#Local_News
Published_26 October 2022

အောက်တိုဘာလ ၁ ရက်မှ ၂၅ ရက်အတွင်း တောင်ကိုရီးယားနိုင်ငံသို့ အစိုးရပြည်ပအလုပ်အကိုင် အေဂျင်စီမှ တစ်ဆင့် EPS စနစ်ဖြင့် အလုပ်သမား စုစုပေါင်း ၉၉၇ ဦး တရားဝင် ပို့ဆောင်ထားကြောင်း အလုပ်သမားညွှန်ကြားရေးဦးစီးဌာန၏ စာရင်းများကို အခြေခံ၍ ဆိုးလ်မြို့ မြန်မာသံရုံးက ထုတ်ပြန်ထားသည်။

အောက်တိုဘာလ ၄ ရက်တွင် လုပ်သားသစ် ၁၂၈ ဦး၊ ၆ ရက်တွင် လုပ်သားသစ် ၁၂၄ ဦး၊ ၁၁ ရက်တွင် လုပ်သားသစ် ၁၂၀ ဦး၊ ၁၃ ရက်တွင် လုပ်သားသစ် ၁၄၈ ဦး ၊ ၁၈ ရက်တွင် လုပ်သားသစ် ၁၅၀ ဦး ၊ ၂၀ ရက်တွင် လုပ်သားသစ် ၁၇၈ ဦး နှင့် ၂၅ ရက်တွင် လုပ်သားသစ် ၁၄၈ ဦး စုစုပေါင်း ၉၉၇ ဦး ပို့ဆောင်ပေးထားခြင်းဖြစ်ကြောင်း ယင်းထုတ်ပြန်ချက်တွင် ဖော်ပြထားသည်။

ယင်းအပင် အစိုးရပြည်ပအလုပ်အကိုင်အေဂျင်စီ (POEA) ၏ ထုတ်ပြန်ချက်တွင် မြန်မာ လုပ်သားဟောင်း ၅၀ ကျော် နှင့် ကုန်ထုတ်လုပ်သားသစ် ၈၀ ကျော်ကို လာမည့် နိုဝင်ဘာလဆန်းတွင် စေလွှတ်သွားမည်ဖြစ်ကြောင်းလည်း ဖော်ပြထားသည်။

တောင်ကိုရီးယားနိုင်ငံသို့ သွားရောက်အလုပ်လုပ်ကိုင်သည့် အလုပ်သမားအများစုအနေဖြင့် ကုန်ထုတ်လုပ်ငန်း၊ စိုက်ပျိုးရေးနှင့် မွေးမြူရေး လုပ်ငန်းများတွင် လုပ်ကိုင်နေကြကြောင်း သိရသည်။

#ymg/sth
#Yangon_Media_Group

#Local_News
Published_26 October 2022

ယခုနှစ်တွင် အကျိုးတူလယ်ယာစနစ်ဖြင့် နွေစပါးနှင့်ပဲတီစိမ်းစိုက်ပျိုးအကောင်အထည်ဖော်ရေးအတွက် ဆောင်ရွက်လိုသည့် ကုမ္ပဏီနှင့် အသင်းအဖွဲ့များကို ဖိတ်ခေါ်ထားကြောင့် စိုက်ပျိုးရေးဦးစီးဌာနကသိရသည်။

၂၀၂၂-၂၀၂၃ ဘဏ္ဍာနှစ်တွင် နွေစပါးသီးနှံနှင့် ဆောင်းပဲတီစိမ်းသီးနှံကို အကျိုးတူလယ်ယာစနစ်ဖြင့် ဆောင်ရွက်ရေးအတွက် စိုက်ပျိုးရေးဦးစီးဌာနအနေဖြင့် မြန်မာနိုင်ငံဆန်စပါးအသင်းချုပ်၊ မြန်မာနိုင်ငံပဲမျိုးစုံ၊ ပြောင်းနှင့် နှမ်းကုန်သည်များအသင်း၊ မြန်မာနိုင်ငံ မြေသြဇာ၊ မျိုးစေ့နှင့်စိုက်ပျိုးရေးဆေးလုပ်ငန်းရှင်များအသင်းတို့နှင့် ညှိနှိုင်း၍ အထက်ပါအတိုင်း ဖိတ်ခေါ်လိုက်ခြင်းလည်း ဖြစ်သည်။

