အောက်တိုဘာ၁၄၊၂၀၂၃

အိန္ဒိယနိုင်ငံ အနေဖြင့် မြန်မာနိုင်ငံငြိမ်းချမ်းရေးအတွက် ဆက်လက်ကူညီ ဆောင်ရွက်သွားမည့် အခြေအနေ များနှင့် NCA အပေါ်အပြည့်အဝယုံကြည်လျက်ရှိကြောင်း  နစက ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် အိန္ဒိယနိုင်ငံ၊ ဒုတိယအမျိုးသား လုံခြုံရေးဆိုင်ရာအကြံပေးပုဂ္ဂိုလ် Mr. Vikram Misriတို့ နေပြည်တော်တွင် ယနေ့ တွေ့ဆုံဆွေးနွေးခဲ့တယ်လို့ နစကရဲ့သတင်းထုတ်ပြန်ချက်အရသိရှိရပါတယ်။

အောက်တိုဘာ ၁၅ ရက်နေ့တွင် ကျင်းပမည့် တစ်နိုင်ငံလုံး ပစ်ခတ်တိုက်ခိုက်မှုရပ်စဲရေးသဘောတူစာချုပ် (NCA) (၈)နှစ်မြောက် နှစ်ပတ်လည်နေ့ အခမ်းအနားသို့တက်ရောက်ရန် ရောက်ရှိနေသည့် အိန္ဒိယနိုင်ငံ၊ ဒုတိယအမျိုးသား လုံခြုံရေးဆိုင်ရာအကြံပေးပုဂ္ဂိုလ် H.E. Mr. Vikram Misri ဦးဆောင်သော ကိုယ်စား လှယ်အဖွဲ့က ယနေ့ အောက်တိုဘာ ၁၄ ရက်နေ့တွင် နစက ဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင်ထံ လာရောက်တွေ့ဆုံစဉ် အဆိုပါကိစ္စဆွေးနွေးခဲ့တာဖြစ်ပါတယ်။

ဗိုလ်ချုပ်မှူးကြီးက အိန္ဒိယနိုင်ငံအစိုးရကိုယ်စား  Mr. Vikram Misri က မြန်မာနိုင်ငံအတွက်အရေးကြီးသည့် ငြိမ်းချမ်းရေးနှစ်ပတ်လည်နေ့အခမ်းအနားကို လာရောက်တက်ရောက် သည့်အတွက် ကျေးဇူးတင်ရှိပါကြောင်း ပြောကြားခဲ့တယ်လို့သတင်းထုတ်ပြန်ချက်မှာဖော်ပြပါရှိပါတယ်။

ဗိုလ်ချုပ်မှူးကြီးနှင့် Mr. Vikram Misri တို့သည် နိုင်ငံဖွံ့ဖြိုးတိုးတက်ရေးနှင့် တည်ငြိမ်အေးချမ်း ရေးအတွက်ဆောင်ရွက်လျက်ရှိမှု၊ ဒီမိုကရေစီနှင့်ဖက်ဒရယ်ကိုအခြေခံသည့် ပြည်ထောင်စု တည်ဆောက်ရေး ဆောင်ရွက်လျက်ရှိမှု၊ နိုင်ငံတော်အစိုးရနှင့် တပ်မတော်အနေဖြင့် ပြည်တွင်းငြိမ်းချမ်းရေးရရှိအောင် ကြိုးပမ်း ဆောင်ရွက်လျက်ရှိမှု၊ မြန်မာနိုင်ငံငြိမ်းချမ်းရေးအတွက် အိန္ဒိယနိုင်ငံအနေဖြင့် တစ်ဖက်တစ်လမ်းမှ  ကူညီဆောင်ရွက် ပေးလျက်ရှိမှု၊  နယ်စပ်ဒေသတည် ငြိမ်အေးချမ်းရေးအတွက် ပူးပေါင်းဆောင်ရွက်လျက်ရှိမှု၊ နှစ်နိုင်ငံ ချစ်ကြည်ရေးနှင့် ပူးပေါင်းဆောင်ရွက်မှုများ တိုးတက်ကောင်းမွန်လျက်ရှိမှု၊ နှစ်နိုင်ငံ အပြန်အလှန်ကုန်သွယ်မှုများနှင့် ရင်းနှီးမြှုပ်နှံမှုများ ယခုထက်ပိုမိုတိုးတက်ကောင်းမွန် စေရေးဆောင်ရွက်ရန်လိုအပ်လျက်ရှိမှုတို့ကို‌ဆွေးနွေးခဲ့တယ်လို့လည်း နစကသတင်း ထုတ်ပြန်ရေးအဖွဲ့က သတင်းထုတ်ပြန်ပါတယ်။

