Published 01 June 2024

ရီပတ်ဘလစ်ကန် သမ္မတဟောင်း ဒေါ်နယ်ထရမ့်ကို နယူးယော့ခ်ဂျူရီတရားသူကြီး အဖွဲ့က သမိုင်းဝင်ပြစ်မှုတစ်ခုဖြင့် အပြစ်ရှိကြောင်း ပြန်လည်ဆုံးဖြတ်ပြီးနောက် သမ္မတဟောင်းကို ထောက်ခံတဲ့သူတွေက နေအိမ်အပြင်ဘက်မှာ အမေရိကန်အလံတွေကို ဇောက်ထိုးချိတ်ဆွဲထားကြပြီး ဆိုရှယ်မီဒီယာတွေမှာလည်း ဖော်ပြလာကြပါတယ်။

ရီပတ်ဘလစ်ကန် ကိုယ်စားလှယ် မာဂျရီတေလာဂရင်းနဲ့ ကန်းထရီးအဆိုတော် ဂျေဆန်အယ်လ်ဒင်းတို့လည်း အလံဇောက်ထိုး ဖော်ပြခဲ့သူတွေထဲ ပါဝင်ပါတယ်။

ဒါဟာ နှစ်ပေါင်း ၂၀၀ ကျော်အတွင်း အမေရိကမှာ ဆန္ဒပြကန့်ကွက်တဲ့ ပြယုဂ်တစ်ခု ဖြစ်လာပါတယ်။

အပြာကားမင်းသမီးတစ်ယောက်ကို နုတ်ပိတ်ခပေးတာနဲ့ ပတ်သက်ပြီး ဖုံးအုပ်ဖို့အတွက် စာရွက်စာတမ်းတုများ ပြုလုပ်တယ်ဆိုကာ ကြာသပတေးနေ့က ထရမ့်ကို အပြစ်ရှိကြောင်း ဆုံးဖြတ်ပြီးနောက် ဆိုရှယ်မီဒီယာတွေမှာ ထရမ့်ထောက်ခံသူတွေက အလံဇောက်ထိုးပုံ ဖော်ပြလာကြပါတယ်။

တရားရေးဆုံးဖြတ်ချက်ထွက်ပေါ်လာပြီး မိနစ်အနည်းငယ် အကြာမှာပဲ ထရမ့်သစ္စာခံ ဂရင်းက X ဆိုရှယ်မီဒီယာမှာ အမေရိကန်အလံကို ဇောက်ထိုးတင်ခဲ့ပြီး သောကြာနေ့မွန်းလွဲအချိန်အထိ ကြည့်ရှုသူ ၈ သန်းကျော် ရှိနေပါတယ်။

အယ်လ်ဒင်းကလည်း အလံဇောက်ထိုးပုံတင်ကာ တိုင်းပြည်အနေနဲ့ ကြောက်ရွံ့စရာ အခြေအနေကို ရင်ဆိုင်နေရကြောင်း၊ ယခုအချိန်မှာ ရဲရဲဝံ့ဝံ့ ထုတ်ဖော်ပြောဆိုသင့်ပြီဖြစ်ကြောင်း ဖော်ပြသွားပါတယ်။

ရီပတ်ဘလစ်ကန် အလှူရှင် ဒွန်တာပီယာကလည်း အရီဇိုးနားက သူ့အိမ်အပြင်ဘက်မှာ အလံဇောက်ထိုး လွှင့်ထားပါတယ်။

အင်တာနက်ပေါ်မှာ ထရမ့်ထောက်ခံသူများကြား အဓိကရုဏ်းတွေ၊ တော်လှန်ရေးတွေ၊ အကြမ်းဖက်မှုတွေ ပြုလုပ်ဖို့ တောင်းဆိုနေကြပါတယ်။

ထရမ့်ဟာ ရာဇဝတ်မှုဖြင့် စွပ်စွဲခံရတဲ့ ပထဆုံးသော သမ္မတဟောင်းဖြစ်လာပြီး ထိုတရားရေးဆုံးဖြတ်ချက်ကို အယူခံဝင်သွားမယ်လို့ ဆိုလိုက်ပါတယ်။

