#WorldHealth
Published - 10 March 2022
ကမ္ဘာတဝန်းမှာ အိုမီခရွန်မျိုးဗီဇကွဲအလျင်အမြန်ကူးစက်နေတာကြောင့် လူတစ်ယောက်အနေနဲ့ ကိုဗစ်ရောဂါကူးစက်ခံရဖူးတယ်ဆိုရင် ကိုဗစ်ကာကွယ်ဆေးတွေ အားမြှင့်ကာကွယ်ဆေး(booster)တွေထိုးနှံဖို့ လိုအပ်သေးသလားဆိုတာကို အတော်များများကသိချင်နေကြပါတယ်။
ဆေးပညာသီအိုရီတွေအရ ရောဂါကူးစက်ခံရရင် ပဋိပစ္စည်း(antibody)ထွက်ပေါ်ကာ သဘာဝခုခံအားရရှိစေပါတယ်။ဒါပေမဲ့မေးစရာရှိတာက သဘာဝခုခံအားက ကိုဗစ်ကာကွယ်ဆေးနေရာမှာ အစားထိုးပေးနိုင်လား၊ နောက်ထပ်ကိုဗစ်ရောဂါကူးစက်မှုကို ကာကွယ်ပေးနိုင်လား ဆိုတာပါပဲ။
လေ့လာစမ်းသပ်ချက်တွေအရ ကိုဗစ်ကူးစက်ပြီးသားလူတွေလည်း ကာကွယ်ဆေးထိုးသင့်ပြီး ကာကွယ်ဆေးထိုးပြီးသားလူတွေကလည်း အားမြှင့်ကာကွယ်ဆေးထိုးနှံသင့်ပါတယ်။
ကိုဗစ်ရောဂါကူးစက်ခံရပြီးနောက်ပိုင်း ကာကွယ်ဆေးမထိုးရသေးတဲ့လူတွေဟာ ရောဂါကူးစက်ခံရပြီးနောက် ကာကွယ်ဆေးထိုးလိုက်တဲ့သူတွေထက် ရောဂါထပ်မံကူးစက်နိုင်ချေပိုများကြောင်း အမေရိကန်ရောဂါထိန်းချုပ်ကာကွယ်ရေးစင်တာ(CDC)က ဖော်ပြထားပါတယ်။
ကိုဗစ်အားမြှင့်ကာကွယ်ဆေး(booster)က ရောဂါပြင်းထန်စွာဖြစ်ပွားခြင်းကို ကာကွယ်ပေးနိုင်တာကြောင့် ရောဂါကူးစက်ဖူးသူတွေမှာလည်း အားမြှင့်ကာကွယ်ဆေးထိုးနှံသင့်ကြောင်း နိုင်ငံအများအပြားမှ တာဝန်ရှိသူများက အကြံပြုထားပါတယ်။
ကိုဗစ်ရောဂါကူးစက်ခံရခြင်းကြောင့် ဆေးရုံတက်ကုသခံယူခဲ့ရတဲ့ ကာကွယ်ဆေးမထိုးရသေးတဲ့လူတွေဟာ ဖိုင်ဇာ-ဘိုင်အိုတက်ခ်ကာကွယ်ဆေး ၂ ကြိမ်ထိုးထားသူတွေထက်စာရင် ရောဂါထပ်မံကူးစက်နိုင်ချေ ၅ ဆခွဲမျှပိုများနေကြောင်း အမေရိကန် CDC က ပြီးခဲ့တဲ့နိုဝင်ဘာလက ဖော်ပြခဲ့ပါတယ်။
အရင်က SARS-CoV-2 ကူးစက်ခံရဖူးသူတွေထဲမှာ ကာကွယ်ဆေးအပြည့်ထိုးနှံထားခြင်းဖြင့် ရောဂါထပ်မံကူးစက်မှုမဖြစ်ပွားအောင် ထပ်ဆောင်းကာကွယ်ပေးနိုင်ပါတယ်။
