#Local_News
Published 28 November

▪️ ထိုင်းနိုင်ငံတွင် ရောက်ရှိနေသောမြန်မာမိဘ၂ဦးက မွေးဖွားသည့် ကလေးများ မွေးဖွားခြင်းမှတ်ပုံတင်နိုင်ကြောင်း ဘန်ကောက်မြို့ရှိမြန်မာသံရုံးက ထုတ်ပြန်ထားသည်။

▪️ ထုတ်ပြန်ချက်အရ ၁၉၈၂ ခုနှစ် မြန်မာနိုင်ငံသား ဥပဒေပုဒ်မ (၁၀)အရ ထိုင်းနိုင်ငံရောက် မြန်မာနိုင်ငံသားမိဘ (၂)ပါးမှ မွေးဖွားသည့် ကလေးများအတွက် မွေးဖွားကြောင်းကို မွေးဖွားသည့်နေ့မှစ၍ တစ်နှစ် အတွင်း မြန်မာသံရုံး၊ ဘန်ကောက်မြို့ (သို့မဟုတ်) မြန်မာကောင်စစ်ဝန်ချုပ်ရုံး၊ ချင်းမိုင်မြို့တို့တွင် အောက်ပါပုံစံများ ဖြည့်စွက်၍ မိဘ (သို့မဟုတ်) အုပ်ထိန်းသူကိုယ်တိုင်လာရောက်၍ မှတ်ပုံတင် နိုင်ကြောင်း၊‌ေလျှာက်ထားရာတွင်ကလေးမွေးဖွားကြောင်း မွေးစာရင်းမိတ္တူ (အင်္ဂလိပ်ဘာသာပြန်) နှင့်အတူ မွေးဖွားသည့်နေ့မှစ၍ တစ်နှစ်အတွင်း မိဘ (သို့မဟုတ်) အုပ်ထိန်းသူက မြန်မာသံရုံး၊ ဘန်ကောက်မြို့  (သို့မဟုတ်) မြန်မာကောင်စစ်ဝန်ချုပ်ရုံး၊ ချင်းမိုင်မြို့သို့ လာရောက်၍ နိုင်ငံတော်ပြင်ပတွင် ကလေးမွေးဖွားခြင်းမှတ်တမ်း (ပုံစံ နိုင်-၈) ပူးတွဲ(က)ပါအား ဖြည့်စွက်၍ လာရောက်မှတ်ပုံတင်နိုင်ကြောင်း၊

▪️ ယင်းသို့မှတ်ပုံတင်ရာတွင် မိဘနှစ်ပါး၏ မြန်မာနိုင်ငံကူးလက်မှတ်မိတ္တူ၊ နိုင်ငံသားစိစစ်ရေးကတ်ပြားမိတ္တူ၊ မိဘနှစ်ပါး၏ လျှောက်လွှာနှင့် ဝန်ခံကတိပြုချက်မိတ္တူတို့ကို ပူးတွဲတင်ပြရမည်။ ကောင်စစ်အရာရှိများမှ လုပ်ထုံးလုပ်နည်းနှင့်အညီ စိစစ်၍ သက်ဆိုင်ရာဝန်ကြီးဌာနသို့ တင်ပြအတည်ပြုချက်ရယူခြင်း၊ နိုင်ငံတော် ပြင်ပတွင် မွေးဖွားသော နိုင်ငံသားအတွက် မွေးဖွားကြောင်း မှတ်ပုံတင်ခြင်း၊ မိဘ၏ နိုင်ငံသားလက်မှတ်တွင် အမည်ထည့်သွင်းခြင်းတို့ကို ဆက်လက်ဆောင်ရွက်သွားမည်ဖြစ်‌ကြောင်း သိရသည်။

▪️ ထို့အပြင်မြန်မာနိုင်ငံသားမိဘ(၂)ပါးမှ ထိုင်းနိုင်ငံတွင် မွေးဖွားသည့် ကလေးများအတွက် မွေးဖွားခြင်းမှတ်ပုံတင်ပြီးပါက ထိုင်းနိုင်ငံတွင် ဆက်လက်နေထိုင်ရန်လိုအပ်ပါကစာရွက်စာတမ်းများ ပူးတွဲ(ခ)နှင့်အတူ မြန်မာနိုင်ငံကူးလက်မှတ် (မွေးတိုး) အား မြန်မာသံရုံး၊ ဘန်ကောက်မြို့နှင့် မြန်မာကောင်စစ်ဝန်ချုပ်ရုံး ချင်းမိုင်မြို့တို့၌ လျှောက်ထားနိုင်ကြောင်း သိရသည်။

