ်ဟောင်းတွေ၊ အသုံးပြုပြီးသား ရောဂါစမ်းသပ်ကိရိယာပစ္စည်းတွေ၊ ကာကွယ်ဆေးပုလင်းဟောင်းတွေဟာ များသထက်များလာပြီး ကျန်းမာရေးသုံးစွန့်ပစ်ပစ္စည်းတွေ တန်ချိန်သောင်းနဲ့ချီပြီး စုပုံလာခဲ့ပါတယ်။

ထိုသို့စွန့်ပစ်ပစ္စည်းတွေ စုပြုံလာခြင်းက သဘာဝပတ်ဝန်းကျင်နဲ့ လူ့ကျန်းမာရေးကို ခြိမ်းခြောက်လျက်ရှိကြောင်း ကမ္ဘာ့ကျန်းမာရေးအဖွဲ့အစည်း WHO က အင်္ဂါနေ့က သတင်းထုတ်ပြန်လိုက်ပါတယ်။
ကိုရိုနာဗိုင်းရပ်စ်က အရာဝတ္ထုမျက်နှာပြင်တွေပေါ်မှာ အသက်ရှင်နိုင်တာကြောင့် ရောဂါပိုးကူးစက်နိုင်တဲ့အစိတ်အပိုင်းကနေ ကျန်းမာရေးဝန်ထမ်းတွေ ဆေးထိုးအပ်စူးခြင်း၊ ထိခိုက်ဒဏ်ရာရခြင်း၊ ရောဂါပိုးထိတွေ့ခြင်းများ ဖြစ်ပေါ်နိုင်ပါတယ်။

အမှိုက်ကျင်းစနစ် အားနည်းတဲ့နေရာတွေနဲ့နီးတဲ့ လူတွေမှာ အမှိုက်မီးရှို့ခြင်းမှ ထွက်လာတဲ့ညစ်ညမ်းလေထု၊ မကောင်းတဲ့ရေတွေနဲ့ ပိုးမွှားသယ်ဆောင်လာတဲ့ သတ္တဝါတွေကြောင့် ကျန်းမာရေးထိခိုက်နိုင်ပါတယ်။

ပြန်လည်ပြုပြင်မွမ်းမံခြင်းနဲ့ ရင်းနှီးမြှုပ်နှံခြင်းတို့ပြုလုပ်ဖို့ တောင်းဆိုထားရာမှာ ထုတ်ပိုးသယ်ဆောင်ရာမှာ အသုံးပြုတဲ့ပလတ်စတစ်တွေ လျှော့သုံးဖို့နဲ့ စွန့်ပစ်ပစ္စည်းတွေကနေ ပြန်လည်သုံးစွဲနိုင်တဲ့အရာတွေနဲ့ ပြုလုပ်ထားတဲ့ ကာကွယ်ရေးဝတ်စုံတွေကို လျှော့ချဖို့ ပါဝင်ပါတယ်။

၂၀၂၁ နိုဝင်ဘာလမတိုင်ခင်အထိ ကုလသမဂ္ဂမှ မှာယူခဲ့တဲ့ PPE ကာကွယ်ရေးဝတ်စုံတွေရဲ့ တန်ချိန်ဟာ စုစုပေါင်း ၈၇,၀၀၀ တန်ခန့်ရှိပြီး အများစုက စွန့်ပစ်ပစ္စည်းဖြစ်သွားခဲ့တယ်လို့ ယူဆလို့ရပါတယ်။
စစ်ဆေးကိရိယာပစ္စည်းပေါင်း သန်း ၁၄၀ ကနေ ပလတ်စတစ်အမှိုက်တန်ချိန် ၂,၆၀၀ ခန့် ထွက်ရှိလာနိုင်ပြီး အိုလံပစ်ရေကူးကန်တစ်ခုရဲ့ ၃ ပုံ ၁ ပုံလောက်ကို ဖုံးလွှမ်းသွားလောက်တဲ့ ဓာတုစွန့်ပစ်ပစ္စည်းတွေ ထွက်ရှိလာနိုင်ကြောင်း ဖော်ပြထားပါတယ်။

