#World_Military
Published 15 June 2023

ဘီလာရုစ်သမ္မတ'အလက်ဇန်းဒါးလူကာရှန်ကို'က ယင်းနိုင်ငံအနေနဲ့ ရုရှားရဲ့ဗျူဟာမြောက်နျူကလီးယားလက်နက်များ ပေးပို့မှုကို စတင်လက်ခံနေပြီလို့ ပြောကြားလိုက်ပါတယ်။

ဇွန်လ ၁၄ ရက်နေ့မှာ စတင်လက်ခံခဲ့တာဖြစ်ပြီး လူကာရှန်ကိုရဲ့ပြောကြားချက်အရ အချို့လက်နက်တွေဟာ ၁၉၄၅ ခုနှစ်က အမေရိကန်က ဟီရိုရှီးမားနဲ့ နာဂါဆာကီတို့မှာကျဲခဲ့တဲ့ အဏုမြူဗုံးများထက် ၃ ဆ ပိုမိုအားပြင်းကြောင်း သိရပါတယ်။

ပြင်းအားလျော့တာတိုနျူကလီးယားလက်နက်များကို စစ်မြေပြင်မှာ အသုံးပြုနိုင်ဖွယ်ရှိကြောင်း ကျွမ်းကျင်သူများက အခိုင်အမာဆိုထားပါတယ်။

အမှန်တကယ်အသုံးပြုဖြစ်ပါက ၁၉၉၁ ဆိုဗီယက်ပြည်ထောင်စုပြိုလဲပြီးနောက်ပိုင်း ရုရှားနိုင်ငံပြင်ပမှာ ပထမဆုံးအသုံးပြုခြင်း ဖြစ်လာမှာဖြစ်ပါတယ်။

လူကာရှန်ကိုက ရုရှားပိုင် ရိုဆီယာ-၁ တီဗီချန်နယ်နဲ့ အင်တာဗျူးရာမှာ "ကျွန်တော်တို့မှာ ရုရှားထံကလက်ခံရရှိထားတဲ့ ဒုံးကျည်တွေနဲ့ဗုံးတွေ ရှိထားပါတယ်" လို့ ပြောကြားခဲ့ပါတယ်။

ရုပ်သံရိုက်ကူးထားတဲ့ပုံရိပ်တွေထဲမှာ နောက်ခံမှာ စစ်ရေးသိုလှောင်ရာအဆောက်အအုံအချို့ကို မြင်တွေ့ရပါတယ်။

ယူကရိန်းစစ်ပွဲကာလအတွင်း ယခုနှစ်မတ်လအစောပိုင်းက ရုရှားသမ္မတ'ပူတင်'က ဘီလာရုစ်မှာ နျူကလီးယားလက်နက်များ ဖြန့်ကျက်ထားရန် ကြေညာထားပါတယ်။

ထိုကြေညာချက်ကို အမေရိကန်နဲ့ အနောက်နိုင်ငံများက ဝေဖန်ခဲ့ပေမယ့် အမေရိကားကတော့ သူတို့ရဲ့မဟာဗျူဟာမြောက်နျူကလီးယားလက်နက် ရပ်တည်ချက်ကို ပြောင်းလဲဖို့ရည်ရွယ်ချက်မရှိဘူးလို့ ပြောကြားခဲ့ပါတယ်။

ရုရှားကလည်း နျူကလီးယားလက်နက် အသုံးပြုဖို့ပြင်ဆင်နေတဲ့ အရိပ်အယောင်လည်း မမြင်ရကြောင်း ပြောကြားထားတာကြာပါပြီ။

ဘီလာရုစ်မှာ ဆိုဗီယက်ခေတ်က ကျန်ခဲ့တဲ့ နျူကလီးယားသိုလှောင်ရုံအများအပြားရှိနေပြီး ၅ ခုလောက်ကို ပြန်လည်ပြင်ဆင်ထားတယ်လို့ လူကာရှန်ကိုက ပြောကြားခဲ့ပါတယ်။

ဗျူဟာမြောက်နျူကလီးယားလက်နက်တွေ ဖြန့်ကျက်ထားမယ့်နေရာအတိအကျကိုတော့ ရုရှားရော ဘီလာရုစ်ကပါ ထုတ်ဖော်ခဲ့ခြင်းမရှိပါဘူး။

