၁၅ ဒီဇင်ဘာ ၂၀၂၃

တပ်မတော်(လေ)ဖွဲ့စည်းတည်ထောင်မှု (၇၆)နှစ်မြောက် နှစ်ပတ်လည်နေ့ အထိမ်းအမှတ် လေယာဉ်များတပ်တော်ဝင်ခြင်း အခမ်းအနားကိုဒီဇင်ဘာ ၁၅ ရက် နံနက်ပိုင်းတွင် နေပြည်တော်လေတပ်စခန်း၌ နစကဥက္ကဋ္ဌ တပ်မတော်  ကာကွယ်ရေးဦးစီးချုပ်  ဗိုလ်ချုပ်မှူးကြီး မင်းအောင်လှိုင်တက်ရောက်ပြီး Su-30 SME တိုက်လေယာဉ် ၂ စီးကို တပ်တော်ဝင်၍ တပ်မတော်(လေ)သို့ လွှဲပြောင်းပေးခဲ့ကြောင်းသိရှိရပါတယ်။

“ယခု ၁၄ ကြိမ် မြောက် တပ်တော်ဝင်အခမ်းအနားတွင် စတုတ္ထမျိုးဆက်လွန် လေကြောင်းအရေးသာမှု လေယာဉ်အမျိုးအစား  ဖြစ်သည့် Su-30 SME တိုက်လေယာဉ် ၂ စီးကို တပ်တော်ဝင်ပြီး တပ်မတော်(လေ)သို့ လွှဲပြောင်းပေးခြင်းဟာ တပ်မတော်(လေ)ရှိ အရာရှိ/ စစ်သည်အားလုံး၏ စိတ်ဓာတ်အင်အားကို မြှင့်တင်ပေးရာရောက်သကဲ့သို့ တပ်မတော်အတွက် တိုက် စွမ်းအား၊ တိုက်စွမ်းရည် တိုးတက်မြင့်မားအောင် အထောက်အကူပြုစေမည်ဖြစ်တယ်” လို့ ဗိုလ်ချုပ်မှူးကြီးက အခမ်း အနားမှာ ထည့်သွင်းပြောကြားခဲ့ပါတယ်လို့ နစကရဲ့ သတင်းထုတ်ပြန်ချက်မှာဖော်ပြထားပါတယ်။

ယနေ့တပ်တော်ဝင်မည့် Su-30 SME တိုက်လေယာဉ်များသည် စတုတ္ထမျိုး ဆက်လွန် တိုက်လေယာဉ်များဖြစ်သည့်အတွက် ယခုကဲ့သို့ တပ်တော်ဝင်နိုင်ခြင်းသည် တပ်မတော်(လေ)၏ လေကြောင်းစွမ်းအားကို တိုးမြှင့်ပေးရာ ရောက်သကဲ့သို့ တပ်မတော်(လေ)၏ အနာဂတ်ရည်မှန်းချက်ဖြစ်သည့် လေကြောင်းစွမ်းအားနှင့် ပတ်သက်သည့် လုပ်ငန်းတာဝန်အများစုကို ထိရောက်စွာ စွမ်းဆောင်နိုင်သော မဟာ ဗျူဟာမြောက် စွမ်းရည်အချို့ကို ပိုင်ဆိုင်သည့် နည်းဗျူဟာမြောက် လေတပ်အဖြစ် ကူးပြောင်းရပ်တည်နိုင်ရန် ခြေလှမ်းသစ်တစ်ရပ်ဖြစ်တယ်လို့လည်း တပ်မတော်ကာကွယ်ရေးဦးစီးချုပ်ဗိုလ်ချုပ်မှူးကြီးက ပြောဆိုပါတယ်။

