#WorldHealth
Published 23 May 2022

ညဘက်မှာ ခွေးလေးတွေ ကြောင်လေးတွေနဲ့ အတူအိပ်စက်ခြင်းဖြင့် နှစ်ခြိုက်စွာအိပ်ပျော်နိုင်ကြောင်း စစ်တမ်းလေ့လာရရှိထားပါတယ်။

ဗြိတိန်စစ်တမ်းကောက်ယူရေး OnePoll က အမေရိကန်အိမ်မွေးတိရစ္ဆာန်ပိုင်ရှင်အယောက် ၂ ထောင်ကို စစ်တမ်းကောက်ယူခဲ့ပါတယ်။

၁၀ ယောက်မှာ ၇ ယောက်က သူတို့အချစ်ဆုံးတိရိစ္ဆာန်နဲ့အတူ အိပ်စက်ခြင်းက ပိုမိုကောင်းမွန်စွာအိပ်ပျော်စေကြောင်း တွေ့ရှိရပါတယ်။

ထိုထဲကလူတဝက်လောက်က သူတို့ရဲ့အိမ်မွေးလေးတွေ အနားမှာရှိရုံနဲ့တင် စိတ်ဖိစီးမှုလျော့ကျစေတယ်လို့ သိရှိရပါတယ်။

အရင်ကလေ့လာမှုတွေမှာလည်း အိမ်မွေးတွေနဲ့အိပ်စက်ခြင်းက လူသားတွေအတွက် ပိုမိုလုံခြုံစိတ်ချရစေပြီး စိတ်အခြေအနေတိုးတက်စေတယ်လို့ ဖော်ပြထားပါတယ်။

လူသားတွေဟာ ညစဉ်အိပ်ချိန် ၇ နာရီမှ ၉ နာရီကြားရှိသင့်တယ်လို့ ဆရာဝန်များအကြံပြုထားပေမယ့် ၃ ပုံ ၁ ပုံလောက်က လုံလောက်စွာမအိပ်စက်ရပါဘူး။

ဒါကြောင့်နှလုံးရောဂါ၊ အဝလွန်ခြင်း၊ စိတ်ဓာတ်ကျခြင်းတိုလို နာတာရှည်ရောဂါများဖြစ်ပေါ်လာကြကြောင်း CDC က ဖော်ပြထားပါတယ်။

အချို့ကလည်း ညဘက်မှာ အိမ်မွေးတိရိစ္ဆာန်တွေအနားမှာရှိခြင်းက စိတ်ငြိမ်သက်စေတယ်လို့ ဆိုပါတယ်။

လက်တွဲဖော်ရှိတဲ့လူတွေထဲက ၅၈ ရာခိုင်နှုန်းက ညဘက်မှာလက်တွဲဖော်နဲ့အတူရှိဖို့ထက် အိမ်မွေးတိရိစ္ဆာန်နဲ့သာရှိဖို့ ပိုပြီးလိုလားပါတယ်။

အချို့အိမ်မွေးတိရိစ္ဆာန်ပိုင်ရှင်တွေကတော့ သူတို့နဲ့အတူအိပ်ရလို့ အနှောင့်အယှက်ဖြစ်ရကြောင်း ဖြေကြားလာပါတယ်။

၂၀၁၈ ခုနှစ်က အမျိုးသမီး ၉၀၀ ကို လေ့လာရာမှာ အိမ်မွေး‌လေးတွေနဲ့အိပ်ခြင်းက အိပ်ရာထဲမှာ ပိုမိုလုံခြုံစိတ်ချရတယ်လို့ ဖြေကြားခဲ့ကြပါတယ်။

ခွေးတွေက အိပ်စက်ရာမှာအနှောင့်အယှက်ပိုနည်းပြီး ပိုမိုလုံခြုံစိတ်ချရနိုင်ပေမယ့် ကြောင်တွေကတော့ အိပ်စက်ရာမှာ အနှောင့်အယှက်ဖြစ်စေတယ်လို့ ပြောသူတွေရှိပါတယ်။

