Published 6 April 2023

လူ့ပတ်ဝန်းကျင် အသိုင်းအဝန်းအတွင်း သတင်းအချက်အလက်များသိရှိအောင် ပြုလုပ်ပေးနိုင်ခြင်းသည် ပြည်သူ့ဆက်ဆံရေးလုပ်ငန်း၏ အစိတ်အပိုင်းတစ်ခုပင်ဖြစ်တယ်လို့ နစက ဥက္ကဋ္ဌ ဗိုလ်ချူပ်မှူးကြီးမင်းအောင်လှိုင်က ပြောပါတယ်။

အဆိုပါအခမ်းအနားကို ဧပြီလ(၅)ရက်နေ့က နေပြည်တော်ကောင်စီနယ်မြေ ဥတ္တရသီရိမြို့နယ် တောင်ညိုမြို့ရှိ အမှတ်(၂) တပ်မတော်ရုပ်မြင်သံကြား ထုတ်လွှင့်ရေးတပ်၌ ကျင်းပပြုလုပ်ခဲ့ရာ နစက ဥက္ကဋ္ဌ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင် တက်ရောက်ချီးမြှင့်ပြီး ဂုဏ်ပြုအမှာစကား ပြောကြားခဲ့ရာမှာထည့်သွင်းပြောဆိုခဲ့တာဖြစ်တယ်လို့ သတင်းထုတ်ပြန်ချက်များအရသိရပါတယ်။

“လူ့ပတ်ဝန်းကျင် အသိုင်းအဝန်းအတွင်း သတင်းအချက်အလက်များသိရှိအောင် ပြုလုပ်ပေးနိုင်ခြင်းသည် ပြည်သူ့ဆက်ဆံရေးလုပ်ငန်း၏ အစိတ်အပိုင်းတစ်ခုပင်ဖြစ်ပါတယ်၊ ပြည်သူ့ဆက်ဆံရေးလုပ်ငန်းတွေဟာ အများပြည်သူနှင့်ဆက်ဆံရေး၊ မိမိပတ်ဝန်းကျင်အသိုက်အဝန်းနှင့် ဆက်ဆံရေးအစရှိသည့် ဆက်ဆံ ရေးအမျိုးမျိုးပါဝင်ကြပါတယ်။ အဲသလို ဆောင်ရွက်ရာမှာ  နိုင်ငံတကာ၌လည်း ပြည်သူ့ဆက်ဆံရေး လုပ်ငန်းနယ်ပယ်များအနက် မီဒီယာဆက်ဆံရေးကို တွင်ကျယ်စွာ အသုံးချဆောင်ရွက်နေသည်ကို တွေ့ရှိရပါတယ်။ နိုင်ငံတော်တည်ဆောက်ရေးတွင် အဓိကမဏ္ဍိုင်ကြီး ၃ ခုဖြစ်သည့် အုပ်ချုပ်ရေး၊ တရားစီရင်ရေး၊ ဥပဒေပြုရေးနှင့် စတုတ္ထမဏ္ဍိုင်ဖြစ်သည့် မီဒီယာတို့ ဟန်ချက်ညီရန် အရေးကြီးတယ်” လို့ ဗိုလ်ချူပ်မှူးကြီးက ပြောကြားခဲ့ပါတယ်။

မြဝတီရုပ်မြင်သံကြားဟာ နိုင်ငံတစ်ဝန်းရှိ မြို့ကြီး ၃၅ မြို့၌ ဒစ်ဂျစ်တယ်ရုပ်မြင်သံကြား ထပ်ဆင့်လွှင့်စက်ရုံများ တည်ဆောက်ပေးနိုင်ခဲ့ပြီး မြို့ပေါင်း ၁၄၅ မြို့၌ မြဝတီရုပ်မြင်သံကြား ဒစ်ဂျစ် တယ်လိုင်းများကို ကြည့်ရှုနိုင်ကြပြီဖြစ်တယ်လို့လည်း သတင်းထုတ်ပြန်ချက်မှာဖော်ပြထားပါတယ်။