စစ်နည်းဗျူဟာ ကျွမ်းကျင်မှု၊ လေကြောင်းအကဲသာမှုနှင့် အီလက်ထရောနစ် နည်းပညာသာလွန်မှု၊ လက်နက်ခဲယမ်းများ ခေတ်မီကောင်းမွန်မှု၊ ထိရောက်တိကျမှုတို့ သည် စစ်ပွဲ၏အနိုင်အရှုံးကို အဓိက အဆုံးအဖြတ်ပေးသည့်အတွက် တပ်မတော် (လေ)အနေဖြင့် နည်းပညာတိုးတက်လာမှုနှင့်အတူ ပြောင်းလဲကျင့်သုံးလာသည့် စစ်နည်းဗျူဟာများနှင့် စစ်လက်နက်ပစ္စည်း များကို ခေတ်နှင့်အညီ ကျွမ်းကျင်စွာ အသုံးချနိုင်ရန် စဉ်ဆက်မပြတ်လေ့ကျင့်ရေးကို အလေးအနက်ထား လုပ်ဆောင်သွား ကြရမည်ဖြစ်ကြောင်းလည်း ဗိုလ်ချုပ်မှူးကြီးက ဆက်လက်ပြောဆိုပါတယ်။

“တပ်မတော်(လေ)အနေဖြင့်သမိုင်းကြောင်းတစ်လျှောက် ပိုင်နက်ဝေဟင် စိုးမိုးရေးနှင့်လေကြောင်းရန်ကာကွယ်ရေးတာဝန် များ သာမကပြည်တွင်းသောင်းကျန်းမှုနှိမ်နင်းရေးစစ်ဆင်ရေးများတွင်ခေတ်အဆက်ဆက်တာဝန်ကျေပွန်အောင် ထမ်းဆောင် နိုင်ခဲ့သည်ကို မြင်တွေ့ရမည်ဖြစ်ပြီး ပြည်ပကျူးကျော်မှု၊ မူးယစ်ဆေးဝါး တိုက်ဖျက်ရေး ကဏ္ဍများတွင် တပ်မတော်(ကြည်း)၊ တပ်မတော်(ရေ)၊ ပြည်သူလူထုနှင့်အတူလက်တွဲပြီး စွမ်းစွမ်းတမံ တိုက်ပွဲဝင်နိုင်ခဲ့တယ်” လို့လည်း ဗိုလ်ချုပ်မှူးကြီးက ပြောပါတယ်။

နယ်မြေဒေသများတည်ငြိမ်အေးချမ်းပြီး ပြည်သူများ၏ လူနေမှုဘဝ အေးချမ်းစွာရှိနေရန်အတွက် တပ်မတော်က လက်နက်ကိုင်သောင်းကျန်းသူများနှင့် PDF အမည်ခံအကြမ်းဖက်သမားများကို တရားသောစစ်ပွဲများဆင်နွှဲလျက် ချေမှုန်း နှိမ်နင်းရာတွင် တပ်မတော်(လေ)အနေဖြင့် ကြည်း၊ ရေ၊ လက်ရုံးတပ်ဖွဲ့များနှင့် ပူးပေါင်း၍ စစ်ဆင်ရေးများတွင် လေကြောင်းစွမ်းအားကို ထိထိရောက်ရောက် အသုံးချကာ တစ်တပ်တစ်အား ပါဝင်ဆင်နွှဲနေသည်ကို ဂုဏ်ယူဖွယ်တွေ့မြင်ရတယ်လို့လည်း ဗိုလ်ချုပ်မှူးကြီးကလက်ရှိအခြေအနေများကိုပြောဆိုပါတယ်။

ထို့အပြင် အရှေ့မြောက် ပိုင်းစစ်ဌာနချုပ်နယ်မြေအတွင်း ပြီးခဲ့သည့် အောက်တိုဘာလအတွင်း ဖြစ်ပွားခဲ့သည့် တိုက်ပွဲများနှင့် အခြားတိုင်းစစ်ဌာနချုပ်နယ်မြေများ၌ ဖြစ်ပွားလျက်ရှိ သည့် စစ်ဆင်ရေးများတွင် လေတပ်စစ်သည်တော်များအနေဖြင့် တပ်မတော်(လေ) တွင် ရှိသည့် လေယာဉ်/ရဟတ်ယာဉ်များကို စွမ်းအားပြည့်အသုံးပြုပြီး တိုက်ပွဲ အောင်နိုင်ရေးအတွက် စွန့်လွှတ်စွန့်စားစိတ်ဖြင့်သက်စွန့်ဆံဖျား ကြိုးပမ်းတိုက်ပွဲဝင်ခဲ့ကြလို့ တိုက်ပွဲဝင်စစ်သည်များအားလုံးကို ချီးကျူးဂုဏ်ပြု ပါကြောင်းလည်း ဗိုလ်ချုပ်မှူးကြီးက ရှမ်း(မြောက်)တိုက်ပွဲများအကြောင်း ထည့်သွင်းပြောဆိုသွားကြောင်း သတင်းထုတ်ပြန် ချက်အရသိရပါတယ်။

