ဖေဖော်ဝါရီလ အစောပိုင်းက ဆူဒန်နိုင်ငံမှာ အင်တာနက်နဲ့ ဆက်သွယ်ရေး ပြတ်တောက်မှုများကြောင့် ပြည်သူတွေရဲ့ နေရေးထိုင်ရေးကို အလွန်ထိခိုက်နေပါတယ်။
တိုင်းပြည်အတွင်း ပဋိပက္ခဖြစ်ပွားနေတာ ၁၀ လကြာမြင့်နေပြီဖြစ်ရာ ဆက်သွယ်ရေးနဲ့ အင်တာနက်ဝန်ဆောင်မှုများ ပြတ်တောက်နေရတာကြောင့် မြို့တော်ခါတွန်နဲ့ ပတ်ပတ်လည် ဒေသတွေမှာ ဆက်သွယ်ရေး အမှောင်ကျနေရပါတယ်။
#World_Crisis
#Published_ 21 February 2024
#YMG_News #Yangon_Times #Yangon_Media_Group

#Daily_News
Published_ 21 February 2024

၁။ သင်္ဘောသားများနှင့် ၄င်းတို၏မိသားစုဝင်‌များ အပတ်စဥ်ကိုဗစ်ကာကွယ်ဆေး အခမဲ့ထိုးနိုင်

၂။ ကိုရီးယားတွင်ကျောင်းတတ်ရန် သင်တန်းကြေးများနှင့် ကျောင်းဝင်ကြေးများကို ကြားခံကတဆင့် ပေးသွင်းသူများ သေချာစုံစမ်းပြီးမှသာ ငွေလွဲပေးဖို့ မြန်မာသံရုံး အသိပေး

၃။ ပထမဆုံး မြင်းလေလံပွဲ ကြမ်းခင်းဈေး ကျပ်၃၅သိန်းဖြင့် ပြုလုပ်

၄။ ဆူဒန်နိုင်ငံ တဝှမ်းဆက်သွယ်ရေးနှင့် အင်တာနက်ပြတ်တောက်နေ ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG_News #Yangon_Media_Group

၂၁ ဖေဖော်ဝါရီ ၂၀၂၄

ဘန်ကောက်,ဖေဖော်ဝါရီ ၂၁ (ရိုက်တာ)- အကျဉ်းကျနေရာမှ ယခုတစ်ပတ်အတွင်းလွတ်မြောက်လာခဲ့သည့် ထိုင်းနိုင်ငံ၏ အရှိန်အဝါရှိ ဝန်ကြီးချုပ်ဟောင်း သက်ဆင် ရှင်နာဝတ်ထရာထံသို့  ကမ္ဘောဒီးယားခေါင်းဆောင်ဟောင်း ဟွန်ဆန်က ဗုဒ္ဓဟူးနေ့ ဖေဖော်ဝါရီ ၂၁ရက်တွင် သွားရောက်လည်ပတ်ခဲ့ပါတယ်။ ဟွန်ဆန်သည် သက်ဆင် မိမိကိုယ်မိမိပြည်ပသို့ရှောင်တိမ်းနေခဲ့သည့်  ၁၅နှစ်တာကာလအတွင်း သူ၏ အရင်းနှီးဆုံးမဟာမိတ်များထဲက တစ်ဦးဖြစ်ခဲ့ပါတယ်။

နိုင်ငံရေးဟဲဗီးဝိတ်နှင့် ကိုယ်ပိုင်ဟန်နှင့်ဩဇာအာဏာထူထောင်ခဲ့သည့် ဟွန်ဆန်သည် ပြီးခဲ့တဲ့ လက သူ့သားထံ အာဏာလွှဲ မပေးခင်အထိ ကမ္ဘောဒီးယားနိုင်ငံ၏ ဝန်ကြီးချု်အဖြစ် ဆယ်စုနှစ် လေးစုနီးပါးမျှ ကမ္ဘောဒီးယားကို အုပ်ချုပ်ခဲ့ပါတယ်။