အခမ်းအနားမှာ နစက ဥက္ကဋ္ဌက မြဝတီရုပ်မြင်သံကြားမှ အရာရှိ၊ စစ်သည်၊ ဝန်ထမ်းမိသားစုများအတွက် ဂုဏ်ပြုချီးမြှင့်ငွေများကိုပေးအပ်ရာ ပြည်သူ့ဆက်ဆံရေးနှင့် စိတ်ဓာတ်စစ်ဆင်ရေး ညွှန်ကြားရေးမှူးရုံး၊   ညွှန်ကြားရေးမှူးဗိုလ်ချူပ်ဇော်မင်းထွန်းနှင့် တာဝန်ရှိသူများက လက်ခံရယူခဲ့ကြတယ်လို့သိရှိရပါတယ်။

-ymg/knl

#မြဝတီရုပ်မြင်သံကြား ၂၈နှစ်မြောက်နှစ်ပတ်လည်

#ဗိုလ်ချူပ်မှူးကြီးမင်းအောင်လှိုင်

#YangonMediaGroup

#Local_News
Published_ 6 April 2023

ဘင်္ဂလားဒေ့ရှ်နိုင်ငံ၊ စားနပ်ရိက္ခာညွှန်ကြားမှုဦးစီးဌာနနှင့် မြန်မာနိုင်ငံဆန်စပါး အသင်းချုပ်တို့အကြား ဆန်ရောင်းဝယ်မှုဆိုင်ရာ သဘောတူစာချုပ်ကို ၂၀၂၂ မှ ၂၀၂၇ ခုနှစ် အထိ ငါးနှစ်စာချုပ် လက်မှတ်ရေးထိုးထားပြီးဖြစ်ကြောင်း သိရပါတယ်။

ဘင်္ဂလားဒေ့ရှ်နိုင်ငံသို့ တန်းမြင့်ဆန်များ အောင်မြင်စွာတင်ပို့ပြီးစီးခဲ့တဲ့ အထိမ်း အမှတ် ဂုဏ်ပြုညစာစားပွဲ အခမ်းအနားကို ဧပြီ ၅ ရက်က နေပြည်တော်ရှိ သင်္ဂဟဟိုတယ်၌ ကျင်းပစဉ် စီးပွားရေးနှင့်ကူးသန်းရောင်းဝယ်ရေးဝန်ကြီးဌာနဝန်ကြီး ဦးအောင်နိုင်ဦးက ပြောကြားခဲ့တာဖြစ်ပါတယ်။

မြန်မာနိုင်ငံနှင့် ဘင်္ဂလားဒေ့ရှ်နိုင်ငံတိုအကြား G to G စနစ်ဖြင့် ဆန်ကုန်သွယ်မှု ဆိုင်ရာ နားလည်မှုစာချွန်လွှာများကို လက်မှတ်ရေးထိုးခဲ့ပြီး မြန်မာနိုင်ငံမှ ဘင်္ဂလားဒေ့ရှ် နိုင်ငံသို့ ပထမအကြိမ် ဆန်တန်ချိန် တစ်သိန်းကို ၂၀၁၇ ခုနှစ်၊ ဒုတိယအကြိမ် ဆန်တန်ချိန် တစ်သိန်းကို ၂၀၂၁ခုနှစ်တွင်အောင်မြင်စွာတင်ပို့ရောင်းချ နိုင်ခဲ့ကာ ယခုတတိယအကြိမ် ဆန်တန်ချိန်နှစ်သိန်း တင်ပို့နိုင်ခဲ့ကြောင်း၊ နိုင်ငံတော်နှင့် ပုဂ္ဂလိကအသင်းအဖွဲများ ပူးပေါင်းဆောင်ရွက် နိုင်ခဲ့ခြင်းကြောင့်ဖြစ်တယ်လို့ ဝန်ကြီး ဦးအောင်နိုင်ဦးက ဆိုပါတယ်။

