#LocalNews
Published_14 June 2022

၈ တန်းအောင်ပြီးသူတိုင်း တက်ရောက်နိုင်မည့် ပထမဆုံးသမဝါယမစာရင်းကိုင်ပညာသင်တန်းကျောင်းများကို ဇွန်လ ၁၆ ရက်တွင်ဖွင့်လှစ်မည် ဖြစ်ကြောင်း သမဝါယမနှင့် ကျေးလက်ဖွံ့ဖြိုးရေးဝန်ကြီးဌာန၏ တာဝန်ရှိသူကပြောသည်။

အဆိုပါ သင်တန်းကာလမှာ ၂ နှစ်ဖြစ်ပြီး ပထမနှစ်တွင်၊ Business Accounting ၊ Fundamentals of ICT ၊ သမဝါယမပညာ၊ မြန်မာစာ၊ အင်္ဂလိပ်စာ၊ သင်္ချာ၊ ဘောဂဗေဒတို့ကိုလည်းကောင်း၊ ဒုတိယနှစ်တွင် Cost Accounting ၊ Financial Accounting ၊ Computerized Accounting ၊ Business Organization and Management ၊ သမဝါယမစာရင်းကိုင်ပညာနှင့် စာရင်းစစ်ဆေးခြင်း၊ အင်္ဂလိပ်စာ၊ သင်္ချာ၊ ဘောဂဗေဒ ဘာသာရပ်များကို သင်ကြားကြရမည် ဖြစ်ကြောင်း သိရသည်။

သင်တန်းသားများ၏ Internship Period နှင့် သင်တန်းအပြီး အလုပ်အကိုင်တစ်ပါတည်းရရှိစေရေးအတွက် စီးပွားရေးလုပ်ငန်းရှင်များနှင့် သမဝါယမအသင်းများကို ဖိတ်ခေါ်၍ Job Fair များ ပြုလုပ်ဆောင်ရွက်ပေးမည် ဖြစ်ကြောင်း၊ သင်တန်းပြီးဆုံးအောင်မြင်သူများအား သမဝါယမနှင့် ကျေးလက်ဖွံ့ဖြိုးရေးဝန်ကြီးဌာန သမဝါယမဦးစီးဌာန၊ ပညာရေးနှင့်လေ့ကျင့် သင်ကြားရေးဆိုင်ရာ ညွှန်ကြားမှုအဖွဲ့မှ သင်တန်းဆင်းလက်မှတ် (Certificate) ပေးအပ်သွားမည် ဖြစ်ကြောင်း သိရသည်။

ယင်းအပြင် သင်တန်းပြီးဆုံးအောင်မြင်သူများအနက် သတ်မှတ်အရည်အချင်း ပြည့်မီသူများသည် သမဝါယမကောလိပ်များနှင့် သမဝါယမနှင့်စီမံ ခန့်ခွဲမှုပညာတက္ကသိုလ်များသို့ ပေါင်းကူး၍ ဆက်လက်သင်ကြားနိုင်မည့် အခွင့်အလမ်းများ ရရှိမည်ဖြစ်ကြောင်းလည်း သိရသည်။

မြန်မာနိုင်ငံတွင် တောင်ကြီး၊ မကွေး၊ ပုသိမ်၊ မော်လမြိုင်၊ မန္တလေးတို့တွင် သမဝါယမစာရင်းရေးစာရင်းကိုင်နှင့် သက်မွေးပညာသင်တန်းကျောင်းများ ရှိကြောင်း၊ သင်တန်းတက်ရောက်သူများအား နိုင်ငံတော်က စားသောက်စရိတ်အဖြစ် တစ်လလျှင် ငွေကျပ်သုံးသောင်းအပြင် ဝတ်စုံစရိတ် တစ်နှစ်စာ၂၅၀၀၀ ကျပ် ထောက်ပံ့ကာ နယ်မှ လာရောက်သူများအတွက် နေထိုင်ရန် အဆောင်စီစဉ်ပေးသွားမည် ဖြစ်ကြောင်းသိရသည်။

ymg/mt
#Yangon_Media_Group

#LocalNews
Published _ 14 June 2022

ရန်ကုန်တိုင်းဒေသကြီး သစ်တောဦးစီးဌာနအနေဖြင့် ယခုနှစ်မိုးရာသီတွင် ပြည်သူများအတွက် ပျိုးပင်ပေါင်း ၄၅၀,ဝဝဝ ခန့်စိုက်ပျိုးထားရှိပြီး အမှန်တကယ် အကျိုးဖြစ်ထွန်းမည့် နေရာများကိုစိစစ်ကာ ပျိုးပင်များကို အခမဲ့ ဖြန့်ဝေပေးသွားမည်ဖြစ်ကြောင်း သိရသည်။