အမေရိကန်ဖက်ဒရေးရှင်းသိပ္ပံပညာရှင်များကတော့ ထိုလက်နက်များဟာ လစ်သူရေးနီးယားနယ်စပ်မှ ၄၀ ကီလိုမီတာအကွာ လီဒါလေတပ်အခြေစိုက်စခန်းမှာ တည်ရှိနေနိုင်တယ်လို့ ဆိုလိုက်ပါတယ်။

ဘီလာရုစ်နိုင်ငံဟာ နေတိုး(NATO)အဖွဲ့ဝင်တွေဖြစ်တဲ့ လစ်သူရေးနီးယား၊ လတ်ဗီးယား၊ ပိုလန်နိုင်ငံတို့နဲ့ နယ်နမိတ်ထိစပ်နေတာဖြစ်ပါတယ်။

Source: WION #World_Military #ဟီရိုရှီးမားဗုံးထက်၃ဆပြင်း #နျူကလီးယားလက်နက်များ
#YMG #Yangon_Media_Group

#World_Science
Published 15 June 2023

ကမ္ဘာမြေကြီးသာ ကြောက်မက်ဖွယ်ဆွဲငင်အားရှိတဲ့ တွင်းနက်ကြီး(black hole)ထဲသို့ ကျသွားခဲ့ပါက အလင်းရောင်ပင်မထွက်နိုင်ဘဲ လူ့ခန္ဓာကိုယ်ဟာလည်း ခေါက်ဆွဲရှည်ပုံစံလိုမျိုး ပြောင်းလဲသွားဖွယ်ရှိကြောင်း သိပ္ပံပညာရှင်များ အခိုင်အမာဆိုလိုက်ပါတယ်။

တွင်းနက်တွေဟာ အနီးနားရှိ ဖုန်မှုန့်များ ဓာတ်ငွေ့များသာမက ဂြိုဟ်များနဲ့ အခြားတွင်းနက်များကိုပါ စုပ်ယူနိုင်တယ်လို့ သိရှိထားကြပါတယ်။

ဂြိုဟ်များကို ဆုတ်ဖြဲပစ်နိုင်ပြီး နီးစပ်တဲ့အရာမှန်သမျှကို စုပ်ယူပစ်နိုင်စွမ်းရှိပါတယ်။

ကမ္ဘာမြေကြီးသာ တွင်းနက်ထဲကျရောက်ပါက လွတ်မြောက်နိုင်စွမ်း အလွန်နည်းသွားမှာဖြစ်ပါတယ်။

တွင်းနက်ရဲ့ဆွဲငင်အားက အားကောင်းလွန်းတာကြောင့် လူသားများဟာ ခေါက်ဆွဲလိုမျိုး ရှည်ထွက်လာနိုင်တယ်လို့ ဆက္ကဆပ်စ်ဇေဗီးယားကယ်လ်မက်တက္ကသိုလ်မှ ရူပဗေဒပရော်ဖက်ဆာက Daily Mail ကိုပြောကြားခဲ့ပါတယ်။

ရှည်ထွက်လာပြီးနောက် ခေါက်ဆွဲလိုမျိုး ပြတ်ထွက်သွားနိုင်တယ်လို့ ဆိုပါတယ်။

တွင်းနက်ထဲကိုသာ ကျသွားမယ်ဆိုရင် ကမ္ဘာကြီးကအလျင်အမြန်အဆုံးသတ်သွားမှာဖြစ်ပြီး အရာအားလုံးက ရှည်မျောမျောဖြစ်သွားမှာဖြစ်ပြီး လေထုဖယ်ထုတ်ခံလိုက်ရရင် လေပြတ်လတ်သွားမှာဖြစ်တယ်လို့ အင်ပီရီယယ်လန်ဒန်ကောလိပ်မှ ဒေါက်တာ'ဒေးဗစ်ကလီးမန့်စ်'က ပြောကြားခဲ့ပါတယ်။

