#Local_News
Published-12 March 2023
ရှမ်းပြည်နယ်(တောင်ပိုင်း)၊ မိုင်းပန်မြို့နယ်တွင် ငွေကျပ်သိန်း ၂၅၂၀ တန်ဖိုးရှိ ဘိန်းဖြူများကို မတ်လ ၁၀ ရက်က ဖမ်းဆီးရမိခဲ့ကြောင်း သိရသည်။ မူးယစ်ဆေးဝါးတားဆီးနှိမ်နင်းရေးရဲတပ်ဖွဲ့မှ တပ်ဖွဲ့ဝင်များပါဝင်သော ပူးပေါင်းအဖွဲ့က မိုင်းပန်မြို့နယ်၊ တာဆန်းကျေးရွာ၊ တာဆန်းတံတားပူးပေါင်းစစ်ဆေးရေးဂိတ်တွင် မော်တော်ယာဉ်များကို စစ်ဆေးရှာဖွေစဉ် မိုင်းပန်မြို့ဘက်မှ မိုင်းတုံမြို့ဘက်သို့ စိုင်းခမ်း မောင်းနှင်လာသည့် NISSAN ၁၂ ဘီးမော်တော်ယာဉ်ပေါ်မှ အထက်ပါအတိုင်း ဖမ်းဆီးရမိခြင်းဖြစ်ကြောင်း သိရသည်။ ယာဉ်ပေါ်တွင် ဆာလာအိတ်များအတွင်းမှ ဘိန်းဖြူအလေးချိန် ၂၁ ကီလို(ဒေသကာလပေါက်ဈေးတန်ဖိုးငွေကျပ်သိန်း ၂၅၂၀)နှင့် လက်ကိုင်ဖုန်း ၁ လုံးတို့ကို တွေ့ရှိသိမ်းဆည်းရမိခဲ့ကြောင်း သိရသည်။ ယင်းကြောင့် ယာဉ်ပေါ်တွင်လိုက်ပါလာသည့်စိုင်းခမ်း(၃၂)နှစ်အား မိုင်းပန်မြို့မရဲစခန်းတွင် မူးယစ်ဆေးဝါးနှင့် စိတ်ကို ပြောင်းလဲစေသောဆေးဝါးများဆိုင်ရာဥပဒေအရ အမှုဖွင့်အရေးယူထားရှိပြီး ကွင်းဆက်များ ဖော်ထုတ်လျက်ရှိကြောင်း သိရသည်။
ymg/ppk
#Yangon_Media_Group
