#LocalPolitics
Published 7 Feb 2022

 

ငြိမ်းချမ်းရေးဆွေးနွေးရာမှာ ဆွေးနွေးမယ့်အကြောင်းအရာများနဲ့ပက်သက်ပြီး ကြိုတင်ကန့်သတ်ချက်မထားဘဲ တတ်နိုင်သလောက် လွတ်လွတ်လပ်လပ် နှီးနှောဖလှယ်နိုင်ရန် ရည်ရွယ်ချက်ထားရှိတယ်လို့ နစက က ကြေညာလိုက်ပါတယ်။

 

ဖေဖော်ဝါရီလ ၆ ရက်နေ့ နစကရဲ့ ကြေညာချက် ၁/၂၀၂၂ ထာဝရငြိမ်းချမ်းရေးအတွက် ဖိတ်ခေါ်ခြင်း နဲ့ စိန်ရတုပြည်ထောင်စုနေ့အခမ်းအနားသို့ဖိတ်ကြားခြင်း ထုတ်ပြန်ရာမှာ အထက်ပါအတိုင်းရေးသားထားတာဖြစ်ပါတယ်။

 

အဆိုပါထုတ်ပြန်ချက်မှာ နိုင်ငံတော်စီမံအုပ်ချုပ်ရေးကောင်စီအနေနဲ့ ထာဝရငြိမ်းချမ်းရေးအတွက် တိုင်းရင်းသားလက်နက်ကိုင်အဖွဲ့အစည်းများနှင့် ဆွေးနွေးပွဲများပြုလုပ်နိုင်ရေး ဆက်လက်စီမံဆောင်ရွက်နေပြီး အကြမ်းဖက်အုပ်စုအဖြစ်ကြေညာထားတဲ့ အဖွဲ့အစည်းများမှအပ NCA လက်မှတ်ရေးထိုးထားသည့် တိုင်းရင်းသားလက်နက်ကိုင်အဖွဲ့အစည်းများသာမက NCA လက်မှတ်မရေးထိုးရသေးသည့် တိုင်းရင်းသား လက်နက်ကိုင်အဖွဲ့အစည်းများကိုပါ ထာဝရငြိမ်းချမ်းရေးအတွက် ဆွေးနွေးရန်ဖိတ်ခေါ်တယ်လို့ ဖော်ပြထားပါတယ်။

 

ငြိမ်းချမ်းရေးဆွေးနွေးရာမှာလည်း ဆွေးနွေးမယ့်အကြောင်းအရာတွေနဲ့ပက်သက်ပြီး ကြိုတင်ကန့်သတ်ချက်မထားဘဲ တတ်နိုင်သလောက် လွတ်လွတ်လပ်လပ် နှီးနှောဖလှယ်နိုင်ရန် ရည်ရွယ်ချက်ထားရှိတယ်လို့လည်း အလေးထားဖော်ပြထားပါတယ်။

 

ဒါ့အပြင် ဒီမိုကရေစီကျင့်စဉ်များနဲ့အညီ စေ့စပ်ညှိနှိုင်းအဖြေရှာရေးနည်းလမ်းနဲ့ ထာဝရငြိမ်းချမ်းရေးကို ရှေးရှုဆွေးနွေးသွားကြမှာဖြစ်တာကြောင့် ပြည်ထောင်စုနေ့အခမ်းအနားတက်ရောက်စဉ်ကာလအတွင်း ဒီမိုကရေစီနဲ့ ဖက်ဒရယ်စနစ်ကိုအခြေခံတဲ့ပြည်ထောင်စုကို တည်ဆောက်နိုင်ရေးအတွက်ကျင်းပမယ့် ထာဝရငြိမ်းချမ်းရေးအကြိုညှိနှိုင်းဆွေးနွေးပွဲကို တက်ရောက်ဆွေးနွေးကြဖို့ဖိတ်ခေါ်တယ်လို့ ဖော်ပြထားပါတယ်။

 

၂၀၂၂ ခုနှစ်ဇန်နဝါရီလ ၁၃ ရက်နေ့ နစက ဥက္ကဌရဲ့တနင်္သာရီတိုင်းဒေသကြီးခရီးစဥ်မှာ ငြိမ်းချမ်းရေးမှာ လက်နက်ကိုင်အဖွဲ့အစည်းအားလုံးဥပဒေနှင့်အညီ ပါဝင်လာမှသာလျှင် လွတ်လပ်ပြီးတရားမျှတတဲ့ ရွေးကောက်ပွဲဖြစ်လိမ့်မယ်လို့ ဒေသအုပ်ချုပ်ရေးအဖွဲ့အစည်းတွေနှင့် တွေ့ဆုံစဉ်ပြောကြားခဲ့ပါတယ်။

 

လက်ရှိဖြစ်ပေါ်နေတဲ့ နိုင်ငံရေးအကြပ်အတည်းတွေကို ဖြေရှင်းနိုင်ရေးအတွက် သက်ဆိုင်သူများအားလုံးပါဝင်သော အဓိပ္ပယ်ပြည့်ဝသည့် နိုင်ငံရေးဆွေးနွေးပွဲများနဲ့သာ ဖြေရှင်းနိုင်မယ်လို့ တစ်နိုင်ငံလုံးပစ်ခတ်တိုက်ခိုက်မှုရပ်စဲရေးသဘောတူစာချုပ်လက်မှတ်ရေးထိုးထားသော တိုင်းရင်းသားလက်နက်ကိုင်တော်လှန်ရေးအဖွဲ့အစည်းများရဲ့ ငြိမ်းချမ်းရေးလုပ်ငန်းစဥ်ဦးဆောင်အဖွဲ့ PPST က ဇန်နဝါရီလ ၇ ရက်နေ့ကထုတ်ပြန်ထားပါတယ်။