ရောဂါကူးစက်ခံရဖူးပြီး ကာကွယ်ဆေးနှစ်ကြိမ်ထိုးထားသူတွေမှာ ရောဂါကာကွယ်နိုင်စွမ်းက ပိုမိုအားကောင်းကာ တာရှည်ခံနိုင်ပြီး ကာကွယ်ဆေးနှစ်ကြိမ်ထိုးအပြီးမှာ ၉၀ ရာခိုင်နှုန်းအထိ ကာကွယ်ပေးနိုင်ပါတယ်။
အဆိုပါကာကွယ်နိုင်စွမ်းက ရောဂါကူးစက်ခံရအပြီး တစ်နှစ်ကျော်အထိတာရှည်ခံနိုင်ကာ ကာကွယ်ဆေးထိုးအပြီးမှာ ၆ လကျော်တာရှည်ခံနိုင်ပါတယ်။
ရောဂါကူးစက်ခံရပြီးရရှိခဲ့တဲ့ သဘာဝခုခံအားကတော့ ၆ လလောက်အထိ ကာကွယ်မှုပေးနိုင်ပါတယ်။၄ လမှ ၆ လကြာပြီးနောက် ခုခံအားကတဖြည်းဖြည်းလျော့ကျလာမှာဖြစ်ပါတယ်။
ဂျွန်ဟော့ကင်းစ်တက္ကသိုလ်လေ့လာချက်အရ mRNA ကာကွယ်ဆေးနှစ်ကြိမ်ထိုးပြီး ရောဂါကူးစက်ခဲ့တဲ့လူတွေမှာ ကာကွယ်ဆေးမထိုးထားဘဲ ရောဂါကူးစက်ခဲ့တဲ့လူတွေထက် ခုခံအားက ပိုမိုကြာရှည်ခံနိုင်ပါတယ်။
ကိုဗစ်ရောဂါဖြစ်ပွားခြင်းမှ ပြန်လည်သက်သာလာတဲ့လူတွေကို ရောဂါပိုးမတွေ့ရှိတော့ကြောင်းအဖြေထွက်ပြီးတဲ့အခါ ကာကွယ်ဆေးထိုးနှံပေးခြင်းဖြင့် ကျန်းမာရေးစောင့်ရှောက်မှုစင်တာတွေမှာ ကူးစက်မှုတွေကိုလျှော့ချနိုင်မှာဖြစ်ကြောင်း CDC က ဆိုပါတယ်။
Source: South China Morning Post
#WorldHealth
Published - 10 March 2022
ကိုဗစ်ရောဂါကူးစက်ဖြစ်ပွားခြင်းကြောင့် ဦးနှောက်ကျုံ့ခြင်းဖြစ်ပေါ်နိုင်ပြီး စိတ်ခံစားမှုနှင့်မှတ်ဉာဏ်ပိုင်းဆိုင်ရာ ဦးနှောက်အစိတ်အပိုင်းလျော့နည်းလာကာ အနံ့ခံအာရုံကိုထိန်းချုပ်နိုင်တဲ့ ဦးနှောက်အပိုင်းကိုလည်း ထိခိုက်စေနိုင်ကြောင်း အောက်စ်ဖို့ဒ်တက္ကသိုလ်ရဲ့လေ့လာချက်မှာ ဖော်ပြထားပါတယ်။
ဒီအကျိုးဆက်တွေကို ကိုဗစ်ရောဂါကူးစက်လို ဆေးရုံတက်ကုသခြင်းမခံရတဲ့သူတွေမှာပါ တွေ့မြင်နေရတာဖြစ်ပါတယ်။အဆိုပါထိခိုက်မှုတွေရဲ့အချို့တဝက်လောက်က ပြန်ကောင်းနိုင်ချေရှိလား ဒါမှမဟုတ် ရေရှည်အထိပါသက်ရောက်နေမှာလားဆိုတာကိုတော့ ဆက်လက်လေ့လာရဦးမှာဖြစ်ပါတယ်။
