#LocalNews
Published - 6 May 2022
ဘင်္ဂလားပင်လယ်အော်အရှေ့တောင်ပိုင်းတို့မှာဖြစ်ပေါ်နေတဲ့ လေဖိအားနည်းရပ်ဝန်းအရှိန်ကြောင့် မြန်မာနိုင်ငံရှိ အချို့ဒေသတွေမှာ မိုးရွာသွန်းခြင်းနှင့်အတူ လေပြင်းတိုက်ခတ်ခြင်း၊ မိုးထစ်ချုန်းခြင်းများ ဖြစ်ပေါ်နိုင်တဲ့အတွက် ကြိုတင်သတိပြုနေထိုင်ကြဖို့ မိုးလေဝသနှင့်ဇလဗေဒညွှန်ကြားမှုဦးစီးဌာနက သတိပေးချက်ထုတ်ပြန်လိုက်ပါတယ်၊၊
ဒါနဲ့ပတ်သက်လို့ မိုးလေဝသနှင့်ဇလဗေဒညွှန်ကြားမှုဦးစီးဌာန၊ညွှန်ကြားရေးမှူးဦးလှထွန်းက "အဲဒီလေဖိအားနည်းရပ်ဝန်းက လောလောဆယ်အထိတော့ မြန်မာနိုင်ငံဘက်ကို ဦးတည်ရွေ့လျားတာမျိုး မရှိသေးပါဘူး၊၊မေလ(၁၀)ရက်နေ့အထိ အိန္ဒိယဘက်ကို ဦးတည်ရမယ့်အနေအထားပေါ့ ကျန်တဲ့ရက်တွေမှာတော့ စောင့်ကြည့်ရဦးမှာပေါ့၊၊လေဖိအားနည်းရပ်ဝန်းကြောင့်ဖြစ်ပေါ်လာတဲ့ တိမ်တိုက်တွေကိုတော့ မြစ်ဝကျွန်းပေါ်ဒေသ၊ မုတ္တမကွေ့နဲ တနင်္သာရီ ကမ်းရိုးတန်းတစ်လျှောက် မြန်မာနိုင်ငံတောင်ပိုင်းဒေသတွအနေနဲ့သတိထားဖို့လိုတယ်"လို့ YMGကို ပြောပါတယ်၊၊
ဒီ့အပြင် ပြည်တွင်းလေကြောင်းပျံသန်းရေး၊ မြစ်ဝကျွန်းပေါ်၊ မုတ္တမကွေ့၊ မွန်-တနင်္သာရီကမ်းရိုးတန်းတစ်လျှောက်နဲ့ကမ်းလွန်ပင်လယ်ပြင်တိုရှိ ကမ်းနီး၊ ကမ်းဝေး ငါးဖမ်းရေယာဉ်များ၊ သင်္ဘောများအနေနဲ့လည်း ကြိုတင်သတိပြုနိုင်ရန် အသိပေးနှိုးဆော်ထားပါတယ်၊၊
လေဖိအားနည်းရပ်ဝန်းဟာ အနောက်မြောက်ဘက်သို့ ရွေ့လျားနိုင်ပြီး၊မေလ(၇) ညနေပိုင်းမှာ မုန်တိုင်းငယ်အဖြစ်သို့လည်းကောင်း၊မေလ(၈)ရက်ညနေပိုင်းမှာ ဆိုင်ကလုန်းမုန်တိုင်းအဖြစ်သို့လည်းကောင်း ပိုမိုအားကောင်းလာနိုင်ပြီး၊ အနောက်မြောက်ဘက်သို့ ဆက်လက်ရွေ့လျားကာ၊မေလ(၁၀)ရက်မှာဘင်္ဂလားပင်လယ်အော်အနောက်အလယ်ပိုင်း (အိန္ဒိယ နိုင်ငံ၊ အင်ဒရာပရာဒေ့ရှ်မြောက်ပိုင်းကမ်းလွန်-ဩရိဿကမ်းခြေ)သို့ ရောက်ရှိနိုင်တယ်လို့ မိုး/ဇလက ခန့်မှန်းချက်ထုတ်ပြန်ထားပါတယ်၊၊