 

ymg/hm
#Yangon_Media_Group

Published 07 February 2022

တောင်ကိုရီးယားကုမ္ပဏီတစ်ခုမှ ထုတ်လုပ်လိုက်တဲ့ ကော့စ်(kosk)ဆိုတဲ့ နှာခေါင်းစည်းဟာ အစာစားတဲ့အခါ နှာခေါင်းအထိရောက်အောင် ဖုံးအုပ်ထားနိုင်ကြောင်း The Washington Post က ဖော်ပြထားပါတယ်။

ဒီနှာခေါင်းစည်းတွေကို အတ်မန်ကုမ္ပဏီကထုတ်လုပ်လိုက်တာဖြစ်ပြီး ကော့စ် ၁၀ ခုပါတဲ့ဗူးတစ်ဗူးကို ၈ ဒေါ်လာကျော်ဖြင့် တောင်ကိုရီးယားဝက်ဘ်ဆိုက်တစ်ခုကနေ မှာယူလို့ရပါတယ်။

kosk ဆိုတဲ့နာမည်ကို mask နဲ့ ko ဆိုတဲ့ စကားလုံးတွေကိုပေါင်းစပ်ထားတာဖြစ်ပြီး ko ဆိုတာက ကိုရီးယားဘာသာမှာ နှာခေါင်းလို့အဓိပ္ပာယ်ရပါတယ်။

နှာခေါင်းစည်းတပ်ဆင်ရာမှာ နှာခေါင်းအထိ သေချာမတပ်ဆင်တဲ့သူတွေအတွက် ရည်ရွယ်ကာ ကော့စ်နှာခေါင်းစည်းတွေကို ထုတ်လုပ်ထားတာဖြစ်ပါတယ်။

ကော့စ်နှာခေါင်းစည်းဒီဇိုင်းဟာ ပါးစပ်ကနေ ကိုရိုနာဗိုင်းရပ်စ်ဝင်ရောက်နိုင်တယ်လို့ အွန်လိုင်းကနေဝေဖန်မှုတွေရှိသလို စားသောက်ဖို့သွားတဲ့အခါကျရင်တော့ သက်တောင့်သက်သာရှိစေမှာဖြစ်တယ်လို့လည်း အားပေးပြောကြားနေကြကြောင်း ဖော်ပြထားပါတယ်။

သုတေသနပညာရှင်တွေနဲ့ ဒီဇိုင်နာတွေ နှာခေါင်းစည်းအသစ်အဆန်းကို တီထွင်တာဟာ ဒါပထမဆုံးတော့မဟုတ်ပါဘူး။

၂၀၂၁ မတ်လက မက္ကဆီကိုသုတေသီတို့က နှာခေါင်းတစ်ခုတည်းကိုပဲဖုံးအုပ်တဲ့ နှာခေါင်းစည်းကို ဖန်တီးခဲ့ကြသေးတယ်လို့ ရိုက်တာနဲ့ ဂျေရုဆလန်ပို့စ်တို့က ဖော်ပြခဲ့ကြပါတယ်။

ကော့စ်နှာခေါင်းစည်းလေးကို ပုံမှန်နှာခေါင်းစည်းအောက်မှာထားပြီး ဝတ်ဆင်ရမှာဖြစ်ပါတယ်။

ဒါမှသာ အစားစားတဲ့အခါ ကိုဗစ်ရောဂါပိုးဝင်ရောက်နိုင်တဲ့ နှာခေါင်းပေါက်ကို ကာကွယ်ပေးထားမှာဖြစ်ပါတယ်။

source Insider

#LocalNews
Published-7 Feb 2022

 

သာစည်မြို့နယ်တွင် ငွေကျပ် ၁၅ ဒသမ ၃၅ ဘီလီယံကျော်တန်ဖိုးရှိ စိတ်ကြွရူးသွပ်ဆေးပြားများ ဖမ်းဆီးရမိခဲ့တယ်လို့မူးယစ်ဆေးဝါးတားဆီးနှိမ်နှင်းရေးရဲတပ်ဖွဲ့က သိရသည်။

 

ဖြစ်စဥ်မှာ မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့သည် ဇန်နဝါရီလ ၃၁ ရက်နေ့ ညနေ ၄ နာရီအချိန်တွင် မန္တလေးတိုင်းဒေသကြီး၊ သာစည်မြို့နယ်၊ တောင်ကြီး-သာစည်သွားကားလမ်း၊ ကျွဲတပ်ဆုံပူးပေါင်းစစ်ဆေးရေးစခန်းတွင် တောင်ကြီးမှ သာစည်ဘက်သို့ သီဟအောင်(၂၉)နှစ် မောင်းနှင်ပြီး ခွန်တဘောက်(၂၁)နှစ် လိုက်ပါလာသည့် MITSUBISHI FUSO ၁၂ ဘီးမော်တော်ယာဉ်အား သတင်းအရရှာဖွေရာ ယာဉ်ပေါ်မှ ဒေသကာလတန်ဖိုး ၁၅ ဒသမ ၃၅ ဘီလီယံကျော် တန်ဖိုးရှိ စိတ်ကြွရူးသွပ်ဆေးပြား ၁၀၂ ဒသမ ၃၇၅ သိန်း သိမ်းဆည်းရမိခဲ့တယ်လို့ သိရပါတယ်။