"ကိုဗစ်ရောဂါကူးစက်မှုဖြစ်စဉ်တွင် ဦးနှောက်ပိုင်းဆိုင်ရာမူမမှန်ခြင်းမျိုးတွေတွေ့ရှိရကြောင်း ခိုင်ခိုင်မာမာသိရှိထားပါတယ်" လို့ သုတေသနပညာရှင်တွေက မတ်လ ၇ ရက်နေ့မှာဖော်ပြခဲ့ပါတယ်။
အာရုံစူးစိုက်ခြင်းနဲ့ စီမံခန့်ခွဲခြင်းအစိတ်အပိုင်းများတွင် လုပ်ငန်းဆောင်ရွက်ချက်တွေ ပိုမိုဆိုးရွားလာခြင်းကို ကိုဗစ်အပျော့စားလက္ခဏာခံစားရသူတွေမှာတောင် တွေ့ရှိနေရပြီး ဦးနှောက်အရွယ်အစားက ၀.၂ ကနေ ၂ ရာခိုင်နှုန်းကြားအထိ ကျုံ့သွားခဲ့ပါတယ်။
အသက် ၅၁ မှ ၈၁ နှစ်အတွင်းရှိ လူပေါင်း ၇၈၅ ဦးရဲ့ဦးနှောက်တွေကို နှစ်ခါပြန်စကင်ရိုက်ကာ ဦးနှောက်အတွင်းပြောင်းလဲမှုများကို လေ့လာခဲ့ကြပါတယ်။ပထမအကြိမ်စကင်ရိုက်ပြီး ၁၄၁ ရက်အကြာမှာ ဒုတိယအကြိမ်စကင်ရိုက်ခဲ့တာဖြစ်ပါတယ်။
ဒီစမ်းသပ်မှုပြုလုပ်ချိန်မှာ ဗြိတိန်နိုင်ငံအတွင်း အယ်လ်ဖာမျိုးဗီဇကွဲကူးစက်မှုလွှမ်းမိုးနေပြီး ဒယ်လ်တာမျိုးဗီဇကွဲကူးစက်သူမပါဝင်နိုင်ဘူးလို့ ခန့်မှန်းလို့ရပါတယ်။
အဆိုပါစမ်းသပ်ချက်များအရ ကိုဗစ်ရောဂါဖြစ်ပွားခဲ့တဲ့လူအချို့ဟာ ဦးနှောက်တုံ့ဆိုင်းဝေဝါးခြင်းခံစားနေရတာဖြစ်ပြီး အာရုံသိရှိမှု၊ အာရုံစူးစိုက်မှု၊ ဦးနှောက်ထဲသို့ သတင်းအချက်အလက်ပို့ဆောင်မှုနှုန်းနဲ့ မှတ်ဉာဏ်အပိုင်းတို့မှာ ချိုယွင်းချက်တွေရှိလာပါတယ်။
ကိုဗစ်ကာကွယ်ဆေးထိုးနှံခြင်းက ဒီဆိုးကျိုးတွေအပေါ် အကျိုးသက်ရောက်မှုရှိနိုင်လားဆိုတာကို သုတေသီတွေမပြောပြသေးပါဘူး။ယူကေကျန်းမာရေးနဲ့လုံခြုံရေးအေဂျင်စီက ပြီးခဲ့တဲ့လကပြောကြားခဲ့ရာမှာ ကိုဗစ်ကာကွယ်ဆေးထိုးထားတဲ့သူတွေက ကိုဗစ်နောက်ဆက်တွဲလက္ခဏာခံစားရနိုင်ချေမှာ ကာကွယ်ဆေးမထိုးထားတဲ့သူတွေထက် တဝက်မျှသာရှိကြောင်း ထုတ်ဖော်ပြောကြားခဲ့ပါတယ်။
Source: The Straits Times
Published 9 March 2022
ပိုလန်က တိုက်လေယာဉ်တွေပေးမယ့် ကမ်းလှမ်းချက်ကို အနောက်အင်အားကြီးနိုင်ငံတွေ အရေးတကြီး ဆုံးဖြတ်ပေးကြဖို့ ယူကရိန်းသမ္မတ ဗိုလိုဒီမာ ဇီလင်စကီးက တောင်းဆိုလိုက်ပါတယ်။