ယင်းအပြင် နိုင်ငံတော်အစိုးရနှင့်တပ်မတော်အနေဖြင့် NCA လမ်းကြောင်းပေါ်၌ ခိုင်မာစွာရပ်တည်  လျှောက်လှမ်းလျက်ရှိမှုနှင့် ပါတီစုံဒီမို ကရေစီ လမ်းကြောင်းပေါ်၌ ခိုင်ခိုင်မာမာဖြင့် ဆက်လက်လျှောက်လှမ်းလျက်ရှိမှု၊ အိန္ဒိယနိုင်ငံ အနေဖြင့်လည်း မြန်မာနိုင်ငံငြိမ်းချမ်းရေးအတွက် ဆက်လက်ကူညီ ဆောင်ရွက်သွား မည့် အခြေအနေများ    နှင့် NCA အပေါ်အပြည့်အဝယုံကြည်လျက်ရှိမှု နှင့် မြန်မာနိုင်ငံ၏ နိုင်ငံရေးဖြစ်ပေါ်ပြောင်းလဲမှုများနှင့်ပတ်သက်၍ ရင်းနှီးပွင့်လင်းစွာဖြင့် အမြင်ချင်းဖလှယ်ခဲ့ကြတယ်လို့ သတင်းထုတ်ပြန်ချက်မှာဆက်လက်ဖော်ပြထားပါတယ်။

တွေ့ဆုံပွဲသို့ ဗိုလ်ချုပ်မှူးကြီးနှင့်အတူကောင်စီတွဲဖက်အတွင်းရေးမှူး ဒုတိယဗိုလ်ချုပ်ကြီး ရဲဝင်းဦး၊ ကောင်စီ အဖွဲ့ဝင် ပြည်ထဲရေးဝန်ကြီးဌာန ပြည်ထောင်စုဝန်ကြီး အမျိုးသားစည်းလုံးညီညွတ်ရေးနှင့် ငြိမ်းချမ်းရေးဖော်ဆောင်မှု ညှိနှိုင်းရေးကော်မတီ ဥက္ကဋ္ဌ  ဒုတိယဗိုလ်ချုပ်ကြီး ရာပြည့် တို့ တက်ရောက်ကြပြီး  အိန္ဒိယနိုင်ငံ၊ ဒုတိယ အမျိုးသား လုံခြုံရေးဆိုင်ရာ အကြံပေး ပုဂ္ဂိုလ်နှင့်အတူ မြန်မာနိုင်ငံ ဆိုင်ရာ အိန္ဒိယနိုင်ငံသံအမတ်ကြီး H.E. Mr. Vinay Kumar နှင့်တာဝန်ရှိသူများ တက်ရောက်ကြကြောင်းသတင်းရရှိပါတယ်။

၁၀ အောက်တိုဘာ ၂၀၂၃

ဒုတိယဗိုလ်ချုပ်ကြီ(ဟောင်း)မိုးမြင့်ထွန်းနှင့် ဗိုလ်မှူးချုပ်(ဟောင်း) ရန်နောင်စိုးတို့ကို  စစ်တရားရုံးက နှစ်(၂၀)နှင့် ညီမျှသော တစ်သက်တစ်ကျွန်းပြစ်ဒဏ်တွေချမှတ်ခဲ့တယ်လို့ အောက်တိုဘာ ၁၀ရက်နေ့တွင် နစကသတင်းထုတ်ပြန်ရေးအဖွဲ့က သတင်း ထုတ်ပြန်ပါတယ်။