အမေရိကန်အလံ ဇောက်ထိုးလွှင့်တဲ့ သင်္ကေတက ၁၇၀၀ ခုနှစ်ဝန်းကျင်တွေမှာ သင်္ဘောသားများက မကျေနပ်ကြောင်း ထုတ်ဖော်ခဲ့စဥ်က ပထမဆုံးအသုံးပြုခဲ့တာ ဖြစ်ပါတယ်။

၁၈၀၀ ခုနှစ်အလယ်ပိုင်းတွေမှာ ကျွန်ပြုဆန့်ကျင်ရေး လှုပ်ရှားမှုတွေနဲ့ ၁၉၆၀ ဝန်းကျင် ဗီယက်နမ်စစ်ပွဲ ဆန့်ကျင်ရေးတို့မှာ အလံဇောက်ထိုးလွှင့်တဲ့ လုပ်ရပ်များ ပြုလုပ်ခဲ့ကြကြောင်း ကိုလံဘီယာတက္ကသိုလ်မှ ပရော်ဖက်ဆာ တင်မိုသီနက်ဖ်တာလီက ပြောပြသွားပါတယ်။
Source: Reuters
#World_News
#Published 01 June 2024
#YMG #Yangon_Times #Yangon_Media_Group

Published 1 June 2024

လေထုညစ်ညမ်းခြင်းနဲ့ ကိုယ်ဝန်ဆောင်များကြား ဆက်စပ်နေပြီး မွေးဖွားလာတဲ့ ကလေးရဲ့ ကိုယ်အလေးချိန် ကျဆင်းပုံတို့ကို ဟီဘရူးတက္ကသိုလ် ဟာဒါဆာဘရွန် ပြည်သူ့ကျန်းမာရေးကျောင်းမှ ရောဂါဗေဒကျွမ်းကျင်သူများက ဆန်းစစ်ဖော်ပြလာကြပါတယ်။

ကိုယ်ဝန်ဆောင်ချိန်မှာ လေထုညစ်ညမ်းမှု အတိုင်းအတာ PM2.5 ထိတွေ့ခြင်းနဲ့ မွေးဖွားလာတဲ့ ကလေးကိုယ်အလေးချိန် ကျဆင်းခြင်းတို့ကြား ဆက်စပ်မှုကို လေ့လာခဲ့ကြတာ ဖြစ်ပါတယ်။

လေထုအခြေအနေက သန္ဓေသားဖွံ့ဖြိုးမှုအပေါ် သက်ရောက်နေကာ လေထုညစ်ညမ်းခြင်းကို ထိန်းချုပ်ဖို့ အရေးတကြီး လိုအပ်နေကြောင်းကို အလေးပေးဖော်ပြလာပါတယ်။

ညစ်ညမ်းရတဲ့ အဓိကအကြောင်းအရင်းတွေက သယ်ယူပို့ဆောင်ရေးနဲ့ စက်မှုလုပ်ငန်းတွေကနေ ထွက်လာတဲ့ အမှုန်အမွှားများနဲ့ သက်ဆိုင်နေပါတယ်။

ကလေးမွေးဖွားချိန်မှာ ကိုယ်အလေးချိန် နည်းပါးခြင်းက နောက်ပိုင်းမှာ ကျန်းမာရေးပြဿနာများ ဝင်ရောက်လာနိုင်ပြီး နှလုံးရောဂါ၊ ဆီးချို၊ ဖွံ့ဖြိုးမှုပိုင်းချို့ယွင်းမှုများ ဖြစ်လာနိုင်ပါတယ်။

၂၀၂၄ မှာ အစ္စရေးလ်ရဲ့ အချို့နေရာတွေမှာ လေထုညစ်ညမ်းမှု အခြေအနေ လျော့နည်းလာကြောင်း မှတ်တမ်းတင်ရရှိခဲ့ပြီး ဒီမတိုင်ခင် မီးသတ်ဌာနက ရိုးရာမီးပုံပွဲတွေကို သတ်မှတ်ထားတဲ့ နေရာတွေမှာသာ ပြုလုပ်ဖို့ အမိန့်ထုတ်ခဲ့ပါတယ်။

