#World_Science
Published 21 April 2023

SpaceX မှ Starship အာကာသယာဉ်ဟာ တည်ဆောက်ခဲ့သမျှထဲမှာ စွမ်းအားအကြီးဆုံးဒုံးပျံဖြစ်ပြီး ကြာသပတေးနေ့က ပထမဆုံးစမ်းသပ်ပျံသန်းမှုပြုလုပ်ခဲ့ကာ သမိုင်းတစ်ခုဖန်တီးခဲ့ပါတယ်။

ထိုအာကာသယာဉ်ဟာ အာကာသယာဉ်မှူးတွေကို လဂြိုဟ်၊ အင်္ဂါဂြိုဟ်များသို့ စေလွှတ်ရန်ဆောက်လုပ်ထားတာဖြစ်ပါတယ်။

ဒါပေမဲ့ ဒုံးပျံဟာ ပထမခွဲထွက်အဆင့်မှာပဲ ပေါက်ကွဲသွားခဲ့ပါတယ်။

Starship ထိပ်ဖူးဟာ ပျံသန်းပြီး ၃ မိနစ်အတွင်း ပထမအဆင့်ခွဲထွက်ရန် စီစဉ်ထားပေမယ့် မအောင်မြင်ခဲ့ဘဲ ပေါက်ကွဲသွားခဲ့ပါတယ်။

ဒုံးပျံကြီးဟာ တက္ကဆပ် ဘိုကာချီကာ SpaceX အာကာသဆိပ်ရှိ Starbase ကနေ စံတော်ချိန် မနက် ၈ နာရီ ၃၃ မိနစ်မှာ စတင်ပစ်လွှတ်ခဲ့တာဖြစ်ပါတယ်။

စမ်းသပ်ပျံသန်းမှုက သိပ်ပြီးစိတ်လှုပ်ရှားစရာ မကောင်းခဲ့သလို ခွဲထွက်ခြင်းအဆင့်မတိုင်မီ မမျှော်လင့်ဘဲ ပေါက်ကွဲသွားခဲ့ပါတယ်လို့ SpaceX က တွစ်တာမှာဖော်ပြထားပါတယ်။

စမ်းသပ်ပစ်လွှတ်မှု ပေါက်ကွဲခဲ့ပေမယ့် SpaceX ကတော့ ဒါကိုအောင်မြင်တယ်လို့ ကြေညာခဲ့ပါတယ်။

"ဒီလိုစမ်းသပ်မှုကနေ လေ့လာမှတ်သားပြီး Starship ရဲ့ ယုံကြည်စိတ်ချရမှုကို တိုးတက်အောင် အကူအညီပေးနိုင်လိမ့်မယ်" လို့ ဖော်ပြခဲ့ပါတယ်။

SpaceX စီအီးအို'အီလွန်မက်စ်'က ဒုံးပျံပစ်လွှတ်မှုနဲ့ပတ်သက်ပြီး အဖွဲ့သားအားလုံးကို ဂုဏ်ပြုလိုက်ကာ နောက်ထပ်စမ်းသပ်ပစ်လွှတ်မှုအတွက် အရေးပါတဲ့အချက်အလက်တွေ ရရှိခဲ့ကြောင်း ပြောကြားခဲ့ပါတယ်။

စမ်းသပ်ပစ်လွှတ်မှုကို တနင်္လာနေ့က ပြုလုပ်ဖို့စီစဉ်ခဲ့ပေမယ့် နည်းပညာပိုင်းဆိုင်ရာပြဿနာကြောင့် နောက်ဆုံးမိနစ်ကျမှ ရွှေ့ဆိုင်းခဲ့ရပါတယ်။

အေးခဲနေတဲ့အဆို့ရှင်ကြောင့် ဖိအားပြဿနာပေါ်ပေါက်ခဲ့ရတာ ဖြစ်ပါတယ်။

ကြာသပတေးနေ့က ပစ်လွှတ်မှုမှာ အားလုံးအဆင်ပြေခဲ့ပါက Booster 7 ဟာ လွှတ်တင်ပြီးနောက် ၈ မိနစ်အကြာမှာ မက္ကဆီကိုပင်လယ်ကွေ့သို့ ပြုတ်ကျမှာဖြစ်ပါတယ်။

Ship 24 က အာကာသထဲဝင်ရောက်ကာ ကမ္ဘာဂြိုဟ်ပတ်လမ်းကြောင်းတစ်ခုမှာ လည်ပတ်ရမှာဖြစ်ပါတယ်။

