#World_News

Published 03 April 2025

▪️ Top Gun , The Doors , Tombstone , Batman Forever တို့လိုရုပ်ရှင်ကားတွေမှာ ပါဝင်သရုပ်ဆောင်ခဲ့တဲ့ အမေရိကန်မင်းသားကြီး ဗယ်ကီလ်မာဟာ အသက် ၆၅ နှစ်အရွယ်မှာ ကွယ်လွန်သွားပါတယ်။

▪️ သူ့သမီးဖြစ်သူ မာစီဒီးစ်ကီလ်မာရဲ့ ပြောကြားချက်အရ သေဆုံးရတဲ့အကြောင်းအရင်းက အဆုတ်ရောင်ရောဂါကြောင့်လို့ New York Timesက ဖော်ပြထားပါတယ်။

▪️ ဗယ်ကီလ်မာဟာ လည်ချောင်းကင်ဆာကြောင့် နှစ်တွေကြာအောင် ကျန်းမာရေးဆိုးရွားစွာ နေထိုင်ခဲ့ရပါတယ်။

▪️ ကယ်လီဖိုးနီးယားမှာ မွေးဖွားပြီး ဂျူလီယာ့ဒ်ကျောင်းထွက် သရုပ်ဆောင်မင်းသားကြီးဟာ အအောင်မြင်ဆုံးကာလတွေတုန်းက ဟောလိဝုဒ်ရဲ့ အထင်ရှားဆုံးသူတွေထဲက တစ်ဦးဖြစ်ပါတယ်။

▪️ ၁၉၈၄ ခုနှစ်က Top Secretဇာတ်ကားဖြင့် ပထမဆုံးသရုပ်ဆောင်ခဲ့ရာ အားပေးသူအများအပြား ရရှိခဲ့ပြီး ၁၉၈၆က တွမ်ခရုစ်ပါဝင်တဲ့ Top Gun ဖြင့်လည်း ကျော်ကြားလာပါတယ်။

▪️ ၂၀၂၂ ခုနှစ် Top Gun: Maverickမှာ တွမ်ခရုစ်နဲ့ပဲ ဆက်လက်ပါဝင်ခဲ့ပြီး စကားပြောဖို့တောင်အနိုင်နိုင် ဖြစ်နေပါတယ်။

▪️ လည်ချောင်းကင်ဆာ တွေ့ရှိပြီးနောက် ဓာတ်ရောင်ခြည်၊ ဓာတုကုထုံးများ ခံယူခဲ့တဲ့အပြင် လေပြွန်ခွဲစိတ်ရသဖြင့် အသံပျက်စီးခဲ့ရပါတယ်။

▪️ နားလည်သဘောပေါက်အောင် စကားပြောဆိုဖို့ မလွယ်ကူတော့ဘူးလို့ ကီလ်မာက ၂၀၂၂မှာ သူ့ဝက်ဘ်ဆိုက်ကနေ ဖော်ပြခဲ့ပါတယ်။

▪️ တွမ်ခရုစ်က ယခုသတင်းနဲ့ပတ်သက်ပြီး စိတ်ထိခိုက်ရကာ ဝမ်းနည်းငိုကြွေးမိတယ်လို့ ဆိုပါတယ်။

▪️ Heat မှုခင်းဒရာမာမှာ ဒါရိုက်တာလုပ်ခဲ့တဲ့ မိုက်ကယ်မန်းက ကျယ်ပြန့်တဲ့ ဗယ်ကီလ်မာရဲ့ ပါဝင်မှုကဏ္ဍမျိုးစုံနဲ့ ထင်ရှားတဲ့သရုပ်ဆောင်တွေကို အမြဲအံ့ဩမိကြောင်း၊ ရောဂါကို နှစ်ပေါင်းများစွာ ရင်ဆိုင်လာရအပြီး ယခုသတင်းက ဝမ်းနည်းစရာဖြစ်ကြောင်း ပြောသွားပါတယ်။