ကံကောင်းတာက တွင်းနက်ထဲသို့ ကမ္ဘာမြေကြီးကျရောက်နိုင်ချေက သုညနီးပါးဖြစ်နေတာပါပဲ။

လက်ရှိမှာ ကမ္ဘာနဲ့အနီးဆုံးတွင်းနက်ကို Gaia BH1 လို့ခေါ်ပြီး အလင်းနှစ် ၁,၆၀၀ ခန့်ဝေးကွာကာ နေအရွယ်အစားထက် ၁၀ ဆပိုမိုကြီးမားကြောင်း ကျွမ်းကျင်သူများက ဆိုပါတယ်။

တွင်းနက်တွေရဲ့လျှို့ဝှက်ချက်တွေကိုသိရဖို့ ဂျိမ်းစ်ဝက်ဘ်အာကာသတယ်လီစကုပ်(JWST)ကို ပြင်ဆင်ခဲ့ကြပါတယ်။

တွင်းနက်ကြီးများရဲ့ လမ်းကြောင်းများကိုရှာဖွေဖို့ နက္ခတ္တဗေဒပညာရှင်များ ကြိုးပမ်းနေတာကြောင့် သိပ္ပံပညာရှင်များက တယ်လီစကုပ်များ အသုံးပြုသွားမှာဖြစ်ပါတယ်။

တွင်းနက်ဖွဲ့စည်းမှုနောက်ကွယ်မှ သိပ္ပံပညာကို ပိုမိုနားလည်ရန်ကြိုးပမ်းရာမှာ အတွင်းပိုင်းစီးဆင်းမှုကို စောင့်ကြည့်ရန်အတွက် နဂါးငွေ့တန်းဂလက်ဆီ Sgr A အလယ်မှာရှိတဲ့ တွင်းနက်ကို JWST က ဆက်လက်အာရုံစိုက်လုပ်ဆောင်သွားမှာဖြစ်ပါတယ်။

Source: WION #World_Science #လူ့ခန္ဓာကိုယ်သည်ခေါက်ဆွဲရှည်ကဲ့သို့ဆွဲဆန့်ရှည်မျောသွားလိမ့်မည်
#YMG #Yangon_Media_Group

#World_Health
Published_ 15 June 2023

အဝလွန်ခြင်းအခြေအနေကြောင့် အဆီနဲ့အချိုများစားပြီးနောက် ပြည့်ဝသွားပြီဆိုတဲ့ခံစားချက်ကို ဦးနှောက်ကသိရှိနိုင်စွမ်း ထိခိုက်နိုင်ကြောင်း လေ့လာတွေ့ရှိထားပါတယ်။

ဒါ့အပြင် ကိုယ်အလေးချိန်သိသိသာသာ လျော့ကျသွားတာတောင် အဆိုပါဦးနှောက်ခံစားချက်ပြောင်းလဲမှုက ဆက်လက်ရှိနေပါသေးတယ်။

အဝလွန်ခြင်းက ရောဂါတစ်မျိုးဖြစ်ပြီး ဦးနှောက်ကိုအမှန်တကယ် ပြောင်းလဲသွားစေကြောင်း ဘော့စ်တွန်အမျိုးသမီးဆေးရုံနဲ့ ဟားဗတ်ဒ်ဆေးတက္ကသိုလ်မှ ဆေးဘက်ဆိုင်ရာပရော်ဖက်ဆာ ဒေါက်တာ'ကယ်ရိုလင်းအေပိုဗီယန်'က ပြောပြခဲ့ပါတယ်။

အဝလွန်သူ ၃၀ ဦးနဲ့ သာမန်အလေးချိန်ရှိသူ ၃၀ ဦးတို့ကို ဂလူးကို့စ်၊ အဆီ၊ ရေတို့ဖြင့် အစာအိမ်ထဲတိုက်ရိုက်ရောက်အောင် ပြွန်ဖြင့်ကျွေးမွေးခဲ့ပါတယ်။

ပါးစပ်ကိုကျော်ပြီး ဦးနှောက်နဲ့အစာအိမ်ချိတ်ဆက်ပုံကို ကြည့်ချင်တာကြောင့်ဖြစ်တယ်လို့ နယူးဟေဗင် ယေးလ်ဆေးတက္ကသိုလ်မှ ပရော်ဖက်ဆာဒေါက်တာ'မီရေးလ်ဆာလီ'က ပြောပြခဲ့ပါတယ်။