ဒုတိယဗိုလ်ချုပ်ကြီး(ဟောင်း)မိုးမြင့်ထွန်းသည်နိုင်ငံတော်စီမံအုပ်ချုပ်ရေးကောင်စီအဖွဲ့ဝင်၊မြန်မာနိုင်ငံရင်းနှီးမြှုပ်နှံမှုကော်မရှင်ဥက္ကဋ္ဌ၊နိုင်ငံခြားသုံးငွေကြီးကြပ်ရေးကော်မတီဥက္ကဋ္ဌ၊ကုန်သွယ်မှုနှင့်ကုန်စည်စီးဆင်းမှုများ မှန်ကန်မြန်ဆန်ရေးဗဟိုကော်မတီ ဥက္ကဋ္ဌ တာဝန်များကိုထမ်းဆောင်စဉ်အတွင်း နိုင်ငံတော်၏ နိုင်ငံခြားသုံးငွေဆိုင်ရာ မူဝါဒ၊ အရေးကြီး ကုန်စည်ဆိုင်ရာမူဝါဒနှင့် အခြားစီးပွားရေးဆိုင်ရာ မူဝါဒများနှင့် ဆန့်ကျင်၍ ပုဂ္ဂိုလ်ရေး အကျိုးအမြတ်ရယူဆောင်ရွက်ခဲ့ခြင်း ဖြင့် နိုင်ငံတော်က ချမှတ်ထားသည့် ရှေ့လုပ်ငန်းစဉ် များနှင့်ဦးတည်ချက်များကို သွေဖည်ဆောင်ရွက်၍ နိုင်ငံတော်သစ္စာဖောက်ဖျက်မှုကို ကျူးလွန်ခဲ့ခြင်း၊ နိုင်ငံတော်အစိုးရက စားအုန်းဆီများကိုတင်သွင်းရန် သတ်မှတ်ရာခိုင်နှုန်းအတွက် ကျသင့်ဒေါ်လာများအားမြန်မာနိုင်ငံတော်ဗဟိုဘဏ်က ရည်ညွှန်းဈေးနှုန်းဖြင့် ရောင်းချပေး ကာတင်သွင်းစေခဲ့သော်လည်းနိုင်ငံတော်အစိုးရက ခွင့်ပြု ရောင်းချရန် သတ်မှတ်ထားသည့် ရည်ညွှန်းဈေးနှုန်းထက် ဈေးတင်ရောင်းချခြင်းကို သိလျက် အရေးယူဆောင်ရွက်ရန် ပျက်ကွက်ခြင်း၊ ပတ်သက်ဆောင်ရွက်ခြင်း၊ကုမ္ပဏီများက ပေးအပ်သည့် တံစိုး လက်ဆောင်ပစ္စည်းများကို ရာထူး လုပ်ပိုင်ခွင့်ကိုအသုံးပြု၍ ရယူ ဆောင်ရွက်ခဲ့ခြင်း၊ နိုင်ငံခြားသုံးငွေများကို တရားမဝင် လက်ဝယ် ထားရှိခြင်း၊စစ်စည်းကမ်းဆိုင်ရာ ညွှန်ကြား ချက်များကို ဖောက်ဖျက်၍ အရပ်ဘက်စီးပွားရေးလုပ်ငန်းများတွင် ပါဝင်ဆောင်ရွက်ခဲ့ခြင်းတို့ကို ကျူးလွန်ခဲ့သဖြင့် သက်ဆိုင်ရာ ဥပဒေပုဒ်မများဖြင့်စွဲချက်တင်ကာ စစ်တရားရုံးဖြင့် စစ်ဆေးစီရင်ပြီး နှစ်ဆယ် နှစ်ကာလနှင့်ညီမျှသော တစ်သက်တစ်ကျွန်းဒဏ်ကိုချမှတ်ခဲ့ခြင်းဖြစ်တယ်လို့ သတင်းထုတ်ပြန်ချက်မှာဖော်ပြထားပါတယ်။

အဲဒီအပြင် ဗိုလ်မှူးချုပ်(ဟောင်း) ရန်နောင်စိုးသည် ကုန်သွယ်မှုနှင့် ကုန်စည်စီးဆင်းမှုများ မှန်ကန်မြန်ဆန်ရေးဗဟိုကော်မတီ တွဲဖက်အတွင်းရေးမှူး တာဝန်ထမ်းဆောင်စဉ်နိုင်ငံတော်၏ စီးပွာရေး ဆိုင်ရာမူဝါဒနှင့်ဆန့်ကျင်၍ ပုဂ္ဂိုလ်ရေး အကျိုးအမြတ်ရယူဆောင်ရွက်ခြင်း၊နိုင်ငံခြားသုံး ငွေဆိုင်ရာမူဝါဒ၊ အရေးကြီးကုန်စည်ဆိုင်ရာမူဝါဒနှင့် အခြားစီးပွားရေး ဆိုင်ရာမူဝါဒများနှင့် ဆန့်ကျင်ကာ နိုင်ငံတော်ရှေ့လုပ်ငန်းစဉ်များနှင့် ဦးတည်ချက်များကို သွေဖည်ဆောင်ရွက်၍ နိုင်ငံတော်သစ္စာဖောက်ဖျက်မှုကို ဒုတိယဗိုလ်ချုပ်ကြီး(ဟောင်း) မိုးမြင့်ထွန်းနှင့်အတူ ပူးပေါင်း ကျူးလွန်ခဲ့ခြင်း၊ ရာထူးလုပ်ပိုင် ခွင့်အား အသုံးပြု၍ စီးပွားရေးလုပ်ငန်းရှင်များအားနိုင်ငံခြားငွေနှင့် မြန်မာကျပ်ငွေများကိုလဲလှယ်ပေးခဲ့ခြင်း၊ စီးပွားရေး လုပ်ငန်းရှင်များထံမှနိုင်ငံခြားငွေနှင့် မြန်မာကျပ်ငွေများကိုလက်ခံရယူခဲ့ခြင်း၊ စီးပွားရေးလုပ်ငန်းရှင်များအားဒုတိယဗိုလ်ချုပ်ကြီး (ဟောင်း)မိုးမြင့်ထွန်းနှင့် ဆက်သွယ်ဆောင်ရွက်ပေးခြင်း၊ နိုင်ငံခြားငွေများကို တရားမဝင် လက်ဝယ် ထားရှိ ခြင်း၊ စစ်စည်းကမ်း ဆိုင်ရာ ညွှန်ကြားချက်များကို ဖောက်ဖျက်၍အရပ်ဘက်စီးပွားရေးလုပ်ငန်းများတွင် ပါဝင်ဆောင်ရွက်ခဲ့ခြင်း တို့ကို ကျူးလွန်ခဲ့ သဖြင့် သက်ဆိုင်ရာဥပဒေပုဒ်မများဖြင့် စွဲချက်တင်ကာ စစ်တရားရုံးဖြင့် စစ်ဆေးစီရင်ပြီး နှစ်ဆယ် နှစ်ကာလနှင့်ညီမျှသော တစ်သက်တစ်ကျွန်းဒဏ်ကိုချမှတ်ခဲ့တယ်လို့လည်း သတင်းမှာဖော်ပြထားပါတယ်။