 

သတင်းကွင်းဆက်အရ ဖေဖော်ဝါရီလ ၁ ရက်နေ့ ညနေ ၄ နာရီခွဲအချိန် ပူးပေါင်းအဖွဲ့မှ ရန်ကုန်-မန္တလေးအမြန်လမ်းမကြီး၊ မိုင်တိုင်အမှတ်(၁၁၅/၆)အနီးတွင် မူးယစ်ဆေးဝါးများ သယ်ဆောင်ရာ၌ ပူးပေါင်းပါဝင်သူ မနီလာဦး(၂၄)နှစ်အား IPSUM မော်တော်ယာဉ်တစ်စီးနှင့်အတူ ဆက်လက်ဖမ်းဆီးရမိခဲ့တယ်လို့ သိရပါတယ်။

 

စစ်ဆေးဖော်ထုတ်ချက်များအရ သိမ်းဆည်းရမိစိတ်ကြွရူးသွပ်ဆေးပြားများအား ရှမ်းပြည်နယ်(တောင်ပိုင်း)မှ ရန်ကုန်တိုင်းဒေသကြီးသို့ သယ်ဆောင်ခြင်းဖြစ်ကြောင်း သိရှိရသဖြင့် ၎င်းတို့ ၃ ဦးအား ဥပဒေအရအရေးယူထားရှိပြီး ကွင်းဆက်ပြစ်မှုကျူးလွန်သူများအား ဆက်လက်စစ်ဆေးဖော်ထုတ်လျက်ရှိတယ်လို့ သိရပါတယ်။

ymg/hm
#Yangon_Media_Group

Published 07 February 2022

BA.2 မျိုးနွယ်ခွဲအပါအဝင် လက်ရှိအိုမီခရွန်မျိုးဗီဇကွဲရဲ့ မျိုးနွယ်ခွဲ ၄ ခုကို ကမ္ဘာ့ကျန်းမာရေးအဖွဲ့အစည်း WHO က စောင့်ကြည့်လေ့လာလျက်ရှိပါတယ်။

ကနဦးတွေ့ရှိချက်တွေအရ BA.2 က မူလအိုမီခရွန်ထက် ပိုမိုကူးစက်မြန်ပြီး ရောဂါပြင်းထန်မှုလျော့နည်းနိုင်တယ်လို့ ယူဆထားကြပါတယ်။

အိုမီခရွန်မျိုးဗီဇကွဲနဲ့ပတ်သက်ပြီး နိုင်ငံအသီးသီးအနေနဲ့ သတိပေါ့လျော့လို့မဖြစ်ကြောင်း WHO မှ အထွေထွေညွှန်ကြားရေးမှူးနဲ့ အရာရှိတာဝန်ရှိသူတွေက မီဒီယာရှင်းလင်းပွဲမှာ သတိပေးခဲ့ပါတယ်။

BA.2 က အိုမီခရွန်မှခွဲထွက်လာတာ ဖြစ်တဲ့အတွက် သတိထားရမယ့်မျိုးဗီဇကွဲဖြစ်ကြောင်း WHO မှ ကိုဗစ်ထိန်းချုပ်ရေးအဖွဲ့က တနင်္လာနေ့က ပြောကြားလိုက်ပါတယ်။

အမေရိကန်အပါအဝင် နိုင်ငံအများအပြားမှာ ပြီးခဲ့တဲ့ ၁၄ ရက်အတွင်း နေ့စဉ်ကိုဗစ်ရောဂါကူးစက်မှုအရေအတွက် ၄၄ ရာခိုင်နှုန်းကျဆင်းလာပေမယ့် ဗိုင်းရပ်စ်ကဆင့်ကဲပြောင်းလဲနေတာဖြစ်ကြောင်း WHO မှတာဝန်ရှိသူတွေက သတိပေးထားပါတယ်။

WHO အဖွဲ့အစည်းက အိုမီခရွန်နဲ့ပတ်သက်ပြီး အစောဆုံးသတိပေးနိုင်ခဲ့တဲ့အဖွဲ့ဖြစ်ကာ ၂၀၂၁ နိုဝင်ဘာ ၂၆ ရက်နေ့က သတိထားရမယ့်မျိုးဗီဇကွဲဖြစ်ကြောင်း သတ်မှတ်ခဲ့ပါတယ်။

အဲဒီနောက်ပိုင်း အိုမီခရွန်မျိုးနွယ်ခွဲအများအပြားကိုလည်း ဆက်လက်တွေ့ရှိခဲ့ကြပါတယ်။

မူလအိုမီခရွန် BA.1 အပြင် BA.1.1, BA.2, BA.3 တို့လည်း ပါဝင်လာပါတယ်။

WHO စောင့်ကြည့်လေ့လာခဲ့တဲ့ တွေ့ရှိချက်တွေအရ လက်ရှိအချိန်အထိ BA.2 က စိုးရိမ်ရဆုံးမျိုးနွယ်ခွဲဖြစ်နေပါတယ်။