ပိုလန်က ဆိုဗီယက်ခေတ်က MiG-29 ဂျက် တိုက်လေယာဉ်တွေကို အမေရိကန်လေတပ်စခန်းရှိတဲ့ ဂျာမနီနိုင်ငံ ရမ်စတိန်းကနေ တစ်ဆင့် ယူကရိန်းကိုပို့ပေးဖို့ အဆိုပြုချက်ကို အမေရိကန်က အင်္ဂါနေ့တုန်းက ပယ်ချခဲ့ပါတယ်။ ပိုလန်က လေတပ်အနေနှင့် F-16 တိုက်လေယာဉ်တွေကို အစားဖိုးရရှိဖို့ အကြံပြုထားတာဖြစ်ပါတယ်။
Source AFP
#WorldSports
Published 09 March 2022
ငယ်စဉ်က ကလေးစစ်သားဖြစ်ခဲ့ဖူးတဲ့ နီပေါနိုင်ငံမှ မာရသွန်တာဝေးအပြေးမယ်'မီရာရိုင်'ဟာ နှစ်ပေါင်းများစွာတိုင်အောင် နံနက်တိုင်းတစ်ဦးတည်း အပြေးလေ့ကျင့်နေခဲ့ပါတယ်။
#Yangon_Media_Group
Published 9 March 2022
အမေရိကန်နှင့်ဗြိတိန်တို့က ရုရှားထံမှ စွမ်းအင် တင်သွင်းတာတွေကို ဖြတ်ပစ်လိုက်ပြီလို့ မတ်(၈)ရက် နေ့က ကြေညာခဲ့ပါတယ်။ နိုင်ငံတကာစွမ်းအင်ကုမ္ပဏီတွေဖြစ်တဲ့ ရှဲလ်နှင့် ဘီပီတို့ကလည်း ရုရှားဆီက ရေနံနှင့် သဘာဝဓာတ်ငွေ့ တင်သွင်းမှုအသစ်တွေရပ်ဆိုင်းမယ်လို့ပြောပါတယ်။
အဲဒါကြောင့် လက်ရှိမှာ ရုရှားနှင့်ယူကရိန်းပဋိပက္ခတွေကြောင့် စက်သုံးဆီဈေးနှုန်းတွေမြင့်တက်နေတဲ့ အမေရိကန်မှာ အခုလို တင်သွင်းမှုပိတ်လိုက်တဲ့အတွက် ဈေးနှုန်းတွေ ထပ်မံမြင့်တက်မယ့်အလားအလာတွေရှိနေပါတယ်။
အခုဆို အမေရိကန်ပြည်ထောင်စုက ဓာတ်ဆီဆိုင်တွေမှာ ဆီတစ်ဂါလံကို ၄.၁၇ ဒေါ်လာပေးနေရပါပြီ။ တစ်လအတွင်း တစ်ဒေါ်လာနီးပါးဖြစ်တဲ့ ၇၂ ဆင့် တက်လာပါတယ်။ ဒီဈေးနှုန်းဟာ ၂၀၀၈ခုနှစ် ကမ္ဘာ့စီးပွားရေးကျဆင်းမှုနောက်ပိုင်းမှာ ဈေးအကြီးဆုံးဖြစ်ပါတယ်။
Source AFP
#DailyNews
Published - 9 Mar 2022
၁။ မျိုးသုဉ်းနိုင်သည့်ကြယ်လိပ်များကို မူရင်းဒေသများသို့ ပို့လွှတ်မည်
၂။ NCA ထိုးထားသည့်တိုင်းရင်းသားလက်နက်ကိုင်အဖွဲ့အများစု အာဆီယံအထူးကိုယ်စားလှယ်နှင့် တွေ့ဆုံနိုင်ရန်ရှိနေ
၃။ မိုးလဝေသ သတင်း
