#Local_News
Published 9 September 2026

■ လက်ရှိနိုင်ငံစွမ်းအင်အခြေအနေများ တည်ငြိမ်စပြုလာပြီဖြစ်သည့်အတွက် မော်တော်ယာဉ်များကို စုံရက်၊ မရက်ခွဲခြား၍ မောင်းနှင်သုံးစွဲရသည့် စုံ/မ စနစ်အား ယနေ့ စက်တင်ဘာ ၉ ရက်မှစတင်၍ ပယ်ဖျက်လိုက်ပြီဖြစ်ကြောင်း နိုင်ငံတော်သမ္မတရုံး၏ ပြောရေးဆိုခွင့်ရှိသူ ဒေါက်တာခိုင်ခိုင်စိုးက ပြောကြားသည်။

■ လက်ရှိဖြစ်ပေါ်နေသည့် ကမ္ဘာ့နိုင်ငံရေးအပြောင်းအလဲများနှင့် အရှေ့အလယ်ပိုင်းဒေသတွင်း စစ်ရေးပဋိပက္ခများကြောင့် နိုင်ငံ၏ စွမ်းအင်လုံခြုံရေးနှင့် စက်သုံးဆီချွေတာရေးအတွက် မော်တော်ယာဉ်သုံးစွဲမှုကို လျှော့ချနိုင်ရန် ရည်ရွယ်၍ ၂၀၂၆ ခုနှစ် မတ်လ ၇ ရက်မှစတင်ကာ စုံ/မ စနစ်ကို ကျင့်သုံးခဲ့ခြင်းဖြစ်သည်။

■ အဆိုပါစနစ် ကျင့်သုံးခြင်းဖြင့် စွမ်းအင်ချွေတာနိုင်ခဲ့သော်လည်း ပြည်သူများ၏ သွားလာရေးအခက်အခဲများ ဖြစ်ပေါ်ခဲ့သည်ကိုလည်း နားလည်ကြောင်းနှင့် စုံ/မ စနစ်အပေါ် ပြည်သူများ ပူးပေါင်းပါဝင်ပေးခဲ့သည့်အတွက် ကျေးဇူးတင်ရှိကြောင်း ဒေါက်တာခိုင်ခိုင်စိုးက ပြောသည်။

■ လက်ရှိတွင် နိုင်ငံ၏ စွမ်းအင်အခြေအနေများ တည်ငြိမ်စပြုလာပြီဖြစ်သည့်အတွက် နိုင်ငံတော်အစိုးရအနေဖြင့် ပြည်သူလူထု၏ အကျိုးစီးပွားကို ဦးထိပ်ထား၍ မော်တော်ယာဉ်များ စုံရက်၊ မရက်ခွဲခြားမောင်းနှင်ရသည့် စနစ်ကို ပယ်ဖျက်ပေးလိုက်ခြင်းဖြစ်ကြောင်း သိရသည်။

■ သို့သော် နိုင်ငံ၏ စွမ်းအင်လုံခြုံရေးနှင့် အများပြည်သူအကျိုးစီးပွားအတွက် မော်တော်ယာဉ်များ စက်သုံးဆီဖြည့်တင်းရာတွင် QR Code ဖြင့် စုံ/မ ခွဲခြားသည့် စနစ်ကိုမူ ဆက်လက်ထားရှိမည်ဖြစ်ကြောင်း သိရသည်။

#YMG/SW #Yangon_Times

#Local_News
Published 09 September 2026
 
■ မန္တလေးပြည်သူ့ဆေးရုံကြီး နှလုံးနှင့်သွေးကြောခွဲစိတ်ကုဌာနနှင့်တရုတ်ပြည်သူ့သမ္မတနိုင်ငံ ရှန်ဟိုင်းမြို့ Yida Hospital, Shanghai University Medical School မှ နှလုံးနှင့်သွေးကြောခွဲစိတ်ပါမောက္ခတို့ နှလုံးသွေးကြောခွဲစိတ်ကုသမှုများ ပူးပေါင်းဆောင်ရွက်ခဲ့ကြောင်းသိရသည်။

■ ရှန်ဟိုင်းမြို့ Yida Hospital, Shanghai University Medical School မှ Dr. Feng Wan (Chairman and Professor, Department of Cardiovascular Surgery Center) ဦးဆောင်သော အဖွဲ့ဝင်ငါးဦးပါအဖွဲ့သည် မန္တလေးပြည်သူ့ဆေးရုံကြီး နှလုံးနှင့်သွေးကြောခွဲစိတ်ကုဌာနနှင့်ပူးပေါင်း၍ ဩဂုတ် ၂၄ ရက်မှ ၂၇ရက်အထိ နှလုံးသွေးကြောပိတ်လူနာခြောက်ဦးကို နှလုံးစက်အသုံးမပြုဘဲ နှလုံးသွေးကြောအစားထိုးဖြတ်ကျော် ဆက်သွယ်ခြင်း (Off-Pump Coronary Artery Bypass Surgery) ဖြင့် ခွဲစိတ်ကုသပေးခဲ့ခြင်းဖြစ်သည်။