အဆီနဲ့ဂလူးကို့စ်တွေက စားစရာအမျိုးမျိုးနဲ့ပတ်သက်ပြီး ဦးနှောက်အစိတ်အပိုင်းများမှာ လှုံ့ဆော်ပေးပုံကို စိတ်ဝင်စားခဲ့ကြပါတယ်။

ပုံမှန်လူတွေမှာဆိုရင် အစားအစာက အစာအိမ်ကိုရောက်တဲ့အခါ နောက်ထပ်စားချင်စိတ်မရှိတော့ပါဘူး။

ဒိုပါမင်းဟော်မုန်းပမာဏများလာကာ ဦးနှောက်ဗဟိုစင်တာတွေ လှုပ်ရှားသွားပါတယ်။

ဒီအစားအစာတွေကိုပဲ အဝလွန်သူတွေစားသုံးတဲ့အခါ ဦးနှောက်လှုပ်ရှားမှု နှေးသွားခြင်းမရှိသလို ဒိုပါမင်းလည်း မြင့်တက်မလာပါဘူး။

ထိုသူတွေအလေးချိန်လျော့ကျတဲ့အခါမှာလည်း ကျန်းမာရေးကောင်းမွန်စေပေမယ့် စမ်းသပ်ချက်များအရ ကိုယ်အလေးချိန်ကျပေမယ့် ဦးနှောက်ထဲကပုံစံတွေကတော့ ပြန်လည်ပြောင်းလဲတာမျိုးမရှိခဲ့ပါဘူး။

စားချင်စိတ်ပြည့်ဝသွားတဲ့ခံစားချက်မျိုးကို ဦးနှောက်က ဆက်လက်မတုန့်ပြန်ဘဲရှိနေတုန်းဖြစ်ပါတယ်။
ဒီအချက်ကြောင့် ကိုယ်အလေးချိန်ကျသွားသူတွေဟာ ခဏအကြာမှာ ပြန်ပြီးကိုယ်အလေးချိန်တက်လာတာဖြစ်နိုင်ပါတယ်။

အဝလွန်ခြင်းက မျိုးရိုးဗီဇနဲ့သက်ဆိုင်နေပြီး ဦးနှောက်ရှိတုန့်ပြန်မှုတွေအပေါ် သက်ရောက်နေပါတယ်။

အဆီတစ်ရှူးတွေ၊ စားလိုက်တဲ့စားစရာတွေ၊ အခြားအကြောင်းအရာတွေက ဒီလိုသက်ရောက်နေတယ်ဆိုတာကိုသိရဖို့ နောက်ထပ်သုတေသနတွေ ထပ်လုပ်ရဦးမှာဖြစ်ပါတယ်။

အဝလွန်ခြင်းပြဿနာရှိနေတဲ့သူများအတွက် ဦးနှောက်တုန့်ပြန်မှုလွဲမှားနေတာကို နားလည်သိရှိထားဖို့လိုအပ်ပါတယ်လို့ ဆာလီကဆိုပါတယ်။

Source: CNN Health
#YMG #Yangon_Media_Group

#Local_News
Published_14 June 2023

ကိုဗစ်ဖြစ်ပွားချိန်ကစလို့ (၃)နှစ်ကြာ မကျင်းပဖြစ်ခဲ့တဲ့ တောင်ကြီးတန်ဆောင်တိုင် မီးပုံးပျံပွဲတော် အခုနှစ်နိုဝင်ဘာလမှာ ပြန်ကျင်းပဖို့ရှိတယ်လို့ ရှမ်းပြည်နယ်ရိုးရာ မီးပုံးပျံပညာရှင်အသင်းမှ သိရပါတယ်။

#YMG #Yangon_Media_Group

#World_Environment
Published_ 14 June 2023

ဆိုက်ပရပ်စ်ကို ပိုင်းခြားထားတဲ့ လူသူမရောက်တဲ့နေရာမှာ ဆယ်စုနှစ်တွေတိုင်အောင် ကြွက်တွေက လယ်သမားဖြစ်သူခရစ္စတိုဒူလော့စ်ရဲ့ ကောက်ပဲသီးနှံတွေကို ဖျက်ဆီးခဲ့ပေမယ့် အခုတော့ ဇီးကွက်တွေက မောင်းထုတ်ပေးနေပါပြီ။