အဲဒီနောက်စစ်ဦးစီးအရာရှိချုပ်(လေ) ဒုတိယဗိုလ်ချုပ်ကြီး ဇော်ဝင်းမြင့်က လေယာဉ်များအား တပ်တော်ဝင်အဖြစ် ကြေညာခဲ့ပါတယ်။

ဆက်လက်၍နစကဥက္ကဌ တပ်မတော်ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်ထံ ကာကွယ်ရေးဦးစီးချုပ် (လေ) ဗိုလ်ချုပ်ကြီး ထွန်းအောင်က လေယာဉ်များ တပ်တော်ဝင်အထိမ်းအမှတ် လေယာဉ် ပုံစံငယ်ကို ဂါရဝပြု ပေးအပ်ခဲ့ပါတယ်။

ထို့နောက် စတုတ္ထမျိုးဆက်လွန် ဘက်စုံသုံး အကြီးစားတိုက်လေယာဉ်ဖြစ် သည့် Su–30 SME တိုက်လေယာဉ် ၁ စီးဖြင့် ပျံသန်းအလေးပြုပြီး ၎င်းတိုက်လေယာဉ်၏ အဆင့်မြင့် လှုပ်ရှားစစ်ကစားမှု (High Performance Maneuver) များအား စွမ်းရည်ပြ ပျံသန်းပြသခဲ့ပါတယ်။

အခမ်းအနားသို့်ဗိုလ်ချုပ်မှူးကြီး မင်းအောင်လှိုင်နှင့် ဇနီး ဒေါ်ကြူကြူလှနှင့်အတူ နစကဒုတိယဥက္ကဋ္ဌ ဒုတိယတပ်မတော် ကာကွယ်ရေး ဦးစီးချုပ် ဒုတိယဗိုလ်ချုပ်မှူးကြီး စိုးဝင်းနှင့် ဇနီး ဒေါ်သန်းသန်းနွယ်၊ ကာကွယ်ရေး ဦးစီးချုပ်(ရေ)ဗိုလ်ချုပ်ကြီး မိုးအောင်နှင့်ဇနီး၊ ကာကွယ်ရေးဦးစီးချုပ်(လေ) ဗိုလ်ချုပ်ကြီး ထွန်းအောင်နှင့်ဇနီး၊ ပြည်ထောင်စုအဆင့်ပုဂ္ဂိုလ်များနှင့် ဇနီးများ၊ ကာကွယ်ရေး ဦးစီးချုပ်ရုံးမှ တပ်မတော်အရာရှိကြီးများနှင့် ဇနီးများ၊ နေပြည်တော်တိုင်းစစ်ဌာနချုပ် တိုင်းမှူး၊ လေတပ်စခန်းဌာနချုပ်မှူးများ၊ တပ်မတော်(လေ)မှ အရာရှိ၊ စစ်သည်များနှင့် တာဝန်ရှိသူများ တက်ရောက်ခဲ့ကြတယ်လို့ သတင်းထုတ်ပြန်ချက်မှာဖော်ပြထားပါတယ်။

-ymg/knl

၁၅ ဒီဇင်ဘာ ၂၀၂၃

ရှမ်းပြည်နယ်(မြောက်ပိုင်း) ပဋိပက္ခများနှင့်ပတ်သက်၍ တရုတ်နိုင်ငံမှ နယ်မြေငြိမ်းချမ်းရေး၊ လုံခြုံရေးအတွက် ကူညီနေမှုများအပေါ် ဝေဖန်ချက်အမျိုးမျိုးဖြင့် ထုတ်လွှင့်ပြောဆိုနေမှုများ