အဲဒီလေဖိအားနည်းရပ်ဝန်းအရှိန်ကြောင့် မေလ(၆)ရက်မှ(၁၀)ရက်အတွင်း နေပြည်တော်၊ မန္တလေးတိုင်းဒေသကြီး၊ မကွေးတိုင်းဒေသကြီး၊ ပဲခူး တိုင်းဒေသကြီး၊ ရန်ကုန်တိုင်းဒေသကြီး၊ ဧရာဝတီတိုင်းဒေသကြီး၊ တနင်္သာရီတိုင်း ဒေသကြီး၊ ရှမ်းပြည်နယ်၊ ချင်းပြည်နယ်၊ ရခိုင်ပြည်နယ်၊ ကယားပြည်နယ်၊ ကရင် ပြည်နယ်နှင့် မွန်ပြည်နယ်တို့တွင် နေရာကျဲကျဲမှ နေရာစိပ်စိပ် မိုးထစ်ချုန်းရွာနိုင်ပြီး၊ အချို့ဒေသတွေမှာ နေရာကွက်၍ မိုးကြီးနိုင်ကြောင်း၊မြစ်ဝကျွန်းပေါ်၊ မုတ္တမကွေ့၊ မွန်-တနင်္သာရီကမ်းရိုးတန်းတစ်လျှောက်နှင့် ကမ်းလွန်ပင်လယ်ပြင်တိုတွင် တစ်ခါတစ်ရံ မိုးသက်လေပြင်းများကျရောက်ပြီး လှိုင်းကြီးနိုင်ကြောင်းသိရပါတယ်၊၊ မိုးသက်လေပြင်းကျစဉ် ရေပြင်/မြေပြင်လေသည် တစ်နာရီလျှင် (၃၅)မိုင်မှ မိုင်(၄၀)အထိ တိုက်ခတ်နိုင်ပြီးလှိင်းအမြင့်မှာ မြစ်ဝကျွန်းပေါ်၊ မုတ္တမကွေ့၊ မွန်-တနင်္သာရီကမ်းရိုးတန်း တစ်လျှောက်နှင့် ကမ်းလွန်ပင်လယ်ပြင်တိုတွင် (၈)ပေမှ (၁၀)ပေခန့် ရှိနိုင်တယ်လို ထုတ်ပြန်ချက်မှာဖော်ပြပါရှိပါတယ်၊၊
ymg/tthl
#Yangon_Media_Group
#LocalNews
Published - 6 May 2022
မကြာမီ ကာလအတွင်း မိုးရာသီကျရောက်တော့မှာဖြစ်တဲ့အတွက် မိုးရာသီမှာဖြစ်ပေါ်တတ်တဲ့ သွေးလွန်တုပ်ကွေးရောဂါ မဖြစ်ပွားစေရေးအတွက် ကြိုတင်ကာကွယ်ရေးလုပ်ငန်းတွေကို ကျိုက်ခမီမြို့တွင် ကြက်ခြေနီအဖွဲ့တွေက စတင်ဆောင်ရွက်နေပြီဖြစ်ပါတယ်၊၊
မေလ(၄)ရက်နေ့က မွန်ပြည်နယ်၊ သံဖြူဇရပ်မြို့နယ်၊ ကျိုက်ခမီမြို့ရှိ ရပ်ကွက်များအတွင်း နေအိမ်တွေမှာ သွေးလွန်တုပ်ကွေးရောဂါ အသိပညာပေးတာတွေ ဆောင်ရွက်ခဲ့ပါတယ်၊၊
ဒီ့အပြင်ရပ်ကွက်များအတွင်းရှိ ရေတွင်း၊ ရေကန်၊ ရေစည်တွေကို ဖုံး၊ သွန်၊ လဲ၊ စစ် ဆောင်ရွက်ပေးခြင်း၊ အဘိတ်ဆေးခပ်ခြင်းများကိုလည်း ကြက်ခြေနီတွေက သွားရောက်ဆောင်ရွက်ပေးခဲ့ကြတယ်လို သိရပါတယ်၊၊
ymg/tthl
#Yangon_Media_Group