■ ၎င်းလူနာများအား မန္တလေးပြည်သူ့ဆေးရုံကြီး၊ နှလုံးနှင့်သွေးကြောခွဲစိတ်ကုဌာနတွင် လိုအပ်သောကုသမှုများ ဆက်လက်ဆောင်ရွက်ပေးနေပြီး ကျန်းမာရေးအခြေအနေ တိုးတက်ကောင်း မွန်လျက်ရှိကြောင်း သိရသည်။
 
■ ပါမောက္ခ Dr. Feng Wan သည် ၂၀၀၈ ခုနှစ်မှ စတင်ပြီး မြန်မာနိုင်ငံရှိ ပြည်သူ့ဆေးရုံကြီးများ၌ နှလုံးနှင့် သွေးကြောခွဲစိတ်ကုဌာနနှင့် ပူးပေါင်း၍ နှလုံးနှင့် သွေးကြောခွဲစိတ်ကုသမှုများ ဆောင်ရွက်လျက်ရှိရာ ၂၀၂၇ ခုနှစ်တွင်လည်း မြန်မာနိုင်ငံသို့ ထပ်မံလာရောက်ပြီး နှလုံးခွဲစိတ်ကုသမှုများနှင့် နှလုံးနှင့် သွေးကြောခွဲစိတ်ပညာ ဘွဲ့လွန်ကျောင်းသား ကျောင်းသူများအား လေ့ကျင့်သင်ကြားပေးမည်ဖြစ်ကြောင်း သိရသည်။
 
■ မန္တလေးပြည်သူ့ဆေးရုံကြီး၊ နှလုံးနှင့်သွေးကြောခွဲစိတ်ကုဌာနအနေဖြင့် မွေးရာပါနှလုံးရောဂါများ၊ နှလုံးအဆို့ရှင်ဆိုင်ရာရောဂါများ၊ နှလုံးသွေးကြော ပိတ်ရောဂါနှင့် နှလုံးသွေးလွှတ်ကြောမကြီး ခွဲစိတ်ကုသမှုများကို ပုံမှန်ဆောင်ရွက်ပေးလျက်ရှိရာ ၂၀၂၅ ခုနှစ်အတွင်း အကြီးစားခွဲစိတ်ကုသမှု ၁၅ ခုနှင့် ၂၀၂၆ ခုနှစ် ဩဂုတ်လအထိ အကြီးစားခွဲစိတ်ကုသမှု ၄၀ တို့ကို ဆောင်ရွက်နိုင်ခဲ့ကြောင်းသိရသည်။
 
#YMG/NN #Yangon_Times

#Local_News
Published 9 September 2026

■ မန္တလေးတိုင်းဒေသကြီး၊ ချမ်းအေးသာစံမြို့နယ်တွင် ယနေ့ စက်တင်ဘာ ၉ ရက် နံနက်ပိုင်းက ရပ်ထားသည့်ကားပေါ်သို့ သစ်ပင်လဲကျမှုဖြစ်ပွားခဲ့ပြီး ကားခေါင်းခန်းအတွင်း လူတစ်ဦး ပိတ်မိခဲ့ကြောင်း မြန်မာနိုင်ငံမီးသတ်တပ်ဖွဲ့ထံမှ သိရသည်။

■ ဖြစ်စဉ်မှာ စက်တင်ဘာ ၉ ရက် နံနက် ၈ နာရီ ၁၇ မိနစ်ခန့်က ချမ်းအေးသာစံမြို့နယ်၊ အောင်နန်းရိပ်သာအနောက်ရပ်ကွက်၊ ၃၄ လမ်း၊ ၈၅ လမ်းနှင့် ၈၆ လမ်းကြား၌ ဖြစ်ပွားခဲ့ခြင်းဖြစ်သည်။

■ ရပ်ထားသည့်ကားပေါ်သို့ သစ်ပင်လဲကျရာမှ ကားခေါင်းခန်းအတွင်း အမျိုးသားတစ်ဦး ပိတ်မိနေကြောင်း သတင်းရရှိသဖြင့် ချမ်းအေးသာစံမြို့နယ်မီးသတ်စခန်းမှ သန္ဓေမီးသတ်တပ်ဖွဲ့ဝင်များက ရှာဖွေကယ်ဆယ်ရေးလုပ်ငန်းများ ဆောင်ရွက်ခဲ့ကြသည်။