၁၅-၁၂-၂၀၂၃ ရက်နေ့ ရှမ်းပြည်နယ်(မြောက်ပိုင်း) နမ့်ဆန်နှင့် စစ်ကိုင်းတိုင်း ဒေသကြီး ထီးချိုင့်တို့တွင် ထိတွေ့တိုက်ပွဲဖြစ်ပွားမှုအခြေအနေများ

ငြိမ်းချမ်းရေးနှင့်ပတ်သက်ပြီး ဆက်လက်ဆောင်ရွက်ရမည့်လုပ်ငန်းများ

နှင့် ပတ်သက်၍ နစကသတင်းထုတ်ပြန်ရေးအဖွဲ့ ခေါင်းဆောင် ဗိုလ်ချုပ် ဇော်မင်းထွန်း၏ ပြောကြားချက်အပြည့်အစုံကို

ပြန်လည်ဖော်ပြပေးအပ်ပါတယ်။

-ymg/knl

#Daily_News
Published 15 December 2023

၁။ တက္ကသိုလ်ဝင်စာမေးပွဲ(ဆယ်တန်း) လာမည့်မတ်လ ၁၁ရက်တွင် စတင်ကျင်းပမည် ၊ ပြင်ပဖြေဆိုသူနှင့် ပုဂ္ဂလိကကျောင်းများမှ ဖြေဆိုသူများစာရင်း ကောက်ခံနေဟုဆို

၂။ စားဝတ်နေရေး အခက်ခဲတွေကြောင့် စစ်ရှောင်စခန်းမှ အမျိုးသားအများစု ပြည်ပကို အဆင်ပြေသလို သွားရောက် အလုပ်လုပ်ကိုင်မှု များလာဟုဆို

၃။ ထိုင်း၊ တရုတ်နှင့် ဗီယက်နမ်နိုင်ငံများသို့ ပုဂ္ဂလိက လုပ်ငန်းအချင်းချင်း B to B စနစ်ဖြင့် မြန်မာ့ပြောင်းတန်ချိန်ခုနှစ်သိန်း ဧပြီလနောက်ဆုံး တင်ပို့သွားမည်

၄။ ဗီယက်နမ်သို့ တရုတ်သမ္မတရှီကျင့်ဖင်လာရောက်ကာ နှစ်နိုင်ငံဆက်ဆံရေး တိုးတက်ရေးအတွက် ထိပ်သီးခေါင်းဆောင်များနှင့် တွေ့ဆုံဆွေးနွေး ... အစရှိတဲ့ သတင်းတွေကို တင်ဆက်ပေးသွားမှာ ဖြစ်ပါတယ်။

#Yangon_Times #Daily_News #YMG_News #Yangon_Media_Group

Published_ 15 December 2023

အမေရိကန်-အာဆီယံစင်တာ ဖွင့်ပွဲ အခမ်းအနားကို ဒီဇင်ဘာ ၁၄ ရက်တွင် အရီဇိုနားတက္ကသိုလ်၊ ဝါရှင်တန်ဒီစီ ကျောင်းခွဲ၌ ကျင်းပခဲ့ရာ ယင်းအခမ်းအနားသို့ မြန်မာသံရုံး၊ ဝါရှင်တန်မြို့မှ သံရုံးယာယီတာဝန်ခံ/သံအမတ် ဦးသက်ဝင်းနှင့် တာဝန်ရှိသူ များသည် အခြားအာဆီယံသံရုံးများမှ သံအမတ်ကြီးများ၊ သံရုံးယာယီတာဝန်ခံများနှင့် အတူ တက်ရောက်ခဲ့ကြပါတယ်။