ဘင်္ဂလားဒေ့ရှ်နိုင်ငံသို့ G to G အစီအစဉ်ဖြင့် ဆန်တင်ပို့ရေး လုပ်ငန်းစဉ်အဆင့်ဆင့် အောင်မြင်စေရေးအတွက် နစကအနေဖြင့် ပိုကုန်ထောက်ပံ့ငွေအဖြစ် ယခင်နှစ်တွင် ငွေကျပ်ဘီလီယံ ၃၀ နှင့် ယခုနှစ်တွင် ငွေကျပ် ၇၉ ဘီလီယံကို ထောက်ပံ့ပေးနိုင်ခဲ့ကြောင်း သတင်းရရှိပါတယ်။
ygm_mnn
#Local_News #ဘင်္ဂလားဒေ့ရှ်နိုင်ငံ #သဘောတူစာချုပ် #လက်မှတ်ရေးထိုး
#YMG #Yangon_Media_Group

#Local_News
Published_ 6 April 2023

မြန်မာ-ဘင်္ဂလားဒေ့ရှ် နှစ်နိုင်ငံသဘောတူညီမှုဖြင့် Pilot Project အရ နေရပ် စွန့်ခွာသူများ ပြန်လည်စီစစ်လက်ခံရေးအတွက် ဘင်္ဂလားဒေ့ရှ်နိုင်ငံသို သွားရောက် စစ်ဆေးခဲ့သည့် မျက်မြင်တွေ့ရှိချက်များနှင့် ဆက်လက်ဆောင်ရွက်ရမည့်လုပ်ငန်းများ သုံးသပ်ညှိနှိုင်းအစည်းအဝေးကို ဧပြီ ၅ ရက်နံနက်ပိုင်းတွင် နယ်စပ်ရေးရာဝန်ကြီးဌာန၌ ပြုလုပ်ခဲ့ပါတယ်။

ဦးစွာ ကော်မတီဥက္ကဋ္ဌက ညှိနှိုင်းအစည်းအဝေး ကျင်းပပြုလုပ်ရခြင်း၏ ရည်ရွယ်ချက်မှာ ရှေ့ပြေးစမ်းသပ် စီမံကိန်းဖြင့် ပြန်လည်စီစစ်လက်ခံရန် လျာထားတဲ့ နေရပ်စွန့်ခွာသူများနှင့် ၎င်းတို့ရဲ့ ဆက်စပ်မိသားစုဝင်များကို ဘင်္ဂလားဒေ့ရှ်နိုင်ငံ၊ တက္ကနာ့ဖ်မြို့သို့ မျက်မြင်စစ်ဆေးရေးအဖွဲ သွားရောက်၍ မျက်မြင်စစ်ဆေးခဲ့တဲ့ တွေ့ရှိချက်များနှင့်စပ်လျဉ်းပြီး လူဝင်မှုကြီးကြပ်ရေးနှင့် နိုင်ငံသားစီစစ်ရေးလုပ်ငန်း ကော်မတီကပြုစုထားရှိသည့် အစီရင်ခံစာအပေါ် အကြံပြုသုံးသပ်ဆွေးနွေးဖို့ ပြောပါတယ်။

မျက်မြင်စစ်ဆေးရေးအဖွဲ၏ မျက်မြင်တွေ့ရှိချက်များအပေါ် မူတည်၍ ဆက်လက် ဆောင်ရွက်ရမည့် လုပ်ငန်းများ၊ နေရပ်စွန့်ခွာသူများကို ပြန်လည်လက်ခံနိုင်ရေးအတွက် ဆောင်ရွက်ထားရှိမှုများ၏ ဖြစ်ပေါ်တိုးတက်မှု နောက်ဆုံးအခြေအနေများကို ဝိုင်းဝန်းသုံးသပ် အကြံပြုဆွေးနွေးရန် တိုက်တွန်းပါတယ်။