#YMG #Yangon_Media_Group

#Local_News
Published_ 14 June 2023

ပြည်တွင်းဆန်ထွက်ရှိမူ အားလုံးရဲ့ ၂၀ရာခိုင်နူန်းကိုသာ ပြည်ပကိုတင်ပို့နေတာဖြစ်ပြီး ကျန်တဲ့ ၈၀ ရာခိုင်နူန်းကို ပြည်တွင်းမှာစားသုံးဖို့ ထားရှိတာဖြစ်တဲ့ ဆန်စျေးကွက်အခြေအနေကို စိုးရိမ်ရမရှိဘူးလို့ မြန်မာနိုင်ငံဆန်စပါးအသင်းချုပ် ဥက္ကဌဦးရဲမင်းအောင်က ပြောပါတယ်။

#YMG #Yangon_Media_Group

#Local_News
Published_ 14 June 2023

ပြည်ပနိုင်ငံများကို ကျောက်မြတ်ရတနာများ တင်ပို့ရောင်းချတဲ့အခါမှာ မြန်မာနိုင်ငံတော်ဗဟိုဘဏ်ကို ပေးဆောင်ရတဲ့ ကြိုတင်ငွေ ၂ရာခိုင်နူန်း ကိုလျော့ပေါ့ပေးဖို့ ရွှေလုပ်ငန်းရှင်တွေနဲ့ ကျောက်မြတ်လုပ်ငန်းရှင်တွေစုပေါင်းပြီးတောင်းဆိုထားတယ်လို့ ရွှေလုပ်ငန်းရှင်တွေက YMG ကိုပြောပါတယ်။

#YMG #Yangon_Media_Group

#Local_News
Published_14 June 2023

အခြေခံလူတန်းစားများ အဓိက အားထားစားသုံးနေသည့် ကြက်ဥ၊ ဘဲဥစျေးနူန်းများမြင့်တက်နေပြီး တစ်လုံးကို အရွယ်အစားပေါ်မူတည်ပြီး အမြင့်ဆုံးငွေကျပ် ၃၀၀ ကျော်စျေးရှိနေတယ်လို့ စားသုံးသူတွေစီကသိရပါတယ်။

#YMG #Yangon_Media_Group

#Daily_News
Published_ 14 June 2023

၁။ အခြေခံလူတန်းစားများ အဓိထားစားသုံးသည့် ကြက်ဥ၊ဘဲဥစျေးများ မြင့်တက်နေပြီး တစ်လုံးကို ငွေကျပ် ၃၀၀ ကျော်ရှိနေ

၂။ ပြည်ပသို့ ကျောက်မြတ်ရတနာများ တင်ပို့သည့်အခါ နိုင်ငံတော်သို့ပေးသွင်းရသည့် ကြိုတင်ငွေ ၂ ရာခိုင်နူန်းအား လျော့ပေးဖို့ လုပ်ငန်းရှင်များ တောင်းဆိုထား

၃။ ပြည်တွင်းဆန်ထွက်ရှိမူ၏ ၂၀ ရာခိုင်နူန်းကိုသာ ပြည်ပတင်ပို့သည့်အတွက် ပြည်တွင်းဆန်စျေးအခြေအနေကို စိုးရိမ်စရာမရှိဘူးလို့ ဆန်စပါးအသင်းချုပ်ဥက္ကဌပြော

၄။ ဆိုက်ပရပ်စ်ရှိ လူသူမရောက်ကျွန်းတွင် သောင်းကျန်းနေသည့် ကြွက်များအား ဇီးကွက်များဖြင့် ဖြေရှင်းလျက်ရှိ .... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group #Daily_News #YMG

#Local_News
Published_14 June 2023

ပြည်တွင်းပြည်ပ ပညာရှင်တွေရဲ့ အကြံဥာဏ်တွေကို ဆွေးနွေးရယူပြီးမှ သဗ္ဗေညုဘုရားပြုပြင်ထိန်းသိမ်းရေးလုပ်ငန်းတွေ စတင်ဆောင်ရွက်သွားမှာဖြစ်တယ်လို့ ရှေးဟောင်း သုတေသနနှင့်အမျိုးသားပြတိုက်ဦးစီးဌာန (ပုဂံဌာနခွဲ) မှသိရပါတယ်။