အကျိုးတူလယ်ယာစနစ်ဆောင်ရွက်လိုသည့်ကုမ္ပဏီ၊အသင်းအဖွဲ့ များအနေဖြင့် အဆိုပါရုံးများထံသို့ ဆက်သွယ်ဆောင်ရွက်ကြရန် အသိပေးထားပြီး ဖြစ်ကြောင်းလည်း သိရသည်။

ရန်ကုန်တိုင်းဒေသကြီးအတွင်းတွင် ပဲတီစိမ်းဧက ၂ သိန်း ခန့်ကို အကျိုးတူလယ်ယာစနစ်ဖြင့် ဆောင်ရွက်မည်ဖြစ်ကြောင်း စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန က သိရသည်။

မြန်မာတစ်နိုင်ငံလုံးတွင် ယခုနှစ်တွင် နွေစပါးဧက ၈သိန်းခွဲ နှင့် ဆောင်းပဲတီစိမ်းဧက၅ သိန်းအတွက် တောင်သူများ သွင်းအားစုအသုံးပြုနိုင်ရေးချေးငွေများ ထောက်ပံ့ပေးသွားမည်ဖြစ်ကြောင်း၊ ယင်းအပြင် လယ်ယာကဏ္ဍနှင့် ပတ်သက်သည့် ကုန်စည်လိုင်းအရေအတွက် ၇ဝ ကိုလည်း သွင်းကုန်လိုင်စင်လျှောက်ထားရန်မလိုဘဲ ယခုနှစ် စက်တင်ဘာလ ၁ ရက်မှ စတင်၍ တင်သွင်းခွင့်ပြုခဲ့ကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ကုန်သွယ်ရေး ဦးစီးဌာနမှ အသိပေးထုတ်ပြန်ထားသည်။

#ymg/sth
#Yangon_Media_Group

#Local_News
Published _ 26 october 2022

ဒဂုံမြို့သစ်(တောင်ပိုင်း)နှင့် သင်္ကန်းကျွန်းမြို့နယ်ကို ဆက်သွယ်ထားသည့် အမှတ်(၂)ကမာကြည်တံတားပေါ်က ပြီးခဲ့သည့် အောက်တိုဘာလ ၂၄ ရက်တွင် အမျိုးသမီးငယ်တစ်ဦး ခုန်ချသွားခဲ့သည့်ဖြစ်စဉ်တစ်ခု ဖြစ်ပွားခဲ့သည်။

အဆိုပါ အမျိုးသမီးငယ်ကို လူမှုကူညီရေးအဖွဲ့များက ရှာဖွေခဲ့ကြရာ ယနေ့ အောက်တိုဘာလ ၂၆ရက် နေ့လယ်ပိုင်းကရုပ်အလောင်းကို တွေ့ရှိခဲ့ကြောင်း စေတနာ ဘက်စုံပရဟိတ လူငယ်အသင်းက သိရသည်။

ယင်းအမျိုးသမီးငယ်မှာ အသက်၂၀နှစ်ခန့် အရွယ်ကုမ္ပဏီဝန်ထမ်းတစ်ဦး ဖြစ်ကြောင်း၊ တံတားပေါ်ကခုန်ချသည့်နေ့က ၎င်းတွင်ပါလာသည့် ပစ္စည်းများကို အမှတ်(၂) ကမာကြည်တံတား၏ လျှောက်လမ်းတွင်အမျိုးသမီးကိုင် စလင်းဘတ်အမဲရောင် ၁ လုံး၊ ပိုက်ဆံအချို့ ၊ မိတ်ဆက်လိပ်စာကတ်အချို့၊ တယ်လီဖုန်းနှင့် နားကြပ်ဗူးတို့ကို ချထားခဲ့ကြောင်း သိရသည်။