Video>>

Breaking News

၁၀ အောက်တိုဘာ ၂၀၂၃

တပ်မတော်အနေနနှင့် မည်သည့် လက်နက်ကိုင်သောင်းကျန်းသူတွေရဲ့ ဌာနချုပ်ကိုမှ ပစ်ခတ်တိုက်ခိုက်ခဲ့တာတွေ မရှိခဲ့ဘူးလို့ သတင်းထုတ်ပြန်ရေးအဖွဲ့ခေါင်းဆောင် ဗိုလ်ချုပ်ဇော်မင်းထွန်းက ပြောပါတယ်။ ကေအိုင်အေရဲ့ လိုင်ဇာ ဌာနချုပ်အတွင်း ပေါက်ကွဲမှုဖြစ်ပေါ်ခဲ့တဲ့သတင်းများနှင့်ပတ်သက်လို့ ဗိုလ်ချုပ်ဇော်မင်းထွန်းက သတင်းမီဒီယာများရဲ့အမေးကိုပြန်လည် ဖြေကြားခဲ့တာဖြစ်ပါတယ်။

၈ အောက်တိုဘာ ၂၀၂၃

ပါလက်စတိုင်း အစ္စလမ်မစ်အုပ်စု ဟားမတ်က အောက်တိုဘာ(၇)ရက်စနေနေ့တွင်  နှစ်ပေါင်း ၅၀ အတွင်း အဆိုးရွားဆုံး အကြမ်းဖက်မှုအဖြစ် အစ္စရေးကို တိုက်ဂါဇာနှင့်အစ္စရေးတို့တွင် လူပေါင်း ၄၀၀ ကျော်သေဆုံးပြီး ထောင်ပေါင်းများစွာ ဒဏ်ရာရရှိခဲ့ပါတယ်။ အစ္စရေးဝန်ကြီးချုပ် ဘင်ဂျမင်နေတန်ယာဟုက နိုင်ငံတွင် စစ်ဖြစ်နေပြီဖြစ်ပြီး ပြင်းထန်စွာပြန်လည်တိုက်ခိုက်မည်ဟု ပြောခဲ့ပါတယ်။

အဆိုပါတိုက်ခိုက်မှုအပေါ် ကမ္ဘာတစ်လွှားမှ အမျိုးမျိုးတုန့်ပြန်ခဲ့ကြပါတယ်။ အနောက်နိုင်ငံအများစု၊ယူကရိန်းနှင့် အိန္ဒိယတို့က  အစ္စရေးကို တိုက်ခိုက်မှု အပေါ်ရှုတ်ချလိုက်ကြပြီး အစ္စရေးနှင့်အတူတကွစည်းလုံးစွာ ရှိကြရန်ပြောဆိုခဲ့ပါတယ်။ အခြားတစ်ဖက်မှာလည်း အီရန်လို နိုင်ငံတွေက ဂုဏ်ယူစရာစစ်ဆင်ရေးအဖြစ် အောင်ပွဲခံခဲ့ကြပါတယ်။ ကာတာကလည်း အကြမ်းဖက်မှုတွေအရှိန်မြင့်တင်လာမှုမှာ အစ္စရေးကသာ တာဝန်ရှိတယ်လို့ ပြောလာပါတယ်။

ပါလက်စတန်းစစ်သွေးကြွအုပ်စုက ဂါဇာကမ်းမြောင်မှ အစ္စရေးနိုင်ငံအတွင်းသို့ ဒုံးကျဉ်ပေါင်း ၅၀၀၀ ကျော်ကို ပစ်လွှတ်တိုက်ခိုက်ခြင်းဖြင့် Al-Aqsa Flood စစ်ဆင်ရေးကို စတင်ခဲ့ကြတာဖြစ်ပါတယ်။ ဒုံးကျည်ပေါင်း ၁၅၀လောက်နှင့် အဓိကမြို့တဲလ်အဗစ်အပါအဝင် အစ္စရေးအလယ်ပိုင်းကို တိုက်ခိုက်ခံရတယ်လို့ စနေနေ့ညနေပိုင်းမှာ အစ္စရေးမီဒီယာတွေက သတင်းရေးသားကြပါတယ်။

