#Local_News
Published 24 September 2026

■ တရုတ်-မြန်မာ နှစ်နိုင်ငံ၏ ရိုးရာယဉ်ကျေးမှုများကို မျှဝေဖလှယ်သည့် “လက်ဖက်ဆွေသဟာ တရုတ်-မြန်မာ၊ လဝန်းထိန်သာ ကမ္ဘာတစ်ဝန်းမှာ” ဆောင်းဦးလယ်လမုန့်ပွဲတော်နှင့် လက်ဖက်ယဉ်ကျေးမှုပြပွဲကို စက်တင်ဘာ ၂၃ ရက် မွန်းလွဲပိုင်းက ရန်ကုန်မြို့ လှိုင်မြို့နယ်ရှိ လှိုင်မင်္ဂလာခန်းမ၌ ပြုလုပ်ခဲ့ကြောင်းသိရသည်။

■ ပွဲတော်အတွင်း တရုတ်နှင့်မြန်မာတို့၏ လက်ဖက်ယဉ်ကျေးမှုနှင့် ရိုးရာအနုပညာလက်ရာများအပြင် ဒေသအသီးသီးမှ အစားအသောက်နှင့် လယ်ယာထွက်ကုန်များကို တစ်နေရာတည်းတွင် စုစည်းမိတ်ဆက်ခဲ့ပြီးယင်းပြပွဲတွင် ဝါးကျည်တောက်လက်ဖက်ခြောက် ပြုလုပ်သည့်အတတ်ပညာ၊ ဟားနီတိုင်းရင်းသား ရိုးရာပန်းထိုးပညာ၊ ပိုင်တိုင်းရင်းသား ဆေးဆိုးပန်းရိုက်ပညာတို့အပြင် ယူနန်ဒေသ၏ Tile Cat ယဉ်ကျေးမှုနှင့် Jiama နတ်ရုပ်ယဉ်ကျေးမှု လက်ရာများကို ခင်းကျင်းပြသခဲ့သည့်အပြင် ယူနန်ဒေသ၏ ဒြပ်မဲ့ယဉ်ကျေးမှုအမွေအနှစ်ဖြစ်သည့် လက်ဖက်ပြုလုပ်ခြင်းအတတ်ပညာ၊ ယူနန်နှင့် တက်ဟုန်းဒေသထွက်စားဖွယ်များ၊ ကျန်းရှီးဒေသစားဖွယ်များ၊ ဟေးလုံကျန်းဒေသထွက် လယ်ယာထွက်ကုန်များနှင့် ကြွေထည်လက်ရာများကိုလည်း ပြသခဲ့ပြီး လာရောက်ကြည့်ရှုသူများအား ဒေသထွက်အစားအစာများဖြင့် ဧည့်ခံခဲ့ပြီး မြန်မာနိုင်ငံဘက်မှလည်း မြန်မာ့လက်ဖက်ယဉ်ကျေးမှုနှင့် လက်ဖက်ရည်၊ ကော်ဖီ၊ မုန့်များကို ထည့်သွင်းပြသခဲ့သည်။

ထို့အပြင်ယဉ်ကျေးမှုဖျော်ဖြေရေးအစီအစဉ်များအဖြစ် ယူနန်လူမှုဘဝနှင့် ခရီးသွားလုပ်ငန်း မိတ်ဆက်ဗီဒီယိုပြသခြင်း၊ ယူနန်တိုင်းရင်းသားအကနှင့် မီးပွဲတော် တင်ဆက်ခြင်း၊ တရုတ်-မြန်မာ ရိုးရာတေးသီချင်းများဖြင့် ဖျော်ဖြေခြင်းတို့ကိုလည်း ဆောင်ရွက်ခဲ့သည်။