■ ထိုသို့ ကယ်ဆယ်ရေးဆောင်ရွက်ခဲ့ရာ ကားခေါင်းခန်းအတွင်း ပိတ်မိနေသည့် အမျိုးသားတစ်ဦးအား နံနက် ၁၀ နာရီ ၂၅ မိနစ်တွင် ကယ်ထုတ်နိုင်ခဲ့ပြီး ထိခိုက်ဒဏ်ရာရရှိမှုမှာ မစိုးရိမ်ရကြောင်း သိရသည်။

■ ဒဏ်ရာရရှိသူအား မီးသတ်တပ်ဖွဲ့ဝင်များက မန္တလေးမြို့ ပြည်သူ့ဆေးရုံကြီးသို့ ကူညီပို့ဆောင်ပေးခဲ့ကြောင်း မြန်မာနိုင်ငံမီးသတ်တပ်ဖွဲ့၏ ထုတ်ပြန်ချက်အရ သိရသည်။

#YMG/SW #Yangon_Times

#Local_News
Published 09 September 2026

■ မြန်မာနိုင်ငံဆန်စပါးအသင်းချုပ်နှင့် ညီနောင်အသင်းဖြစ်သော မြန်မာနိုင်ငံဆန်စပါးစိုက်ပျိုးထုတ်လုပ်သူများအသင်း (MPPA)တို့သည်ဗီယက်နမ်နိုင်ငံ ဟနွိုင်းမြို့တွင်ကျင်းပသော Myanmar-Vietnam Business Forum (2026) တွင် ဗီယက်နမ်ကုမ္ပဏီများနှင့်ဆန်စပါး စိုက်ပျိုးထုတ်လုပ်ရေးဆိုင်ရာကိစ္စရပ်များကို MOU လက်မှတ်များရေးထိုးခဲ့ကြောင်း သိရသည်။

■ အဆိုပါ ခရီးစဉ်အတွင်း အသင်းချုပ်ဥက္ကဋ္ဌနှင့်ကိုယ်စားလှယ်များသည် အသင်းချုပ်နှင့် MOU ရေးထိုးထားသော ဗီယက်နမ်နိုင်ငံ၏ ထိပ်တန်းမျိုးစေ့ထုတ် ကုမ္ပဏီများ ဖြစ်သည့် Vina Seed နှင့် Loc Troi Group တို့နှင့်လည်းကောင်း၊ ဆန်စက်ပစ္စည်း နှင့် အခြောက်ခံစက်များထုတ်လုပ်သည့် Lamico Groupနှင့် လည်းကောင်း၊ အခြားသော ဆန်စပါးလုပ်ငန်းဆိုင်ရာ ကုမ္ပဏီများ၊ အဖွဲ့အစည်းများမှ တာဝန်ရှိသူများနှင့်လည်းကောင်း တွေ့ဆုံညှိနှိုင်းဆွေးနွေးခဲ့ကြကြောင်း သိရသည်။

■ ထို့အပြင် ဖိုရမ်၏ MOU ရေးထိုးခြင်းအစီအစဉ်တွင် Vietnam Rural Agricultural Development Science Instituteနှင့် မြန်မာနိုင်ငံဆန်စပါးအသင်းချုပ်တို့အကြား ကျေးလက်ဒေသ ဖွံ့ဖြိုးရေးနှင့် စိုက်ပျိုးမြေဆီလွှာများ၊ ဂေဟစနစ်များ ထိန်းသိမ်းရေး၊ ဇီဝနှင့် သဘာဝ မြေဩဇာများ ထုတ်လုပ်သုံးစွဲမှု မြှင့်တင်ရေးဆိုင်ရာ MOUကို အသင်းချုပ်ကိုယ်စား တွဲဖက်အထွေထွေအတွင်းရေးမှူး ဦးနေလင်းဇင်က တက်ရောက်လက်မှတ်ရေးထိုးခဲ့ ကြောင်းသိရသည်။

■ ၎င်းအပြင် အသင်းချုပ်၏ ညီနောင်အသင်းဖြစ်သော မြန်မာနိုင်ငံဆန်စပါးစိုက်ပျိုးထုတ်လုပ်သူများအသင်း (MPPA) အနေဖြင့်လည်း ဗီယက်နမ်နိုင်ငံမှ Phong VU Trading Services Import Export Co.,Ltdနှင့် ဓါတ်မြေဩဇာလုပ်ငန်းပူးပေါင်းဆောင်ရွက်မှုကို (MPPA)ဥက္ကဋ္ဌ ဦးခင်မြင့်မှ တက်ရောက်၍ လက်မှတ်ရေးထိုးခဲ့ကြောင်း သိရသည်။

#YMG/NN #Yangon_Times