ရောဂါကူးစက်မှုစောင့်ကြည့်လေ့လာရေးဝက်ဘ်ဆိုက် GISAID ရဲ့ တင်ပြချက်အရ ၅၇ နိုင်ငံမှ သတင်းပို့ထားတဲ့ BA.2 ကူးစက်မှုတွေဟာ ပြီးခဲ့တဲ့ ၆ ပတ်အတွင်း အိုမီခရွန်ကူးစက်မှုရဲ့ ၅၀ ရာခိုင်နှုန်းအထိ ပါဝင်ပတ်သက်နေပါတယ်။

သေချာတာတစ်ခုက ဖိလစ်ပိုင်၊ ဒိန်းမတ်၊ နီပေါ၊ စင်္ကာပူ၊ ဆရီလန်ကာနဲ့ အိန္ဒိယတို့မှာ အိုမီခရွန်ကူးစက်မှုက ဒယ်လ်တာထက်ကျော်လွန်နေပြီဖြစ်ပါတယ်။

အိုမီခရွန်ကိုစတင်တွေ့ရှိခဲ့တာ ၁၀ ပတ်လောက်သာရှိသေးပေမယ့် ကူးစက်မှုပေါင်း သန်း ၉၀ ကျော်သွားပြီဖြစ်ပြီး ၂၀၂၀ တစ်နှစ်လုံးကထက် ပိုများခဲ့တာဖြစ်ပါတယ်။

အရင်မျိုးဗီဇကွဲတွေကို ပစ်မှတ်ထားထုတ်လုပ်ခဲ့တဲ့ ကိုဗစ်ကာကွယ်ဆေးတွေဟာ နောက်ထပ်ပေါ်ထွက်လာတဲ့ SARS-CoV-2 မျိုးဗီဇကွဲတွေကို ထိရောက်စွာကာကွယ်နိုင်စွမ်း မရှိဘူးလို့ အငြင်းပွားနေကြပါတယ်။

မျိုးဗီဇကွဲအားလုံးကို ကာကွယ်ပေးနိုင်မယ့် SARS-CoV-2 ကာကွယ်ဆေးကို ထုတ်လုပ်သင့်ပြီဖြစ်ပါတယ်။

source deadline

#LocalNews
Published - 6 Feb 2022
ရန်ကုန်တိုင်းဒေသကြီး၊ ဗဟန်းမြို့နယ်ရှိ ဇီဝိတဒါန သံဃာ့ဆေးရုံကြီး၌ ဆေးရုံဝန်ထမ်းအပါအဝင် ကိုဗစ် ၁၉ ရောဂါ ကူစက်ခံရသူအများအပြားကို တွေ့ ရှိခဲ့သည့် အတွက် ဖေဖော်ဝါရီလ ၃ ရက်နေ့မှစတင်၍ ၁၄ ရက် (နှစ်ပတ်တိတိ)Lock Down ချထားလိုက်ပြီ ဖြစ်တယ်လို့ သိရပါတယ်။

"အဲ့ဒီဆေးရုံက တပည့်ကိုမေးကြည့်တာ Nurse Aid ကလေးတွေ စကူးတာတဲ့ အားလုံး ၂၀ လောက်Positive ထွက်တော့ လူနာတွေထဲက Negativeထွက်ရင်ပြန်ခိုင်းပြီး Positive တွေဘဲချန်ထားတာတဲ့ နှာစေးချောင်းဆိုးလောက်ပါဘဲ၊ အောက်ဆီဂျင်မကျကြဘူးလို့ ပြောတယ်။ ခုတော့နှစ်ပတ် ကွာရန်တင်းထားတယ်။"လို့ အဆိုပါ ဇီဝိတဒါနသံဃာ့ဆေးရုံကြီးနှင့်
နီးစပ်သူတစ်ဦးက ပြောပြခဲ့ပါတယ်။

ထိုဆေးရုံတွင် ဆေးရုံဝန်ထမ်းပေါင်း ၁၀၀ ခန့် ရှိနေပြီး ဆေးကုသမှု ခံယူနေသည့် လူနာသံဃာတော်အပါး ၂၀ နှင့် သီလရှင် ၇ ပါး စုစု ပေါင်း ၁၂၇ ဦးရှိကာ လက်ရှိတွင် ကိုဗစ် ၁၉ ရောဂါပိုးတွေ့ ရှိသူ ၄၀ နီးပါးခန့်မှာ ပြင်ပအဝင်၊အထွက်မှ တစ်ဆင့် ကူးဆက်ခဲ့ခြင်းသာ ဖြစ်နိုင်တယ်လို့လည်း သုံးသပ်ထားကြပါတယ်။

"ဒီနေ့မှ မဟုတ်ပါဘူးရှင် ၃ ရက်နေ့ထဲက Lockdown ချတာပါ။ JSH မှာတော့ ဝန်ထမ်း အယောက် ၂၀ ကူးပြီး ရပ်နေပါတယ်၊ ၃ ရက်နေ့ထဲက Lockdown ချလိုက်ပါတယ်။"လို့ ဇီဝိတဒါနသံဃာ့ဆေးရုံကြီးနှင့် နီးစပ်သူတစ်ဦးက ပြောပါတယ်။

