#Local_News
ဟနွိုင်း၊ စက်တင်ဘာ ၅

ဗီယက်နမ်နိုင်ငံသို့ နိုင်ငံတော်အဆင့် တရားဝင်ချစ်ကြည်ရေးခရီးစဉ်အဖြစ် ရောက်ရှိနေသည့် နိုင်ငံတော်သမ္မတ ဦးမင်းအောင်လှိုင်သည် ဗီယက်နမ်နိုင်ငံသမ္မတ မစ္စတာ တိုလန်းနှင့် တွေ့ဆုံ၍ နှစ်နိုင်ငံအကြား အစဉ်အလာရှိသည့် ချစ်ကြည်ရင်းနှီးမှုနှင့် နိုင်ငံရေးယုံကြည်မှု ပိုမိုခိုင်မာစေရေး၊ ကာကွယ်ရေးနှင့် လုံခြုံရေးပူးပေါင်းဆောင်ရွက်မှု တိုးမြှင့်ရေး၊ ကုန်သွယ်ရေးနှင့် ရင်းနှီးမြှုပ်နှံမှု ချဲ့ထွင်ရေး၊ ဆက်သွယ်ရေး၊ ဒစ်ဂျစ်တယ်နည်းပညာ၊ စိုက်ပျိုးရေး၊ စွမ်းအင်နှင့် ဒေသတွင်းချိတ်ဆက်မှုများ တိုးမြှင့်ရေးအပြင် အာဆီယံနှင့် နိုင်ငံတကာမျက်နှာစာများတွင် အပြန်အလှန်ပံ့ပိုးကူညီရေးတို့ကို ရင်းနှီးပွင့်လင်းစွာ ဆွေးနွေးခဲ့ကြပါသည်။

နိုင်ငံတော်သမ္မတ ဦးမင်းအောင်လှိုင်က ပြောကြားသည်များမှာ -

၁။ နှစ်နိုင်ငံဆက်ဆံရေး အဆင့်မြှင့်တင်ရေး

မြန်မာ-ဗီယက်နမ် နှစ်နိုင်ငံအကြား နှစ်ပေါင်း ၅၀ ကျော် တည်ရှိလာသည့် သမိုင်းအစဉ်အလာရှိ ချစ်ကြည်ရင်းနှီးမှုကို ဆက်လက်ထိန်းသိမ်းပြီး ၂၀၁၇ ခုနှစ်တွင် တည်ထောင်ခဲ့သည့် ဘက်စုံပူးပေါင်းဆောင်ရွက်မှု မိတ်ဖက်ဆက်ဆံရေး ၂၀၂၇ ခုနှစ်တွင် ၁၀ နှစ်ပြည့်မြောက်မည့် အခွင့်အခါကို အသုံးချ၍ နှစ်နိုင်ငံဆက်ဆံရေးကို ပိုမိုမြင့်မားသည့် အဆင့်သို့ တိုးမြှင့်လိုကြောင်း ပြောကြားခဲ့ပါသည်။

၂။ နိုင်ငံရေး၊ ကာကွယ်ရေးနှင့် လုံခြုံရေး ပူးပေါင်းဆောင်ရွက်မှု

အစိုးရ၊ လွှတ်တော်၊ နိုင်ငံရေးပါတီ၊ တပ်မတော်နှင့် ပြည်သူအချင်းချင်း ဆက်ဆံရေးများ တိုးမြှင့်ရန်နှင့် တပ်မတော်နှစ်ရပ်အကြား ရှိရင်းစွဲ ပူးပေါင်းဆောင်ရွက်မှုများ ဆက်လက်အားကောင်းစေရန် ဆန္ဒရှိကြောင်း ပြောကြားခဲ့ပါသည်။ ထို့ပြင် မူးယစ်ဆေးဝါး၊ လူကုန်ကူးမှု၊ ဆိုက်ဘာရာဇဝတ်မှုနှင့် အွန်လိုင်းလိမ်လည်မှု တိုက်ဖျက်ရေးတို့တွင် သတင်းအချက်အလက်နှင့် အတွေ့အကြုံများ ပိုမိုမျှဝေလိုကြောင်း ထည့်သွင်းပြောကြားခဲ့ပါသည်။