■ တရုတ်ယဉ်ကျေးမှုစင်တာ(ရန်ကုန်) တာဝန်ခံ Mr. Han Jiajun က တရုတ်နှင့် မြန်မာနှစ်နိုင်ငံတွင် ရှည်လျားသည့် လက်ဖက်ယဉ်ကျေးမှု အစဉ်အလာများရှိပြီး တရုတ်လူမျိုးများ၏ လက်ဖက်ရည်သောက်သုံးခြင်းနှင့် မြန်မာလူမျိုးများ၏ လက်ဖက်သုပ်စားသုံးခြင်း၊ ရေနွေးကြမ်းသောက်သုံးခြင်းတို့သည် နှစ်နိုင်ငံပြည်သူများ၏ နေ့စဉ်လူနေမှုဘဝနှင့် ဆက်စပ်နေသည့် ယဉ်ကျေးမှုများဖြစ်ကြောင်းပြောကြားသည်။

■ ထို့အတူ တရုတ်နှင့် မြန်မာနှစ်နိုင်ငံသည် တောတောင်ရေမြေချင်း ထိစပ်နေသည့် အိမ်နီးချင်းနိုင်ငံများဖြစ်သကဲ့သို့ ပြည်သူအချင်းချင်း ဆွေမျိုးပေါက်ဖော်ချစ်ကြည်ရေးလည်း ကာလရှည်ကြာ တည်တံ့လာခဲ့ကြောင်း၊ အဆိုပါဆောင်းဦးလယ်လမုန့်ပွဲတော်သည် နှစ်နိုင်ငံအကြား ယဉ်ကျေးမှုဖလှယ်မှုမှတစ်ဆင့် ချစ်ကြည်ရင်းနှီးမှုကို ပိုမိုတိုးမြှင့်ပေးနိုင်မည့် အစီအစဉ်တစ်ရပ်ဖြစ်ကြောင်း ၎င်းကဆိုသည်။

■ ဆောင်းဦးလယ်လမုန့်ပွဲတော်သည် မိသားစုများ ပြန်လည်ဆုံစည်း၍ လပြည့်ဝန်းကို ကြည့်ရှုသည့် တရုတ်ရိုးရာပွဲတော်ဖြစ်ပြီး လမုန့်စားသုံးခြင်းနှင့် လက်ဖက်ရည်သောက်သုံးခြင်းတို့မှာ ပွဲတော်နှင့်အတူ တွဲဖက်ကျင်းပလေ့ရှိသည့် ရိုးရာဓလေ့များဖြစ်ကြောင်းသိရသည်။

#YMG/SW #Yangon_Times

#Local_News
Published 24 September 2026

■ တရုတ်နိုင်ငံ၊ ကွမ်ရှီးကျွမ့် ကိုယ်ပိုင်အုပ်ချုပ်ခွင့်ရဒေသ၊ ကွေ့လင်မြို့၌ စက်တင်ဘာ ၁၉ ရက်မှ ၂၁ ရက်အထိ ကျင်းပခဲ့သည့် (၂၃)ကြိမ်မြောက် တရုတ်-အာဆီယံကုန်စည်ပြပွဲ ခရီးသွားလာရေးပြခန်းတွင် မြန်မာနိုင်ငံယဉ်ကျေးမှု၊ ဟိုတယ်နှင့်ခရီးသွားလာရေးဝန်ကြီးဌာန ဒုတိယဝန်ကြီး ဦးဖြိုးဇော်စိုး ဦးဆောင်သည့် မြန်မာကိုယ်စားလှယ်အဖွဲ့ ပါဝင်တက်ရောက်ခဲ့ကြောင်း သိရသည်။

■ အဆိုပါ ခရီးသွားလာရေးပြခန်းတွင် အာဆီယံအဖွဲ့ဝင် ၁၁ နိုင်ငံအပါအဝင် နိုင်ငံတကာမှ ၈ နိုင်ငံ၊ တရုတ်ပြည်မကြီးနှင့် ဒေသအသီးသီးမှ ခရီးသွားလုပ်ငန်းရှင်များ၊ နည်းပညာကုမ္ပဏီများနှင့် ဒေသထွက်ကုန်လုပ်ငန်းများပါဝင်ခဲ့ပြီး ကုမ္ပဏီ ၁,၃၅၀ နှင့် ပြခန်း ၁,၇၂၀ ခင်းကျင်းပြသခဲ့သည်။