မကြာသေးမီ လပိုင်းက ကုသမှုရပ်နားထားသည့် ဇီဝိတဒါန သံဃာ့ဆေးရုံရှိဌာနများအား ကိုဗစ်‌ ၁၉ စည်းကမ်းများနှင့်အညီ ပြန်လည်ကုသမှုပေးခဲ့သော်လည်း ဝန်ထမ်းများ အပါအဝင် ဆေးကုသမှုခံယူနေသည့် သံဃာများ၌ပါ ကိုဗစ်ရောဂါ ပိုးတွေ့ ရှိခဲ့ရသည့်အတွက် သက်ဆိုင်ရာတိုင်း ကျန်းမာရေးမှ လာရောက်စစ်ဆေးမှုများပြုလုပ်‌လျက်ရှိတယ်လို့ သိရပါတယ်။

ဒါ့အပြင် ယခုကာလတွင် ရန်ကုန်မြို အပါအဝင် မြို့ ကြီးအချို့ မှာ ကိုဗစ်အစုအပြုံလိုက်ဖြစ်ပွားမှုနှင့် အိုမီခရွန် ရောဂါပိုး ကူးစက်တွေလည်းရှိ နေသည့် အတွက် ပြည်သူလူထု တွေအ နေနဲ့ ကိုဗစ်စည်းကမ်းကို အထူးသတိပြုလိုက်နာကြဖို့ နဲ့ ကာကွယ် ဆေးထိုးနှံကြဖို့ကိုလည်း ကျန်းမာရေးပညာရှင်များက တိုက်တွန်းထားပါတယ်။

ထို့အပြင် မကြာ သေးမီရက်ပိုင်းအတွင်းက ရန်ကုန်မြို့ ရှိ စက်ရုံတစ်ခုမှာ ကိုဗစ် ရောဂါ ဖြစ်ပွားသူ တွေကို အစုလိုက်အပြုံလိုက် တွေ့ ရှိခဲ့ပြီး နောက် ၄င်းတို့ထဲမှ ၁၀ ဦး၏ ဓါတ်ခွဲနမူနာများကို စစ်ဆေးရာခဲ့မှ အဆိုပါ ၁၀ ဦးလုံးတွင် အိုမီခရွန် ရောဂါပိုးကိုတွေ့ ရှိခဲ့ရတာဖြစ်တယ်။

ကျန်းမာ ရေးဝန်ကြီးဌာန၏ နောက်ဆုံးထုတ်ပြန်ထားတဲ့ အချက်အလက် တွေ အရလည်း မြန်မာနိုင်ငံမှာ အိုမီခရွန်ရောဂါပိုးကို နိုင်ငံခြားသားရော၊ မြန်မာနိုင်ငံသားအပါအဝင် စုစုပေါင်း ၃၄၈ ဦးထံမှာ တွေ့ ရှိထားပါတယ်။

ဒါ့အပြင် ကိုဗစ်ရောဂါပိုးကို တိုင်းဒေသကြီး၊ ပြည်နယ်အနေနဲ့ ရန်ကုန်တိုင်းဒေသကြီးကတော့ ပိုးတွေ့ မှုအများဆုံးဖြစ်နေပြီး ယခုလက်ရှိထိ ကိုဗစ်-၁၉ ကူးစက်ခံရသူ ၅၃၆,၉၀၄ ဦးအထိ ရှိပြီးလည်း ဖြစ်ပါတယ်။

ဓါတ်ပုံ - ရန်ကုန် ဇီဝိတဒါနသံဃာ့ဆေးရုံ

ymg/kg
#Yangon_Media_Group 

Published 6 Feb 2022

ထိုင်းနိုင်ငံ ဘန်ကောက်မြို့မှာရှိတဲ့ ဩစတြေလျသံရုံးရဲ့ အမျိုးသမီး သန့်စင်ခန်းတွေထဲမှာ စပိုင်ကင်မရာတွေ တပ်ဆင်ထားတာကို တွေ့ရှိရပြီး အဲဒီကိစ္စနှင့်ပတ်သက်လို့ ဝန်ထမ်းဟောင်းတစ်ဦးကို ဖမ်းဆီးထိန်းသိမ်းထားတယ်လို့ သံရုံးအရာရှိတစ်ဦးက ဖေဖော်ဝါရီ ၅ရက်စနေနေ့ကပြောကြားပါတယ်။

Source: AFP/ABC

TV Yangon Times Matters အစီအစဉ် Published -6 Feb 2022 အစီအစဉ်တင်ဆက်သူ ဆရာဟိန်းလတ်နဲ့အတူ နိုင်ငံရေးသိပ္ပံ သုတေသနပညာရှင် ဒေါက်တာ မင်းညို တို့က "နိုင်ငံကြီးပွားတိုးတက်ဖို့ဆိုရာတွင် " ခေါင်းစဉ်အောက်မှာ နိုင်ငံကြီးပွားတိုးတက်ဖို့ဘာတွေလိုအပ်သလဲ၊ဘာတွေလုပ်သင့်သလဲဆိုတာတွေကို အတွေ့အကြုံတွေ ဝေမျှဆွေးနွေးထားကြပါတယ်။ #Yangon_Media_Group

Published 6 Feb 2022

နှင်းတွေထူထပ်စွာကျနေတာကြောင့် တရုတ်နိုင်ငံအနောက်မြောက်ပိုင်း ကန်စုပြည်နယ်ရဲ့ တျန်ရှီးမြို့မှာတည်ရှိတဲ့ ကမ္ဘာ့အမွေအနှစ်နေရာ မေဂျီဂူထွင်းပန်းပုတွေဟာ နှင်းတွေကြားက အင်မတန်လှပတဲ့ ရှုမျှော်ခင်းတစ်ခုကို ဖန်တီးလိုက်သလို ဖြစ်သွားစေခဲ့ပါတယ်။