ပစ်လွှတ်ပြီး မိနစ် ၉၀ အကြာမှာတော့ ဟာဝိုင်အီအနီး ပစိဖိတ်သမုဒ္ဒရာအတွင်း ပြုတ်ကျရမှာဖြစ်ပါတယ်။

ပေ ၂၃၀ မြင့်တဲ့ Super Heavy booster ဒုံးပျံပေါ်မှာ ၁၆၄ ပေမြင့်တဲ့ Starship အာကာသယာဉ်ရှိပြီး အာကာသယာဉ်မှူးများနဲ့ ကုန်များတင်ဆောင်ရန် ဖန်တီးထားတာဖြစ်ပါတယ်။

ထိုနှစ်ဆင့်ပေါင်း အာကာသယာဉ်ကြီးဟာ ၃၉၄ ပေဖြင့် လွတ်လပ်ရေးလစ်ဘာတီကျောက်တိုင်ကြီးထက် ပိုမြင့်ပါတယ်။

ပစ်လွှတ်မှုက အလွန်အန္တရာယ်များပြီး ဧရာမဒုံးပျံကို ပထမဆုံးပစ်လွှတ်ဖို့ အခက်အခဲများရှိခဲ့ကာ ပျက်ကျဖို့အခွင့်အရေးအလွန်များခဲ့ပါတယ်လို့ အီလွန်မက်စ်ကဆိုပါတယ်။

Starship ဟာ နာဆာရဲ့အာကာသယာဉ်ထက် ပိုမိုကြီးမားပြီး ပတ်လမ်းကြောင်းထဲမှာ ၁၀၀ မက်ထရစ်တန်ချိန်ကို သယ်ဆောင်ထားနိုင်မှာဖြစ်ပါတယ်။

Source: WION #World_Science #SpaceX #အာကာသဒုံးပျံယာဉ် #မိနစ်ပိုင်းအတွင်းပေါက်ကွဲ #YMG #Yangon_Media_Group

#World_Health
Published 21 April 2023

မတ်လအတွင်း အပူချိန်အတက်အကျဖြစ်တတ်ပြီး နှာရည်ယိုခြင်း၊ လည်ချောင်းနာခြင်း၊ ချောင်းဆိုးခြင်း၊ ဝမ်းလျှောခြင်းတို့ ဖြစ်ပျက်တတ်ကြပါတယ်။

အဖျားမရှိဘဲနဲ့ နှာရည်ယိုခြင်း၊ ချောင်းခြောက်ဆိုးခြင်းတို့ အချိန်ကြာမြင့်သည့်တိုင်အောင် ခံစားရတတ်ပါတယ်။

အပူချိန်ရုတ်တရက်ပြောင်းလဲခြင်းကြောင့် နှာပိတ်ခြင်းခံစားရတတ်ကြောင်း BLK Max Super Speciality ဆေးရုံမှ ဒေါက်တာ'အတ်တူလ်ဘေဆင်'က ပြောပြခဲ့ပါတယ်။

ဒါဟာ နှာခေါင်းတစ်ရှူးက ရောင်ရမ်းလာပြီး သွေးကြောများဖောရောင်လာခြင်းကြောင့် ဖြစ်ပါတယ်။

ပြဿနာကတော့ နှာခေါင်းမှအရည်ထွက်လာပြီး ပိုလျှံလာတဲ့အချွဲတွေက နှာခေါင်းအနောက်ဘက်မှကျဆင်းလာကာ ချောင်းဆိုးခြင်း လည်ချောင်းနာခြင်းတို့ ဖြစ်လာစေပါတယ်။

ဒါ့အပြင် ဖျားနာခြင်း၊ နှာရည်ယိုခြင်း၊ ခေါင်းကိုက်ခြင်း၊ မျိုချရခက်ခဲခြင်းတို့လည်း ခံစားရတတ်ပါတယ်။

ယခုလိုရာသီဥတုမျိုးမှာ ဗိုင်းရပ်စ်တွေရှင်သန်ပေါက်ဖွားနိုင်ချေ အများဆုံးဖြစ်နေပြီး ပတ်ဝန်းကျင်မှာ ဗိုင်းရပ်စ်အများအပြားလည်ပတ်နေကြကြောင်း C K Birla ဆေးရုံမှ ဒေါက်တာ'တူရှာတာယယ်'က ပြောပြသွားပါတယ်။

ဗိုင်းရပ်စ်အတော်များများက ဖျားနာခြင်း၊ လည်ချောင်းနာခြင်း၊ ချောင်းဆိုးခြင်း၊ နှာရည်ယိုခြင်း၊ အော့အန်ခြင်း၊ ဝမ်းပျက်ခြင်းတို့ ဖြစ်တတ်ပါတယ်။