"အခုနှစ်မှာ ပျိုးထောင်ထားတဲ့ သစ်မျိုးတွေထဲ ကျွန်း၊ ပျဉ်းကတိုး၊ ပိတောက်၊ ကံ့ကော်၊ ခရေ၊ ပျဉ်းမ၊ မယ်ဇလီ၊ စိန်ပန်း၊ ငုရွှေဝါ၊ ယမနေ၊ မဟော်ဂနီ စတဲ့ ပျိုးပင်တွေ ပါဝင်ပါတယ်။ အဲဒီ့ပျိုးပင်တွေကို သစ်ပင်စိုက်ပျိုး ပွဲတော်တွေမှာ စိုက်ပျိုးခြင်း၊ ပြည်သူတွေနဲ့ ဌာနဆိုင်ရာ တပ်ရင်းတပ်ဖွဲ့တွေက စိုက်ပျိုးခြင်း၊ လမ်းဘေးဝဲယာ တစ်အုပ်တစ်မ စိုက်ပျိုးခြင်းတွေအပြင် လမ်းဦးစီးဌာနနှင့် ကျေးလက်ဖွံ့ဖြိုးရေးဦးစီးဌာနတို့က စိုက်ပျိုးခြင်းတွေမှာ ဖြန့်ဝေပေးသွားမည်" ဖြစ်ကြောင်း ယင်းဌာနမှ သိရသည်။

ယခင်နှစ် မိုးရာသီတွင် ပျိုးပင်ပေါင်း ၄၃၀,ဝဝဝ ကျော် စိုက်ပျိုးကာ အခမဲ့ဖြန့်ဝေပေးခဲ့ပြီး စိုက်ပျိုးပြီးသော သစ်ပင်များကို ကြီးထွားရှင်သန်စေရေးအတွက် သက်ဆိုင်ရာက စဉ်ဆက် မပြတ် ထိန်းသိမ်းစောင့်ရှောက်လျှက်ရှိကြောင်းလည်း သိရသည်။

ymg/NN
#Yangon_Media_Group

#LocalNews
Published - 14 June 2022

ရန်ကုန်ရွှေစျေးကွက်ကို နိုင်ငံတကာနှင့်ချိတ်ဆက်မိစေရန် ရည်ရွယ်၍ ပြည်ပမှရွှေတင်သွင်းမည်ဖြစ်ကြောင်း ရန်ကုန်တိုင်းရွှေလုပ်ငန်းရှင်များအသင်းမှ သိရသည်။

"ရန်ကုန်ရွှေစျေးကွက်နဲ့ နိုင်ငံတကာရွှေစျေးကွက်ကို ချိတ်ဆက်ချင်တဲ့သဘောပါပဲ။ နိုင်ငံခြားကနေ ရွှေတင်သွင်းတဲ့အခါကျတော့ လက်ဝတ်တန်ဆာကို ဒီမှာပြန်လုပ်မယ်။ 3D နည်းပညာတွေ၊ စက်မှုနည်းပညာတွေရမယ်။ အဲဒီလိုရတဲ့အခါကျရင် နိုင်ငံတကာနဲ့လည်းချိတ်မိမယ်။ ပန်းတိမ်လုပ်ငန်းလည်း အများကြီးတိုးတက်လာမယ်။ လောလောဆယ်ကတော့ ကမ္ဘာ့ရွှေစျေးက မြင့်နေပြီးတော့ ပြည်တွင်းရွှေစျေးကနိမ့်နေတဲ့အတွက် လောလောဆယ်အစီအစဥ်ဆွဲထားတာပဲ ရှိသေးတယ်"ဟု ရန်ကုန်တိုင်းရွှေလုပ်ငန်းရှင်များအသင်းမှ ဥက္ကဌ ဦးမျိုးမြင့်ကပြောသည်။

လက်ရှိပြည်တွင်းရွှေဈေးကွက်မှာ ဈေးအမြင့်ပိုင်းတွင်သာရှိ‌နေပြီး ယခုကာလသည် ကျောင်းအပ်နှံချိန်ဖြစ်သည့်အတွက် ဈေးကွက်အေးနေကာ ဝယ်လိုအားနည်း၍ ရောင်းလိုအား အနည်းငယ်များသည့် အ‌ခြေအနေမျိုးဖြစ်နေပြီး ရွှေဈေးမှာသိန်းနှစ်ဆယ် လေးသောင်း၊ ငါးသောင်း ဝန်းကျင်သာရှိကြောင်း သိရသည်။

YGEA အနေဖြင့် မီးလင်းရွှေ အတုံးအခဲအရောင်းအဝယ်ပြုလုပ်သူများအား လိုင်စင်ပြုလုပ်ထားကြရန် ပြီးခဲ့သည့် မေ ၁၈ ရက်ကအသိပေးပြောကြားထားပြီး လိုင်စင်မရှိသည့်ရွှေဆိုင်များကိုလည်း ရွှေအရောင်းအဝယ်လိုင်စင်ပြုလုပ်ကြရန် ထုတ်ပြန်ကြေညာထားသည်။

ymg/sth
#Yangon_Media_Group

#WorldScience
Published 14 June 2022

အတွေးအခေါ်ပညာရှင်တွေက လူသားတွေဟာ မွေးကတည်းက လူ့ကျင့်ဝတ်တရားသိရှိတာလား ဒါမှမဟုတ် အသက်အရွယ်ကြီးလာမှ လေ့လာသင်ယူကြတာလားဆိုတာကို နှစ်ပေါင်းများစွာကို စူးစမ်းခဲ့ကြပါတယ်။