နှင်းတွေဖုံးလွှမ်းနေတဲ့ ဘေးပတ်ပတ်လည်တောင်တွေကာရံထားတဲ့ မေဂျီတောင်ဂူထွင်းပန်းချီတွေထဲ ဗုဒ္ဓရှင်တော်မြတ်ရဲ့ ရုပ်ပွားတော်တွေကို ရွှံစေးဖြင့်ထုထွင်းထားတာတွေပါဝင်ပါတယ်။အဲဒီရုပ်ပွားတော်တွေနှင့် ဂူတွေကို  မတ်စောက်တဲ့ကျောက်ထထရံတွေအပေါ်မှာ ထင်ရှားပြတ်သားစွာ ဖူးမြင်တွေ့ကြရပါတယ်။

မေဂျီတောင်မှာ ဂူပေါင်း၂၂၁ဂူနှင့် ရွှံ့စေးပန်းပုလက်ရာပေါင်း တစ်သောင်းကျော်ရှိပါတယ်။ အဲဒါတွေဟာ လွန်ခဲ့တဲ့ နှစ်ပေါင်း ၁၆၀၀ကျော်ကတည်းက တည်ရှိနေခဲ့တာဖြစ်ပါတယ်။

ဂျုံရိုးတံတွေနှင့်တူလှလို့ မေဂျီလို့ အမည်ပေးခဲ့တဲ့ အဲဒီတောင်မှာ အေဒီ၃၈၄မှ၄၁၇ အထိ ပထမဆုံးနံရံထွင်းပန်းပုတွေစတင် ထုလုပ်ခဲ့ကြပါတယ်။ တရုတ်နိုင်ငံရဲ့ အထင်ရှားဆုံးဂူထွင်းပန်းပုလက်ရာတွေထဲကတစ်ခုဖြစ်ပြီး “ အရှေ့တိုင်း၏ပန်းပုပြတိုက်” လို့အမည်တွင်ပါတယ်။

 Source CCTV Plus

#LocalNews
Published - 6 Feb 2022
ဒီကနေ့ ( ဖေ ဖော်ဝါရီ ၆ ရက်)၊ မွန်းလွဲပိုင်းအချိန်က အမြန်လမ်းတွင် ကားမီးလောင်မှု
ဖြစ်ပွားပြီး လူ ၂ ဦး သေဆုံးသွားခဲ့ရပါတယ်။

ဖြစ်စဥ်မှာ ရန်ကုန်-မန္တလေးအမြန်လမ်းမကြီး၊ မိုင်တိုင်အမှတ်(၃၁၉/၅)နှင့် (၃၁၉/၆)ကြားတွင် ယာဉ်တစ်စီး အရှိန်မထိန်းနိုင်ဘဲ တိမ်းမှောက်ကာ မီးလောင်မှုဖြစ်ပွားခဲ့ရတာဖြစ်တယ်လို့ ဆိုပါတယ်။

အဆိုပါ ယာဥ်မီးလောင်မှုကို ပြင်စည်အမြန်လမ်းမီးသတ်စခန်းမှ သန္ဓေမီးသတ်တပ်ဖွဲ့ဝင်များ၊ သက်ဆိုင်ရာအဖွဲ့အစည်းများနှင့် ပူးပေါင်း၍ သွားရောက်ကူညီဆောင်ရွက်ခဲ့ ရတာပါ။

သို့ သော်လည်း ယာဉ်ပေါ်ပါ အမျိုးသား(၁)ဦးနှင့် အမျိုးသမီး(၁)ဦးတို့ကတော့ ကားမီး လောင်မှု ကြောင့် သေဆုံးသ့ားခဲ့တာဖြစ်တယ်လို့လည်း အမြန်လမ်း မီးသတ်တပ်ဖွဲ့က သတင်းထုတ်ပြန်ခဲ့ပါတယ်။

Photo - MFSD
ymg/kg
#Yangon_Media_Group 

#LocalNews
Published - 6 Feb 2022

မြန်မာ့လက်မှုအနုပညာစင်တာ (MHC)နဲ့ အသေးစားစက်မှုလက်မှုနှင့် လက်မှုအနုပညာထုတ်ကုန်ပစ္စည်းပြပွဲ၊ ဈေးရောင်းပွဲ အခမ်းအနားကို ဇန်နဝါရီ လ ၅ ရက်နေ့က ဖွင့်လှစ်ခဲ့ပါတယ်။

မြန်မာ့လက်မှုအနုပညာစင်တာကို ရန်ကုန်တိုင်း မြောက်ဥက္ကလာပမြို့နယ်၊ သုဓမ္မာလမ်းမကြီးပေါ်ရှိ အသေးစား စက်မှုလက်မှုလုပ်ငန်းဦးစီးဌာန ရုံးဝန်းအတွင်း တည်ဆောက်ထားတာ ဖြစ်ပါတယ်။