ဟားမတ်ခေါင်းဆောင် အစ်စ်မေးလ်ဟန်ညီယတ်က  ဂါဇာမှာ စတင်ခဲ့တဲ့တိုက်ခိုက်မှုကို အနောက်ဘက်ကမ်းခြေနှင့်ဂျေရုစလင်အထိ ချဲ့သွားမယ်လို့ ပြောပါတယ်။ “ ဒါဟာ ကျွန်တော်တို့ရဲ့ရန်သူ၊သူ့စစ်သားတွေနှင့်အခြေချနေထိုင်သူတွေအပေါ် မနက်ခင်းအနိုင်ယူမှုနှင့် အရှက်ခွဲမှုတစ်ရပ်ဖြစ်တယ်” လို့ ပြောပါတယ်။

“ ဒီနေ့ဖြစ်ခဲ့တာတွေဟာ ကျွန်တော်တို့ရဲ့ ကြီးကျယ်တဲ့ပြင်ဆင်မှုကို ထုတ်ဖော်ပြတာဖြစ်တယ်။ ရန်သူရဲ့အားနည်းချက်ကိုထုတ်ပြတာဖြစ်တယ်” လို့လည်း သူကဆက်ပြောပါတယ်။

အစ္စရေးထဲ ကုန်းကြောင်း၊ပင်လယ်ရေကြောင်းနှင့်လေကြောင်းကနေ ပါရာဂလိုက်ဒါတွေ အသုံးပြုပြီး ဝင်လာကာ ဒုံးကျယ်တွေအများအပြားပစ်ခတ်ခဲ့တဲ့ ဂါဇာစစ်သွေးကြွတွေကို သူတို့တိုက်ခိုက်နေတယ်လို့ အစ္စရေးစစ်တပ်ကပြောပါတယ်။

အစ္စရေးနိုင်ငံအတွင်းက ၂၂ နေရာမှာ ရာပေါင်းများစွာသော ပါလက်စတိုင်းစစ်သွေးကြွတွေနှင့်  တိုက်ပွဲတွေဖြစ်နေတယ်လို့ အစ္စရေးက ပြောပါတယ်။ ဟားမတ်ရဲ့တိုက်ခိုက်မှုတွေထဲ ပြင်းထန်တဲ့ မြေပြင်ကျူးကျော်တိုက်ခိုက်မှဒလည်းပါဝင်တယ်။

အစ္စရေးဝန်ကြီးချုပ် နေတန်ယာဟုက “ အစ္စရေးနိုင်ငံသားများခင်ဗျား ကျွန်တော်တို့စစ်ဖြစ်နေပါပြီ” လို့ ပထမဆုံးမှတ်ချက်စကားပြောကြားပြီး Swords of Iron စစ်ဆင်ရေး အတွက် အောင်နိုင်ဖို့ ညီညွတ်ကြဖို့ တောင်းဆိုလိုက်ပါတယ်။ အဲဒီအပြင် ဒီလိုအဖြစ်မျိုးဘယ်တုန်းကမှမရှိခဲ့ဘူး။ ဘယ်တော့မှလည်းထပ်အဖြစ်မခံဘူးလို့ပြောပါတယ်။ ဟားမတ်ရဲ့ စွမ်းရည်တွေကို ဖျက်ဆီးပစ်ဖို့ အစ္စရေးကာကွယ်ရေးတပ်တွေဟာ ရှိသမျှစွမ်းအားတွေအကုန်ထုတ်သုံးမယ်လို့လည်း သူက ကတိပေးခဲ့ပါတယ်။ အင်အားအပြည်နှင့်နေရာအနှံ့စစ်ဆင်ရေးတွေလုပ်မှာဖြစ်တာကြောင့်ဂါဇာကနေ ဒေသခံတွေ ထွက်ခွာပေးဖို့ သူကပြောခဲ့ပါတယ်။

ပါလက်စတိုင်းသမ္မတ မာမွတ်အက်ဘားက “ သူ့နိုင်ငံပြည်သူတွေအနေနှင့် အခြေချသူတွေနှင့် သိမ်းပိုက်ထားတဲ့တပ်တွေရဲ့အကြမ်းဖက်မှုတွေကို ခုခံဖို့ အခွင့်အရေးအပြည့်ရှိတယ်” လို့ သတင်းထုတ်ပြန်ခဲ့ပါတယ်။  အစ္စရေးနှင့် ဂါဇာမှာ သေဆုံးသူတွေဟာ ၄၀၀ ကျော်သွားပြီဖြစ်ပါတယ်။