ပတ်ဝန်းကျင်မှာ ကျန်းမာရေးနဲ့ ညီညွတ်မယ့် အလေ့အထတွေ ထိန်းသိမ်းပြုကျင့်ဖို့ ပတ်ဝန်းကျင်ပညာရှင်များက တိုက်တွန်းထားပါတယ်။

အစ္စရေးလ်လိုနိုင်ငံမှာ ရိုးရာမီးပုံပွဲတွေ ပြုလုပ်လေ့ရှိပြီး ထိုအစား မိသားစုလိုက် လမ်းလျှောက်ထွက်ဖို့ကို ကျန်းမာရေးဝန်ကြီးဌာနက တိုက်တွန်းလိုက်ပါတယ်။
Source: The Jerusalem Post.
#World_Health
#Published 1 June 2024
#YMG #Yangon_Times #Yangon_Media_Group

Published 1 June 2024

အမျိုးသမီးတစ်ဦးရဲ့ တင်ပါးကြွက်သားထဲမှာ ၃ နှစ်ကျော်လောက် စိုက်ဝင်နေတဲ့ အပ်ချုပ်အပ်ကို ဒေလီမြို့ ဆာဂမ်ဂါရမ်ဆေးရုံမှ ဆရာဝန်များက အောင်မြင်စွာ ဖယ်ထုတ်နိုင်ခဲ့ပါတယ်။

လူနာဟာ ၂၀၂၁ တုန်း အပ်ပေါ် မတော်တဆလဲကျခဲ့ပြီးနောက် နေမထိထိုင်မသာဖြစ်နေပြီး နာကျင်မှု ခံစားနေခဲ့ရပါတယ်။

တစ်ရက်မှာ လူနာက အပ်ချုပ်နေရင်း အပ်ကို ကုတင်ပေါ်မှာ ခဏထားခဲ့ပါတယ်။

မတ်တပ်ထပြီး တစ်ခုခုယူပြီးနောက် ချော်လဲကာ ကုတင်ပေါ်သို့ကျပြီး စူးရှတဲ့ခံစားမှု ခံစားလိုက်ရပါတယ်။

အပ်က တဝက်ကျိုးသွားပြီး နောက်ရက်တွေအထိ ကျန်တဲ့အပ်တပိုင်းကို ရှာခဲ့ပေမယ့် မတွေ့ခဲ့ပါဘူး။

အခန်းထဲက တစ်နေရာရာမှာ ကျသွားလိမ့်မယ်လို့ ထင်နေခဲ့ပြီး တင်ပါးက နာကျင်မှုကလည်း ပိုပိုဆိုးလာတယ်လို့ လူနာက ပြန်ပြောပြပါတယ်။

၃ နှစ်အတွင်း ဆရာဝန်အများအပြားနဲ့ ပြသခဲ့ပေမယ့် ပြဿနာရင်းမြစ်ကို မသိရှိကြပါဘူး။

မကြာသေးမီ ဓာတ်မှန်ရိုက်ခဲ့ရာမှ ပျောက်နေတဲ့ အပ်ချောင်းက တင်ပါးမှာ စိုက်ဝင်နေခဲ့တာကို သိရှိခဲ့ကြပါတယ်။

ဖယ်ရှားဖို့ ဆုံးဖြတ်ပြီး ခွဲစိတ်ဆရာဝန်တွေနဲ့ တိုင်ပင်ခဲ့ပေမယ့် အပ်ဝင်နေတဲ့ ဒဏ်ရာအနက်နဲ့ အနီးနား အာရုံကြောများမှ သွေးထွက်လာမှာကို စိုးရိမ်ပြီး ငြင်းပယ်ခဲ့ကြပါတယ်။

နောက်ဆုံးမှာတော့ ဆာဂမ်ဂါရမ်ဆေးရုံ အထွေထွေခွဲစိတ်ဌာနမှ ဒေါက်တာ တာရန်မစ်တယ်လ်နဲ့ တွေ့ဆုံခဲ့ပြီး သေချာကြည့်ရှုစစ်ဆေးပြီးနောက် အလွန်ရှုပ်ထွေးတဲ့ ခွဲစိတ်မှုကို ပြုလုပ်ရန် စီစဥ်ခဲ့ကြပါတယ်။