မြန်မာ့လက်မှုအနုပညာစင်တာမှာ ယွန်းထည်ပစ္စည်းတွေ၊ ရက်ကန်းထည်ပစ္စည်းတွေ၊ သစ်သားပန်းပုတွေ၊ ငွေထည် ကြေးထည်ပစ္စည်းတွေ၊ ပန်းချီကားတွေ၊ သစ်သား၊ ဝါး၊ ကျောက်မျက်တို့နဲ့ ပြုလုပ်တဲ့ ပန်းပုပစ္စည်း တွေ၊ ဝါးထည်၊ ကြိမ်ထည်တွေ၊ ကနုကမာ၊ ခရုတို့နဲ့ ပြုလုပ်တဲ့ အလှဆင်ပစ္စည်းတွေနဲ့ တိုင်းဒေသကြီးနှင့် ပြည်နယ်အသီးသီးတို့မှထွက်ရှိတဲ့ လက်မှုအနုပညာပစ္စည်း အမျိုးမျိုးတို့ကို ပြသရောင်းချပေးသွားမှာ ဖြစ်တယ်လို့ သိရပါတယ်။

"မြန်မာနိုင်ငံဟာ သဘာဝကုန်ကြမ်းပစ္စည်းတွေ အလွယ်တကူရရှိနိုင်ပြီး လက်မှုအနုပညာတွေထွန်းကားတဲ့ နိုင်ငံဖြစ်ပေမယ့်လည်း မြန်မာ့လက်မှုပညာပစ္စည်းတွေဟာ ပြည်ပနိုင်ငံတွေကို ကျယ်ကျယ်ပြန့်ပြန့် တင်ပို့ရောင်းချနိုင်တာ မရှိသေးဘဲ နိုင်ငံခြားသားခရီးသွား ဧည့်သည်တွေအပေါ် မျှော်ကိုးရောင်းချနေရတဲ့ အနေအထားမှာပဲ ရှိနေသေးတာကြောင့် မြန်မာ့လက်မှု အနုပညာပစ္စည်းများ အနာဂတ် ဈေးကွက် ကောင်းမွန်စေရေးကို ဖော်ဆောင်ပေးဖို ဒီမြန်မာ့လက်မှု အနုပညာစင်တာကို ဖွင့်လှစ်ပေးတာပဲဖြစ်ပါတယ်" လို့ ပြည်ထောင်စု ဝန်ကြီး ဦးလှမိုးက ပြောပါတယ်။

 

၇၅ နှစ်မြောက် စိန်ရတုနှစ်ပတ်လည် ပြည်ထောင်စုနေ့ကို ကြိုဆိုဂုဏ်ပြုတဲ့အနေနဲ့ မြန်မာ့လက်မှုအနုပညာစင်တာ(MHC)နဲ့ အသေးစားစက်မှုလက်မှုနှင့် လက်မှုအနုပညာထုတ်ကုန်ပစ္စည်းပြပွဲ၊ ဈေးရောင်းပွဲ ကျင်းပပြုလုပ်တာဖြစ်တယ်လို့ သိရပါတယ်။

လက်မှုအနုပညာထုတ်ကုန်ပစ္စည်းပြပွဲ၊ဈေးရောင်းပွဲမှာ ပြခန်းပေါင်း(၇၇)ခန်း ပါဝင်ပြသမှာဖြစ်ပြီး အဆိုပါ ပြခန်းတွေကတဆင့် နိုင်ငံတစ်ဝန်းမှာရှိတဲ့ အသေးစားထုတ်ကုန် ပစ္စည်းတွေကို တစ်နေရာထဲမှာ ဝယ်ယူနိုင်မယ်လို့ သိရပါတယ်။

ymg/ei 

#LocalNews
Published- 6 Feb 2022
ဖေဖော်ဝါရီလ ၅ရက်နေ့ကမကွေးတိုင်းဒေသကြီး၊ မင်းဘူးခရိုင်၊ မင်းဘူး(စကု)မြို့နယ်ရှိ မန်းရွှေစက်တော်ဘုရား ဗုဒ္ဓပါဒ စေတီတော်ဖွင့်ပွဲနှင့် ဓါတ်လှေကားတာဝါဖွင့်ပွဲ အခမ်းအနားကျင်းပခဲ့တယ်လို့ သိရပါတယ်။

နိုင်ငံတော်ဩဝါဒါစရိယဆရာတော် ဘဒ္ဒန္တဥတ္တရမှ မန်းရွှေစက်တော်ဘုရား အောက်ခြေတော်ရာ ပါဒစေတီတော် အလင်းပေါက်ဖန်အုပ်ဆောင်းတော်အား စက်ခလုပ်နှိပ် ဖွင့်လှစ် ပေးခြင်းနဲ့ အထက်စက်တော်ရာ ပါဒစေတီတော် ခြေတော်ရာသံတံခါးအား ဖွင့်လှစ်ပေးခြင်းများ ဆောင်ရွက်ပေးခဲ့ပြီး ဩဝါဒါစရိယဆရာတော်ကြီးများက ဗုဒ္ဓပါဒ စေတီတော်နှစ်ဆူအား ဗုဒ္ဓါဘိသေက အနေကဇာတင် ဘိသိတ်သွန်းတော်မူခဲ့ကြတယ်လို့ သိရပါတယ်။