အခုအခါမှာတော့ ကလေးငယ်ငယ်လေးတွေက ကိုယ်ကျင့်တရားအမှားအမှန်ကိုဆုံးဖြတ်တတ်ပြီး လူသားမဆန်တဲ့ အပြုအမူများကို အပြစ်ပေးချင်စိတ်ရှိကြောင်း တွေ့ရှိခဲ့ကြပြီး လူတွေဟာ မွေးတဲ့အချိန်တုန်းက ကိုယ်ကျင့်တရားကောင်းကြတယ်လို့ ယူဆလို့ရနေပါတယ်။

စမ်းသပ်ချက် ပြုလုပ်ရာမှာတော့ ဂျပန်ပညာရှင်များက မျက်လုံးခြေရာခံစနစ်ကိုအသုံးပြုကာ ကွန်ပျူတာဖန်သားပြင်ပေါ်က လူမျက်နှာနဲ့တူတဲ့အတုံးလေးတွေကို အသက် ၈ လအရွယ်ကလေးတွေအနေနဲ့ ဆုံးဖြတ်ပေးနိုင်ခြင်းရှိ/မရှိ လေ့လာခဲ့ကြပါတယ်။

ကလေးငယ်တွေက တစ်စုံတစ်ခုအပေါ် ကြမ်းကြမ်းတမ်းတမ်းပြုမူတဲ့သူကို အပြစ်ပေးချင်တဲ့စိတ်ပိုများနေတာကို တွေ့ရှိခဲ့ကြပါတယ်။

ရရှိလာတဲ့ရလာဒ်တွေကတော့ မွေးလာတဲ့အချိန်မှာ မတရားမှုကို အပြစ်ပေးချင်တဲ့စိတ် လှုံ့ဆော်မှုမျိုးရှိနေပြီး အသက်ကြီးလာတဲ့အခါ သိရှိလာရတာမျိုးနဲ့ ဆန့်ကျင်ဘက်ဖြစ်နေပါတယ်။

"မတရားတာကို ဆန့်ကျင်တဲ့စိတ်က အသက်အလွန်ငယ်တဲ့အချိန်မှာတည်းက ရှိနေလားဆိုတာကို ကျွန်တော်တို့သိချင်ခဲ့ကြပါတယ်၊ ကိုယ်ကျင့်တရားက သင်ယူလာရတာလားဆိုတာကိုလည်း သိရှိလာရပါတယ်" လို့ အိုဆာကာတက္ကသိုလ်မှ ဦးဆောင်စာတမ်းပြုစုသူ'ယာဆူဟီရိုကာနာကိုဂီ'က ဆိုပါတယ်။

စမ်းသပ်မှုပြုလုပ်ရာမှာ အသက် ၈ လအရွယ်ကလေး ၁၂၄ ယောက်ကို မိဘတစ်ဦးရဲ့ပေါင်ပေါ်မှာတင်ပြီး ကွန်ပျူတာပေါ်က လှုပ်ရှားမှုများကိုကြည့်စေခဲ့ပါတယ်။

ကလေးက ဘယ်နေရာကိုကြည့်နေလဲဆိုတာကိုသိရဖို့ မျက်လုံးခြေရာခံစနစ်တစ်ခုတပ်ဆင်ထားပါတယ်။

ပြသမှုထဲမှာ မျက်လုံးနှစ်လုံးပါတဲ့ လေးထောင့်တုံးအစိမ်းရောင်တစ်ခုနဲ့ လိမ္မော်ရောင်တစ်ခုတို့ကို ပြသထားပါတယ်။

ကလေးက လိမ္မော်ရောင်တုံးကိုကြည့်လိုက်ရင် ကျောက်တုံးတစ်ခုပြုတ်ကျလာပြီး လေးထောင့်တုံးပြားသွားပါတယ်။

ထို့အတူ အစိမ်းရောင်တုံးကိုကြည့်လိုက်ရင်လည်း ကျောက်တုံးပြုတ်ကျလာပြီး လေးထောင့်တုံးလေးပြားသွားပါတယ်။

နောက်တစ်ဆင့်ကတော့ အစိမ်းရောင်တုံးက လိမ္မော်ရောင်တုံးနောက်ကိုလိုက်ကာ ရန်လိုတွန်းတိုက်နေတဲ့ပုံစံမျိုး ၃ ကြိမ်ပြသခဲ့ပါတယ်။

အဲဒီနောက်မှာတော့ ကလေးတွေက ရန်လိုတဲ့ပုံစံဖြစ်နေတဲ့အစိမ်းရောင်တုံးကိုသာ အကြည့်များနေတာကို တွေ့ရှိခဲ့ရပါတယ်။