#LocalNews
Published - 6 May 2022
ရန်ကုန်တိုင်းအတွင်းမှာ သက်ကြီးဆရာဝန်(၄၅၀)ဦး ရှိပြီးသူတို့အတွက် ငွေရေးကြေးရေးထောက်ပံ့မှုအစီအစဥ်တွေ ပြန်လည်ဆောင်ရွက်နေပြီဖြစ်တယ်လို့ သက်ကြီးဆရာဝန်များအထောက်အကူပြုအဖွဲ့ထံမှ သိရပါတယ်၊၊
ကိုဗစ်ဖြစ်ပွားမှုတွေကြောင့် သက်ကြီးဆရာဝန်များ အထောက်အကူပြုအဖွဲ့လှုပ်ရှားမှုတွေ ယာယီနားထားရာမှ အခုပြန်လည်ဆောင်ရွက်နေပြီဖြစ်တယ်လို့ ဆိုပါတယ်၊၊
နာမကျန်းဖြစ်တဲ့သက်ကြီးဆရာဝန်တွေ၊ မျက်စိခွဲရတဲ့သက်ကြီးဆရာဝန်တွေနဲ့ ကွယ်လွန်သွားတဲ့သက်ကြီး ဆရာဝန်တွေအတွက် ထောက်ပံ့ကြေးတွေပေးနေတယ်လို့ မြန်မာနိုင်ငံဆရာဝန်အသင်း၊ သက်ကြီးဆရာဝန်များ အထောက်အကူပြုအဖွဲ့၊ ဘဏ္ဌာရေးမှူး ဒေါက်တာကြည်မေသိန်းက YNG ကို ပြောပါတယ်၊၊
"အသက်(၇၀)ကျော်အရွယ် ဆရာဝန်တွေဆိုရင် အန်တီတို့အဖွဲ့ကိုဝင်လို့ရတယ်၊၊ အန်တီတို့မှာမန်ဘာအဖွဲ့ဝင် အားလုံး(၉၀၀)ကျော်ရှိတယ်၊၊ ကွယ်လွန်သွားသူတွေ၊ မန္တလေးကသူတွေ ဖယ်လိုက်ရင် ရန်ကုန်တိုင်းမှာတော့(၄၅၀)လောက်ရှိပါတယ်၊၊ သူတို့ကို ငွေရေးကြေးရေးထောက်ပံ့မှု၊လူမှုရေးထောက်ပံ့မှု၊ သွားရောက်အားပေးပံ့ပိုးမှုတွေ လုပ်ပါတယ်၊၊ medical check upလုပ်ပေးတာတွေ၊ ဆေးပညာဆိုင်ရာဟောပြောပွဲတွေ လုပ်ဆောင်ပေးပါတယ်၊၊
ကိုဗစ်တွေ ဖြစ်တုန်းကတော့ အန်တီတို့ သက်ကြီးဆရာဝန်များ စင်တာပိတ်လိုက်ရတယ်၊၊ အခုအန်တီတို့ ရုံးပြန်ဖွင့်ထားပါတယ်၊၊ ဒါပေမယ့် အရင်လိုငါးရက်မဟုတ်တော့ဘဲ အင်္ဂါနဲ့သောကြာ နေ့ဖွင့်ထားပါတယ်၊၊ နေမကောင်းဖြစ်တဲ့သူ၊ နာမကျန်းဖြစ်တဲ့သူတွေအတွက် အန်တီတို့ ငွေရေးကြေးရေးထောက်ပံ့မှု ပြန်လုပ်နေပါတယ်၊၊
ရောဂါတွေမဖြစ်တော့ရင် အိမ်တိုင်ရာရောက်သွားရောက်အားပေးတွေ့ဆုံမှုတွေ ပြန်လုပ်သွားမှာဖြစ်တယ်"လို့ မြန်မာနိုင်ငံဆရာဝန်အသင်း၊ သက်ကြီးဆရာဝန်များ အထောက်အကူပြုအဖွဲ့၊ ဘဏ္ဌာရေးမှူး ဒေါက်တာကြည်မေသိန်းက YNG ကို ပြောပါတယ်၊၊