သက်ဆင်ပြည်ပြေးဘဝဖြစ်ရှိစဉ်မှာ ဟွန်ဆန်ဟာ သူ့ကို ခိုလှုံစရာပေးခဲ့ပြီး  အထူးအကြံပေးအဖြစ်ပါ  ခန့်အပ်ခဲ့ပါတယ်။ သက်   ဆင်ကို ကမ္ဘောဒီးယားသို့ မကြာခဏလာရောက်ပြီးသူ့မဟာမိတ်တွေနှင့်တွေ့ဆုံခွင့်ကို ဟွန်ဆန်ကပေးခဲ့ပါတယ်။ ဒါဟာ အိမ်နီးချင်းတစ်နိုင်ငံရဲ့ ပြည်တွင်းရေးကို ဝင်ရောက်စွက်ဖက်ခြင်းလို့မြင်ကြတဲ့ သက်ဆင်ရဲ့ပြိုင်ဘက်တွေအတွက် အဲဒါတွေက စိတ်တိုစရာဖြစ်ခဲ့ရပါတယ်။

သက်ဆင်ဟာ အသက်အရွယ်နှင့်ကျန်းမာရေးကြောင့် တနင်္ဂနွေနေ့က လွတ်ငြိမ်းခွင့်နှင့် ပြန်လညလွတ်မြောက်လာခဲ့ပါတယ်။ အသက်၇၄နှစ်အရွယ်သက်ဆင်ဟာ အဲဒီကတည်းက ကြိုးသိုင်းပတ်တီး၊ဘီးတပ်ကုလားထိုင်တွေနှင့် တွေ့နေရပါတယ်။ သူနှင့် တွေ့ဆုံခဲ့တဲ့ အကြီးတန်းအရာရှိတစ်ဦးကတော့ “သက်ဆင်ဟာ တကယ့်ကိုနာမကျန်းဖြစ်နေတာ”လို့ပြောခဲ့ပါတယ်။

“ ဝန်ကြီးချုပ်ဟောင်းနှစ်ဦးတွေ့ကြတယ်။ နိုင်ငံရေးအကြောင်းမပြောခဲ့ကြဘူး” လို့ ဟွန်ဆန်က ဖေ့စ်ဘုတ်မှာ ပို့စ်ရေး တင်ပါ  တယ်။ ပို့စ်ထဲမှာ ပခုံးသိုင်းပတ်တီးဝတ်ထားပြီး မရွှင်မပျမြင်ရတဲ့ သက်ဆင်နှင့်အတူ ဆိုဖာမှာတွဲထိုင်နေတဲ့ ဓာတ်ပုံလည်း ပါဝင်ပါတယ်။

သက်ဆင်ကျန်းမာရေးအခြေအနေအပြည့်အစုံကို မထုတ်ပြန်တဲ့အတွက် ဝေဖန်သူတွေက သူတကယ်ရော မကျန်းမာတာမှ ဟုတ်ရဲ့လားလို့ မေးခွန်းထုတ်ခဲ့ကြပါတယ်။

သက်ဆင်ဟာ ပြီးခဲ့တဲ့ ဩဂုတ်လထဲ သူ့ရဲ့ သစ္စာခံ ဆရက်သာ သာဗီဆင် ဝန်ကြီးချုပ်ဖြစ်ပြီး ဟွန်ဆန်ကလည်း အိမ်နီးချင်းကမ္ဘောဒီးယားနိုင်ငံမှာ အာဏာလွှဲပေးလိုက်တဲ့ တစ်ရက်တည်းမှာပဲ မထင်မှတ်ဘဲ ပြည်တော် ပြန်လာခဲ့ပါတယ်။

သက်ဆင်ကို အကျိုးစီးပွားပဋိပက္ခဖြစ်ပြီးအာဏာအလွဲသုံးစားလုပ်မှုနှင့် ထောင်(၈)နှစ်ချခဲ့ပြီး သူ့ရဲ့ အကျဉ်းထောင်ထဲက ပထမညမှာပဲ ရင်ဘတ်အောင့်လာလို့ဆိုကာ ဆေးရုံသို့ရွှေ့ပြောင်းပေးခဲ့ပါတယ်။

အဲဒီနောက်ဘုရင်က သူ့ကို ထောင်ဒဏ်(၁)နှစ်သို့ လျှော့ချပေးခဲ့ပြီး ခြောက်လအကြာမှာ လွတ်ငြိမ်းခွင့်နှင့်လွတ်လာခဲ့တာ ဖြစ်ပါတယ်။