C-Arm ပုံရိပ်မြင်ကိရိယာဖြင့် ကြွက်သားတစ်ရှူးများ ကြားထဲက အပ်ကို နေရာတိကျစွာ တွေ့ရှိခဲ့ကြပါတယ်။

အန္တရာယ်တွေကြားထဲကပဲ ခွဲစိတ်ပြီးနောက် စိုက်ဝင်နေတဲ့ အပ်အပိုင်းအစကို အောင်မြင်စွာ ဖယ်ထုတ်နိုင်ခဲ့ပါတယ်။

ဒေါက်တာ မစ်တယ်လ်၊ ဒေါက်တာ အာရှစ်ဒီး၊ ဒေါက်တာ အန်မိုလ်အာဟူဂျာ၊ ဒေါက်တာ တာနူရှရီး၊ ဒေါက်တာ ကာသစ်တို့က ခွဲစိတ်ပေးခဲ့တာ ဖြစ်ပါတယ်။

ဆရာဝန်တွေက ကျွမ်းကျွမ်းကျင်ကျင်ဖြင့် ဇွဲရှိရှိခွဲစိတ်ပေးတဲ့အတွက် ကျေးဇူးတင်ရှိပါတယ်လို့ လူနာက ပြောဆိုသွားပါတယ်။
Source: India Today
#World_News
#Published 1 June 2024
#YMG #Yangon_Times #Yangon_Media_Group

ရုရှားနဲ့ ယူကရိန်းတို့ကြား အီလက်ထရွန်နစ်စစ်ရေး ပြင်းထန်လာတာနဲ့ အမေရိကန်ထောက်ပံ့ လက်နက်များရဲ့ ပစ်ခတ်တိကျမှုစွမ်းရည်ကို နှောင့်နှေးစေပြီး ယူကရိန်းကတော့ ရုရှားဒရုန်းတွေကို တန်ပြန်နိုင်ရန်အတွက် ယင်းတို့ရဲ့ အီလက်ထရွန်နစ်စစ်ပွဲကို မြှင့်တင်နေရကြောင်း မီဒီယာများက ဖော်ပြထားပါတယ်။
#World_News
#Published 31 May 2024
#YMG #Yangon_Times #Yangon_Media_Group

Published 31 May 2024

ရုရှားနိုင်ငံထဲရှိ စစ်ရေးပစ်မှတ်များကို တိုက်ခိုက်ရာမှာ အမေရိကန်ထောက်ပံ့ လက်နက်များ အသုံးပြုခွင့်ကို သမ္မတဂျိုးဘိုင်ဒင်က ယူကရိန်းအား တိတ်တဆိတ်ခွင့်ပြုလိုက်ပြီ ဖြစ်ကာ ယူကရိန်းအရှေ့မြောက်ပိုင်းရှိ ခါကိဗ်မြို့ တိုက်ခိုက်ရေးကို ထောက်ပံ့အားပေးနေတာ ဖြစ်တယ်လို့ အမေရိကန် အရာရှိ ၄ ဦးက ကြာသပတေးနေ့မှာ ပြောကြားလိုက်ပါတယ်။

ဘိုင်ဒင်ဟာ အမေရိကန်လက်နက်များဖြင့် ရုရှားနိုင်ငံထဲသို့ ပစ်ခတ်ရန် ယူကရိန်းကို ခွင့်မပြုခဲ့ပေမယ့် အခုအခါမှာတော့ မူဝါဒပြောင်းလဲလာတဲ့ ဆုံးဖြတ်ချက်မျိုး မြင်လာရပါတယ်။

ဝါရှင်တန်ရှိ ရုရှားသံရုံးနဲ့ နယူးယော့ခ်ရှိ ကုလသမဂ္ဂဆိုင်ရာ ရုရှားသံအမတ်တို့က ဒါနဲ့ပတ်သက်ပြီး တုန့်ပြန်ပြောကြားခြင်း မရှိသေးပါဘူး။

ဘိုင်ဒင်ရဲ့ဆုံးဖြတ်ချက်က ခါကိဗ်ဒေသ နယ်စပ်အနီးရှိ ရုရှားတပ်များကိုသာ ပစ်ခတ်ရန် ခွင့်ပြုတာဖြစ်ပါတယ်။