■ မြန်မာကိုယ်စားလှယ်အဖွဲ့သည် စက်တင်ဘာ ၁၉ ရက်တွင် ကွမ်ရှီးဒေသအစိုးရအဖွဲ့ တာဝန်ရှိသူများနှင့် တွေ့ဆုံ၍ မြန်မာ-တရုတ် ခရီးသွားလုပ်ငန်းပူးပေါင်းဆောင်ရွက်မှု တိုးမြှင့်ရေး၊ နယ်စပ်ဒေသ ခရီးသွားလာမှု ပိုမိုလွယ်ကူချောမွေ့စေရေး၊ တိုက်ရိုက်လေကြောင်းခရီးစဉ်များ တိုးချဲ့ပြေးဆွဲရေးနှင့် ခရီးသွားကဏ္ဍ လူ့စွမ်းအားအရင်းအမြစ် ဖွံ့ဖြိုးရေးတို့ကို ဆွေးနွေးခဲ့သည်။

■ ထို့ပြင် မြန်မာနိုင်ငံကိုယ်စားပြု ခရီးသွားပြခန်းတွင် ရှေးဟောင်းယဉ်ကျေးမှုအမွေအနှစ်ဒေသများ၊ သဘာဝအခြေခံခရီးစဉ်ဒေသများ၊ ခရီးသွားအတွေ့အကြုံများနှင့် ခရီးသွားလုပ်ငန်းဆိုင်ရာ ထုတ်ကုန်များကို ခင်းကျင်းပြသခဲ့ပြီး မြန်မာခရီးသွားကုမ္ပဏီများက တရုတ်နိုင်ငံနှင့် နိုင်ငံတကာမှ ခရီးသွားအေဂျင်စီများနှင့် စီးပွားရေးလုပ်ငန်းချင်း ချိတ်ဆက်ဆွေးနွေးခဲ့ကြသည်။

■ မြန်မာကိုယ်စားလှယ်အဖွဲ့သည် ကွေ့လင်မြို့ရှိ အထင်ကရခရီးစဉ်ဒေသများနှင့် ခရီးသွားလုပ်ငန်းဆိုင်ရာ စီမံခန့်ခွဲမှုနှင့် ဝန်ဆောင်မှုပေးမှုများကိုလည်း လေ့လာခဲ့ပြီး နိုင်ငံတကာခရီးသွားလုပ်ငန်းမြှင့်တင်ရေးနှင့် မြန်မာနိုင်ငံ၏ခရီးစဉ်ဒေသစီမံခန့်ခွဲမှု၊ ဝန်ဆောင်မှုအရည်အသွေး မြှင့်တင်ရေးတို့အတွက် အတွေ့အကြုံများရရှိခဲ့ကြောင်း သိရသည်။

#YMG/SW #Yangon_Times

နေပြည်တော်၊ စက်တင်ဘာ ၂၃

ဒေသအလိုက် လုံခြုံရေးနှင့် တရားမဝင်ကုန်စည်စီးဆင်းမှု တိုက်ဖျက်ရေးအတွက် ဖွင့်လှစ်ထားသည့် စစ်ဆေးရေးဂိတ်များ၌ လုံခြုံရေးကိုအကြောင်းပြ၍ ပေးအပ်ထားသော အခွင့်အာဏာကို မလျော်ကန် စွာအသုံးချမှုများရှိနေပြီး ယင်းကြောင့် တရားမဝင်ကုန်စည်စီးဆင်းမှုများ ဖြစ်ပေါ်ကာ ပြည်သူ များ ကုန်ဈေးနှုန်းကြီးမြင့်မှုဒဏ် ခံစားနေရသဖြင့် အဆိုပါကိစ္စများကို ထိရောက်စွာ ကိုင်တွယ်ဖြေရှင်းပြီး ဥပဒေချိုးဖောက်မှုများအား ဥပဒေနှင့်အညီ အရေးယူရန် နိုင်ငံတော်သမ္မတ ဦးမင်းအောင်လှိုင်က စက်တင်ဘာ ၂၃ ရက်တွင် မှာကြားခဲ့သည်။

