မကြာသေးမီက ပြည်ထောင်စုသမ္မတမြန်မာနိုင်ငံတော် နိုင်ငံတော်သမ္မတ ဦးမင်းအောင်လှိုင်၏ ဗီယက်နမ် ဆိုရှယ်လစ်သမ္မတနိုင်ငံသို့ သွားရောက်ခဲ့သည့် တရားဝင်ခရီးစဉ်သည် မြန်မာ-ဗီယက်နမ် နှစ်နိုင်ငံ ဆက်ဆံရေးတွင် စာမျက်နှာသစ်တစ်ရပ် ဖွင့်လှစ်နိုင်ခြင်း၏ ပြယုဂ်ဖြစ်သည်။ ဤခရီးစဉ်သည် သမိုင်း အစဉ်အလာကြီးမားသည့် ချစ်ကြည်ရင်းနှီးမှုကို အခြေခံကာ အနာဂတ်ကာလအတွက် ခိုင်မာသော နိုင်ငံရေးယုံကြည်မှုအပြင် စီးပွားရေးနှင့် နည်းပညာစင်္ကြံများကို ပိုမိုကျယ်ပြန့်လာစေရန် မဟာဗျူဟာ မြောက် လမ်းစဖော်ပေးလိုက်ခြင်းဖြစ်ကြောင်း သုံးသပ်ရမည်ဖြစ်သည်။ 

သမိုင်းအစဉ်အလာနှင့် ခိုင်မာသည့် နိုင်ငံရေးယုံကြည်မှု

မြန်မာနှင့် ဗီယက်နမ်နိုင်ငံတို့သည် လွတ်လပ်ရေးကြိုးပမ်းမှု သမိုင်းကြောင်းများ တူညီကြပြီး အခက်အခဲများစွာကို အတူတကွ ဖြတ်သန်းခဲ့ကြသည့် နိုင်ငံများဖြစ်သည်။ 

၁၉၅၄ ခုနှစ်တွင် မြန်မာနိုင်ငံ ဝန်ကြီးချုပ် ဦးနုသည် ဗီယက်နမ်သို့ လာရောက်ခဲ့သည်။  ၁၉၅၈ ခုနှစ် ဖေဖော်ဝါရီလတွင် ဗီယက်နမ်ဥက္ကဋ္ဌ ဟိုချီမင်းသည် မြန်မာနိုင်ငံသို့ လာရောက်ခဲ့ပြီး ရန်ကုန်တက္ကသိုလ်က ၎င်းကို ဥပဒေဆိုင်ရာ ဂုဏ်ထူးဆောင်ပါရဂူဘွဲ့ ချီးမြှင့်နိုင်ခဲ့သည်အထိ နှစ်နိုင်ငံချစ်ကြည်ရေး အခြေခံ  အုတ်မြစ် ခိုင်မာခဲ့သည်။ 

လက်ရှိတွင် နှစ်နိုင်ငံ သံတမန်ဆက်ဆံမှုသည် နှစ် (၅၀) ပြည့် ရွှေရတုတိုင်ခဲ့ပြီဖြစ်ကာ ၂၀၁၇ ခုနှစ်က တည်ထောင်ခဲ့သည့် ဘက်စုံပူးပေါင်းဆောင်ရွက်မှု မိတ်ဖက်ဆက်ဆံရေး (Comprehensive Cooperative Partnership) သည်လည်း ၂၀၂၇ ခုနှစ်တွင် (၁၀) နှစ် ပြည့်မြောက်တော့မည်ဖြစ်သည်။ 

ယခုခရီးစဉ်အတွင်း ခေါင်းဆောင်များ၏ ပြောကြားချက်များသည် နှစ်နိုင်ငံအကြား နိုင်ငံရေးယုံကြည်မှုကို ပိုမိုပီပြင်ခိုင်မာစေခဲ့သည်။ ဗီယက်နမ်သမ္မတ မစ္စတာ တိုလန်းက "အဆွေတော်သမ္မတကြီး၏ ယခုခရီးစဉ်သည် နှစ်နိုင်ငံချစ်ကြည်ရင်းနှီးမှု၊ ဘက်စုံပူးပေါင်းဆောင်ရွက်မှုနှင့် မိတ်ဖက်ဆက်ဆံရေးကို ပိုမိုခိုင်မာစေမည့် ခရီးစဉ်တစ်ခုဖြစ်ပြီး ရှေ့လာမည့်ကာလများအတွင်း ဗီယက်နမ်-မြန်မာ ဆက်ဆံရေးကို ပိုမိုနက်ရှိုင်းခိုင်မာပြီး ထိထိရောက်ရောက် ဖွံ့ဖြိုးတိုးတက်စေရန် လက်တွေ့ကျသော အကျိုး ရလာဒ်များစွာကို ဖော်ဆောင်ပေးနိုင်မည်ဖြစ်ပါကြောင်း" ဟု ပြောကြားခဲ့သည်။ 