ဒုတိယဥက္ကဋ္ဌများက ရခိုင်ပြည်နယ်မှ နေရပ်စွန့်ခွာသူများ ပြန်လည်စီစစ် လက်ခံ ရေး၊ ပြန်လည်နေရာချထားရေး၊ လူသားချင်းစာနာမှု အကူအညီအထောက်အပံ့ပေးရေး၊ ကုလသမဂ္ဂအဖွဲအစည်းများ၊ နိုင်ငံတကာအဖွဲ့ အစည်းများနှင့် ပူးပေါင်းဆောင်ရွက်နေမှု အခြေအနေများနှင့် ရှေ့ဆက်လက်ဆောင်ရွက်သွားမယ့် အစီအမံများကိုဆွေးနွေးပါတယ်။

လုပ်ငန်းကော်မတီ အတွင်းရေးမှူးက မျက်မြင်စစ်ဆေးရေးအဖွဲ၏ ဘင်္ဂလားဒေ့ရှ် နိုင်ငံသို မြေပြင်ဖြစ်ရပ်မှန်များကို သွားရောက် မျက်မြင်စစ်ဆေးခဲ့တဲ့ အစီရင်ခံစာနှင့် လုပ်ငန်းဆောင်ရွက်ခဲ့မှု၊ ကော်မတီဝင်များနှင့် တာဝန်ရှိသူများက မျက်မြင်စစ်ဆေးရေး အဖွဲ့၏ မျက်မြင်တွေ့ရှိချက်များ၊ Pilot Project အရ ပြန်လည်စီစစ်လက်ခံမည့် နေရပ်စွန့်ခွာသူများ ပြန်လည်လက်ခံနိုင်ရေးအတွက် ဆောင်ရွက်ထားတဲ့ ဖြစ်ပေါ်တိုးတက်မှုများကို ဆွေးနွေးခဲ့ကြပါတယ်။

အစည်းအဝေးသို့ ရခိုင်ပြည်နယ်တည်ငြိမ်အေးချမ်းရေးနှင့် ဖွံဖြိုးတိုးတက်ရေး ဆိုင်ရာလုပ်ငန်းများ ညှိနှိင်းပေါင်းစပ်ရေးကော်မတီဥက္ကဋ္ဌ ဒုတိယဗိုလ်ချုပ်ကြီး ထွန်းထွန်းနောင်၊ ဒုတိယဥက္ကဋ္ဌ (၁) ဝန်ကြီး ဦးကိုကိုလှိုင်၊ ဒုတိယဥက္ကဋ္ဌ(၂) ဝန်ကြီး ဒေါက်တာ သက်သက်ခိုင်၊ ကော်မတီဝင်များနှင့်တာဝန်ရှိသူများ တက်ရောက်ကြပြီး ဒုတိယဥက္ကဋ္ဌ (၃) ပြည်နယ်ဝန်ကြီးချုပ် ဦးထိန်လင်းနှင့် ပြည်နယ် လုံခြုံရေးနှင့်နယ်စပ်ရေးရာဝန်ကြီးတို့က Zoom Application ဖြင့် တက်ရောက်ခဲ့ကြပါတယ်။
ygm_mnn
#Local_News #နေရပ်စွန့်ခွာသူများ #ဘင်္ဂလားဒေ့ရှ်နိုင်ငံ #သုံးသပ်ညှိနှိုင်း
#YMG #Yangon_Media_Group

#Local_News
Published_ 6 April 2023

KBZ ဘဏ်၏ Core Banking စနစ်အဆင့်မြှင့်တင်ခြင်းကို ဧပြီလ(၇)ရက်မှ စတင်၍ ၄ရက်ခွဲ​ြကာလုပ်ဆောင်သွားမည်ဖြစ်ကြောင်း KBZ Pay မှထုတ်ပြန်ထားသည်။