#YMG/SW#Yangon_Times

#Local_News
Published 28 November 2024

▪️ ရုရှားနိုင်ငံက မြန်မာနိုင်ငံမှအလုပ်သမားများခေါ်ယူမှုစတင်နေပြီဖြစ်ပြီး ရုရှားနိုင်ငံ၏ လုပ်သားခေါ်ယူမှုပုံစံသည်နှစ်နိုင်ငံသဘောတူစာချုပ် (MOU) အရ အခမဲ့စနစ် (Zero-Cost) ဖြစ်ကြောင်း မြန်မာနိုင်ငံ ပြည်ပအလုပ်အကိုင် အေဂျင်စီများအဖွဲ့ချုပ် (MOEAF)မှ သိရသည်။

▪️ ထိုသို့ အခမဲ့စနစ်(Zero-Cost)ဖြစ်သောကြောင့် မြန်မာနိုင်ငံမှသွားရောက်အလုပ်လုပ်ကိုင်မည့်သူများအ‌ေနဖြင့် အခြေခံကုန်ကျစရိတ်အနည်းငယ်သာကုန်ကျမည်ဖြစ်ကြောင်း MOEAF တာဝန်ရှိသူတစ်ဦးက‌ပြောသည်။

▪️ ရုရှားဖက်မှ လုပ်သားခေါ်ယူရာတွင် ကုန်ထုတ်လုပ်ငန်း၊ စိုက်ပျိုးရေး၊ မွေးမြူရေးကဏ္ဍများအတွက် ခေါ်ယူမည်ဖြစ်ကြောင်း၊ရုရှားသို့လုပ်သားများစေလွတ်ရန်အတွက် ြပည်တွင်းမှအလုပ်အကိုင်အေဂျင်စီအချို့ပြင်ဆင်မှုများစတင် ပြုလုပ်နေပြီဖြစ်ပြီး ရုရှားအစိုးရဘက်မှလည်းလုပ်သားသစ်စုဆောင်းခြင်းအတွက် ဘာသာစကားသင်တန်းများစတင် ပေးနေပြီဖြစ်ကြောင်း သိရသည်။

▪️ အစိုးရအနေဖြင့်မြန်မာလုပ်သားများကို ပြည်ပသို့MOU စနစ်ဖြင့်စေလွှတ်ရာတွင် ထိုင်း၊ ဂျပန်နှင့်ကိုရီးယားနိုင်ငံများသို့ အများဆုံးစေလွတ်လျက်ရှိကြောင်း သိရသည်။

#YMG/SW#Yangon_Times

#Local_News
Published 28November 2024

▪️ ဆောက်လုပ်ရေးဝန်ကြီးဌာန၊ မြို့ပြနှင့် အိမ်ရာဖွံ့ဖြိုးရေးဦးစီးဌာနနှင့်Alliance Stars Group of Companiesတို့ အကျိုးတူပူးပေါင်းဆောင်ရွက်နေသည့် Eco Green City စီမံကိန်းအတွင်းရှိ တန်ဖိုးနည်းအိမ်ရာများတည်ဆောက်မှုယခုနှစ်ကုန်ပြီးစီးမည်ဖြစ်ကြောင်း သိရသည်။

▪️ ရန်ကုန်တိုင်းဒေသကြီး၊ လှည်းကူးမြို့နယ်၊ ရန်ကုန်-မန္တလေးအမြန်လမ်းမကြီး (၃) မိုင်မှ (၅/၄)မိုင်ဝဲယာတွင် တည်ရှိသော အဆိုပါစီမံကိန်းသည်ဆောက်လုပ်ရေးဝန်းကြီးဌာနနှင့် ပုဂ္ဂလိကကုမ္ပဏီများအကျိုးတူပူးပေါင်းဆောင်ရွက်လျက်ရှိသော စီမံကိန်းကြီးလေးခုအနက်တစ်ခုအပါအဝင်ဖြစ်ပြီး ဒုတိယမြောက် အကောင် အထည်ဖော်သည့် စီမံကိန်းဖြစ်ပြီး ရင်းနီးမြုပ်နှုံမှုတန်ဖိုး အမေရိကန်‌ဒေါ်လာ နှစ်ဘီလျံခန့်သုံးစွဲမည်ဖြစ်ကြောင်း သိရသည်။