ဟွန်ဆန်ရဲ့အလည်ခရီးဟာ သူတို့ရဲ့ နက်ရှိုင်းလှတဲ့ ပုဂ္ဂိုလ်ရေးချိတ်ဆက်မှုကိုပြသနေပြီး အဲဒါတွေက သက်ဆိုင်ရာ အစိုးရတွေ ဆီ သူတို့ရဲ့ဩဇာလွှမ်းမိုးစေပြီး နှစ်နိုင်ငံဆက်ဆံရေးပိုပြီး ခိုင်မြဲလာမယ့်သဘောရှိတယ်လို့ အကဲဖြတ်တွေကဆိုကြပါတယ်။

“ဒီအလည်အပတ်ခရီးဟာ အရှေ့တောင်အာရှရဲ့ နိုင်ငံရေးလူ့မလိုင်ကို ထင်ဟပ်နေတာဖြစ်တယ်” လို့ ချူလာလောင်ကွန်း   တက္ကသိုလ်ရဲ့ နိုင်ငံရေးသိပ္ပံပါမောက္ခ ဆီရီပန်နိုဂူအန်ကပြောပါတယ်။

သူတို့ရဲ့ဆက်ဆံရေးကြောင့် ဆယ်စုနှစ်များစွာရပ်တန့်နေခဲ့တဲ့ နှစ်နိုင်ငံပူးပေါင်းပြီး ကမ်းလွန်ဟိုက်ဒရိုကာဘွန်ရှာဖွေတူးဖော် ရေးလိုမျိုးလုပ်ငန်းတွေလို ခက်ခဲတဲ့ နှစ်နိုင်ငံဆက်ဆံရေးပြဿနာတွေကို ပြန်လည်အစဖော်ရာမှာအကူအညီဖြစ်စေနိုင်မယ် လို့ သုံးသပ်နေကြပါတယ်။

@ymg/knl

Published 21 February 2024

အစ္စရေးလ်-ဟားမတ်စ်စစ်ပွဲနဲ့ ပတ်သက်တဲ့ ကုလသမဂ္ဂ လုံခြုံရေးကောင်စီ ဆုံးဖြတ်ချက်မူကြမ်းတစ်ခုကို အမေရိကန်က အင်္ဂါနေ့မှာ ဗီတိုအာဏာသုံးပြီး ထပ်မံပယ်ချလိုက်ပါတယ်။

လူသားချင်းစာနာမှုဆိုင်ရာ ချက်ချင်းအပစ်အခတ် ရပ်စဲရေးကို အမေရိကန်က ပိတ်ပင်လိုက်တဲ့ သဘောဖြစ်ပြီး ထိုဖြေရှင်းချက်အစား ယာယီအပစ်အခတ် ရပ်စဲရေးနဲ့ ဟားမတ်စ်တို့ ဖမ်းဆီးထားတဲ့ ဓားစာခံများ လွှတ်ပေးရေးတို့ ဆက်စပ်နေတဲ့ တောင်းဆိုချက်ကိုသာ အမေရိကန်က တွန်းအားပေးလိုက်ပါတယ်။

အယ်လ်ဂျီးရီးယားမှ အဆိုပြုတဲ့ မူကြမ်းကို ကုလလုံခြုံရေးကောင်စီ အဖွဲ့ဝင် ၁၃ နိုင်ငံက ထောက်ခံမဲပေးလိုက်ကာ ဗြိတိန်က ကြားနေမဲ ပေးခဲ့ပါတယ်။

အောက်တိုဘာ ၇ ရက်နေ့ စစ်ပွဲစတင်ကတည်းက အမေရိကန် ဗီတိုအာဏာသုံး ပယ်ချလာတာ တတိယအကြိမ် ရှိလာပြီဖြစ်ပါတယ်။

ကုလသမဂ္ဂဆိုင်ရာ အယ်လ်ဂျီးရီးယားသံအမတ် အေမာဘန်ဂျာမာက မဲပေးမှုမပြုခင် ပြောကြားရာမှာ ယခုဆုံးဖြတ်ချက်မူကြမ်းကို ထောက်ခံခြင်းက ပါလက်စ်တိုင်းတွေ အသက်ရှင်ခွင့်ကို ထောက်ခံရာကျကြောင်း၊ ဆန့်ကျင်မဲပေးတာကတော့ အကြမ်းဖက်မှုကို အားပေးရာကျကြောင်း ဆိုလိုက်ပါတယ်။