မန်းရွှေစက်တော်ဘုရား ဓါတ်လှေကားတာဝါနှင့် စင်္ကြန်လျှောက်လမ်းကို Phase-1နှင့် Phase-2 ဟူ၍ နှစ်ကျိပ်ရှစ်ဆူစေတီတော်အနီးမှ ကိုးခန်းကြီးဘုရားအထိ (အလျား ပေ ၂၁၀ x အမြင့် ၁၁၉ ပေ x အကျယ် ၁၂ ပေ) ရှိပြီး၊ ဘုရားကြီးဘဏ္ဍာငွေမှ ခွင့်ပြုငွေကျပ်သိန်းပေါင်း (၁၈၀,၀၀၀)ခန့်ဖြင့် ၂၀၂၁ ခုနှစ်၊ ဇွန်လ ၂၉ ရက်နေ့က စတင်တည်ဆောက်ခဲ့ရာ (ဖေဖော်ဝါရီ ၅ ရက်) ယမန်နေ့တွင် စတင်ဖွင့် လှစ်ပေးခဲ့ကြောင်း၊ ဓာတ်လှေကားတစ်စင်းကို လူ(၂၀)နှုန်းဖြင့် စုစုပေါင်း လူ(၄၀) လိုက်ပါ စီးနင်းနိုင်မယ်လို့ သိရပါတယ်။

မန်းရွှေစက်တော်ရာ ပါဒစေတီတော် ဗုဒ္ဓပူဇနိယပွဲတော်ကာလမှာ နှစ်စဉ်တပို့တွဲလဆန်း ၅ ရက်နေ့မှ မြန်မာနှစ်ဆန်း ၁ ရက်နေ့အထိဖြစ်တယ်လို့ သိရပါတယ်။
ymg/hm

#Yangon_Media_Group 

#LocalNews
Published - 6 Feb 2022

တမူးမြို့မှ ကိုဗစ်လူနာ ၂၈ ဦး ဆေးရုံဆင်းခွင့် ထပ်မံရရှိခဲ့သည့် အတွက် ယနေ့( ဖေ ဖော်ဝါရီလ ၆ ရက် နေ့)အထိ ရောဂါပိုးကင်းစင်သူ(၆၀)ဦး အထိ ဆေးရုံဆင်းခွင့်ရရှိခဲ့ပြီဖြစ်တယ်လို့ သိရပါတယ်။

ယနေ့တွင် ကိုဗစ်ပိုးတွေ့လူနာ(၂၈)ဦးအား သတ်မှတ်ရက်ပြည့်မြောက်ပြီး ရောဂါပိုးမတွေ့ ရှိတော့သဖြင့် နေအိမ်သို့ ပြန်လည်စေလွှတ်ပေးခဲ့တာဖြစ်တယ်လို့ သိရပါတယ်။

တမူးမြို့တွင် ယခုကူးစက်ခံနေရသော ကိုဗစ်ရောဂါပိုးမှာ ကူးစက်မှုမြန်သော်လည်း ကူးစက်ခံရသောလူနာများမှာ ကျန်းမာရေးအတွက် စိုးရိမ်စရာမတွေ့ရပါဘဲ အားလုံးကျန်းမာစွာရှိနေ တယ်လို့လည်း သိရပါတယ်။

အဆိုပါ တမူးမြို့ တွင်(ဇန်နဝါရီလ ၂၄ ရက် နေ့)တစ်ရက်ထဲမှာပင် ကိုဗစ်အတည်ပြုလူနာ ၅၉ ဦးကို စတင်တွေ့ ရှိခဲ့ခြင်းဖြစ်ပြီး အဲ့ဒီလို တွေ့ ရှိပြီး နောက်ပိုင်း ၄ ရက်
အကြာ(ဇန်နဝါရီလ ၂၇ ရက် နေ့)မှာ ကိုဗစ်အတည်ပြု လူနာသစ် ၂၄ ဦး၊ (ဇန်နဝါရီလ ၂၈ ရက် နေ့)တွင် ကိုဗစ်အတည်ပြုလူနာ ၂၉ ဦးနှင့် (ဇန်နဝါရီလ ၃၀ ရက် နေ့)တွင် ကိုဗစ်အတည်ပြု လူနာသစ် ၂၉ ဦးတို့ကို ထပ်မံ တွေ့ ရှိခဲ့တာဖြစ်ပါတယ်။

ဒါ့အပြင် ယခုဖေဖော်ဝါရီလ ၁ ရက်နေ့မှာ တမူးမြို့တွင် ကိုဗစ်အတည်ပြုလူနာ(၆)ဦးကို ထပ်မံတွေ့ ရှိခဲ့ရတာပါ။

ဒါကြောင့် တမူးမြို့တွင် ရောဂါပိုးကူးစက်ခံရပြီးဆေးကုသမှုခံယူနေဆဲ လူနာစုစုပေါင်း(၂၅၉)ဦး အထိ ရှိ နေခဲ့တာဖြစ်ပြီး ယနေ့အထိတော့ ရောဂါပိုးကင်းစင်ပြီဖြစ် တဲ့ ကိုဗစ်လူနာ(၆၀)ဦး အထိ ဆေးရုံဆင်းခွင့်ရရှိခဲ့တာဖြစ်တယ်လို့ သိရပါတယ်။

ကျန်ရှိနေသည့် ပိုးတွေ့လူနာများကိုလည်း ဆေးဝါးကုသမှုတွေကို ဆက်လက်ပြုလုပ်ပေး နေတယ်လို့လည်း ဆိုပါတယ်။

ymg/kg
#Yangon_Media_Group