ရာသီအကူးအပြောင်းဖျားနာခြင်းတွေက ဆေးဝါးများဖြင့် သက်သာပျောက်ကင်းတတ်ကြပါတယ်။

နှာခေါင်းစည်းတပ်ဆင်ခြင်း၊ မကြာခဏလက်ဆေးခြင်း၊ ခပ်ခွာခွာနေထိုင်ခြင်းတို့အပြင် အဖျားဝေဒနာ ၁၀၀ ဒီဂရီဖာရင်ဟိုက်ကျော်နေရင် ပါရာစီတမောလ်သောက်သုံးနိုင်ကြောင်း ဒေါက်တာ'တာယယ်'ကဆိုပါတယ်။

နှာရည်ယို၊ နှာပိတ်ခြင်းတို့အတွက် အန်တီဟစ္စတမင်းဆေးအသုံးပြုနိုင်သလို ချောင်းဆိုးခြင်းအတွက် ငုံဆေးသောက်သုံးနိုင်ပါတယ်။

လည်ချောင်းနာခြင်းအတွက်တော့ ဆားရည်ဖြင့်အာလုတ်ကျင်းခြင်း၊ ဘီတာဒိုင်း၊ ရေနွေးငွေ့ရှူခြင်းတို့ ပြုလုပ်နိုင်ပါတယ်။

ကိုယ်ခံအားမြှင့်တင်ရန်အတွက် ဗိုက်တာမင်စီဆေးပြားများသောက်သုံးနိုင်ပါတယ်။

ပဋိဇီဝဆေးတွေက ဗိုင်းရပ်စ်တွေကို မသက်ရောက်စေနိုင်တာကြောင့် လုံးဝရှောင်ရှားသင့်ပါတယ်။

ရောဂါလက္ခဏာတွေက ၅ ရက်ကျော်လာရင်တော့ ဆရာဝန်နဲ့တိုင်ပင်ပြသသင့်ပါတယ်။

အာဟာရဓာတ်မျှတတဲ့ ရာသီစာများ၊ ရေအလုံအလောက်သောက်ခြင်းတို့ဖြင့် သက်သာစေနိုင်ပါတယ်။

#Source: India Today #World_Health #နွေရာသီ #လည်ချောင်းနာ #နှာပိတ်
#YMG #Yangon_Media_Group

#Asia_Design
Published 20 April 2023

တစ်ချိန်က နီယွန်ဆိုင်းဘုတ်များဖြင့် ရောင်စုံထွန်းလင်းတောက်ပခဲ့တဲ့ ဟောင်ကောင်လူနေရပ်ကွက်တွေမှာ အခုတော့ နီယွန်ဆိုင်းဘုတ်အများစု ဖယ်ရှားခံရပြီဖြစ်ပါတယ်။

#Asia_Design #နီယွန်ဆိုင်းဘုတ် #YMG #Yangon_Media_Group

#Daily_News
Published_ 20 April 2023

၁။ ဒေသအသီးသီးမှ သင်္ကြန်ပွဲတော်များ၊ တိုင်းရင်းသားရိုးရာသင်္ကြန်ပွဲတော်ဓလေ့များကို ကမ္ဘာ့အမွေအနှစ်စာရင်းတင်သွင်းနိုင်ရန် မှတ်တမ်းတင်ထားဟုဆို

၂။ စက်သုံးဆီဈေးကျဆင်းလာ ၉၂ဓာတ်ဆီတစ်လီတာ ၂၁၂၅ ကျပ်ရောက်ရှိ

၃။ ကမ္ဘာ့ရွှေဈေးတစ်အောင်စကို ၁၉၉၂ ဒေါ်လာပေါက်ဈေးရှိနေပြီး ပြည်တွင်းရွှေဈေးအနည်းငယ်ပြန်ကျ

၄။ ပျောက်ကွယ်လာသည့်နီယွန်ဆိုင်းဘုတ်များကို ထိန်းသိမ်းစောင့်ရှောက်ရန်ကြိုးပမ်းလာ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Media_Group #Daily_News #YMG

#World_Business
Published 20 April 2023

ဖေ့စ်ဘွတ်ခ်တည်ထောင်ရာ Meta ကုမ္ပဏီဟာ Metaverse ကုမ္ပဏီအားလုံးမှာ ဧပြီ ၁၉ ရက်နေ့ကစပြီး အလုပ်အကိုင်များလျှော့ချနေပြီ ဖြစ်ပါတယ်။