ဗီယက်နမ်ဝန်ကြီးချုပ် မစ္စတာ လေမင်ဟုန်ကလည်း "အဆွေတော် သမ္မတကြီး၏ ယခုခရီးစဉ်သည် နှစ်နိုင်ငံအကြား ချစ်ကြည်ရင်းနှီးမှုနှင့် ပူးပေါင်းဆောင်ရွက်မှုများကို ပိုမိုတိုးမြှင့်ခိုင်မာစေမည်ဟု ယုံကြည်ပါကြောင်း" ထည့်သွင်းပြောကြားခဲ့သည်။ 

မြန်မာနိုင်ငံတော်သမ္မတကလည်း "ဗီယက်နမ်နိုင်ငံအနေဖြင့် စစ်ပွဲဒဏ်နှင့် အရေးယူပိတ်ဆို့ ကန့်သတ် မှုများကို ဆယ်စုနှစ်ပေါင်းများစွာ ကြုံတွေ့ခဲ့ရသည့်ကြားမှ ယခုကဲ့သို့ ဘက်ပေါင်းစုံ ဖွံ့ဖြိုးတိုးတက်  လာသည့် နိုင်ငံတော်တစ်ခုကို တည်ဆောက်နိုင်ခဲ့မှုအပေါ် ဗီယက်နမ်နိုင်ငံ၏ နိုင်ငံ့ခေါင်းဆောင် အဆက်ဆက်ကို လေးစားဂုဏ်ယူပါကြောင်း" ပြန်လည်ပြောကြားခဲ့သည်။ ဤပြောကြားချက်များသည် တစ်နိုင်ငံ၏ ခက်ခဲသော ဖြတ်သန်းမှုနှင့် ကြိုးပမ်းအောင်မြင်မှုများကို အခြားတစ်နိုင်ငံက အပြန်အလှန် အသိအမှတ်ပြုသည့် ခိုင်မာသော နိုင်ငံရေးယုံကြည်မှုကို ပြသနေခြင်းဖြစ်သည်။ 

ပိုမိုကျယ်ပြန့်လာမည့် နည်းပညာစင်္ကြံနှင့် စက်မှုပူးပေါင်းဆောင်ရွက်မှု

ခိုင်မာသည့် နိုင်ငံရေးယုံကြည်မှုအပေါ် အခြေခံ၍ နှစ်နိုင်ငံစီးပွားရေးနှင့် နည်းပညာပူးပေါင်းဆောင် ရွက်မှုများသည် ပိုမိုကျယ်ပြန့်လာခဲ့သည်။ ထို့ပြင် မြန်မာနိုင်ငံအနေဖြင့် ဗီယက်နမ်နိုင်ငံမှ နှစ်ပေါင်း ၄၀ ခန့် အကောင်အထည်ဖော်ခဲ့သည့် "ဒွိုင်မွိုင်း" (Doi Moi) စီးပွားရေးပြုပြင်ပြောင်းလဲမှု အတွေ့အကြုံ  များကို မျှဝေပေးရန်လည်း တောင်းဆိုထားရာ ဤသည်မှာ မြန်မာ့စီးပွားရေး ပြုပြင်ပြောင်းလဲမှုအတွက် မဟာဗျူဟာမြောက် ခြေလှမ်းတစ်ရပ်ဖြစ်သည်။ 

နည်းပညာနှင့် စက်မှုကဏ္ဍတွင်လည်း အလားအလာကောင်းများကို တွေ့မြင်ရသည်။

🔳၂၀၁၈ ခုနှစ်တွင် စတင်ခဲ့သည့် Mytel ဆက်သွယ်ရေးလုပ်ငန်းသည် နှစ်နိုင်ငံ ရင်းနှီးမြှုပ်နှံမှုနှင့် နည်းပညာပူးပေါင်းဆောင်ရွက်မှု၏ စံနမူနာကောင်းဖြစ်ပြီး ယင်းအမည်ကို နိုင်ငံတော်သမ္မတကိုယ်တိုင် ရွေးချယ်ပေးအပ်ခဲ့ခြင်းဖြစ်သည်။ 

🔳မြန်မာနိုင်ငံအနေဖြင့် ရတနာပုံဆိုက်ဘာစီးတီးအပါအဝင် နည်းပညာအထူးဇုန်များတွင် Viettel မှ လာရောက်ရင်းနှီးမြှုပ်နှံပြီး ဒီဂျစ်တယ်နှင့် နည်းပညာဆိုင်ရာပစ္စည်းများ ထုတ်လုပ်ရန် ဖိတ်ခေါ်ထား သည်။ 