ငွေရေးကြေးရေးထောက်ပံ့မှုအနေနဲ့ သက်ကြီးဆရာဝန်တွေနေထိုင်မကောင်းဖြစ်ရင် ဆေးရုံတက်ရရင်ကျပ်နှစ်သိန်း၊ မျက်စိတစ်ဖက်ခွဲရင်တစ်သိန်း၊ နှစ်ဖက်ခွဲရင် နှစ်သိန်း၊ ကွယ်လွန်သွားရင် နာရေးထောက် ပံ့မှုတစ်သိန်းပေးတယ်လို့ ဆိုပါတယ်၊၊
သက်ကြီးဆရာဝန်များ အထောက်အကူပြုအဖွဲ့ကို ၁၉၉၉ခုနှစ်ကတည်းက ဖွဲ့စည်းခဲ့တာဖြစ်ပြီး သက်ကြီးဆရာဝန်တွေ ကျန်းမာရေးနဲ့လူမှုရေး ထောက်ပံ့မှုတွေဆောင်ရွက်ပေးခဲ့ပြီး ဆေးပညာရပ်ပိုင်းဆိုင်ရာ ဗဟုသုတအတွက် ဟောပြောပွဲတွေလည်း ကျင်းပပေးတာတွေ ဆောင်ရွက်ပေးနေတာဖြစ်ပါတယ်၊၊ ဒီ့အပြင် မြန်မာနိုင်ငံဆရာဝန်အသင်း၊ ဗုဒ္ဓဘာသာအဖွဲ့၊အမျိုးသမီးဆရာဝန်များအဖွဲ့စတဲ့ မိတ်ဖက်အဖွဲ့အစည်းတွေနဲ့လည်း ပူးပေါင်းပြီး ပရဟိတတွေ၊ သက်ကြီးစောင့်ရှောက်မှုတွေကိုလည်း လုပ်ဆောင်နေတယ်လို့သိရပါတယ်၊၊
ymg/tthl
#Yangon_Media_Group
#LocalNews
Published_6 May 2022
ထိုင်းနိုင်ငံ၊ အုဒွန်ဌာနီမြို့တွင်၊ မေလ ၅ ရက် ထိုင်းဒေသစံတော်ချိန် ည ၉ နာရီခွဲအချိန်ခန့်အချိန်က ရထားသံလမ်းပေါ်၌ မြန်မာနိုင်ငံသားတစ်ဦး ရထားကြိတ်ခံရကာ သေဆုံးခဲ့ကြောင်း သိရသည်။
ထိုင်းဒေသတွင်းသတင်းများတွင် ရထားကြိတ်ခံရကာ သေဆုံးသူမှာ အသက် ၂၈ နှစ်အရွယ် မြန်မာနိုင်ငံသား ကိုမြဝင်းဆိုသူဖြစ်ပြီး ရထားသံလမ်းပေါ်တွင် အိပ်၍ ဖုန်းပြောနေကြောင်း ရေးသားထားကြသည်။
ယင်း ဖြစ်စဉ်တွင် အုဒွန်ဌာနီရဲတပ်ဖွဲ့မှ အခင်းဖြစ်ပွားခဲ့သော နေရာသို့ သွားရောက်စစ်ဆေးခဲ့ခြင်းဖြစ်ပြီး ရထားကြိတ်ခံရကာ သေဆုံးခြင်းဖြစ်ကြောင်း အတည်ပြုထားသည်ဟုဆိုသည်။
သေဆုံးသူ ကိုမြဝင်းသည် ထိုင်းနိုင်ငံ အုဒွန်ဌာနီမြို့တွင် နေထိုင်ပြီး ကျပမ်းအလုပ်လုပ်ကိုင်နေသူ တစ်ဦးဖြစ်ကာ နေ့စဉ်အလုပ်သိမ်းပြီးနောက်ပိုင်း နခွန်လာချစီမာ - အုဒွန်ဌာနီမြို့သို ပြေးဆွဲသော ရထားသံလမ်းပေါ်တွင် အရက်သောက်၍ ဖုန်းပြောလေ့ရှိကြောင်း ကိုမြဝင်းရဲ့ လုပ်ဖော်ကိုင်ဖက်ဖြစ်သူတစ်ဦးက ပြောသည့်စကားကို ကိုးကား၍ သတင်းများတွင် ဖော်ပြထားကြသည်။