▪️ ဗယ်ကီလ်မာဟာ စိတ်ကြီးခြင်း၊ ပြင်းထန်ခြင်း၊ အကောင်းဆုံးဖြစ်လိုခြင်း၊ တစ်ခါတရံ အတ္တကြီးခြင်းတို့နဲ့ ဂုဏ်သတင်းကြီးခဲ့သလို ဒါရိုက်တာတွေ၊ တွဲဖက်သရုပ်ဆောင်တွေနဲ့ စကားများတာတွေက သူ့ရဲ့အနုပညာဘဝကို ထိပါးစေပါတယ်။

▪️ ၂၀၁၁ ခုနှစ်က Twixtဇာတ်ကားရဲ့ ဒါရိုက်တာ ဖရန်ဆစ်ဖို့ဒ်ကော့ပိုလာက ဗယ်ကီလ်မာဟာ အထက်တန်းကျောင်းတုန်းက အထူးချွန်ဆုံး သရုပ်ဆောင်ဖြစ်ခဲ့ပြီး သူ့ဘဝတလျှောက် ပိုပိုပြီးသာ ခမ်းနားစေခဲ့တယ်လို့ ပြောသွားပါတယ်။

Source: Reuters

#World_Health

Published 03 April 2025

▪️ မျိုးရိုးဗီဇအရ အသက် ၄၀-၅၀ ဝန်းကျင်မှာ အယ်လ်ဇိုင်းမားရောဂါလက္ခဏာ ပေါ်ပေါက်လာခြင်းကို နှောင့်နှေးစေနိုင်မယ်လို့ ကုသနည်းတစ်ခုကို သုတေသနတွေ့ရှိထားပါတယ်။

▪️ နယူးယော့ခ်စီးတီးမှ အသက် ၅၀ ရှိ ဂျိတ်ခ်ဟိုင်းနရစ်ဟာ ဒီလေ့လာချက်မှာ ဆယ်စုနှစ်တစ်ခုကျော် ပါဝင်ခဲ့ပြီး မျိုးရိုးလိုက် အယ်လ်ဇိုင်းမားဖြစ်စေတဲ့ ဗီဇရှိထားပေမယ့် ရောဂါလက္ခဏာ ကင်းစင်နေဆဲဖြစ်ပါတယ်။

▪️ လက်ရှိအမေရိကန်မှာ ရောင်းချနေတဲ့ ဆေး ၂မျိုးက ဦးနှောက်ထဲက အညစ်အကြေး အမိုင်လွိုက်တွေကို ဖယ်ရှားပြီး အယ်လ်ဇိုင်းမားအစောပိုင်းအဆင့် ဆိုးရွားလာခြင်းကို နှောင့်နှေးစေပေမယ့် လက္ခဏာအရင်ဆုံးမပေါ်ခင်မှာ ဖယ်ရှားတာမဟုတ်တဲ့အတွက် ရောဂါကို ရွှေ့ဆိုင်းလိုက်တဲ့သဘောသာ ဖြစ်ပါတယ်။

▪️ လေ့လာချက်အသစ်မှာ စမ်းသပ်ပါဝင်သူ ၂၂ ဦးကို ပျမ်းမျှ ၈ နှစ်အထိ အမိုင်လွိုက်ဖယ်ရှားတဲ့ဆေးတွေ ပေးခဲ့ပါတယ်။

▪️ အခုအခါတော့ စမ်းသပ်ခံတွေကို အစောပိုင်းစမ်းသပ်ဆေးတွေကနေ အမေရိကန်မှာ IVကုသနည်း အသိအမှတ်ပြု Leqembiကို ပြောင်းပေးပြီး စောင့်ကြည့်ခဲ့ကြပါတယ်။

▪️ နောက် ၅ နှစ်အတွင်း ဘယ်လောက်အထိ ကာကွယ်ပေးနိုင်လဲ၊ ဆက်လက်ကုသနေရင် အယ်လ်ဇိုင်းမားရောဂါ လက္ခဏာတွေ ဖြစ်မှာလားဆိုတာတွေကို လေ့လာခဲ့ကြတယ်လို့ စမ်းသပ်ချက်တွေကို ညွှန်ကြားတဲ့ ဝါရှင်တန်တက္ကသိုလ်မှ ဒေါက်တာ ရန်ဒေါလ်ဘိတ်မန်းက ပြောပါတယ်။