၄။ ကလေးစစ်သားဖြစ်ခဲ့ဖူးသည့် နီပေါမာရသွန်အပြေးမယ် ဆင်းရဲနွမ်းပါးမှုနှင့်လူတန်းစားခွဲခြားမှုကို အားကစားဖြင့်တိုက်ဖျက်ရန် လူငယ်မျိုးဆက်သစ်အပြေးသမားများလေ့ကျင့်ပေးနေ.......အစရှိတဲ့သတင်းတွေကိုတင်ဆက်ပေးသွားမှာပဲဖြစ်ပါတယ်။
#Yangon_Media_Group
#WorldPolitics
Published - 09 March 2022
ယူကရိန်းမှာဖြစ်ပွားနေတဲ့တိုက်ပွဲကိစ္စတွေကို ညှိနှိုင်းဖြေရှင်းပေးဖို့ အတွက် နိုင်ငံတကာအဖွဲ့အစည်းတွေနဲ့ပူးပေါင်းပြီး တက်တက်ကြွကြွလုပ်ဆောင်သွားဖို့ တရုတ်တို့ ဆန္ဒရှိကြောင်း တရုတ်သမ္မတ'ရှီကျင်ဖင်'က အသိပေးပြောကြားလိုက်ပါတယ်။
ဒါပေမဲ့ ဘယ်လိုဆောင်ရွက်သွားမလဲဆိုတာကို တိတိကျကျဖော်ပြသွားခြင်းမရှိသလို ရုရှားနိုင်ငံအပေါ် အနောက်အုပ်စုရဲ့ဒဏ်ခတ်ပိတ်ဆို့ မှုတွေကိုလည်း ထပ်ခါထပ်ခါ ဆန့်ကျင်ရှုတ်ချသွားပါတယ်။
ဂျာမနီအကြီးအကဲအဓိပတိ'အိုလက်ဖ်ရှော့လ်ဇ်'၊ ပြင်သစ်သမ္မတ'အီမန်နျူရယ်မက်ခရွန်'တို့နဲ့ အွန်လိုင်းကနေပြောဆိုခဲ့ရာ ယူကရိန်းအခြေအနေက စိုးရိမ်ပူပန်နေရကြောင်း၊ ဥရောပတိုက်မှာ စစ်ပွဲထပ်မံဖြစ်ပေါ်လာတဲ့အတွက် အလွန်ဝမ်းနည်းပူဆွေးရကြောင်း 'ရှီ'ကပြောကြားခဲ့တယ်လို့ တရုတ်နိုင်ငံခြားရေးဝန်ကြီးဌာနက ဖော်ပြထားပါတယ်။
"တရုတ်အနေနဲ့ ပြင်သစ်၊ ဂျာမနီ၊ အီးယူတို့နဲ့ အဆက်အသွယ်မပြတ်ရှိနေမှာဖြစ်ပါတယ်။ ပါဝင်ဖွဲစည်းထားတဲ့နိုင်ငံတွေရဲ့လိုအပ်ချက်အတိုင်း နိုင်ငံတကာအဖွဲ့အစည်းတွေနဲ့ အတူတကွလုပ်ဆောင်သွားမှာဖြစ်ပါတယ်။ စစ်ရေးပြဿနာဖြေရှင်းနိုင်ဖို့ ကြိုးပမ်းမှုအားလုံးမှန်သမျှကို ကူညီထောက်ပံ့ပေးသွားပါမယ်" လို့ 'ရှီ'ရဲ့ပြောကြားချက်ကို ဖော်ပြထားတာဖြစ်ပါတယ်။
တရုတ်နဲ့ရုရှားတို့ဟာ အနောက်နိုင်ငံကိုစိန်ခေါ်ရာမှာ အကြံတူပူးပေါင်းခဲ့ကြပေမယ့် ယူကရိန်းကိုကျူးကျော်မှုကတော့ သူတို့နှစ်နိုင်ငံရဲ့ဆက်ဆံရေးသဘောထားအစစ်အမှန်ကို စမ်းသပ်ရာရောက်နေပါတယ်။