၃။ မြန်မာနိုင်ငံ၏ လက်ရှိဖြစ်ပေါ်တိုးတက်မှုများ

မြန်မာနိုင်ငံတွင် ရွေးကောက်ပွဲအပြီး အစိုးရနှင့် လွှတ်တော်များ တာဝန်ယူဆောင်ရွက်နေမှု၊ နိုင်ငံရေးတည်ငြိမ်မှု၊ ငြိမ်းချမ်းရေးနှင့် စီးပွားရေးဖွံ့ဖြိုးတိုးတက်မှုတို့ကို အပြန်အလှန်ဆက်စပ်သည့် ဦးစားပေးလုပ်ငန်းများအဖြစ် ဆောင်ရွက်နေမှုနှင့် NCA မူဘောင်အပေါ်အခြေခံ၍ ပြည်တွင်းငြိမ်းချမ်းရေးကို ဆက်လက်ကြိုးပမ်းနေမှုတို့ကို ရှင်းလင်းပြောကြားခဲ့ပါသည်။

၄။ ကုန်သွယ်ရေးနှင့် ရင်းနှီးမြှုပ်နှံမှု အရှိန်မြှင့်တင်ရေး

နှစ်နိုင်ငံကုန်သွယ်မှုပမာဏ ပြန်လည်တိုးမြှင့်ရန်၊ ဗီယက်နမ်စီးပွားရေးလုပ်ငန်းများ မြန်မာနိုင်ငံသို့ ပိုမိုလာရောက်ရင်းနှီးမြှုပ်နှံရန်နှင့် ယခင်က လုပ်ငန်းရပ်ဆိုင်းခဲ့သည့် ဗီယက်နမ်ရင်းနှီးမြှုပ်နှံမှုလုပ်ငန်းများ ပြန်လည်ဝင်ရောက်လာရန် ဖိတ်ခေါ်ကြောင်း ပြောကြားခဲ့ပါသည်။ ဗီယက်နမ်လုပ်ငန်းရှင်များ ယုံကြည်စိတ်ချစွာ လုပ်ကိုင်နိုင်ရေးအတွက် လိုအပ်သည့် ကူညီစောင့်ရှောက်မှုများ ပံ့ပိုးပေးသွားမည်ဖြစ်ကြောင်းလည်း ပြောကြားခဲ့ပါသည်။

၅။ အနာဂတ်ပူးပေါင်းဆောင်ရွက်မည့် ဦးစားပေးကဏ္ဍများ

စိုက်ပျိုးမွေးမြူရေးနှင့် အစားအစာပြုပြင်ထုတ်လုပ်ရေး၊ စက်မှုဇုန်နှင့် အထူးစီးပွားရေးဇုန်၊ စွမ်းအင်နှင့် ပြန်လည်ပြည့်ဖြိုးမြဲစွမ်းအင်၊ ဆက်သွယ်ရေး၊ ဒစ်ဂျစ်တယ်စီးပွားရေး၊ သိပ္ပံနှင့် နည်းပညာ၊ ပညာရေး၊ ကျန်းမာရေးနှင့် လူ့စွမ်းအားအရင်းအမြစ် ဖွံ့ဖြိုးရေးတို့တွင် ပူးပေါင်းဆောင်ရွက်မှု တိုးချဲ့လိုကြောင်း ပြောကြားခဲ့ပါသည်။

၆။ ဒေသတွင်း ဆက်သွယ်ချိတ်ဆက်မှု

မြန်မာ-လာအို-ဗီယက်နမ်နှင့် မြန်မာ-ထိုင်း-လာအို-ဗီယက်နမ် လမ်းကြောင်းများကို ပိုမိုအားကောင်းစေပြီး မြန်မာနိုင်ငံ၏ ပထဝီအနေအထားနှင့် ထားဝယ်ရေနက်ဆိပ်ကမ်းတို့ကို အသုံးချ၍ တောင်အာရှနှင့် အရှေ့အာရှဈေးကွက်များကို ချိတ်ဆက်နိုင်သည့် Land Bridge အဖြစ် ဖော်ဆောင်နိုင်ကြောင်း အဆိုပြုခဲ့ပါသည်။

၇။ ASEAN နှင့် နိုင်ငံတကာပူးပေါင်းဆောင်ရွက်မှု

ASEAN Unity နှင့် ASEAN Centrality ကို အခြေခံ၍ CLMV၊ ACMECS နှင့် မဲခေါင်ဒေသဆိုင်ရာ ပူးပေါင်းဆောင်ရွက်မှုများတွင် နှစ်နိုင်ငံအပြန်အလှန်ပံ့ပိုးကူညီရန်နှင့် ဒေသတွင်းငြိမ်းချမ်းရေး၊ တည်ငြိမ်ရေးနှင့် ဖွံ့ဖြိုးတိုးတက်ရေးအတွက် ဆက်လက်လက်တွဲလိုကြောင်း ပြောကြားခဲ့ပါသည်။