Facebook ၊ WhatsApp ၊ Instagram ၊ Reality Labs တို့မှာ အလုပ်အကိုင်နေရာပေါင်း ၁ သောင်းလျှော့ချသွားမှာဖြစ်ပြီး ဒါဟာ ပိုမိုအကျိုးရှိသက်ရောက်စေရန် Meta က ရည်ရွယ်တာဖြစ်ပါတယ်။

ထုတ်ပယ်ရန် ရည်ရွယ်ထားတဲ့ ဝန်ထမ်းများထံသို့ ကြေညာရန် မန်နေဂျာများအား Meta က အသိပေးပြီးနောက် အခုလိုဆောင်ရွက်လိုက်တာဖြစ်ပါတယ်။

Metaverse ကုမ္ပဏီအသီးသီးရှိ မန်နေဂျာများထံသို့ ဧပြီ ၁၉ ရက်နေ့ကအသိပေးပြီးနောက် ထိုရာထူးနေရာ ၁ သောင်းထဲကမှ ဘယ်နှဦးဖယ်ရှားမလဲဆိုတာတော့ သေချာမသိရသေးပါဘူး။

Meta မှ အသင်းအဖွဲ့များကို ပြန်လည်ဖွဲ့စည်းမယ်လို့လည်း Bloomberg News မှ ဖော်ပြခဲ့ပါတယ်။

အိမ်ကနေအလုပ်လုပ်နိုင်တဲ့ မြောက်အမေရိကမှ ဝန်ထမ်းတွေကိုလည်း အချက်အလက်များ စီမံဆောင်ရွက်ပေးဖို့ အမိန့်ပေးထားကြောင်း သိရှိရပါတယ်။

Meta က နိုဝင်ဘာလမှာ အလုပ်အကိုင် ၁၃ ရာခိုင်နှုန်းဖြစ်တဲ့ ၁၁,၀၀၀ ကိုလည်းလျှော့ချထားပြီးဖြစ်ပါတယ်။

ဒါကြောင့် အချိန် ၆ လခန့်အတွင်း ဝန်ထမ်းပေါင်း ၂၁,၀၀၀ ထုတ်ပစ်မယ့်သဘောဖြစ်ပါတယ်။
Meta က အသင်းဘတ်ဂျက်သတ်မှတ်ခြင်းမှာ နှောင့်နှေးနေသလို အလုပ်ထုတ်ပယ်မှုများ ပိုများလာမယ်လို့ ထင်ကြေးများထွက်ပေါ်နေကြောင်း WION က ၂၀၂၃ ဖေဖော်ဝါရီမှာ တင်ပြခဲ့ပါတယ်။

"ဧပြီနှောင်းပိုင်းမှာ စီးပွားရေးဆိုင်ရာအဖွဲ့များနဲ့ မေလနှောင်းပိုင်းမှာ နည်းပညာဆိုင်ရာအဖွဲ့များ ပြန်လည်ဖွဲ့စည်းခြင်း၊ အလုပ်ထုတ်ပယ်ခြင်းများ ကြေညာသွားဖို့မျှော်မှန်းထားပါတယ်" လို့ Meta တည်ထောင်သူ'မာ့ခ်ဇူကာဘက်ခ်'က မတ်လက ရေးသားဖော်ပြခဲ့ပါတယ်။

ဇူကာဘက်ခ်ဆိုခဲ့တဲ့အတိုင်း Meta က ဘဏ္ဍာရေး၊ တရားဥပဒေ၊ လူသားအရင်းအမြစ်စတဲ့ ကဏ္ဍတွေကိုဖြတ်တောက်ရန် စီစဉ်နေပါတယ်။

CNBC TV18 ရဲ့တင်ပြချက်အရ ဒုတိယအကြိမ်အလုပ်လျှော့ချရာမှာ အိန္ဒိယမှဝန်ထမ်းများလည်း သက်ရောက်လာနိုင်ပါတယ်။

အလုပ်ထုတ်ခံရတဲ့ Meta ဝန်ထမ်းအများအပြားဟာ ကုမ္ပဏီလည်ပတ်ရာနေရာများမှာ ထောင်ချီအလုပ်ဖြုတ်ခံရတဲ့အကြောင်းတွေကို LinkedIn မှာ ဖော်ပြလာကြပါတယ်။

ဖေ့စ်ဘွတ်ခ်မှ စီးပွားရေးပရိုဂရမ်မန်နေဂျာဟောင်း 'ထရီဇာဂျီမီနက်ဇ်'က LinkedIn မှာဖော်ပြရာမှာ ဒီမနက်အိပ်ရာနိုးလာတော့ Meta ကနေ အလုပ်ထုတ်ခံရသူတွေထဲမှာ သူလည်းပါဝင်ကြောင်း၊ စိတ်ပျက်ရပေမယ့် ၃ နှစ်နီးပါးအတွင်း အရည်အသွေးပြည့်ဝတဲ့ လက်တွဲဖော်တွေနဲ့ တွဲလုပ်ခဲ့ရတဲ့အတွက် အလွန်ကျေနပ်မိကြောင်း ဖော်ပြထားပါတယ်။