စစ်ပွဲရပ်ဆိုင်းရန်နဲ့ ဂါဇာကမ်းမြောင်မှာ ဟားမတ်စ်တို့ဖမ်းဆီးထားတဲ့ ဓားစာခံများ လွှတ်ပေးရေးတို့အကြောင်း အမေရိကန်၊ အီဂျစ်၊ အစ္စရေးလ်၊ ကာတာတို့ ဆွေးနွေးနေရာမှာ အယ်လ်ဂျီးရီးယားရဲ့ အဆိုပြုမူကြမ်းက နှောင့်ယှက်မှာကို စိုးရိမ်တဲ့အတွက် ဗီတိုအာဏာသုံးပယ်ချမယ်လို့ ကုလသမဂ္ဂဆိုင်ရာ အမေရိကန် သံအမတ် လင်ဒါသောမတ်စ်ဂရင်းဖီးလ်က စနေနေ့မှာ ပြောလိုက်ပါတယ်။

ဟားမတ်စ်တို့ ဖမ်းဆီးထားတဲ့ ဓားစာခံတွေ လွှတ်ပေးဖို့ သဘောတူညီချက်မပါဝင်ဘဲ ခြွင်းချက်မရှိ ချက်ချင်းအပစ်အခတ် ရပ်စဲရေး အလိုရှိတာဟာ တည်တံ့ခိုင်မြဲတဲ့ ငြိမ်းချမ်းရေး ဖြစ်လာမှာမဟုတ်ဘဲ ဟားမတ်စ်နဲ့ အစ္စရေးလ်တို့ကြား တိုက်ခိုက်မှု ပိုမိုကြာရှည်လာလိမ့်မယ်လို့ သောမတ်စ်ဂရင်းဖီးလ်က မဲမပေးခင်မှာ ပြောကြားလိုက်ပါတယ်။

အယ်လ်ဂျီးရီးယားမှ အဆိုပြုတဲ့မူကြမ်းမှာ အပစ်အခတ် ရပ်စဲရေးနဲ့ ဓားစာခံ လွှတ်ပေးရေးတို့ ချိတ်ဆက်ထားတာမျိုး မရှိပါဘူး။

ယခုဗီတိုအာဏာနဲ့ ပတ်သက်ပြီး အစ္စရေးလ်တွေကို ပြောချင်တာက လူသတ်ပြီး ဆက်လက်ထွက်ပြေးနေနိုင်သေးတယ် ဆိုတာပဲ ဖြစ်ကြောင်း ကုလသမဂ္ဂဆိုင်ရာ ပါလက်စ်တိုင်းသံတမန် ရီယက်ဒ်မန်ဆော်က ကောင်စီကို ပြောကြားလိုက်ပါတယ်။

အပစ်အခတ် ရပ်စဲရေးဆိုတာဟာ ဟားမတ်စ်တို့အတွက်သာ ဖြစ်ပြီး အစ္စရေးလ်တွေနဲ့ ဂါဇာသားတွေအတွက်တော့ မမျှတတဲ့လုပ်ရပ်ဖြစ်ကြောင်း ကုလသမဂ္ဂဆိုင်ရာ အစ္စရေးလ်သံအမတ် ဂျီလတ်အာဒန်က ပြောကြားခဲ့ပါတယ်။

အမေရိကန်က ဆုံးဖြတ်ချက်မူကြမ်းတစ်ခုကို အပြိုင်တင်သွင်းရာမှာ စစ်ပွဲယာယီရပ်ဆိုင်းရေးကို တောင်းဆိုလိုက်ပြီး ရာဖာမြို့ကို အစ္စရေးလ်တို့ တိုက်ခိုက်မှာကို ဆန့်ကျင်ကြောင်း ဖော်ပြထားကာ ညှိနှိုင်းရေးအတွက် အချိန်ပိုပေးဖို့နဲ့ အလျင်စလို မဲပေးခြင်းမပြုဖို့ ဆိုလိုက်ပါတယ်။
Source: Reuters
#World_News
#Published_ 21 February 2024
#YMG_News #Yangon_Times #Yangon_Media_Group