အဆိုပါအခမ်းအနားတွင် အမေရိကန် နိုင်ငံခြားရေးဝန်ကြီးဌာန၊ အရှေ့အာရှနှင့် ပစိဖိတ်ဌာန၊ နိုင်ငံစုံရေးရာရုံးမှ ညွှန်ကြားရေးမှူး Ms. Holly Lindquist Thomas က အဖွင့်အမှာစကား ပြောကြားကာ အမေရိကန်-အာဆီယံ ဆွေးနွေးဖက်ဆက်ဆံရေး တာဝန်ယူသည့် အင်ဒိုနီးရှားနိုင်ငံ၏ သံရုံး ယာယီတာဝန်ခံ Mr. Ida Bagus Made Bimantara၊ အရီဇိုနားတက္ကသိုလ်မှ ဒုတိယဥက္ကဋ္ဌ Dr. Christopher B. Howard ၊ အထက်လွှတ်တော် နိုင်ငံခြားဆက်ဆံရေး ကော်မတီဝင် Ms. Tammy Duckworth ၊ တက္ကဆက်ပြည်နယ် အောက်လွှတ်တော်အမတ် Mr. Joaquin Castro ၊ အမေရိကန် နိုင်ငံခြားရေး ဝန်ကြီးဌာနမှ လက်ထောက်ဒုတိယဝန်ကြီး Ms. Elizabeth M. Allen တို့က အမှာစကားများပြောကြား ခဲ့ကြပါတယ်။

ထိုသို့ အမှာစကားများပြောကြားကြရာတွင် ၂၀၂၃ ခုနှစ်၊ အာဆီယံ-အမေရိကန် ထိပ်သီးအစည်းအဝေး၌ အမေရိကန်ဒုတိယသမ္မတ Mrs. Kamala Harris သည် အစိုးရ-ပုဂ္ဂလိက မိတ်ဖက်ဆက်ဆံရေးကို အားပေးသည့် အနေဖြင့် ဝါရှင်တန်ဒီစီ၌ အမေရိကန်-အာဆီယံ စင်တာတစ်ခု တည်ထောင်သွားမယ်လို့ ကြေညာခဲ့ပါတယ်။

ယင်းစင်တာသည် အစိုးရ-ပုဂ္ဂလိက ပူးပေါင်း ဆောင်ရွက်မှုအဖြစ် အရှေ့တောင် အာရှနိုင်ငံများနှင့် အမေရိကန် နိုင်ငံတို့အကြား ထိတွေ့ဆက်ဆံမှုတွင် အချက်အချာ ကျသည့်ကဏ္ဍမှ ဆောင်ရွက်သွားမှာဖြစ်ပြီး အရှေ့တောင်အာရှနှင့် အမေရိကန်အကြား၏ စီးပွားရေးနှင့် ယဉ်ကျေးမှုဆိုင်ရာ ထိတွေ့ဆက်ဆံမှုကို ပိုမိုတိုးမြှင့်စေရန်၊ အဓိက ပုဂ္ဂလိကကဏ္ဍ အဖွဲ့အစည်းများအကြား ချိတ်ဆက်နိုင်ရေး တို့အတွက် ဆောင်ရွက်သွား မယ်လို့ ဆိုပါတယ်။

ယခု ပူးတွဲဆောင်ရွက်တဲ့ အရီဇိုနားတက္ကသိုလ်သည် အာဆီယံဒေသတွင်း နိုင်ငံ အချို့နှင့် အစောပိုင်းကာလ ကတည်းက အစိုးရ-ပုဂ္ဂလိက ပူးပေါင်းဆောင်ရွက်မှုပုံစံ စီမံကိန်းများကို အမေရိကန်နိုင်ငံခြားရေးဝန်ကြီးဌာန၊ အပြည်ပြည်ဆိုင်ရာ ဖွံ့ဖြိုးတိုးတက် ရေး အမေရိကန် အေဂျင်စီနှင့် အမေရိကန် စက်မှုလုပ်ငန်းများနှင့် မိတ်ဖက်ပြု ချိတ်ဆက် ဆောင်ရွက်လျက်ရှိသည့်တက္ကသိုလ်ဖြစ်ပါတယ်။
ymg_mnn
#Published_ 15 December 2023
#YMG #Yangon_Times #YMG_News
#Yangon_Media_Group