ဒါ့အပြင် ကမ္ဘာတဝန်း ကိုဗစ်ကာကွယ်ဆေး ၈ ဘီလီယံထိုးနှံမှုကနေ စွန့်ပစ်ထွက်ရှိလာတဲ့ ဖန်ပြွန်တွေ၊ ဆေးထိုးအပ်တွေ၊ ဆေးဘူးတွေရဲ့တန်ချိန်ဟာ ၁၄၄,၀၀၀ တန်လောက်ရှိမယ်လို့ ခန့်မှန်းထားကြပါတယ်။
ဘယ်နေရာတွေမှာ စွန့်ပစ်ပစ္စည်းအမြောက်အများ စုပြုံနေတာလဲဆိုတာကို WHO က အတိအကျမပြောထားပေမယ့် အိန္ဒိယကျေးလက်ရှိ အမှိုက်စွန့်ပစ်ရေးစနစ်နဲ့ မာဒါဂတ်စ်ကာရှိ ကွာရန်တင်းအဆောက်အအုံများမှ မစင်အညစ်အကြေးတွေကို ရည်ညွှန်းချင်တာဖြစ်ပါလိမ့်မယ်။

ကပ်ရောဂါမတိုင်ခင်ကတည်းက ကျန်းမာရေးစောင့်ရှောက်စင်တာ ၃ ပုံ ၁ ပုံခန့်ဟာ စွန့်ပစ်ထားတဲ့ပစ္စည်းတွေကို ကိုင်တွယ်ဖြေရှင်းခြင်း မရှိခဲ့ဘဲ ဆင်းရဲတဲ့နိုင်ငံတွေမှာ ၆၀ ရာခိုင်နှုန်းလောက်အထိရှိကြောင်း WHO က ပြောကြားခဲ့ပါတယ်။
Source: The Jerusalem Post 

#LocalPolitics

++++++++++++++++++++++++++++++++++++++
Published -3 Feb 2022
နိုင်ငံတွင်ကာကွယ်ရေးစွမ်းပကားမကောင်းပါက သူများကဖင်ပုတ်ခေါင်းပုတ်လုပ်တာခံရလိမ့်မယ်လို့ နစကဥက္ကဋ္ဌကပြောကြားပါတယ်။

ဖေဖော်ဝါရီ လ၂ရက်နေ့ကကျင်းပတဲ့အစိုးရအဖွဲ့ အစည်းအဝေး အမှတ်စဉ်(၁/၂၀၂၂)မှာ သူကယခုလိုပြောဆိုခဲ့တာဖြစ်ပါတယ်" ကာကွယ်ရေး စွမ်းအားမကောင်းတော့ ကျွန်တော်တို့ခံသွားရမှာပေါ့။ သူများက ဖင်ပုတ်၊ ခေါင်းပုတ် လာလုပ်သွားမှာပေါ့။ စီးပွားရေးအား မကောင်းလည်း ပိုက်ဆံမရှိတော့ မျက်နှာငယ် ရတယ်။ နိုင်ငံရေးအားမကောင်းတဲ့အခါကျတော့ သူများတွေ ကျွန်တော်တို့ကို မျိုးစုံ ပြဿနာတွေရှာမှာ။ စစ်ရေးအရ ကာကွယ်ရေးစွမ်းအား မကောင်းတော့ ဖင်ပုတ်၊ ခေါင်းပုတ်လာလုပ်မယ်။ ကျွန်တော်တို့တွေ စော်ကားခံရလိမ့်မယ်။ ခြံစည်းရိုးတွေလုံမှာ မဟုတ်ဘူး" လို့ဗိုလ်ချူပ်မှူးကြီးမင်းအောင်လှိုင်ကပြောခဲ့တာပါ။

ယင်းအတွက်ကြောင့် မကျင့်သုံးရသေးသည့် စစ်မှုထမ်းဥပဒေကို တစ်ချိန်ချိန်တွင်လုပ်ကိုလုပ်ရမည်ဟုသူက ဆက်ပြောခဲ့ပါတယ်။ လက်ရှိတွင်မူပြည်တွင်းလက်နက်ကိုင်ပဋိပက္ခတွေရှိနေသေးသည့်အတွက် ကျင့်သုံးလို့မရသေးကြောင်းလည်း သူကပြောပါတယ်။

"ဒီမှာ အမျိုးသားစစ်မှုထမ်းဉပဒေအရ နိုင်ငံသား တွေစစ်မှုထမ်းရမယ်။ ၂ နှစ်တန်သည်၊ ၃ နှစ်တန်သည်၊ ဒါသူ့ရဲ့ သတ်မှတ်ထားတဲ့ ဟာအတိုင်း ကျွန်တော်တို့ စစ်မှုထမ်းရမယ်။ တစ်နှစ်လည်းဖြစ်ရင်ဖြစ်မှာပေါ့ဗျာ၊ တစ်နှစ်ခွဲလည်းဖြစ်ရင်ဖြစ်မှာပေါ့။ အခြေအနေပေါ်မူတည်ပြီးတော့ တိုင်းပြည်ရဲ့အခြေ အနေပေါ်မူတည်ပြီး တော့လုပ်ရမှာပေါ့။ ဒါကလုပ်ရမှာ၊ မလုပ်လို့မရဘူး" လို့ နစကဥက္ကဋ္ဌကပြောခဲ့တာဖြစ်ပါတယ်။