KBZ Bank ၏ Core Banking စနစ်အဆင့်မြှင့်တင်ခြင်းကို ဧပြီလ(၇)ရက်၊ ည(၁၂)နာရီအချိန်ခန့်မှ ဧပြီလ(၁၂) ရက်၊ နံနက်(၁၁)နာရီ အချိန်အထိ ဆောင်ရွက်သွားမည်ဖြစ်၍KBZ Pay ၏ အခြားဝန်ဆောင်မှုများဖြစ်သည့် ငွေပေးချေခြင်း၊ ငွေလွှဲခြင်း၊ ဖုန်းငွေဖြည့်ခြင်း၊ အကောင့်ထဲမှငွေထုတ်ယူခြင်းတို့ကိုဆက်လက်အသုံးပြုနိုင်မည်ဖြစ် ကြောင်း သိရသည်။

သို့သော်လည်း KBZ Bank ၏ အွန်လိုင်းဘဏ် ဝန်ဆောင်မှုများ(iBanking နှင့် mBanking)၊ Debit နှင့် Credit Card ဝန်ဆောင်မှုများအပြင် အချို့သော ATM စက် များနှင့် KBZ Pay ဝန်ဆောင်မှုများကို အသုံးပြုနိုင်မည်မဟုတ်ကြောင်း ထုတ်ပြန်ချက်အရ သိရသည်။

အဆိုပါ အဆင့်မြှင့်တင်ခြင်းနှင့်ပတ်သက်ပြီး KBZ Bank ဝန်ထမ်းများအနေဖြင့် Customer များ၏ အချက်အလက် များကို ဆက်သွယ်တောင်းဆိုခြင်းများ ပြုလုပ်သွားမည်မဟုတ်ကြောင်းလည်း ပါရှိသည်။
#ymg/mt
#Local_News ##Core Bankingစနစ် #KBZ Pay အသိပေ
#YMG #Yangon_Media_Group

#Local_News
Published_ 6 April 2023

သင်္ကြန်ကာလနဲ့ သင်္ကြန်အလွန်ကာလအတွက် စက်သုံးဆီ အလုံအလောက် တင်သွင်းထားတယ်လို့ ထုတ်ပြန်ပေမယ့် ရန်ကုန်က စက်သုံးဆီအရောင်းဆိုင်တချို့မှာ စက်သုံးဆီ မရှိတဲ့အတွက် ကွန်ဒိုတွေ၊ ဟိုတယ်တွေနဲ့ စက်မှုဇုန်တွေ စက်သုံးဆီ ဝယ်မရတဲ့အခြေအနေ ကြုံတွေ့နေရတယ်လို့ သိရပါသည်။

သင်္ကြန်ကာလ စက်သုံးဆီလုံလောက်မှုရှိအောင် စင်ကာပူကတင်သွင်းလာတဲ့ စက်သုံးဆီတင် သင်္ဘောဟာ ဧပြီ ၄ရက်က သီလဝါဆိပ်ကမ်းရှိ စက်သုံးဆီ သိုလှောင်ကန်စခန်း Jetty များသို့ ဆိုက်ကပ်ရောက်ရှိလာတယ်လို့ နိုင်ငံပိုင်သတင်းစာကနေ ထုတ်ပြန်ထားသည်။

စက်သုံးဆီအလုံအလောက်ရှိတယ်လို့ ထုတ်ပြန်ပေမယ့် မြေပြင်မှာတော့ စက်သုံးဆီ ဝယ်မရတဲ့ အခက်အခဲအပြင် ဈေးနှုန်းကလည်းအနည်းငယ်စီ မြင့်တက်လာတယ်လို့ လုပ်ငန်းရှင်တွေနဲ့ မော်တော်ယာဉ်မောင်းနှင်သူတွေက ပြောသည်။