Sealy မွေ့ရာထုတ်လုပ်ကုန်မှ ကြော်ငြာဌာနဥက္ကဌ’ဘရန့်ဖစ္စတာ’က ဒီစစ်တမ်းများအရ အိမ်မွေးတွေနဲ့အိပ်စက်ခြင်းက လူသားတွေအတွက် အကျိုးပြုတာရှိသလို အနှောင့်အယှက်ဖြစ်စေတာမျိုးလည်းရှိကြောင်း သုံးသပ်သွားပါတယ်။

Source: Dailymail.
#Yangon_Media_Group

Published 22 May 2022

ပုံမှန်မဟုတ်တဲ့ အပူနှင့်စိုထိုင်းမှုအခြေအနေတွေမှာ ဘရွတ်ကလင်း တာဝက်မာရသွန်ပြေးပွဲကို မေလ၂၁ ရက် စနေနေ့က ကျင်းပရာ အပြေးသမားတစ်ဦးသေဆုံးပြီး အခြား၁၅ ဦးမှာ ဆေးရုံတင်လိုက်ရတယ်လို့ မြို့အရာရှိတွေကပြောပါတယ်။ ဆေးရုံတင်လိုက်ရတဲ့ ၁၅ ဦးထဲမှာ လေးဦးရဲ့ဒဏ်ရာတွေဟာစိုးရိမ်ရပြီး (၈)ဦးက အသက်အန္တရာယ်မရှိဘဲ ကျန်လေးဦးကတော့ အနည်းအကျဉ်းဒဏ်ရာရတာဖြစ်တယ်လို့ နယူးယောက်စီးတီးမီးသတ်ဌာနပြောရေးဆိုခွင့်ရသူက Insider ကို သတင်းထုတ်ပြန် ဖြေကြားပါတယ်။

သေဆုံးသွားတဲ့အပြေးသမားဟာ အသက်၃၀အရွယ်ရှိပြီး ပန်းဝင်ပြီးနောက်လဲကျသွားတာဖြစ်တယ်လို့ နယူးယောက်တိုင်းမ် ကရေးသားပါတယ်။

အခုလိုသေဆုံးဒဏ်ရာရမှုတွေဟာ အပူချိန်နှင့်စိုထိုင်းဆတွေနှင့် တိုက်ရိုက်ပတ်သက်သလားဆိုတာကိုတော့ ရှင်းရှင်းလင်း လင်းမသိရသေးပါဘူး။ နယူးယောက်စီးတီးနေရာတစ်ဝိုက်မှာ အရာရှိတွေက အပူသတိပေးချက်ထုတ်ပြန်တဲ့တစ်ရက်တည်းမှာ မာရသွန်ပြေးပွဲ ကျင်းပခဲ့တာဖြစ်ပါတယ်။လေထုအရည်အသွေးသတိပေးချက်ပါအဲဒီတုန်းက ထုတ်ပြန်ခဲ့တာပါ။

မနက်၇နာရီမှ စတင်ခဲ့တဲ့ပြေးပွဲအချိန်အတွင်း အပူချိန်ဟာ ၆၀နှင့်၇၀ ဖာရင်ဟိုက်ကြားရှိခဲ့ပြီး နောက်ပိုင်းမှာ ၉၀ဒီဂရီဖာရင်ဟိုက်ကျော်ရှိခဲ့ပါတယ်။အဲဒီစနေနေ့ဟာ နယူးယောက်စီးတီးမှာ တစ်နှစ်လုံးအပူဆုံးဖြစ်ပြီး မေလမှာ အပူချိန် သတိပေးချက်ထုတ်ပြန်ရတာကလည်း ၁၆နှစ်အတွင်းပထမဆုံးအကြိမ်ဖြစ်ပါတယ်။