▪️ "စီမံကိန်းအတွင်းကတန်ဖိုးနည်းအိမ်ရာတွေကိုတည်ဆောက်ရာမှာ အခန်းအကျယ်၄၃၆ စတုရန်းပေကို (၈)ခန်းတွဲ (၅)ထပ်အဖြစ်နဲ့အဆောက်အအုံ ၂၈လုံးအခန်းရေ (၁၁၂၀)ခန်းတည်ဆောက်နေတာပါ။ ဒီနှစ်ဒီဇင်ဘာမှာ တည်ဆောက်မှုအားလုံးပြီးစီးမယ်လို့မျှော်မှန်းထားပါတယ်" ဟု Alliance Stars Group of Companies မှ တာဝန်ရှိသူတစ်ဦးက ပြောသည်။

▪️ စီမံကိန်းကိုဂျပန်နိုင်ငံ အပြည်ပြည်ဆိုင်ရာ ပူးပေါင်းဆောင်ရွက်ရေး အေဂျင်စီ (JICA)က ရေးဆွဲခဲ့သည့် ရန်ကုန်မြို့ ရည်မှန်းချက် ၂၀၄၀ မှာပါဝင်သည့် အနာဂတ်မြို့သစ်စီမံကိန်းတစ်ခု အကောင်အထည်ဖော်ရန်၊ ဝင်ငွေနည်းပြည်သူများအတွက် လိုအပ်သည့် အငှားအိမ်ရာများ တန်ဖိုးနည်းအိမ်ရာများ ဖြည့်ဆည်းပေးနိုင်ရန်နှင့် ဒေသခံပြည်သူများ အလုပ်အကိုင်အခွင့်အလမ်းများရရှိပြီး လူမှုဘဝမြင့်မားလာစေရန် ဆောင်ရွက်ခြင်းဖြစ်ကြောင်း၊၂၀၁၉ခုနှစ်တွင်စတင်ခဲ့သည့် အဆိုပါစီမံကိန်းကို အပိုင်းသုံးပိုင်းခွဲတည်‌ဆောက်နေခြင်းဖြစ်ပြီးစီမံကိန်းအားလုံး လာမည့်၂၀၂၉ခုနှစ်တွင် ပြီးစီးရန်မျော်မှန်းထားကြောင်း သိရသည်။

#YMG/SW#Yangon_Times

#Local_News
Published_ 28 November 2024

▪️ မြန်မာနိုင်ငံနှင့် ထိုင်းနိုင်ငံတို့အကြား နယ်စပ်ဒေသလုံခြုံရေးနှင့် တည်ငြိမ်အေးချမ်းရေး နေပြည်တော်ရှိ နိုင်ငံခြားရေးဝန်ကြီးဌာန၌ ဆွေးနွေးခဲ့​ကြောင်း သိရပါတယ်။

▪️ ထိုသို့ဆွေးနွေးရာတွင် နှစ်နိုင်ငံဆက်ဆံရေးနှင့် ပူးပေါင်းဆောင်ရွက်မှုများ ပိုမိုမြှင့်တင်ဆောင်ရွက်ရေး၊  ကဏ္ဍစုံပူးပေါင်းဆောင်ရွက်မှုတိုးမြှင့်ရေး၊ ပြည်သူအချင်းချင်း ထိတွေ့ဆက်ဆံမှုတိုးမြှင့်ရေးနှင့် နှစ်နိုင်ငံအကြား ဒေသတွင်းနှင့် နိုင်ငံတကာမျက်နှာစာတို့တွင် ပိုမိုနီးကပ်စွာ ပူးပေါင်းဆောင်ရွက်ရေး စတဲ့ကိစ္စရပ်များကိုလည်း ဆွေးနွေးခဲ့တယ်လို့ဆိုပါတယ်။

▪️ အဆိုပါဆွေးနွေးမှုကို နိုဝင်ဘာ (၂၇)ရက်က ဒုတိယဝန်ကြီးချုပ်နှင့် နိုင်ငံခြားရေးဝန်ကြီး ဦးသန်းဆွေနှင့် ထိုင်းနိုင်ငံခြားရေးဝန်ကြီး၏ အကြံပေးပုဂ္ဂိုလ် H.E. Mr. Dusit Manapan တို့ ဆွေးနွေးခဲ့တာ ဖြစ်ပါတယ်။