▪️ လေ့လာချက် အတည်ပြုနိုင်ဖို့ ဘိတ်မန်းက ရန်ပုံငွေထူထောင်ပေမယ့် ပြန်လည်သုံးသပ်ချက်တွေ ပျက်ပြယ်သွားတာကြောင့် အခက်အခဲ ဖြစ်နေပါတယ်။

▪️ အယ်လ်ဇိုင်းမားရောဂါဟာ ပထမဆုံးလက္ခဏာများ မပေါ်လာခင် ဆယ်စုနှစ် ၂ ခုလောက်တည်းက ဦးနှောက်မှာ အပြောင်းအလဲတွေ အသံတိတ်ဖြစ်ပေါ်နေပြီး အဓိကအရာက အမိုင်လွိုက်တွေဖြစ်ပါတယ်။

▪️ အမျိုးသားကျန်းမာရေးဌာနအနေနဲ့ နိုင်ငံရေးအရမဟုတ်ဘဲ လူတွေပိုမိုကျန်းမာစေရန် ရည်ရွယ်ကာ လုပ်ဆောင်သင့်တယ်လို့ ဟိုင်းနရစ်က ပြောသွားပါတယ်။

Source: India

#World_Science

Published 03 April 2025

▪️ မျိုးရိုးလိုက် ထိပ်ပြောင်ခြင်းဝေဒနာ ကုသနိုင်ဖွယ်ရှိတဲ့ နည်းလမ်းတစ်ခုကို သိပ္ပံပညာရှင်များ လေ့လာစမ်းသပ်ခဲ့ကြပါတယ်။

▪️ ဒီနည်းလမ်းက ခန္ဓာကိုယ်ထဲက သဘာဝအတိုင်းဖြစ်ပေါ်တဲ့ သကြားဓာတ်ကို သုတေသနပြုလုပ်တာဖြစ်ပြီး DNAဖြစ်စေဖို့ ကူညီပေးတယ်လို့ ဖော်ပြထားပါတယ်။

▪️ ပါကစ္စတန်မှ COMSATS တက္ကသိုလ်နဲ့ ရှက်ဖီးလ်တက္ကသိုလ်တို့မှ သိပ္ပံပညာရှင်များက ကြွက်တွေကို ပြင်ပဒဏ်ရာတွေနားမှာ သကြားဖြင့် ကုသတဲ့အခါ မကုသပေးတဲ့ကြွက်တွေထက် ဒဏ်ရာတွေနားက အမွှေးတွေ ပိုမိုလျင်မြန်စွာ ပြန်ထွက်လာပုံကို လေ့လာခဲ့ကြပါတယ်။

▪️ တက်စ်တိုစတီရုန်းကြောင့် အမွှေးကျွတ်တဲ့ ကြွက်ထီးတွေကို ကျောပေါ်မှ အမွှေးများ ဖယ်ရှားခဲ့ကာ ဒီအောက်ဆီရိုင်ဘို့စ်သကြားဂျယ်လ်ကို နေ့စဉ်အနည်းငယ် သုတ်လိမ်းပေးခဲ့ပြီး ရက်သတ္တပတ်အတွင်း ထူထဲရှည်လျားတဲ့ အမွှေးတွေ ပြန်ထွက်လာတာ တွေ့ခဲ့ကြပါတယ်။

▪️ သဘာဝအတိုင်းဖြစ်ပေါ်တဲ့ ဒီအောက်ဆီရိုင်ဘို့စ်သကြားက မွှေးညင်းပေါက်များဆီ သွေးလှည့်ပတ်မှုကောင်းစေပြီး အမွှေးအမျှင်ကြီးထွားမှုကို အားပေးခြင်းက ဆံပင်ကျွတ်ခြင်းကုသနိုင်မယ့် အဖြေဖြစ်လာနိုင်တယ်လို့ ရှက်ဖီးလ်တက္ကသိုလ်မှ တစ်ရှူးအင်ဂျင်နီယာ ရှီလာမက်နေးလ်က ပြောပါတယ်။

▪️ မျိုးရိုးလိုက်ထိပ်ပြောင်ခြင်းဟာ သဘာဝအတိုင်း ဟော်မုန်းပမာဏ၊ အသက်အရွယ်တို့ကြောင့် ဖြစ်ပေါ်တတ်ပြီး ယောက်ျားမိန်းမမရွေး ပုံစံအမျိုးမျိုးဖြင့် ဖြစ်နိုင်ပါတယ်။