၁၃.၁မိုင်ပြေးရတဲ့ ခရီးဝက်မာရသွန်ကိုဘရွတ်ကလင်းပြတိုက်က တာထွက်ပြီး ပရောစပက်ပန်းခြံကိုဖြတ်သန်းပြီးနောက် ကိုနေကျွန်းမှာ ပန်းဝင်တာဖြစ်ပါတယ်။သေဆုံးသွားသူဟာ ပန်းဝင်အပြီးလဲကျသွားလို့ ဆေးရုံကိုအပို့ ဆေးရုံအရောက်မှာ သေဆုံးခဲ့ရတာပါ။

Source Insider

Published 22 May 2022

မြောက်ကိုးရီးယားလုပ်တာမှန်သမျှအတွက် ကျွန်တော်တို့ပြင်ဆင်ထားပြီးပါပြီ၊သူတို့ဘာပဲလုပ်လုပ် ကျွန်တော်တို့ ဘယ်လိုတုန့်ပြန်ရမယ်ဆိုတာစဉ်းစားထားပြီးပြီမို့ စိတ်မပူဘူး လို့ အမေရိကန်သမ္မတ ဂျိုးဘိုင်ဒင်ကပြောပါတယ်။  တောင်ကိုးရီးယားကို သူရောက်ရှိနေစဉ်အတွင်း ဟွန်ဒေးရင်းနှီးမြှပ်နှံမှုနှင့်ပတ်သက်လို့ မှတ်ချက်စကားပြောကြားရာမှာ သူက ထည့်သွင်းပြောဆိုခဲ့တာဖြစ်ပါတယ်။

Source AFP

Published 22 May 2022

ဂရင်းပါတီနှင့် ရာသီဥတုပြောင်းလဲမှာ အာရုံစိုက်တဲ့ တစ်သီးပုဂ္ဂလိကတွေအပေါ်မကြုံစဖူး ထောက်ခံမှုတွေ က ကွန်ဆာဗေးတစ်ညွန့်ပေါင်းရဲ့ ဆယ်စုနှစ်တစ်စုနီးပါး အုပ်ချုပ်မှုကို အဆုံးသတ်လိုက်ပြီးနောက်  ဩစတြေးလျ လေဘာပါတီဟာ နောက်အစိုးရကို တနင်္လာနေ့မှာ ဖွဲ့စည်းဖို့ရှိပါတယ်။

အလယ်-လက်ဝဲ လေဘာပါတီဟာ အောက်လွှတ်တော်၁၅၁နေရာက အများစု ၇၆နေရာရရှိဖို့ လေးနေရာ ငါးနေရာခန့် လိုအပ်နေပါတယ်။ ဒါကြောင့် ၂၀၁၃ခုနှစ်ကတည်းက လက်လွှတ်ခဲ့တဲ့ အာဏာကို ပြန်ရယူဖို့ တစ်သီးပုဂ္ဂလိကတွေနှင့် ပါတီငယ်လေးတွေရဲ့ထောက်ခံမှုလိုကောင်းလိုပါမယ်။

တိုကျိုမှာ အင်္ဂါနေ့ မှာ အမေရိကန်သမ္မတ ဂျိုးဘိုင်ဒင်၊ဂျပန်နှင့်အိန္ဒိယဝန်ကြီးချုပ်တို့နှင့်တွေ့ဆုံဆွေးနွေးကြမယ့် လေးပြည်ထောင်"Quad" အစည်းအဝေးကို သူမတက်ခင် သူဟာ ၃၁ဦးမြောက်ဝန်ကြီးချုပ်အဖြစ် အခြား ပါတီရဲ့ဝါရင့် ပါတီဝင်(၄)ဦးနှင့်အတူ  ကျမ်းသစ္စာကျိန်ဆိုမယ်လို့ လေဘာပါတီခေါင်းဆောင် အန်သိုနီအယ်ဘန်နီဆီက ပြောပါတယ်။