ပြီးခဲ့သည့် စက်တင်ဘာလ ၁၄ ရက်ကလည်း သင်္ဃန်းကျွန်းမြို့နယ်နှင့် သာကေတမြို့နယ်ကို ဆက်သွယ်ထားတဲ့ ကမာကြည်တံတားပေါ်က အမျိုးသား ၁ ဦးခုန်ချ သေဆုံးမှု ဖြစ်ပွားခဲ့သေးသည်။

#ymg/NN
#Yangon_Media_Group

#Local_News
Published _ 26 October 2022

မြန်မာတစ်နိုင်ငံလုံးရှိ လမ်းညွှန်း၊ လမ်းအမှတ်အသားနှင့်အချက်ပြများကို တစ်ပြေးညီသတ်မှတ်မည်ဖြစ်ကြောင်း အောက်တိုဘာလ ၂၅ ရက်က ပို့ဆောင်ရေးနှင့် ဆက်သွယ်ရေး ဝန်ကြီးဌာန အစည်းအဝေးမှတ်တမ်းများအရ သိရသည်။

လက်ရှိတွင် အချို့ဒေသများတွင် လမ်းညွှန်းလမ်းအမှတ်အသားဆိုင်ရာ ကွဲလွဲအသုံးပြုမှုများ ရှိနေကြောင်း၊ လူကူးမျဉ်းကျားနှင့် လမ်းပိုင်းများတွင် အသုံးပြုနေသော ဆေးရောင်များမှာ သတ်မှတ်ညွှန်ကြားချက်နှင့်အညီ တစ်ပြေးညီဖြစ်ရန်လိုအပ်နေကာ လမ်းဘေးပလက်ဖောင်းများမှာလည်း လူသွားရန်လုံလောက်သည့် သတ်မှတ်အကျယ်အဝန်းရှိရန် လိုအပ်နေကြောင်းလည်း သိရသည်။

ယင်းကြောင့်မြန်မာတစ်နိုင်ငံလုံးရှိ လမ်းညွှန်းများ၊ လမ်းအမှတ်အသားများနှင့် အချက်ပြများကို တစ်ပြေးညီဖြစ်စေရန် တိုင်းဒေသကြီး၊ပြည်နယ် ကြီးကြပ်ရေးအဖွဲ့များက လုပ်ဆောင်ကြမည် ဖြစ်ကြောင်းလည်း သိရသည်။

"လမ်းတွေကို မြေပြင်မှာလက်တွေ့ အကောင်အထည်ဖော် စီမံခန့်ခွဲနေကြတဲ့ ဌာနတွေ အပါအဝင် သက်ဆိုင်ရာ မြို့တော်စည်ပင် သာယာရေး ကော်မတီတွေကပဲ လမ်းညွှန်း၊ လမ်းအမှတ်အသားနဲ့ အချက်ပြသတ်မှတ်ချက်တွေကို ရေးဆွဲပြီး စိုက်ထူကြမှာ ဖြစ်ပါတယ်"ဟု YCDC တာဝန်ရှိသူက ပြောသည်။