Source WION

၁ အောက်တိုဘာ ၂၀၂၃

အစိုးရရဲ့ဌာနတွေ နောက်ထပ် ၄၅ ရက်ဆက်လက်လည်ပတ်လို့ရဖို့အတွက် 11th-hour ရန်ပုံငွေဥပဒေကြမ်းကို အမေရိကန်ကွန်ဂရက်က စနေနေ့က အတည်ပြုလိုက်ပေးလိုက်လို့ ပေးဆပ်ရမယ့်တန်ဖိုးကြီးမားလှတဲ့ အစိုးရယန္တယားရပ်ပစ်ရမယ့်အရေးမှ အမေရိကန်ပြည်ထောင်စုလွတ်မြောက်သွားပါတယ်။ ဒါပေမယ့် သမ္မတဂျိုးဘိုင်ဒင်တောင်းထားတဲ့ ယူကရိန်းအကူအညီကိုတော့ အပေးအယူလုပ်ပြီး ချန်လှပ်တာခံလိုက်ရပါတယ်။

စက်တင်ဘာ၃၀ စနေည သန်းခေါင်မတိုင်ခင်သုံးနာရီအလိုမှ ဆီးနိတ်က ၃၃၅-၉၁မဲဖြင့် အတည်ပြုခဲ့တဲ့ အဲဒီဥပဒေကြမ်းဟာ နိုဝင်ဘာလအလယ်အထိပဲ အကျုံးဝင်တာဖြစ်ပါတယ်။ ယူကရိန်းအထောက်အပံ့ကိစ္စကိုတော့ တစ်ခြားဥပဒေကြမ်းတစ်ခုအနေနှင့် ခပ်မြန်မြန်တင်သွင်းမှာကို ရီပတ်ဘလီကင်တွေက ခွင့်ပြုမယ်လို့ အစိုးရကမျှော်လင့်ထားတယ်လို့တော့ အိမ်ဖြူတော်အရာရှိကပြောပါတယ်။

အစိုးရယန္တယားတွေရပ်ရမယ့်အကျပ်အတည်းဟာ ရီပတ်ဘလီကင်တွေထဲက သဘောထားတင်းမာသူအချို့ကြောင့် ကျယ်ပြန့်လာခဲ့ရတာဖြစ်ပါတယ်။ ဒီလိုဆီးနိတ်ကမဲပေးလိုက်လို့ ဥပဒေကြမ်းအဆင်ပြေသွားပေမယ့် ဆီးနိတ်ဥက္ကဋ္ဌ ရီပတ်ဘလီကင်အမတ် မက်ကာသီအတွက်တော့ သူ့ရာထူးခုံလှုပ်လာမယ့်သဘောတော့ရှိနေပါတယ်။ သဘောထားတင်းမာတဲ့ ဆီးနိတ်အမတ်၂၁ဦးက သူ့ကို ဆီးနိတ်ဥက္ကဋ္ဌနေရာကနေ ဖယ်ရှားလိုနေကြပါတယ်။

“ အစိုးရယန္တယားပွင့်နေဖို့ ဒါလုံလောက်ပါတယ်။ နိုင်ငံခြားအကူအညီကိစ္စတစ်ခုတည်းနှင့် အစိုးရယန္တယားရပ်သွားဖို့မဟုတ်ဘူး” လို့ အောက်လွှတ်တော်ဒီမိုကရက်တစ်(၁)ဦးဖြစ်တဲ့ ဂျာရက်မော့စကိုဝစ်က စီအင်န်အင်န်ကိုပြောပါတယ်။

“ အမေရိကန်တွေ အသက်ရှုရနည်းနည်းချောင်သွားတာပေါ့။ ယနေ့ည အစိုရယန္တယားရပ်စရာမရှိ” လို့ ဒီမိုကရက်တစ်ဆီးနိတ်လူများစု ခေါင်းဆောင် Chuck Schumerက မဲပေးအပြီးမှာပြောပါတယ်။ “ ယန္တယားမရပ်အောင်ရှောင်ရှားနိုင်တဲ့ တစ်ခုတည်းသော နည်းလမ်းက နှစ်ပါတီလက်တွဲလုပ်ဖို့ပဲ။ ဥက္ကဋ္ဌ မက်ကာသီအဲဒါကိုသဘောပေါက်တဲ့အတွက် ကျွန်တော်တို့ဝမ်းသာပါတယ်” လို့သူကဆက်ပြောပါတယ်။

Source agencies

၃၀ စက်တင်ဘာ ၂၀၂၃

ငြိမ်းချမ်းရေးကို ဖော်ဆောင်ရာတွင် NCA အပေါ်တွင်သာ ခိုင်ခိုင်မာမာရပ်တည် ဆောင်ရွက်သွားရမည်ဟု ယုံကြည်ပြီး NCA နှင့်ပတ်သက်၍ အထောက်အထားမဲ့၊ အဓိပ္ပါယ်မဲ့စွာ လက်လွတ်စပယ်ပြောကြားမှုများကို လက်သင့်ခံ ၍မရနိုင်ဟု KNU ဥက္ကဋ္ဌဟောင်း စောမူတူးစေးဖိုးက ဗိုလ်ချူပ်မှူးကြီးမင်းအောင်လှိုင်ကို ပြောကြားပါတယ်။