“ ကျွန်တော်ဟာ နိုင်ငံကို မပြောင်းလဲလိုပါဘူး။ နိုင်ငံမှာ နိုင်ငံရေးတွေ လှုပ်ရှားဆောင်ရွက်နေကြတဲ့ နည်းလမ်းကိုပဲ ပြောင်းလဲချင်ပါတယ်” လို့ ဆစ်ဒနီဆင်ခြေဖုံးရက်ကွက်က ကဖေးဆိုင်တစ်ဆိုင်က ထွက်လာတဲ့ အယ်ဘန်နီဆီက သတင်းထောက်တွေကိုပြောပါတယ်။သူဟာ အဲဒီနေရာမှာပဲ ထောက်ခံသူတွေနှင့် အမှတ်တရ ဓာတ်ပုံတွေ ရိုက်ကူးခဲ့တာပါ။

ဗြိတိန်ဝန်ကြီးချုပ် ဘောရစ်ဂျွန်ဆင်နှင့်အိမ်နီးချင်း နယူးဇီလန်ဝန်ကြီးချုပ် ဂျာဆင်ဒါအာဒန်တို့အပါအဝင် ကမ္ဘာ့ခေါင်းဆောင် တော်တော်များများက သူ့အနိုင်ရမှုကို ချီးကျုးဝမ်းသာစကားပြောခဲ့ကြပါတယ်။

လက်ရှိဝန်ကြီးချုပ် စကော့မော်ရစ်ဆန်ရဲ့ လစ်ဘရယ်ပါတီဟာ သူ့ရဲ့အမာခံ  မြို့တော်တော်များများမှာ  အမျိုးသမီး အများစုပါဝင်တဲ့ တစ်သီးပုဂ္ဂလိကတွေရဲ့ ဖြုတ်ချခြင်းခံရပါတယ်။အဲဒီအမျိုးသမီးတွေဟာ ရာသီဥတုပြောင်းလဲခြင်း၊ဂုဏ်သိက္ခာနှင့် လိင်တန်းတူရှိမှုတို့အတွက် ပိုမိုလုပ်ဆောင်ဖို့ စည်းရုံးလှုံ့ဆော်ခဲ့ကြသူတွေဖြစ်ပါတယ်။

လစ်ဘရယ်ပါတီခေါင်းဆောင်ကနေ နှုတ်ထွက်မယ့် မော်ရစ်ဆန်ကို တနင်္ဂနွေနေ့ ဘုရာရှိခိုးကျောင်းလာတက်ပုံကို ရုပ်သံမှာ ပြသခဲ့ပါတယ်။

“ကျွန်တော်တို့လျှောက်လှမ်းနိုင်ဖို့ ကြီးမားတဲ့ ဖောင်ဒေးရှင်းတစ်ခုကို ခင်ဗျားတို့က ကျွန်တော်တို့ကိုပေးခဲ့ပါတယ်။ ဒါပေမယ့် ပြီးခဲ့တဲ့လေးနှစ်လုံးလုံး အတော်ခက်ခက်ခဲခဲလျှောက်လှမ်းခဲ့ရပါတယ်” လို့ စိတ်လှုပ်ရှားနေပုံရတဲ့ မော်ရစ်ဆန်က ဘုရားကျောင်းလာသူတွေကို ပြောခဲ့ပါတယ်။

Source Reuters

Published 22 May 2022

တောင်ကိုးရီးယားလူမှုအဖွဲ့အစည်းတွေဟာ သောကြာနေ့မွန်းလွဲပိုင်းက အမေရိကန်သမ္မတ ဂျိုးဘိုင်ဒင် လာရောက်တဲ့ခရီးစဉ်ကို ဆိုးလ်မြိုမှာ စီတန်းလှည့်လည်ပြီး ကန့်ကွက်ဆန္ဒပြခဲ့ကြပါတယ်။

“ ဘိုင်ဒင် တောင်ကိုးရီးယားကို လာတဲ့ခရီးဟာ စစ်အကျပ်အတည်းကို မီးလာထိုးတာ” “ ယွန်ဆောင်ယို အစိုးရအဖွဲ့ဟာ အမေရိကန်ရဲ့စစ်အေးတိုက်ပွဲအသစ်ကို ပူးပေါင်းနေတာ ဆန့်ကျင်ကြ” “ အမေရိကန်-ဂျပန်-တောင်ကိုးရီးယား စစ်ရေးပူးပေါင်းမှုဆန့်ကျင်ကြ”စတဲ့ ဆိုင်းဘုတ်တွေနှင့်ကြွေးကြော်သံတွေဟစ်ကြွေး ဆန္ဒပြကြတာဖြစ်ပါတယ်။