#ymg_mnn #Yangon_Media_Group

#Local_News
Published_27 Nov 2024

▪️ ယခုနှစ်အတွင်း သဘာဝဘေးအန္တရာယ်ကြုံတွေ့ခြင်း၊ သွင်းအားစုများဈေးနှုန်းမြင့်တက်ခြင်းတို့ကိုအကြောင်းပြ၍ အခြေခံစားကုန်များ ဈေးနှုန်းကြီးမြင့်လာခြင်းကြောင့် အခြေခံလူတန်းစားများအနေဖြင့် အခက်အခဲများဖြစ်ပေါ်လျက်ရှိကြောင်း နစက ဥက္ကဌက ပြောသည်။

▪️ ယနေ့ နိုဝင်ဘာလ ၂၇ ရက်က နေပြည်တော်ရှိ နိုင်ငံတော်စီမံအုပ်ချုပ်ရေးကောင်စီဥက္ကဋ္ဌရုံး အစည်းအဝေးခန်းမ၌ ကျင်းပသည့် ဘဏ္ဍာရေးဆိုင်ရာကော်မရှင် အစည်းအဝေးအတွင်းဘဏ္ဍာရေးဆိုင်ရာကော်မရှင်ဥက္ကဋ္ဌ နိုင်ငံတော်စီမံအုပ်ချုပ်ရေးကောင်စီ ဥက္ကဋ္ဌ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင်က ယင်းသို့ပြောကြားလိုက်ခြင်း ဖြစ်သည်။

▪️ ယင်းက အဓိကစားသုံးသည့် အသားများဖြစ်သည့် ကြက်၊ ဝက်၊ ဆိတ်၊ နွား၊ ငါး တွင် အများစုကို ဒေသအလိုက်၊ နေရာအလိုက် အောင်မြင်စွာမွေးမြူနိုင်သည့် အခြေအနေများပိုင်ဆိုင်ပြီးဖြစ်၍ အမှန်သာအလုပ်လုပ်ကြမည်ဆိုပါက ဒေသတွင်းစားရေး ဖူလုံမှုကို အထောက်အကူပြုနိုင်ပြီး ဈေးနှုန်းသက်သာစွာဖြင့် ဝယ်ယူစားသုံး နိုင်မည်ဖြစ်ကြောင်း ပြောကြားခဲ့သည်။

▪️ ၎င်းအပြင် ဒေသမျိုးများကိုပင် လှောင်မွေးစနစ်ဖြင့် စနစ်တကျမွေးမြူပါက တိုးတက်မှု များပြားလာမည်ဖြစ်ပြီး ဒေသတွင်းကုန်ကြမ်းများကို အသုံးပြု၍ အစာကျွေးမွေးမည် ဆိုပါက အောင်မြင်သည့် မွေးမြူရေးလုပ်ငန်းကို ဖော်ဆောင်နိုင်မည်ဖြစ်ကြောင်း၊ အခြေခံလူတန်းစားများ၏ သက်သာချောင်ချိရေးကို အထူးအလေးထားဆောင်ရွက်ပေးရန်လိုကြောင်း နစက ဥက္ကဌက ပြောသည်။

▪️ အလားတူ စိုက်ပျိုးရေးလုပ်ငန်းများ၌လည်း သီးထပ်စွမ်းအားတိုးမြှင့်ခြင်း၊ စိုက်ဧကတိုးချဲ့ခြင်းဟူသည့် နည်း လမ်း ၃ သွယ်ဖြင့် အထွက်နှုန်းတိုးမြင့်အောင် ဆောင်ရွက်နိုင်ကြောင်း၊ မူလရှိပြီး အခြေခံအပေါ် တိုးတက်အောင်ဆောင်ရွက်ရခြင်းဖြစ်သောကြောင့်ဖြစ်နိုင်ခြေမြင့်မားသဖြင့် အလေးထားဆောင်ရွက်ရမည်ဖြစ်ကြောင် ဆိုသည်။