စက်တင်ဘာ ၃၀ ရက် မနက်ပိုင်းက နေပြည်တော်ရှိ ဘုရင့်နောင်ရိပ်သာတွင် နစကဥက္ကဋ္ဌ၊တပ်မတော်     ကာကွယ်ရေးဦးစီးချုပ် ဗိုလ်ချူပ်မှူးကြီးမင်းအောင်လှိုင်နှင့်ငြိမ်းချမ်းရေးကိစ္စများ   ဆွေးနွေးရာတွင်NCA စာချုပ်လက် မှတ်ရေးထိုးစဉ်ကိုယ်တိုင်လက်မှတ်ရေးထိုးခဲ့သူလည်းဖြစ်တဲ့ ကရင်တိုင်းရင်းသားခေါင်းဆောင် စောမူတူးစေးဖိုးက ပြောကြားခဲ့ခြင်းဖြစ်တယ်လို့ နစကရဲ့သတင်းထုတ်ပြန်ချက်အရသိရပါတယ်။

အမှန်တကယ် ငြိမ်းချမ်းရေးကိုလိုလားပါက အမုန်းတရားကို အခြေခံ၍ ဆောင်ရွက်၍ရမည်မဟုတ် ကြောင်း၊ မိမိအနေဖြင့် တစ်နိုင်ငံလုံးပစ်ခတ်တိုက်ခိုက်မှု ရပ်စဲရေး သဘောတူစာချုပ် (NCA) လက်မှတ်ရေးထိုးစဉ်ကတည်းကပင် ယခုအချိန်အထိ ငြိမ်းချမ်းရေးရရှိရေး ကိုသာ ခိုင်ခိုင်မာမာရပ်တည်ဆောင်ရွက်ခဲ့ပါကြောင်းလည်း စောမူတူးစေးဖိုးက ပြောပါတယ်။ယင်းအပြင် ကရင်အမျိုးသားအစည်း အရုံး(KNU)ကို ငြိမ်းချမ်းရေးလမ်းကြောင်းပေါ်သို့ မှန်မှန်ကန်ကန် ရောက်ရှိလာစေရေး စိတ်ရှည်စွာဖြင့် စောင့်ဆိုင်းပေးနေမှုအပေါ်တွင်လည်း ကျေးဇူးတင်ပါတယ်လို့ နစကဥက္ကဋ္ဌကို စောမူတူးစေးဖိုးနှင့်အဖွဲ့ကဆက်လက်ပြောဆိုတယ်လို့ သတင်းထုတ်ပြန်ချက်မှာဖော်ပြထားပါတယ်။

NCA စာချုပ် ချုပ်ဆိုချိန်တွင်လည်း အစိုးရ၊ လွှတ်တော်၊ တပ်မတော်နှင့် တိုင်းရင်းသား လက်နက်ကိုင် အဖွဲ့အစည်းများက ကမ္ဘာ့ကုလသမဂ္ဂအပါအဝင် နိုင်ငံတကာမှ သံတမန် များ၊ ပြည်တွင်း အသိသက်သေများ ရှေ့မှောက်၌ လက်မှတ်ရေးထိုးထားခြင်းဖြစ်ပြီး မည်သည့်အချိန်မှ ပျက်ပြယ်မှုမရှိ တည်ရှိနေမည့်ခိုင်မာသည့် တရားဝင်စာချုပ်ဖြစ်တယ်လို့လည်း စောမူတူးစေးဖိုးနှင့်အဖွဲ့က အခိုင်အမာပြောဆိုပါတယ်။ သူ့အနေနှင့်ပါတီစုံဒီမို ကရေစီ စနစ်  ကိုလက်ခံပြီး တည်ငြိမ်အေးချမ်းမှုကိုလိုလားတယ်လို့လည်းဆက်ပြောပါတယ်။

ယခုတွေ့ဆုံမှုသည် ကရင်ပြည်နယ် တည်ငြိမ်အေးချမ်းရေးနှင့် မြန်မာနိုင်ငံ တစ်နိုင်ငံလုံး အတိုင်းအတာဖြင့် ငြိမ်းချမ်းမှုရရှိရေး၏ ခြေလှမ်းသစ်တစ်ခုကို စတင်နိုင်ခဲ့ခြင်းဖြစ်သည်ဟု ယုံကြည်တယ်လို့ ဗိုလ်ချူပ်မှူးကြီးက ပြန်လည်  ပြော ဆိုပါတယ်။

တပ်မတော်အနေဖြင့် ငြိမ်းချမ်းရေးကိုဖော် ဆောင်ရာတွင် NCA နှင့် ဖွဲ့စည်းပုံအခြေခံဥပဒေအပေါ်တွင် ခိုင်ခိုင် မာမာရပ်တည်၍ ဆက်လက်ဆောင်ရွက်သွားမည်ဖြစ်ကြောင်း၊ ထို့ကြောင့် တိုင်းရင်းသားလက်နက်ကိုင် အဖွဲ့အစည်း  (EAO) များအားလုံးကို ငြိမ်းချမ်းရေးဆွေးနွေးရန် အမြဲတံခါးဖွင့်ကြိုဆိုလျက်ရှိတယ်လို့လည်း ဗိုလ်ချူပ်မှူးကြီးက ဆက်လက်ဖိတ်ခေါ်ခဲ့တယ်လို့ သတင်းထုတ်ပြန်ချက်မှာဖော်ပြထားပါတယ်။