ယွန်ဆောင်ယိုရဲ့အစိုးရအဖွဲ့ဟာ အမေရိကန်-တောင်ကိုးရီးယား စစ်ရေးမဟာမိတ်ကိုပိုမိုတောင့်တင်းအောင်နှင့် အမေရိကန်-ဂျပန်-တောင်ကိုးရီးယား စစ်ရေးမဟာမိတ်ကိုတိုးတက်စေအောင် ပြီးတော့ ယင်းရဲ့ ရန်လိုတဲ့ စစ်ရေးမဟာဗျူဟာဟာ ကိုရီးယားကျွန်းဆယ်ရဲ့ အရှိန်မြှင့်ပြီးသား အနေအထားနှင့် ဒေသအတွင်း တင်းမာမှုတွေကို ပိုပြီး မီးလောင်ရာလေပင့်ဖြစ်စေတယ်လို့ ဆန္ဒပြသူတွေက ပြောကြပါတယ်။

အင်ဒိုပစိဖိတ်ရဲ့ စီးပွားရေးမူဘောင်လို့ခေါ်တဲ့ IPEF ကို အမေရိကန်စတင်မှာကို ဆန္ဒပြသူတွေက ဆန့်ကျင်ကြပါတယ် လို့ ပြောပါတယ်။ သူတို့နိုင်ငံဟာ အမေရိကန်နှင့်စစ်ရေးမဟာမိတ်လုပ်ပြီး လက်နက်ယှဉ်ပြိုင်မှုကို အရှိန်မြှင့်တာကို မရွေးချယ် သင့်ဘူးလို့လည်းပြောပါတယ်။ အစိုးရအနေနှင့် ငြိမ်းချမ်းရေးနှင့်ပူးပေါင်းဆောင်ရွက်ရေးကို ရွေးချယ်ဖို့ သူတို့ တောင်းဆိုလိုက်ပါတယ်။

ဘိုင်ဒင်ဟာ တောင်ကိုးရီးယားနှင့် ဂျပန်ကို လေးရက်ကြာခရီးစဉ်အဖြစ် သွားရောက်နေတာဖြစ်ပါတယ်။

Source CMG/CCTV

#WorldHealth
Published 22 May 2022

မျောက်ကျောက်ရောဂါကူးစက်မှုကို အာဖရိကပြင်ပမှ နိုင်ငံ ၇ နိုင်ငံမှာတွေ့ရှိကြောင်း အတည်ပြုခဲ့ကြပြီး အခုနောက်ဆုံး အမေရိကန်၊ အီတလီ၊ ဆွီဒင်တို့မှာ တွေ့ရှိခဲ့ကြပါတယ်။

ကူးစက်သူအရေအတွက်က မကြာခင်ပိုမိုများပြားလာမယ်လို့ ပညာရှင်တစ်ဦးက ခန့်မှန်းလိုက်ပါတယ်။

မယ်ရီလန်း ဘော်တီမောလ်ရှိ ဂျွန်စ်ဟော့ပ်ကင်းစ်တက္ကသိုလ်မှ ကူးစက်ရောဂါပညာရှင်ဒေါက်တာ’အာမက်ရှ်အဒယ်လ်ဂျာ'က အဆိုပါဗိုင်းရပ်စ်ဟာ ခန္ဓာကိုယ်ချင်းထိတွေ့မှုကနေ ကူးစက်တာဖြစ်တယ်လို့ DailyMail ကို ပြောကြားခဲ့ပါတယ်။

မျောက်ကျောက်ရောဂါကူးစက်ခံရတဲ့ ဥရောပလူမျိုးအများစုဟာ လိင်တူနေအမျိုးသားများဖြစ်နေတာကို တွေ့ရှိရပါတယ်။