ယခုရက်ပိုင်း လျှပ်စစ်မီးရရှိချိန် အရင်ကထက် လျော့နည်းသွားတဲ့အတွက် လုပ်ငန်းအများစုက မီးစက်နဲ့ လည်ပတ်နေရလို့ စက်သုံးဆီလိုအပ်ချက်က များလာပြီး ဆီဈေးကလည်း ဧပြီလ ၃ ရက်နေ့မှာ အောက်တိန်း ၉၂ တစ်လီတာလျှင် ၂၁၀၅ ကျပ် ရှိရာမှ ဧပြီလ ၅ ရက်နေ့မှာ ၂၂၅၀ ကျပ်သို့ မြင့်တက်လာသလို ယနေ့ ဧပြီ ၆ရက်မှာ ၉၂ တစ်လီတာ ၂၂၆၀ ကျပ်ရောက်ရှိလာခဲ့သည်။

ymg/ppk
#Local_News #စက်သုံးဆီဈေး
#YMG #Yangon_Media_Group

#Local_News
Published-6 April 2023

ရှမ်းပြည်နယ်၊ မူဆယ်ခရိုင်၊ ကွတ်ခိုင်မြို့နယ် မိုင်တိုင်အမှတ်(၂၅၄/၆)နှင့်(၂၅၄/၇)ဂုန်းဆင်းတွင် ဖရဲသီးသယ်ဆောင်လာသည့်၁၂ဘီးယာဉ်တိမ်းမှောက်ပြီး ယာဉ်မောင်းအမျိုးသားမှာ ကားခေါင်းတွင်း ညပ်နေခဲ့ပြီး စိုးရိမ်ရဒဏ်ရာများရရှိခဲ့ကြောင်း မီးသတ်တပ်ဖွဲ့က သိရသည်။

ဧပြီ၆ရက် နံနက်၉နာရီ၂၀အချိန်ခန့်က ကွတ်ခိုင်မြို့နယ်၊ နမ့်ဖတ်ကာကျေးရွာအုပ်စု၊ ပန်ဂျလော့ရွာအနီး၊ မိုင်တိုင်အမှတ် ၂၅၄/၆)နှင့်၂၅၄/၇)ဂုန်းဆင်းတွင် ဖရဲသီးများသယ်ဆောင်လာသော ၁၂ဘီး အဖြူရောင်ယာဉ်သည် အရှိန်မထိန်းနိုင်ဘဲတိမ်းမှောက် မှုဖြစ်ပွားပြီး ယာဉ်မောင်းအမျိုးသား ကားခေါင်းအတွင်းညပ်နေခဲ့၍ ကွတ်ခိုင်မြို့နယ်မီးသတ်စခန်းနှင့်နမ့်ဖက်ကာနယ်မြေမီးသတ်စခန်းတို့မှ သန္ဓေမီးသတ်တပ်ဖွဲ့ဝင်များဖြင့် ရှာဖွေကယ်ဆယ်ရေးလုပ်ငန်းများ သွားရောက်ဆောင်ရွက်ခဲ့ကြောင်းသိရသည်။

ယင်းကဲ့သို့ဆောင်ရွက် မှုကြောင့် ကားခေါင်းခန်းတွင်ညပ်နေသော ယာဉ်မောင်းကျား(၁)ဦးထိခိုက်ဒဏ်ရာရ(စိုးရိမ်ရ)အား ၁၀ နာရီ ၂၅မိနစ် အချိန်တွင် ကယ်ထုတ်နိုင်ခဲ့ပြီး မြန်မာ့နှလုံးသားလူမှုကူညီရေးယာဉ်ဖြင့် မူဆယ်မြို့နယ်ပြည်သူဆေးရုံသို့ ပို့ဆောင်ပေးခဲ့ကြောင်းလည်း မီးသတ်တပ်ဖွဲ့မှသိရသည်။
#ymg/mt
#Local_News #ရှမ်းပြည်နယ်ကွတ်ခိုင် #၁၂ဘီးယာဉ်တိမ်းမှောက် #စိုးရိမ်ဒဏ်ရာရ #YMG#Yangon_Media_Group