တရုတ်တို့က ရုရှားရဲ့ကျူးကျော်တိုက်ခိုက်မှုနဲ့ ရုရှားအပေါ် ဒဏ်ခတ်ပိတ်ဆို့မှုတွေကို တိုက်ရိုက်အပြစ်တင်ဝေဖန်ခြင်းတော့ မရှိသေးပါဘူး။တစ်ကမ္ဘာလုံးက စီးပွားရေးပိတ်ဆို့အရေးယူမှုတွေပြုလုပ်ထားတာကြောင့် ရုရှားတို့ရဲ့စီးပွားရေးထိခိုက်လာချိန်မှာ တရုတ်တို့ကအလျင်စလို ကူညီတာမျိုး မတွေ့ရသေးပါဘူး။
တရုတ်ဘဏ်တွေနဲ့ကုမ္ပဏီတွေက ရုရှားတို့နဲ့ပူးပေါင်းဆောင်ရွက်လိုက်ပါက သူတို့ကိုလည်းဒဏ်ခတ်ပိတ်ဆို့ မှုတွေ ပြုလုပ်လာမှာကို စိုးရိမ်နေကြတယ်လို့ သုံးသပ်မှုတွေထွက်ပေါ်လာပါတယ်။
ယူကရိန်းမှာတိုက်ပွဲတွေဖြစ်ပွားရခြင်းက ရုရှားတို့ကျူးကျော်ခြင်းကြောင့်ဖြစ်တယ်ဆိုတာကို တရုတ်တို့က ဆက်တိုက်ငြင်းချက်ထုတ်ထားပြီး ဒါဟာ နေတိုး(NATO)တပ်ဖွဲ့ တွေ ဥရောပအရှေ့ဘက်သို့ ချဲ့ထွင်လာခြင်းက ဒီပဋိပက္ခကြီးဖြစ်ရခြင်းရဲ့အဓိကအကြောင်းအရင်းဖြစ်တယ်လို့ တရုတ်အာဏာပိုင်တွေက ရုရှားတို့ ရဲ့အဆိုအတိုင်း ပြောကြားခဲ့ပါတယ်။
ငြိမ်းချမ်းရေးဆွေးနွေးပွဲတွေပြုလုပ်ဖို့ ထောက်ပံ့ကူညီသင့်ကြောင်း၊ စစ်ပြေငြိမ်းရေးရရှိဖို့ နှစ်ဦးနှစ်ဘက်စလုံးဆွေးနွေးပြောကြားကြဖို့ တိုက်တွန်းသင့်ကြောင်း 'ရှီ'ကအလေးထားပြောဆိုခဲ့ပါတယ်။
စစ်ဘေးဒုက္ခသည်များအခက်အခဲမဖြစ်စေရေးအတွက် အင်တိုက်အားတိုက်ကျယ်ကျယ်ပြန့်ပြန့်ဆောင်ရွက်ဖို့ နိုင်ငံတကာအဖွဲ့အစည်းတွေကို တောင်းဆိုလိုက်ပြီး ယူကရိန်းကို လူသားချင်းစာနာမှုဖြင့် ထောက်ပံ့ကူညီသွားဖို့ အဆင်သင့်ရှိနေကြောင်း တရုတ်တို့က အသိပေးလိုက်ပါတယ်။
ဒါ့အပြင် အနောက်နိုင်ငံတွေရဲ့ စီးပွားရေးဒဏ်ခတ်ပိတ်ဆို့မှုတွေက ကိုဗစ်ကပ်ရောဂါကြောင့် ပျက်စီးနေပြီးသားဖြစ်နေတဲ့ ကမ္ဘာ့စီးပွားရေးကို ထပ်မံနှောင့်နှေးစေမှာဖြစ်ကြောင်း ရှုတ်ချလိုက်ပါတယ်။
"ဒီလိုတွေလုပ်နေလို့ ဘယ်သူမှအကျိုးအမြတ်ရှိမှာမဟုတ်ပါဘူး။ ဘက်စုံပူးပေါင်းဆောင်ရွက်ရေးနဲ့ ကမ္ဘာ့လုံခြုံရေးတည်တံ့ခိုင်မြဲဖို့ အတွက် တက်တက်ကြွကြွထောက်ပံ့ဆောင်ရွက်ပေးကြဖို့ လိုအပ်ပါတယ်" လို့ ဖော်ပြထားပါတယ်။
Source: CNN
Page 964 of 1003
