#Local_News
Published_ 22 November 2023

(၅၂)ကြိမ်မြောက် မဟာမဲခေါင်ဒေသခွဲ ခရီးသွားလုပ်ငန်းအဖွဲ့အစည်းအဝေးနှင့် မဲခေါင်ခရီးသွား လုပ်ငန်းညှိနှိုင်းရေးရုံး ဘုတ်အဖွဲ့အစည်းအဝေးများကို နေပြည်တော်ရှိ မင်္ဂလာသီရိဟိုတယ်၌ မြန်မာနိုင်ငံက အိမ်ရှင်အဖြစ် Hybrid စနစ်ဖြင့် လက်ခံကျင်းပခဲ့ကြောင်း သိရပါတယ်။

အစည်းအဝေးတွင် မဟာမဲခေါင်ဒေသခွဲ မဟာဗျူဟာ ၂၀၃၀ တွင် ဖော်ပြထားသည့် စီးပွားရေး ပူးပေါင်းဆောင်ရွက်မှုနှင့် ဖွံ့ဖြိုးတိုးတက်ရေးပန်းတိုင်များ၌ ခရီးသွားလုပ်ငန်း ဖွံ့ဖြိုးတိုးတက်ရေးနှင့် ပူးပေါင်းဆောင်ရွက်မှုသည် အရေးကြီးသော အခန်းကဏ္ဍတစ်ခုအဖြစ် ပါဝင်ပါကြောင်း၊ ယင်းမဟာဗျူဟာသည် ရေရှည်တည်တံ့ခိုင်မြဲပြီး အားလုံးပါဝင်နိုင်သော ဖွံ့ဖြိုးတိုးတက်မှုကို မြှင့်တင်ရန်၊ အဖွဲ့ဝင်နိုင်ငံများအကြား ချိတ်ဆက်မှု တိုးမြှင့်ရန်နှင့် ပူးပေါင်းဆောင်ရွက်မှုကို အားကောင်းစေရန် ရည်ရွယ်ပါကြောင်းနှင့် ခရီးသွားလာရေးဝန်ကြီးဌာန ပြည်ထောင်စုဝန်ကြီး ဒေါက်တာ သက်သက်ခိုင်က ဆိုပါတယ်။

ယင်းအစည်းအဝေးတွင် အဖွဲ့ဝင်နိုင်ငံများအကြား ခရီးသွားကဏ္ဍဖွံ့ဖြိုးတိုးတက်မှုအခြေအနေများ၊ ဒစ်ဂျစ်တယ်ခရီးသွားလုပ်ငန်း၊ ခရီးစဉ်ဒေသများအကြောင်း၊ အခြေခံအဆောက်အအုံဖွံ့ဖြိုးတိုးတက်ရေးဆိုင်ရာကိစ္စရပ်များ၊ မဟာမဲခေါင်ခရီးသွားလုပ်ငန်း ကဏ္ဍ မဟာဗျူဟာ ၂၀၃၀ နှင့် ဆက်လက်ပူးပေါင်းဆောင်ရွက်သွားမည့် ကိစ္စရပ်များကို ဆွေးနွေးကြကြောင်း သတင်းရရှိပါတယ်။

#Local_News #ခရီးသွားလုပ်ငန်းအဖွဲ့အစည်းအဝေး #အိမ်ရှင်အဖြစ်လက်ခံကျင်းပ #Yangon_Times

#Local_News
Published_ 22 November 2023

ဓာတ်ပုံဝါသနာရှင်များအတွက် မြန်မာ့ဓါတ်ပုံမော် ကွန်းမှ စု‌ဆောင်းထားသည့်ဓာတ်ပုံများလေ့လာနိုင်မည့်The meet Myanmar Photo Archive  မြန်မာ့ဓါတ်ပုံမော်ကွန်းနှင့်တွေ့ဆုံနိုင်မည့်စကားဝိုင်းတစ်ခုကျင်းပသွားရန်ရှိကြောင်း Goethe -Institut Myanmar မှ သိရသည်။

ယင်းစကားဝိုင်းကို နိုဝင်ဘာလ ၂၅ ရက်တွင် ကမ္ဘာအေးဘုရားလမ်းနှင့်နတ်မောက်လမ်းထောင့်ရှိ Goethe-Institut Myanmar ပွဲခန်းမ၌ကျင်းပမည်ဖြစ်ပြီး ညနေ ၃း၃၀ မှ ၆း၀၀ ထိကျင်းပသွားမည်ဖြစ်သည်။