နိုင်ငံတော်သမ္မတသည် နေပြည်တော်ကောင်စီဥက္ကဋ္ဌနှင့် တိုင်းဒေသကြီး၊ ပြည်နယ်ဝန်ကြီးချုပ်များအား နိုင်ငံတော်သမ္မတရုံးတော် အစည်းအဝေးခန်းမ၌ တွေ့ဆုံစဉ် ယင်းသို့ ပြောကြားခဲ့ခြင်းဖြစ်ပြီး တွေ့ဆုံပွဲသို့ ဒုတိယသမ္မတ ဦးညိုစော၊ ပြည်ထောင်စုဝန်ကြီးများနှင့် တာဝန်ရှိသူများ တက်ရောက်ခဲ့ကြသည်။

လတ်တလော ပြည်သူများ ရင်ဆိုင်နေရသည့် ကုန်ဈေးနှုန်းကြီးမြင့်မှုကို ဒေသအလိုက် တာဝန်ရှိသူများက လက်တွေ့ကျကျ ဖြေရှင်းရန်နှင့် ဒေသတွင်း စားနပ်ရိက္ခာဖူလုံရေးအတွက် စိုက်ပျိုးရေးနှင့် မွေးမြူရေးလုပ်ငန်းများကို လိုအပ်ချက်အပေါ်မူတည်၍ စနစ်တကျ တိုးချဲ့ဆောင်ရွက်ရန်လည်း ဦးမင်းအောင်လှိုင်က ပြောကြားခဲ့သည်။ စိုက်ပျိုးမွေးမြူရေးအတွက် ခွင့်ပြုထားသည့် မြေများကို ရည်ရွယ်ချက်နှင့်မညီဘဲ အခြားနည်းလမ်းဖြင့် အသုံးပြုနေမှုများကိုလည်း ဥပဒေ၊ စည်းမျဉ်းစည်းကမ်းများနှင့်အညီ ကြပ်မတ်ရန် မှာကြားခဲ့သည်။

ပြည်တွင်းစားသုံးဆီဖူလုံရေးအတွက် နှမ်း၊ နေကြာ၊ မြေပဲ၊ ပဲပုတ်နှင့် ဆီအုန်းအပါအဝင် ဆီထွက် သီးနှံများကို ပန်းတိုင်အထွက်နှုန်းရရှိအောင် စိုက်ပျိုးထုတ်လုပ်ရန်နှင့် ယင်းသို့ ဆောင်ရွက်နိုင်ပါက ပြည်ပမှ စားသုံးဆီနှစ်စဉ်တင်သွင်းနေရမှုကို လျှော့ချနိုင်မည်ဟု ၎င်းက ပြောကြားခဲ့သည်။ တနင်္သာရီ တိုင်းဒေသကြီး၌ ဆီအုန်းစိုက်ပျိုးထုတ်လုပ်မှု တိုးမြှင့်နိုင်ပါက တနင်္သာရီ၊ မွန်နှင့် ကရင်ဒေသတို့၏ စားသုံးဆီလိုအပ်ချက်ကို ဖြည့်ဆည်းရာတွင် အထောက်အကူဖြစ်စေနိုင်ကြောင်းလည်း ဆိုသည်။