သုတေသီအဖွဲ့ရဲ့ပြောကြားချက်အရ အစိမ်းရောင်တုံးက လိမ္မော်ရောင်ကိုရန်လိုနေတာကြောင့် ကလေးတွေက အစိမ်းရောင်တုံးကိုအပြစ်ပေးချင်ကြတဲ့ လက္ခဏာမြင်တွေ့ရကြောင်း ဖော်ပြထားပါတယ်။

"ရလာဒ်တွေက အံ့ဩစရာကောင်းပါတယ်၊ စကားမပြောတတ်သေးတဲ့ကလေးတွေက ရန်လိုတဲ့အရာကို မျက်လုံးနဲ့လိုက်ကြည့်ပြီး အပြစ်ပေးချင်ကြတာကို တွေ့ရှိခဲ့ရပါတယ်" လို့ 'ကာနာကိုဂီ'ကပြောကြားခဲ့ပါတယ်။

ကလေးငယ်တွေဆီကနေ အခုလိုဆုံးဖြတ်ချက်မျိုးကို တိုင်းတာတာဟာ ကမ္ဘာပေါ်မှာပထမဆုံးလေ့လာမှုဖြစ်တယ်လို့ သုတေသီတွေကဆိုပါတယ်။

ယခုလေ့လာမှုအသစ်ကို Nature Human Behaviour ဂျာနယ်မှာဖော်ပြခဲ့တာဖြစ်ပါတယ်။

Source: DailyMail
#Yangon_Media_Group

#LocalNews
Published _ 14 June 2022

မြန်မာနိုင်ငံအတွင်း ဘဏ်များမရှိသည့်၊ ဝေးလံ၍ လမ်းပန်းဆက်သွယ်မှု ခက်ခဲသော ဒေသများရှိ ပြည်သူများကို မိုဘိုင်းလ်ဖုန်းအသုံးပြုပြီး ငွေကြေးဆိုင်ရာဝန်ဆောင်မှုလုပ်ငန်းများအား လုံခြုံစိတ်ချစွာ၊ ရိုးရှင်းလွယ်ကူ လျှင်မြန်ချောမွေ့စွာဖြင့် ဆောင်ရွက်နိုင်ရေးကို မြန်မာမိုဘိုင်းလ်ငွေကြေးဝန်ဆောင်မှုကုမ္ပဏီနှင့် ရန်ကုန်မြို့တော်စည်ပင်သာယာရေး ကော်မတီတို့ ပူးပေါင်းလုပ်ဆောင်နေလျှက်ရှိကြောင်း သိရသည်။

"မိုဘိုင်းလ်ဖုန်းကွန်ယက်နဲ့ ပြည်သူလူထုအတွင်းမှာ မိုဘိုင်းလ်ဘဏ် (Mobile Banking) နဲ့ အသေးစားငွေကြေး ဝန်ဆောင်မှုလုပ်ငန်း (Microfinance)တွေ၊ ဘဏ်လုပ်ငန်း နည်းစနစ်တွေနဲ့
အညီ တစ်နိုင်ငံလုံး ကျယ်ကျယ်ပြန့်ပြန့် အကျိုးထိရောက် အောင်မြင်စေဖို့တွေ လုပ်ဆောင်သွားမယ်" ဟု မြန်မာမိုဘိုင်းလ် ငွေကြေးဝန်ဆောင်မှုကုမ္ပဏီမှ အမှုဆောင်အရာရှိချုပ် ဦးကျော်စွာဦးက ပြောသည်။

မြန်မာမိုဘိုင်းလ်ငွေကြေးဝန်ဆောင်မှု ကုမ္ပဏီမှ မီတာဘေလ်ဝန်ဆောင်မှုနှင့် ပတ်သက်၍ ယမန်နေ့ ဇွန်လ ၁၃ရက် ရန်ကုန်မြို့တော်စည်ပင်သာယာရေး ကော်မတီ ပထမထပ်ရှိ အစည်းအဝေးခန်းမ၌ ကျင်းပပြုလုပ်စဥ် ယင်းကဲ့သို့ပြောကြားခဲ့ခြင်းဖြစ်သည်။

မိုဘိုင်းလ်ဖုန်း ရှိယုံဖြင့် နိုင်ငံတကာ ငွေကြေးလွဲပြောင်းခြင်း ဝန်ဆောင်မှု လုပ်ငန်းတွေကို ပြည်သူများ သုံးစွဲနိုင်ရန် ရည်ရွယ်ချက်ဖြင့်ဝန်ဆောင်မှုပေးသွားမည်ဖြစ်ကြောင်း သိရသည်။

ymg/NN
#Yangon _Media_Group

#LocalNews
Published - 14 June 2022

သာကေတမြို့နယ်၊ တိုင်းရင်းသားကျေးရွာအနီးရှိ ပဲခူးမြစ်အတွင်း ရေလယ်ကျွန်း အပန်းဖြေစခန်း စီမံကိန်း အကောင်အထည်ဖော် ရန်ကုန်တိုင်းဒေသကြီးအစိုးရအဖွဲ့ထံတင်ပြထားကြောင်း မြန်မာနိုင်ငံခရီးသွားလုပ်ငန်းရှင်များအသင်းမှ သိရသည်။