Published 15 December 2023

ဗိုလ်တထောင်စေတီတော်ကြီးတွင် နှစ်စဉ်ကျင်းပမြဲဖြစ်သော ဗုဒ္ဓ၊ဓမ္မ၊သံဃပူဇာပွဲကြီးကို (၆)ရက်တိုင်တိုင် ကျင်းပသွားရန် ရှိကြောင်း ဗိုလ်တထောင်စေတီတော်ဂေါပကအဖွဲ့မှသိရသည်။

ဗုဒ္ဓပူဇာပွဲအဖြစ် ဒီဇင်ဘာလ၂၇ရက် နံနက်(၅)နာရီတွင်ကျင်းပသွားမည်ဖြစ်ပြီး ဗိုလ်တထောင်ကျိုက်ဒေးအပ် ဆံတော်ဦးစေတီတော်မြတ်ကြီးအား ဆရာတော်သံဃာတော်အပါး(၉၀)ဖြင့် ဗုဒ္ဓါဘိသေကအနေကဇာတင်တင် ပူဇော်ခြင်း၊ပန်း၊ရေချမ်း၊ဆီမီး၊အမွှေးနံသာ၊ဆွမ်း၊သစ်သီးများကပ်လှူသွားမည်ဖြစ်သည်ဟုဆိုသည်။

ဓမ္မပူဇာပွဲအဖြစ် ဒီဇင်ဘာလ၂၆ရက်မှ ၃၀ရက်အထိကျင်းပသွားမည်ဖြစ်ပြီး ဓမ္မပူဇာအဖြစ် အသံမစဲမဟာပဌာန်း တော်ကြီးရွတ်ဖတ်ပူဇော်သွားမည်ဖြစ်သည်။

သံဃာပူဇာပွဲအဖြစ် ဒီဇင်ဘာလ၃၁ရက်တွင်ကျင်းပမည်ဖြစ်ပြီး မြတ်စွာဘုရားရှင်ကိုအမှူးထား၍ မဟနဆရာတော် များ၊ တိပိဋကဆရာတော်များ၊ ဩဝါဒစရိယဆရာတော်၊သံဃာတော်များ(၁၀၈)ပါးနှင့်သီလရှင်(၃၆)ပါးတို့ကို လှူဖွယ်ပစ္စည်းများဖြင့် အကြိမ်(၅၀)မြောက် ဆွမ်းဆန်စိမ်းလောင်းလှူပွဲတွင် ပါဝင်လှူဒါန်းနိုင်ကြောင်း သိရသည်။
Yangon-Times/tthl
#Local_News
#Published 15 December 2023
#Yangon_Times #Daily_News #YMG_News #Yangon_Media_Group

Published-15 December 2023

လွယ်ဂျယ်မှဗန်းမော်သို့သယ်ယူပို့ဆောင်ခ (၁၂)ဘီးယာဉ်(၁)စီးလျှင် ကျပ် ၈၀၀,၀၀၀မှ ၁,၂၀၀,၀၀၀ အထိဈေးနှုန်းရှိနေ ပြီးတရုတ်မှဆေးဝါးနှင့်လူသုံးကုန်များ အဓိကတင်သွင်းမှုများ ပြုလုပ်‌နေကြောင်း ကုန်သည်များထံမှသိရသည်။

အဆိုပါသယ်ယူပို့ဆောင်ခများမှာ ကုန်အမျိုးအစားပေါ်မူတည်၍ဈေးနှုန်းများကွာခြားလေ့ရှိပြီး ကုန်ပွတစ်စီးလျှင် (၈၀၀,၀၀၀)ကျပ်၊ကုန်စုံတစ်စီးလျှင် (၁၀၀၀၀၀၀)ကျပ် ဝန်းကျင်နှင့်ကုန်ကျစ်တစ်စီးလျှင် (၁,၂၀၀,၀၀၀)ကျပ်အထိဈေးနှုန်းအသီးသီးရှိနေကြောင်းသိရသည်။

' ‌ဈေးကကုန်အမျိုးအစားအလိုက်ကွာတယ်၊ အရင်ကျွန်တော်တို့မူဆယ်ကတင်ပို့တင်သွင်းနေပါ တယ်ပေါ့၊အခုလွယ်ဂျယ်ကနေအဓိကကုန်သွယ်နေပါတယ်၊ကုန်ကတော့ဟိုဘက်ဒီဘက်အစုံသွားပါတယ်၊ ' ဟု သွင်းကုန်လုပ်ငန်းရှင်တစ်ဦးကပြောသည်။