ဒါအပြင် ဒီနှစ် ၂၀၂၂ ခုနှစ်ဟာ စိန်ခေါ်တဲ့နှစ်တစ်နှစ်လည်း ဖြစ်လာ နေပြီး စီးပွားရေးကိုပြန်လည်တည့် မတ်လာအောင်လုပ်မယ်ဆိုပါက ပြည်သူက ယုံကြည်မှုရှိလာမယ်လို့ပြောဆိုခဲ့ပါတယ်။
ymg/hm
#Yangon_Media_Group

Published 3 February 2022

CNNရဲ့ဥက္ကဋ္ဌ ဂျက်ဖ်ဇာတ်ခါဟာ သူ့အနေနှင့် လုပ်ဖော်ကိုင်ဖက်တစ်ဦးနှင့် ချစ်ကြိုးသွယ်မိတာကို ဖွင့်ပြောဖို့ပျက်ကွက်ခဲ့တဲ့  အတွက် ရာထူးက နှုတ်ထွက်ခဲ့ပါတယ်။CNNဟာ ဒစ်ကာဗာရီရဲ့အစိတ်အပိုင်းဖြစ်လာတဲ့အခါ သူဟာ ပိုကြီးမားတဲ့တာဝန်ကို ထမ်းဆောင်လိမ့်မယ်လို့ ထင်ကြေးပေးခံထားရသူဖြစ်ပါတယ်။

အသက်၅၆နှစ်အရွယ်ရှိပြီဖြစ်တဲ့ဇာတ်ခါရဲ့ ချစ်ဇာတ်လမ်းဟာ စီအင်န်အင်န်မှာ ယခင်မေးမြန်းခန်းတင်ဆက်ခဲ့တဲ့ ခရစ်စ် ကူမိုကို စုံစမ်းစစ်ဆေးရေးလုပ်စဉ်မှာ ပေါ်လာခဲ့တာပါလို့ သူကရုံးတွင်းထုတ်ပြန်စာမှာဖော်ပြခဲ့ပါတယ်။ ခရစ်ကူမိုဟာ လိင်ပိုင်းဆိုင်ရာ မတော်မလျော်ပြုခဲ့တယ်လို့စွပ်စွဲခံရတဲ့သူ့အစ်ကို နယူးယောက်အုပ်ချုပ်ရေးမှူးဟောင်း အင်ဒရူးကူမိုကို ကူညီခဲ့လို့ဆိုပြီး ဒီဇင်ဘာမှာ အလုပ်ကထုတ်ပစ်ခြင်းခံခဲ့ရပါတယ်။

“ အဲဒီကိစ္စဖြစ်တုန်းက ကျွန်တော့်အနေနှင့် ဖွင့်ပြောဖို့လိုအပ်ခဲ့ပေမယ့် ကျွန်တော်မလုပ်ခဲ့ပါဘူး” လို့ ဇာတ်ခါက ပြောပါတယ်။  သူဟာ ဝါနာမီဒီယာရဲ့ သတင်းနှင့်အားကစားဌာနခွဲဥက္ကဋ္ဌနေရာကပါ နှုတ်ထွက်ခဲ့တာပါ။

သူ့ရဲ့ပြောရေးဆိုခွင့်ရသူကတစ်ဆင့် ရိုက်တာက အင်တာဗျူးတောင်းခံတာကို ဇာတ်ခါကငြင်းဆန်ခဲ့ပါတယ်။ သူဟာ အိမ်ထောင်ကွဲတစ်ဦးဖြစ်တယ်လို့ သူ့ကိုယ်စားလှယ်ကပြောပါတယ်။

သူက သူနှင့်ချစ်ကြိုးသွယ်တဲ့လုပ်ဖော်ကိုင်ဖက်ဘယ်သူဆိုတာမပြောပေမယ့် သူမဟာ စီအင်န်အင်န်ရဲ့ ဈေးကွက်အရာရှိချုပ် အယ်လစ်ဆင်ဂိုလတ်စ်ဖြစ်ပါတယ်လို့ ဗုဒ္ဓဟူးနေ့က ရုပ်သံလွှင့်အစီအစဉ်တစ်ခုမှာ စီအင်န်အင်န်ရဲ့ မေးမြန်းတင်ဆက်သူ ဘရီယန်စတယ်လ်တာ ကပြောသွားပါတယ်။ သူမဟာ စီအင်န်အင်န်မှာဆက်ရှိနေတယ်လို့လည်း ဖြည့်စွက်ပြောသွား ပါသေးတယ်။