"ရေပင်လယ်ကျွန်း အပန်းဖြေစခန်းစီမံကိန်းဆောင်ရွက်ဖို့အတွက် တင်ပြထားတယ်။ အခုကတော့ ရေလယ်အပန်းဖြေစခန်းတည်ဆောက်ဖို့ ဖြစ်နိုင်စွမ်းမြစ်ချောင်း လေ့လာဆန်းစစ် အကဲဖြတ်မှုနဲ့ ရေအရင်းအမြစ် သုံးစွဲမှုတွေကို လေ့လာဆန်းစစ်နေတုန်းပဲရှိသေးတယ်"ဟု မြန်မာနိုင်ငံခရီးသွားလုပ်ငန်းရှင်များအသင်းမှ ဥက္ကဌ ဦးနောင်းနောင်းဟန်က ပြောသည်။

အဆိုပါ ရေလယ်ကျွန်းအပန်းဖြေစခန်း စီမံကိန်းတွင် အပျော်စီးသင်္ဘော ( River Cruise) ခရီးစဉ်များ၊ တိုင်းရင်းသားရိုးရာ အစားအစာများ ပါဝင်သည့် စားသောက်ဆိုင်များ၊ သစ်ပင်ပန်းမန်နှင့် သီးနှံပင်များ စိုက်ပျိုးထားရှိမည့်စိုက်ခင်းများ၊ မြန်မာမှုလက်ရာများဖြင့် ပြုလုပ်ထားသော နားနေဆောင်များနှင့် နေဝင်ဆည်းဆာအလှကို ကြည့်ရှုခံစား လေ့လာနိုင်မည့်နေရာများ ပါဝင်မည်ဖြစ်ကြောင်း သိရသည်။

ယင်းအပြင် ရေလွှာလျှော၊ ရေကန်၊ မြက်ခင်းတု၊ မြင်းစီးကွင်းများအပါအဝင် အဆင့်မြင့် ဟိုတယ်တစ်လုံးပါ ထည့်သွင်း တည်ဆောက်ရန် စီစဉ်ထားကြောင်း သိရသည်။

ရေပင်လယ်ကျွန်း အပန်းဖြေစခန်းကို ရေပေါ်တွင် တည်ဆောက်ရန် မြစ်ချောင်း လေ့လာဆန်းစစ် အကဲဖြတ်မှုနှင့် ရေအရင်းအမြစ်သုံးစွဲမှုများကို လေ့လာဆန်းစစ်နေသည်ဟုလည်း သိရသည်။

ရေပင်လယ်ကျွန်းအပန်းဖြေစခန်း တည်ဆောက်ပြီးစီးပါက ပြည်တွင်း ပြည်ပခရီးသွား ဧည့်သည်များ ရန်ကုန်မြို့၏ မြစ်ကြောင်း တစ်လျှောက်ရှိ နေဝင်ချိန်ဆည်းဆာအလှကို မြစ်တွင်းအပျော်စီးသင်္ဘောခရီးစဉ်ဖြင့် ကြည်ရှုခံစားနိုင်မည်ဖြစ်ကြောင်း သိရသည်။

ymg/sth
#Yangon_Media_Group

#WorldHealth
Published 14 June 2022

ကလေးမိခင်တစ်ဦးဟာ တစ်နေ့ကို ခဏတာလေဖြတ်ခြင်းမျိုး ၁၅ ကြိမ်လောက်ခံစားနေရကာ အသက်ဆုံးရှုံးမှာကိုတွေးပူပြီး သူ့ကလေးအတွက်နှုတ်ဆက်စာတောင် ရေးသားခဲ့ပါတယ်။

အဲဒီနောက် ခွဲစိတ်ကုသမှုခံယူခဲ့ပြီး အသက်ဆက်ရှင်သန်ခဲ့ပါတယ်။

အိုဟိုင်ယိုပြည်နယ်မှ အသက် ၃၉ နှစ်အရွယ်'ကိတ်ဆစ်ပယ်'ဟာ ကိုယ်ဝန်ဆောင်ပြီးနောက် ကြံ့ခိုင်မှုအားနည်းခဲ့ပြီး အစောပိုင်းဝေဒနာလက္ခဏာများ ခံစားခဲ့ရပါတယ်။

သူ့ရဲ့သားယောက်ျားလေးကို မွေးဖွားပြီး ၃ လအကြာမှာတော့ ကလေးအမေဟာ အိမ်မှာနေရင်းလဲကျသွားခဲ့ပြီး စက္ကန့် ၃၀ လောက်ကြာအောင် အကြောသေသွားခဲ့ရာ အရေးပေါ်ဌာနသို့သွားရောက်ခဲ့ရပါတယ်။

ဆရာဝန်တွေကတော့ မိခင်ဖြစ်သူဟာ ဗိုက်ခွဲမွေးပြီးနောက် ကလေးအမေတစ်ယောက်ဖြစ်လာရခြင်းရဲ့ စိတ်ဖိစီးမှုများကြောင့်ဖြစ်မယ်လို့ အစပိုင်းက ယူဆထားကြပါတယ်။