ရုရှားက မေလ ၁၀ ရက်နေ့မှာ ထိုဒေသကို တိုက်ခိုက်ခဲ့ပြီး အချို့ရွာများကို ဝင်ရောက်ဖျက်ဆီးခဲ့ပါတယ်။

‘’ခါကိဗ်ဒေသမှာ တိုက်ခိုက်ရန် ပြင်ဆင်နေတဲ့ ရုရှားတပ်တွေကို ယူကရိန်းတို့ ပြန်လည်တိုက်ခိုက်နိုင်ရန် အမေရိကန် ထောက်ပံ့လက်နက်များ အသုံးပြုနိုင်အောင် သမ္မတက တိုက်ရိုက်ညွှန်ကြားခဲ့တယ်’’ လို့ အမေရိကန်အရာရှိ တစ်ဦးက ပြောပြပါတယ်။

ရုရှားတို့က ထိုဒေသမြောက်ပိုင်းအနီးမှာ တပ်စုနေပေမယ့် ချီတက်မှုကြီး ပြုလုပ်ရလောက်တဲ့အထိ တပ်သားမလောက်ဘူးလို့ ယူကရိန်း ထိပ်သီးတပ်မှူးချုပ်က ပြောပြပါတယ်။

ဘိုင်ဒင်က ယူကရိန်းအတွက် လက်နက်ထောက်ပံ့ရေး မူဝါဒများ တိတ်တဆိတ်လျှော့ချတာ ဒုတိယအကြိမ် ရှိပြီဖြစ်ပါတယ်။

အငြိမ်းစားဒုဗိုလ်မှူးကြီးနဲ့ ဥရောပရေးရာ ညွှန်ကြားရေးမှူးဟောင်း အဲလက်ဇန်ဒါဗိုင်းမန်းက ဘိုင်ဒင်ရဲ့ မူဝါဒပြောင်းလဲမှုကို ချီးကျူးလိုက်ပြီး ယူကရိန်းကို လွတ်လပ်စွာ တိုက်ခိုက်ခွင့်ပေးသင့်ကြောင်း ပြောကြားသွားပါတယ်။

ရုရှားတိုင်းပြည်အတွင်းထဲထိတော့ အမေရိကန်ထုတ် တာဝေးပစ်လက်နက်တွေ အသုံးပြုခွင့်ကိုတော့ ဆက်လက်တားမြစ်သွားမှာ ဖြစ်ပါတယ်။

ရုရှားရေနံစက်ရုံတွေကို ယူကရိန်းက ဒရုန်းဖြင့် တိုက်ခိုက်နေတာကိုလည်း အသိအမှတ်ပြုသေးတာ မဟုတ်ပါဘူး။

နေတိုး(NATO) မဟာမိတ်အချို့နဲ့ အမေရိကန် လွှတ်တော်အမတ်များက ယူကရိန်းကို အမေရိကန်ထောက်ပံ့ လက်နက်များ အသုံးပြုခွင့်ကန့်သတ်ထားတာကို ဖြေလျှော့ပေးဖို့ တောင်းဆိုနေခဲ့ကြပါတယ်။

ထောက်ပံ့လက်နက်များဖြင့် ရုရှားကိုပစ်ခတ်ဖို့အတွက် ယူကရိန်းကို ခွင့်ပြုပေးတဲ့ နေတိုးအဖွဲ့ဝင်များကို ပူတင်က အင်္ဂါနေ့မှာ သတိပေးလိုက်ပြီး နျူကလီးယားစစ်ပွဲအန္တရာယ် ကျရောက်နိုင်တယ်လို့ ဆိုလိုက်ပါတယ်။
Source: Reuters.
#World_News
#Published 31 May 2024
#YMG #Yangon_Times #Yangon_Media_Group