စိုက်ပျိုးရေးကဏ္ဍတွင် တစ်ဧကအထွက်နှုန်း မြင့်မားရေးအတွက် “မျိုး၊ မြေ၊ ရေ၊ နည်း” အချက်လေးရပ်ကို စနစ်တကျ ဆောင်ရွက်ရန်၊ တောင်သူတစ်ဦးချင်း၏ အကျိုးစီးပွားကို ဖော်ဆောင်နိုင်ရေး စုပေါင်းသမဝါယမစနစ်ဖြင့် စိုက်ပျိုးရေးလုပ်ငန်းများ အကောင်အထည်ဖော်ရန်နှင့် လိုအပ်သည့် စိုက်ပျိုးရေးချေးငွေများ ဖြည့်ဆည်းပေးရန် ပြောကြားခဲ့သည်။ သီးထပ်စွမ်းအား  တိုးမြှင့်ရာတွင်လည်း အခြေခံကိန်းဂဏန်းများ မှန်ကန်ရန်နှင့် ရာသီဥတု၊ မြေအနေအထားနှင့် ကိုက်ညီ သည့်သီးနှံများကို အချိန်မီစိုက်ပျိုးရန် လိုအပ်ကြောင်းလည်း နိုင်ငံတော်သမ္မတက မှာကြားသည်။

ပညာရေးကဏ္ဍနှင့်ပတ်သက်၍ တစ်မျိုးသားလုံး ပညာရည်မြင့်မားရေးကို ဦးစားပေးပြီး KG+9 အထိ မသင်မနေရပညာရေးစနစ်ကို ဆက်လက်အကောင်အထည်ဖော်ရန်၊ ကျောင်းနေအရွယ်ကလေးအားလုံး ကျောင်းတက်နိုင်ရေးနှင့် တန်းစဉ်ကူးပြောင်းမှု မြင့်မားလာရေး ဆောင်ရွက်ရန် ဦးမင်းအောင်လှိုင်က မှာကြားခဲ့သည်။ အခြေခံပညာကျောင်းများတွင် ဆရာ၊ ဆရာမလိုအပ်ချက်များကို ဖြည့်ဆည်းရန်၊ ပညာရေးဒီဂရီကောလိပ်များမှ သင်တန်းဆင်းများကို စနစ်တကျ နေရာချထားရန်နှင့် စာကြည့်တိုက်များအတွက် သုတ၊ ရသ စာအုပ်စာစောင်များ ဖြည့်ဆည်းပေးရန်လည်း ပြောကြားခဲ့သည်။

နယ်စပ်ဒေသနှင့် တိုင်းရင်းသားလူမျိုးများ ဖွံ့ဖြိုးတိုးတက်ရေးအတွက် ပူတာအိုဒေသ၌ ဒေသနှင့် ကိုက်ညီသည့် ဒီဂရီကောလိပ်တစ်ခု ဖွင့်လှစ်ရန်နှင့် ဥပဒေ၊ စီးပွားရေးဘာသာရပ်များအပါအဝင် သင့်လျော်သည့် ဘာသာရပ်များဖြင့် သင်ကြားနိုင်ရေး သက်ဆိုင်ရာဝန်ကြီးဌာနက ဆက်လက် ဆောင်ရွက်ရန်လည်း မှာကြားခဲ့သည်။

ရာသီဥတုပြောင်းလဲမှုနှင့် အယ်လ်နီညိုဖြစ်စဉ်ကြောင့် အပူချိန်လွန်ကဲမှု၊ မြေအောက်ရေလျော့နည်းမှုနှင့် ရေအရင်းအမြစ်ရှားပါးမှုများ ဖြစ်ပေါ်နိုင်သဖြင့် သောက်သုံးရေနှင့် စိုက်ပျိုးရေများ ကြိုတင်  စုဆောင်းထားရန်၊ ရေကို အကျိုးရှိစွာအသုံးပြုရေး အသိပညာပေးရန်နှင့် လိုအပ်ပါက မြစ်ချောင်းများ၌ မြေအောက်တမံများပြုလုပ်ကာ မြေအောက်ရေထိန်းသိမ်းရေး ဆောင်ရွက်ရန်လည်း ပြောကြားခဲ့သည်။ မလိုအပ်ဘဲ သစ်ခုတ်ခြင်းများ တားမြစ်ရန်နှင့် သစ်ပင်စိုက်ပျိုးမှု တိုးမြှင့်ရန်လည်း တိုက်တွန်းခဲ့သည်။