မြန်မာနိုင်ငံတွင် မော်တော်ယာဉ်ဆိုင်ရာ ကြီးကြပ်ထိန်းသိမ်းမှုများ ဆောင်ရွက်နိုင်ရန် ယာဉ်အန္တရာယ်ကင်းရှင်းရေးနှင့် မော်တော်ယာဉ်စီမံခန့်ခွဲမှု ဥပဒေ (၂၀၂၀) ကို ၂၀၂၀ ပြည့်နှစ် မေလ ၂၆ ရက်တွင်လည်းကောင်း၊ ယာဉ်အန္တရာယ် ကင်းရှင်းရေးနှင့် မော်တော်ယာဉ်စီမံခန့်ခွဲမှု နည်းဥပဒေများကို ၂၀၂၂ ခုနှစ် ဇန်နဝါရီလ ၁၉ ရက်တွင်လည်းကောင်း၊ လမ်းညွှန်းများ၊ လမ်းအမှတ်အသားများနှင့် အချက်ပြများဆိုင်ရာ ညွှန်ကြားချက်ကို ၂၀၂၂ ခုနှစ် ဇန်နဝါရီလ ၂၁ ရက်တွင်လည်းကောင်း ပြဋ္ဌာန်းထုတ်ပြန်ဆောင်ရွက်ခဲ့ပြီး ဖြစ်ကြောင်းလည်း သိရသည်။

မြန်မာနိုင်ငံအနေဖြင့် 1968 Vienna Convention on Road Traffic နှင့် Road Signs & Signals သို့ အဖွဲ့ဝင်နိုင်ငံအဖြစ် ဝင်ရောက်ခဲ့ပြီးဖြစ်၍ လက်ရှိထုတ်ပြန် ကျင့်သုံးလျက်ရှိသော လမ်းညွှန်းများ၊ လမ်းအမှတ်အသားများနှင့် အချက်ပြများမှာလည်း Vienna Convention ၏ ပြဋ္ဌာန်းချက်များနှင့် ညီညွတ်ပြီးဖြစ်ကြောင်း သိရသည်။

ယခုအခါ အမျိုးသား ယာဉ်အန္တရာယ်၊ လမ်းအန္တရာယ်ကင်းရှင်းရေးကောင်စီ (National Road Safety Council- NRSC) အနေဖြင့် National Road Safety Action Plan (2021-2030) ကို အကောင်အထည်ဖော် ဆောင်ရွက်လျက်ရှိရာ ယင်း Action Plan တွင်လည်း လမ်းညွှန်း၊ လမ်းအမှတ်အသား၊ အချက်ပြနှင့်သက်ဆိုင်သည့် လုပ်ငန်းစဉ် (၂) ရပ်ပါဝင်ထားကြောင်း သိရသည်။

#ymg/mt
#Yangon_Media_Group

#Local_News
Published _ 26 October 2022

ရန်ကုန်တိုင်းဒေသကြီး၊ ရွှေပြည်သာမြို့နယ်၊ ၃ ရပ်ကွက်ရှိ ငွေလမ်းသွယ်ထိပ်တွင် ယနေ့ အောက်တိုဘာလ ၂၆ ရက် နံနက် ၉ နာရီကျော်ခန့်အချိန်က စက်ဘီးစီးနင်းလာသည့် အမျိုးသမီးတစ်ဦး YBS 65 နှင့် တိုက်မိ၍သေဆုံးခဲ့ကြောင်း လူမှုဘဝစောင့်ရှောက်ရေး ပရဟိတအသင်းက သိရသည်။

ဗိုလ်ချုပ်လမ်းမကြီးအတိုင်းမောင်းနှင်လာသည့် YBS 65 ခရီးသည်တင်ယာဉ်က ငွေလမ်းသွယ်ထိပ်အရောက်တွင် လမ်းအတွင်းမှ အသက်(၃၅)နှစ်အရွယ်ခန့်ရှိ အမျိုးသမီးတစ်ဦး စီးနင်းထွက်ခွာလာသည့် စက်ဘီးနှင့်တိုက်မိခဲ့ကြောင်း သိရှိရသည်။

"သတင်းရတာနဲ့ချက်ခြင်းသွားပြီး ကူညီပေးခဲ့ပါတယ် ဒဏ်ရာရသွားလို့ အင်းစိန်ဆေးရုံကို ပို့ပေးခဲ့တယ်၊ ဆေးကုနေရင်းသေဆုံးသွားတာပါ၊ ပထမကတော့ မိသားစုဝင်တွေနဲ့ အဆက်အသွယ်မရသေးပါဘူး၊ နေ့လယ်လောက်ကမှ အဆက်အသွယ်ရခဲ့တာ၊ နာရီပိုင်းလောက်ပဲရှိသေးပါတယ်"ဟု လူမှုဘဝစောင့်ရှောက်ရေးပရဟိတအသင်း၏ တာဝန်ရှိသူ ကိုဇော်ကြီးက ပြောသည်။