"ရထားသံလမ်းပေါ်မှာ အိပ်ပြီးဖုန်းပြောနေတာဘယ်သူမြင်လို့လဲ။ ဖုန်းနဲ့တွေ့တာနဲ့ဖုန်းပြောနေတယ်လို့ စွပ်စွဲလို့ရလား။ သတ်ပြီးလာထားသွားရင်ကော။ သေချာ စစ်ဆေးဖို့လိုတယ်"ဟု ထိုင်းနိုင်ငံတွင် နေထိုင်သော မြန်မာနိုင်ငံသားတစ်ဦးက မှတ်ချက်ပြုသည်။
ယခုအခါ အုဒွန်ဌာနီရဲတပ်ဖွဲ့က သေဆုံးသူ ကိုမြဝင်း၏ ရုပ်အလောင်းကို အုဒွန်ဌာနီဆေးရုံကြီးသို့ ပို့ဆောင်ထားပြီး၊ အလုပ်အကိုင်ရှာဖွေပေးရေးရုံးသို့ ဆက်သွယ်သတင်းပေးပို့၍ သေဆုံးသူ၏ ဆွေမျိုးသားချင်းများနှင့် အဆက်အသွယ်ရရန် ကြိုးစားနေကြောင်းနှင့် အကူအညီပေးနိုင်ရန် လုပ်ဆောင်နေကြောင်း လည်းသိရသည်။
ymg/mt
#Yangon_Media_Group
#DailyNews
Published - 6 May 2022
၁။ ကျောက်မဲမြို့ရှိ စစ်ဘေးရှောင်များ နေရပ်ပြန်ကြပြီ မြို့ပေါ်တွင် စစ်ရှောင်စခန်း
နှစ်ခုသာကျန်ရှိ။
၂။ ကမ္ဘာ့ကြက်ခြေနီနေ့တွင် စွမ်းစွမ်းတမံတာဝန်ထမ်းဆောင်ခဲ့သည့်ကြက်ခြေနီများ၊ သက်ကြီးကြက်ခြေနီများကို ဂုဏ်ပြုချီးမြှင့်မည်။
၃။ နေ့စဉ်မိုးလေဝသသတင်း။
၄။ ဟောလိဝုဒ်နာမည်ကျော်အော်ဒရေဟပ်ဘန်း၏ ကြေးရုပ်တု ဘရူဆဲလ်မြို့တွင်ဖွင့်လှစ်ထားရှိ...အစရှိတဲ့သတင်းတွေကို တင်ဆက်ပေးသွားမှာ ဖြစ်ပါတယ်။
#Yangon_Media_Group
#LocalNews
Published - 6 May 2022
လေပြင်းတိုက်ခတ်မှုကြောင့် မုံရွာမြို့ကျောက္ကာလမ်းရှိ သစ်ပင်ကြီးတစ်ပင် ပြိုလဲကျမှု ဖြစ်ပွားခဲ့တယ်လို့ သိရပါတယ်။
အဆိုပါ ဖြစ်စဥ်ဟာ ဒီကနေ့ မေလ ၆ ရက်၊ နံနက်အစောပိုင်းအချိန်က စစ်ကိုင်းတိုင်းဒေသကြီး၊ မုံရွာမြို့၊ ဘုန်းစိုးရပ်ကွက်၊ ကျောက္ကာလမ်းပေါ်တွင် ဖြစ်ပွားခဲ့ခြင်းဖြစ်ပါတယ်။
သစ်ပင်ပြိုလဲကျမှုကို မုံရွာခရိုင်မီးသတ်စခန်းမှ သန္ဓေမီးသတ်တပ်ဖွဲ့ဝင်များဖြင့် ရှင်းလင်းရေးလုပ်ငန်းများကို သွားရောက်ဆောင်ရွက်ပေးခဲ့ရပြီး ယင်းဖြစ်စဥ်ကြောင့် လူထိခိုက်မှုတော့ မရှိခဲ့ဘူးလို့ မီးသတ်တပ်ဖွဲ့က သတင်းထုတ်ပြန်ထားပါတယ်။