Published 21 February 2024

အမြောက်အများ စားသောက်ခြင်းနည်းလမ်းက လတ်တလော ရေပန်းစားနေတဲ့ စားသောက်နည်းလမ်း တစ်မျိုးဖြစ်ပြီး ကယ်လိုရီနည်းပါးတဲ့ အစားအစာတွေ အများအပြား စားသောက်ကာ ဗိုက်ပြည့်ဝနေစေပြီး ကယ်လိုရီ လျော့နည်းစေတာ ဖြစ်ပါတယ်။

အစားအစာ ပိုမိုစားသောက်ပေမယ့် ကယ်လိုရီကတော့ နည်းပါးနေတာ ဖြစ်ပါတယ်။

ထိုထဲမှာမှ အများအပြား စားနိုင်တဲ့ အစားအစာတွေကတော့ အမျှင်ဓာတ်နဲ့ ရေဓာတ်များပြားတဲ့ ဖရဲသီး၊ ဆလတ်ရွက်၊ ကျောက်ဖရုံ၊ ရှောက်သီး၊ ဟင်းနုနွယ်၊ ကြက်ဥအကာ၊ သခွားသီး၊ တရုတ်နံနံ၊ အုတ်စပါး၊ ပန်းသီး၊ ဘယ်ရီသီးတို့ ဖြစ်ပါတယ်။

အဆီအနှစ်များ၊ သစ်သီးခြောက်၊ ပျားရည်၊ သကာရည်၊ ချိစ်၊ အခွံမာသီး၊ မြေပဲထောပတ်တို့ကိုတော့ သင့်တင့်ရုံ စားသင့်ပါတယ်။

အမြောက်အများ စားခြင်းဖြင့် ကိုယ်အလေးချိန် ထိန်းသိမ်းဖို့ဆိုတာက စီစဥ်တွက်ချက်စားဖို့ လိုပါတယ်။

ကိုယ်အလေးချိန်ချရာမှာ အခက်အခဲတစ်ခုက စားသောက်ပြီးနောက် မဝသေးဘူးလို့ ခံစားရတာပါပဲ။

အမျှင်ဓာတ်တွေ၊ ဗိုက်တာမင်တွေ၊ သတ္တုဓာတ်တွေ ပြည့်ဝတဲ့ အစားအစာတွေဟာ ဗိုက်ထဲမှာ နေရာပိုယူပြီး ပြည့်ဝနေစေတယ်လို့ ခံစားရစေပါတယ်။

အာဟာရဓာတ်တွေ ယခင်ကထက် ပိုမိုရရှိဖို့ကလည်း ထိုနည်းလမ်းက အသုံးဝင်နိုင်ပါတယ်။

ဒီလိုအစားအစာများ စားသုံးခြင်းဖြင့် ကယ်လိုရီများတဲ့ အစားအစာတွေ စားဖို့ဆန္ဒလျော့နည်းသွားပါတယ်။

အာဟာရဓာတ် လိုအပ်ချက်တွေ ပြည့်မီအောင်စားသုံးရင်တော့ ထိုနည်းလမ်းက အကျိုးရှိစေနိုင်ပါတယ်။

အမြောက်အများ စားသောက်ခြင်းနည်းလမ်း ဆိုပေမယ့် အာဟာရတန်ဖိုးရှိအောင် စားသောက်ဖို့ကလည်း အရေးကြီးပါတယ်။

ဥပမာအားဖြင့် ကယ်လိုရီမပါတဲ့ ကိုလာဆိုရင် ကယ်လိုရီမပါဘူးဆိုပေမယ့် အာဟာရတန်ဖိုးလည်း မရှိပါဘူး။

လိမ္မော်ရည်ဆိုရင် ကယ်လိုရီမပါတဲ့ ကိုလာထက် ကယ်လိုရီများပေမယ့် ဗိုက်တာမင်စီနဲ့ ဓာတ်တိုးဆန့်ကျင်ပစ္စည်းများ ပါဝင်တာကြောင့် ပိုမိုသင့်လျော်ပါတယ်။

ဒါပေမဲ့ ဒီလိုမျိုး အမြောက်အများ စားသောက်ခြင်းဟာ ရင်ပြည့်စေကာ အစာမကြေခြင်းမျိုး ဖြစ်နိုင်ပါတယ်။