ဗီယက်နမ်နိုင်ငံသမ္မတ မစ္စတာ တိုလန်းက ပြောကြားသည်များမှာ -

၁။ နိုင်ငံရေးယုံကြည်မှုနှင့် အဆင့်မြင့်ဆက်ဆံရေး တိုးမြှင့်ရေး

မြန်မာ-ဗီယက်နမ် နှစ်နိုင်ငံအကြား ရှိရင်းစွဲချစ်ကြည်ရင်းနှီးမှုနှင့် အပြန်အလှန်နားလည်ယုံကြည်မှုကို ပိုမိုခိုင်မာစေရန်၊ သံအမတ်ကြီးများ၏ ခန့်အပ်လွှာပေးအပ်ပွဲများအပါအဝင် သံတမန်ရေးဆိုင်ရာ ထိတွေ့ဆက်ဆံမှုများနှင့် နိုင်ငံရေးဆွေးနွေးမှုများကို မြှင့်တင်ရန်၊ အဆင့်မြင့်ခေါင်းဆောင်များနှင့် ကိုယ်စားလှယ်အဖွဲ့များ အပြန်အလှန်ချစ်ကြည်ရေးခရီးစဉ်များ တိုးမြှင့်ကာ နှစ်နိုင်ငံအကြား နိုင်ငံရေးယုံကြည်မှုကို ပိုမိုခိုင်မာအောင် ဆောင်ရွက်သွားလိုကြောင်း ပြောကြားခဲ့ပါသည်။

၂။ ကာကွယ်ရေး၊ လုံခြုံရေးနှင့် နယ်စပ်ဖြတ်ကျော်ရာဇဝတ်မှု တိုက်ဖျက်ရေး ပူးပေါင်းဆောင်ရွက်မှု မြှင့်တင်ရေး

နှစ်နိုင်ငံအကြား ကာကွယ်ရေးနှင့် လုံခြုံရေးဆိုင်ရာ ရှိရင်းစွဲပူးပေါင်းဆောင်ရွက်မှုများကို ပိုမိုခိုင်မာစေရန်၊ ပူးပေါင်းဆောင်ရွက်ရေးယန္တရားသစ်များ ဖော်ဆောင်ရန်နှင့် သက်ဆိုင်ရာမူဘောင်များအောက်တွင် မူးယစ်ဆေးဝါး၊ လူကုန်ကူးမှုနှင့် နယ်စပ်ဖြတ်ကျော်ရာဇဝတ်မှုများ တိုက်ဖျက်ရေး၌ နီးကပ်စွာ ပူးပေါင်းဆောင်ရွက်လိုကြောင်း ပြောကြားခဲ့ပါသည်။ ထို့ပြင် အခက်အခဲကြုံတွေ့ခဲ့သည့် ဗီယက်နမ်နိုင်ငံသားများအား မြန်မာနိုင်ငံဘက်မှ ကူညီပေးခဲ့မှုအတွက် ကျေးဇူးတင်ရှိကြောင်း ပြောကြားခဲ့ပါသည်။

၃။ စီးပွားရေး၊ ကုန်သွယ်ရေးနှင့် ရင်းနှီးမြှုပ်နှံမှု တိုးမြှင့်ရေး

နှစ်နိုင်ငံအကြား စီးပွားရေး၊ ကုန်သွယ်ရေးနှင့် ရင်းနှီးမြှုပ်နှံမှုများကို ပိုမိုမြှင့်တင်လိုကြောင်း၊ Green Energy၊ EV၊ ဆောက်လုပ်ရေး၊ စိုက်ပျိုးရေးနည်းပညာနှင့် ဒစ်ဂျစ်တယ်အသွင်ကူးပြောင်းရေး စသည့် အလားအလာရှိသော ကဏ္ဍများတွင် ပူးပေါင်းဆောင်ရွက်မှု တိုးချဲ့လိုကြောင်း ပြောကြားခဲ့ပါသည်။ မြန်မာနိုင်ငံသို့ စီးပွားရေးလုပ်ငန်းရှင်များ ခေါ်ဆောင်လာခဲ့မှုနှင့် မြန်မာနိုင်ငံရှိ ဗီယက်နမ်စီးပွားရေးလုပ်ငန်းများကို ကူညီစောင့်ရှောက်ပေးမှုအတွက်လည်း ကျေးဇူးတင်ရှိကြောင်းနှင့် မြန်မာနိုင်ငံ၏ လူမှုစီးပွားဖွံ့ဖြိုးတိုးတက်ရေးအတွက် ဗီယက်နမ်၏ ဖွံ့ဖြိုးတိုးတက်ရေးအတွေ့အကြုံများ မျှဝေပေးလိုကြောင်း ပြောကြားခဲ့ပါသည်။