▪️ Minoxidilဆေးက ဆံပင်ကျွတ်ခြင်းကို နှောင့်နှေးစေနိုင်ပြီး ဆံပင်ပြန်ထွက်စေနိုင်ပေမယ့် ထိပ်ပြောင်ခြင်းဝေဒနာ ခံစားရသူအားလုံးအတွက် ထိရောက်တာမျိုးတော့ မဟုတ်ပါဘူး။

▪️ Minoxidilကို အမွှေးပြောင်တဲ့ ကြွက်တွေမှာ စမ်းသပ်ပြီး အချို့ကြွက်တွေမှာတော့ Minoxidilရော သကြားဂျယ်လ်ရောနဲ့ စမ်းသပ်ရာမှာ ဒီအောက်ဆီရိုင်ဘို့စ်သကြားပါတဲ့ ဂျယ်လ်အသုံးပြုတဲ့ကြွက်တွေဟာ မွေးညင်းပေါက်အသစ်များ ထွက်ပေါ်လာတာ တွေ့ခဲ့ကြပါတယ်။

▪️ မွေးညင်းပေါက်တွေဆီ သွေးလှည့်ပတ်မှု ကောင်းစေကာ အမွှေးရှည်လျားတယ်လို့ ဖော်ပြထားပါတယ်။

▪️ လူသားတွေမှာလည်း ဒီဂျယ်လ်က ထိရောက်မှုရှိခဲ့ရင် ထိပ်ပြောင်ခြင်းကို ကုသပေးပြီး ဆံကေသာများကို လှုံ့ဆော်ပေးနိုင်မယ်လို့ ဖော်ပြထားပါတယ်။

Source: WION

အလွန်ခေတ်မီတဲ့ အခြေခံအဆောက်အအုံတွေနဲ့ ကျော်ကြားတဲ့ တရုတ်တောင်ပိုင်းရှိ နည်းပညာအချက်အခြာ ရှန်ကျန်းမြို့ရဲ့ နန်ရှန်ခရိုင်မှာ မှတ်ဉာဏ်တုချိတ်ဆက်ယာဉ်များ (ICV) လုပ်ငန်းလည်ပတ်မှု ရှေ့ပြေးစမ်းသပ်မှုယာဉ်ပရိုဂရမ်ကို တရားဝင်စတင်လိုက်ပါတယ်။
#Asia_Development
Published 2 Apirl 2025
#ဉာဏ်ရည်တုချိတ်ဆက် #ရှန်ကျန်းမြို့
#YMG #Yangon_Times #Yangon_Media_Group

#Daily_News

Published 2 Apirl 2025

၁။ ငလျင်ကယ်ဆယ်ရေးတွင်အသုံးပြုရန် တရုတ်-မြန်မာ-အင်္ဂလိပ် ဘာသာပြန်ဆိုစနစ်ကို အရေးပေါ်ဖော်ဆောင်ခဲ့

၂။ ၆ရက်အတွင်း မြေငလျင်(၅၅)ကြိမ် လှုပ်ခတ်ခဲ့

၃။ ငလျင်ဒဏ်ကြောင့် ယာယီရပ်နားထားသော ရထားလမ်းပိုင်းများအား အမြန်ဆုံးပြုပြင်ပြီး ပြန်လည်ပြေးဆွဲသွားမည်

၄။ ဉာဏ်ရည်တုချိတ်ဆက်မော်တော်ယာဉ် ရှန်ကျန်းမြို့တွင် ကနဦးစမ်းသပ် ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#YMG #Yangon_Times #Yangon_Media_Group

#World_News
Published 02 April 2025

▪️ ဒေါ်နယ်ထရမ့်ရဲ့ အမေရိကန်အစိုးရက အင်္ဂါနေ့မှာ ကျန်းမာရေးအေဂျင်စီများမှ ဝန်ထမ်း ၁ သောင်းခန့်ကို အလုံးအရင်းဖြင့် စတင်အလုပ်ထုတ်ပယ်လိုက်ကာ ဝန်ထမ်းများ အသိပေးစာရပြီးနောက် နာရီပိုင်းအကြာမှာပဲ လုံခြုံရေးများက အချို့ဝန်ထမ်းတွေကို ဝင်ရောက်ခွင့် တားဆီးပိတ်ပင်နေတယ်လို့ သတင်းနီးစပ်သူတွေက ပြောပါတယ်။