Published 31 May 2024

ကျန်းမာရေးကဏ္ဍ အမျိုးမျိုးအတွက် ကောင်းစွာအိပ်စက်ဖို့ အရေးကြီးပါတယ်။

ဒါပေမဲ့ ပြဿနာအမျိုးမျိုးကြောင့် လုံလောက်စွာ အိပ်စက်ရဖို့ ခက်ခဲနေကြပါတယ်။

ဒါကြောင့် နှစ်ခြိုက်စွာ အိပ်ပျော်စေမယ့် နည်းလမ်းတွေကို ဖော်ပြလိုက်ပါတယ်။
 
(၁) အိပ်ချိန်သတ်မှတ်ပါ
အိပ်ချိန်ထချိန်ကို ပုံမှန်သတ်မှတ်ပြီး ကျင့်သုံးပေးခြင်းဖြင့် ကိုယ်တွင်း လည်ပတ်မှုစနစ်နဲ့ ကိုက်ညီစေပြီး အကျင့်ဖြစ်သွားပါက ပုံမှန်အိပ်စက်မှုကို အထောက်အကူပြုပါတယ်။
 
(၂) ညအိပ်ချိန်မတိုင်ခင် စိတ်ဖြေလျှော့ပါ
ညမအိပ်ခင်မှာ စိတ်ငြိမ်စေတဲ့ အပြုအမူတွေ ပြုလုပ်ခြင်းဖြင့် ခန္ဓာကိုယ်ကလည်း အိပ်ချိန်ရောက်ပြီဆိုတာကို သိရှိစေပါတယ်။
 
(၃) မအိပ်ခင်တီဗီ၊ဖုန်းကြည့်ခြင်း မပြုရန်
ဖုန်း၊ တီဗီ၊ ကွန်ပျူတာတို့မှထွက်တဲ့ အလင်းပြာက အိပ်စက်ခြင်းဟော်မုန်း မယ်လာတိုနင် ထွက်ရှိမှုကို အဟန့်အတား ဖြစ်စေပါတယ်။
 
(၄) အိပ်ခန်းကိုသက်တောင့်သက်သာဖြစ်အောင် ပြင်ဆင်ပါ
တိတ်ဆိတ်ပြီး သက်တောင့်သက်သာရှိတဲ့ အနေအထားက နှစ်ခြိုက်စွာ အိပ်စက်စေနိုင်ပါတယ်။ 
 
(၅) များများစားခြင်းနဲ့ ကဖင်းဓာတ်ရှောင်ရှားပါ
ကဖင်းဓာတ်နဲ့ နီကိုတင်းတို့က အိပ်စက်မှုကို အနှောင့်အယှက်ဖြစ်စေပြီး အစားများများစားခြင်းကတော့ မအီမသာ ဖြစ်စေပါတယ်။
 
(၆) စိတ်ပြေလျော့စေမည့် နည်းလမ်းသုံးပါ
အသက်ပြင်းပြင်းရှူခြင်း၊ ကြွက်သားဖြေလျှော့ခြင်းတို့က စိတ်နဲ့ခန္ဓာကိုယ်ကို ပြေလျော့စေပါတယ်။
 
(၇) တရေးအိပ်ခြင်းကို လျှော့ပါ
နေ့ခင်းဘက် တရေးအိပ်ခြင်းက ညဘက်အိပ်စက်ခြင်းကို အနှောင့်အယှက် ဖြစ်စေပါတယ်။
 
(၈) သဘာဝအလင်းရောင်နဲ့ ထိတွေ့ပေးပါ
နေ့ပိုင်းမှာ သဘာဝအလင်းရောင်နဲ့ ထိတွေ့ခြင်းဖြင့် ခန္ဓာကိုယ် နေ့ညလည်ပတ်မှုပုံစံကို ထိန်းညှိပေးပါတယ်။
 
(၉) အရက်လျှော့သောက်ပါ
အရက်သောက်ပြီး အစပိုင်းမှာ အိပ်ပျော်ပေမယ့် နောက်ပိုင်းမှာတော့ အိပ်စက်မှုပုံစံကို နှောင့်ယှက်စေပါတယ်။
အိပ်ခါနီးမှာ အရက်ရှောင်ရှားပြီး ကျန်တဲ့အချိန်တွေမှာလည်း ကန့်သတ်သောက်သုံးသင့်ပါတယ်။
Source: DoctorNDTV
#World_Health
#Published 31 May 2024
#YMG #Yangon_Times #Yangon_Media_Group