ယင်းကဲ့သို့ဆွေးနွေးရာတွင် မိမိတို့ထံသို့လာရောက်တွေ့ဆုံညှိနှိုင်း ဆွေးနွေးနိုင်သကဲ့သို့  တပ်မတော်မှ ငြိမ်းချမ်းရေးဆွေးနွေးမှုအဖွဲ့များကို စေလွှတ်ဆွေးနွေးပေးစေလိုပါကလည်း တိုင်းစစ်ဌာနချုပ်များတွင် ဆွေးနွေးနိုင်ရေး    ဆောင်ရွက်ပေးသွားမယ်လို့ ဗိုလ်ချူပ်မှူးကြီးက ပြောပါတယ်။

ပြည်တွင်းတည်ငြိမ် အေးချမ်း ရေးအတွက် လက်နက်ကိုင်လမ်းစဉ်ကို မကျင့်သုံးဘဲ တွေ့ဆုံညှိနှိုင်း  ဆွေးနွေး ရေးကိုသာ ဆောင်ရွက်ရမည်ဖြစ်ကြောင်း၊ ငြိမ်းချမ်းရေးကို ပျက်ယွင်းစေမည့် အပြုအမူ အပြောအဆို၊ အလုပ်အကိုင် များကို လုံးဝ လက်သင့်ခံ၍ ရနိုင်မည်မဟုတ်ပါကြောင်း၊ သဘောတူညီချက်များဖြင့် ချုပ်ဆိုထားသည့် NCA လမ်း  ကြောင်းပေါ်တွင် ဆက်လက်လျှောက်လှမ်းသွားရမှာဖြစ်တယ်လို့ စောမူတူးစေးဖိုးနှင့်အဖွဲ့က ဆွေးနွေးပြောဆိုတယ်လို့   သတင်းထုတ်ပြန်ချက်အရ သိရပါတယ်။

ကရင်တိုင်းရင်းသားခေါင်းဆောင် စောမူတူးစေးဖိုးအနေဖြင့် NCA စာချုပ်ကို ကိုယ်တိုင်လက်မှတ်ရေးထိုး  ပါဝင်ခဲ့သည့် တိုင်းရင်းသားခေါင်းဆောင် တစ်ဦးဖြစ်တဲ့အတွက် မကြာမီ ကျရောက်တော့မည့် တစ်နိုင်ငံလုံး ပစ်ခတ် တိုက်ခိုက်မှုရပ်စဲရေး သဘောတူစာချုပ် (NCA)ချုပ်ဆိုမှု ၈ နှစ်မြောက် အထိမ်းအမှတ်အခမ်းအနားသို့ တက်ရောက်   ပေးနိုင်ဖို့အတွက်လည်း ဗိုလ်ချူပ်မှူးကြီးက  ဖိတ်ကြားခဲ့တယ်လို့ နစက သတင်းထုတ်ပြန်ရေးအဖွဲ့က သတင်း ထုတ်ပြန်   ထားပါတယ်။

အဆိုပါငြိမ်းချမ်းရေးတွေ့ဆုံဆွေးနွေးပွဲသို့ နစကဥက္ကဋ္ဌ၊တပ်မတော်ကာကွယ်ရေးဦးစီးချုပ်နှင့်အတူ ကာကွယ်ရေး  ဦးစီးချုပ်ရုံးမှ ဒုတိယဗိုလ်ချုပ်ကြီး ရဲဝင်းဦးနှင့် တပ်မတော်အရာရှိကြီးများ၊ အမျိုးသားစည်းလုံးညီညွတ်ရေးနှင့် ငြိမ်းချမ်း  ရေးဖော်ဆောင်မှုညှိနှိုင်းရေး ကော်မတီဥက္ကဋ္ဌဒုတိယဗိုလ်ချုပ်ကြီး ရာပြည့်တို့တက်ရောက်ကြပြီး ကရင်တိုင်းရင်းသား  ခေါင်းဆောင် စောမူတူးစေးဖိုးနှင့်အတူ ကရင်အမျိုးသားအစည်းအရုံး (KNU) ဗဟိုကော်မတီဝင်ဟောင်းဖြစ်သူ စောရော   ဂျာခင်၊ ကော့ကရိတ်ခရိုင် ဥက္ကဋ္ဌ ပဒိုရွှေမောင်း တို့ တက်ရောက်ခဲ့ကြတယ်လို့သိရှိရပါတယ်။

 Knl/ymg