ယာဉ်တိုက်မှုဖြစ်ပွားခဲ့သော်လည်း အဆိုပါ YBS 65 မောင်းနှင်သူမှာ မထွက်ပြေးဘဲ ဒဏ်ရာရရှိသူအမျိုးသမီးအား လိုက်ပါကူညီဆောင်ရွက်ပေးခဲ့ကြောင်းလည်း သိရသည်။

"သေဆုံးသူအမျိုးသမီးကိုရော ၆၅ ယာဉ်မောင်းကိုရော ကျွန်တော်တိုအသင်းကားနဲ့ပဲ ဆေးရုံကိုပိုပေးခဲ့ပါတယ်။ ယာဉ်မောင်းကိုတော့ ယာဉ်အမှုစစ်တွေလက်ထဲ ထည့်ပေးခဲ့ပါတယ်"လို့ အဆိုပါအသင်း၏ တာဝန်ရှိသူကYMG ကို ပြောသည်။

#ymg/NN
#Yangon_Media_Group

#Local_News
PUBLISHED _26 OCTOBER 2022

နေပြည်တော်၊ တပ်ကုန်းမြို့နယ်၊ ရန်ကုန်- မန္တလေးအမြန်လမ်းမကြီး၊ မိုင်တိုင်အမှတ် (၂၂၈/၂)နှင့် (၂၂၈/၃) အကြားတွင် Express ခရီးသည်တင်ယာဉ်တစ်စီး အရှိန်မထိန်းနိုင်ဘဲ တိမ်းမှောက်မှုဖြစ်ပွားခဲ့သောကြောင့် (၃)ဦး သေဆုံးကာ (၁၄)ဦး ဒဏ်ရာ ရရှိခဲ့ကြကြောင်း သိရသည်။

ယနေ့ အောက်တိုဘာလ ၂၆ ရက် နံနက် ၆ နာရီခွဲ ခန့်အချိန်က ဖြစ်ပွားခဲ့ခြင်း ဖြစ်ပြီး အခင်းဖြစ်နေရာသို့ ပလွေးအမြန်လမ်းမီးသတ်စခန်း၊ ပန်းတင်အမြန်လမ်းမီးသတ်စခန်းနှင့် ဘုရားတောင်နယ်မြေမီးသတ်စခန်းတို့မှ သန္ဓေမီးသတ်တပ်ဖွဲ့ဝင်များဖြင့် ကယ်ဆယ်ရေးလုပ်ငန်းများ သွားရောက်ဆောင်ရွက်ခဲ့ကြကြောင်း သိရသည်။

ယာဉ်တိမ်းမှောက်မှုကြောင့် ယာဉ်ပေါ်ပါ ခရီးသည်(၁၇)ဦးတွင် အမျိုးသား(၃)ဦးသေဆုံးကာ အမျိုးသား (၁၀)ဦးနှင့် အမျိုးသမီး (၄)ဦး စုစုပေါင်း (၁၄)ဦး ထိခိုက်ဒဏ်ရာခဲ့ကြကြောင်း၊ ယင်းတို့ကို သုခဒါနပရဟိတအသင်း၊ မေတ္တာရေစင်တောင်ညိုပရဟိတအသင်းနှင့် အမြန်လမ်းမကြီးပိုင် သူနာတင်ယာဉ်တို့ဖြင့် နေပြည်တော်ကုတင်(၁၀၀၀)ဆေးရုံသို့ ပို့ဆောင်ထားကြောင်း သိရသည်။

#ymg/mt
#Yangon_Media_Group