လတ်တလောတွင် သွင်းကုန်ပစ္စည်းများအား လွယ်ဂျယ်- စိန်လုံ-မိုးမောက်(ကျောက်စခန်း)-ဗန်းမော်လမ်းကြောင်းအတိုင်းကုန်သွယ်မှုပြုလုပ်လျက် ရှိပြီး ယခုအပတ်အတွင်း သွင်းကုန်ပိုင်းတွင်ဆေးဝါးပစ္စည်း (၅၉၈၈၀၀)U ၊ တန်ဖိုး (ဝ.၀၉၈) ဒေါ်လာသန်း၊ ဂျပ်ဖာ (၂၂.၀၀) တန်၊ တန်ဖိုး (ဝ.၀၀၉) ဒေါလာသန်း၊ ထွန်စက် (၂) U ၊ တန်ဖိုး (ဝ.၀၁၈) ဒေါ်လာသန်း၊ ချည် (၂၈.၆၀) တန်၊ တန်ဖိုး (ဝ.၀၁၇) ဒေါ်လာသန်း၊ တစ်သျှူးလိပ် (၃.၅၀) တန်၊ တန်ဖိုး (ဝ.၀၀၇) ဒေါ်လာသန်း၊ မြက်ခင်းတု (၈.၀၀) တန်၊ တန်ဖိုး (ဝ.၀၀၅) ဒေါ်လာသန်း၊ ပတ္တာကြိုး (၄၃.၀၀) တန်၊ တန်ဖိုး (ဝ.၀၅၃) ဒေါ်လာသန်း၊ စောင် (၂၃.၀၀) တန်၊ တန်ဖိုး (ဝ.၀၁၂) ဒေါ်လာသန်း၊ ပိုက် (၁၆.၅၀) တန်၊ တန်ဖိုး (ဝ.၀၂၃) ဒေါ်လာသန်း၊ နန်းကြိုးခွေ(၁၆.၀၀) တန်၊ တန်ဖိုး (ဝ.၀၁၁) ဒေါ်လာသန်း၊ ဖော့ (၁၀.၀၀) တန်၊ တန်ဖိုး (ဝ.၀၀၇) ဒေါ်လာသန်း၊ ကုန်စုံ (၁၉၁.၈၀) တန်၊ (၂၈၅၀၉) U၊ (၁၀၀၀) PR၊ တန်ဖိုး (ဝ.၁၅၅) ဒေါ်လာသန်း တင်သွင်းနိုင်ခဲ့ကြောင်းစီးပွားရေးနှင့်ကူးသန်းရောင်းဝယ်ရေးဝန်ကြီးဌာနမှသိရသည်။

အဆိုပါ သွင်းကုန်ပစ္စည်းဈေးနှုန်းများအနေဖြင့် နှစ်ဘီးထွန်စက်တစ်စီးလျှင် (၆၀၀)ဒေါ်လာ၊ စက္ကူလိပ် တစ်တန်လျှင် (၃၅၀) ဒေါ်လာ၊ ပီနံအိတ် တစ်တန်လျှင် (၈၀၀) ဒေါ်လာ၊ ပိတ်လိပ်တစ်တန်လျှင် (၅၇၀)ဒေါ်လာ၊ ချည်ခင် တစ်တန်လျှင် (၆၆၇)ဒေါ်လာရှိကြောင်းသိရသည်။

ပို့ကုန်များအနေဖြင့်ဆန်နှင့်ဆန်ကွဲအပါအဝင်လယ်ယာထွက်ကုန်များအားအဓိကတင်ပို့ခဲ့ကာသယ်ဆောင်စရတ်အဖြစ် တစ်ပိသာလျှင်ကျပ်၁၅၀အထိဈေးနှုန်းရှိနေကြောင်းသိရသည်။
Yangon-Times/NN
#Local_News
#Published 15 December 2023
#Yangon_Times #Daily_News #YMG_News #Yangon_Media_Group