၄။ သိပ္ပံနည်းပညာ၊ ဒစ်ဂျစ်တယ်အသွင်ကူးပြောင်းရေးနှင့် ဒေသတွင်းဆက်သွယ်ချိတ်ဆက်မှု မြှင့်တင်ရေး

သတင်းအချက်အလက်၊ သိပ္ပံနှင့် နည်းပညာကဏ္ဍများတွင် အတွေ့အကြုံများ အပြန်အလှန်မျှဝေရန်၊ 5G နှင့် Digital Transformation ဆိုင်ရာ ပူးပေါင်းဆောင်ရွက်မှုများ တိုးမြှင့်ရန်နှင့် Mytel-Viettel ပူးပေါင်းဆောင်ရွက်မှုကို ဆက်လက်အားကောင်းစေလိုကြောင်း ပြောကြားခဲ့ပါသည်။ ထို့ပြင် ဗီယက်နမ်-လာအို-မြန်မာမှတစ်ဆင့် အိန္ဒိယအထိ ချိတ်ဆက်နိုင်မည့် လမ်းနှင့် ရထားလမ်းအပါအဝင် ဒေသတွင်းသယ်ယူပို့ဆောင်ရေးလမ်းကြောင်းများကို ပူးပေါင်းလေ့လာဖော်ဆောင်ကာ အရှေ့-အနောက် ဆက်သွယ်ချိတ်ဆက်မှု ပိုမိုအားကောင်းစေလိုကြောင်း ပြောကြားခဲ့ပါသည်။

၅။ လူမှုရေး၊ ပညာရေး၊ ကျန်းမာရေး၊ ယဉ်ကျေးမှုနှင့် ပြည်သူအချင်းချင်း ထိတွေ့ဆက်ဆံမှု တိုးမြှင့်ရေး

နှစ်နိုင်ငံအကြား ပညာရေးနှင့် လေ့ကျင့်ရေး၊ ကျန်းမာရေး၊ လူမှုရေး၊ ယဉ်ကျေးမှုနှင့် ခရီးသွားလုပ်ငန်းကဏ္ဍများတွင် ပူးပေါင်းဆောင်ရွက်မှု ပိုမိုတိုးချဲ့ရန်နှင့် ပြည်သူအချင်းချင်း ထိတွေ့ဆက်ဆံမှုကို မြှင့်တင်လိုကြောင်း ပြောကြားခဲ့ပါသည်။ ထို့ပြင် မြန်မာနှင့် ဗီယက်နမ်နိုင်ငံရှိ ခရီးသွားမြို့များအကြား တိုက်ရိုက်လေကြောင်းခရီးစဉ်များ တိုးချဲ့ဖွင့်လှစ်နိုင်ရေးကို ကြိုဆိုအားပေးကြောင်း ပြောကြားခဲ့ပါသည်။

၆။ ASEAN နှင့် ဒေသတွင်း၊ နိုင်ငံတကာမျက်နှာစာများတွင် အပြန်အလှန်ပံ့ပိုးကူညီရေး

မြန်မာနိုင်ငံ၏ အချုပ်အခြာအာဏာနှင့် ကိုယ်ပိုင်ရွေးချယ်ထားသည့် ဖွံ့ဖြိုးတိုးတက်ရေးလမ်းကြောင်းကို လေးစားထောက်ခံကြောင်းနှင့် ASEAN Unity နှင့် ASEAN Centrality ကို အလေးထား၍ နှစ်နိုင်ငံအကြား နားလည်မှုနှင့် အပြန်အလှန်ပံ့ပိုးကူညီမှုကို ဆက်လက်မြှင့်တင်လိုကြောင်း ပြောကြားခဲ့ပါသည်။ ထို့ပြင် CLMV၊ ACMECS အပါအဝင် ဒေသတွင်းနှင့် နိုင်ငံတကာပူးပေါင်းဆောင်ရွက်ရေးယန္တရားများတွင် အပြန်အလှန်ပံ့ပိုးကူညီကာ ဒေသတွင်းငြိမ်းချမ်းရေး၊ တည်ငြိမ်ရေးနှင့် ဖွံ့ဖြိုးတိုးတက်ရေးအတွက် နီးကပ်စွာ ဆက်လက်ပူးပေါင်းဆောင်ရွက်လိုကြောင်း ပြောကြားခဲ့ပါသည်။