🔳ထို့အပြင် ဧရိယာစတုရန်းမီတာ ၅၀၀,၀၀၀ ကျော်ကျယ်ဝန်းပြီး ၂၁ လအတွင်း အပြီးတည်ဆောက်  နိုင်ခဲ့သည့် Vinfast လျှပ်စစ်မော်တော်ယာဉ်ထုတ်လုပ်ရေးစက်ရုံသို့ သွားရောက်လေ့လာခဲ့ခြင်းက အနာဂတ်မော်တော်ယာဉ်နှင့် အဆင့်မြင့်စက်မှုထုတ်လုပ်ရေးကဏ္ဍတွင် ပူးပေါင်းဆောင်ရွက်မှုများ ကျယ်ပြန့်လာနိုင်ကြောင်း ညွှန်ပြနေသည်။ 

မဟာဗျူဟာမြောက် စီးပွားရေးစင်္ကြံလမ်းများ ချိတ်ဆက်ခြင်း

ကုန်သွယ်မှုနှင့် အခြေခံအဆောက်အအုံ ချိတ်ဆက်မှုတွင် မြန်မာနှင့် ဗီယက်နမ်တို့သည် ဒေသတွင်း စီးပွားရေးစင်္ကြံလမ်းများကို အသုံးချရန် အလေးထားလာကြသည်။

🔳မြန်မာနိုင်ငံရှိ သီလဝါစီးပွားရေးဇုန်သည် မြန်မာ (မြဝတီ) - ထိုင်း - လာအို - ဗီယက်နမ် (ဒါနန်း) ချိတ်ဆက်မည့် အရှေ့-အနောက် စီးပွားရေးစင်္ကြံ (East-West Economic Corridor) နှင့် ချိတ်ဆက်သွားမည်ဖြစ်သည်။ 

🔳ထားဝယ်ရေနက်ဆိပ်ကမ်းသည်လည်း တောင်ပိုင်းစီးပွားရေးစင်္ကြံ (Southern Economic Corridor) ဖြစ်သည့် မြန်မာ (ထားဝယ်) - ဗန်ကောက် - လွန်ပရာဘမ် - ဗီယက်နမ် (ဒါနန်း) လမ်းကြောင်းနှင့် ချိတ်ဆက်နိုင်မည်ဖြစ်သည်။ 

🔳ထို့အပြင် မြန်မာ-အိန္ဒိယ-ထိုင်း သုံးနိုင်ငံ အဝေးပြေးလမ်းမကြီးစီမံကိန်းကို အကောင်အထည်  ဖော်လျက်ရှိပြီး ယင်းလမ်းနှင့်ချိတ်ဆက်ကာ ဗီယက်နမ်မှသည် တောင်အာရှဈေးကွက်သို့လည်းကောင်း၊ မြန်မာမှသည် လာအို၊ ဗီယက်နမ်တို့မှတစ်ဆင့် အရှေ့အာရှဈေးကွက်သို့လည်းကောင်း အပြန်အလှန် ဝင်ရောက်နိုင်မည်ဖြစ်သည်။ 

နိဂုံး

အချုပ်အားဖြင့် သုံးသပ်ရလျှင် မြန်မာ-ဗီယက်နမ် ဆက်ဆံရေးသည် သမိုင်းဝင် ချစ်ကြည်ရင်းနှီးမှုမှသည် လက်တွေ့ကျသော မဟာဗျူဟာမြောက် မိတ်ဖက်ဆက်ဆံရေးအဆင့်သို့ ကူးပြောင်းရောက်ရှိ လာပြီဖြစ် သည်။ နိုင်ငံတော်သမ္မတက “တစ်ဦးတည်းဆိုပါက လျင်မြန်စွာသွားနိုင်သော်လည်း အတူတကွပူးပေါင်းမှ  သာလျှင် ဝေးဝေးသို့ ရောက်နိုင်သည်” ဟု စီးပွားရေးဖိုရမ်တွင် ပြောကြားခဲ့သည့်အတိုင်း ကမ္ဘာလုံး ဆိုင်ရာ စီးပွားရေးမရေရာမှုများကို ရင်ဆိုင်ရာတွင် နှစ်နိုင်ငံပူးပေါင်းဆောင်ရွက်မှုသည် အရေးပါလှသည်။ ခိုင်မာသော နိုင်ငံရေးယုံကြည်မှုကို အုတ်မြစ်ချလျက် ဒစ်ဂျစ်တယ်နှင့် နည်းပညာစင်္ကြံများ၊ အရှေ့-အနောက်နှင့် တောင်ပိုင်း စီးပွားရေးစင်္ကြံလမ်းများကို ပေါင်းကူးချိတ်ဆက်ခြင်းဖြင့် မြန်မာ-ဗီယက်နမ် နှစ်နိုင်ငံ၏ အနာဂတ်သည် ပိုမိုကျယ်ပြန့်တောက်ပလာမည်ဖြစ်ကြောင်းသုံးသပ်ရေးသားရပါသည်။