▪️ ကျန်းမာရေးဝန်ကြီးဌာနလက်အောက်ရှိ FDA, CDC, အမျိုးသားကျန်းမာရေးအဖွဲ့အစည်းတို့ အပါအဝင် အဆင့်မြင့်အေဂျင်စီ အများအပြားကို ဝန်ထမ်းအင်အား လျှော့ချလာတာဖြစ်ပြီး ဒါတွေဟာ သမ္မတ ဒေါ်နယ်ထရမ့်နဲ့ ဘီလျံနာ အီလွန်မက်စ်တို့ အစိုးရအမှုထမ်းအင်အားနဲ့ အသုံးစရိတ်လျှော့ချရေး အစီအစဉ်ကြီးထဲက တစ်ခုဖြစ်လာပါတယ်။

▪️ အလုပ်ထုတ်ပယ်သူတွေထဲမှာ ပြည်သူ့ကျန်းမာရေး၊ ကင်ဆာသုတေသန၊ ကာကွယ်ဆေးနဲ့ ဆေးဝါးအသိအမှတ်ပြုရေးတို့ကို ကြီးကြပ်နေတဲ့ ထိပ်သီးသိပ္ပံပညာရှင်တွေ ပါဝင်နေရာ လက်ရှိရောဂါဖြစ်ပွားမှုတွေကို အမေရိကန် ဘယ်လိုတုံ့ပြန်ဆောင်ရွက်မလဲဆိုတာနဲ့ ပတ်သက်ပြီး စိုးရိမ်စရာ ဖြစ်လာပါတယ်။

▪️ အလုပ်အကိုင် ဆုံးရှုံးသွားသူတွေအတွက် စိတ်မကောင်းဖြစ်မိတယ်လို့ ကျန်းမာရေးဝန်ကြီး ရောဘတ်အက်ဖ်ကင်နက်ဒီဂျူနီယာက ဖော်ပြသွားပါတယ်။

▪️ ဆေးဝါးသစ်ဌာနမှ ညွှန်ကြားရေးမှူး ပီတာစတိန်း၊ FDA ဆေးရွက်ကြီးထုတ်ကုန်ဌာန အကြီးအကဲ ဘရိုင်ယန်ကင်း၊ FDAကာကွယ်ဆေး ထိပ်သီးအရာရှိ ပီတာမာ့ခ်တို့ အလုပ်ထုတ်ခံရတဲ့ထဲ ပါဝင်နေပါတယ်။

▪️ "FDAက ပြီးဆုံးသွားပါပြီ။ အသိပညာတွေအကြောင်း၊ ထုတ်ကုန်ဖွံ့ဖြိုးတိုးတက် ဘေးကင်းရေးတို့အကြောင်း နက်နဲစွာသဘောပေါက်နားလည်တဲ့ ခေါင်းဆောင်အများစု မရှိတော့ပါဘူး။ သမိုင်းမှာ အမှားကြီးတစ်ခုအနေနဲ့ နာမည်တွင်သွားလိမ့်မယ်" လို့ ကော်မရှင်နာဟောင်း ရောဘတ်ကာလစ်ဖ်က Linkedlnမှာ ဖော်ပြထားပါတယ်။

▪️ ဝန်ထမ်းတွေက ဝါရှင်တန်မြို့လယ် ကျန်းမာရေးဌာနအများအပြား တည်ရှိတဲ့ မယ်ရီဆွစ်ဇာအဆောက်အအုံအတွင်းသို့ ဝင်ရောက်ရန် ကြိုးပမ်းတဲ့အခါမှာ လုံခြုံရေးအစောင့်တွေက အလုပ်ထုတ်ခံရကြောင်း အသိပေးနေကြပါတယ်။

▪️ အလုပ်ထုတ်ခံရကြောင်းကို လုံခြုံရေးအစောင့်တွေက ပြောပြနေရတယ်လို့ ဝန်ထမ်းတစ်ဦးက ပြောသွားပါတယ်။

#Source: Reuters