မြန်မာ့ဓါတ်ပုံမော်ကွန်းတွင် ခေတ်အဆက်ဆက် မြန်မာနိုင်ငံတစ်ဝန်း မှ ဓာတ်ပုံများစွာကို စုစည်းထားရှိပြီး ယခုအခါတွင် Goethe-Institut Myanmar နှင့်ပူးပေါင်းကာ အဆိုပါဓါတ်ပုံတွေကို လူအများဝင်ရောက်ကြည့်ရှုလေ့လာနိုင်ရန်၊ သမိုင်းနှင့် ပညာရေးဆိုင်ရာ ကိုးကားရာတွင် အသုံးပြုနိုင်ကြရန်နှင့် မြန်မာနိုင်ငံရှိ အမြင်အခြေပြု ဖန်တီးထားသည့် အနုပညာသမိုင်းကို ပိုမိုစိတ်ဝင်စားလာကြဖို့ ရည်ရွယ်ချက်များဖြင့် ပူးပေါင်းလုပ်ဆောင်ခြင်းဖြစ်သည်ဟုဆိုသည်။

ယင်းစကားဝိုင်းတွင် မကြာသေးမီက ပြုလုပ်ခဲ့သည့် မြန်မာ့ဓာတ်ပုံမော်ကွန်း ရဲ့ OPEN CALL တွင် ထောက်ပံ့ကြေးရရှိပြီး ဖန်တီးထားသည့် အနုပညာလက်ရာအချို့အကြောင်းကို ပြောပြသွားရန်ရှိကြောင်း၊ မြန်မာ့ဓါတ်ပုံမော်ကွန်းနှင့် တက်ရောက် လာသူများအချင်းချင်း ချိတ်ဆက်စကားပြောနိုင်ကြစေရန်လဲစီစဥ်ထားရှိထားကြောင်း၊ မြန်မာနိုင်ငံ ၏ အမြင်ပိုင်းဆိုင်ရာ အနုပညာသမိုင်းကြောင်းနှင့်ဆိုင်သည့် စုစည်းထားသောဓါတ်ပုံများ၊ ဇာတ်လမ်းများ နဲ့ စကားဝိုင်းတစ်ခုပြုလုပ်ဖို့စီစဥ်ထားကြောင်းလည်း သိရသည်။

#Local_News #ဓာတ်ပုံဝါသနာရှင် #မြန်မာ့ဓါတ်ပုံမော်ကွန်း #စကားဝိုင်းကျင်းပမည် #tthl #Yangon_Times

‘တန်ဆောင်တိုင်မှာတော့ ဟိုတယ်တွေမှာ ကြိုတင်ဘိုကင်ယူထားတဲ့သူတွေလည်းရှိနေတဲ့အတွက် ပြည်တွင်းပြည်ပခရီးသွားငါးသောင်း၊ ခြောက်သောင်းလောက်အထိဝင်နိုင်မယ်လို့ခန့်မှန်းထားတယ်။ ရွှေစည်းခုံဘုရားပွဲတော်ကိုလာရောက်မယ့်သူတွေရှိတယ်’
(ဟိုတယ်နှင့်ခရီးသွားပုဂံတာဝန်ခံ၊ဒုတိယညွှန်ကြားရေးမှူး ဦးဝင်းအောင်)
#Local_News
Published_ 22 November 2023
#ပုဂံဘုရားဖူး #ရွှေစည်းခုံဘုရားပွဲတော်
#tthl #Yangon_Times

#Local_News
Published_ 22 November 2023

မြန်မာနိုင်ငံရှိ ထိုင်းတက္ကသိုလ်ကျောင်းသားဟောင်းများအသင်းမှ ဦးစီး၍ ယခုနှစ်ထိုင်းတက္ကသိုလ်ပေါင်းစုံ ပညာရေးပြပွဲ Thailand Education Fair(Myanmar)ကို ရန်ကုန်မြို့တွင် ကျင်းပမည်ဖြစ်ကြောင်း သိရသည်။