▪️ ထို့နောက် စိုက်ပျိုးရေးလုပ်ငန်းများအတွက် လိုအပ်သည့်သွင်းအားစုများ ပြည့်ပြည့်ဝဝရရှိစေရေးသက်ဆိုင်ရာ ဝန်ကြီးဌာနများနှင့် တိုင်းဒေသကြီးနှင့် ပြည်နယ်များအလိုက်မှ တာဝန်ရှိသူများအနေဖြင့် ကြံဆဆောင်ရွက်သွားကြရန်၊စိုက်ပျိုးရေးနှင့် မွေးမြူရေးလုပ်ငန်းများ တိုးတက်အောင်ဆောင်ရွက်နိုင်မည်ဆိုပါက GDP တိုးတက်လာပြီး နိုင်ငံ၏ဘဏ္ဍာငွေတိုးတက်ရရှိလာမည့်အပြင်ကုန်ပစ္စည်းများကို အရည်အသွေးပြည့်မီအောင် ထုတ်လုပ်နိုင်မည်ဆိုပါက ပြည်ပသို့ပါတင်ပို့ရောင်းချနိုင်မည်ဖြစ်ပြီး ပြည်ပပို့ကုန်များ မြှင့်တင်နိုင်မည်ဖြစ်ကြောင်းလည်း ယင်းကပြောကြားခဲ့ကြောင်း သိရသည်။

#Yangon_Times/PP

၂၇ နိုဝင်ဘာ ၂၀၂၄

အပြည်ပြည်ဆိုင်ရာ ရာဇဝတ်တရားရုံး ICC က နစက ဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်ကို ဖမ်းဝရမ်း ထုတ်ရန် ICC ရှေ့နေချုပ်ဆိုသူက လျှောက်ထားမယ်လို့ ထွက်ပေါ်နေတဲ့ သတင်းများနှင့်ပတ်သက်၍ နစက အစိုးရက တရားဝင်ပယ်ချလိုက်ပါတယ်။

“ မြန်မာနိုင်ငံသည် ICC အဖွဲ့ဝင်နိုင်ငံမဟုတ်သကဲ့သို့ ICC ၏ ပြောကြားချက်များအပေါ် မည်သည့်အခါကမှ အသိအမှတ်ပြုခြင်းမရှိပါ” လို့ နစက သတင်းထုတ်ပြန်ရေးအဖွဲ့က တုန့်ပြန်ခဲ့တာဖြစ်ပါတယ်။

မြန်မာနိုင်ငံအနေဖြင့် ဒေသတွင်းအပြင် ကမ္ဘာ့နိုင်ငံများနှင့် ဆက်ဆံရာတွင် လွတ်လပ်၍တက်ကြွပြီး ဘက်မလိုက် သော နိုင်ငံခြားရေး မူဝါဒကို ကျင့်သုံးလျက်ရှိပြီး နိုင်ငံများအကြား ငြိမ်းချမ်းစွာအတူယှဉ်တွဲနေထိုင်ရေးမူကို ကျင့်သုံး  လျက်ရှိတယ်လို့လည်း အဆိုပါသတင်းထုတ်ပြန်ချက်မှာဖော်ပြထားပါတယ်။

နိုဝင်ဘာ ၂၇ ရက်က ထုတ်ပြန်တဲ့ နိုင်ငံတကာသတင်းများတွင် ၂၀၁၇ ခုနှစ်အတွင် ဘင်္ဂါလီတွေအပေါ်  ကျူးလွန်တဲ့ ရာဇဝတ်မှုတွေအတွက် ဗိုလ်ချုပ်မှူးကြီးမင်းအောင်လှိုင်ကို ဖမ်းဝရမ်းထုတ်ဖို့ ICC ရှေ့နေချုပ် ကာရင် အေအေခန် Karim A.A Khan က တရားရုံးကိုလျှောက်ထားခဲ့တယ်လို့ ရေးသားခဲ့ကြတာဖြစ်ပါတယ်။

ကာရင်အေအေခန်ဟာ ပါကစ္စတန်သွေးပါတဲ့ ဗြိတိန်နိုင်ငံသားတစ်ဦးဖြစ်ပြီး  ICC မှာ သူ့လက်ထောက် အမျိးသမီး   ဝန်ထမ်းတစ်ဦးကို လိင်ပိုင်းဆိုင်ရာ မဖွယ်မရာလုပ်လို့ အတိုင်အတန်းခံခဲ့ရသူတစ်ဦးဖြစ်ပါတယ်။

@ymg/knl