#YMG #Yangon_Media_Group

#Local_News
Published_14 June 2023

ဖိလစ်ပိုင်အမျိုးသားရဲတပ်ဖွဲ့မှ ကယ်ထုတ်ခဲ့ရသည့် လုပ်ငန်းခွင်အတွင်း အတင်းအကျပ် စေခိုင်းခံနေရသော မြန်မာနိုင်ငံသား (၆) ဦးအား ဇွန်၆ရက်တွင်တတိယအသုတ်အဖြစ် ပြန်လည်ပို့ဆောင်ခဲ့ကြောင်းသိရသည်။

ဖိလစ်ပိုင်တွင် အတင်းအကျပ်ခိုင်းစေခံခဲ့ရသည့် မြန်မာနိုင်ငံသား ၄၂ဦးအနက် ၄၁ဦးကိုမြန်မာနိုင်ငံသို့ပြန်လည်ပို့ဆောင်ပြီးဖြစ်သည်ဟု မြန်မာနိုင်ငံခြားရေးဝန်ကြီး ဌာန၏ထုတ်ပြန်ချက်အရသိရသည်။

ထုတ်ပြန်ချက်တွင်ဖိလစ်ပိုင်နိုင်ငံ၊ ပမ်ပန်ဂါပြည်နယ် (Pampanga)၊ မာဘလာကတ်မြို့ (Mabalacat City) အနီးရှိ အွန်လိုင်းဂိမ်းလုပ်ငန်းများ ဆောင်ရွက်နေသည့် ကုမ္ပဏီကြီးတစ်ခု၌ အတင်းအကျပ်စေခိုင်းခံနေရသည့် နိုင်ငံခြားသားများရှိကြောင်း သတင်းရရှိသဖြင့် လူကုန်ကူးမှုတိုက်ဖျက်ရေး စစ်ဆင်ရေးအဖြစ် ဖိလစ်ပိုင် အမျိုးသားရဲတပ်ဖွဲ့မှ ဦးဆောင်၍ မေလ၄ရက် ညပိုင်းက ဝင်ရောက်စီးနင်းခဲ့ရာတွင် မြန်မာနိုင်ငံသား (၄၂) ဦး အပါအဝင် နိုင်ငံခြားသား စုစုပေါင်း (၁၁၃၇) ဦးအား ကယ်ထုတ်နိုင်ခဲ့သည်ဟုဆိုသည်။

မနီလာမြို့၊ မြန်မာသံရုံးအနေဖြင့် ဖိလစ်ပိုင် အမျိုးသားရဲတပ်ဖွဲ့မှ ကယ်တင်ပေးရာတွင် ပါဝင်သည့် မြန်မာနိုင်ငံသား (၄၂) ဦးအား မြန်မာနိုင်ငံသို့ အမြန်ဆုံးပြန်လည်ပို့ဆောင်ပေးနိုင်ရေးအတွက် ဖိလစ်ပိုင်နိုင်ငံခြားရေးဝန်ကြီးဌာန၊ ဖိလစ်ပိုင်အမျိုးသားရဲတပ်ဖွဲ့၊ ဖိလစ်ပိုင် လူဝင်မှုကြီးကြပ်ရေးဌာနတို့နှင့် ပူးပေါင်းဆောင်ရွက်ကာ မြန်မာနိုင်ငံသား (၂၀) ဦး (အမျိုးသမီး ၁၅ ဦးနှင့် အမျိုးသား ၅ ဦး) တို့အား ၂၇-၅-၂၀၂၃ ရက်တွင် ပထမအသုတ်အဖြစ် လည်းကောင်း၊ မြန်မာနိုင်ငံသား (၁၅) ဦး (အမျိုးသမီး ၆ ဦးနှင့် အမျိုးသား ၉ ဦး) တို့အား ၂-၆-၂၀၂၃ ရက်တွင် ဒုတိယအသုတ်အဖြစ် လည်းကောင်း ပြန်လည်ပို့ဆောင်ပေးခဲ့သည်။