အဆိုပါ ရောဂါပျံ့ပွားမှုအတွင်း အမေရိကန်မှာပထမဆုံးရောဂါပိုးတွေ့ရှိခဲ့တဲ့ အမည်မသိလူနာဟာ ကနေဒါကို လတ်တလောသွားရောက်ထားပြီး ဆေးရုံတင်ကုသထားရပေမယ့် ကျန်းမာရေးအခြေအနေကောင်းမွန်ကြောင်း မာဆာချူဆက်စ်မှ တာဝန်ရှိသူများက ဗုဒ္ဓဟူးနေ့မှာ ကြေညာထားပါတယ်။

ဥရောပမှာ အီတလီ၊ ပေါ်တူဂီ၊ စပိန်၊ ဆွီဒင်၊ ယူကေတို့မှာ ရောဂါပိုးတွေ့ရှိထားပြီး ကနေဒါမှာ ကူးစက်သူအနည်းဆုံး ၁၃ ယောက်ရှိကြောင်း သိရှိရပါတယ်။

ရောဂါပိုးတွေ့ရှိခဲ့တဲ့ ဗြိတိသျှလူမျိုးနဲ့ လေယာဉ်အတူစီးလာသူ ၆ ဦးကို အမေရိကန်တာဝန်ရှိသူများက စစ်ဆေးလျက်ရှိပါတယ်။

ယခုပျံ့ပွားမှုအတွင်း သေဆုံးသူတစ်ဦးမျှ မရှိသေးပါဘူး။

အရင်က တိရိစ္ဆာန်ကနေ လူကိုကူးတာဖြစ်ပေမယ့် အနီးကပ်ထိတွေ့မယ်ဆိုရင် ကူးစက်နိုင်ချေများပါတယ်လို့ ‘အဒယ်လ်ဂျာ’က ရှင်းပြပါတယ်။

လေယာဉ်ပေါ်မှာ ရောဂါပိုးကူးစက်ထားသူနဲ့ လိုက်ပါခဲ့သူ ၆ ယောက်က ကူးစက်မယ်လို့ မထင်ကြောင်း၊ ဘာာကြောင့်လဲဆိုတော့ လေယာဉ်ပေါ်မှာက တစ်ဦးနဲ့တစ်ဦးထိတွေ့နိုင်ချေနည်းပါးတာကြောင့်ဖြစ်ကြောင်း ရှင်းပြသွားပါတယ်။

ဒီဗိုင်းရပ်စ်က အာဖရိကအလယ်ပိုင်းနဲ့ အနောက်ပိုင်းတို့မှာ အတွေ့များပြီး အနီးကပ်ထိတွေ့ခြင်းမှ တိရိစ္ဆာန်နဲ့လူသားတို့ အပြန်အလှန်ကူးစက်နိုင်တာဖြစ်ပါတယ်။

ကူးစက်ခံရသူတွေဟာ အရေပြားပေါ်မှာ အဖုအပိန့်အနာများ ထွက်ပေါ်တတ်ပြီး တုပ်ကွေးလက္ခဏာာများလည်း ဖြစ်ပေါ်တတ်ပါတယ်။

အခုလက်ရှိတွေ့နေရတဲ့ဗိုင်းရပ်စ်ကတော့ ရောဂါကြောင့်သေဆုံးနိုင်ချေ ၁ ရာခိုင်နှုန်းအောက်သာရှိတယ်လို့ ယူဆနေကြပါတယ်။

ယောက်ျားချင်းအတူနေတဲ့သူများ ကူးစက်နိုင်ချေ အများဆုံးဖြစ်ပြီး ကျန်းမာရေးဝန်ထမ်းတွေ အထူးသတိပြုဖို့ ရောဂါထိန်းချုပ်ကာကွယ်ရေးစင်တာ(CDC)က သတိပေးလိုက်ပါတယ်။

Source: Dailymail.
#Yangon_Media_Group