#Local_News
Published 28 September 2026

■ ရန်ကုန်တိုင်းဒေသကြီး၊ ထန်းတပင်မြို့နယ်ရှိ အလုပ်သမားဆေးရုံ (ထန်းတပင်) တွင် အာမခံအလုပ်သမားများအတွက် ကျောက်ကပ်သွေးသန့်စင်ဆေးကြောသည့် ဝန်ဆောင်မှုတိုးချဲ့ပေးနိုင်ရေး ကျောက်ကပ်သန့်စင်စက် တပ်ဆင်၍စမ်းသပ်လည်ပတ်နေကြောင်း သိရသည်။

■ အဆိုပါ စမ်းသပ်လည်ပတ်မှုကို အလုပ်သမားဝန်ကြီးဌာန ပြည်ထောင်စုဝန်ကြီး ဦးခင်မောင်စိုးက ယနေ့နံနက်ပိုင်းတွင် သက်ဆိုင်ရာတာဝန်ရှိသူများနှင့်အတူ သွားရောက်ကြည့်ရှုစစ်ဆေးခဲ့ပြီး အောက်တိုဘာလအတွင်း အာမခံအလုပ်သမားလူနာများအား ကျောက်ကပ်သွေးသန့်စင်ပေးနိုင်ရေး လိုအပ်သည့် ဆေးပစ္စည်းများ အမြန်ဝယ်ယူရန်မှာကြားခဲ့သည်။

■ ထို့ပြင် ရွှေပြည်သာနှင့် လှိုင်သာယာမြို့နယ်များရှိ အာမခံအလုပ်သမားများအနေဖြင့် ကျောက်ကပ်သွေးသန့်စင်ကုသမှုခံယူလိုပါက အလုပ်သမားဆေးရုံ (ထန်းတပင်)တွင် လာရောက်ကုသနိုင်ရန် စီစဉ်ဆောင်ရွက်ပေးမည်ဖြစ်ကြောင်း လူမှုဖူလုံရေးအဖွဲ့ ညွှန်ကြားရေးမှူးချုပ်က တင်ပြခဲ့သည်။

■ ကျောက်ကပ်သွေးသန့်စင်လုပ်ငန်းအတွက် လိုအပ်သည့် ရေသန့်စက်တပ်ဆင်မှုများ ပြီးစီးပြီဖြစ်ပြီး ဆက်စပ်ပစ္စည်းများ ဝယ်ယူနိုင်ရေးဆောင်ရွက်နေကြောင်းလည်း သိရသည်။

■ လူမှုဖူလုံရေးအဖွဲ့အနေဖြင့် နာတာရှည်ကျောက်ကပ်ရောဂါခံစားနေရသည့် အာမခံအလုပ်သမားလူနာများအတွက် ၂၀၂၆ ခုနှစ် ဩဂုတ်လအထိ အလုပ်သမားဆေးရုံကြီး (ရန်ကုန်) တွင် လူနာ ၅၃၀ ဦးအား ကျောက်ကပ်သွေးသန့်စင်ဆေးကြောမှု ၃,၀၄၅ ကြိမ်နှင့် အလုပ်သမားဆေးရုံကြီး (မန္တလေး) တွင် လူနာ ၃၀၈ ဦးအား ၂,၅၄၂ ကြိမ် ဆောင်ရွက်ပေးခဲ့ကြောင်း သိရသည်။

#YMG/SW #Yangon_Times