အခြားအစားအစာတွေကို လုံးဝရှောင်ကြဥ်တာမျိုးလည်း ပြုလုပ်စရာ မလိုပါဘူး။

ထိုနည်းလမ်းကနေ အာဟာရမပြည့်ဝတဲ့ ပုံစံမျိုးမဖြစ်အောင်လည်း ဂရုစိုက်ဖို့ လိုအပ်ပါတယ်။  
Source: New York Post.
#World_Health
#Published_ 21 February 2024
#YMG_News #Yangon_Times #Yangon_Media_Group

Published 21 February 2024

ရင်သားကင်ဆာ ရှိမရှိကို လျင်မြန်သက်သာတိကျစွာ စစ်ဆေးနိုင်ပြီး အသက်ပေါင်းများစွာကို ကယ်တင်နိုင်ဖွယ်ရှိတဲ့ လက်တစ်ဖဝါးစာ အာရုံခံကိရိယာကို အမေရိကန်နဲ့ ထိုင်ဝမ်တို့မှ အဖွဲ့တစ်ဖွဲ့က ဖန်တီးလိုက်ပါတယ်။

လူနာရဲ့ တံတွေးနမူနာမှ ဇီဝအမှတ်အသားများကို ကြည့်ရှုကာ ရင်သားကင်ဆာကို စစ်ဆေးတဲ့ ကိရိယာဖြင့် စမ်းသပ်မှုများ ပြုလုပ်ရာမှာ အောင်မြင်မှုများ ရရှိထားတယ်လို့ သုတေသနအဖွဲ့က ဖော်ပြထားပါတယ်။

ရင်သားကင်ဆာက တစ်ကမ္ဘာလုံးမှာ အဖြစ်အများဆုံး ကင်ဆာတစ်မျိုးဖြစ်ပြီး တစ်နှစ်ကို ရောဂါဖြစ်ပွားသူ ၂.၃ သန်းနဲ့ သေဆုံးသူ ၆ သိန်းခွဲကျော်ရှိနေပါတယ်။

အနာဂတ်မှာ ရင်သားကင်ဆာ ဖြစ်ပွားမှု ပိုမိုမြင့်မားလာနိုင်ကာ ၂၀၄၀ လောက်မှာ လူ ၁ သန်းခန့် အသက်ဆုံးရှုံးနိုင်တယ်လို့ ခန့်မှန်းထားပါတယ်။

စက်ပစ္စည်းက လက်တစ်ဖဝါး အရွယ်မျှသာရှိကာ ကိုင်ဆောင်သွားနိုင်ပြီး ပြန်လည်အသုံးပြုနိုင်ကြောင်း၊ စမ်းသပ်ချိန်က ၅ စက္ကန့်တောင် မကြာတာကြောင့် အလွန်ထိရောက်မှုရှိကြောင်း သုတေသနပြုစုသူတစ်ဦးက ဆိုပါတယ်။

ရင်သားကင်ဆာ စစ်ဆေးလို့ရတဲ့ ယခင်နည်းလမ်းတွေက အကုန်အကျများကာ စက်ပစ္စည်းကြီးတွေ လိုအပ်သလို ဓာတ်ရောင်ခြည်လည်း ထိတွေ့ရပြီး အဖြေသိဖို့ ရက်နဲ့ချီ ကြာမြင့်ပါတယ်။

ယခင်က ရင်သားကင်ဆာ စစ်ဆေးလို့မရနိုင်တဲ့ နေရာတွေမှာပါ ရရှိနိုင်မှာ ဖြစ်တဲ့အတွက် အလွန်စိတ်လှုပ်ရှားမိကြောင်း ဖော်ပြထားပါတယ်။

အဆိုပါ အာရုံခံကိရိယာဟာ တံတွေးတစ်စက်သာ လိုအပ်ပြီး ကင်ဆာဇီဝ အမှတ်အသား အလွန်နည်းပါးစွာ ပါဝင်လျှင်ပင် တိကျစွာ အဖြေထုတ်ပေးနိုင်ပါတယ်။

ကင်ဆာရှိမရှိ ကွဲကွဲပြားပြားသိနိုင်ပြီး ဒီလိုရရှိနိုင်ရန် ကြိုးပမ်းအားထုတ်မှုတွေနဲ့ အချိန်များစွာ ပေးဆပ်ခဲ့ရကြောင်း ပြောပြသွားပါတယ်။
Source: The Jerusalem Post
#World_Health
#Published_ 21 February 2024
#YMG_News #Yangon_Times #Yangon_Media_Group