တိရိစ္ဆာန်ဆေးကုဆရာဝန်ဖြစ်တဲ့'ဆစ်ပယ်'က အခြားဆရာဝန်များနဲ့ ရောဂါရှာဖွေစစ်ဆေးကြည့်ရာမှာ ဦးခေါင်းအနောက်ဘက်က သွေးကြောများကျဉ်းမြောင်းပိတ်ဆို့ခြင်းကြောင့် လေဖြတ်ခြင်းခံစားရတာဖြစ်တယ်လို့ သိရှိခဲ့ရပါတယ်။

ဦးနှောက်ထဲမှာ သွေးလည်ပတ်စီးဆင်းမှုကောင်းမွန်အောင် ယခုနှစ်အတွင်းခွဲစိတ်ပြီးတဲ့အခါမှာတော့ ခဏတာလေဖြတ်ခြင်းဝေဒနာ သက်သာသွားခဲ့ပါတယ်။

သူ့ကိုကုသပေးတဲ့ ကလိဗ်လန်းဆေးခန်းမှဆရာဝန်များက ကလေးအမေဟာ ကိုယ်ဝန်ဆောင်ရခြင်းကြောင့် ဒီလိုအခြေအနေဖြစ်ပေါ်စေတာမဟုတ်ပေမယ့် ကိုယ်ဝန်ဆောင်ခြင်းကြောင်း ပိုမိုဆိုးရွားလာတတ်ကြောင်း ရှင်းပြခဲ့ပါတယ်။

အမေရိကန်လူမျိုး ၁ သန်းမှာ တစ်ယောက်ကဦးနှောက်သွေးကြောပိတ်ခြင်းမျိုး ကြုံတွေ့ရတတ်ပြီး အမျိုးသမီးတွေမှာပိုအဖြစ်များကြောင်း ဂျွန်စ်ဟော့ပ်ကင်းစ်ဆေးကုသစင်တာက ပြောကြားလိုက်ပါတယ်။

သွေးလွှတ်ကြောပိတ်ဆိုရတဲ့အကြောင်းအရင်းကို သေချာမသိရသေးပေမယ့် မျိုးရိုးဗီဇနဲ့သက်ဆိုင်နေနိုင်ပါတယ်။

ဒီဝေဒနာဖြစ်ပွားသူတွေမှာ ခဏတာလေဖြတ်ခြင်းမျိုးအပြင် ခေါင်းကိုက်ခြင်း၊ စကားပြောဆိုဆက်ဆံဖို့ခက်ခဲခြင်း၊ လူနဲ့စိတ်နဲ့မကပ်တဲ့ လှုပ်ရှားမှုမျိုးဖြစ်ခြင်းတို့ ခံစားရနိုင်ပါတယ်။

ခံစားရတဲ့ လူအများအပြားမှာတော့ သွေးကျဲဆေးအသုံးပြုပြီး ဦးနှောက်ကိုသွေးရောက်ရှိမှုကောင်းမွန်အောင် ကုသနိုင်ပေမယ့် အချို့လူတွေမှာတော့ ခွဲစိတ်ကုသမှသက်သာနိုင်ပါတယ်။

ကုသမှုမခံယူခင်က သူ့ရဲ့ကလေးအတွက် နှုတ်ဆက်စာရေးသားထားရာမှာ 'သားကိုနေ့တိုင်းထွေးပွေ့နမ်းရှု့ချင်ပေမယ့် အဲဒီလိုမလုပ်နိုင်တာတောင်းပန်ပါတယ်၊ အသက်တွေကြီးလာပြီး အမေကိုယ်တိုင်ထိန်းကျောင်းပေးချင်သေးတယ်၊ သားကိုအမေချစ်တယ်' လို့ ရေးသားခဲ့ပါတယ်။

အဲဒီနောက်ဦးနှောက်နဲ့ အာရုံကြောအထူးကုဆီသွားပြီးပြသရာမှာ ဦးနှောက်သွေးကြောကျဉ်းရောဂါဖြစ်နေကြောင်း တွေ့ရှိခဲ့ပါတယ်။

အစက သွေးကျဲဆေးပေးပြီးကုသပေမယ့် ဝေဒနာသက်သာခြင်းမရှိရာ အိုဟိုင်ယိုရှိ ကလိဗ်လန်းဆေးခန်းသို့ ရောက်ရှိလာပါတယ်။

အဲဒီကဆရာဝန်တွေက ခွဲစိတ်မှုပြုလုပ်ပြီးနောက် ၂ ရက်အကြာမှာ ဆေးရုံဆင်းခဲ့ရပြီး အဲဒီနောက်ပိုင်း နောက်ထပ်လေဖြတ်ခြင်းမျိုးမခံစားရတော့ပါဘူး။