ယင်းကို ဒီဇင်ဘာလ ၃ ရက် နံနက် ၉နာရီမှ ညနေ ၄ နာရီထိ ရန်ကုန်မြို့၊ အလံပြဘုရားလမ်းရှိ ParkRoyal ဟိုတယ်တွင် ကျင်းပသွားမည်ဖြစ်ကြောင်း၊ ယင်းမှာ (၆)ကြိမ်မြောက်ထိုင်းတက္ကသိုလ်ပေါင်းစုံပညာရေးပြပွဲလည်းဖြစ်ကြောင်း သိရသည်။

“မြန်မာပြည်က ကျောင်းသား၊ ကျောင်းသူတွေအနေနဲ့ တစ်နေရာတည်းမှာ ထိုင်းတက္ကသိုလ်တွေကို လေ့လာနိုင်မှာဖြစ်ပါတယ်။ ပြပွဲမှာဘာသာရပ်ဆိုင်ရာ ပညာသင်ဆုတွေကိုလည်း လာရောက်လေ့လာနိုင်မှာဖြစ်ပါတယ်”ဟု ထိုင်းတက္ကသိုလ်ဘွဲ့ရ မြန်မာကျောင်းသားများအသင်း အတွင်းရေးမှူး ဒေါ်ဝင်းမြသွေးက ပြောသည်။

အဆိုပါ ထိုင်းတက္ကသိုလ်ပေါင်းစုံပညာရေးပြပွဲတွင် ထိုင်းနိုင်ငံရှိ Harbour Space ၊ University of the Thai Chamber of Commerce(UTCC)၊ Assumption University ၊ Dhurakij Pundit University(DPU)၊ Mahidol University International College(MUIC) ၊ Raffles International College Bangkok(RIC)၊ Panyapiwat Institute of Management,International College(PIM)၊ Krirk University၊ Metharath University ၊ TGGS(Thai-German Graduate School of Engineering )၊ AIHM (Asian Institute of Hospitality Management)၊ London University at Bangkok Center(LUBC) စသည့် တက္ကသိုလ်များမှ တိုက်ရိုက်ဆွေးနွေးမှုများ ပြုလုပ်ပေးမည်ဖြစ်ကြောင်းလည်း သိရသည်။

#Local_News #ထိုင်းတက္ကသိုလ်ပေါင်းစုံ #ပညာရေးပြပွဲ #Yangon _Times/PP

လတ်တလောဖြစ်နေတဲ့ တိုက်ပွဲကြောင့် လမ်းပန်းဆက်သွယ်ရေးတွေ ပြတ်တောက်နေတဲ့ အတွက် ပြည်ပကနေ သစ်သီးတင်သွင်းတာ နည်းသလို ဒေသအတွင်း လမ်းပန်းဆက်သွယ်ရေး ကြန့်ကြာတာတွေရှိတဲ့အတွက် ရန်ကုန်သစ်သီးဈေးကွက်ကုန်အဝင်နည်းပြီး ဈေးမြင့်လာတယ်လို့ သစ်သီးပွဲရုံတွေထံက သိရပါတယ်။
#Local_News
Published_ 22 November 2023
#သစ်သီးဈေးကွက် #လမ်းပန်းဆက်သွယ်ရေးကြန့်ကြာ
#YGN/LW #Yangon_Times

#Local_News
Published 22 November 2023

တောင်ငူခရိုင်အတွင်းရှိ တိုက်ပွဲရှောင်၈၀၀ ကျော် ‌စားနပ်ရိက္ခာလိုအပ်နေကြောင်း ပရဟိတလူမှုကူညီရေးအသင်းများမှ သိရသည်။

ပြီးခဲ့သည့်ရက်ပိုင်းအတွင်းက တောင်ငူမြို့အရှေ့ဘက်ကမ်း လေးမိုင်အထက်ရှိ တိုက်ပွဲကြောင့် စစ်ရှောင်ပြည်သူများမှာ တောင်ငူမြို့ရှိ မြတ်စောညီနောင်စေတီ၏ နောင်တော်စေတီဝန်း၊ ညီတော်စေတီဝန်း၊ ကုသိနာရုံစေတီဝန်း၊ ရွှေမင်းဝံရိပ်သာ၊ရွှေဘုံသာ၊ ငါးထပ်ကြီးဘုရားဝန်းတို့တွင်လက်ရှိအချိန်အထိ ခိုလှုံနေကြရကြောင်း ရွှေမင်းဝင် အရေးပေါ်ကယ်ဆယ်ရေးနှင့်လူမှုကူညီရေးပရဟိတအသင်း၏ ဦးဆောင်နာယကဆရာတော်က မိန့်ကြားသည်။