# Source: WION
#World_Business #Facebook #Instagram #Whats App #အလုပ်စဖြုတ် #YMG #Yangon_Media_Group

#World_Health
Published_ 20 April 2023

XBB.1.16 လို့ခေါ်တဲ့ ကိုဗစ်-၁၉ မျိုးဗီဇကွဲအသစ်ဟာ လက်ရှိအခြားမျိုးဗီဇကွဲတွေထက် ပိုမိုကူးစက်မြန်နေပေမယ့် ရောဂါလက္ခဏာဆိုးရွားခြင်းတော့ မရှိဘူးလို့ ကနဦးလေ့လာချက်များမှာ ဖော်ပြထားပါတယ်။

မကြာသေးမီရက်သတ္တပတ်များအတွင်း အိန္ဒိယမှာ ကူးစက်မှုတိုးများလာဟန်ရှိပြီး မီဒီယာနဲ့ ကမ္ဘာ့ကျန်းမာရေးအဖွဲ့ WHO တို့ အာရုံစိုက်လာကြပါတယ်။

ဗုဒ္ဓဟူးနေ့အထိ အိန္ဒိယမှာ လက်ရှိကိုရိုနာဗိုင်းရပ်စ်ကူးစက်ခံထားရသူ ၄၀,၂၁၅ ဦးရှိပြီး အင်္ဂါနေ့နဲ့ ဗုဒ္ဓဟူးနေ့ကြားက နောက်ထပ် ၇,၈၃၀ ဦးထပ်တိုးလာပါတယ်။

ဂျပန်နဲ့ ချက်သုတေသီများရဲ့ တွေ့ရှိချက်အရ XBB.1.16 ဟာ SARS-CoV-2 ခုခံပဋိပစ္စည်းများကို ယဉ်ပါးပြီး အိုမီခရွန်မျိုးဗီဇကွဲတွေထက် ဖွံ့ဖြိုးမှုနှုန်းပိုမိုမြန်ဆန်နိုင်ဖွယ်ရှိပါတယ်။

ဒီမျိုးဗီဇကွဲရဲ့ကူးစက်မှုနှုန်းအရ မကြာခင်မှာ ကမ္ဘာအနှံ့ပျံ့နှံ့သွားနိုင်တယ်လို့ ဖော်ပြနေကြပါတယ်။

အိန္ဒိယမှာ ကလေးတွေရဲ့ကိုရိုနာဗိုင်းရပ်စ်ကူးစက်မှုနဲ့ ပတ်သက်ပြီး လက္ခဏာအမျိုးမျိုးတွေ့ရကြောင်း Times of India မှာ အစောပိုင်းကဖော်ပြထားပါတယ်။

WHO ကလည်း XBB.1.16 ကိုစောင့်ကြည့်နေကာ XBB.1.5 နဲ့ယှဉ်ရင် စပိုက်ခ်ပရိုတိန်းမှာ ဗီဇပြောင်းလဲချက်တစ်မျိုးပိုပါလာကြောင်း WHO နည်းပညာပိုင်းမှ ဒေါက်တာ'မာရီယာဗန်ကာခေါ့ဗ်'က ဖော်ပြထားပါတယ်။

XBB.1.16 က အိန္ဒိယမှာ အခြားမျိုးဗီဇကွဲတွေထက် ပိုမိုကူးစက်နေပြီး ပျံ့နှံ့နေတာလအနည်းငယ်ကြာပါပြီ။

ပျံ့နှံ့နေတဲ့ထဲမှာ အိုမီခရွန်မျိုးခွဲပေါင်း ၆၀၀ ကျော်ရှိနေကြောင်းလည်း ပြောပြသွားပါတယ်။

ဇန်နဝါရီလတုန်းကတော့ XBB.1.5 မျိုးဗီဇကွဲဟာ ကူးစက်အမြန်ဆုံးမျိုးဗီဇကွဲဖြစ်နေတယ်လို့ သတ်မှတ်ခဲ့ကြပါတယ်။
Source: The Jerusalem Post
#World_Health #ကိုဗစ်မျိုးဗီဇကွဲအသစ် #XBB.1.16ကူးစက်မှု #WHO စောင့်ကြည့်လေ့လာ
#YMG #Yangon_Media_Group