ယခုအခါ ကျန်ရှိသူ မြန်မာနိုင်ငံသား (၇) ဦးအနက် (၆) ဦး (အမျိုးသမီး ၄ ဦးနှင့် အမျိုးသား ၂ ဦး)တို့အား တတိယအသုတ်အဖြစ် ၁၄-၆-၂၀၂၃ ရက်တွင် အဆင်ပြေချောမွေ့စွာ ပြန်လည်ပို့ဆောင်ပေးနိုင်ခဲ့ပြီး၊ အဆိုပါ မြန်မာနိုင်ငံသားများအား မြန်မာသံရုံးမှ သံရုံးယာယီတာဝန်ခံနှင့် မြန်မာသံရုံး၊ စစ်သံရုံးမှ တာဝန်ရှိသူများ၊ ဖိလစ်ပိုင် လူဝင်မှုကြီးကြပ်ရေးဌာနနှင့် ဖိလစ်ပိုင်နိုင်ငံအခြေစိုက် International Organization for Migration (IOM) တို့မှ တာဝန်ရှိသူများက မနီလာမြို့ အပြည်ပြည်ဆိုင်ရာလေဆိပ်သို့ လိုက်ပါကူညီပို့ဆောင်ပေးခဲ့သည်ဟုဆိုသည်။

ပြန်လည်ပို့ဆောင်ပေးရန် ကျန်ရှိနေသော မြန်မာနိုင်ငံသား (၁) ဦးမှာ လက်ရှိတွင် ဖိလစ်ပိုင်ရဲတပ်ဖွဲ့မှ အွန်လိုင်းကုမ္ပဏီအား တရားစွဲဆိုထားသည့် အမှု၌ အခြားနိုင်ငံခြားသားအချို့နှင့်အတူ သက်သေအဖြစ် တရားရုံးတွင် ထွက်ဆိုနေရပြီး၊ ၎င်းအား တရားရုံးက အပြီးသတ်ဆုံးဖြတ်ချက် ချမှတ်ပြီးမှသာ မြန်မာနိုင်ငံသို့ ပြန်လည်ပို့ဆောင်ပေးနိုင်မည်ဖြစ်ကြောင်း ထုတ်ပြန်ချက်တွင်ဖော်ပြပါရှိသည်။
ymg/tthl
#YMG #Yangon_Media_Group

#Asia_Politics
Published_ 14 June 2023

ထိုင်းနိုင်ငံဖွဲ့စည်းပုံအခြေခံဥပဒေခုံရုံးက Move Forward ပါတီခေါင်းဆောင်'ပီတာလင်မ်ဂျရွန်ရတ်'ကို လွှတ်တော်ကိုယ်စားလှယ်အဖြစ် တာဝန်မထမ်းဆောင်ရန် တားမြစ်ပိတ်ပင်မိန့်ထုတ်လိုက်ပါက သူ့ကို ဝန်ကြီးချုပ်လောင်းအဖြစ် စာရင်းထည့်သွင်းခံရတော့မှာမဟုတ်ကြောင်း အိမ်စောင့်ဒုဝန်ကြီးချုပ်'ဝီဆာနူခရီယာငမ်'က အင်္ဂါနေ့မှာ ပြောကြားလိုက်ပါတယ်။

ပီတာအနေနဲ့ လွှတ်တော်အမတ်ဖြစ်ရန် သတ်မှတ်ချက်ကိုက်ညီခြင်းရှိ/မရှိကို တရားရုံးမှစီရင်ချက်ရယူနိုင်ရန် လွတ်တော်အမတ်များအဖွဲ့မှ ဖွဲ့စည်းပုံအခြေခံဥပဒေပုဒ်မ ၈၂ ကို တင်သွင်းသွားနိုင်ဖွယ်ရှိတယ်ဆိုတဲ့ ထင်မြင်ချက်များနဲ့ပတ်သက်ပြီး ဝီဆာနူက မှတ်ချက်ပေးလိုက်ပါတယ်။

အကယ်၍တရားရုံးက အဆိုပါတင်သွင်းချက်ကိုလက်ခံပြီး ပီတာကို လွှတ်တော်အမတ်အဖြစ် ပိတ်ပင်လိုက်ပါက ဝန်ကြီးချုပ်နေရာအတွက် ဝင်ရောက်ယှဉ်ပြိုင်ခွင့်ရှိမှာ မဟုတ်ကြောင်း ဆိုပါတယ်။