Photo - MFSD
ymg/kg
#Yangon_Media_Group
#LocalNews
Published - 6 May 2022
သထုံခရိုင်၊ ဘီလင်းမြို့နယ်အတွင်း ဒေသခံစစ်ဘေးရှောင်ဦးရေဟာ သောင်းဂဏန်း အထိ
မြင့်တက်လာပြီး ၄င်းတို့အတွက် နေရာထိုင်ခင်း၊ စားနပ်ရိက္ခာ၊ ဆေးဝါးနှင့်၊ သောက်သုံးရေ အခက်အခဲများရှိနေကြောင်း သထုံခရိုင် စစ်ဘေးရှောင် ကူညီစောင့်ရှောက်ရေး ကော်မတီထံမှ သိရပါတယ်။
ပြီးခဲ့တဲ့ ရက်ပိုင်းအတွင်း ဘီးလင်းမြို့နယ်၊ လေးကေကျေးရွာအတွင်း ဖြစ်ပွားခဲ့တဲ့ တိုက်ပွဲများအပြီး နောက်ပိုင်း၌ ဒေသခံစစ်ဘေးရှောင်ဦးရေဟာ တစ်သောင်း(၁၀၀၀၀)ကျော်အထိ ရှိလာခဲ့တာဖြစ်တယ်လို့ ဆိုပါတယ်။
လက်ရှိတွင် စစ်ဘေးရှောင်များအတွက် နေရာထိုင်ခင်းနှင့် အခြေခံစားသောက်ကုန်ဖြစ်တဲ့ ဆန်၊ ဆီ၊ ဆား စတာတွေ အရေးပေါ်လိုအပ်နေပြီး သောက်သုံးရေနဲ့ အိမ်သာအခက်အခဲလည်းရှိ နေတာဖြစ်ပါတယ်။
စစ်ဘေးရှောင်ဦးရေများပြားပြီး ရေလိုအပ်ချက်များကြောင့် တစ်ချို့သော ဒေသခံပြည်သူများဟာ ဝမ်းပျက်၊ ဝမ်းလျှောရောဂါများကို ခံစားနေကြရတယ်လို့လည်း စစ်ဘေးရှောင်အရေးကူညီ ဆောင်ရွက်သူများက ပြောပါတယ်။
ဒါ့အပြင် လက်ရှိအခြေအနေတွင် စစ်ဘေးရှောင် ကူညီစောင့်ရှောက်ရေးကော်မတီမှ ရပ်ဝေး၊ ရပ်နီးမှ အလှူရှင်များနှင့် ချိတ်ဆက်ကာ ဒေသခံ စစ်ဘေးရှောင် ပြည်သူများအား ထောက်ပံ့စောင့်ရှောက်မှုများရှိသော်လည်း စစ်ဘေးရှောင်ဦးရေ ယခင်ကထက် ပိုများလာသဖြင့် ဆေးဝါး၊ သောက်သုံးရေနှင့် အခြေခံ စားသောက်ကုန်များ လိုအပ်နေသေးတာဖြစ်တယ်လို့ ဆိုပါတယ်။
အဆိုပါ သထုံခရိုင်အတွင်းရှိ သထုံ၊ ဘားအံ၊ ဘီးလင်းနှင့် ကျိုက်ထို မြို့နယ်(၄)ခုစလုံးတွင် လက်ရှိမှာ နှစ်ဖက်တပ်တွေရဲ့စစ်ရေး အခြေအနေဟာ တင်းမာလျှက်ရှိ နေတာဖြစ်တယ်လို့လည်း သိရပါတယ်။
Photo - CJ
ymg/kg
#Yangon_Media_Group
Page 1643 of 1810