Source: DailyMail
#Yangon_Media_Group

#WorldNews
Published 13 June 2022

ကမ္ဘာ့အကြီးဆုံး နွားရိုင်းသတ်ကွင်းကြီးဖြစ်တဲ့ မက္ကဆီကိုပလာဇာမှာ နွားရိုင်းသတ်ပွဲပြုလုပ်ခြင်းကို ရက်အကန့်အသတ်မရှိ ဆိုင်းငံ့ပိတ်ပင်လိုက်ကြောင်း အစိုးရတရားသူကြီးတစ်ဦးက သောကြာနေ့မှာ အမိန့်ချခဲ့ပါတယ်။

#Yangon_Media_Group

Published 13 June 2022

ဂျပန်နိုင်ငံ ကာဝါဆာကီအကြီးစားစက်မှုလုပ်ငန်းက အင်ဂျင်နီယာတွေဟာ သူတို့ရဲ့ နောက်ဆုံးတီထွင်တဲ့ စီးနင်းလို့ရတဲ့ ခြေလေးချောင်းသွား စက်ရုပ်တစ်ရုပ်ကို ထုတ်ဖော်ပြသလိုက်ကြပါတယ်။

စက်ရုပ်ကို ဥရောပ၊အာရှနှင့် အာဖရိက အရှေ့မြောက်ပိုင်းက တောင်တန်းတွေမှာ တွေ့ရတတ်တဲ့ အိုင်ဘက်စ်လို့ခေါ်တဲ့ ဆိတ်ရိုင်းမျိုးစိတ်တစ်မျိုးရဲ့ ပုံံစံ ဖန်တီးထားခြင်းဖြစ်ပါတယ်။

စက်ရုပ်အမည်ကိုတော့ ဘက်ဇ် Named "BEX"လို့ အမည်ပေးထားပြီး အဲဒီနမူနာစက်ရုပ်ဟာ ကြမ်းတမ်းပြီး မပြေပြစ်တဲ့ မြေပြင်အနေအထားတွေမှာ ဖြတ်သန်းသွားလာနိုင်ပါတယ်။အဲဒီအပြင် လေးလံတဲ့ပစ္စည်းတွေကိုလည်း ဆောက်လုပ်ရေး လုပ်ငန်းခွင်တွေနှင့် လယ်ယာလုပ်ငန်းတွေမှာ သယ်ဆောင်ပေးပို့နိုင်ပါတယ်။ လူတွေကိုလည်း တင်ဆောင်သယ်ပို့နိုင်ပြီး သူတို့ရဲ့နေရာတွေမှာ အလုပ်တွေ လုပ်ကိုင်နိုင်ပါတယ်။ အခုတီထွင်လိုက်တဲ့ စက်ရုပ်ဟာ ဂျပန်ရဲ့ သက်ကြီးရွယ်အို လူအဖွဲ့အစည်းကို ကူညီပေးနိုင်ဖို့ နည်းလမ်းတစ်ခုဖြစ်ပါတယ်။

ဂျပန်နိုင်ငံမှာ အသက်အရွယ်ကြီးရင်တဲ့လူ့အဖွဲ့အစည်းဟာ ခပ်မြန်မြန်ကြီးထွားလာနေလို့ စီးပွားရေးနှင့် နိုင်ငံရေး ပြဿနာကြိးတွေ ဖြစ်ပေါ်စေပါတယ်။ ဘာဖြစ်လို့လဲဆိုတော့ လျော့နည်းလာတဲ့ ငယ်ရွယ်သူအုပ်စုက ကြီးမားလာတဲ့ အသက်ကြီး အုပ်စုတွေကို ကူညီထောက်ပံ့ပေးနေရလို့ဖြစ်ပါတယ်။

ဂျပန်လူဦးရေရဲ့ ၃၀ ရာခိုင်နှုန်းဟာ အသက်၆၅နှစ်အထက်ဖြစ်ပါတယ်။ အများစုမှာ အမျိုးသမီးတွေဖြစ်ပြီး လာမယ့် ဆယ်စုနှစ်တွေမှာ ပိုပြီးများလာမယ့် အနေအထားမှာရှိနေပါတယ်။

Source AFP

#LocalNews
Published - 13 June 2022

မြန်မာနိုင်ငံအနေနဲ့ ကမ္ဘာ့ကုလသမဂ္ဂစားနပ်ရိက္ခာနှင့် လယ်ယာစိုက်ပျိုးရေးအဖွဲ့ (FAO)ရဲ့ပရော်ဂျက်မရလိုက်တဲ့အတွက် ကိုဗစ်အတွက်ဆေးဘက်ဝင်တဲ့ ဆေးခါးကြီးပင်ကို ကျယ်ကျယ်ပြန့်ပြန့်မစိုက်ပျိုးတော့နိုင်ဘဲ တစ်ပိုင်တစ်နိုင်သာ စိုက်ပျိုးနိုင်တော့မှာဖြစ်တယ်လို့ သိရပါတယ်၊၊

#Yangon_Media_Group

#LocalNews
Published_13 June 2022

ကချင်ပြည်နယ်၊ ဖားကန့်မြို့တွင် ဥရုချောင်းရေလျှံ၍ ရေဘေးသင့်သူ ၂၂၀၀ ကျော်ထိ ရှိလာကြောင်း Coln Foundation က သိရသည်။