“ ဂျက်ဖ်နှင့်ကျွန်မတို့ဟာ နီးကပ်တဲ့မိတ်ဆွေတွေနှင့် လုပ်ငန်းဆိုင်ရာပါတနာတွေအဖြစ် အနှစ်၂၀ကျော် အလုပ်လုပ်ခဲ့ ကြပါ တယ်”လို့ သူမက သီးခြားထုတ်ပြန်တဲ့ ဌာနတွင်းဝေစာမှာ ပြောတယ်လို့ စတယ်လ်တာကပြောသွားပါတယ်။ “ သိပ်မကြာသေး ခင် ကိုဗစ်ကာလရောက်မှသာ ကျွန်မတို့ရဲ့ဆက်ဆံရေးက ပြောင်းသွားခဲ့တာပါ။ အဲဒီအချိန်တုန်းက ကျွန်မတို့ဖွင့်မပြောမိခဲ့တာ ကျွန်မတို့ဝမ်းနည်းရပါတယ်။ ကျွန်မအနေနှင့် စီအင်န်အင်န်နှင့်ရှိနေတဲ့အချိန်တွေကို အလွန်ဂုဏ်ယူပြီး နေ့စဉ် ကျွန်မတို့ လုပ်နေကျအလုပ်တွေကို ဆက်လုပ်ကိုင်သွားဖို့ မျှော်လင့်ထားပါတယ်” လို့ သူမက ရုံးတွင်းဝေစာမှာရေးသားထားပါတယ်။

ဂိုလပ်စ်ကို ရိုက်တာက သီးခြားမှတ်ချက်ပေးဖို့မေတ္တာရပ်ခံပေမယ့် ဘာမှမတုန့်ပြန်သေးပါဘူး။

လူတွေအတော်တုန်လှုပ်သွားကြတယ်လို့ စီအင်န်အင်န်ဝန်ထမ်းဟောင်းတစ်ဦးကပြောပါတယ်။ “ ဂျက်ဖ်ဟာ ကပ်ဘေးကာလ တလျေက် လူတော်တောများများနှင့်အတော်နီးနီးကပ်ကပ်ရှိနေခဲ့တာပါ”  လို့သူကဆက်ပြောပါတယ်။

၂၀၁၃ခုနှစ်မှာ စီအင်န်အင်န်ကို ရောက်လာတဲ့ ဇာတ်ခါဟာ အစောပိုင်းအောင်မြင်မှုမှတ်တမ်းတွေကြောင့် ရုပ်သံလောကမှာ နာမည်ကောင်းရှိသူတစ်ဦးဖြစ်ပါတယ်။ အသက်၂၀ကျော်ဝန်းကျင်မှာ သူဟာ အင်န်ဘီစီရဲ့ “တူဒေး” အစီအစဉ်မှာ အမှုဆောင် ထုတ်လုပ်ရေးမှူးလုပ်ခဲ့ပါတယ်။အဲဒီနောက်အင်န်ဘီစီအင်တာတိန်းမန့်ရဲ့ ဥက္ကဋ္ဌဖြစ်လာခဲ့ပါတယ်။

မီယာမီမှာမွေးဖွားကြီးပြင်းခဲ့တဲ့သူဟာ နယူးယောက်မှာနေထိုင်ပြီး သားသမီး(၄)ဦးရှိပါတယ်။

Source Reuters

Published 2 Feb 2022

လာမယ့်၁၀နှစ်အတွင်းမှာ သူ့ရဲ့နိုင်ငံ ကော့စတာရီကာဟာ ခြားနားပြောင်းလဲသွားလိမ့်မယ်လို့ အာကသယာဉ်မှူးဟောင်း ဖရန်ကလင်ချန်းက ယုံကြည်နေပါတယ်။ သူက နိုင်ငံကို ပိုပြီးကြွယ်ဝလာကာပိုပြီးသန့်ရှင်းလာဖို့ စိတ်အားထက်သန်နေပါတယ်။  ၂၀၁၁ခုနှစ်ကတည်းက သူလေ့လာဆောင်ရွက်နေတဲ့ သန့်စင်တဲ့ဟိုက်ဒရိုဂျင်နည်းပညာကို ကျေးဇူးတင်ရမှာပါ။

Source AFP