ထို့ပြင် ဒေသအလိုက် ခေတ်စနစ်နှင့် လျော်ညီသည့် ဥပဒေများ ပြင်ဆင်ရေးဆွဲရေး၊ ဆင်းရဲမွဲတေမှု လျှော့ချရေးနှင့် ပြည်သူများ အလုပ်အကိုင်ရရှိရေး၊ အခွန်ရသင့်ရထိုက်မှု မှန်ကန်စွာရရှိရေးနှင့် အခွန်ရှောင်မှု တားဆီးရေးတို့ကို အလေးထားဆောင်ရွက်ရန် မှာကြားခဲ့သည်။ နိုင်ငံသားစိစစ်ရေးကတ် ထုတ်ပေးရာတွင်လည်း မသမာသည့်နည်းလမ်းဖြင့် နိုင်ငံသားဖြစ်ခွင့်ရယူမှုနှင့် နိုင်ငံသားအယောင်ဆောင် မှုများကို စိစစ်ဖော်ထုတ်၍ သက်ဆိုင်ရာဥပဒေနှင့်အညီ အရေးယူရန် ပြောကြားခဲ့သည်။

အစည်းအဝေးတွင် ပြည်ထောင်စုဝန်ကြီးများ၊ နေပြည်တော်ကောင်စီဥက္ကဋ္ဌနှင့် တိုင်းဒေသကြီး၊ ပြည်နယ်ဝန်ကြီးချုပ်များက ဒေသအလိုက် ကုန်ဈေးနှုန်းကျဆင်းရေးနှင့် စားနပ်ရိက္ခာဖူလုံရေး၊ ဆီထွက်သီးနှံစိုက်ပျိုးရေး၊ ပညာရေး၊ စိုက်ပျိုးမွေးမြူရေးနှင့် MSME လုပ်ငန်းများ ဖွံ့ဖြိုးရေး၊ ရေရှားပါးမှုအတွက် ကြိုတင်ပြင်ဆင်ရေး၊ ယာယီနေရပ်စွန့်ခွာသူများ ပြန်လည်အခြေချနေထိုင်နိုင်ရေးနှင့် ဒေသဖွံ့ဖြိုးရေးလုပ်ငန်းများ ဆောင်ရွက်နေမှုတို့ကို ရှင်းလင်းတင်ပြခဲ့ကြောင်း သိရသည်။

မကွေးမြို့ရှိ မြသလွန်စေတီတော်မြတ်ရဲ့ (၂၅၉၀)ကြိမ်မြောက် ဗုဒ္ဓပူဇနိယပွဲတော်ကို ဈေးဆိုင်ခန်းပေါင်း(၁၀၀၀)ကျော်ဖြင့် စည်ကားသိုက်မြိုက်စွာ ကျင်းပသွားမယ်လို့ မြသလွန်စေတီတော်ဘဏ္ဍာတော်ထိန်းဂေါပကအဖွဲ့ကနေသိရပါတယ်။

#Local_News
Published 23 September 2026
#မကွေးမြသလွန်စေတီ
#YMG/NN #Yangon_Times

စိုက်ပျိုးရေးသွင်းအားစုတွေ အတုအပကင်းစင်ပြီး အရည်အသွေးပြည့်မီစေရေး ပိုးသတ်ဆေးဥပဒေဖောက်ဖျက်မှုတွေ့ရှိပါက တည်ဆဲဥပဒေနဲ့အညီ ထိရောက်စွာအရေးယူသွားမယ်လို့ မြန်မာနိုင်ငံပိုးသတ်ဆေးမှတ်ပုံတင်အဖွဲ့က အသိပေးထားပါတယ်။

#Local_News
Published 23 September 2026
#ပိုးသတ်ဆေး
#YMG/SW #Yangon_Times

ဘုရားဖူးလုပ်ငန်းများလိုင်စင် လျှောက်ထားကြဖို့ပြည်တွင်းဘုရားဖူးနှင့် ခရီးသွားဝန်ဆောင်မှုအသင်းက အသိပေးထုတ်ပြန်ထား ပါတယ်။

#Local_News
Published 23 September 2026
#ဘုရားဖူး
#YMG/NN #Yangon_Times