#Local_News
Published 28 September 2026

■ ရန်ကုန်-မန္တလေးအမြန်လမ်းမကြီးပေါ်တွင် ယာဉ်မောင်းနှင်ရင်း TikTok ရိုက်သည့် Express ယာဉ်မောင်းကို အရေးယူရန်တိုင်ကြားထားရာ ယာဉ်လိုင်းအားပြင်းထန်စွာသတိပေးခြင်း၊Express ယာဉ်ကို Telematic ကတ်ဖြုတ်သိမ်းပြီး အမြန်လမ်းအသုံးပြုခွင့်ပိတ်သိမ်းခြင်းများအပြင် ယာဉ်မောင်းကိုလည်း တရားဥပဒေအရဆက်လက်အရေးယူနိုင်ရန်ဆောင်ရွက်သွားမည်ဖြစ်ကြောင်း ရန်ကုန်-မန္တလေး အမြန်လမ်းမကြီးထိန်းသိမ်းပြုပြင်ရေးနှင့် ကြီးကြပ်ရေးအဖွဲ့မှ အသိပေးထုတ်ပြန်ထားသည်။

■ ယာဉ်မောင်းနှင်နေစဉ် TikTok ရိုက်ကူးမှုများ အကြိမ်ကြိမ်ပြုလုပ်သည့် ရွှေလင်းယုန် Express ယာဉ်လိုင်းမှ ယာဉ်အမှတ် 2G-5403 ကိုမောင်းနှင်သည့် ယာဉ်မောင်းကို ဥပဒေအရအရေးယူပေးပါရန် အမြန်လမ်းမကြီးရဲတပ်ဖွဲ့သို့ တိုင်ကြားထားခြင်းဖြစ်သည်။

■ အဆိုပါ ယာဉ်မောင်းတင်သည့် TikTok ဗီဒီယိုများ၏ အောက်တွင် ယင်းကဲ့သို့ မပြုလုပ်သင့်ကြောင်း ဝေဖန်မှတ်ချက်ပြုသူများကိုလည်း ရိုင်းစိုင်းစွာတုံ့ပြန်ရေးသားခဲ့ကြောင်းသိရသည်။

■ ထို့ကြောင့် သတ်မှတ်စည်းကမ်းများကို လိုက်နာခြင်းမရှိသည့် ယာဉ်မောင်းအား ဥပဒေအရ ဆက်လက်အရေးယူနိုင်ရန် အမြန်လမ်းရဲတပ်ဖွဲ့ထံ သတင်းပေးပို့တိုင်ကြားခဲ့ခြင်းဖြစ်သည်။

■ အဆိုပါယာဉ်မောင်း၏ ပြုမူဆောင်ရွက်မှုများသည် အမြန်လမ်းမကြီးသုံးစွဲသည့် ခရီးသွားပြည်သူအားလုံးအတွက် အလွန်အန္တရာယ်ကြီးသည့် ကိစ္စဖြစ်ခြင်းကြောင့် ၎င်း Express ယာဉ်ကို Telematic ကတ်ဖြုတ်သိမ်းပြီး အမြန်လမ်းအသုံးပြုခွင့်ပိတ်သိမ်းလိုက်ကြောင်းသိရသည်။

■ ထို့အပြင် ရွှေလင်းယုန်ယာဉ်လိုင်းကိုလည်း ယခုလိုဖြစ်စဉ်များ ထပ်မံဖြစ်ပွားပါက ယာဉ်လိုင်းတစ်ခုလုံးကို အမြန်လမ်းသုံးစွဲခွင့် ပိတ်သိမ်းအရေးယူမည်ဖြစ်ကြောင်း ပြင်းထန်စွာသတိပေးထားကြောင်း ထုတ်ပြန်ချက်၌ဖော်ပြထားသည်။

#YMG/NN #Yangon_Times