'ဒါကဒီသုံး‌လေးငါးရက်အတွင်းမှာဖြစ်တဲ့ နေရာတွေက စစ်ဘေးရှောင်တွေပါ၊ ၈၀၀ကျော်လောက်ရှိတာပေါ့၊ နေရာတွေခွဲပြီးချထားပေးတယ်၊ လိုအပ်တာတော့အစုံပဲ၊ အစားအသောက်ကအရေးကြီးဆုံးပါ၊ အစားအစာ၊ ရေသန့်တို့ပေါ့၊ ဉီးဇင်းတို့ဆိုထမင်းဟင်းချက်ပြီး မြတ်‌စောညီနောင် ဘုရားဘက်ကို သွားပို့တာခုနှစ်နပ်ရှိပြီ'ဟု  ဆရာတော်က ဆက်လက်မိန့်ကြားသည်။

အဆိုပါ တိုက်ပွဲရှောင်ပြည်သူများသည် တောင်ငူမြို့အရှေ့ဘက်ကမ်းလေးမိုင်အထက်ရှိ တောတန်းကုန်းရွာ၊ အာလူးကုန်း၊ နဂါးမောက်၊ သပြေလှ၊ ခြောက်မိုင်၊ ကျောက်ပုထိုးရွာများရှိ ဒေသခံပြည်သူများဖြစ်ကြောင်း၊ ယင်းတိုက်ပွဲရှောင်များအား နီးစပ်ရာစေတီ၊ ဘုန်းကြီးကျောင်းများတွင် နေရာချပေးထားပြီး သက်ကြီးနာမကျန်းသူများ၊ မသန်စွမ်းအချို့ပါရှိသောကြောင့် လိုအပ်သည့်  အစားအသောက်ဆေးဝါးများကို  ဒေသတွင်းရှိ ပရဟိတအသင်းများနှင့် ချိတ်ဆက်လှူဒါန်းကူညီမှုများပြုလုပ်ပေးနေကြောင်း၊ တိုက်ပွဲရှောင်များအနေဖြင့် စားသောက်ရေး၊ အဝတ်အစား၊  ဆေးဝါးလိုအပ်ချက်များလည်းရှိနေကြောင်း သိရသည်။

'ဒါကတော့ ခုလက်ရှိရောက်လာတဲ့တိုက်ပွဲရှောင်တွေပါ၊ ဦးဇင်းတို့ဆီမှာရောက်နေတဲ့တိုက်ပွဲရှောင်တွေကတော့တစ်နှစ်နီးပါးရှိပြီ၊ မပြန်ရသေးဘူး'ဟု ဆရာတော်က ဆိုသည်။

တောင်ငူခရိုင်အတွင်း၌ ပြီးခဲ့သည့်တစ်နှစ်နီးပါးက ဖြစ်ပွားခဲ့သည့် ထိ‌တွေ့တိုက်ပွဲများကြောင့် ကနဦးတိုက်ပွဲရှောင်ဦးရေ ငါးထောင်ကျော်‌ခြောက်ထောင်နီးပါးဆက်လက်ရှိနေကြောင်း သိရသည်။

အဆိုပါကနဦးတိုက်ပွဲရှောင်များမှာလည်း လက်ရှိအချိန်အထိ ရွှေမင်းဝံ ၌ ၁၅၀ဦး၊ ကြာနီကန်၌၄၀၀ဦး၊ ရှင်ပေါလု၌၁၆၀၀ ဦးနှင့် အာသောကမိဘမဲ့ဂေဟာများ အပါအဝင် စုစုပေါင်းဦးရေ ၆၀၀၀ခန့်ရှိကာ ၄င်းတို့အတွက်လည်းလိုအပ်ချက်များရှိနေကြောင်း သိရသည်။

#Local_News #တောင်ငူခရိုင် #စားနပ်ရိက္ခာလိုအပ်နေ #YMG/ NN #Yangon_Times