ပီတာကို အုပ်ချုပ်ရေးအာဏာမရစေရန် အထက်လွှတ်တော်ရှိ ပြိုင်ဘက်များက ပုဒ်မ ၈၂ ကိုအသုံးချမယ်လို့ ဖွဲ့စည်းပုံအခြေခံဥပဒေခုံရုံးကို အကြိမ်ကြိမ်ပြောကြားထားပါတယ်။

ပီတာအနေနဲ့ ပါလီမန်ရွေးကောက်ပွဲဥပဒေပုဒ်မ ၁၅၁ ကိုဖောက်ဖျက်ခြင်းရှိ/မရှိ စုံစမ်းစစ်ဆေးရန် ရွေးကောက်ပွဲကော်မရှင်က သောကြာနေ့မှာ အမိန့်ပေးခဲ့ပါတယ်။

ပါလီမန်အမတ်အဖြစ် ရွေးကောက်ပွဲဝင်ရန် မကိုက်ညီကြောင်းသိရှိထားပြီးမှ ရွေးကောက်ပွဲဝင်ရန် လျှောက်ထားသူကို အပြစ်ဒဏ်ပေးသွားမယ်လို့ ဆောင်းပါးမှာဖော်ပြထားပါတယ်။

ပီတာဟာ မီဒီယာကုမ္ပဏီ ITV Plc မှာ အစုရှယ်များကိုင်ဆောင်ထားတာကြောင့် ရွေးကောက်ပွဲဝင်ရောက်ယှဉ်ပြိုင်ရန် အရည်အချင်းမပြည့်မီကြောင်း နိုင်ငံရေးတက်ကြွလှုပ်ရှားသူ'ရွန်ကရိုင်လီကစ်ဝါထာနာ'က စွပ်စွဲခဲ့ပြီးနောက် ရွေးကောက်ပွဲကော်မရှင်က စုံစမ်းစစ်ဆေးရန် အမိန့်ပေးခဲ့ပါတယ်။

ပီတာကို ရွေးကောက်ပွဲဥပဒေပုဒ်မ ၁၅၁ အရ တရားစွဲဆိုရန်ဆုံးဖြတ်လိုက်ပါက ဒီအမှုကို ပြစ်မှုတရားရုံးသို့ပေးပို့မှာဖြစ်ပြီး တရားရုံးမှ စီရင်ချက်မချမီအချိန်ယူရမှာဖြစ်ကြောင်း ဝီဆာနူက ပြောပြခဲ့ပါတယ်။

ရာဇဝတ်ခုံရုံးမှ စီရင်ချက်မချမချင်း ပါလီမန်မှာ ဝန်ကြီးချုပ်အဖြစ် ဝင်ရောက်ယှဉ်ပြိုင်ခွင့် ရှိမှာမဟုတ်ပါဘူး။

ပီတာသာ ဝန်ကြီးချုပ်ရာထူးအတွက် အနိုင်ရခဲ့ပါက လွှတ်တော်ဥက္ကဌအနေနဲ့ ဘုရင်မင်းမြတ်ထောက်ခံမှုရဖို့အတွက် အမည်ပေးသွင်းရမှာဖြစ်ပါတယ်။

ပါလီမန်က ပီတာရဲ့ဥပဒေအမှုကိုဆိုင်းငံ့ထားကြောင်း ဘုရင်ကိုအသိပေးရမှာဖြစ်ပြီး ပီတာကို ဝန်ကြီးချုပ်အဖြစ်ခန့်အပ်ရန်မှာ ဘုရင်အပေါ်မူတည်နေကြောင်း ရှင်းပြသွားပါတယ်။

ဘုရင်ထောက်ခံချက်အတွက် ပီတာရဲ့အမည်ကိုပေးပို့ပါက နောက်ပိုင်းပြဿနာများအတွက် လွှတ်တော်ဥက္ကဌက တာဝန်ယူရမှာဖြစ်ကြောင်းလည်း ပြောပြသွားပါတယ်။
Source: Nation Thailand
#YMG #Yangon_Media_Group