ပြီးခဲ့သည့် ဇွန်လ ၁၁ ရက်မှစကာ မိုးဆက်တိုက်ရွာသွန်းသောကြောင့် ဥရုချောင်းရေလျှံလာသဖြင့် လူနေအိမ်များ ရေနှစ်မြှုပ်ခဲ့သည့်အတွက် ဖားကန့်ကျောက်ဝိုင်း၊ ငှက်ပျောတော ၊မရှီကထောင် ရပ်ကွက်အပါအဝင် ဖားကန့်မြို့နယ် မြို့ပေါ် ငါးရပ်ကွက်မှ လူနေအိမ်များ ရေနစ်မြုပ်၍ ရေဘေးသင့်ပြည်သူများ ၂၂၀၀ ကျော် ဘေးလွတ်ရာသို့ တိမ်းရှောင်နေရခြင်း ဖြစ်ကြောင်း သိရသည်။

"ရေးဘေးသင့်ပြည်သူ မိသားစုဝင်၂၂၀၀ ကျော်အတွက် ထမင်းဘူး ၊ ရေသန့်တွေကို မနက်ရောညပါ စီစဉ်ထားရှိပြီးပါပြီ၊ထမင်းရေသန့် တစ်နပ်စာကို ငွေကျပ် ၂၅ သိန်းပါ။အလှူရှင်တွေကလှူကြပါတယ်၊လောလောဆယ်တော့ လှူနေသူတွေရှိလို့ ကျေးဇူးတင်ပါတယ်"ဟု ကွန်းဖောင်ဒေးရှင်း ပရဟိတအသင်း တာဝန်ရှိသူက ပြောသည်။

ဖားကန့်မြို့တွင် နှစ်စဉ်မိုးရာသီကျရောက်သည့်အချိန်တိုင်း မိုးဆက်တိုက်ရွာသွန်းပါက ဥရုချောင်းရေ စိုးရိမ်ရေမှတ်ကိုရောက်ရှိကာ ရေလျှံ၍ လုံးခင်း၊ဖားကန့်၊ဆိုင်းတောင် ရပ်ကွက်များ ရေမြုတ်လေ့ရှိကြောင်း ဒေသခံများက ပြောသည်။

ymg/mt
#Yangon_Media_Group

#LocalNews
Published_13 June 2022

ဖားကန့်မြို့နယ်တွင် ကျောက်စိမ်းလုပ်ကွက်ဟောင်းကျင်းအတွင်း ပြုတ်ကျသေဆုံးသွားသည့် လူသုံးဦး၏ ရုပ်အလောင်းရှာဖွေရေးရပ်နားလိုက်ပြီဖြစ်ကြောင်း လူမှုကူညီရေးအဖွဲ့များက သိရသည်။

ဇွန်လ ၉ ရက် နံနက် ၉ နာရီခန့်က ဖားကန့်ဆေးရုံသို့ လသားအရွယ်ကလေးငယ်အား ကာကွယ်ဆေးထိုးပေးရန်လာရောက်သည့် မော်မောင်းလျှံကျေးရွာမှ မိသားစုတစ်စု စီးလာသော မော်တော်ယာဉ်မှာ ဖားကန့်မြို့ ရှရော်ခ၊ မော်မောင်းလယန်အတက် လမ်းဆုံ၊အေးမြသာယာအနီး ကားဘရိတ်ပေါက်ကာ ကျောက်စိမ်းလုပ်ကွက်ဟောင်း ကျင်းအတွင်း ပြုတ်ကျခဲ့သည့်အတွက် ယာဉ်ပေါ်ပါ မိသားစုဝင်သုံးဦးလုံး သေဆုံးခဲ့ကြောင်းသိရသည်။

ယင်းမိသားစု ကားပြုတ်ကျခဲ့သည့် ကျောက်စိမ်းလုပ်ကွက်ဟောင်းကျင်းမှာ အနက် ပေ ၄၀၀ ခန့်ရှိကြောင်း၊မိသားစုဝင်သုံးဦး၏ ရုပ်အလောင်းကို ဘတ်ဟိုးယာဉ်၊ ရေငုတ်ပစ္စည်းကိရိယာများဖြင့်သုံးရက်ခန့် အချိန်ပေးရှာဖွေခဲ့ရာ ဇွန်လ ၁၁ ရက်က အဆိုပါ မိသားစု စီးလာသည့် ပါဂျဲရိုကား အမျိုးအစားကိုသာတွေ့ရှိထုတ်ယူနိုင်ခဲ့ပြီး ရုပ်အလောင်းများကို ဇွန်လ ၁၃ ရက်ထိရှာမတွေ့နိုင်ခဲ့သည့်အတွက် ရပ်နားလိုက်ခြင်းဖြစ်ကြောင်း ဖားကန့်မြို့ရှိ ရှာဖွေရေးလုပ်နေသည့် လူမှုကူညီရေးအသင်းများမှ သိရသည်။

ymg/mt
#Yangon_Media_Group